ରୋଡରମାର୍କ(ଏଜେନ୍ସି): ସାରା ବିଶ୍ବରେ ବିପଜ୍ଜନକ ସ୍ଥିତି ସୃଷ୍ଟି କରିଛି ମାରାତ୍ମକ ମଶା। ଏହା କାମୁଡିଲେ ମ୍ୟାଲେରିଆ ଏବଂ ଡେଙ୍ଗୁ ଭଳି ରୋଗ ହେବା ସ୍ବାଭାବିକ କଥା। କିନ୍ତୁ ଏବେ ଜର୍ମାନୀରୁ ଏକ ଆଶ୍ଚର୍ଯ୍ୟଜନକ ଏବଂ ଭୟାନକ ମାମଲା ସାମ୍‌ନାକୁ ଆସିଛି। ମଶା ଜଣେ ବ୍ୟକ୍ତିଙ୍କୁ ମୃତ୍ୟୁମୁଖକୁ ଠେଲି ଦେଇଛି। ମଶା କାମୁଡିବାରୁ ସେ କୋମାକୁ ଚାଲି ଯାଇଛନ୍ତି। ତାଙ୍କର ହାର୍ଟ ଏବଂ କିଡ୍‌ନୀ ମଧ୍ୟ ଫେଲ୍‌ ହୋଇଯାଇଛି। ତାଙ୍କୁ ବଞ୍ଚାଇବା ପାଇଁ ଡାକ୍ତରଙ୍କୁ ୩୦ ଥର ଅସ୍ତ୍ରୋପଚାର କରିବାକୁ ପଡିଛି। ସୂଚନା ଅନୁଯାୟୀ ରୋଡରମାର୍କର ବାସିନ୍ଦା ସେବାଷ୍ଟିୟନ ରୋସ୍‌କେଙ୍କୁ ୨୦୨୧ରେ ଏସିଆନ ଟାଇଗର ପ୍ରଜାତିର ଏକ ମଶା କାମୁଡି ଥିଲା। ପରେ ତାଙ୍କଠାରେ ଜ୍ବର ଆସିଥିଲା। ଡାକ୍ତରଙ୍କ ପରାମର୍ଶ ସତ୍ତ୍ବେ ତାଙ୍କ ସ୍ବାସ୍ଥ୍ୟା ଦିନକୁ ଦିନ ବିଗିଡିବାରେ ଲାଗିଥିଲା। ସେ ବିଞ୍ଛଣାରୁ ଉଠି ପାରୁ ନ ଥିଲେ କି ଠିକ୍‌ ସେ ଖାଇ ପାରୁ ନ ଥିଲେ। ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ଯାଞ୍ଚରୁ ମଶା କାମୁଡିବାରୁ ତାଙ୍କ ରକ୍ତରେ ବିଷ ବ୍ୟାପି ଯାଇଥିବା ଜଣାପଡିଥିଲା। ଏଥିଯୋଗୁଁ ସେବାଷ୍ଟିୟନଙ୍କ ଜଙ୍ଘ ପ୍ରାୟ ୫୦ ପ୍ରତିଶତ ସଢ଼ି ଯାଇଥିଲା। ଏହା ସହିତ ଯକୃତ, କିଡ୍‌ନୀ, ଫୁସ୍‌ଫୁସ୍‌ ଏବଂ ହୃଦୟ କାମ କରିବା ବନ୍ଦ କରି ଦେଇଥିଲା।

ରିପୋର୍ଟ ଅନୁଯାୟୀ ରକ୍ତରେ ବିଷ ବ୍ୟାପିଯାଇଥିବାରୁ ସେ ୪ ସପ୍ତାହ ପର୍ଯ୍ୟନ୍ତ କୋମାରେ ଥିଲେ। ସେହିପରି ଗୋଡ ଠିକ୍‌ କରିବାକୁ ତାଙ୍କୁ ୩୦ ଥର ଅସ୍ତ୍ରୋପଚାର କରିବାକୁ ପଡିଥିଲା। ଏଥିଯୋଗୁ ତାଙ୍କର ଗୋଡର ୨ଟି ଆଙ୍ଗୁଠି ମଧ୍ୟ କାଟିବାକୁ ପଡିଥିଲା। ସେରେସିଆ ମାର୍ସେସେନ୍ସ ନାମକ ଜୀବାଣୁ ତାଙ୍କ ଜଙ୍ଘ ଖାଇ ଦେଇଥିଲା। ବିଦେଶ ଯାଇ ନ ଥିବାରୁ ସ୍ଥାନୀୟ ମଶା ତାଙ୍କୁ କାମୁଡିଥିଲା ବୋଲି ସେବାଷ୍ଟିୟନ କହିଛନ୍ତି। ସେ ଧିରେ ଧିରେ ସୁସ୍ଥ ହେଉଛନ୍ତି। ସୂଚନାଯୋଗ୍ୟ ଯେ ଏସିଆନ ଟାଇଗର ମଶା ଦକ୍ଷିଣ ପୂର୍ବ ଏସିଆର ଉଷ୍ଣମଣ୍ଡଳୀୟ ଏବଂ ଉପ-ଉଷ୍ଣମଣ୍ଡଳୀୟ ଅଞ୍ଚଳରେ ଦେଖାଯାଆନ୍ତି। ସେଥିପାଇଁ ଏହାକୁ ଜଙ୍ଗଲୀ ମଶା ମଧ୍ୟ କୁହାଯାଏ। ଏହା ୟୁରୋପର ଅନେକ ଦେଶରେ ମଧ୍ୟ ଦେଖାଯାଏ। ଏହି ମଶା ଦିନରେ କାମୁଡି ଥାଏ। ଏହି ମଶାରେ କୌଣସି ଭୂତାଣୁ କିମ୍ବା ଜୀବାଣୁ ଥିଲେ ପେଟ ଦରଜ, ବାନ୍ତି, ମୁଣ୍ଡବିନ୍ଧା, ଯକୃତରେ ସମସ୍ୟା, ମଳରେ ରକ୍ତ, ଆଖି ଟାଣିବା ଏବଂ ଚର୍ମ କୁଣ୍ଡେଇ ହୋଇଥାଏ। ମଶା କାମୁଡିବାର ୩ରୁ ୭ ଦିନ ପରେ ଏହି ଲକ୍ଷଣ ଦେଖାଯାଇଥାଏ।

ସାଧାରଣତଃ ଲୋକେ ମଶାମାନଙ୍କ ପାଇଁ ଚିନ୍ତିତ ଥାନ୍ତି। କାରଣ ମଶା କାମୁଡାରେ ମଣିଷ ଅନେକ ରୋଗର ଶିକାର ହୋଇଥାଏ। ମଶାମାନଙ୍କ ଯୋଗୁଁ ମଣିଷ ଅସୁସ୍ଥ ମଧ୍ୟ ହୋଇଯାଆନ୍ତି । ମଶାମାମେ ମଣିଷ କିମ୍ବା ଅନ୍ୟ ପ୍ରାଣୀମାନଙ୍କର ରକ୍ତ ପିଇ ବଞ୍ଚିଥାନ୍ତ। ବିଶ୍ୱାସ କରାଯାଏ ଯେ କେବଳ ମାଈ ମଶାମାନେ ରକ୍ତ ଶୋଷିଥାନ୍ତି। ମାଈ ମଶା ଲୋକମାନଙ୍କୁ କାମୁଡିଥାନ୍ତି କାରଣ ସେମାନେ ମନୁଷ୍ୟ ରକ୍ତରୁ ପ୍ରୋଟିନ୍ ସଂଗ୍ରହ କରି ଅଣ୍ଡା ସୃଷ୍ଟି କରି ସେଥିରୁ ଅଧିକ ମଶା ଛୁଆ କରିଥାନ୍ତି । ସାଧାରଣତଃ ମଶାମାନେ ରକ୍ତ ଶୋଷିବା ପରେ ସେଠାରୁ ଉଡ଼ିଯାଆନ୍ତି। ମଶାମାନେ କାହିଁକି ରିକ୍ତ ଶୋଷି ଥାନ୍ତି । କିପରି ଅଭ୍ୟସ୍ତ ହେଲେ? ପୂର୍ବରୁ ବୈଜ୍ଞାନିକମାନେ ମଧ୍ୟ ଏହି ପ୍ରଶ୍ନର ଉତ୍ତର ଜାଣି ନଥିଲେ, କିନ୍ତୁ ବର୍ତ୍ତମାନ ସେମାନେ ଏହାର ଉତ୍ତର ପାଇଛନ୍ତି, ଯାହା ଅତ୍ୟନ୍ତ ଆଶ୍ଚର୍ଯ୍ୟଜନକ ଅଟେ। ଆପଣ ଜାଣି ଆଶ୍ଚର୍ଯ୍ୟ ହେବେ ଯେ  ପୂର୍ବରୁ ମଶାମାନେ ରକ୍ତ ପିଉ ନ ଥିଲେ। କୌଣସି କାରଣରୁ ସେମାନଙ୍କ ମଧ୍ୟରେ ଧିରେଧିରେ ଏହି ପରିବର୍ତ୍ତନ ଆସିଛି।

ଦୁନିଆରେ ଅନେକ ପ୍ରଜାତିର ମଶା ଅଛନ୍ତି। ସେଥିମଧ୍ୟରୁ ଆଫ୍ରିକାର ଏଡିସ୍ ଏଜିପ୍ଟି ମଶା । ଏହି ମଶାର ମଧ୍ଯ ଅନେକ ପ୍ରଜାତି  ଅଛି। ଏହି ମଶାମାନଙ୍କ ଯୋଗୁଁ  ଜିକା ଭୂତାଣୁ ବ୍ଯାପୁଛି। ଏହି ମଶାମାନେ ମଧ୍ଯ ଡେଙ୍ଗୁ ଜ୍ଜରର କାରଣ ଅଟନ୍ତି।

ପ୍ରିନ୍ସଟନ୍ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏହି ମଶାମାନଙ୍କୁ ଅଧ୍ୟୟନ କରି ଜାଣିବାକୁ ପାଇଥିଲେ ଯେ, ସମସ୍ତ ପ୍ରଜାତିର ମଶାମାନେ ରକ୍ତ ପିଉ ନାହାଁନ୍ତି, କିନ୍ତୁ ସେମାନଙ୍କ ମଧ୍ୟରୁ ଅନେକ ବଞ୍ଚିବା ପାଇଁ ଅନ୍ୟ ଜିନିଷ ଖାଇବା ସହ ରକ୍ତ ମଧ୍ଯ ପିଇଥାନ୍ତି।

ପ୍ରିନ୍ସଟନ୍ ୟୁନିଭରସିଟିର ଅନୁସନ୍ଧାନକାରୀ ନୋହା ରୋଜ୍ କହିଛନ୍ତି ଯେ, ଆମେ ପ୍ରଥମେ ଆଫ୍ରିକାର କେତେକ ସ୍ଥାନରୁ ଏଡିସ୍ ଏଜିପ୍ଟି ମଶାର ଅଣ୍ଡା ନେଇଥିଲୁ ଏବଂ ସେହି ଅଣ୍ଡାରୁ ମଶା ବାହାରିବା ପାଇଁ ଅପେକ୍ଷା କରିଥିଲୁ। ସେମାନଙ୍କ ରକ୍ତ ପିଇବା ପଦ୍ଧତି ଜାଣିବା ପାଇଁ ସେହି ମଶାମାନଙ୍କୁ ମଣିଷ ଏବଂ ଅନ୍ୟ ପ୍ରାଣୀମାନଙ୍କ ଉପରେ ଲାବୋରେଟୋରୀରେ ବନ୍ଦ ବାକ୍ସ ଭିତରେ ଛାଡି ଦିଆଯାଇଥିଲା। ଏହି ସମୟରେ ଜାଣିବାକୁ ମିଳିଥିଲା ଯେ, ବିଭିନ୍ନ ପ୍ରଜାତିର ଏଡିସ୍ ଏଜିପ୍ଟି ମଶାଙ୍କର ଖାଦ୍ୟ ସମ୍ପୂର୍ଣ୍ଣ ଭିନ୍ନ ଭିନ୍ନ।

ନୋହା ରୋଜଙ୍କ ବିଶ୍ୱାସ ଯେ, ସବୁ ମଶା ରକ୍ତ ପିଉ ନାହାଁନ୍ତି। ଯେଉଁଠାରେ ଉତ୍ତାପ ଅଧିକ ଥାଏ କିମ୍ବା ସେହି ସ୍ଥାନ ଶୁଖିଲା ରହିଥାଏ, ସାଧାରଣତ  ପାଣିର ଅଭାବ ଦେଖାଯାଇ ଥାଏ ସେମାନେ ରକ୍ତର ଆବଶ୍ଯକତା କରିଥାନ୍ତି। ମଶାମାନେ ପ୍ରଜନନ ପାଇଁ ସନ୍ତସନ୍ତିଆ ଜାଗା ଆବଶ୍ୟକ କରନ୍ତି। ଏହି ଆର୍ଦ୍ରତାର ଆବଶ୍ୟକତାକୁ ପୂରଣ କରିବା ପାଇଁ ମଶାମାନେ ମଣିଷ କିମ୍ବା ଅନ୍ୟ ପଶୁମାନଙ୍କର ରକ୍ତ ପିଇବା ଆରମ୍ଭ କରିଥାନ୍ତି।

ଯେଉଁଠାରେ ଜଳ ଗଚ୍ଛିତ ହୋଇ ରହିଥାଏ ମଶାଙ୍କର ପ୍ରଜନନ କରିବାରେ କୌଣସି ଅସୁବିଧା ହୋଇ ନ ଥାଏ।  କିନ୍ତୁ ଜଳର ଅଭାବ ଅନୁଭବ କରିବା ମାତ୍ରେ ସେମାନେ ମଣିଷ କିମ୍ବା ଅନ୍ୟ ପ୍ରାଣୀମାନଙ୍କର ରକ୍ତ ଶୋଷିବା ଆରମ୍ଭ କରନ୍ତି। ଅର୍ଥାତ୍ ଏଥିରୁ ଏହା ସ୍ପଷ୍ଟ ହୋଇଛି ଯେ ଜଳ ଅଭାବକୁ ପୂରଣ କରିବା ପାଇଁ ମଶାମାନେ ରକ୍ତ ପିଅନ୍ତି।