ଭୁବନେଶ୍ୱର: ରାଜ୍ୟରେ ଲଗାଣ ବର୍ଷା କାରଣରୁ ନଦୀଗୁଡ଼ିକର ଜଳସ୍ତର ବୃଦ୍ଧି ପାଇବାରେ ଲାଗିଛି। ବିଶେଷ କରି କ୍ୟାଚମେଣ୍ଟ ଅଞ୍ଚଳରେ ବର୍ଷା ଯୋଗୁଁ ବୈତରଣୀ ଏବଂ ବ୍ରାହ୍ମଣୀ ନଦୀର ଜଳସ୍ତର ବଢ଼ିବାରେ ଲାଗିଛି। ଏହି ପରିପ୍ରେକ୍ଷୀରେ ଓଡ଼ିଶା ସରକାର ବନ୍ୟା ପରିସ୍ଥିତି ଉପରେ କଡ଼ା ନଜର ରଖିଛନ୍ତି ବୋଲି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ (ଇଞ୍ଜିନିୟର-ଇନ୍-ଚିଫ୍) ଦିଲ୍ଲୀପ କୁମାର ରାଉତ ସୋମବାର ସୂଚନା ଦେଇଛନ୍ତି।

ଶ୍ରୀ ରାଉତଙ୍କ ସୂଚନା ଅନୁଯାୟୀ, ସୋମବାର ସକାଳେ ଆଖୁଆପଦା ଠାରେ ବୈତରଣୀ ନଦୀର ଜଳସ୍ତର ୧୮.୧୫ ମିଟର ଥିଲା, ଯେତେବେଳେ କି ଏଠାରେ ବିପଦ ସଙ୍କେତ ୧୮.୩୩ ମିଟର ରହିଛି। ସନ୍ଧ୍ୟା ସୁଦ୍ଧା ଜଳସ୍ତର ଆହୁରି ବଢ଼ିବା ପରେ ଖସିବାର ସମ୍ଭାବନା ରହିଛି। ଗତକାଲି ଏହା ପ୍ରାୟ ୧୯ ମିଟର ଛୁଇଁବା ପରେ କମିଥିଲା, କିନ୍ତୁ ଗତ ରାତିରେ ସ୍ଥାନୀୟ କ୍ୟାଚମେଣ୍ଟ ଅଞ୍ଚଳରେ ପ୍ରବଳ ବର୍ଷା ହେତୁ ଜଳସ୍ତର ପୁଣି ବୃଦ୍ଧି ପାଇଛି। ବିଭାଗ ପକ୍ଷରୁ ସ୍ଥିତି ଉପରେ ନିରନ୍ତର ନଜର ରଖାଯାଇଛି ଏବଂ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ପ୍ରସ୍ତୁତି ରହିଛି।

ସେହିପରି ବ୍ରାହ୍ମଣୀ ନଦୀର ସ୍ଥିତି ସମ୍ପର୍କରେ ସୂଚନା ଦେଇ ସେ କହିଛନ୍ତି ଯେ, ଜେନାପୁର ଠାରେ ଜଳସ୍ତର ସୋମବାର ପ୍ରାୟ ୨୦.୯ ମିଟର ରହିଥିଲା। ଏଠାରେ ସତର୍କ ସଙ୍କେତ ୨୨ ମିଟର ଥିବା ବେଳେ ବିପଦ ସଙ୍କେତ ୨୩ ମିଟର ରହିଛି। ଜଳସ୍ତର କମୁଥିଲେ ମଧ୍ୟ ବର୍ଷା କାରଣରୁ ଏହା ପୁଣି ବଢ଼ିଛି, ତେବେ ଏହା ବିଶେଷ ଭାବେ ବୃଦ୍ଧି ପାଇବାର ଆଶଙ୍କା ନାହିଁ। ତଳମୁଣ୍ଡରେ ବନ୍ୟା ଆଶଙ୍କାକୁ ଏଡ଼ାଇବା ପାଇଁ ରେଙ୍ଗାଳି ଡ୍ୟାମ୍ ଦେଇ ଜଳ ନିଷ୍କାସନକୁ ନିୟନ୍ତ୍ରଣ କରାଯାଉଛି। ବର୍ତ୍ତମାନ ଡ୍ୟାମ୍‌ର କେବଳ ଗୋଟିଏ ଗେଟ୍ ଖୋଲାଯାଇଛି।

ଯଦି ନଦୀର ଜଳସ୍ତର ଆହୁରି ବୃଦ୍ଧି ପାଏ, ତେବେ କେନ୍ଦ୍ରାପଡ଼ା, ଆଳି ଏବଂ ରାଜନଗର ଭଳି ଅଞ୍ଚଳରେ ଜଳବନ୍ଦୀ ସମସ୍ୟା ଦେଖାଦେଇପାରେ। ତେବେ ଏହାର ପ୍ରଭାବ କିପରି କମ୍ କରାଯାଇପାରିବ, ସେନେଇ ବିଭାଗ ପକ୍ଷରୁ ସମସ୍ତ ପ୍ରକାର ପ୍ରୟାସ କରାଯାଉଛି। ଶ୍ରୀ ରାଉତ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ ବନ୍ୟା ପରିସ୍ଥିତିକୁ ନିୟନ୍ତ୍ରଣ କରିବା ଏବଂ ଲୋକଙ୍କ ସମସ୍ୟା ଲାଘବ କରିବା ପାଇଁ ପ୍ରଶାସନ ସମ୍ପୂର୍ଣ୍ଣ ସଜାଗ ଅଛି।

ଅନୁଗୋଳ: ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ଅନୁଗୋଳ ଜିଲ୍ଲାର ରେଙ୍ଗାଳି ଡ୍ୟାମର ଜଳସ୍ତର ବୃଦ୍ଧି ପାଇବାରେ ଲାଗିଛି। ଏହାକୁ ଦୃଷ୍ଟିରେ ରଖି ସୋମବାର ଦିନ କର୍ତ୍ତୃପକ୍ଷ ଗୋଟିଏ ସ୍ଲୁଇସ୍ ଗେଟ୍ ଓ ପାୱାର ଚ୍ୟାନେଲ୍ ଖୋଲିଛନ୍ତି, ଯାହା ଫଳରେ ବ୍ରାହ୍ମଣୀ ନଦୀ ଅବବାହିକାକୁ ବଳକା ଜଳ ନିଷ୍କାସିତ କରାଯାଉଛି।

ସୂଚନା ଅନୁଯାୟୀ, ଜଳସ୍ତର ବୃଦ୍ଧିକୁ ନିୟନ୍ତ୍ରଣ କରିବା ପାଇଁ ଚଳିତ ବର୍ଷ ଏହା ହେଉଛି ଦ୍ୱିତୀୟ ଥର ଯେବେ ଡ୍ୟାମ୍‌ରୁ ଜଳ ନିଷ୍କାସନ କରାଯାଉଛି। ବର୍ତ୍ତମାନ ଡ୍ୟାମ୍‌କୁ ପ୍ରାୟ ୨,୫୦୦ କ୍ୟୁବିକ୍ ମିଟର ଜଳ ପ୍ରବେଶ କରୁଛି। ଡ୍ୟାମ୍‌ର ସୁରକ୍ଷା ଓ ସ୍ଥିରତାକୁ ସୁନିଶ୍ଚିତ କରିବା ପାଇଁ ୮ ନମ୍ବର ଗେଟ୍ ଏବଂ ପାୱାର ଚ୍ୟାନେଲ୍ ଦେଇ ପ୍ରାୟ ୨,୦୦୦ କ୍ୟୁବିକ୍ ମିଟର ଜଳ ଛଡ଼ାଯାଉଛି। ବର୍ତ୍ତମାନ ରେଙ୍ଗାଳି ଡ୍ୟାମ୍‌ର ଜଳସ୍ତର ୧୨୨.୧୪ ମିଟରରେ ପହଞ୍ଚିଛି। ଡ୍ୟାମ୍‌ର ସର୍ବୋଚ୍ଚ ଜଳଧାରଣ କ୍ଷମତା ହେଉଛି ୧୨୩.୫୦ ମିଟର, ତେଣୁ ଏବେ ଜଳସ୍ତର ଏହାର ପାଖାପାଖି ରହିଛି।

ବିଭାଗୀୟ ଇଞ୍ଜିନିୟରମାନେ ସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି। ଉପରମୁଣ୍ଡରେ ବର୍ଷାର ପରିମାଣ ଏବଂ ଡ୍ୟାମ୍‌କୁ ଜଳ ପ୍ରବେଶର ସ୍ଥିତି ଉପରେ ଆଧାର କରି ପରବର୍ତ୍ତୀ ସମୟରେ ଅଧିକ ଜଳ ନିଷ୍କାସନ ନିଷ୍ପତ୍ତି ନିଆଯିବ ବୋଲି ସୂଚନା ମିଳିଛି।

ଅନୁଗୁଳ: ଚଳିତ ବର୍ଷ ପ୍ରଥମ ଥର ପାଇଁ ଖୋଲିଲା ରେଙ୍ଗାଲି ଡ୍ୟାମ୍ ଗେଟ୍। ଅନୁଗୁଳ ଜିଲ୍ଲାରେ ଥିବା ଏହି ବୃହତ୍ ଜଳଭଣ୍ଡାରର ଉପରମୁଣ୍ଡରେ ଲଗାଣ ବର୍ଷା କାରଣରୁ ଜଳସ୍ତର ବୃଦ୍ଧି ପାଇବା ପରେ ବୁଧବାର ଦିନ ପ୍ରଥମ ବନ୍ୟା ଜଳ ନିଷ୍କାସନ କରାଯାଇଛି। ସୁରକ୍ଷା ଦୃଷ୍ଟିରୁ ଏବଂ ଜଳପ୍ରବାହକୁ ନିୟନ୍ତ୍ରଣ କରିବା ପାଇଁ କର୍ତ୍ତୃପକ୍ଷ ଗୋଟିଏ ସ୍ଲୁଇସ୍ ଗେଟ୍ ଖୋଲିଛନ୍ତି।

ବିଭାଗୀୟ ଅଧିକାରୀଙ୍କ ସୂଚନା ଅନୁଯାୟୀ, ରେଙ୍ଗାଲି ଜଳଭଣ୍ଡାରର ସର୍ବୋଚ୍ଚ ଜଳଧାରଣ କ୍ଷମତା ୧୨୩.୫୦ ମିଟର ଥିବାବେଳେ ବର୍ତ୍ତମାନର ଜଳସ୍ତର ୧୨୨.୨୪ ମିଟରରେ ପହଞ୍ଚିଛି। ଜଳଭଣ୍ଡାରକୁ ପ୍ରତି ସେକେଣ୍ଡରେ ୨,୭୩୫ ଘନ ମିଟର ଜଳ ପ୍ରବେଶ କରୁଛି।

ବର୍ଦ୍ଧିତ ଜଳସ୍ତରକୁ ନିୟନ୍ତ୍ରଣ କରିବା ପାଇଁ ଗୋଟିଏ ଗେଟ୍ ଦେଇ ପ୍ରତି ସେକେଣ୍ଡରେ ୧,୩୯୪.୨୪ ଘନ ମିଟର ଜଳ ଛଡ଼ାଯାଉଥିବା ବେଳେ ପାୱାର ଟନେଲ୍ ମାଧ୍ୟମରେ ଅତିରିକ୍ତ ୫୦୧ ଘନ ମିଟର ଜଳ ନିଷ୍କାସନ କରାଯାଉଛି।

ଡ୍ୟାମରୁ ଜଳ ନିଷ୍କାସନକୁ ଦୃଷ୍ଟିରେ ରଖି ଅନୁଗୁଳ, ଢେଙ୍କାନାଳ, ଯାଜପୁର ଏବଂ କେନ୍ଦ୍ରାପଡ଼ା ଜିଲ୍ଲା ପ୍ରଶାସନକୁ ସତର୍କ ରହିବାକୁ ପରାମର୍ଶ ଦିଆଯାଇଛି। ବିଶେଷକରି ବ୍ରାହ୍ମଣୀ ନଦୀ କୂଳରେ ରହୁଥିବା ବାସିନ୍ଦାମାନଙ୍କୁ ନଦୀ ନିକଟକୁ ନଯିବାକୁ ଏବଂ ନିଜ ଗୃହପାଳିତ ପଶୁମାନଙ୍କୁ ନଦୀ କୂଳରେ ନଚରାଇବାକୁ ବାରଣ କରାଯାଇଛି।

ଡ୍ୟାମ୍ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି ଯେ ସ୍ଥିତି ଉପରେ ୨୪ ଘଣ୍ଟିଆ ନଜର ରଖାଯାଇଛି। ଯଦି ଉପରମୁଣ୍ଡରୁ ଅଧିକ ଜଳ ପ୍ରବେଶ କରେ, ତେବେ ପରିସ୍ଥିତିକୁ ଦେଖି ଆବଶ୍ୟକ ହେଲେ ଅତିରିକ୍ତ ଗେଟ୍ ଖୋଲାଯିବ।