ଶ୍ରୀଲଙ୍କା ବିପକ୍ଷ ଦ୍ୱିତୀୟ ଟେଷ୍ଟ ପୂର୍ବରୁ ଭାରତୀୟ ଦଳର ପ୍ଲେଇଂ ଇଲେଭେନ୍ (Playing XI) କୁ ନେଇ ଚର୍ଚ୍ଚା ଜୋର ଧରିଛି। ଗାଲେରେ ଖେଳାଯାଇଥିବା ପ୍ରଥମ ଟେଷ୍ଟରେ ଖରାପ ପ୍ରଦର୍ଶନ କରିଥିବା ସ୍ପିନର କୁଲଦୀପ ଯାଦବଙ୍କୁ ଦଳରୁ ବାଦ୍ ଦିଆଯିବା ନେଇ ଗୁଜବ ସୃଷ୍ଟି ହୋଇଛି। ତେବେ ପୂର୍ବତନ ଭାରତୀୟ ବ୍ୟାଟର ଚେତେଶ୍ୱର ପୂଜାରା ଏହାକୁ ନେଇ ମୁଖ୍ୟ କୋଚ୍ ଗୌତମ ଗମ୍ଭୀର ଏବଂ ଟିମ୍ ମ୍ୟାନେଜମେଣ୍ଟଙ୍କୁ ଚେତାବନୀ ଦେଇଛନ୍ତି। କୁଲଦୀପଙ୍କ ଉପରେ ଭରସା ରଖିବାକୁ ସେ ପରାମର୍ଶ ଦେଇଛନ୍ତି।

ସାରାଂଶ ଜୈନଙ୍କୁ ମିଳିପାରେ ସୁଯୋଗ

ପ୍ରଥମ ଟେଷ୍ଟରେ ଭାରତ ତିନି ଜଣ ବାମହାତୀ ସ୍ପିନରଙ୍କୁ ନେଇ ପଡ଼ିଆକୁ ଓହ୍ଲାଇଥିଲା। ଏହି ମ୍ୟାଚରେ ରବୀନ୍ଦ୍ର ଜାଡେଜା ଏବଂ ମାନବ ସୁଥାର ଉତ୍ତମ ପ୍ରଦର୍ଶନ କରିଥିବା ବେଳେ କୁଲଦୀପ ଯାଦବ ସଂଘର୍ଷ କରିଥିଲେ। ସେ ୨୫ ଓଭର ବୋଲିଂ କରି ୧୦୩ ରନ୍ ବ୍ୟୟରେ ମାତ୍ର ଗୋଟିଏ ୱିକେଟ୍ ହାସଲ କରିଥିଲେ। ଶ୍ରୀଲଙ୍କା ଦଳରେ ଅଧିକ ବାମହାତୀ ବ୍ୟାଟର ଥିବାରୁ, ଆସନ୍ତା କଲମ୍ବୋ ଟେଷ୍ଟରେ କୁଲଦୀପଙ୍କ ସ୍ଥାନରେ ୩୩ ବର୍ଷୀୟ ଅଫ୍-ସ୍ପିନର ସାରାଂଶ ଜୈନଙ୍କୁ ଟେଷ୍ଟ ଡେବ୍ୟୁ କରିବାକୁ ସୁଯୋଗ ମିଳିପାରେ ବୋଲି ଶୁଣିବାକୁ ମିଳୁଛି।

କୁଲଦୀପ ଜଣେ ମ୍ୟାଚ୍ ୱିନର୍: ପୂଜାରା

ଏହି ଖବର ଉପରେ ପ୍ରତିକ୍ରିୟା ରଖି ପୂଜାରା କହିଛନ୍ତି ଯେ, କୁଲଦୀପଙ୍କୁ ବାଦ୍ ଦେବା ଏକ ଭୁଲ୍ ନିଷ୍ପତ୍ତି ହେବ। "କୁଲଦୀପଙ୍କ ମୁଖ୍ୟ କାମ ହେଉଛି ୱିକେଟ୍ ନେବା। ସେ ହୁଏତ ଅଧିକ ରନ୍ ଦେଇପାରନ୍ତି, କିନ୍ତୁ ସେ ମ୍ୟାଚ୍ ବିଜୟୀ ବୋଲର ଅଟନ୍ତି। ଆର୍. ଅଶ୍ୱିନ୍ ମଧ୍ୟ ଅନେକ ସମୟରେ ମହଙ୍ଗା ସାବ୍ୟସ୍ତ ହୁଅନ୍ତି, କିନ୍ତୁ ସେ ୱିକେଟ୍ ନେଇଥାନ୍ତି। କୁଲଦୀପଙ୍କ କ୍ଷେତ୍ରରେ ମଧ୍ୟ ସମାନ କଥା ଲାଗୁ ହୁଏ," ବୋଲି ପୂଜାରା ସ୍ପଷ୍ଟ କରିଛନ୍ତି।

ଅନ୍ୟପକ୍ଷରେ, ପୂର୍ବତନ ଭାରତୀୟ ଦ୍ରୁତ ବୋଲର ଭେଙ୍କଟେଶ ପ୍ରସାଦ ମଧ୍ୟ ପୂଜାରାଙ୍କ ସ୍ୱରରେ ସ୍ୱର ମିଳାଇଛନ୍ତି। ଗୋଟିଏ ଖରାପ ମ୍ୟାଚ୍ ଆଧାରରେ ଖେଳାଳିଙ୍କୁ ଦଳରୁ ବାହାର କରିବା ପରିବର୍ତ୍ତେ, କୋଚ୍ ଗମ୍ଭୀର ଏବଂ ଅଧିନାୟକ ଶୁବମନ ଗିଲ୍ କୁଲଦୀପଙ୍କୁ ଆତ୍ମବିଶ୍ୱାସ ପ୍ରଦାନ କରିବା ଆବଶ୍ୟକ ବୋଲି ପ୍ରସାଦ ମତବ୍ୟକ୍ତ କରିଛନ୍ତି।

ମୁମ୍ବାଇ: ଶ୍ରୀଲଙ୍କା ବିପକ୍ଷ ୨ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ପାଇଁ ଟିମ୍ ଇଣ୍ଡିଆ ଘୋଷଣା । ଗିଲ୍‌ଙ୍କ ନେତୃତ୍ବରେ ୧୫ ଜଣିଆ ଭାରତୀୟ ଦଳ ଘୋଷଣା କଲା ବିସିସିଆଇ । ଏହି ଦଳରେ ଅଫ୍-ସ୍ପିନ୍ ଅଲରାଉଣ୍ଡର ସାରାଂଶ ଜୈନଙ୍କୁ ପ୍ରଥମ ଥର ପାଇଁ ଟେଷ୍ଟ ଦଳରେ ସାମିଲ କରାଯାଇଛି। ସେହିପରି ଦୀର୍ଘ ଦିନର ବ୍ୟବଧାନ ପରେ ଭେଟେରାନ୍ ସ୍ପିନ୍ ଅଲରାଉଣ୍ଡର ରବୀନ୍ଦ୍ର ଜାଡେଜା ଏବଂ ଦ୍ରୁତ ବୋଲର ଯଶପ୍ରୀତ ବୁମରା ମଧ୍ୟ ରେଡ୍-ବଲ୍ ଫର୍ମାଟକୁ ପ୍ରତ୍ୟାବର୍ତ୍ତନ କରିଛନ୍ତି।

ଆସନ୍ତା ଅଗଷ୍ଟ ୧୫ ତାରିଖରୁ ଆରମ୍ଭ ହେବାକୁ ଥିବା ଏହି ସିରିଜ୍ ପାଇଁ ଘୋଷିତ ଦଳରେ ୱାଶିଂଟନ୍ ସୁନ୍ଦରଙ୍କ ଅନୁପସ୍ଥିତି କାରଣରୁ ସାରାଂଶ ଜୈନଙ୍କୁ ସୁଯୋଗ ମିଳିଛି। ସୁନ୍ଦରଙ୍କ ଡାହାଣ ଗୋଡ଼ର ହାମଷ୍ଟ୍ରିଙ୍ଗ୍ ସମସ୍ୟା ଥିବାରୁ ସେ ପ୍ରଥମ ଟେଷ୍ଟରୁ ବାଦ୍ ପଡ଼ିଛନ୍ତି। ନିକଟରେ ଶ୍ରୀଲଙ୍କା ଗସ୍ତରେ ଇଣ୍ଡିଆ-ଏ (India A) ପକ୍ଷରୁ ଖେଳି ସାରାଂଶ ଚମତ୍କାର ପ୍ରଦର୍ଶନ କରିଥିଲେ। ଦ୍ୱିତୀୟ ଅଣଆନୁଷ୍ଠାନିକ ଟେଷ୍ଟରେ ସେ ଅପରାଜିତ ୭୦ ରନ୍ ସଂଗ୍ରହ କରିବା ସହ ୬ଟି ୱିକେଟ୍ ଅକ୍ତିଆର କରିଥିଲେ। ନିଜର ୫୪ଟି ପ୍ରଥମ ଶ୍ରେଣୀ ମ୍ୟାଚ୍ରେ ସେ ମୋଟ ୨୨୨୩ ରନ୍ ଏବଂ ୧୮୮ ୱିକେଟ୍ ନେବାର ରେକର୍ଡ ରଖିଛନ୍ତି।

ଅନ୍ୟପକ୍ଷରେ, ଆଇପିଏଲ୍ ୨୦୨୬ ସମୟରେ ଆହତ ହୋଇଥିବା ରବୀନ୍ଦ୍ର ଜାଡେଜା ସୁସ୍ଥ ହୋଇ ଦଳକୁ ଫେରିଥିବା ବେଳେ ଯଶପ୍ରୀତ ବୁମରାଙ୍କ ଉପଲବ୍ଧତା ତାଙ୍କ ଫିଟନେସ୍ କ୍ଲିୟରାନ୍ସ ଉପରେ ନିର୍ଭର କରିବ ବୋଲି ବୋର୍ଡ ପକ୍ଷରୁ କୁହାଯାଇଛି। ଉଭୟ ଖେଳାଳି ନଭେମ୍ବର ୨୦୨୫ ପରେ ପ୍ରଥମ ଥର ପାଇଁ ଟେଷ୍ଟ ଦଳକୁ ଫେରିଛନ୍ତି।

ଏହି ଗୁରୁତ୍ୱପୂର୍ଣ୍ଣ ସିରିଜରେ ଭାରତୀୟ ଦଳର ନେତୃତ୍ୱ ନେବେ ଯୁବ ବ୍ୟାଟର ଶୁଭମନ ଗିଲ୍। ଆଇସିସି ବିଶ୍ୱ ଟେଷ୍ଟ ଚାମ୍ପିୟନସିପ୍ (WTC) ଅନ୍ତର୍ଗତ ଖେଳାଯିବାକୁ ଥିବା ଏହି ସିରିଜ୍ ପୂର୍ବରୁ ଭାରତୀୟ ଦଳ ଅଗଷ୍ଟ ୭ ତାରିଖରୁ କଲମ୍ବୋରେ ଏକ ଚାରି ଦିନିଆ ଅଭ୍ୟାସ ମ୍ୟାଚ୍ ଖେଳିବ।

ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜ୍ ପାଇଁ ଭାରତୀୟ ଦଳ:
ଶୁଭମନ ଗିଲ୍ (ଅଧିନାୟକ), କେ.ଏଲ୍ ରାହୁଲ (ଉପ-ଅଧିନାୟକ), ଯଶସ୍ୱୀ ଜୟସ୍ୱାଲ୍, ରିଷଭ ପନ୍ତ (ୱିକେଟ୍ କିପର), ସାଇ ସୁଦର୍ଶନ, ଧ୍ରୁବ ଜୁରେଲ୍ (ୱିକେଟ୍ କିପର), ରବୀନ୍ଦ୍ର ଜାଡେଜା, କୁଲଦୀପ ଯାଦବ, ମାନବ ସୁଥାର, ଯଶପ୍ରୀତ ବୁମରା, ମହମ୍ମଦ ସିରାଜ, ପ୍ରସିଦ୍ଧ କ୍ରିଷ୍ଣା, ଗୁରନୁର ବ୍ରାର, ଦେବଦୂତ୍ତ ପାଡିକଲ ଏବଂ ସାରାଂଶ ଜୈନ।