ପାକିସ୍ତାନରେ ଆତଙ୍କବାଦୀଙ୍କ ଉପରେ ଆକ୍ରମଣ ଜାରି ରହିଛି। ଆତଙ୍କବାଦୀ ସଙ୍ଗଠନ ଲସ୍କର-ଇ-ତୋଏବା (LeT) ର ପ୍ରତିଷ୍ଠାତା ସଦସ୍ୟ ତଥା ମୋଷ୍ଟ ୱାଣ୍ଟେଡ୍ ଆତଙ୍କବାଦୀ ଆମୀର ହମଜା ଉପରେ ଲାହୋରରେ ଗୁଳିମାଡ଼ ହୋଇଛି। କିଛି ଅଜ୍ଞାତ ବନ୍ଧୁକଧାରୀ ତାଙ୍କୁ ଲାହୋର ସ୍ଥିତ ଏକ ନ୍ୟୁଜ୍ ଚ୍ୟାନେଲ୍ ଅଫିସ୍ ବାହାରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ସ୍ଥାନୀୟ ଏକ ଡାକ୍ତରଖାନାରେ ଭର୍ତ୍ତି କରାଯାଇଛି।

ନ୍ୟୁଜ୍ ଚ୍ୟାନେଲ୍ ବାହାରେ ହେଲା ଆକ୍ରମଣ

ମିଳିଥିବା ସୂଚନା ଅନୁଯାୟୀ, ଗୁରୁବାର ଆମୀର ହମଜା ଲାହୋରର ଏକ ନ୍ୟୁଜ୍ ଚ୍ୟାନେଲ୍ କାର୍ଯ୍ୟାଳୟ ବାହାରେ ଥିବା ସମୟରେ ଅଚାନକ କିଛି ଅଜ୍ଞାତ ବ୍ୟକ୍ତି ଆସି ତାଙ୍କ ଉପରକୁ ଆଖିବୁଜା ଗୁଳିମାଡ଼ କରିଥିଲେ। ଗୁଳିମାଡ଼ ପରେ ଆକ୍ରମଣକାରୀମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ରକ୍ତାକ୍ତ ଅବସ୍ଥାରେ ହମଜାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ବର୍ତ୍ତମାନ ତାଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ରହିଥିବା କୁହାଯାଉଛି। ସୂଚନାଯୋଗ୍ୟ ଯେ, ଗୋଟିଏ ବର୍ଷ ମଧ୍ୟରେ ଏହା ତାଙ୍କ ଉପରେ ଦ୍ୱିତୀୟ ପ୍ରାଣଘାତୀ ଆକ୍ରମଣ। ଗତବର୍ଷ ମେ ମାସରେ ମଧ୍ୟ ତାଙ୍କ ବାସଭବନ ବାହାରେ ତାଙ୍କ ଉପରେ ଗୁଳିମାଡ଼ କରାଯାଇଥିଲା।

କିଏ ଏହି ଆମୀର ହମଜା?

ଆମୀର ହମଜା ହେଉଛି ଲସ୍କର-ଇ-ତୋଏବାର ମୁଖ୍ୟ ରଣନୀତିକାର ଏବଂ କୁଖ୍ୟାତ ଆତଙ୍କବାଦୀ ହାଫିଜ୍ ସୟିଦର ଅତ୍ୟନ୍ତ ଘନିଷ୍ଠ। ୧୯୮୫ ରୁ ୧୯୮୬ ମସିହା ମଧ୍ୟରେ ସେ ହାଫିଜ୍ ସୟିଦ ସହ ମିଶି ଲସ୍କର-ଇ-ତୋଏବାର ପ୍ରତିଷ୍ଠା କରିଥିଲା। ଭାରତରେ ହୋଇଥିବା ବିଭିନ୍ନ ଆତଙ୍କବାଦୀ ଆକ୍ରମଣ, ବିଶେଷକରି ୨୦୦୫ ବେଙ୍ଗାଲୁରୁ ଆଇଆଇଏସସି (IISc) ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ଭାବେ ସେ ଜଣାଶୁଣା। ଏହାବ୍ୟତୀତ ସେ ଆତଙ୍କବାଦୀ ସଙ୍ଗଠନ ପାଇଁ ପାଣ୍ଠି ସଂଗ୍ରହ, ନୂଆ ଯୁବକମାନଙ୍କୁ ଆତଙ୍କବାଦରେ ସାମିଲ କରିବା ଏବଂ ବିଭିନ୍ନ ଆତଙ୍କବାଦୀ କାର୍ଯ୍ୟକଳାପକୁ ପରିଚାଳନା କରୁଥିଲା।

ପାକିସ୍ତାନରେ ଭୟଭୀତ ଆତଙ୍କବାଦୀ

ଗତ କିଛି ମାସ ଧରି ପାକିସ୍ତାନ ମାଟିରେ ଲୁଚି ରହିଥିବା ବିଭିନ୍ନ ଆତଙ୍କବାଦୀଙ୍କୁ ଟାର୍ଗେଟ୍ କରାଯାଉଛି। ଏକାଧିକ କୁଖ୍ୟାତ ଆତଙ୍କବାଦୀ ଅଜ୍ଞାତ ଆକ୍ରମଣକାରୀଙ୍କ ଗୁଳିରେ ନିହତ ହୋଇସାରିଛନ୍ତି। ଆମେରିକାର ଟ୍ରେଜେରୀ ବିଭାଗ ପକ୍ଷରୁ ଆମୀର ହମଜାକୁ ବିଶ୍ୱସ୍ତରୀୟ ଆତଙ୍କବାଦୀ ଘୋଷଣା କରାଯାଇଛି। ଏହି ଘଟଣା ପରେ ପାକିସ୍ତାନୀ ପୋଲିସ ସ୍ଥାନୀୟ ଅଞ୍ଚଳରେ ହାଇ ଆଲର୍ଟ ଜାରି କରି ସର୍ଚ୍ଚ ଅପରେସନ ଆରମ୍ଭ କରିଛି।

ଦେଶର ସୁରକ୍ଷା ଏଜେନ୍ସି ଏବଂ ଦିଲ୍ଲୀ ପୋଲିସର ସ୍ପେଶାଲ ସେଲ (Delhi Police Special Cell) କୁ ଏକ ବଡ଼ ସଫଳତା ମିଳିଛି। ଲସ୍କର-ଏ-ତୈବାର କୁଖ୍ୟାତ ଆତଙ୍କବାଦୀ ଶବ୍ବିର ଅହମ୍ମଦ ଲୋନ (Shabbir Ahmed Lone) କୁ ଦିଲ୍ଲୀ ସୀମାରୁ ଗିରଫ କରାଯାଇଛି। ଭାରତରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି କରିବା ଏବଂ ଏକ ବଡ଼ ଧରଣର ଆକ୍ରମଣ ଯୋଜନା କରୁଥିବା ଅଭିଯୋଗରେ ସୁରକ୍ଷାକର୍ମୀମାନେ ତାକୁ ଖୋଜୁଥିଲେ।

ଆତଙ୍କବାଦୀ ନେଟୱର୍କର ମାଷ୍ଟରମାଇଣ୍ଡ

ପୋଲିସ ସୂତ୍ରରୁ ପ୍ରକାଶ ଯେ, ଶବ୍ବିର ଅହମ୍ମଦ ଲୋନ ଦୀର୍ଘ ଦିନ ଧରି ଭାରତ ବିରୋଧୀ କାର୍ଯ୍ୟକଳାପରେ ସମ୍ପୃକ୍ତ ଥିଲା। ଏହା ପୂର୍ବରୁ ୨୦୦୭ ମସିହାରେ ମଧ୍ୟ ତାକୁ ଦିଲ୍ଲୀ ପୋଲିସ ଗିରଫ କରିଥିଲା ଏବଂ ସେ ତିହାର ଜେଲରେ ବନ୍ଦୀ ଥିଲା। ୨୦୧୯ ମସିହାରେ ଜେଲରୁ ମୁକୁଳିବା ପରେ ସେ ବାଂଲାଦେଶ ଫେରାର ହୋଇଯାଇଥିଲା। ସେଠାରେ ରହି ସେ ପାକିସ୍ତାନର ଆଇଏସଆଇ (ISI) ଏବଂ ଲସ୍କର ମୁଖ୍ୟଙ୍କ ନିର୍ଦ୍ଦେଶରେ ଏକ ନୂଆ ଆତଙ୍କବାଦୀ ନେଟୱର୍କ ପ୍ରସ୍ତୁତ କରୁଥିଲା।

ନିକଟରେ ଧରାପଡିଥିଲା ତା'ର ମଡ୍ୟୁଲ

ଗତ ଫେବୃଆରୀ ମାସରେ ଦିଲ୍ଲୀ ପୋଲିସ ଏକ ବଡ଼ ଆତଙ୍କବାଦୀ ମଡ୍ୟୁଲର ପର୍ଦ୍ଦାଫାଶ କରି ୮ ଜଣ ସନ୍ଦିଗ୍ଧଙ୍କୁ ଗିରଫ କରିଥିଲା। ଏହି ଅଭିଯୁକ୍ତମାନେ ବାଂଲାଦେଶରୁ ଆସି ନକଲି ପରିଚୟ ପତ୍ର ଜରିଆରେ ଭାରତର ବିଭିନ୍ନ ସ୍ଥାନରେ ଲୁଚି ରହୁଥିଲେ। ଦିଲ୍ଲୀର କାଶ୍ମୀରୀ ଗେଟ୍ ମେଟ୍ରୋ ଷ୍ଟେସନରେ ଦେଶବିରୋଧୀ ପୋଷ୍ଟର ଲଗାଇବା ଘଟଣାରେ ମଧ୍ୟ ସେମାନଙ୍କ ସମ୍ପୃକ୍ତି ଥିଲା। ପରବର୍ତ୍ତୀ ତଦନ୍ତରୁ ଜଣାପଡିଥିଲା ଯେ, ଏହି ସମସ୍ତ ଅଭିଯୁକ୍ତଙ୍କୁ ଶବ୍ବିର ଅହମ୍ମଦ ଲୋନ ହିଁ ବାଂଲାଦେଶରୁ ନିୟନ୍ତ୍ରଣ କରୁଥିଲା ଏବଂ ଭାରତରେ ଆକ୍ରମଣ ପାଇଁ ସ୍ଥାନୀୟ ସ୍ତରରେ ଅସ୍ତ୍ରଶସ୍ତ୍ର ଯୋଗାଡ଼ କରୁଥିଲା।

ଆଗକୁ ବଢିବ ତଦନ୍ତ

ଶବ୍ବିରର ଗିରଫଦାରୀ ପରେ ସୁରକ୍ଷା ଏଜେନ୍ସିଗୁଡ଼ିକ ତାକୁ କଡ଼ା ଜେରା କରୁଛନ୍ତି। ତା'ର ନେଟୱର୍କରେ ଆହୁରି କେତେ ଜଣ ସମ୍ପୃକ୍ତ ଅଛନ୍ତି ଏବଂ ସେମାନଙ୍କର ପରବର୍ତ୍ତୀ ଲକ୍ଷ୍ୟ କ'ଣ ଥିଲା, ସେ ନେଇ ବିସ୍ତୃତ ତଥ୍ୟ ହାସଲ କରାଯାଉଛି। ଏହି ଗିରଫଦାରୀ ଭାରତୀୟ ସୁରକ୍ଷା ବାହିନୀ ପାଇଁ ଏକ ବଡ଼ ବିଜୟ ବୋଲି ବିବେଚନା କରାଯାଉଛି, ଯାହାଦ୍ୱାରା ଏକ ବଡ଼ ଧରଣର ଆତଙ୍କବାଦୀ ବିପଦକୁ ଏଡାଇ ଦିଆଯାଇପାରିଛି।

ନୂଆଦିଲ୍ଲୀ: ପାକିସ୍ତାନ ସ୍ଥିତ ଆତଙ୍କବାଦୀ ସଂଗଠନ ଲସ୍କର-ଏ-ତୋଇବା (LeT) ପୁଣି ଥରେ ଭାରତ ବିରୋଧରେ ଏକ ବଡ଼ ଷଡଯନ୍ତ୍ର ରଚୁଥିବା ଜଣାପଡ଼ିଛି। ୨୦୦୮ ମୁମ୍ବାଇ ଆକ୍ରମଣର ଭୟାବହତାକୁ ମନେ ପକାଇ ଏହି ସଂଗଠନ ପୁଣି ଥରେ ସମୁଦ୍ର ପଥ ଦେଇ ଭାରତ ଉପରେ ଆକ୍ରମଣ କରିବାକୁ ଧମକ ଦେଇଛି। ସଦ୍ୟ ପ୍ରକାଶିତ ଏକ ଭିଡିଓରେ ଲସ୍କରର ଡେପୁଟି ଚିଫ୍ ସୈଫୁଲ୍ଲା କସୁରୀ ଖୋଲାଖୋଲି ଭାବେ ଭାରତକୁ ଚେତାବନୀ ଦେବା ସହ ୨୦୨୬ ମସିହାରେ ସମୁଦ୍ର ଉପରେ ‘ରାଜ୍’ କରିବା କଥା କହିଛି ।

ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ଏକ ରିପୋର୍ଟ ଅନୁଯାୟୀ, କସୁରୀ ଦାବି କରିଛି ଯେ ପାକିସ୍ତାନ ୨୦୨୫ରେ ଆକାଶ ପଥରେ ନିଜର ଶକ୍ତି ଦେଖାଇଥିଲା ଏବଂ ୨୦୨୬ରେ ସମୁଦ୍ର ପଥରେ ମଧ୍ୟ ସମାନ ଦବଦବା ରହିବ। ଗୁଇନ୍ଦା ବିଭାଗର ବରିଷ୍ଠ ଅଧିକାରୀଙ୍କ ମତରେ, ଏହି ମନ୍ତବ୍ୟ ୨୬/୧୧ ଆକ୍ରମଣ ପରି ସମୁଦ୍ର ପଥ ଦେଇ ଆତଙ୍କବାଦୀ ଅନୁପ୍ରବେଶର ଏକ ପୂର୍ବ ସୂଚନା ହୋଇପାରେ, ଯାହାକୁ ନେଇ ସତର୍କ ରହିବାର ଆବଶ୍ୟକତା ରହିଛି।

ଏପ୍ରିଲ ୨୨, ୨୦୨୫ରେ ହୋଇଥିବା ପହଲଗାମ ଆତଙ୍କବାଦୀ ଆକ୍ରମଣର ମୁଖ୍ୟ ଷଡଯନ୍ତ୍ରକାରୀ ହେଉଛି ସୈଫୁଲ୍ଲା କସୁରୀ। ଏହାର କଡ଼ା ଜବାବ ଦେଇ ଭାରତ ମେ ୨୦୨୫ରେ ‘ଅପରେସନ୍ ସିନ୍ଦୂର’ ଆରମ୍ଭ କରିଥିଲା। ଏହି ଅପରେସନ୍ ଅଧୀନରେ ପାକିସ୍ତାନର ମୁରିଦକେ ଏବଂ ବାହାୱାଲପୁରରେ ଥିବା ଲସ୍କରର ଆତଙ୍କୀ ଶିବିରଗୁଡ଼ିକୁ ଟାର୍ଗେଟ କରାଯାଇଥିଲା। ଭାରତୀୟ ସେନାର ଏହି କାର୍ଯ୍ୟାନୁଷ୍ଠାନ ପରେ କସୁରୀ ବିଚଳିତ ହୋଇପଡିଥିବା ଭିଡିଓରୁ ସ୍ପଷ୍ଟ ବାରି ହେଉଛି ଏବଂ ସେ ନିଜ ସଂଗଠନର ମନୋବଳ ବଢାଇବା ପାଇଁ ଏଭଳି ପ୍ରଚାର କରୁଛି।

ଭିଡିଓରେ କସୁରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସିଧାସଳଖ ଧମକ ଦେବା ସହ ଭାରତ ବିରୋଧରେ ‘ଜଳ ଆତଙ୍କବାଦ’ (Water Terrorism)ର ଅଭିଯୋଗ ଆଣିଛି। ଏହା ସହିତ ସେ ଅଯୋଧ୍ୟା ଭଳି ଭାରତର ପ୍ରମୁଖ ହିନ୍ଦୁ ଧାର୍ମିକ ସ୍ଥଳଗୁଡିକୁ ଟାର୍ଗେଟ କରିବା ନେଇ ମଧ୍ୟ ଇଙ୍ଗିତ ଦେଇଛି, ଯାହା ସାମ୍ପ୍ରଦାୟିକ ଉତ୍ତେଜନା ସୃଷ୍ଟି କରିବା ପାଇଁ ଏକ ଷଡଯନ୍ତ୍ର ବୋଲି କୁହାଯାଉଛି। କସୁରୀ ଖୋଲାଖୋଲି ଭାବେ ସ୍ୱୀକାର କରିଛି ଯେ, ତାଙ୍କ ସଂଗଠନ ପାକିସ୍ତାନ ସେନା ସହ ମିଶି କାମ କରୁଛି। ଏହି ଧମକ ପରେ ଭାରତର ପଶ୍ଚିମ ଉପକୂଳରେ ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରାଯାଇଛି।

ଦେଶର ରାଜଧାନୀ ଦିଲ୍ଲୀରେ ପୁଣି ଥରେ ଆତଙ୍କବାଦୀ ଆକ୍ରମଣର କଳା ବାଦଲ ଘୂରି ବୁଲୁଛି। ଗୁଇନ୍ଦା ବିଭାଗର ସୂଚନା ମୁତାବକ, ପାକିସ୍ତାନ ସ୍ଥିତ ଆତଙ୍କବାଦୀ ସଙ୍ଗଠନ ଲସ୍କର-ଇ-ତୋଇବା (LeT) ଦିଲ୍ଲୀର ଐତିହାସିକ ଲାଲକିଲ୍ଲା ଏବଂ ଚାନ୍ଦିନୀ ଚୌକ ଅଞ୍ଚଳରେ ବଡ଼ ଧରଣର ଆକ୍ରମଣ କରିବାକୁ ଯୋଜନା କରୁଛି। ଏହି ସୂଚନା ମିଳିବା ପରେ ଦିଲ୍ଲୀ ପୋଲିସ ଏବଂ ସୁରକ୍ଷା ଏଜେନ୍ସିଗୁଡ଼ିକୁ ହାଇଅଲର୍ଟରେ ରଖାଯାଇଛି।

ମନ୍ଦିର ଓ ଭିଡ଼ ଅଞ୍ଚଳ ଟାର୍ଗେଟରେ

ଗୁଇନ୍ଦା ରିପୋର୍ଟ ଅନୁଯାୟୀ, ଆତଙ୍କବାଦୀମାନେ ଚାନ୍ଦିନୀ ଚୌକରେ ଥିବା ଏକ ପ୍ରମୁଖ ମନ୍ଦିର ଏବଂ ଲାଲକିଲ୍ଲା ନିକଟବର୍ତ୍ତୀ ଜନଗହଳିପୂର୍ଣ୍ଣ ସ୍ଥାନଗୁଡ଼ିକୁ ଟାର୍ଗେଟ କରିପାରନ୍ତି। ସୂଚନା ମିଳିଛି ଯେ, ଇସଲାମାବାଦର ଏକ ମସଜିଦରେ ହୋଇଥିବା ବିସ୍ଫୋରଣର ପ୍ରତିଶୋଧ ନେବା ପାଇଁ ଲସ୍କର-ଇ-ତୋଇବା ଭାରତରେ ଏହି ଆକ୍ରମଣର ଷଡ଼ଯନ୍ତ୍ର ରଚୁଛି। ଆତଙ୍କବାଦୀମାନେ IED (Improvised Explosive Device) ବ୍ୟବହାର କରି ବିସ୍ଫୋରଣ ଘଟାଇବାକୁ ଯୋଜନା କରୁଥିବା ଆଶଙ୍କା କରାଯାଉଛି।

କଡ଼ା ସୁରକ୍ଷା ବ୍ୟବସ୍ଥା

ଏହି ଗୁଇନ୍ଦା ସୂଚନା ପରେ ଦିଲ୍ଲୀର ପ୍ରମୁଖ ଧାର୍ମିକ ଓ ଐତିହାସିକ ସ୍ଥଳୀଗୁଡ଼ିକରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଲାଲକିଲ୍ଲା ଏବଂ ଚାନ୍ଦିନୀ ଚୌକ ଅଞ୍ଚଳରେ ପୋଲିସ ପକ୍ଷରୁ ବ୍ୟାପକ ଯାଞ୍ଚ ଅଭିଯାନ ଆରମ୍ଭ ହୋଇଛି। ସନ୍ଦିଗ୍ଧ ବ୍ୟକ୍ତି ଓ ବାହନଗୁଡ଼ିକ ଉପରେ କଡ଼ା ନଜର ରଖାଯାଇଛି ଏବଂ ସିସିଟିଭି କ୍ୟାମେରା ମାଧ୍ୟମରେ ନିରନ୍ତର ନିରୀକ୍ଷଣ କରାଯାଉଛି। ଜନସାଧାରଣଙ୍କୁ ମଧ୍ୟ ସତର୍କ ରହିବାକୁ ଏବଂ କୌଣସି ସନ୍ଦେହଜନକ ବସ୍ତୁ ଦେଖିଲେ ତୁରନ୍ତ ପୋଲିସକୁ ସୂଚନା ଦେବାକୁ ପରାମର୍ଶ ଦିଆଯାଇଛି।

ଦକ୍ଷିଣ କାଶ୍ମୀରର ପୁଲୱାମାରେ ଆତଙ୍କବାଦୀ ଏବଂ ସୁରକ୍ଷା ବାହିନୀ ମଧ୍ୟରେ ବିଳମ୍ବିତ ରାତିରେ ଆରମ୍ଭ ହୋଇଥିବା ଏକ ଏନକାଉଣ୍ଟରରେ ଏପର୍ଯ୍ୟନ୍ତ ତିନି ଜଣ ଆତଙ୍କବାଦୀ ନିହତ ହୋଇଛନ୍ତି। ଆଇଜିପି କାଶ୍ମୀର କହିଛି ଯେ ନିହତ ଆତଙ୍କବାଦୀଙ୍କ ମଧ୍ୟରୁ ଲଶ୍କର-ଏ-ତାଇବାଙ୍କର ପାକିସ୍ତାନୀ କମାଣ୍ଡର ଆଇଜାଜ ଛଦ୍ମନାମ ଆବୁ ହୁରେରା। ଏହା ସହିତ ଦୁଇ ସ୍ଥାନୀୟ ଆତଙ୍କବାଦୀଙ୍କୁ ମଧ୍ୟ ହତ୍ୟା କରାଯାଇଛି। ତେବେ ସୁରକ୍ଷା ବାହିନୀର ଅପରେସନ ଜାରି ରହିଛି।