ଭୁବନେଶ୍ୱର: ରାଜଧାନୀରେ ଚାଲିଥିବା ଅନଲାଇନ୍ କ୍ୟାବ୍ ଡ୍ରାଇଭରଙ୍କୁ ଧର୍ମଘଟ ମଧ୍ୟରେ ଯାତ୍ରୀଙ୍କ ସମସ୍ୟାକୁ ଦୃଷ୍ଟିରେ ରଖି ଏକ ବଡ଼ ପଦକ୍ଷେପ ନେଇଛି ଭୁବନେଶ୍ୱର-କଟକ କମିଶନରେଟ୍ ପୋଲିସ। ବିମାନବନ୍ଦରରେ ଓହ୍ଲାଉଥିବା ଯାତ୍ରୀମାନଙ୍କୁ ବିଶେଷ କରି ସ୍ୱାସ୍ଥ୍ୟଗତ ଜରୁରୀକାଳୀନ ପରିସ୍ଥିତିରେ ଡାକ୍ତରଖାନାରେ ପହଞ୍ଚାଇବା ପାଇଁ ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦରରେ ପିସିଆର (PCR) ଭ୍ୟାନ୍ ମୁତୟନ କରାଯାଇଛି।

ଆପ୍-ଭିତ୍ତିକ କ୍ୟାବ୍ ସେବା ବ୍ୟାହତ ହୋଇଥିବାରୁ ଅନେକ ଯାତ୍ରୀ ଯାତାୟାତରେ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଏଭଳି ସ୍ଥିତିରେ କୌଣସି ବି ଯାତ୍ରୀ ଯେପରି ଜରୁରୀ ସ୍ୱାସ୍ଥ୍ୟ ସେବାରୁ ବଞ୍ଚିତ ନହୁଅନ୍ତି, ସେଥିପାଇଁ ପୋଲିସ ପକ୍ଷରୁ ଏହି ବିଶେଷ ବ୍ୟବସ୍ଥା କରାଯାଇଛି। ଯଦି କୌଣସି ଯାତ୍ରୀଙ୍କର ଜରୁରୀକାଳୀନ ଚିକିତ୍ସା ଆବଶ୍ୟକ ହୁଏ, ତେବେ ସେମାନଙ୍କୁ ତୁରନ୍ତ ଡାକ୍ତରଖାନାରେ ପହଞ୍ଚାଇବାର ଦାୟିତ୍ୱ ନେବେ ବିମାନବନ୍ଦରରେ ମୁତୟନ ଥିବା ପିସିଆର ଗାଡ଼ି।

ଏହି ପଦକ୍ଷେପ ସମ୍ପର୍କରେ ସୂଚନା ଦେଇ କମିଶନରେଟ୍ ପୋଲିସ ତାର ଅଫିସିଆଲ୍ ଏକ୍ସ (X) ଆକାଉଣ୍ଟରେ ଉଲ୍ଲେଖ କରିଛି ଯେ, ସାଧାରଣ ଜନତାଙ୍କ ସେବା ପାଇଁ ପୋଲିସ ସର୍ବଦା ପ୍ରତିବଦ୍ଧ। ପୋଲିସ ନିଜର ବାର୍ତ୍ତା ଦେଇ କହିଛି: "ଆମେ ଆପଣଙ୍କ ସହିତ ଅଛୁ। ସବୁବେଳେ, ପ୍ରତିଟି ସମୟରେ, ସବୁଠାରେ"। ଏହି ବ୍ୟବସ୍ଥା ଦ୍ୱାରା, ସ୍ୱାସ୍ଥ୍ୟ ସମସ୍ୟାରେ ପଡ଼ିଥିବା କୌଣସି ଯାତ୍ରୀ ବିମାନବନ୍ଦରରେ ଅଟକି ନରହି ଠିକ୍ ସମୟରେ ଚିକିତ୍ସା ସୁବିଧା ପାଇପାରିବେ। ଆବଶ୍ୟକ ଥିବା ଯାତ୍ରୀମାନେ ସିଧାସଳଖ ପିସିଆର ଗାଡ଼ି ନିକଟକୁ ଯାଇ ସାହାଯ୍ୟ ମାଗିବାକୁ ପୋଲିସ ପକ୍ଷରୁ ପରାମର୍ଶ ଦିଆଯାଇଛି।

ଭୁବନେଶ୍ୱର: ଓଡ଼ିଶା ଅନଲାଇନ୍ ଡ୍ରାଇଭର୍ସ ୟୁନାଇଟେଡ୍ ଫୋରମ୍ ପକ୍ଷରୁ ରାଜ୍ୟବ୍ୟାପୀ ୧୨ ଘଣ୍ଟିଆ ଧର୍ମଘଟ । ୭ ଦଫା ଦାବି ନେଇ ଅନଲାଇନ୍ ଆପ୍ ଡ୍ରାଇଭରଙ୍କ ‘ଜିରୋ ସପ୍ଲାଇ’ ଆନ୍ଦୋଳନ । ଡ୍ରାଇଭର ସଂଘ ପକ୍ଷରୁ ସରକାର ଓ କମ୍ପାନୀଗୁଡ଼ିକ ଆଗରେ ୭ଟି ମୁଖ୍ୟ ଦାବି ରଖାଯାଇଛି । ଅନଲାଇନ୍ ଟ୍ୟାକ୍ସି କମ୍ପାନୀଗୁଡ଼ିକ ଉପରେ କଠୋର ନିୟମ ଲାଗୁ କରିବା ଏବଂ ଡ୍ରାଇଭରମାନଙ୍କ ପ୍ରତି ଉଚିତ ବ୍ୟବହାର ଦାବିରେ ଏହି ବନ୍ଦ ଡାକରା ଦିଆଯାଇଛି।

ରାଜ୍ୟର ପ୍ରାୟ ୨୧ଟି ସଂଗଠନ ଏହି ଆନ୍ଦୋଳନକୁ ସମର୍ଥନ ଜଣାଇଛନ୍ତି। ଫଳରେ କଟକ, ଭୁବନେଶ୍ୱର ସମେତ ରାଜ୍ୟର ବିଭିନ୍ନ ଜିଲ୍ଲାରେ ଗମନାଗମନ ସେବା ବହୁଳ ଭାବରେ ପ୍ରଭାବିତ ହୋଇଥିବା ସୂଚନା । ବିଶେଷ କରି ଦୈନନ୍ଦିନ ଯାତାୟାତ ପାଇଁ ଆପ୍-ଭିତ୍ତିକ କ୍ୟାବ୍ ଉପରେ ନିର୍ଭର କରୁଥିବା ହଜାର ହଜାର ଯାତ୍ରୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖାଦେଇଛି ।

ଫୋରମ୍ ପକ୍ଷରୁ ସରକାରଙ୍କୁ ଅନୁରୋଧ କରାଯାଇଛି ଯେ, ରାଜ୍ୟ ସରକାର ଓ କମ୍ପାନୀ ମିଳିତ ଭାବେ ଏକ ନିର୍ଦ୍ଦିଷ୍ଟ ଭଡ଼ା ଧାର୍ଯ୍ୟ କରନ୍ତୁ। ଗ୍ରାହକମାନଙ୍କୁ ଦିଆଯାଉଥିବା ରିହାତି (ଡିସକାଉଣ୍ଟ)ର ଖର୍ଚ୍ଚ କମ୍ପାନୀ ବହନ କରିବା ଉଚିତ୍ ଏବଂ ଏହା ଡ୍ରାଇଭରମାନଙ୍କ ରୋଜଗାରରୁ କଟାଯିବା ଅନୁଚିତ ବୋଲି ଡ୍ରାଇଭରମାନେ ଦୃଢ଼ ଦାବି କରିଛନ୍ତି।

ଏହା ବ୍ୟତୀତ ବିନା ତଦନ୍ତରେ ବ୍ଲକ୍ ହୋଇଥିବା ଡ୍ରାଇଭରମାନଙ୍କ ଆକାଉଣ୍ଟକୁ ପୁନର୍ବାର ସଚଳ କରିବା ଏବଂ ମନଇଚ୍ଛା ଜୋରିମାନା ଆଦାୟ ବନ୍ଦ କରିବାକୁ ଦାବି କରାଯାଇଛି। ଟ୍ରାଫିକ୍ ଜାମ୍ କିମ୍ବା ଗ୍ରାହକଙ୍କ ବିଳମ୍ବ ଯୋଗୁଁ ହେଉଥିବା ସମୟ ନଷ୍ଟ ପାଇଁ ୱେଟିଂ ଚାର୍ଜ ପ୍ରଦାନ କରିବା ସହ ଯାତ୍ରା ଆରମ୍ଭ ହେବା ପରେ ଯଦି ରାଇଡ୍ ବାତିଲ୍ ହୁଏ, ତେବେ ବାତିଲ୍ ଫି' ସମ୍ପୂର୍ଣ୍ଣ ଭାବେ ଡ୍ରାଇଭରଙ୍କୁ ଦିଆଯାଉ ବୋଲି ଆନ୍ଦୋଳନକାରୀମାନେ ଦାବି କରିଛନ୍ତି।

ଓଡ଼ିଶାରେ ସମସ୍ତ ଆପ୍-ଭିତ୍ତିକ ଅପରେଟରଙ୍କ ଏକ ସ୍ଥାୟୀ କାର୍ଯ୍ୟାଳୟ ରହିବା ବାଧ୍ୟତାମୂଳକ କରିବା ସହ ଚାହିଦା ଓ ଯୋଗାଣରେ ସନ୍ତୁଳନ ରକ୍ଷା କରିବା ପାଇଁ ନୂତନ ଗାଡ଼ି ସଂଯୋଗ ଉପରେ କଟକଣା ଲଗାଇବା ପାଇଁ ମଧ୍ୟ ଫୋରମ୍ ଦାବି ରଖିଛି।

ଏହି ଧର୍ମଘଟ ମାଧ୍ୟମରେ ରାଜ୍ୟ ସରକାର ଏବଂ ଅନଲାଇନ୍ ଟ୍ୟାକ୍ସି କମ୍ପାନୀଗୁଡ଼ିକ ଉପରେ ଚାପ ପକାଇବାକୁ ଉଦ୍ୟମ କରାଯାଉଛି। ଦୀର୍ଘ ଦିନ ଧରି ଲାଗି ରହିଥିବା ଏହିସବୁ ସମସ୍ୟାର ତୁରନ୍ତ ସମାଧାନ ନହେଲେ ଆଗାମୀ ଦିନରେ ଆନ୍ଦୋଳନ ଆହୁରି ତୀବ୍ର ହେବ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି।