ଭାରତୀୟ ଦଳର ଷ୍ଟାର୍ ଅଲରାଉଣ୍ଡର ତଥା ମୁମ୍ବାଇ ଇଣ୍ଡିଆନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପଡ଼ିଆ ଭିତରେ ନିଜର ଦମଦାର ଖେଳ ପାଇଁ ଯେତିକି ପରିଚିତ, ଏବେ ପଡ଼ିଆ ବାହାରେ ନିଜର ଏକ ମହାନ କାର୍ଯ୍ୟ ପାଇଁ ସେତିକି ଚର୍ଚ୍ଚାରେ ଅଛନ୍ତି। ନିକଟରେ ସେ ମୁମ୍ବାଇର ୱାଙ୍ଖେଡେ ଷ୍ଟାଡିୟମ୍ର ଗ୍ରାଉଣ୍ଡଷ୍ଟାଫଙ୍କୁ ପୁରସ୍କୃତ କରି ସମସ୍ତଙ୍କ ହୃଦୟ ଜିଣିଛନ୍ତି। ନିଜର ଦିଆଯାଇଥିବା ପ୍ରତିଶ୍ରୁତି ରଖି ହାର୍ଦ୍ଦିକ ପ୍ରମାଣିତ କରିଛନ୍ତି ଯେ ଜଣେ ଖେଳାଳିଙ୍କ ସଫଳତା ପଛରେ ଥିବା ପରଦା ଆଢ଼ୁଆଳର ହିରୋମାନଙ୍କୁ ସେ କେବେ ଭୁଲନ୍ତି ନାହିଁ।

କାହିଁକି ପୁରସ୍କୃତ କଲେ ହାର୍ଦ୍ଦିକ?

୨୦୨୬ ଟି-୨୦ ବିଶ୍ୱକପ୍ ପୂର୍ବରୁ ନିଜକୁ ପ୍ରସ୍ତୁତ କରିବା ପାଇଁ ହାର୍ଦ୍ଦିକ ୱାଙ୍ଖେଡେ ଷ୍ଟାଡିୟମରେ କଠିନ ଅଭ୍ୟାସ କରୁଥିଲେ। ସେ ପ୍ରାୟତଃ ବିଳମ୍ବିତ ରାତି ଏବଂ ମଧ୍ୟରାତ୍ରି ପର୍ଯ୍ୟନ୍ତ ନେଟ୍ସରେ ଝାଳ ବୁହାଉଥିଲେ। ଏହି ସମୟରେ ଷ୍ଟାଡିୟମର ଗ୍ରାଉଣ୍ଡଷ୍ଟାଫମାନେ ତାଙ୍କୁ ସମ୍ପୂର୍ଣ୍ଣ ସହଯୋଗ କରିଥିଲେ। ପିଚ୍ ପ୍ରସ୍ତୁତ କରିବାଠାରୁ ଆରମ୍ଭ କରି ଲାଇଟ୍ ଏବଂ ଅନ୍ୟାନ୍ୟ ସୁବିଧା ଯୋଗାଇଦେବା ପାଇଁ ସେମାନେ ନିଜ ଡ୍ୟୁଟି ସମୟ ପରେ ମଧ୍ୟ କାମ କରୁଥିଲେ। ସେମାନଙ୍କର ଏହି ନିଷ୍ଠା ଏବଂ କଠିନ ପରିଶ୍ରମକୁ ଦେଖି ହାର୍ଦ୍ଦିକ ପ୍ରତିଶ୍ରୁତି ଦେଇଥିଲେ ଯେ ବିଶ୍ୱକପ୍ ପରେ ସେ ସେମାନଙ୍କୁ ନିଶ୍ଚିତ ରୂପେ ପୁରସ୍କୃତ କରିବେ।

ପ୍ରତିଶ୍ରୁତି ରକ୍ଷା କଲେ ଅଧିନାୟକ

ନିଜ କଥା ରଖି ଗୁରୁବାର ଦିନ ହାର୍ଦ୍ଦିକ ପାଣ୍ଡ୍ୟା ୱାଙ୍ଖେଡେ ଷ୍ଟାଡିୟମରେ ପହଞ୍ଚି ମୁମ୍ବାଇ କ୍ରିକେଟ୍ ଆସୋସିଏସନ୍ (MCA) ର ୧୦ ରୁ ୧୧ ଜଣ ଗ୍ରାଉଣ୍ଡଷ୍ଟାଫଙ୍କୁ ଭେଟିଥିଲେ। ଗଣମାଧ୍ୟମ ରିପୋର୍ଟ ଅନୁଯାୟୀ, ସେ ପ୍ରତ୍ୟେକ କର୍ମଚାରୀଙ୍କୁ ୧୦,୦୦୦ ଟଙ୍କାର ଚେକ୍ ଏବଂ କିଛି ସ୍ୱତନ୍ତ୍ର ଉପହାର ପ୍ରଦାନ କରିଥିଲେ। କେବଳ ଆର୍ଥିକ ପୁରସ୍କାର ନୁହେଁ, ବରଂ ସେ ପ୍ରତ୍ୟେକ କର୍ମଚାରୀଙ୍କ ସହ ବ୍ୟକ୍ତିଗତ ଭାବେ କଥା ହୋଇ ସେମାନଙ୍କର ଅବଦାନକୁ ପ୍ରଶଂସା କରିଥିଲେ। ଏହି ସମୟର ଫଟୋ ବର୍ତ୍ତମାନ ସୋସିଆଲ୍ ମିଡିଆରେ ଖୁବ୍ ଭାଇରାଲ୍ ହେବାରେ ଲାଗିଛି।

ଆଗାମୀ ଆଇପିଏଲ୍ ପ୍ରସ୍ତୁତି

ସୂଚନାଯୋଗ୍ୟ ଯେ, ଭାରତକୁ ଟି-୨୦ ବିଶ୍ୱକପ୍ ୨୦୨୬ ଚାମ୍ପିଅନ୍ କରାଇବାରେ ହାର୍ଦ୍ଦିକଙ୍କର ଏକ ପ୍ରମୁଖ ଭୂମିକା ରହିଥିଲା। ବର୍ତ୍ତମାନ ସେ ମୁମ୍ବାଇ ଇଣ୍ଡିଆନ୍ସ ର ଅଧିନାୟକ ଭାବେ ଆଗାମୀ ଆଇପିଏଲ୍ ସିଜିନ୍ ପାଇଁ ଜୋରଦାର ପ୍ରସ୍ତୁତି ଚଳାଇଛନ୍ତି। ତାଙ୍କର ଏହି ବିନମ୍ର ସ୍ୱଭାବ ଏବଂ କୃତଜ୍ଞତା ଜ୍ଞାପନ କରିବାର ଶୈଳୀ କ୍ରିକେଟ୍ ପ୍ରଶଂସକଙ୍କୁ ବେଶ୍ ଆକର୍ଷିତ କରିଛି।

ମୁମ୍ଵାଇ: ଆଜି T-20 ବିଶ୍ୱକପର ଦ୍ୱିତୀୟ ସେମି ପାଇନାଲ ମ୍ୟାଚ୍ । ଭାରତ-ଇଂଲଣ୍ଡ ମଧ୍ୟରେ ହେବ ମହା ମୁକାବିଲା । ମୁମ୍ଵାଇର ୱାଙ୍ଖଡ଼େ ଷ୍ଟାଡିୟମରେ ଫାଇନାଲ ଟିକେଟ ପାଇଁ ମୁହାଁମୁହିଁ ହେବେ ଦୁଇ ପୂର୍ବତନ ଚାମ୍ପିୟନ ଭାରତ ଓ ଇଂଲଣ୍ଡ। ଉଭୟ ଦଳରେ ଅଭିଜ୍ଞ ଖେଳାଳି ଥିବାରୁ ହୋଇପାରେ କଡା ଟକ୍କର । T-20 ବିଶ୍ଵକପ୍ ଇତିହାସରେ ଷଷ୍ଠ ଥର ସେମିଫାଇନାଲରେ ପ୍ରବେଶ କରିଛି ଟିମ୍ ଇଣ୍ଡିଆ । ତେବେ ଆଜିର ମ୍ୟାଚର ଓପନର୍ ଯୋଡ଼ି କିଏ ହେବ, ତାକୁ ନେଇ ଦ୍ଵନ୍ଦ୍ଵ ଲାଗି ରହିଛି। ସଂଜୁ ସାମସନଙ୍କ ସହିତ ଅଭିଷେକ ଶର୍ମା ଓପନ କରିବା ନେଇ ସନ୍ଦେହ ରହିଚି। ଏହି ମ୍ୟାଚରେ ବ୍ଯାଟିଂ ଅର୍ଡର ପରିବର୍ତ୍ତନ ନେଇ ଆକଳନ କରାଯାଉଛି। ଅନ୍ଯ ପକ୍ଷରେ ଇଂଲଣ୍ଡ ଦଳ ବେଶ ଭଲ ଫର୍ମରେ ଥିବାରୁ ମୁକାବିଲା ଜୋରଦାର ହେବ। ଏହି ଦୁଇ ଟିମ୍ ମଧ୍ୟରୁ ଯିଏ ଆଜି ଜିତିବ, ସେ ଟାଇଟଲ ପାଇଁ ନ୍ଯୁଜିଲାଣ୍ଡ ସହିତ ଖେଳିବ। ୮ ତାରିଖରେ ଅହମଦାବାଦ ନରେନ୍ଦ୍ର ମୋଦି ଷ୍ଟାଡିୟମରେ ଫାଇନାଲ ମ୍ୟାଚ୍ ଖେଳାଯିବ। 

ସୂର୍ଯ୍ୟଙ୍କ ବ୍ୟାଟିଂ ନା ଆଦିଲ ରସିଦ୍‌ଙ୍କ ଗୁଗଲି, ଆଜି କାହାର ରହିବ ପଲା ଭାରି? ଲଗାତାର ତୃତୀୟ ଥର ପାଇଁ ବିଶ୍ୱକପ୍‌ ସେମିଫାଇନାଲରେ ଭାରତ ଓ ଇଂଲଣ୍ଡ ମୁହାଁମୁହିଁ ହେଉଛନ୍ତି। ପୂର୍ବରୁ ୨୦୨୨ ଓ ୨୦୨୪ରେ ଦୁଇ ଦଳ ୧-୧ ଜିତି ସମାନ ସ୍ଥିତିରେ ଅଛନ୍ତି। ଆଜି ଯିଏ ଜିତିବ, ସିଏ ସିଧା ଫାଇନାଲ୍‌ ଟିକେଟ୍‌ କାଟିବ। ଭାରତ ପାଇଁ ଅଧିନାୟକ ସୂର୍ଯ୍ୟକୁମାର ଯାଦବ ଜବରଦସ୍ତ ଫର୍ମରେ ଅଛନ୍ତି, ସେ ଚଳିତ ବିଶ୍ୱକପ୍‌ରେ ୨୩୧ ରନ୍‌ ସଂଗ୍ରହ କରିଛନ୍ତି। ବୋଲିଂରେ ବରୁଣ ଚକ୍ରବର୍ତୀଙ୍କ ମାୟାଜାଲ ଇଂଲଣ୍ଡ ପାଇଁ ବିପଦ ସାଜିପାରେ। ଅନ୍ୟପଟେ ଇଂଲଣ୍ଡର ହ୍ୟାରି ବ୍ରୁକ୍‌ ଏବଂ ସ୍ପିନର ଆଦିଲ ରସିଦ୍‌ ମଧ୍ୟ ଭାରତ ପାଇଁ ବଡ଼ ଚ୍ୟାଲେଞ୍ଜ ହେବେ।

ୱାଙ୍ଖଡେର ପିଚ୍‌ ସବୁବେଳେ ବ୍ୟାଟରଙ୍କୁ ସହାୟକ ହୋଇଥାଏ। ଫଳରେ ଏଠାରେ ହାଇ-ସ୍କୋରିଂ ମ୍ୟାଚ୍‌ ଦେଖିବାକୁ ମିଳେ। ଯଦିଓ ଟସ୍‌ ଜିତିବା ଦଳ ପ୍ରଥମେ ବୋଲିଂ କରିବାକୁ ପସନ୍ଦ କରିବ, କିନ୍ତୁ ଏହି ମୈଦାନରେ ପ୍ରଥମେ ବ୍ୟାଟିଂ ଏବଂ ଚେଜ୍‌ କରିବା ଦଳର ଜିତିବା ହାର ୫୦-୫୦ ରହିଛି। ଭାରତ ଏଠାରେ ୭ଟି ମ୍ୟାଚ୍‌ରୁ ୫ଟି ଜିତି ବେଶ୍‌ ଆତ୍ମବିଶ୍ୱାସରେ ଅଛି। ମୁମ୍ବାଇରେ ବର୍ଷାର ସମ୍ଭାବନା ନାହିଁ, ତଥାପି ଆଇସିସି ଏକ ‘ରିଜର୍ଭ ଡେ’ ରଖିଛି। କିନ୍ତୁ ଯଦି କୌଣସି କାରଣରୁ ମ୍ୟାଚ୍‌ ଆଦୌ ହୋଇନପାରେ, ତେବେ ଭାରତ ପାଇଁ ଖରାପ ଖବର ହେବ। ନିୟମ ଅନୁସାରେ, ସୁପର-୮ରେ ନିଜ ଗ୍ରୁପ୍‌ର ଶୀର୍ଷରେ ଥିବାରୁ ଇଂଲଣ୍ଡ ସିଧା ଫାଇନାଲ୍‌ ପହଂଚିଯିବ ଏବଂ ଭାରତ ବିଶ୍ୱକପ୍‌ରୁ ବିଦାୟ ନେବ। 

ଚେନ୍ନଇ: ଆଜି ଭାରତ-ଜିମ୍ବାୱେ ମହାଲଢ଼େଇ । ଚଳିତ ଆଇସିସି ଟି-୨୦ ବିଶ୍ୱକପ୍‌ର ସୁପର-୮ ପର୍ଯ୍ୟାୟରେ ଏକ ଗୁରୁତ୍ୱପୂର୍ଣ୍ଣ ମ୍ୟାଚରେ ଆଜି ଜିମ୍ବାୱେକୁ ଭେଟିବ ଆୟୋଜକ ଭାରତ। ସ୍ଥାନୀୟ ଏମ୍‌ ଚିଦାମ୍ବରମ ଷ୍ଟାଡିୟମରେ ରାତି ୭ଟାରେ ଗ୍ରୁପ୍‌-୧’ର ଏହି ଗୁରୁତ୍ୱପୂର୍ଣ୍ଣ ମୁକାବିଲା ଅନୁଷ୍ଠିତ ହେବ। ଭାରତ ଜିତିଲେ ସେମିଫାଇନାଲ ଆଶା ନ ହେଲେ ବିଦା । ଉଭୟ ଭାରତ ଓ ଜିମ୍ବାୱେ ସୁପର୍‌-୮ ପର୍ଯ୍ୟାୟରେ ନିଜ ନିଜର ପ୍ରଥମ ମ୍ୟାଚରେ ପରାଜୟବରଣ କରିଛନ୍ତି। ଭାରତ ୭୬ ରନର ବଡ଼ ବ୍ୟବଧାନରେ ଦକ୍ଷିଣ ଆଫ୍ରିକା ନିକଟରୁ ହାରିଥିଲା। ସେହିଭଳି ଜିମ୍ବାୱେ ମଧ୍ୟ ୧୦୭ ରନରେ ୱେଷ୍ଟଇଣ୍ଡିଜ ନିକଟରୁ ଶୋଚନୀୟ ପରାଜୟବରଣ କରିଥିଲା। ତେଣୁ ସେମିଫାଇନାଲ ଦୌଡ଼ରେ ତିଷ୍ଠି ରହିବାକୁ ହେଲେ ଉଭୟ ଦଳକୁ ଏହି ମ୍ୟାଚରେ ଜିତିବା ନିହାତି ଜରୁରୀ ହୋଇପଡ଼ିଛି।

ଟାଇଟଲ୍‌ ବଜାୟ ରଖିବାକୁ ହେଲେ ସୂର୍ଯ୍ୟକୁମାର ଯାଦବଙ୍କ ନେତୃତ୍ୱାଧୀନ ଡିଫେଣ୍ଡିଂ ଚାମ୍ପିଅନ ଭାରତକୁ ଏହି ମ୍ୟାଚରେ ବଡ଼ ବ୍ୟବଧାନରେ ବିଜୟ ଆବଶ୍ୟକ ହେଉଛି। ଗ୍ରୁପ ପର୍ଯ୍ୟାୟରେ ଭାରତ ଯେଉଁଭଳି ଦମ୍‌ଦାର ପ୍ରଦର୍ଶନ କରିଥିଲା ସୁପର-୮’ରେ କିନ୍ତୁ ସମ୍ପୂର୍ଣ୍ଣ ନିରାଶ କରିଥିଲା। ବିଶେଷ କରି ଭାରତୀୟ ବ୍ୟାଟରମାନେ ଗତ ମ୍ୟାଚରେ ଦକ୍ଷିଣ ଆଫ୍ରିକା ବୋଲିଂ ବାହିନୀ ଆଗରେ ଆତ୍ମସମର୍ପଣ କରିଥିଲେ। ଇନଫର୍ମ ଇଶାନ କିଶାନଙ୍କଠାରୁ ଆରମ୍ଭ କରି ଅଭିଷେକ ଶର୍ମା, ତିଲକ ବର୍ମା, ଅଧିନାୟକ ସୂର୍ଯ୍ୟକୁମାର, ହାର୍ଦ୍ଦିକ ପାଣ୍ଡ୍ୟା, ୱାଶିଂଟନ ସୁନ୍ଦର କେହି ମଧ୍ୟ ବଡ଼ ସ୍କୋର କରିପାରି ନ ଥିଲେ। କ୍ରମାଗତ ଭାବେ ନୈରାଶ୍ୟଜନକ ପ୍ରଦର୍ଶନ କରି ଆସୁଥିବା ଅଭିଷେକଙ୍କୁ ଜିମ୍ବାୱେ ବିପକ୍ଷ ମ୍ୟାଚରେ ବେଞ୍ଚରେ ବସିବାକୁ ପଡ଼ିପାରେ ବୋଲି ରିପୋର୍ଟ ପ୍ରକାଶ ପାଇଛି। ତାଙ୍କ ସ୍ଥାନରେ ଇଶାନ କିଶାନଙ୍କ ସହ ଅଭିଜ୍ଞ ୱିକେଟ୍‌କିପର ବ୍ୟାଟର୍‌ ସଞ୍ଜୁ ସାମସନ ଇନିଂସ ଓପନ୍‌ କରିବାର ସମ୍ଭାବନା ରହିଛି। ସେହିଭଳି କ୍ରମାଗତ ୨ଟି ମ୍ୟାଚରେ ବାହାରେ ବସିଥିବା ଉପ-ଅଧିନାୟକ ଅକ୍ଷର ପଟେଲଙ୍କୁ ମଧ୍ୟ ଏହି ମ୍ୟାଚରେ ସୁଯୋଗ ମିଳିପାରେ। ଅକ୍ଷରଙ୍କୁ ସୁଯୋଗ ନ ଦେବାକୁ ନେଇ ଟିମ୍‌ ମ୍ୟାନେଜମେଣ୍ଟର ନିଷ୍ପତ୍ତିକୁ ଅନେକ ପୂର୍ବତନ କ୍ରିକେଟର କଡ଼ା ନିନ୍ଦା କରିଥିଲେ। ତେଣୁ ଅକ୍ଷର ଚୂଡ଼ାନ୍ତ ଏକାଦଶରେ ସାମିଲ ହେବାର ଯଥେଷ୍ଟ ସମ୍ଭାବନା ରହିଛି। ଭାରତ ନେଟ୍‌ ରନରେଟ୍‌ରେ ବିଯୁକ୍ତ (-୩.୮୦୦) ପଏଣ୍ଟରେ ଥିବାରୁ ଜିମ୍ବାୱେ ବିପକ୍ଷରେ ଉଭୟ ବ୍ୟାଟିଂ ଓ ବୋଲିଂରେ ଭଲ ପ୍ରଦର୍ଶନ କରି ଏଥିରେ ଉନ୍ନତି ଆଣିବାକୁ ଲକ୍ଷ୍ୟ ରଖିଛି।
  
ଅପରପକ୍ଷରେ ଗ୍ରୁପ୍‌ ପର୍ଯ୍ୟାୟରେ ଦୁଇ ପୂର୍ବ ବିଜେତା ଅଷ୍ଟ୍ରେଲିଆ ଓ ଶ୍ରୀଲଙ୍କାକୁ ହରାଇ ବିପର୍ଯ୍ୟୟ ଘଟାଇଥିବା ଜିମ୍ବାୱେ ସୁପର୍‌-୮ରେ ମଧ୍ୟ ଏହି ଧାରାକୁ ଫେରିବା ଲକ୍ଷ୍ୟରେ ରହିଛି। ସିକନ୍ଦର ରାଜା, ବ୍ଲେସିଂ ମୁଜରବାନି, ବ୍ରାଏନ ବେନେଟ୍ଟ, ବ୍ରାଡ୍‌ ଇଭାନ୍ସଙ୍କ ପରି ଦକ୍ଷ ଖେଳାଳିଙ୍କୁ ନେଇ ଗଠିତ ଜିମ୍ବାୱେ ପୁଣି ଏକ ବଡ଼ ବିପର୍ଯ୍ୟୟ ଘଟାଇବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବ।

ରାଉରକେଲା ପୋଲିସକୁ ମିଳିଛି ଏକ ବଡ଼ ସଫଳତା। ଆଇସିସି ଟି-୨୦ ବିଶ୍ୱକପ୍ ସମୟରେ ଚାଲିଥିବା ଏକ ବଡ଼ ଧରଣର ଅନଲାଇନ୍ ବେଟିଂ କାରବାରର ପର୍ଦ୍ଦାଫାସ କରିଛି ପୋଲିସ। ଏହି ଘଟଣାରେ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ନଗଦ ୨୦ ଲକ୍ଷରୁ ଊର୍ଦ୍ଧ୍ବ ଟଙ୍କା ଜବତ କରିବା ସହ ୫ ଜଣଙ୍କୁ ଅଟକ ରଖି ପଚରାଉଚରା କରୁଛି।

ଏକକାଳୀନ ୫ଟି ଥାନା ଅଞ୍ଚଳରେ ଚଢ଼ାଉ

ବିଶ୍ୱସ୍ତ ସୂତ୍ରରୁ ଖବର ପାଇ ବୁଧବାର ଦିନ ରାଉରକେଲା ପୋଲିସର ଏକ ସ୍ୱତନ୍ତ୍ର ଟିମ୍ ସହରର ବିଭିନ୍ନ ସ୍ଥାନରେ ଚଢ଼ାଉ ଆରମ୍ଭ କରିଥିଲା। ପ୍ଲାଣ୍ଟସାଇଟ୍, ଉଦିତନଗର, ବଣ୍ଡମୁଣ୍ଡା, ରଘୁନାଥପାଲି ଏବଂ ବ୍ରାହ୍ମଣୀ ତରଙ୍ଗ ଥାନା ଅଞ୍ଚଳରେ ଏକକାଳୀନ ଏହି ଚଢ଼ାଉ କରାଯାଇଥିଲା। ଏହି ଅପରେସନ୍ ସମୟରେ ବ୍ୟାପକ ପରିମାଣର ଟଙ୍କା ସହ ଅନେକ ଇଲେକ୍ଟ୍ରୋନିକ୍ ଯନ୍ତ୍ରପାତି, ଯଥା କମ୍ପ୍ୟୁଟର ଓ ଲାପଟପ୍ ଜବତ କରାଯାଇଛି।

ହାୱାଲା ଓ ବେନାମୀ ଆକାଉଣ୍ଟର ଲିଙ୍କ୍

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଏହି ବେଟିଂ ରାକେଟ୍‌ର ତାର ହାୱାଲା କାରବାର ସହ ଯୋଡ଼ି ହୋଇଛି। ଅଟକ ଥିବା ବ୍ୟକ୍ତିମାନେ ବେନାମୀ ବ୍ୟାଙ୍କ ଆକାଉଣ୍ଟ ଜରିଆରେ ବେଆଇନ ଅର୍ଥ କାରବାର କରୁଥିଲେ। ଏହି ରାକେଟ୍‌ର ମୁଖ୍ୟ କାର୍ପଟଦାର ଏବଂ ଏଥିରେ ସମ୍ପୃକ୍ତ ଅନ୍ୟ ବ୍ୟକ୍ତିମାନଙ୍କୁ ଧରିବା ପାଇଁ ପୋଲିସ ତଦନ୍ତ ଜାରି ରଖିଛି।

ରାଉରକେଲା ଏସ୍‌ପିଙ୍କ ନିର୍ଦ୍ଦେଶକ୍ରମେ ଚାଲିଥିବା ଏହି ଅପରେସନ୍ ଜରିଆରେ ଆଗକୁ ଆହୁରି ଅନେକ ତଥ୍ୟ ସାମ୍ନାକୁ ଆସିବାର ସମ୍ଭାବନା ରହିଛି। ବର୍ତ୍ତମାନ ସୁଦ୍ଧା ଜବତ ହୋଇଥିବା ଡିଜିଟାଲ୍ ତଥ୍ୟ ଏବଂ ବ୍ୟାଙ୍କ ଆକାଉଣ୍ଟଗୁଡ଼ିକୁ ଯାଞ୍ଚ କରାଯାଉଛି।

ନୂଆଦିଲ୍ଲୀ: ବାଂଲାଦେଶକୁ ଆଉ ଏକ ଝଟକା ଦେଇଛି ICC । ଆନ୍ତର୍ଜାତୀୟ କ୍ରିକେଟ ପରିଷଦ (ICC) ଭାରତରେ ଆୟୋଜିତ ହେବାକୁ ଥିବା ଟି-୨୦ ବିଶ୍ୱକପ ପାଇଁ ବାଂଲାଦେଶୀ ସାମ୍ବାଦିକଙ୍କ ମିଡିଆ ଆକ୍ରେଡିଟେସନ୍ (ଅନୁମୋଦନ) ପ୍ରକ୍ରିୟାରେ ପରିବର୍ତ୍ତନ କରିଛି। ସୁରକ୍ଷା କାରଣ ଦର୍ଶାଇ ବାଂଲାଦେଶ ଦଳ ଟୁର୍ଣ୍ଣାମେଣ୍ଟରୁ ଓହରିଯାଇଥିବା ବେଳେ ଏବେ ସେଠାକାର ସାମ୍ବାଦିକମାନଙ୍କ ପାଇଁ ନୂଆ ନିୟମାବଳୀ ପ୍ରସ୍ତୁତ କରୁଛି ଆଇସିସି ।

ରିପୋର୍ଟ ଅନୁଯାୟୀ, ପ୍ରାୟ ୮୦-୯୦ ଜଣ ବାଂଲାଦେଶୀ ସାମ୍ବାଦିକ ବିଶ୍ୱକପ କଭର୍ କରିବା ପାଇଁ ଆବେଦନ କରିଥିଲେ। ତେବେ ଆଇସିସି ସୂତ୍ରରୁ ମିଳିଥିବା ଖବର ଅନୁଯାୟୀ, ଯଦି ବାଂଲାଦେଶ ଦଳ ଏହି ଇଭେଣ୍ଟରେ ଭାଗ ନେଇଥାନ୍ତା, ତଥାପି ଏତେ ସଂଖ୍ୟକ ସାମ୍ବାଦିକଙ୍କୁ ସୁଯୋଗ ଦେବା ସମ୍ଭବ ହୋଇନଥାନ୍ତା। ଦେଶ ପିଛା କୋଟା ଅନୁଯାୟୀ ସର୍ବାଧିକ ୪୦ ଜଣଙ୍କୁ ଅନୁମତି ମିଳିବାର ବ୍ୟବସ୍ଥା ରହିଛି। ଅନେକ ବାଂଲାଦେଶୀ ସାମ୍ବାଦିକ ଅଭିଯୋଗ କରିଥିଲେ ଯେ ସେମାନଙ୍କର ଆକ୍ରିଡିଟେସନ୍ ଆବେଦନକୁ ଆଇସିସି ଖାରଜ କରିଦେଇଛି। ଏହାର ଜବାବରେ ଆଇସିସି ସୂତ୍ରରୁ ପ୍ରକାଶ ଯେ, ଟୁର୍ଣ୍ଣାମେଣ୍ଟର କାର୍ଯ୍ୟସୂଚୀ ଏବଂ ଅଂଶଗ୍ରହଣକାରୀ ଦଳରେ ପରିବର୍ତ୍ତନ ହୋଇଥିବାରୁ ଏହି ପ୍ରକ୍ରିୟାକୁ ସଂଶୋଧନ କରାଯାଉଛି। 

ଢାକାରେ ବାଂଲାଦେଶ କ୍ରିକେଟ ବୋର୍ଡ (BCB) ର ମିଡିଆ ମ୍ୟାନେଜର ଅମଜାଦ ହୋସେନ୍ କହିଛନ୍ତି ଯେ ସେମାନେ ଏହି ବିଷୟରେ ଆଇସିସି ନିକଟରୁ ସ୍ପଷ୍ଟୀକରଣ ମାଗିଛନ୍ତି। ଅନ୍ୟପଟେ କିଛି ବରିଷ୍ଠ ସାମ୍ବାଦିକ ଅଭିଯୋଗ କରିଛନ୍ତି ଯେ ଦୀର୍ଘ ବର୍ଷ ଧରି ବିଶ୍ୱକପ କଭର କରୁଥିବା ସତ୍ତ୍ୱେ ପ୍ରଥମ ଥର ପାଇଁ ସେମାନଙ୍କ ଆବେଦନ ଖାରଜ ହୋଇଛି।

ବର୍ତ୍ତମାନ ବାଂଲାଦେଶୀ ଗଣମାଧ୍ୟମ ପ୍ରତିନିଧିମାନଙ୍କୁ ନୂତନ ଭାବେ ଆବେଦନ କରିବାକୁ ପଡିବ। ଆଇସିସି ପ୍ରତ୍ୟେକ ଆବେଦନକୁ ବ୍ୟକ୍ତିଗତ ଭାବେ (case-by-case) ଯାଞ୍ଚ କରି ନିଷ୍ପତ୍ତି ନେବ। ସୂଚନାଯୋଗ୍ୟ ଯେ, ବାଂଲାଦେଶ ଓହରିଯିବା ପରେ ସ୍କଟଲ୍ୟାଣ୍ଡକୁ ଟୁର୍ଣ୍ଣାମେଣ୍ଟରେ ସାମିଲ କରାଯାଇଛି ଏବଂ ଆସନ୍ତା ଫେବୃଆରୀ ୭ରୁ ବିଶ୍ୱକପ ଆରମ୍ଭ ହେବ।

ନୂଆଦିଲ୍ଲୀ: ଟି-୨୦ ବିଶ୍ୱକପ୍‌ରୁ ବାଦ୍‌ ପଡିଲା ବାଂଲାଦେଶ । ବାଂଲାଦେଶ ବଦଳରେ ସ୍କଟଲାଣ୍ଡ୍ ଖେଳିବ ଟ୍ୱେଣ୍ଟି-୨୦ ବିଶ୍ୱକପ୍ । ଏ ନେଇ ଆଇସିସି ନିଷ୍ପତ୍ତି ନେଇଛି ।  ଟି-୨୦ ବିଶ୍ୱକପ୍ ଆରମ୍ଭ ହେବାକୁ ଆଉ ମାତ୍ର ଅଳ୍ପ ଦିନ ବାକି ଥିବାବେଳେ ଆନ୍ତର୍ଜାତୀୟ କ୍ରିକେଟ୍ କାଉନସିଲ୍ (ICC) ଏହି ବଡ଼ ନିଷ୍ପତ୍ତି ନେଇଛି। ସୁରକ୍ଷା କାରଣ ଦର୍ଶାଇ ଭାରତ ଆସିବାକୁ ଅନିଚ୍ଛା ପ୍ରକାଶ କରିଥିବା ବାଂଲାଦେଶକୁ ଟୁର୍ଣ୍ଣାମେଣ୍ଟରୁ ଆନୁଷ୍ଠାନିକ ଭାବେ ବାଦ୍ ଦିଆଯାଇଛି। ଦୁବାଇରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକ ପରେ ଆଇସିସି ବାଂଲାଦେଶ ସ୍ଥାନରେ ସ୍କଟଲାଣ୍ଡକୁ ଟୁର୍ଣ୍ଣାମେଣ୍ଟରେ ସାମିଲ କରିଛି।

ଶୁକ୍ରବାର ଦିନ ଆଇସିସି ଅଧ୍ୟକ୍ଷ ଜୟ ଶାହାଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଥିଲା। ବାଂଲାଦେଶ କ୍ରିକେଟ୍ ବୋର୍ଡକୁ ନିଷ୍ପତ୍ତି ନେବା ପାଇଁ ୨୪ ଘଣ୍ଟାର ସମୟ ସୀମା ଦିଆଯାଇଥିଲା। ତେବେ ଏହି ସମୟ ମଧ୍ୟରେ ବୋର୍ଡ କୌଣସି ଆନୁଷ୍ଠାନିକ ଉତ୍ତର ନଦେବାରୁ ଆଇସିସି ଏହି କଠୋର ପଦକ୍ଷେପ ଗ୍ରହଣ କରିଛି। ଶନିବାର, ଜାନୁଆରୀ ୨୪ରେ ଆଇସିସି ପକ୍ଷରୁ ବିସିବିକୁ ଏକ ଇମେଲ ମାଧ୍ୟମରେ ଏହି ନିଷ୍ପତ୍ତି ସମ୍ପର୍କରେ ଅବଗତ କରାଯାଇଛି।

ସୂଚନା ଅନୁଯାୟୀ, ଆଇସିସିକୁ ଜଣାଇବା ପୂର୍ବରୁ ବାଂଲାଦେଶ କ୍ରିକେଟ୍ ବୋର୍ଡ ଢାକାରେ ସାମ୍ବାଦିକ ସମ୍ମିଳନୀ କରି ଦଳ ଭାରତ ଗସ୍ତ କରିବ ନାହିଁ ବୋଲି ଘୋଷଣା କରିଥିଲା, ଯାହା ପ୍ରୋଟୋକଲ୍ ଉଲ୍ଲଂଘନ ଅଟେ। ଅନ୍ୟପକ୍ଷରେ, ବାଂଲାଦେଶ ଏହି ପ୍ରସଙ୍ଗରେ ଆଇସିସିର ବିବାଦ ସମାଧାନ କମିଟିର ହସ୍ତକ୍ଷେପ ଲୋଡିଥିଲେ ମଧ୍ୟ କମିଟି ଶାସକ ସଂସ୍ଥାର ନିଷ୍ପତ୍ତିକୁ ବଦଳାଇବାକୁ ମନା କରିଦେଇଥିଲା।

ବାଂଲାଦେଶର ବହିଷ୍କାର ପରେ ବର୍ତ୍ତମାନ ସ୍କଟଲାଣ୍ଡ ଟି-୨୦ ବିଶ୍ୱକପ୍‌ରେ ଅଂଶଗ୍ରହଣ କରିବ। ଆଇସିସି ଟି-୨୦ ମାନ୍ୟତାରେ ଅନ୍ୟ ଦଳଙ୍କ ତୁଳନାରେ ସ୍କଟଲାଣ୍ଡ ଆଗରେ ଥିବାରୁ ଏହି ସୁଯୋଗ ମିଳିଛି। ସ୍କଟଲାଣ୍ଡକୁ ଗ୍ରୁପ୍‌-ସି (Group C)ରେ ରଖାଯାଇଛି। ଦଳ ଫେବୃଆରୀ ୭ରେ ୱେଷ୍ଟଇଣ୍ଡିଜ୍‌, ଫେବୃଆରୀ ୯ରେ ଇଟାଲୀ ଏବଂ ଫେବୃଆରୀ ୧୪ରେ ଇଂଲଣ୍ଡ ବିପକ୍ଷରେ କୋଲକାତାରେ ମ୍ୟାଚ୍ ଖେଳିବ। ଏହାପରେ ମୁମ୍ବାଇରେ ଫେବୃଆରୀ ୧୭ରେ ନେପାଳ ବିପକ୍ଷରେ ମୈଦାନକୁ ଓହ୍ଲାଇବ।

ନୂଆଦିଲ୍ଲୀ: ବାଂଲାଦେଶ ସରକାର ଦେଶରେ ଇଣ୍ଡିଆନ୍ ପ୍ରିମିୟର ଲିଗ୍ ର ଟେଲିକାଷ୍ଟ ଏବଂ ଷ୍ଟ୍ରିମିଂ ଉପରେ ଅନିର୍ଦ୍ଦିଷ୍ଟ କାଳ ପାଇଁ ରୋକ ଲଗାଇଛନ୍ତି। କୋଲକାତା ନାଇଟ୍ ରାଇଡର୍ସ ଦଳରୁ ବାଂଲାଦେଶୀ ଦ୍ରୁତ ବୋଲର ମୁସ୍ତାଫିଜୁର ରେହମାନଙ୍କୁ ମୁକ୍ତ କରାଯିବା ପରେ ୟୁନୁସ୍ ସରକାର ଏହି ପଦକ୍ଷେପ ଗ୍ରହଣ କରିଛନ୍ତି। ଭାରତ ଏବଂ ବାଂଲାଦେଶ ମଧ୍ୟରେ ବଢୁଥିବା ତିକ୍ତତା ମଧ୍ୟରେ ଏହି ଘଟଣା ସାମ୍ନାକୁ ଆସିଛି।

ଆଜି ବାଂଲାଦେଶ ସରକାର ଏହି ନିର୍ଦ୍ଦେଶ ଜାରି କରିଛନ୍ତି। ଏହି ନିଷ୍ପତ୍ତି ଫଳରେ ବାଂଲାଦେଶର କ୍ରିକେଟ୍ ପ୍ରେମୀମାନେ ଆଉ ଆଇପିଏଲ୍ ମ୍ୟାଚ୍ କୌଣସି ଟିଭି ଚ୍ୟାନେଲ୍ କିମ୍ବା ଡିଜିଟାଲ୍ ପ୍ଲାଟଫର୍ମରେ ଦେଖିପାରିବେ ନାହିଁ। ସରକାରୀ ବିଜ୍ଞପ୍ତିରେ କୁହାଯାଇଛି ଯେ, ବିସିସିଆଇ ବିନା କୌଣସି ଯୁକ୍ତିଯୁକ୍ତ କାରଣରେ ମୁସ୍ତାଫିଜୁରଙ୍କୁ ଆଇପିଏଲ୍‌ରୁ ବାଦ୍ ଦେବା ନିଷ୍ପତ୍ତି ନେଇଛି, ଯାହା ବାଂଲାଦେଶର ଜନସାଧାରଣଙ୍କୁ ବ୍ୟଥିତ ଓ କ୍ଷୁବ୍ଧ କରିଛି। ତେଣୁ ଜନସ୍ୱାର୍ଥକୁ ଦୃଷ୍ଟିରେ ରଖି ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଆଇପିଏଲ୍‌ର ସମସ୍ତ ପ୍ରସାରଣ ବନ୍ଦ ରହିବ।

ଉଲ୍ଲେଖଯୋଗ୍ୟ ଯେ, ମିନି ନିଲାମରେ କେକେଆର ମୁସ୍ତାଫିଜୁରଙ୍କୁ ୯.୨୦ କୋଟି ଟଙ୍କାରେ କିଣିଥିଲା। ତେବେ ବାଂଲାଦେଶରେ ହିନ୍ଦୁମାନଙ୍କ ଉପରେ ହେଉଥିବା ଆକ୍ରମଣ ଘଟଣାକୁ ନେଇ ଦୁଇ ଦେଶ ମଧ୍ୟରେ ସମ୍ପର୍କ ଖରାପ ହେବା ପରେ, ବିସିସିଆଇ କୋଲକାତା ଫ୍ରାଞ୍ଚାଇଜିକୁ ତାଙ୍କୁ ଛାଡିବାକୁ ନିର୍ଦ୍ଦେଶ ଦେଇଥିଲା। ନିୟମ ଅନୁଯାୟୀ କେକେଆର ତାଙ୍କୁ ମୁକ୍ତ କରିଛି ଏବଂ ଏବେ ଦଳ ଜଣେ ବିକଳ୍ପ ଖେଳାଳିଙ୍କୁ ଚୁକ୍ତିବଦ୍ଧ କରିପାରିବ।

ଏହି ବିବାଦର ପ୍ରଭାବ ଆଗାମୀ ଟି-୨୦ ବିଶ୍ୱକପ୍ ଉପରେ ମଧ୍ୟ ପଡିଛି। ବାଂଲାଦେଶ କ୍ରିକେଟ୍ ବୋର୍ଡ ଅନ୍ତର୍ଜାତୀୟ କ୍ରିକେଟ୍ କାଉନସିଲ୍ (ICC) କୁ ଚିଠି ଲେଖି ନିଜର ମ୍ୟାଚଗୁଡ଼ିକୁ ଭାରତରୁ ଶ୍ରୀଲଙ୍କାକୁ ସ୍ଥାନାନ୍ତର କରିବାକୁ ଅନୁରୋଧ କରିଛି। ବର୍ତ୍ତମାନର କାର୍ଯ୍ୟସୂଚୀ ଅନୁଯାୟୀ ବାଂଲାଦେଶର ମ୍ୟାଚ୍ କୋଲକାତା ଓ ମୁମ୍ବାଇରେ ହେବାର ଥିଲା, କିନ୍ତୁ ଆଇସିସି ଏବେ ଗ୍ରୁପ୍-ସି ମ୍ୟାଚଗୁଡ଼ିକୁ ଶ୍ରୀଲଙ୍କାରେ ଆୟୋଜନ କରିବାକୁ ବିଚାର କରୁଥିବା ରିପୋର୍ଟ ପ୍ରକାଶ ପାଇଛି।

ଗାଏନା: T-20 ବିଶ୍ବକପ ଫାଇନାଲରେ ଭାରତ । ଦ୍ଵିତୀୟ ସେମି ଫାଇନାଲରେ ଡିଫେଣ୍ଡିଂ ଚାମ୍ପିଅନ ଇଂଲଣ୍ଡକୁ ୬୮ ରନରେ ହରାଇ ଫାଇନାଲରେ ପ୍ରବେଶ କରିଛି ଟିମ୍ ଇଣ୍ଡିଆ। ଅକ୍ଷର ଓ କୁଲଦୀପଙ୍କ ଯାଦୁକରୀ ସ୍ପିନରେ ଧୂଳି ଚାଟିଲା ଇଂଲଣ୍ଡ । ୧୭୨ ରନର ବିଜୟ ଲକ୍ଷ୍ଯକୁ ପିଛା କରି ୧୦୩ ରନରେ ଅଲଆଉଟ୍ ହୋଇଗଲା ଇଂଲଣ୍ଡ । ଫଳରେ ୬୮ ରନର ବିରାଟ ବ୍ଯବଧାନରେ ଇଂଲଣ୍ଡକୁ ହରାଇ ଫାଇନାଲ ଟିକେଟ ହାସଲ କରିଛି ରୋହିତ ବାହିନୀ । ଟ୍ରଫି ପାଇଁ ଆସନ୍ତାକାଲି ଦକ୍ଷିଣ ଆଫ୍ରିକା-ଭାରତ ମଧ୍ୟରେ ହେବ ଫାଇନାଲ୍ ଟକ୍କର।

ଗାଏନାର ପ୍ରୋଭିଡେନ୍ସ ଷ୍ଟାଡିୟମରେ ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଖେଳାଯାଇଥିବା ବର୍ଷା ବାଧାପ୍ରାପ୍ତ ଦ୍ବିତୀୟ ସେମିଫାଇନାଲ ମ୍ୟାଚରେ ଇଂଲଣ୍ଡ ଟସ୍ ଜିତିଥିଲା ଓ ପ୍ରଥମେ ବୋଲିଂ କରିବାକୁ ନିଷ୍ପତ୍ତିି ନେଇଥିଲା । ପ୍ରଥମେ ବ୍ଯାଟିଂ କରି ଭାରତ ନିର୍ଦ୍ଧାରିତ ଓଭରରେ ୭ ୱିକେଟ ହରାଇ ୧୭୧ ରନ କରିଥିଲା । କ୍ଯାପଟେନ ରୋହିତ ଶର୍ମା ୩୯ ବଲରେ ୫୭ ରନ୍ କରିଥିବାବେଳେ ଏବଂ ସୂର୍ଯ୍ୟକୁମାର ୟାଦବ ୩୬ ବଲରେ ୪୭, ରନ ହାସଲ କରିଥିଲେ ।

ହାର୍ଦ୍ଦିକ ପାଣ୍ଡ୍ୟା ୧୩ ବଲରେ ୨୩, ରବୀନ୍ଦ୍ର ଜାଡେଜା ୯ ବଲରେ ୧୭ ଓ ଅକ୍ଷର ପଟେଲ ୬ ବଲରେ ୧୦ ରନ କରି ଦଳୀୟ ସ୍କୋରକୁ ୧୭୧ରେ ପହଞ୍ଚାଇଥିଲେ । ୧୭୨ ରନର ବିଜୟ ଲକ୍ଷ୍ଯକୁ ନେଇ ପଡ଼ିଆକୁ ଓହ୍ଲାଇଥିବା ଇଂଲଣ୍ଡ ନିୟମିତ ଭାବେ ୱିକେଟ ହରାଇଥିଲା । ଭାରତୀୟ ସ୍ପିନର ଓ ଫିଲଡରଙ୍କ ରଣନୀତି ଆଗରେ ଇଂଲଣ୍ଡ ଦଳ ଫେଲ୍ ହୋଇଥିଲା । ହ୍ଯାରୀ ବୃକ୍ ସର୍ବାଧିକ ୨୫ ରନ କରିଥିବାବେଳେ ଅଧିନାୟକ ବଟଲର ୨୩ ରନ କରିବାକୁ ସକ୍ଷମ ହୋଇଥିଲେ ।

ଭାରତର ମୁକାବିଲା କରିନପାରି ଶେଷରେ ୧୬ ଓଭର ୪ଟି ବଲରେ ଇଂଲଣ୍ଡ ୧୦୩ ରନ କରି ଅଲଆଉଟ ହୋଇଯାଇଥିଲା । ଅକ୍ଷର ପଟେଲ ଓ କୁଲଦୀପ ୩ଟି ଲେଖାଏଁ ୱିକେଟ ନେଇଥିବାବେଳେ ବୁମରା ୨ଟି ୱିକେଟ ନେଇଥିଲେ ।

ଲାଉଡରହିଲ୍‌: ଚଳିତ ଟି-୨୦ ବିଶ୍ୱକପ୍‌ରେ ଭାରତ ଶନିବାର ତା’ର ଚତୁର୍ଥ ତଥା ଅନ୍ତିମ ଗ୍ରୁପ୍‌ ପର୍ଯ୍ୟାୟ ମ୍ୟାଚ୍‌ରେ କାନାଡାକୁ ଭେଟିବ। ଗ୍ରପ୍‌ ଏ’ରେ ପ୍ରଥମ ୩ଟି ମ୍ୟାଚ୍‌ ଜିତି ଭାରତ ସୁପର-୮ ପର୍ଯ୍ୟାୟରେ ପହଞ୍ଚି ସାରିଛି। ତେଣୁ ଏହି ମ୍ୟାଚ୍‌ର ଗୁରୁତ୍ୱ କମିଯାଇଛି। ତେବେ ଭାରତ ସବୁ ୪ଟି ମ୍ୟାଚ୍‌ ଜିତି ଅପରାଜେୟ ରହି ପରବର୍ତ୍ତୀ ପର୍ଯ୍ୟାୟକୁ ପ୍ରବେଶ କରିବା ଲକ୍ଷ୍ୟରେ ରହିଛି। ଅଭ୍ୟାସ ମ୍ୟାଚ୍‌ରେ ବାଂଲାଦେଶକୁ ୬୦ ରନରେ ପରାସ୍ତ କରିବା ପରେ ଭାରତ ତା’ର ପ୍ରଥମ ମୁକାବିଲାରେ ଆୟର୍ଲାଣ୍ଡକୁ ୮ ୱିକେଟରେ ପରାସ୍ତ କରିଥିଲା। ଏହାପରେ ଦ୍ୱିତୀୟ ମ୍ୟାଚ୍‌ରେ ଭାରତ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୬ ରନରେ ଓ ତୃତୀୟ ମ୍ୟାଚ୍‌ରେ ଆମେରିକାକୁ ୭ ୱିକେଟରେ ପରାସ୍ତ କରିଥିଲା। ଅନ୍ୟପଟେ କାନାଡା ଏହି ମ୍ୟାଚ୍‌ ଜିତି ସୁପର-୮ରେ ପ୍ରବେଶ କରିବାକୁ ଅନ୍ୟ ମ୍ୟାଚ୍‌ଗୁଡିକର ଫଳାଫଳ ଉପରେ ନିର୍ଭର କରିବ। ତେଣୁ କାନାଡ଼ା ପାଇଁ କର ବା ସ୍ଥିତି ସୃଷ୍ଟି ହୋଇଛି।

ବର୍ଷା ଆଶଙ୍କା: ପ୍ରଥମଥର ପାଇଁ ମୁହାଁମୁହିଁ ହେବେ
ଫ୍ଲୋରିଡାର ଲାଉଡରହିଲ୍‌ର ସେଣ୍ଟ୍ରାଲ ବ୍ରୋୱାର୍ଡ ରିଜିଓନାଲ ପାର୍କ ଷ୍ଟାଡିୟମ ଟର୍ଫ ଗ୍ରାଉଣ୍ଡରେ ଏହି ମ୍ୟାଚ୍‌ ଖେଳାଯିବ। ଦୁଇ ଦଳ ପ୍ରଥମଥର ପାଇଁ ଟି-୨୦ ଫର୍ମାଟ୍‌ରେ ପରସ୍ପରକୁ ଭେଟିବେ। ଫ୍ଲୋରିଡାରେ ବନ୍ୟା ସ୍ଥିତି ସୃଷ୍ଟି ହୋଇଛି। ପୁଣି ବର୍ଷା ମଧ୍ୟ ଲାଗି ରହିଛି। ମ୍ୟାଚ୍‌ ଅବସରରେ ଆକାଶ ମେଘୁଆ ରହିବ ଓ ଘଡଘଡି ସହ ବର୍ଷା ହେବାର ସମ୍ଭାବନା ରହିଛି ବୋଲି ସ୍ଥାନୀୟ ପାଣିପାଗ କାର୍ଯ୍ୟାଳୟ ତରଫରୁ ସୂଚନା ଦିଆଯାଇଛି।

ଲାଉଡରହିଲ୍‌ର ଏହି ପିଚ୍‌ ବ୍ୟାଟରଙ୍କ ସ୍ୱର୍ଗ ବୋଲି ଜଣାଶୁଣା। ତେବେ ବର୍ଷା କାରଣରୁ ପିଚ୍‌ର ଧର୍ମରେ ସାମାନ୍ୟ ପରିବର୍ତ୍ତନ ହୋଇପାରେ। ମ୍ୟାଚ୍‌ ହାଇସ୍କୋରିଂ ହେବା ସହ ଛକା ଓ ଚୌକାର ବର୍ଷା ଦେଖିବାକୁ ମିଳିବ। ଭାରତ ଅପେକ୍ଷାକୃତ ଶକ୍ତିଶାଳୀ ଦଳ ହୋଇଥିବାରୁ ଏହି ମ୍ୟାଚ୍‌ରେ ବିଜୟୀ ହେବାର ସମ୍ଭାବନା ଶତପ୍ରତିଶତ ରହିଛି। ଆରମ୍ଭରୁ ବ୍ୟାଟରମାନେ ସୁବିଧାଜନକ ସ୍ଥିତିରୁ ଫାଇଦା ଉଠାଇବେ। ତେବେ ମ୍ୟାଚ୍‌ ଆଗକୁ ବଢିଲେ ବୋଲରମାନେ ପ୍ରଭାବୀ ସାବ୍ୟସ୍ତ ହେବେ। ମ୍ୟାଚ୍‌ ଶେଷ ଆଡକୁ ବଲ୍‌ ଟର୍ଣ୍ଣ ମଧ୍ୟ ହେବାର ସମ୍ଭାବନା ରହିଛି। ଏଠାରେ ବର୍ଷା ଚାଲିଥିବାରୁ ଭରାତୀୟ ଦଳର ଅଭ୍ୟାସକୁ ବାତିଲ କରାଯାଇଛି। ଅନ୍ତିମ ଏକାଦଶରେ ସାମାନ୍ୟ ପରିବର୍ତ୍ତନ କରାଯିବ ବୋଲି ଆଶା କରାଯାଉଛି। ଟସ୍‌ ପଡିବା ପରେ ଅନ୍ତିମ ଏକାଦଶ ସଂକ୍ରାନ୍ତରେ ସବୁକିଛି ସ୍ପଷ୍ଟ ହେବ। ଟସ୍‌ ଜିତିବା ଦଳ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେବ। ବିଜୟୀ ହେଲେ ଭାରତ ଗ୍ରୁପ୍‌ ଏ’ର ଶୀର୍ଷ ସ୍ଥାନରେ ରହି ପରବର୍ତ୍ତୀ ପର୍ଯ୍ୟାୟରେ ପ୍ରବେଶ କରିବ।

ଭାରତ: ରୋହିତ ଶର୍ମା (ଅଧିନାୟକ), ହାର୍ଦ୍ଦିକ ପାଣ୍ଡ୍ୟା, ଯଶସ୍ୱୀ ଜୟସ୍ୱାଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ଋଷଭ ପନ୍ତ, ସଞ୍ଜୁ ସାମସନ, ଶିବମ ଦୁବେ, ରବୀନ୍ଦ୍ର ଜାଡେଜା, ଅକ୍ଷର ପଟେଲ, କୁଲଦୀପ ଯାଦବ, ୟୁଜବେନ୍ଦ୍ର ଚହଲ, ଅର୍ଶଦୀପ ସିଂ, ଯଶପ୍ରୀତ ବୁମ୍‌ରା ଓ ମହମ୍ମଦ ସିରାଜ।

କାନାଡା: ସାଦ ବିନ ଜାଫର (ଅଧିନାୟକ), ଆରୋନ ଜନସନ, ଡିଲନ ହେଲିଗର, ଦିଲପ୍ରୀତ ବାଜୱା, ରିଷିଭ ଜୋଶୀ, ଜେରେମି ଗୋର୍ଡୋନ, ଜୁନେଦ ସିଦ୍ଦିକି, କଲିମ ସାନା, କନୱରପାଲ ତଥଗୁର, ନବନୀତ ଧଲିୱାଲ, ନିକୋଲାସ କିର୍ଟୋନ, ପରଗତ ସିଂ, ରବୀନ୍ଦରପାଲ ସିଂ, ରେୟାନଖାନ ପଠାନ ଓ ଶ୍ରେୟାସ ମୋଭା।

ଆମେରିକା ଓ ୱେଷ୍ଟଇଣ୍ଡିଜରେ ଆରମ୍ଭ ହୋଇଥିବା ଟି-୨୦ ବିଶ୍ୱକପ୍‌ର ୯ମ ସଂସ୍କରଣରେ ଆରମ୍ଭରୁ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଛି। ଗୁରୁବାର ରାତିରେ ଗ୍ରୁପ୍‌ ଏ’ର ଏକ ମ୍ୟାଚ୍‌ରେ ଆସୋସିଏସଟ ଦେଶ ତଥା ଆୟୋଜକ ଆମେରିକା ଟେଷ୍ଟ ଖେଳୁଥିବା ପୂର୍ବତନ ଚାମ୍ପିଅନ ପାକିସ୍ତାନକୁ ସୁପର ଓଭରରେ ପରାସ୍ତ କରି ହଇଚଇ ସୃଷ୍ଟି କରିଛି। ଟି-୨୦ ବିଶ୍ୱକପ୍‌ ଇତିହାସରେ ଏହା ଅନ୍ୟତମ ଶ୍ରେଷ୍ଠ ବିପର୍ଯ୍ୟୟ ଭାବେ ପରିଗଣିତ ହେଉଛି। ତେବେ ବିଶ୍ୱକପ୍‌ରେ ଏଭଳି ବିପର୍ଯ୍ୟୟ ଆଦୌ ନୂଆ ନୁହଁ। ବିଶ୍ୱକପ୍‌ ଇତିହାସରେ ପୂର୍ବରୁ ଘଟିଥିବା ଏହି ଭଳି ସର୍ବବୃହତ୍‌ ୫ଟି ବିପର୍ଯ୍ୟୟକୁ ନେଇ ଆଲୋଚନା କରିବା।

୧. ପାକିସ୍ତାନକୁ ହରାଇଲା ଆମେରିକା (୨୦୨୪)
ଆୟୋଜକ ଭାବେ ପଦାର୍ପଣ କରିଥିବା ଆମେରିକା ପୂର୍ବରୁ ପାକିସ୍ତାନକୁ କୌଣସି ଅନ୍ତର୍ଜାତୀୟ ମ୍ୟାଚ୍‌ରେ ଭେଟି ନଥିଲେ ମଧ୍ୟ ଗୁରୁବାର ପାକିସ୍ତାନକୁ ପରାସ୍ତ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ପ୍ରଥମେ ବ୍ୟାଟିଂ କରି ପାକିସ୍ତାନ ୭ ୱିକେଟ ହରାଇ ୧୫୯ ରନ ସଂଗ୍ରହ କରିଥିଲା। ଜବାବରେ ଆମେରିକା ୩ ୱିକେଟ ହରାଇ ୧୫୯ ରନ ସଂଗ୍ରହ କରି ମ୍ୟାଚ୍‌ ଟାଇ ରଖିଥିଲା। ସୁପର ଓଭରରେ ପାକିସ୍ତାନ ପରାସ୍ତ ହୋଇଥିଲା। ଏଥିସହ ଆମେରିକା ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ପୂର୍ଣ୍ଣ ସଦସ୍ୟତା ପାଇଥିବା ଦେଶଗୁଡିକ ସହ ୪ଥର ଭେଟିଛି। ଆମେରିକା ଜିମ୍ବାୱେକୁ ପୂର୍ବରୁ ୩ଥର ଭେଟି ସବୁଥର ପରାସ୍ତ ହୋଇଥିଲା। ଆମେରିକା ଏବେ ଆଇସିସି ମାନ୍ୟତାର ଦ୍ୱାଦଶ ସ୍ଥାନରେ ରହିଛି। ଅନ୍ୟପଟେ ପାକିସ୍ତାନ ଷଷ୍ଠ ସ୍ଥାନରେ ରହିଛି। ପାକିସ୍ତାନ ୨୦୦୯ରେ ଟାଇଟଲ ହାସଲ କରିଥିଲା ଓ ଗତ ୨୦୨୨ ସଂସ୍କରଣରେ ଫାଇନାଲରେ ଇଂଲଣ୍ଡଠାରୁ ପରାସ୍ତ ହୋଇ ରନର୍ସଅପ୍‌ ବିବେଚିତ ହୋଇଥିଲା।

୨.ଅଷ୍ଟ୍ରେଲିଆ ୫ ୱିକେଟ ଜିମ୍ବାୱେଠାରୁ ପରାସ୍ତ (୨୦୦୭)
ବିଶ୍ୱକପ୍‌ର ପ୍ରଥମ ସଂସ୍କରଣ ୨୦୦୭ରେ ଖେଳାଯାଇଥିଲା ଓ ଏଥିରେ ମହେନ୍ଦ୍ର ସିଂ ଧୋନିଙ୍କ ନେତୃତ୍ୱାଧୀନ ଭାରତ ଚାମ୍ପିଅନ ହୋଇଥିଲା। ଏହି ବିଶ୍ୱକପ୍‌ରେ ମଧ୍ୟ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଥିଲା। ଗ୍ରୁପ୍‌ ବି’ର ଚତୁର୍ଥ ମ୍ୟାଚରେ ଜିମ୍ବାୱ ଗୋଟିଏ ବଲ୍‌ ବାକିଥାଇ ଅଷ୍ଟ୍ରେଲିଆକୁ ୫ ୱିକେଟରେ ହରାଇଥିଲା। ଟସ୍‌ ଜିତି ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୯ ୱିକେଟ ହରାଇ ୧୩୮ ରନ ସଂଗ୍ରହ କରିଥିଲା। ବ୍ରାଡ ହଗ୍‌ ସର୍ବାଧିକ ୩୫ ରନକରି ଅପରାଜିତ ରହିଥିଲେ। ଜିମ୍ବାୱେର ଏଲଟନ ଚିଗୁମ୍ବୁରା ସର୍ବାଧିକ ୩, ଗ୍ୟାରୀ ବ୍ରେଣ୍ଟ ୨ ୱିକେଟ ନେଇଥିଲେ। ଜବାବରେ ଜିମ୍ବାୱେ ୧୯.୫ ଓଭରରେ ୫ ୱିକେଟ ହରାଇ ୧୩୯ ରନକରି ବାଜି ମାରିଥିଲା। ବ୍ରେଣ୍ଡନ ଟେଲର ସର୍ବାଧିକ ଅପରାଜିତ ୬୦ ରନ ସଂଗ୍ରହ କରି ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ଅଷ୍ଟ୍ରେଲିଆର ଷ୍ଟୁଆର୍ଟ କ୍ଲର୍କ ୨ ୱିକେଟ ନେଇଥିଲେ।

୩. ନେଦରଲାଣ୍ଡସଠାରୁ ୪ ୱିକେଟରେ ହାରିଥିଲା ଇଂଲଣ୍ଡ (୨୦୦୯)
୨୦୦୯ରେ ଇଂଲଣ୍ଡରେ ଆୟୋଜିତ ଟି-୨୦ ବିଶ୍ୱକପ୍‌ରେ ନେଦରଲାଣ୍ଡ ଐତିହାସିକ ଲର୍ଡ୍ସ ଗ୍ରାଉଣ୍ଡରେ ଶେଷ ବଲ୍‌ରେ ଇଂଲଣ୍ଡକୁ ୪ ୱିକେଟରେ ପରାସ୍ତ କରି ଏକ ବଡ଼ ବିପର୍ଯ୍ୟୟ ଘଟାଇବା ସହ ଚର୍ଚ୍ଚା ସୃଷ୍ଟି କରିଥିଲା। ଟସ୍‌ ହାରି ଇଂଲଣ୍ଡ ପ୍ରଥମେ ବ୍ୟାଟିଂ କରି ୫ ୱିକେଟ ହରାଇ ୧୬୨ ରନ ସଂଗ୍ରହ କରିଥିଲା। ଦଳ ତରଫରୁ ଲୁକ୍‌ ରାଇଟ୍‌ ସର୍ବାଧିକ ୭୧ ରନ ସଂଗ୍ରହ କରିଥିଲେ। ଜବାବରେ ନେଦରଲାଣ୍ଡସ ୬ ୱିକେଟ ହରାଇ ଶେଷ ବଲରେ ହିଁ ବିଜୟ ଲକ୍ଷ୍ୟ ହାସଲ କରିନେଇଥିଲା। ନେଦରଲାଣ୍ଡସ ତରଫରୁ ଟମ୍‌ ଡି ଗ୍ରୁଥ୍‌ ସର୍ବାଧି ୪୯, ପିଟର ବୋରେନ୍‌ ୩୦ ଓ ରିଆନ ଟେନ୍‌ ଡୋଶଚେଟ୍‌ ଅପରାଜିତ ୨୨ ରନକରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଇଂଲଣ୍ଡ ତରଫରୁ ଦ୍ରୁତ ବୋଲର ଜେମ୍ସ ଆଣ୍ଡରସନ ସର୍ବାଧିକ ୩ ୱିକେଟ ନେଇଥିଲେ। ଟମ୍‌ ଡି ଗ୍ରୁଥ ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।

୪. ପାକିସ୍ତାନକୁ ୧ ରନରେ ହରାଇଥିଲା ଜିମ୍ବାୱେ (୨୦୨୨)
ଟି-୨୦ ବିଶ୍ୱକପ୍‌ ଗତ ସଂସ୍କରଣ ଅର୍ଥାତ ୨୦୨୨ରେ ଜିମ୍ବାୱେ ଗ୍ରୁପ୍‌-୨ରେ ପାକିସ୍ତାନକୁ ୧ ରନରେ ପରାସ୍ତ କରି ଏକ ବଡ଼ ବିପର୍ଯ୍ୟୟ ସୃଷ୍ଟି କରିଥିଲା। ଟସ୍‌ ଜିତି ଜିମ୍ବାୱେ ପ୍ରଥମେ ବ୍ୟାଟିଂ କରି ୮ ୱିକେଟ ହରାଇ ୧୩୦ ରନ ସଂଗ୍ରହ କରିଥିଲା। ଦଳ ତରଫରୁ ସିନ ୱିଲିୟମ୍ସ ସର୍ବାଧିକ ୩୧ ରନ ସଂଗ୍ରହ କରିଥିଲେ ଓ ପାକିସ୍ତାନର ମହମ୍ମଦ ୱାସିମ ସର୍ବାଧିକ ୪, ସଦାବ ଖାନ୍‌ ୩ ୱିକେଟ ନେଇଥିଲେ। ଜବାବରେ ପାକିସ୍ତାନ ୮ ୱିକେଟ ହରାଇ ୧୨୯ ରନରେ ସୀମିତ ରହି ବିଜୟଠାରୁ ୨ ରନ ଦୂରରେ ରହିଯାଇଥିଲା। ସାନ ମାସୁଦ ସର୍ବାଧବକ ୪୪ ରନ ସଂଗ୍ରହ କରିଥିଲେ। ମୂଲ୍ୟବାନ ୩ ୱିକେଟ ନେଇ ଜିମ୍ବାୱେ ବୋଲର ସିକନ୍ଦର ରାଜା ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।

୫. ୱେଷ୍ଟଇଣ୍ଡିଜକୁ ୬ ରନରେ ହରାଇଥିଲା ଆଫଗାନିସ୍ତାନ(୨୦୧୬)
ଭାରତରେ ଅନୁଷ୍ଠିତ ୨୦୧୬ ବିଶ୍ୱକପ୍‌ରେ ନବାଗତ ଆଫଗାନିସ୍ତାନ ୬ ରନରେ ଡ୍ୱେନ ବ୍ରାଭୋ, ଡାରେନ ସାମି ଓ ଆନ୍ଦ୍ରେ ରସେଲଙ୍କ ଭଳି ଖେଳାଳିଙ୍କୁ ନେଇ ଗଠିତ ୱେଷ୍ଟଇଣ୍ଡିଜକୁ ହରାଇ ଏକ ବଡ଼ ବିପର୍ଯ୍ୟୟ ସୃଷ୍ଟି କରିଥିଲା। ଟସ ହାରି ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ୭ ୱିକେଟ ହରାଇ ୧୨୩ ରନ ସଂଗ୍ରହ କରିଥିଲା। ଦଳ ତରଫରୁ ନାଜିବୁଲ୍ଲ ଜଡ୍ରାନ ସର୍ବାଧିକ ଅପରାଜିତ ୪୮ ରନ ସଂଗ୍ରହ କରି ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ୱେଷ୍ଟଇଣ୍ଡିଜ ସାମୁଏଲ ବଦ୍ରି ୩ ଓ ରସେଲ ୨ ୱିକେଟ ନେଇଥିଲେ। ଜବାବରେ ୱେଷ୍ଟଇଣ୍ଡିଜ ୮ ୱିକେଟ ହରାଇ ୧୧୮ ରନରେ ସୀମିତ ରହି ବିଜୟଠାରୁ ୭ ରନ ଦୂରରେ ରହିଯାଇଥିଲା। ଦଳ ପାଇଁ ବ୍ରାଭୋ ସର୍ବାଧିକ ୨୮ ରନ ସଂଗ୍ରହ କରିଥିଲେ। ଆଫଗାନିସ୍ତାନ ପାଇଁ ମହମ୍ମଦ ନବୀ ଓ ରସିଦ ଖାନ୍‌ ୨ଟି ଲେଖାଏ ୱିକେଟ ନେଇଥିଲେ।

ନୂଆଦିଲ୍ଲୀ: ଟି-ଟ୍ୱେଣ୍ଟି ବିଶ୍ୱକପରେ ଗତକାଲି ଏକ ରୋମାଞ୍ଚକର ମ୍ୟାଚ୍ ଦେଖିବାକୁ ମିଳିଛି। ଆମେରିକା ଓ ପାକିସ୍ତାନ ମଧ୍ୟରେ ଖେଳା ଯାଇଥିବା ଏହି ମ୍ୟାଚ୍ ଟାଇ ହୋଇଯିବା ପରେ ସୁପର୍ ଓଭର୍ ଖେଳାଯାଇଥିଲା। ଯେଉଁଥିରେ ରୋମାଞ୍ଚକର ବିଜୟ ହାସଲ କରିଛି ଆମେରିକା।

ପ୍ରଥମେ ବ୍ୟାଟିଂ କରି ପାକିସ୍ତାନ ନିର୍ଦ୍ଧାରିତ ଓଭରରେ ୭ ୱିକେଟ୍ ହରାଇ ୧୫୯ ରନ୍ ସଂଗ୍ରହ କରିଥିବା ବେଳେ ଆମେରିକା ୩ ୱିକେଟ ବିନିମୟରେ ସମାନ ସ୍କୋର୍ କରିଥିଲା। ଫଳରେ ସୁପର୍ ଓଭର୍ ଘୋଷଣା କରାଯାଇଥିଲା। ସୁପର୍ ଓଭରରେ ପାକିସ୍ତାନ ପକ୍ଷରୁ ମହମ୍ମଦ ଆମିର୍ ବଲିଂ କରିଥିବା ବେଳେ ଆମେରିକା ୧୮ ରନ୍ ସଂଗ୍ରହ କରିଥିଲା।

ଏହାପରେ ଆମେରିକା ପକ୍ଷରୁ ଭାରତୀୟ ବଂଶୋଦ୍ଭବ ସୌରଭ ନେତ୍ରଭଲକର ବଲିଂ କରିଥିଲେ। ସୌରଭଙ୍କ ଷାଣିତ ବୋଲିଂ ଆମେରିକାକୁ ବିଜୟ ଭେଟି ଦେଇଛି।

କାରଣ ସୁପର୍ ଓଭରରେ ପାକିସ୍ତାନ ୧୩ ରନ୍ କରିବାକୁ ସକ୍ଷମ ହୋଇଥିଲା। ଫଳରେ ୫ ରନରେ ବିଜୟୀ ଆମେରିକା ଘୋଷିତ ହୋଇଥିଲା। ଏହି ବିଜୟ ସହ ପଏଣ୍ଟ ଟେବୁଲର ଶୀର୍ଷ ସ୍ଥାନ ଦଖଲ କରିଛି ଆୟୋଜକ ଟିମ୍।

ନୂଆଦିଲ୍ଲୀ: ଆସନ୍ତା ଜୁନ୍‌ରେ ଟି-୨୦ ବିଶ୍ୱକପ୍‌ର ୯ମ ସଂସ୍କରଣ ଆମେରିକା ଓ ୱେଷ୍ଟଇଣ୍ଡିଜରେ ଆୟୋଜନ ହେବ। ନ୍ୟୁୟର୍କରେ ଭାରତ ଓ ପାକିସ୍ତାନ ମଧ୍ୟରେ ଖେଳାଯିବାକୁ ଥିବା ମ୍ୟାଚ୍‌ ଲାଗି ପିଚ୍‌ ପ୍ରସ୍ତୁତ ହୋଇଛି। ଏହି ହାଇଭୋଲ୍ଟେଜ ମ୍ୟାଚ୍‌ ସମେତ ୮ଟି ମ୍ୟାଚ୍‌ ନ୍ୟୁୟର୍କର ନାସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯିବ। ଏହି ଷ୍ଟାଡିୟମରେ ଭାରତ ଆଉ ଦୁଇଟି ମ୍ୟାଚ୍‌ ମଧ୍ୟ ଖେଳିବ। ଭାରତ ଏହି ଷ୍ଟାଡିୟମରେ ଜୁନ୍‌ ୫ରେ ଆୟର୍ଲାଣ୍ଡକୁ, ୯ ତାରିଖରେ ପାକିସ୍ତାନକୁ, ୧୨ ତାରିଖରେ ଆମରିକାକୁ ଭେଟିବ। ଭାରତ ଓ ପାକିସ୍ତାନ ମଧ୍ୟରେ ଖେଳାଯିବାକୁ ଥିବା ମ୍ୟାଚ୍‌ର ସବୁ ଟିକଟ୍‌ ବିକ୍ରି ସରିଛି। ଏହି ଟିକଟ ସବୁ ଚଢ଼ା ଦାମ୍‌ରେ ବିକ୍ରି ହୋଇଛି।

ଡ୍ରପ୍‌ ଇନ୍‌ ପିଚ୍‌ କ’ଣ?
ଏହି ମ୍ୟାଚ୍‌ଗୁଡିକ ଲାଗି ଏହି ଷ୍ଟାଡିୟମରେ ଡ୍ରପ୍‌ ଇନ୍‌ ପିଚ୍‌ ପ୍ରସ୍ତୁତ କରାଯାଇ ତା’ର ବ୍ୟବହାର କରାଯିବ। ନ୍ୟୁୟର୍କଠାରୁ ଦୁଇ ହଜାର କିଲୋମିଟର ଦୂରରେ ଫ୍ଲୋରିଡାରେ ଏହି ଡ୍ରପ୍‌ ଇନ୍‌ ପିଚ୍‌ ପ୍ରସ୍ତୁତ କରାଯାଇଛି। ପ୍ରଥମଥର ପାଇଁ ଆମେରିକାର କୌଣସି ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଟୁର୍ଣ୍ଣାମେଣ୍ଟ ଆୟୋଜନ ହେବ। ତେଣୁ ନୂଆ ଷ୍ଟାଡିୟମରେ ମ୍ୟାଚ୍‌ ଆୟୋଜନ ହେବ। ତେଣୁ ହାତରେ କମ୍‌ ସମୟ ରହିଥିବାରୁ ପିଚ୍‌ ପ୍ରସ୍ତୁତି ନେଇ ସ୍ୱତନ୍ତ୍ର ଯୋଜନା କରାଯାଇଛି। ଫ୍ଲୋରିଡାରେ ପ୍ରସ୍ତୁତ ହୋଇଥିବା ଏହି ପିଚ୍‌କୁ ନ୍ୟୁୟର୍କ ଅଣାଯାଇ ନାସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମ ସ୍ଥାପନ କରାଯିବ। ଅନ୍ୟ ସ୍ଥାନରୁ ପ୍ରସ୍ତୁତ ପିଚ୍‌ ଆଣି ଷ୍ଟାଡିୟମରେ ସ୍ଥାପନ ଷ୍ଟାଡିୟମରେ ସ୍ଥାପନ କରାଗଲେ, ଏହାକୁ ଡ୍ରପ୍‌ ଇନ୍‌ ପିଚ୍‌ କୁହାଯାଇଥାଏ। ଗତ ଡିସେମ୍ବରରୁ ଫ୍ଲୋରିଡାରେ ଏହି ଡ୍ରପ୍‌ ଇନ୍‌ ପିଚ୍‌ ପ୍ରସ୍ତୁତି କାର୍ଯ୍ୟ ଚାଲିଛି। ଡ୍ରପ୍‌ ଇନ୍‌ ପିଚ୍‌ ସାଧାରଣତଃ ଅଷ୍ଟ୍ରେଲିଆରେ ବେଶି ବ୍ୟବହାର କରାଯାଇଥାଏ।

ଅଷ୍ଟ୍ରେଲିଆ ମାଟିରେ ଆଡିଲେଡ କ୍ୟୁରେଟର ପ୍ରସ୍ତୁତ କରିଛନ୍ତି ଏହି ପିଚ୍‌
ଅଷ୍ଟ୍ରେଲିଆର ମାଟି ବ୍ୟବହାର କରି ଆଡିଲେଡ କ୍ୟୁରେଟର ଏହି ଡ୍ରପ୍‌ ଇନ୍‌ ପିଚ୍‌ ପ୍ରସ୍ତୁତ କରିଛନ୍ତି। ଆଡିଲେଡ ଓଭାଲ ଗ୍ରାଉଣ୍ଡର ମୁଖ୍ୟ କ୍ୟୁରେଟର ଡେମିୟର ହଗ୍‌ ଏହି ଭଳି ୧୦ଟି ପିଚ୍‌ ପ୍ରସ୍ତୁତ କରିଛନ୍ତି। ନାସାଉ ଷ୍ଟାଡିୟମରେ ମୋଟ୍‌ ୪ଟି ଡ୍ରପ୍‌ ଇନ୍‌ ପିଚ୍‌ ଲଗାଯିବ ଓ ଏଠାରେ ବିଶ୍ୱକପ୍‌ ମ୍ୟାଚ୍‌ ଖେଳାଯିବ। ଆଉ ୬ଟି ଅଭ୍ୟାସ ପାଇଁ ସ୍ଥାପନ କରାଯିବ ବୋଲି ଆଇସିସି ତରଫରୁ କୁହାଯାଇଛି। ଟି-୨୦ ବିଶ୍ୱକପ୍‌ ଜୁନ୍‌ ୧ରୁ ଆରମ୍ଭ ହୋଇ ୨୯ରେ ଶେଷ ହେବ।