ପୁରୀ: ଭଡ଼ା ଘରୁ ଜବତ ହେଲା ବିଡ଼ା ବିଡ଼ା ଟଙ୍କା ସହ ୧ କ୍ବିଣ୍ଟାଲ ଗଞ୍ଜେଇ । ପୁରୀ ଜିଲ୍ଲାର ଗୋପାଳପୁର ଗ୍ରାମରେ ଏକ ଭଡ଼ା ଘରୁ ପ୍ରାୟ ଏକ କ୍ୱିଣ୍ଟାଲ ଓଜନର ଗଞ୍ଜେଇ ସହ ୫ ଶହ, ୨ ଶହ ଓ ଶହେ ଟଙ୍କିଆ ବିଡ଼ା ବିଡ଼ା ନୋଟ୍ ଜବତ କରିଛି ପେଣ୍ଠକଟା ମେରାଇନ୍ ପୋଲିସ । ଚଢ଼ାଉ ବେଳେ ୧୭୬ଟି ପ୍ୟାକେଟରେ ଥିବା ଏହି ବିପୁଳ ପରିମାଣର ଗଞ୍ଜେଇ ଜବତ କରିବା ସହ ଦୁଇ ଜଣଙ୍କୁ ଗିରଫ କରିଛି ପୋଲିସ । ଗିରଫ ହୋଇଥିବା ଅଭିଯୁକ୍ତମାନେ ହେଲେ କାର୍ତ୍ତିକେଶ୍ୱର ସାମନ୍ତରାୟ ଏବଂ ଦେବେନ୍ଦ୍ର ସାହୁ।

ଫାର୍ମାସି କଲେଜ ନିକଟରେ ଥିବା ଏକ ଘରେ ଗଞ୍ଜେଇ ଗଚ୍ଛିତ ଥିବା ନେଇ ବିଶ୍ୱସ୍ତ ସୂତ୍ରରୁ ଖବର ପାଇ ପେଣ୍ଠକଟା ମେରାଇନ୍ ପୋଲିସର ଏକ ଟିମ୍ ସେଠାରେ ଅତର୍କିତ ଚଢ଼ାଉ କରିଥିଲା। ଏହି ଘରଟି ଜଣେ ରିଅଲ୍ ଇଷ୍ଟେଟ୍ ଠିକାଦାରଙ୍କର ହୋଇଥିବା ବେଳେ, ଅଭିଯୁକ୍ତ ଦ୍ୱୟ ଏହାକୁ ଭଡ଼ାରେ ନେଇଥିଲେ। ଗଞ୍ଜେଇ ବିତରଣ କରିବା ପୂର୍ବରୁ ସେମାନେ ଏହାକୁ ସେଠାରେ ଲୁଚାଇ ରଖିଥିବା ପୋଲିସ ସନ୍ଦେହ କରୁଛି।

ପୁରୀ ଏସପି ପ୍ରତୀକ ସିଂହ ସୂଚନା ଦେଇ କହିଛନ୍ତି ଯେ, ଏହି ଦୁଇ ଅଭିଯୁକ୍ତ ପୂର୍ବରୁ ମଧ୍ୟ ନିଶା କାରବାରରେ ସମ୍ପୃକ୍ତ ଥିଲେ। ଏକ ଟିପ୍-ଅଫ୍ ଆଧାରରେ ଘରେ ଚଢ଼ାଉ କରାଯାଇଥିଲା ଏବଂ ଭବିଷ୍ୟତରେ ଏହାକୁ ବିତରଣ କରିବା ପାଇଁ ସେମାନେ ଯୋଜନା କରିଥିଲେ। ଏତେ ପରିମାଣର ଗଞ୍ଜେଇ କେଉଁଠାରୁ ଆସିଲା ଏବଂ ଏହି ଚୋରା ଚାଲାଣ ନେଟୱାର୍କରେ ଆଉ କେଉଁମାନେ ସମ୍ପୃକ୍ତ ଅଛନ୍ତି, ତାହା ଜାଣିବା ପାଇଁ ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଛି।

ମାଲକାନଗିରି: କାଲିମେଳା ପୋଲିସକୁ ଏକ ବଡ଼ ସଫଳତା ମିଳିଛି। ପୋଲିସ ଏକ ଜଙ୍ଗଲିଆ ଅଞ୍ଚଳରେ ଚଢ଼ାଉ କରି ପ୍ରାୟ ୧ କୋଟି ୨ ଲକ୍ଷ ଟଙ୍କା (୧.୦୨ କୋଟି) ମୂଲ୍ୟର ୧୦୨୫ କିଲୋଗ୍ରାମ ଗଞ୍ଜେଇ ଜବତ କରିଛି। ଏହି ବିପୁଳ ପରିମାଣର ଗଞ୍ଜେଇ କାଙ୍ଗୁରୁକୋଣ୍ଡା ପଞ୍ଚାୟତ ଅଧୀନସ୍ଥ ଏମଭି-୭୩ ଗ୍ରାମ ନିକଟସ୍ଥ ଏକ ଜଙ୍ଗଲରେ ଲୁଚାଇ ରଖାଯାଇଥିଲା ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।

ବିପୁଳ ପରିମାଣର ଗଞ୍ଜେଇ ଜଙ୍ଗଲରେ ଲୁଚାଇ ରଖାଯାଇଥିବା ନେଇ କୌଣସି ସୂତ୍ରରୁ ଖବର ପାଇବା ପରେ ପୋଲିସର ଏକ ସ୍ୱତନ୍ତ୍ର ଟିମ୍ ଉକ୍ତ ଅଞ୍ଚଳରେ ଚଢ଼ାଉ କରିଥିଲା। ତେବେ ପୋଲିସ ପହଞ୍ଚିବା ପୂର୍ବରୁ ଏହି ବେଆଇନ କାରବାରରେ ସମ୍ପୃକ୍ତ ଥିବା ମାଫିଆମାନେ ଘଟଣାସ୍ଥଳରୁ ଫେରାର୍ ହୋଇଯାଇଥିଲେ। ପୋଲିସର ସନ୍ଦେହ ଅନୁଯାୟୀ, ଅନ୍ୟ ରାଜ୍ୟକୁ ଚାଲାଣ କରିବା ଉଦ୍ଦେଶ୍ୟରେ ଏହି ଗଞ୍ଜେଇକୁ ଜଙ୍ଗଲରେ ମହଜୁଦ କରି ରଖାଯାଇଥିଲା।

ଏହି ଗଞ୍ଜେଇ ଚାଲାଣ ପଛରେ କେଉଁମାନେ ଅଛନ୍ତି ଏବଂ ଏହା କେଉଁଠାରୁ ଆସିଲା ଓ କେଉଁ ସ୍ଥାନକୁ ପଠାଯିବାର ଥିଲା, ସେ ନେଇ ପୋଲିସ ପକ୍ଷରୁ ଏକ ବିସ୍ତୃତ ତଦନ୍ତ ଆରମ୍ଭ କରାଯାଇଛି। ସୂଚନାଯୋଗ୍ୟ ଯେ, ଗତ ଏକ ମାସ ମଧ୍ୟରେ କେବଳ କାଲିମେଳା ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରି ୩ ଟନ୍‌ରୁ ଅଧିକ ଗଞ୍ଜେଇ ଜବତ କରିସାରିଲାଣି। ଏତେ ବଡ଼ ଧରଣର ଗଞ୍ଜେଇ ଜବତ ହେବା ପରେ, ଏବେ ପୋଲିସ ଏହି ବେଆଇନ କାରବାର ସହ ଜଡ଼ିତ ବୃହତ୍ ନେଟୱାର୍କକୁ ଚିହ୍ନଟ କରିବା ଉପରେ ଗୁରୁତ୍ୱାରୋପ କରୁଛି।

ଭୁବନେଶ୍ୱର: ଆନ୍ତଃରାଜ୍ୟ ଗଞ୍ଜେଇ ଚାଲାଣ ରାକେଟ୍‌ର ପର୍ଦ୍ଦାଫାଶ କଲା STF । ଏହି ଘଟଣାରେ ଏସ୍‌ଟିଏଫ୍ ତିନି ଜଣ ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ୩.୮୬ ଲକ୍ଷ ଟଙ୍କା ଏବଂ ଅନ୍ୟାନ୍ୟ ଆପତ୍ତିଜନକ ସାମଗ୍ରୀ ଜବତ କରିଛି। ଅଭିଯୁକ୍ତମାନେ ଓଡ଼ିଶାରୁ ରାଜସ୍ଥାନକୁ ଗଞ୍ଜେଇ କାରବାର କରୁଥିଲେ ।

ସୂଚନାଯୋଗ୍ୟ ଯେ, ଗତ ଏପ୍ରିଲ ୧୮ ତାରିଖ, ୨୦୨୬ ଦିନ ଖୋର୍ଦ୍ଧା ଜିଲ୍ଲା ପିତାପଲ୍ଲୀ ନିକଟରେ ଏକ ଆଇଚର କଣ୍ଟେନର ଯାଞ୍ଚ ବେଳେ ଏସ୍‌ଟିଏଫ୍ ୨୨୭.୪୦୦ କେଜି ଗଞ୍ଜେଇ ଜବତ କରିଥିଲା। ଏହି ଗଞ୍ଜେଇ ଗଜପତି ଜିଲ୍ଲାର ଅଡବା ଅଞ୍ଚଳରୁ ରାଜସ୍ଥାନକୁ ଚାଲାଣ ହେଉଥିଲା। ଏହି ଘଟଣାରେ ଏସ୍‌ଟିଏଫ୍ କେସ୍ ନମ୍ବର ୦୮/୨୦୨୬ (ଏନଡିପିଏସ ଆକ୍ଟ) ରୁଜୁ କରି ଅଧିକ ଖୋଳତାଡ଼ କରୁଥିଲା। ଏହି ତଦନ୍ତର ଫଳସ୍ୱରୂପ ରାକେଟ୍‌ର ମୁଖ୍ୟ ଅଭିଯୁକ୍ତମାନଙ୍କୁ ଧରିବାରେ ସଫଳତା ମିଳିଛି।

ଗିରଫ ହୋଇଥିବା ଅଭିଯୁକ୍ତମାନେ ହେଲେ ଗଞ୍ଜାମ ଜିଲ୍ଲାର ଶିବରାମ ବିଶ୍ଵାଳ (୩୮), ଶିବରାମ ପାତ୍ର (୩୩) ଏବଂ ବ୍ରହ୍ମପୁରର କାଣା ମିଟୁ ଓରଫ ମନୋରଞ୍ଜନ ସାବତ (୪୯)। ତଦନ୍ତରୁ ଜଣାପଡିଛି ଯେ, ଏହି ତିନି ଜଣ ଅଭିଯୁକ୍ତ ଗଞ୍ଜେଇ ସଂଗ୍ରହ, ଲୁଚାଇ ରଖିବା ଏବଂ ଅନ୍ୟ ରାଜ୍ୟକୁ ଚାଲାଣ କରିବାରେ ମୁଖ୍ୟ ଭୂମିକା ଗ୍ରହଣ କରୁଥିଲେ।

ଅଭିଯୁକ୍ତ ଶିବରାମ ବିଶ୍ଵାଳଙ୍କ ଘରେ ଚଢ଼ାଉ କରି ଏସ୍‌ଟିଏଫ୍ ଟିମ୍ ନଗଦ ୩.୮୬ ଲକ୍ଷ ଟଙ୍କା, ମୋବାଇଲ ଫୋନ ଏବଂ ବେଆଇନ ନିଶା କାରବାର ସହ ଜଡିତ ଥିବା ଅନେକ ଗୁରୁତ୍ୱପୂର୍ଣ୍ଣ ପ୍ରମାଣ ଜବତ କରିଛି। ଏସ୍‌ଟିଏଫ୍ ଅଧିକାରୀଙ୍କ ସୂଚନା ଅନୁଯାୟୀ, କାଣା ମିଟୁ ନାମରେ ପୂର୍ବରୁ ଧରାକୋଟ ଏବଂ ବ୍ରହ୍ମପୁର ଟାଉନ୍ ଥାନାରେ ଏକାଧିକ ଅପରାଧିକ ମାମଲା ରହିଛି। ସେହିପରି ଶିବରାମ ବିଶ୍ଵାଳଙ୍କ ନାମରେ ମଧ୍ୟ ମହାରାଷ୍ଟ୍ରରେ ଏକ ଏନଡିପିଏସ (NDPS) ମାମଲା ରହିଥିବା ଜଣାପଡ଼ିଛି।

ଗିରଫ ଅଭିଯୁକ୍ତମାନଙ୍କୁ ମାଜିଷ୍ଟ୍ରେଟଙ୍କ ନିକଟରେ ହାଜର କରାଯିବ ଏବଂ ସେମାନଙ୍କର ବ୍ୟାପକ ନେଟୱାର୍କ, ଆର୍ଥିକ କାରବାର ତଥା ମୁଖ୍ୟ ଫାଇଦା ନେଉଥିବା ବ୍ୟକ୍ତିଙ୍କ ସମ୍ପର୍କରେ ତଥ୍ୟ ଆଦାୟ ପାଇଁ ରିମାଣ୍ଡରେ ଆଣିବାକୁ ଏସ୍‌ଟିଏଫ୍ ପ୍ରୟାସ କରିବ। ଏହା ସହିତ ଅଭିଯୁକ୍ତମାନଙ୍କ ସମ୍ପତ୍ତିର ଆର୍ଥିକ ତଦନ୍ତ ମଧ୍ୟ ଆରମ୍ଭ କରାଯାଇଛି।

ରାଜ୍ୟ ବାହାରେ ସକ୍ରିୟ ଥିବା ଏନଡିପିଏସ ଅପରାଧୀଙ୍କ ଏକ ଡାଟାବେସ୍ ପ୍ରସ୍ତୁତ କରିବା ପାଇଁ ଏସ୍‌ଟିଏଫ୍ ଏକ ସ୍ୱତନ୍ତ୍ର ଅଭିଯାନ ଆରମ୍ଭ କରିଛି। ଏଥିପାଇଁ ବିଭିନ୍ନ ରାଜ୍ୟର କ୍ରାଇମ୍ ବ୍ରାଞ୍ଚ ସହ ସମନ୍ୱୟ ରକ୍ଷା କରାଯାଇ ଗୁଇନ୍ଦା ତଥ୍ୟ ସଂଗ୍ରହ କରାଯାଉଛି।