ପୁରୀ: ଛତିଶାନିଯୋଗ ବୈଠକ ଶେଷ ହୋଇଛି। ଆସନ୍ତା ଡିସେମ୍ବର ୧୭ ଆରମ୍ଭ ହେବ ରତ୍ନଭଣ୍ଡାର ମରାମତି କାର୍ଯ୍ୟ। ୩ମାସ ଭିତରେ ଶେଷ ହେବ ଏହି ରତ୍ନଭଣ୍ଡାର ମରାମତି କାର୍ଯ୍ୟ । ଦ୍ୱିତୀୟ ଭୋଗମଣ୍ଡପ ପରଠାରୁ ଏଏସଆଇ ମରାମତି କାର୍ଯ୍ୟ ଆରମ୍ଭ କରିଛି। ଦୈନିକ ୫ଘଣ୍ଟା ରୁ ୬ଘଣ୍ଟା ପର୍ଯ୍ୟନ୍ତ ଏଏସଆଇ ମରାମତି କରିବ। ଦିନ ଗୋଟାଏରୁ ସଂଧ୍ୟା ୫ଟା/୬ ଟା ଯାଏଁ ଚାଲିବ ମରାମତି କାମ। ଶନିବାର, ରବିବାର କିମ୍ବା ୩୧ ଡିସେମ୍ବର ଅର୍ଥାତ ବିଶେଷ ଦିନ ମାନଙ୍କର ମରାମତି ହେବନାହିଁ। ରତ୍ନଭଣ୍ଡାର ମରାମତି ସମୟରେ ବାହାରକାଠରୁ ଦର୍ଶନ କରିବେ ଭକ୍ତ। ମରାମତି ସମୟରେ ମହାପ୍ରଭୁଙ୍କ ନୀତିକାନ୍ତିକୁ ଗୁରୁତ୍ୱ। ରତ୍ନ ଭଣ୍ଡାର ମରାମତି ସହ ପହିଲି ଭୋଗ, ଦେବାବିଶେକ ନୀତି ଓ ମକର ସଂକ୍ରାନ୍ତି ନେଇ ଛତିଶାନିଯୋଗ ବୈଠକରେ ନୀତି ନିର୍ଘଣ୍ଟ କରାଯାଇଛି। ଏ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ସୂଚନା ଦେଇଛନ୍ତି।

ପୁରୀ: ବୁଧବାର ଆଷାଢ଼ ଶୁକ୍ଳ ଏକାଦଶୀ। ଏହି ପବିତ୍ର ତିଥିରେ ଅନୁଷ୍ଠିତ ହେବ ମହାପ୍ରଭୁଙ୍କର ଦୁର୍ଲଭ ସୁନାବେଶ। ମହଣ ମହଣ ସୁନା ଅଳଙ୍କାରରେ ସଜେଇ ହେବେ ରଥାରୂଢ଼ ଦାରୁବିଗ୍ରହ। ଏଥିପାଇଁ ପ୍ରଶାସନ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି। ଏହି ଅପୂର୍ବ ବେଶ ଲାଗି ଏଥର ଶ୍ରୀମନ୍ଦିର ପରିସର ଅସ୍ଥାୟୀ ବାହାର ଭଣ୍ଡାର (ଚାଙ୍ଗଡ଼ା ଘର)ରୁ ବାହାରିବ ମହଣମହଣ ସୁନା ଓ ରୁପା ଅଳଙ୍କାର। ବହୁବିଧ ରତ୍ନଅଳଙ୍କାର ଲାଗି ହୋଇ ରଥ ଉପରେ ଭକ୍ତଙ୍କୁ ଦର୍ଶନ ଦେବେ ଦାରୁବ୍ରହ୍ମ। ବୁଧବାର ପୂର୍ବାହ୍ନରେ ଅସ୍ଥାୟୀ ବାହାର ରତ୍ନଭଣ୍ଡାର (ଚାଙ୍ଗଡା ଘର) ଖୋଲାଯିବ।

ସେଥିରୁ ସୁନାବେଶ ଲାଗି ଆବଶ୍ୟକ ଅଳଙ୍କାର ବାହାର କରାଯିବ। ଭଣ୍ଡାରମେକାପ ଓ ବଣିଆଙ୍କ ଉପସ୍ଥିତିରେ ଅଳଙ୍କାରଗୁଡ଼ିକ ସଫା ହେବ। ରଥ ଉପରେ ମହାପ୍ରଭୁଙ୍କ ମଇଲମ ଓ ଏକାଦଶୀ ସର୍ବାଙ୍ଗ ନୀତି ବଢ଼଼ିବା ପରେ ଅପରାହ୍ଣ ୫ଟାରୁ ସୁନାବେଶ ଆରମ୍ଭ ହେବ। ନିର୍ଘଣ୍ଟ ସମୟ ପୂର୍ବରୁ ଅର୍ଥାତ୍‌‌ ସଅଳ ନୀତିକାନ୍ତି କରାଯିବା ଲାଗି ପୂର୍ବରୁ ଦଇତାପତିଙ୍କ ସହ ପ୍ରଶାସନର ଆଲୋଚନା ବେଳେ ନିଷ୍ପତ୍ତି ନିଆଯାଇଛି। ସେହିପରି ସୁନାବେଶ ସମୟରେ ରଥାରୂଢ଼ ଠାକୁରଙ୍କ ସମ୍ମୁଖରେ କୌଣସି ସେବାୟତ ରହିବେ ନାହିଁ। ଫଳରେ ଶ୍ରଦ୍ଧାଳୁମାନେ ଭଲ ଭାବେ ଦର୍ଶନ କରିପାରିବେ। ସେହିପରି ରଥ ଉପରକୁ ଅଣସେବାୟତ ଚଢ଼ିବେ ନାହିଁ। ସେହିପରି କୌଣସି ସେବାୟତ ମୋବାଇଲ ଫୋନ ନେଇପାରିବେ ନାହିଁ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ସ୍ପଷ୍ଟ କରିଛନ୍ତି। ଯଦି କେହି ଏହାକୁ ନ ମାନନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।

– ଶ୍ରଦ୍ଧାଳୁ କାଳିଆର ଦର୍ଶନ ସହ ବୃକ୍ଷରାଜି ମଧ୍ୟରେ ହଜି ଯାଉଛନ୍ତି। ମନ ମୋହି ନେଉଛି ଶ୍ରୀ ମନ୍ଦିର ପରିସରରେ ଶୋଭା ପାଉଥିବା ଜୁଇ, ଜାଇ, ହେନା ଓ ମଲ୍ଲି। ଲ୍ୟାଣ୍ଡସ୍କେପିଂ ଅଞ୍ଚଳରେ ଭକ୍ତ ତାହାର ବାସ୍ନାରେ ରେ ବିମୋହିତ ହେଉଛନ୍ତି। ତାହା ସହ ତୁଳସୀ ତୁଳସୀ ବସୁଛି ପରିକ୍ରମା ମାର୍ଗ । ଶ୍ରୀ ମନ୍ଦିର ପରିକ୍ରମା ପରିସରରେ ପ୍ରାୟ ୧ ଲକ୍ଷ ବୃକ୍ଷ ଲଗାଯାଉଛି। ଏଥିରେ ୧୨୦ ପ୍ରଜାତି ରହିଛନ୍ତି। ପ୍ରତିରୋପିତ ହେଉଥିବା ବୃକ୍ଷ ଗୁଡ଼ିକ ଜଗନ୍ନାଥ ସଂସ୍କୃତି ସହ ଜଡ଼ିତ। ବାହାର ପ୍ରଦକ୍ଷିଣ ମାର୍ଗ , ଭିତର ପ୍ରଦକ୍ଷିଣ ଫୁଲର ସବୁଜିମାରେ ଝଲସିଉଠୁଛି। ଭକ୍ତ ଏହାକୁ ଦେଖି ଅଟକୁ ଯାଉଛି। ଶ୍ରୀ ମନ୍ଦିର ପରିକ୍ରମା ପ୍ରକଳ୍ପର ମଧ୍ୟଭାଗରେ ଲ୍ୟାଣ୍ଡସ୍କେପିଂର ସୃଜନୀ ଛିଟା ଦେଖିବାକୁ ମିଳିବ। ୨ ଟି ସଂସ୍ଥା ଏହାର ଦାୟିତ୍ବ ବହନ କରିଛି ।ପ୍ରାୟ ୧୫୦ ରୁ ଅଧିକ ମାଳି ଓ କର୍ମଚାରୀ ଏଥିରେ ନିୟୋଜିତ ଅଛନ୍ତି। ମାଳି ନିରନ୍ତର ପ୍ରଭୁ ସେବାରେ ନିଜକୁ ସମର୍ପିତ କରି ଦେଇଛି।

ବିଶ୍ବନିୟନ୍ତାଙ୍କ ପାଇଁ ସୁଗନ୍ଧରାଜ
ବିଶ୍ବ ନିୟନ୍ତା କଳା ଠାକୁର ପୁଷ୍ପକୁ କେତେ ଯେ ଭଲ ପାଆନ୍ତି। ସେଥି ପାଇଁ ମହାପ୍ରଭୁ ରାଜାଧିରାଜଙ୍କ ଲାଗି ପରିକ୍ରମା ପରିସର ମଧ୍ୟରେ ଲାଗିଛି ପ୍ରାୟ ୯୦ ହଜାର ରୁ ଲକ୍ଷେ ଗଛ। ସୁଗନ୍ଧରାଜ, ଜୁଇ, ଜାଇ, ହେନା ଓ ମଲ୍ଲିରେ ପରିସର ଚହଟୁଛି। ୨୨ ହଜାର ତୁଳସୀ ଗଛ ରେ ଶ୍ରୀ କ୍ଷେତ୍ର ତୁଳସୀ ତୁଳସୀ ବାସୁଛି। ତାହା ସହ ରହିଛି ସ୍ୱର୍ଣ୍ଣଚମ୍ପା, କାମିନୀ ଓ କୁନ୍ଦମଲ୍ଲି ପରି ଭଳିକି ଭଳି ପୁଷ୍ପ। ଯାହା ଭକ୍ତର ମନ, ପ୍ରାଣ ଓ ହୃଦୟକୁ ଲୋଟି ନେଉଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୫ ଟି ଅଧ୍ୟକ୍ଷ ଭି.କେ ପାଣ୍ଡିଆନ୍ ଙ୍କ ମାର୍ଗଦର୍ଶନ ଓ ପ୍ରତ୍ୟକ୍ଷ ତତ୍ତ୍ବାବଧାନରେ ସବୁଜ ବଳୟ ସୁନ୍ଦର ରୂପ ନେଉଛି। ପରିକ୍ରମା ମାର୍ଗରେ ଶ୍ରଦ୍ଧାଳୁ ପୁଷ୍ପକୁ ଦେଖି ଅଟକି ଯିବ । ତାହା ସହ ସେଠି ବାଧ୍ୟ ହୋଇ ସେଲଫି ବି ନେଵ। ଏପରି ସୁଶୋଭିତ ହେଉଛି ଲୀଳାମୟ ଠାକୁରଙ୍କ ପୁଷ୍ପର ଏ ଉଦ୍ୟାନ।

ଶୋଭା ବଢ଼ାଉଛି କଦମ୍ବ, ଚମ୍ପା, ମଲ୍ଲୀ
ଶ୍ରୀ ମନ୍ଦିର ପରିକ୍ରମା ମାର୍ଗର ଭିତର ପ୍ରଦକ୍ଷିଣର ୧୪ ମିଟର ଲ୍ୟାଣ୍ଡସ୍କେପିଂ ଅଞ୍ଚଳରେ ମଧ୍ୟ ପୁଷ୍ପରାଜର ପ୍ରାଣ ପ୍ରତିଷ୍ଠା ହୋଇଛି। ବଡ଼ ବଡ଼ ଗଛ ଏଠି ଆକାଶ ମାର୍ଗକୁ ଛୁଉଁଥିବାର ଭ୍ରମ ସୃଷ୍ଟି କରୁଛି। ତାହା ସହ ଗଢ଼ି ଉଠୁଛି ସବୁଜ ବଳୟ। ପ୍ରାୟ ୬୦୦ ରୁ ଅଧିକ ଗଛ ଏଠାରେ ଲଗା ଯାଉଛି। ବଉଳ, ରୁଦ୍ରଚମ୍ପା, ସ୍ବର୍ଣ୍ଣ ଚମ୍ପା, ନିମ୍ବ, ଛତିଆନା, ନାଗେଶ୍ବର, ନାଗମଲ୍ଲୀ, କଦମ୍ବ, କାଠଚମ୍ପା ପରି ବୃକ୍ଷ ଏଠାରେ ବିରାଜମାନ କରୁଛନ୍ତି। କେବଳ ଚାରା ରୂପରେ ବୃକ୍ଷ ରୋପଣ କରାଯାଉନି; ୫ ରୁ ୧୫ ଫୁଟ ଉଚ୍ଚତାର ଗଛର ସ୍ଥାନାନ୍ତାରଣ ମଧ୍ୟ ହେଉଛି। ଯାହା କିଛି ବର୍ଷ ଭିତରେ ହିଁ ଛାୟା ପ୍ରଦାନ କରିବାରେ ସହାୟ ହେବ ।

ପୁରୀକୁ ଆସିଛି ଚନ୍ଦନପୁର ମାଟି
ପରିକ୍ରମା ମାର୍ଗରେ ସବୁଜ ବଳୟ ସୃଷ୍ଟି ପାଇଁ ମାଟିର ପ୍ରକ୍ରିୟାକରଣ କରଯାଇଛି। ଯାହା ଚନ୍ଦନପୁରରୁ ଶ୍ରୀ କ୍ଷେତ୍ରକୁ ଆସି ପବିତ୍ର ପବିତ୍ର ଲାଗୁଛି। ଏହି ମାଟିର ବିଶେଷତ୍ବ ହେଉଛି ଏହା ଶୀଘ୍ର ବୃକ୍ଷକୁ ବୃଦ୍ଧିରେ ସାହାଯ୍ୟ କରିବ। ଲ୍ୟାଣ୍ଡସ୍କେପିଂ ଅଞ୍ଚଳରେ ଛୋଟ ବଡ଼ ପ୍ରାୟ ୧୨୦ ପ୍ରଜାତିର ରେଡ୍ ଆଲଡର, ଗ୍ରୀନ ଆଲଡର, ପେଣ୍ଟାସ୍, ସିଜିୟମ, ଇକ ଜୋରା, ରୋଇଓ, ଟଗର, ତରାଟ, ଆମାଜନ ବ୍ଲୁ ଭଳି ବୃକ୍ଷ ରହିଛି। ରାଜ୍ୟ ଓ ରାଜ୍ୟ ବାହାରୁ ବୃକ୍ଷ ଏଠାକୁ ଆସିଛି। ଆନ୍ଧ୍ରପ୍ରଦେଶ, ଉତ୍ତରପ୍ରଦେଶ, କୋଲକାତା, ଛତିଶଗଡ଼ ଓ ମହାରାଷ୍ଟ୍ରରୁ ମଧ୍ୟ ଶ୍ରୀମନ୍ଦିର ପରିସରର ଶ୍ରୀ ବୃଦ୍ଧି କରି ପ୍ରଭୁଙ୍କ ପାଦରେ ଲାଗି ପ୍ରଭୁ କୃପା ପାଇବା ପାଇଁ ଗଛ ସବୁ ପୁରୀ ଆସିଛନ୍ତି। ସିଂହ ଦ୍ୱାର ପାର୍ଶ୍ବବର୍ତ୍ତୀ ଅଞ୍ଚଳରେ ଚଳମାନ ବାକ୍ସ ରେ ବୃକ୍ଷ ଶୋଭା ବଢ଼ାଉଛି। ଗ୍ରେନ୍ ୱେ କ୍ରିଏସନ ନାମକ ଏକ ସଂସ୍ଥା ୫ ବର୍ଷ ପର୍ଯ୍ୟନ୍ତ ଏହାର ସୁରକ୍ଷା ଦାୟିତ୍ବରେ ରହିବ। ସବୁଜିମା ବଳୟ ମଧ୍ୟରେ ଶାନ୍ତିପୂର୍ଣ୍ଣ ବାତାବରଣ କରି ଏହି ପୁଷ୍ପ ବୃକ୍ଷ ଓ ବଡ଼ ଗଛ ସବୁ ଶ୍ରୀ ମନ୍ଦିର ପରିକ୍ରମା ପ୍ରକଳ୍ପକୁ ଆହୁରି ସୁସଜ୍ଜିତ କରିବେ । ଯାହା କେବଳ ରାଜ୍ୟ ସରକାରଙ୍କ ଅଭିନବ ପ୍ରୟାସ ଓ ନିରନ୍ତର ପରିଶ୍ରମ ବଳରେ ଆଜି ସଫଳ ହୋଇଛି।

ଏବେ ପୁରୀକୁ ବାରମ୍ବାର ଆସିବାକୁ ଇଚ୍ଛା ହେଉଛି
ପୁରୀ ଆଉ ଶ୍ରୀମନ୍ଦିର ଆସିବା ପାଇଁ ବାରମ୍ବାର ଇଚ୍ଛା ହେଉଛି। ଖୁବ୍‌‌ ସୁନ୍ଦର ବ୍ୟବସ୍ଥା। ଠାକୁରଙ୍କ ନୀତି ସମୟରେ ପୂର୍ବରୁ ଧାଡ଼ିରେ ଛିଡ଼ାହେବା ବହୁତ କଷ୍ଟ ଲାଗୁଥିଲା। ହେଲେ ଏବେ ସେଭଳି ସ୍ଥିତି ନାହିଁ। ବ୍ୟାରିକେଡରେ ବସିବା ସୁବିଧା ରହିଛି। ପିଇବା ପାଇଁ ପାଣି ବି ଯୋଗାଇ ଦିଆଯାଇଛି। ବରିଷ୍ଠ ନାଗରିକଙ୍କ ପାଇଁ ସ୍ୱତନ୍ତ୍ର ଧାଡି ରହିଛି। ପରିକ୍ରମା ପ୍ରକଳ୍ପ ଦ୍ୱାରା ଶ୍ରୀମନ୍ଦିର ଆଉ ମନ୍ଦିର ଚାରିପାଖ ବହୁତ ସୁନ୍ଦର ଲାଗୁଛି। ନବୀନ ପଟ୍ଟନାୟକଙ୍କ ପାଇଁ ହିଁ ଏହା ସମ୍ଭବ ହୋଇଛି।
କୃଷ୍ଣ ଦାସ, ବ୍ରହ୍ମପୁର

ଅକଳ୍ପନୀୟ ଉନ୍ନତିକରଣ
ପରିକ୍ରମା ପ୍ରକଳ୍ପ ଏକ ଐତିହାସିକ ପଦକ୍ଷେପ। ମୁଁ ବାହାର ରାଜ୍ୟରୁ ଆସିଥିଲେ ହେଁ ଶ୍ରୀମନ୍ଦିର ଚତୁଃପାର୍ଶ୍ବର ଉନ୍ନତିକରଣ ମୋତେ ଅଭିଭୂତ କରିଛି। ଦୁଇବର୍ଷ ପୂର୍ବରୁ ପୁରୀ ଆସିଥିଲି, ସେତେବେଳେ ଏହାର କାମ ଆରମ୍ଭ ହେଉଥିଲା। ଏବେ ବେଶ୍‌‌ ସଫାସୂତରା ଲାଗୁଛି। ମନ୍ଦିର ଚତୁଃପାର୍ଶ୍ବ ବୁଲିବାରେ କୌଣସି ଅସୁବିଧା ହେଉନାହିଁ। ନବୀନ ପଟ୍ଟନାୟକ ହେଉଛନ୍ତି ଜଣେ ଅଦ୍ୱିତୀୟ ନେତା। ତାଙ୍କର ଦୂରଦୃଷ୍ଟି ଅନ୍ୟମାନଙ୍କଠାରୁ ଭିନ୍ନ।
ସଞ୍ଜୟ ଚୌଧୁରୀ, ବିକାନୀର, ରାଜସ୍ଥାନ

ସେବେ ଓ ଏବେ: ଆକାଶପାତାଳ ଫରକ
୮/୧୦ ବର୍ଷ ପୂବେ ପୁରୀ ଆସିଥିଲି। ସେତେବେଳର ପୁରୀ ଆଉ ଏବେର ପୁରୀ ଭିତରେ ଆକାଶ ପାତାଳ ଫରକ୍‌‌ ଦେଖୁଛି। ଏବେ କିନ୍ତୁ ବହୁତ ଭଲ ଲାଗୁଛି। ଆଗରୁ ବଡ଼ଦାଣ୍ଡରେ ପ୍ରବଳ ଭିଡ଼ ହେଉଥିଲ। କିନ୍ତୁ ଏବେ ଚାଲି ଚାଲି ଯିବାକୁ ଭଲ ଲାଗୁଛି। ମନ୍ଦିର ଚତୁଃପାର୍ଶ୍ବ ସଂକୁଚିତ ରାସ୍ତା ଥିଲା। ହେଲେ ସବୁ ବ୍ୟବସ୍ଥା ସୁନ୍ଦର ଲାଗୁଛି। କିନ୍ତୁ ମନ୍ଦିର ଭିତରେ ଦର୍ଶନ ପାଇଁ ଭିଡ଼ ହେଉଛି। ଆମ ଭଳି ବୟସ୍କ ଲୋକଙ୍କ ଦର୍ଶନ ବ୍ୟବସ୍ଥା ଆଉ ଟିକେ ସୁବିଧା ହେଲେ ଭଲ ହୁଅନ୍ତା।
ଧାଗୁ ବୋଇ, ମଧ୍ୟପ୍ରଦେଶ

ଅକଳ୍ପନୀୟ ଉନ୍ନତିକରଣ
ଦୀର୍ଘ ବର୍ଷ ର ପରିକଳ୍ପନା ବାସ୍ତବ ରୂପ ନେଇଛି। ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିଶ୍ଚିତ ଏକ ସ୍ୱାଗତଯୋଗ୍ୟ ପଦକ୍ଷେପ। ଏହାଦ୍ୱାରା ଶ୍ରୀମନ୍ଦିରର ସୁରକ୍ଷା, ସୌନ୍ଦର୍ଯ୍ୟକରଣ ସାଙ୍ଗକୁ ଦୂରଦୂରାନ୍ତରୁ ଆସୁଥିବା ଭକ୍ତଙ୍କ ସୁବିଧା ପାଇଁ ବିଭିନ୍ନ ପ୍ରକାର ବ୍ୟବସ୍ଥା କରାଯାଇଛି। ଶ୍ରଦ୍ଧାଳୁମାନେ ବିଭିନ୍ନ ସମ୍ପ୍ରଦାୟର ମଠଗୁଡ଼ିକୁ ମଧ୍ୟ ବୁଲି ଦେଖିପାରିବେ। ସେଥିଲାଗି ମଠଗୁଡ଼ିକର ସୌନ୍ଦର୍ଯ୍ୟକରଣ ମଧ୍ୟ କରାଯାଇଛି। ପୁରୀବାସୀଙ୍କ ପୂର୍ଣ୍ଣ ସହଯୋଗ ଯୋଗୁଁ ଆଜି ଶ୍ରୀକ୍ଷେତ୍ର ଧାମ ନୂଆରୂପ ନେଇଛି।
ନାରାୟଣ ରାମାନୁଜ ଦାସ, ମହନ୍ତ, ଉତ୍ତରପାର୍ଶ୍ବ ମଠ

ସରକାରଙ୍କୁ ଧନ୍ୟବାଦ
ପ୍ରଥମ ଥର ପ୍ରଭୁ ଜଗନ୍ନାଥଙ୍କ ଦର୍ଶନ ପାଇଁ ପୁରୀ ଆସିଛି। ଏଠାକାର ଦର୍ଶନ ବ୍ୟବସ୍ଥା ଦେଖି ମୁଁ ବହୁତ ଖୁସି। ଭକ୍ତଙ୍କ ସୁବିଧା ପାଇଁ ଏମିତି ସୁନ୍ଦର ବ୍ୟବସ୍ଥା ମୁଁ ଆଗରୁ ଯାଇଥିବା ଅନ୍ୟ କୌଣସି ମନ୍ଦିରରେ ଦେଖି ନ ଥିଲି। ମନ୍ଦିର ଚାରିପଟ ବି ଖୁବ୍‌‌ ସୁନ୍ଦର ଲାଗୁଛି। ଶ୍ରଦ୍ଧାଳୁଙ୍କ ପାଇଁ ଏଭଳି ପଦକ୍ଷେପ ନେଇଥିବା ଓଡ଼ିଶା ସରକାର ଏବଂ ଏଠାକାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ।
ଅଙ୍କୁଶ ଅସୱାରା,
ଉଜ୍ଜୟିନୀ, ମଧ୍ୟପ୍ରଦେଶ

ପୂରଣ ହୋଇଛି ଭକ୍ତଙ୍କ ଆବଶ୍ୟକତା
ପରିକ୍ରମା ପ୍ରକଳ୍ପ ଯୋଜନା ମାଧ୍ୟମରେ ଶ୍ରୀମନ୍ଦିର ମେଘନାଦ ପାଚେରିଠାରୁ ୭୫ ମିଟର ଅଞ୍ଚଳ ଖାଲି କରାଯାଇଛି। ଏହା ମଧ୍ୟରେ ଭକ୍ତଙ୍କ ସୁବିଧା ପାଇଁ ଯାହାସବୁ ବ୍ୟବସ୍ଥା କରାଯାଇଛି ବାସ୍ତବିକ ସେ ସବୁର ଆବଶ୍ୟକତା ଥିଲା। ମନ୍ଦିର ବାହାର ବହୁତ ସୁନ୍ଦର ଲାଗୁଛି। ବିଶେଷକରି ବରିଷ୍ଠ ନାଗରିକମାନେ ଯେପରି ଭିଡ଼ରେ ନ ପଶି ଭଲ ଭାବେ ଦର୍ଶନ କରିପାରିବେ ସେ ବ୍ୟବସ୍ଥା ହେଲେ ଭଲ ହୁଅନ୍ତା।
ଅନିମା ସାହୁ, ଭୁବନେଶ୍ୱର

‘ପରିକ୍ରମା’ ଦେଇଛି ନୂଆ ପରିଚୟ
ପୂର୍ବରୁ ଶ୍ରୀମନ୍ଦିର ଚତୁଃପାର୍ଶ୍ବ ସ୍ଥିତି ଦୟନୀୟ ଥିଲା। ସଂକୀର୍ଣ୍ଣ ରାସ୍ତା ଯୋଗୁଁ ମହାପ୍ରଭୁଙ୍କ ଯାନିଯାତ୍ରାରେ ବାଧା ଉପୁଜୁଥିଲା। ଓଡ଼ିଶା ବାହାରୁ ଆସୁଥିବା ସାଧୁସନ୍ଥ ଓ ସେମାନଙ୍କ ଅନୁଗାମୀ ଶ୍ରୀମନ୍ଦିର ପରିକ୍ରମା କରୁପାରୁ ନ ଥିଲେ। ହେଲେ ଏବେ ରାଜ୍ୟ ସରକାର ପରିକ୍ରମା ପ୍ରକଳ୍ପ କରିଥିବାରୁ ଏ ସବୁ ସମସ୍ୟାର ସମାଧାନ ହୋଇଛି। ଶ୍ରୀମାର୍ଗ, ଜେବିପିସି, ବହୁତଳ ପାର୍କିଂ ଓ ସର୍ବୋପରି ଶ୍ରୀସେତୁ ଭକ୍ତଙ୍କୁ ନିଶ୍ଚିତ ଶ୍ରୀକ୍ଷେତ୍ରକୁ ଆକର୍ଷିତ କରିବ। ବିଶ୍ୱସ୍ତରୀୟ ବ୍ୟବସ୍ଥା ପୁରୀ ଧାମକୁ ନୂଆ ପରିଚୟ ଦେବ।
ମନୋଜ ରଥ, ସଭାପତି, ଉତ୍କଳ ବିଦ୍ୱତ୍‌‌ ପରିଷଦ

ଦୂରଦୃଷ୍ଟିସମ୍ପନ୍ନ ନେତା ନବୀନ
୨୦୧୮ରେ ସପରିବାର ପୁରୀ ଆସିଥିଲୁ। ସେତେବେଳେ ପୁରୀ ବହୁତ ଗହଳି ଲାଗୁଥିଲା। ମନ୍ଦିର ଚାରିପାଖରେ ଦୋକାନ ଥିଲା। ଏବେ ସେମିତି ସ୍ଥିତି ନାହିଁ। ସବୁକିଛି ସୁନ୍ଦର ହୋଇଯାଇଛି। ପରିବେଶ ଶାନ୍ତି ଲାଗୁଛି। କେବେ ସ୍ୱପ୍ନରେ ଭାବି ନ ଥିଲୁ ଯେ, ପୁରୀ ଏମିତି ବଦଳି ଯାଇଥିବ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦେବି। ସେ ଭାରତର ଜଣେ ଦୂରଦୃଷ୍ଟିସମ୍ପନ୍ନ ନେତା। ତାଙ୍କର ଉଦ୍ୟମ ପାଇଁ ଜଗନ୍ନାଥ ଧାମର କାୟାକଳ୍ପ ବଦଳିଛି।
କୌଶଲ ସାହୁ, ଧମ୍‌‌ତେରମ, ଛତିଶଗଡ଼

ଉତ୍ତମ ବ୍ୟବସ୍ଥା
ଯେ କେହି ମହାପ୍ରଭୁଙ୍କୁ ଦର୍ଶନ ପରିକ୍ରମା ପ୍ରକଳ୍ପକୁ ପ୍ରଶଂସା କରିବେ। ଭକ୍ତଙ୍କ ପାଇଁ ଏସି ଶେଡ୍‌‌ଠାରୁ ଆରମ୍ଭ କରି ବ୍ୟାରିକେଡରେ ବସିବାର ସୁବିଧା କରାଯାଇଛି। ଏବେ ବାହାରୁ ମନ୍ଦିର ଭଲ ଭାବେ ଦେଖାଯାଉଛି। ପୂର୍ବରୁ ଚତୁଃପାର୍ଶ୍ବ ଅଣଓସାରିଆ ରାସ୍ତା ଥିଲା। ଭକ୍ତମାନେ ଅସୁବିଧା ଭୋଗୁଥିଲେ। ଏବେ ସେମିତି ସ୍ଥିତି ନାହିଁ, କିନ୍ତୁ ଭିତରେ ଦର୍ଶନ ଯେପରି ଭଲ ଭାବେ କରିପାରିବେ ସେ ଦିଗରେ ଫୋକସ ଦିଆଗଲେ ଶ୍ରୀମନ୍ଦିରର ଗରିମା ଆହୁରି ବଢ଼ିବ।
କାଜଲ ନାୟକ, କଟକ

ଅଭୂତପୂର୍ବ ବ୍ୟବସ୍ଥା, ସ୍ୱଚ୍ଛ ଓ ସୁନ୍ଦର
ସମ୍ପର୍କୀୟଙ୍କ ସହ ମହାପ୍ରଭୁଙ୍କ ଦର୍ଶନ ପାଇଁ ଆସିଥିଲୁ। ଭଲଭାବେ ପ୍ରଭୁଙ୍କ ଦର୍ଶନ କଲୁ। ଏଠାକାର ବ୍ୟବସ୍ଥା ଅଦ୍ଭୁତପୂର୍ବ। ପରିବେଶ ସ୍ୱଚ୍ଛ ଏବଂ ସୁନ୍ଦର ଲାଗୁଛି। ଭକ୍ତଙ୍କ ସୁଖଦ ଦର୍ଶନ ପାଇଁ ସବୁ ପ୍ରକାର ସୁବିଧା କରାଯାଇଛି। ବିଶେଷକରି ପୁଲିସ ବ୍ୟବସ୍ଥା ବି ଆଗ ଅପେକ୍ଷା ବହୁତ ଭଲ। ବାସ୍ତବିକ ଓଡ଼ିଶା ସରକାରଙ୍କର ଏକ ଭଲ ଉଦ୍ୟମ। ଏଥିପାଇଁ ଏଠାକାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଯେତେ ପ୍ରଶଂସା କଲେ ବି କମ୍‌‌ ହେବ।
ଈଶ୍ୱର ଶରଣ ମିଶ୍ରା, ଗୁଣ୍ଡା, ୟୁପି

ପୁରୀ: ପବିତ୍ର ଧନୁ ସଂକ୍ରାନ୍ତି ଅବସରରେ ଶନିବାରଠାରୁ ଶ୍ରୀମନ୍ଦିରରେ ଆରମ୍ଭ ହୋଇଛି ପହିଲି ଭୋଗ ନୀତି । ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ବତନ୍ତ୍ର ନୀତି ନିର୍ଘଣ୍ଟ ହୋଇଛି । ଏହି ନୀତି ଦୀର୍ଘ ଏକ ମାସ ଧରି ଆସନ୍ତା ମକର ସଂକ୍ରାନ୍ତି ପର୍ଯ୍ୟନ୍ତ ଚାଲୁ ରହିବ । ଏକ ମାସ ମା’ ମହାଲକ୍ଷ୍ମୀ ବାପ ଘରକୁ ଯିବାର ବିଧି ପରମ୍ପରା ଥିବାରୁ ମାସକ ପର୍ଯ୍ୟନ୍ତ ମାତା ଯଶୋଦା ପହିଲି ଭୋଗରେ ମହାପ୍ରଭୁଙ୍କ ଉଦ୍ଦେଶ୍ୟରେ ସକାଳୁ ସକାଳୁ ସୁସ୍ବାଦୁ ବ୍ୟଞ୍ଜନ ପ୍ରସ୍ତୁତ କରିଛନ୍ତି ।

ପହିଲି ଭୋଗରେ ମହାପ୍ରଭୁଙ୍କ ପାଇଁ ବିଭିନ୍ନ ବ୍ୟଞ୍ଜନ ତଥା ବଡ ଝିଲି, ଦରସୁଆ ବଡ଼ି, ଦରସୁଆ ଝିଲି, ବଡ଼ବଡା, କାକେରା, ଅମାଲୁ, ନଳୀ, ଏଣ୍ଡୁରି, ମୁଗେଇ, ଚଢ଼େଇ ନଦା, ଲଡ଼ୁ, ଗଜା, ଗଇଁଠା, ମଣ୍ଡା ଓ ଖଇର ଚୁଳ ଭଳି ଖାଦ୍ୟ ମହାପ୍ରଭୁଙ୍କ ଉଦ୍ଦେଶ୍ୟରେ ପ୍ରସ୍ତୁତ କରି ଲାଗି କରାଯାଇଛି । ପ୍ରତିଦିନ ସୂର୍ଯ୍ୟ ଉଦୟ ପୂର୍ବରୁ ମହାପ୍ରଭୁଙ୍କ ମଙ୍ଗଳ ଆଳତୀ ଓ ଅବକାଶ ନୀତି ବଢିବା ପରେ ପହିଲି ଭୋଗ ଲାଗି କରାଯାଏ ।

ପୁରୀ: ଆଜି ଶ୍ରୀମନ୍ଦିରରେ ମହାପ୍ରଭୁଙ୍କ ପଇତାଲାଗି ନୀତି ଅନୁଷ୍ଠିତ ହେବ। ଏଥିପାଇଁ ୫ ଘଣ୍ଟା ଦର୍ଶନ ବନ୍ଦ ରହିବ। ମଧ୍ୟାହ୍ନ ଧୂପ ସରିବା ପରେ ଦଇତାପତି ସେବକମାନେ ଏହି ନୀତି ପାଇଁ ଗର୍ଭଗୃହକୁ ପ୍ରବେଶ କରିବେ। ଏହା ଏକ ଗୁପ୍ତ ନୀତି ହୋଇଥିବାରୁ ଜୟ ବିଜୟ ଦ୍ୱାର ବନ୍ଦ କରାଯିବ।

ଶ୍ରୀଜିଉଙ୍କ ଶ୍ରୀଅଙ୍ଗ ସୁରକ୍ଷା ପାଇଁ କରାଯିବ ପଇତାଲାଗି ନୀତି । ଏହି ନୀତି ସମ୍ପନ୍ନ ପରେ ଠାକୁରମାନଙ୍କର ମହାସ୍ନାନ କରାଯିବ। ତେଣୁ ସନ୍ଧ୍ୟା ୫ଟାରୁ ରାତି ୧୦ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରଖାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।

ପୁରୀ: ଆଜି ସୋମବାର ଶ୍ରାବଣ-ମଳ ଶୁକ୍ଳ ଷଷ୍ଠୀ ତିଥି ଅବସରରେ ଶ୍ରୀବିଗ୍ରହ ମାନଙ୍କ ଖସାପଡା ଲାଗି ନୀତି ଅନୁଷ୍ଠିତ ହେବ । ଏଣୁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ଆପାତତଃ ସନ୍ଧ୍ୟା ୬ଟା ଠାରୁ ରାତ୍ର ୧୦ଟା ପର୍ଯ୍ୟନ୍ତ ସର୍ବ ସାଧାରଣ ଦର୍ଶନ ବନ୍ଦ ରହିବ। ଖସାପଡ଼ା ନୀତି ଏକ ଗୁପ୍ତ ସେବା ହୋଇଥିବାରୁ ଏହି ସମୟ ମଧ୍ୟରେ ସର୍ବସାଧାରଣ ଦର୍ଶନ ବାରଣ ରହିଛି।

ପୁରୀ: ତିନି ରଥରେ ଚତୁର୍ଦ୍ଧାମୂର୍ତ୍ତିଙ୍କୁ ଛେରାପହଁରା ପରେ ଆରମ୍ଭ ହୋଇଛି ରଥଟଣା । ମହାରାଜା ଗଜପତି ଦିବ୍ୟସିଂହ ଦେବ ତିନି ରଥରେ ଛେରାପହଁରା କରିବା ପରେ ରଥରୁ ଚାରମାଳ ଫିଟାଯାଇଥିଲା । ଏହା ପରେ ତିନି ରଥରେ ଅଶ୍ୱ ଯୋଖା ହୋଇଥିଲା । ରଥରେ ଅଶ୍ୱଯୋଖା ହେବା ପରେ ଆରମ୍ଭ ହୋଇଥିଲା ରଥଟଣା । ଶରଧାବାଲିରେ ଗଡ଼ିଲା ପ୍ରଭୁ ବଳଭଦ୍ରଙ୍କ ତାଳଧ୍ୱଜ ରଥ । ତାଳଧ୍ୱଜ ରଥ ପ୍ରଥମେ ଶରଧାବାଲିରେ ଗଡ଼ିବା ପରେ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଟଣା ଆରମ୍ଭ ହୋଇଥିଲା । ଶେଷରେ ମହାପ୍ରଭୁଙ୍କ ନନ୍ଦିଘୋଷ ରଥ ଟଣା ଆରମ୍ଭ ହୋଇଛି । ତିନିଠାକୁରଙ୍କ ରଥ ଦଉଡି ଛୁଇଁବା ପାଇଁ ଭକ୍ତଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳୁଛି । ହରିବୋଲ ଓ ହୁଳହୁଳିରେ ପ୍ରକମ୍ପିତ ହେଉଛି ଶରଧାବାଲି ।

ପୁରୀ: ଆଡପ ମଣ୍ଡପରେ ନବମୀ ସନ୍ଧ୍ୟା ଦର୍ଶନ ଅପରାହ୍ନ ୫ ଟା ଯାଏଁ ଜାରି ରହିବ।  ସକାଳ ୭ଟା ରୁ ଅପରାହ୍ନ ୫ ଟା ଯାଏଁ ଦର୍ଶନ ଚାଲିବ। ଅପରାହ୍ନ ୫ଟା ପରେ ଆଉ ଦର୍ଶନ ମିଳିବ ନାହିଁ । ବାହୁଡ଼ା ଯାତ୍ରା ପାଇଁ ସ୍ବତନ୍ତ୍ର ନୀତି କାନ୍ତି ଥିବାରୁ ଏଭଳି ନିଷ୍ପତ୍ତି ନିଆଯାଇଛି। ଆସନ୍ତା ୨୭ ତାରିଖରେ ପବିତ୍ର ନବମୀ ସନ୍ଧ୍ୟା ଦର୍ଶନ। ଏଥିପାଇଁ ଶ୍ରୀମନ୍ଦିର, ପୁଲିସ ଓ ଜିଲ୍ଲାପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ତେବେ ଅପରାହ୍ନ ୫ଟା ପରେ ଶ୍ରୀଗୁଣ୍ଡିଚା ମନ୍ଦିର ଭିତରେ ଥିବା ଭକ୍ତ ଦର୍ଶନର ସୁଯୋଗ ପାଇବେ। ତେବେ ବଡ଼ଦାଣ୍ଡରେ କିମ୍ବା ବ୍ୟାରିକେଡ଼ରେ ଥିବା ଭକ୍ତ ଆଉ ଦର୍ଶନ କରିପାରିବେ ନାହିଁ। ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ ଓ ଦଇତାପତି ନିଯୋଗ ସମ୍ପାଦକ ଏ ନେଇ ସୂଚନା ଦେଇଛନ୍ତି ।

ପୁରୀ: ଶ୍ରୀଦେବୀ (ଲକ୍ଷ୍ମୀ ଠାକୁରାଣୀ)ଙ୍କୁ ଛାଡ଼ି ଜଗନ୍ନାଥ ମହାପ୍ରଭୁ ଭାଉ ଭଉଣୀଙ୍କୁ ସାଥୀରେ ଧରି ନବଦିନାତ୍ମକ ଯାତ୍ରା କରିଛନ୍ତି। ତାଙ୍କୁ ସାଙ୍ଗରେ ନ ଆଣିଥିବାରୁ ଅଭିମାନରେ ରହିଛନ୍ତି ଶ୍ରୀଦେବୀ। ତେଣୁ କାଳିଆ ଠାକୁରଙ୍କୁ ଫେରାଇ ନେବାକୁ ଗୁଣ୍ଡିଚା ମନ୍ଦିର ଆସନ୍ତି ଶ୍ରୀଦେବୀ। ହେଲେ ୯ ଦିନର ଯାତ୍ରା ନ ସରିବା ପର୍ଯ୍ୟନ୍ତ ମହାପ୍ରଭୁ ଶ୍ରୀମନ୍ଦିର ଫେରିବେ ନାହିଁ ବୋଲି ଶ୍ରୀଦେବୀଙ୍କୁ କୁହନ୍ତି। ଏଥିରେ ରାଗିଯାଇ ଫେରିବା ବେଳେ ମହାପ୍ରଭୁଙ୍କ ନନ୍ଦିଘୋଷ ରଥ ଭାଙ୍ଗି ଦେଇଯାନ୍ତି। ଏହି ପରମ୍ପରାକୁ ହେରାପଞ୍ଚମୀ କୁହାଯାଏ। ଶନିବାର ପାଳିତ ହେବ ଏହି ନୀତି।

ଶ୍ରୀମନ୍ଦିରରୁ ଶ୍ରୀଦେବୀ ଆସିବେ ଗୁଣ୍ଡିଚା ମନ୍ଦିର। ଏଥିଲାଗି ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ନୀତି ନିର୍ଘଣ୍ଟ ହୋଇଛି। ଭୋର ୪ଟାରେ ଦ୍ୱାରଫିଟା ଯାଇ ୫ଟା ସୁଦ୍ଧା ମଙ୍ଗଳ ଆଳତି ବଢ଼ିବ। ମଇଲମ, ତଡ଼ପଲାଗି ନୀତି ପରେ ସକାଳ ୬ଟାରେ ଅବକାଶ ନୀତି ସମ୍ପନ୍ନ ହେବ। ସକାଳ ସାଢ଼େ ୬ଟାରୁ ସାଢ଼େ ୭ଟା ଘଣ୍ଟାଏ ସାହାଣମେଲା ଦର୍ଶନ ରହିଛି। ଏହାପରେ ରୋଷହୋମ, ସୂର୍ଯ୍ୟପୂଜା, ଦ୍ୱାରପାଳ ପୂଜା ହୋଇ ଠାକୁରଙ୍କ ବେଶ ବଢ଼ିବ। ପୂର୍ବାହ୍ନ ୧୦ଟାରୁ ୧୧ଟା ୩୦ ମଧ୍ୟରେ ସକାଳ ଧୂପ ଏବଂ ମଧ୍ୟାହ୍ନ ୧୨ଟା ୩୦ ସୁଦ୍ଧା ଭୋଗମଣ୍ଡପ ବଢ଼ିବ। ଏହାପରେ ମହାପ୍ରଭୁଙ୍କ ମଇଲମ, ଯାତ୍ରାଙ୍ଗୀ ମହାସ୍ନାନ, ଘଣ୍ଟଛତା ସର୍ବାଙ୍ଗ, ନୂଆଲୁଗା ଲାଗି ବେଶ ହେବ। ଅପରାହ୍ନ ୩ଟାରୁ ୪ଟା ୩୦ ମଧ୍ୟରେ ମଧ୍ୟାହ୍ନ ଧୂପ ନୀତି ବଢ଼ି ଅପରାହ୍ନ ୫ଟା ୩୦ ସୁଦ୍ଧା ଦ୍ୱିତୀୟ ଭୋଗମଣ୍ଡପ ବଢ଼ିବ। ଏହପରେ ମଇଲମ, ସନ୍ଧ୍ୟା ଆଳତି, ମହାପ୍ରଭୁଙ୍କ ବାଡ଼ରେ ମହାସ୍ନାନ, ତିନିବାଡ଼ରେ ଘଣ୍ଟଛତା ସର୍ବାଙ୍ଗ, ନୂଆଲୁଗା ଲାଗି ଏବଂ ଅଳଙ୍କାର ଲାଗି ଠାକୁରଙ୍କ ବେଶ ହେବ। ପରେ ସନ୍ଧ୍ୟା ଧୂପ ସମ୍ପନ୍ନ ହେବ। ସନ୍ଧ୍ୟାଧୂପ ପୂଜା ବସିଥିବା ସମୟରେ ରଥ ନିକଟରେ ନୀତି ସାରି ଶ୍ରୀଦେବୀ ରାତି ୯ଟା ୩୦ରେ ଜଗମୋହନକୁ ବିଜେ କରିବେ। ଏହାପରେ ଶ୍ରୀଦେବୀଙ୍କୁ ଆଜ୍ଞାମାଳ ଲାଗି ହେବା ପରେ ସନ୍ଧ୍ୟାଧୂପ ଟେରା ପଡ଼ିବ। ରାତି ୯ଟା ୫୦ ସୁଦ୍ଧା ସନ୍ଧ୍ୟାଧୂପ ବଢ଼଼଼଼ିବ। ପରେ ମଇଲମ, ଚନ୍ଦନଲାଗି ଓ ବଡ଼ସିଂହାର ହୋଇ ରାତ୍ର ୧ଟା ସୁଦ୍ଧା ପହୁଡ଼ ହେବାକୁ ନୀତି ନିର୍ଘଣ୍ଟ କରାଯାଇଛି।

ପୁରୀ: ଶେଷ ହେଲା ପହଣ୍ଡି ଯାତ୍ରା। ରଥାରୁଢ ହେଲେ ଚତୁର୍ଦ୍ଧାମୂର୍ତ୍ତି। ନିର୍ଦ୍ଧାରିତ ସମୟରେ ଶେଷ ହୋଇଛି ଚତୁର୍ଦ୍ଧାମୂର୍ତ୍ତିଙ୍କ ପହଣ୍ଡି ବିଜେ ନୀତି। ପହଣ୍ଡିରେ ଆସି ରଥାରୂଢ଼ ହୋଇସାରିଛନ୍ତି ଶ୍ରୀଜିଉ। ବାକି ନୀତିକାନ୍ତି ସହିତ ଛେରା ପହଁରା ସରିଲେ ହେବ ରଥଟଣା। ସବୁ ନୀତିକାନ୍ତି ସଠିକ ସମୟରେ ଚାଲିଥିବାରୁ ରଥଟଣା ବି ଧାର୍ଯ୍ୟ ସମୟରେ ହେବ ବୋଲି ଆଶା କରାଯାଉଛି।

ଶ୍ରୀ ସୁଦର୍ଶନ ଦେବଙ୍କ ପହଣ୍ଡି ବିଜେ ।

The 'Pahandi Bije' of Shree 'Sudarshana Deba'.#JayJagannatha#RathaYatra2023#Pahandi pic.twitter.com/9lSZfE4iLE

— Shree Jagannatha Temple, Puri (@JagannathaDhaam) June 20, 2023

ପ୍ରଥମେ ଚକ୍ରରାଜ ସୁଦର୍ଶନଙ୍କୁ ପହଣ୍ଡି କରି ଦେବଦଳନ ରଥରେ ବିଜେ କରାଯାଇଥିଲା । ଏହା ପରେ ବଡ଼ ଭାଇ ଶ୍ରୀ ବଳଭଦ୍ର ଧାଡ଼ ପହଣ୍ଡିରେ ଆସି ତାଳଧ୍ୱଜ ରଥରେ ବିଜେ ହେବା ପରେ ମା’ ସୁଭଦ୍ରାଙ୍କୁ ପହଣ୍ଡିରେ ଆଣି ଦେବଦଳନ ରଥରେ ବିଜେ କରିଥିଲେ । ଏହା ପରେ ବଡ଼ଦାଣ୍ଡରେ ଝୁଲି ଝୁଲି ରଥ ଉପରକୁ ଆସିଥିଲେ କାଳିଆ ସାଆନ୍ତେ । ପହଣ୍ଡି ସମୟରେ ହରିବୋଲ, ହୁଳହୁଳି ଓ ଜୟ ଜଗନ୍ନାଥ ଧ୍ୱନିରେ ଗଗନପବନ ମୁଖରିତ ହୋଇଉଠିଥିଲା । ତେବେ ଏହାରି ମଧ୍ୟରେ ରଥାରୁଢ଼ ହୋଇସାରିଛନ୍ତି ତିନି ଠାକୁର ।

ବଡ଼ଠାକୁର ଶ୍ରୀ ବଳଭଦ୍ରଙ୍କ ତାଳଧ୍ଵଜ ରଥକୁ ପହଣ୍ଡି ବିଜେ ।

'Pahandi Bije' of 'Badathakura Shree Balabhadra' to the 'Taladhwaja Ratha'.#RathaYatra2023#JayJagannatha#Pahandi pic.twitter.com/IWUXDlsCvR

— Shree Jagannatha Temple, Puri (@JagannathaDhaam) June 20, 2023

ନୀଳକନ୍ଦରରୁ ବଡ଼ଦାଣ୍ଡକୁ ଓହ୍ଲାଇ ଆସିଛନ୍ତି ନୀଳାଦ୍ରିନାଥ। ରଥରେ ବସି ଯିବେ ଆଡ଼ପମଣ୍ଡପ। ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତେ ପାଉଛନ୍ତି ବିଶ୍ୱନିୟନ୍ତାଙ୍କ ଦୁର୍ଲ୍ଲଭ ଦର୍ଶନ। ଆଜି ସକାଳ ସାଢେ ୯ଟାରୁ ଚତୁର୍ଦ୍ଧାବିଗ୍ରହଙ୍କ ପହଣ୍ଡି ଆରମ୍ଭ ହୋଇ ଅପରାହ୍ନ ୪ଟାରେ ରଥ ଟାଣିବା ଲାଗି ନୀତି ନିର୍ଘଣ୍ଟ କରାଯାଇଛି।

ମା ସୁଭଦ୍ରାଙ୍କର ଦର୍ପଦଳନ ରଥକୁ ପହଣ୍ଡି ବିଜେ ।

Pahandi Bije of 'Maa Subhadra' to 'Darpadalana ratha'.#RathaYatra2023#JayJagannatha#Pahandi pic.twitter.com/Zlx5jMjDXi

— Shree Jagannatha Temple, Puri (@JagannathaDhaam) June 20, 2023

ଆଜି ସକାଳ ୬ଟାରେ ମଙ୍ଗଳ ଆଳତି ହୋଇଛି। ସକାଳ ୯ଟାରେ ରଥ ପ୍ରତିଷ୍ଠା ପରେ ମଙ୍ଗଳାର୍ପଣ ହୋଇ ପହଣ୍ଡି ଆରମ୍ଭ ହୋଇଛି। ମଧ୍ୟାହ୍ନ ସାଢେ ୧୨ଟା ସୁଦ୍ଧା ପହଣ୍ଡି ଶେଷ କରାଯାଇଛି। ଅପରାହ୍ନ ୧ଟାରେ ରଥକୁ ରାମକୃଷ୍ଣ, ମଦନମୋହନ ବିଜେ ହେବେ। ଅପରାହ୍ନ ସାଢେ ୨ଟାରୁ ସାଢେ ୩ଟା ମଧ୍ୟରେ ଛେରାପହଁରା ନୀତି ବଢ଼ି ୪ଟା ସୁଦ୍ଧା ରଥ ଟାଣିବା ଲାଗି ନୀତି ନିର୍ଘଣ୍ଟ ପ୍ରସ୍ତୁତ ହୋଇଛି।

ଚତୁର୍ଦ୍ଧାମୂର୍ତ୍ତିଙ୍କ ପହଣ୍ଡି ବିଜେ ।

'Pahandi Bije' of the 'Chaturdha Murti'#RathaYatra2023#JayJagannatha#Pahandi pic.twitter.com/qlV4E9yQoI

— Shree Jagannatha Temple Office, Puri (@SJTA_Puri) June 20, 2023

ଅନ୍ୟପକ୍ଷରେ ମହାପ୍ରଭୁଙ୍କ ଘୋଷଯାତ୍ରାକୁ ଶାନ୍ତିଶୃଙ୍ଖଳାର ସହିତ ସମ୍ପନ୍ନ କରିବା ଲାଗି ବ୍ୟାପକ ପଦକ୍ଷେପ ଗ୍ରହଣ କରାଯାଇଛି। ଜିଲ୍ଲା ପ୍ରଶାସନ, ପୁଲିସ ଏବଂ ଶ୍ରୀମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ସରିଛି। କଡ଼ା ସୁରକ୍ଷା ବଳୟରେ ରହିଛି ପୁରୀ। ସିସିଟିଭି କ୍ୟାମେରା ସହରକୁ ଜଗିଛି। ୧୮୦ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯାଇଛି। ଅପରପକ୍ଷେ ପ୍ରବଳ ଖରା ସତ୍ତ୍ବେ ରଥଯାତ୍ରା ପାଇଁ ପୁରୀରେ ଶ୍ରଦ୍ଧାଳୁଙ୍କ ବେଶ୍‌‌ ଭିଡ଼ ହୋଇଛି।

ଭୁବନେଶ୍ବର: ସୁପ୍ରିମକୋର୍ଟରେ ଶ୍ରୀମନ୍ଦିର ମାମଲାର ଅନ୍ତ ଘଟିଛି। ଶ୍ରୀମନ୍ଦିର ସମ୍ପର୍କୀତ ମାମଲାର ଆଜି ଅନ୍ତ ଘଟାଇଛନ୍ତି ସୁପ୍ରିମକୋର୍ଟ। ମନ୍ଦିର ପ୍ରଶାସନ ପକ୍ଷରୁ ଦାଖଲ ହୋଇଥିବା ଆଫିଡେଭିଟକୁ ବିଚାରକୁ ନେବା ପରେ ମୃଲାଲିନି ପାଢ଼ୀଙ୍କ ଦ୍ଵାରା ଦାଖଲ ହୋଇଥିବା ମୂଳ ପିଟିସନକୁ ସମାପ୍ତ କରିବାର ନିଷ୍ପତି ନେଇଛନ୍ତି କୋର୍ଟ। ଦୀର୍ଘ ୫ ବର୍ଷରେ ୨୬ଟି ଶୁଣାଣି ପରେ ମାମଲାର ଅନ୍ତ ଘଟିଛି। ମାମଲାର ଅନ୍ତ ପରେ ବି ଆବେଦନକାରୀ କୋର୍ଟଙ୍କୁ ଜଣାଇପାରିବେ। କିଛି ନିର୍ଦ୍ଦେଶ ଅମାନ୍ୟ ଦେଖିଲେ ହାଇକୋର୍ଟରେ ଜଣାଇପାରିବେ। ସୁପ୍ରିମକୋର୍ଟଙ୍କ ନିର୍ଦ୍ଦେଶର ଅନୁପାଳନ ନହେଲେ ହାଇକୋର୍ଟରେ ଜଣାଇପାରିବ । ନିର୍ଦ୍ଦେଶ ଅନୁପାଳନ ହେଉଛି କି ନାହିଁ ହାଇକୋର୍ଟ ମନିଟର କରିବେ।

ଲୋକଙ୍କ ଭାବନା ସହ ରତ୍ନ ଭଣ୍ଡାର ଜଡ଼ିତ ଥିବାରୁ ଏହା ଉପରେ କୌଣସି ରାୟ ଦେବୁନି ବୋଲି କୋର୍ଟ କହିଥିଲେ। ଯାହାର ଯାହା ଆପତ୍ତି ଅଭିଯୋଗ ରହିଛି, ସେମାନେ ହାଇକୋର୍ଟଙ୍କ ଦ୍ବାରସ୍ଥ ହୁଅନ୍ତୁ ବୋଲି ନିର୍ଦ୍ଦେଶ ଦେଇଛନ୍ତି କୋର୍ଟ। ବିଚାରପତି ଏମ୍ ଆର ଶାହା ଏବଂ ବିଚାରପତି ସି.ଟି ରବି କୁମାରଙ୍କ ଖଣ୍ଡପୀଠରେ ମାମଲାରେ ଶୁଣାଣି କରିଥିଲେ।

ପୁରୀ: ବୁଧବାରରେ ଶ୍ରୀମନ୍ଦିରରେ ୪ ଘଣ୍ଟା ଶ୍ରୀଜୀଉଙ୍କ ସର୍ବସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀ ଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ବୁଧବାର ବୈଶାଖ-କୃଷ୍ଣ ଚତୁର୍ଦ୍ଦଶୀ,ତିଥିରେ ଶ୍ରୀବିଗ୍ରହମାନଙ୍କ ବନକଲାଗି ନୀତି ଅନୁଷ୍ଠିତ ହେବ। ଏଥିପାଇଁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ପ୍ରାୟ ସନ୍ଧ୍ୟା ୬ଟାରୁ ରାତି ୧୦ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ।

ପୁରୀ ଶ୍ରୀଜଗନ୍ନାଥ ମନ୍ଦିର ସମ୍ବନ୍ଧୀତ ସୂଚନା:

ଆସନ୍ତାକାଲି (୧୯.୪.୨୦୨୩, ବୁଧବାର) ବୈଶାଖ-କୃଷ୍ଣ ଚତୁର୍ଦ୍ଦଶୀ ତିଥିରେ ଶ୍ରୀବିଗ୍ରହମାନଙ୍କ ବନକଲାଗି ନୀତି ଅନୁଷ୍ଠିତ ହେବ। ଏଣୁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ଆପାତତଃ ସନ୍ଧ୍ୟା ଘ.୬.୦୦ରୁ ରାତ୍ର ଘ.୧୦.୦୦ ଟା ପର୍ଯ୍ୟନ୍ତ ସର୍ବସାଧାରଙ୍କ ପାଇଁ ଦର୍ଶନ ବନ୍ଦ ରହିବ।

— I & PR Department, Odisha (@IPR_Odisha) April 18, 2023

ବନକଲାଗି ହେଉଛି ମହାପ୍ରଭୁଙ୍କର ଏକ ଗୁପ୍ତ ନୀତି। ଏହି ନୀତି ପାଇଁ ଜୟ ବିଜୟ ଦ୍ୱାର ବନ୍ଦ ରହିବ। ଏଣୁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ପରେ ଦତ୍ତମହାପାତ୍ର ସେବକମାନେ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର କରିବେ। ଏଥିପାଇଁ ଦତ୍ତମହାପାତ୍ର ସେବକ ପ୍ରାକୃତିକ ରଙ୍ଗ ପ୍ରସ୍ତୁତ କରିଥାନ୍ତି। ଦତ୍ତମହାପାତ୍ର ସେବକମାନେ ପ୍ରାକୃତିକ ପ୍ରଣାଳୀରେ ପ୍ରସ୍ତୁତ ପ୍ରସାଧାନରେ ଶ୍ରୀବିଗ୍ରହମାନଙ୍କ ଶ୍ରୀମୁଖକୁ ଶୃଙ୍ଗାର କରିବେ। ହିଙ୍ଗୁଳ, ହରିତାଳ, କସ୍ତୁରୀ, ନାଲି, ଧଳା ଓ କଳା ଭଳି ପାରମ୍ପରିକ ରଙ୍ଗରେ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର କରାଯିବ। ଏହା ଏକ ଗୁପ୍ତ ସେବା ନୀତି ହୋଇଥିବାରୁ ଏହି ସମୟରେ ସର୍ବସାଧାରଣ ଦର୍ଶନ ବନ୍ଦ ରହିଥାଏ।