E20 ଲାଭକୁ ନେଇ ଅପପ୍ରଚାର: ନକଲି ପୋଷ୍ଟ ଓ ଡିପ୍‌ଫେକ୍ ବିରୋଧରେ ବମ୍ବେ ହାଇକୋର୍ଟରେ ପହଞ୍ଚିଲେ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ

Suryakanta — Mon, 27 Jul 2026 13:31:46 +0530

କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ ସୋସିଆଲ ମିଡିଆରେ ଭାଇରାଲ ହେଉଥିବା ଅପମାନଜନକ ପୋଷ୍ଟ ଏବଂ ଡିପ୍‌ଫେକ୍ ଭିଡିଓ ବିରୋଧରେ ବମ୍ବେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ସରକାରଙ୍କ ଇ-୨୦ (E20) ଇଥାନଲ୍ ବ୍ଲେଣ୍ଡ୍ ଇନ୍ଧନ ନୀତିରୁ ତାଙ୍କୁ ଓ ତାଙ୍କ ପରିବାରକୁ ଆର୍ଥିକ ଲାଭ ମିଳୁଥିବା ନେଇ ସୋସିଆଲ୍ ମିଡିଆରେ ମିଥ୍ୟା ପ୍ରଚାର କରାଯାଉଥିବା ସେ ଅଭିଯୋଗ କରିଛନ୍ତି।

ଟେକ୍ କମ୍ପାନୀଙ୍କ ବିରୋଧରେ ମାମଲା

ରିପୋର୍ଟ ଅନୁଯାୟୀ, ବରିଷ୍ଠ ବିଜେପି ନେତା ତଥା କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ମେଟା (Meta), ଏକ୍ସ (X), ଗୁଗଲ (Google) ଏବଂ ଅନ୍ୟାନ୍ୟ କମ୍ପାନୀ ବିରୋଧରେ ଦେୱାନି ମାମଲା ରୁଜୁ କରିବାକୁ ଆବେଦନ କରିଛନ୍ତି। କିଛି ନ୍ୟସ୍ତସ୍ୱାର୍ଥ ଗୋଷ୍ଠୀ ଉଦ୍ଦେଶ୍ୟମୂଳକ ଭାବେ ଏଭଳି ଭିତ୍ତିହୀନ ଏବଂ ବିଭ୍ରାନ୍ତିକର ତଥ୍ୟ ପ୍ରସାରଣ କରି ତାଙ୍କ ଭାବମୂର୍ତ୍ତି ମଳିନ କରିବାକୁ ଚେଷ୍ଟା କରୁଥିବା ସେ ଦର୍ଶାଇଛନ୍ତି।

ପେଟ୍ରୋଲିୟମ୍ ମନ୍ତ୍ରଣାଳୟ ଅଧୀନରେ ରହିଛି ନୀତି

ଏହି ମାମଲାରେ ଶ୍ରୀ ଗଡ଼କରୀ ସ୍ପଷ୍ଟ କରିଛନ୍ତି ଯେ, ଇ-୨୦ ଇନ୍ଧନ ନୀତି ପ୍ରକୃତରେ ପେଟ୍ରୋଲିୟମ୍ ମନ୍ତ୍ରଣାଳୟ ଦ୍ୱାରା ପରିଚାଳିତ ହେଉଛି। ଏଥିରେ ତାଙ୍କ ବିଭାଗ କିମ୍ବା ତାଙ୍କ ପରିବାରର କୌଣସି ସମ୍ପୃକ୍ତି ନାହିଁ। ତଥାପି, ଜାଣିଶୁଣି ତାଙ୍କୁ ବଦନାମ କରିବା ପାଇଁ ଏହି ପ୍ରସଙ୍ଗରେ ତାଙ୍କ ନାମକୁ ଯୋଡ଼ାଯାଉଛି।

ଇ-୨୦ ପେଟ୍ରୋଲକୁ ନେଇ ବିବାଦ

ସୂଚନାଯୋଗ୍ୟ ଯେ, ସମ୍ପ୍ରତି ଇ-୨୦ ପେଟ୍ରୋଲକୁ (ପେଟ୍ରୋଲରେ ୨୦ ପ୍ରତିଶତ ଇଥାନଲ ମିଶ୍ରଣ) ନେଇ ଦେଶରେ ଅସନ୍ତୋଷ ଦେଖାଦେଇଛି। 'କକରୋଚ୍ ଜନତା ପାର୍ଟି' ଏବଂ ନିକଟରେ ଗଠିତ 'ଇ-୨୦ ଜନତା ପାର୍ଟି' ନାମକ ସଙ୍ଗଠନ ୧୦୦ ପ୍ରତିଶତ ଶୁଦ୍ଧ ପେଟ୍ରୋଲ ବିକଳ୍ପ ଦାବି କରି ଆନ୍ଦୋଳନ ଚଳାଇଛନ୍ତି। ଆନ୍ଦୋଳନକାରୀମାନେ ଅଭିଯୋଗ କରିଛନ୍ତି ଯେ, ଇଥାନଲ୍ ମିଶ୍ରଣ ଯୋଗୁଁ ଗାଡ଼ିର ମାଇଲେଜ୍ କମିବା ସହ ଇଞ୍ଜିନ୍ ଖରାପ ହେଉଛି। ଏହି ପ୍ରସଙ୍ଗକୁ ନେଇ ସୋସିଆଲ ମିଡିଆରେ ବିଭିନ୍ନ ଟ୍ରୋଲ୍ ଓ ଡିପ୍‌ଫେକ୍ ଜରିଆରେ ନୀତିନ ଗଡ଼କରୀଙ୍କୁ ଟାର୍ଗେଟ୍ କରାଯାଉଥିବାରୁ, ସେ ଏବେ କଠୋର ଆଇନଗତ ପଦକ୍ଷେପ ନେଇଛନ୍ତି।

E20 ପେଟ୍ରୋଲକୁ ନେଇ ଆପ୍‌ର ବଡ଼ ଆନ୍ଦୋଳନ ପ୍ରସ୍ତୁତି: ପିଏମ୍‌ ଆବାସ ଘେରାଉ କରିବେ ଅରବିନ୍ଦ କେଜ୍ରିୱାଲ

Suryakanta — Mon, 27 Jul 2026 13:18:43 +0530

ଇ୨୦ (E20) ଇଥାନଲ ମିଶ୍ରିତ ପେଟ୍ରୋଲକୁ ବାଧ୍ୟତାମୂଳକ କରିବା କେନ୍ଦ୍ର ସରକାରଙ୍କ ନିଷ୍ପତ୍ତିକୁ ବିରୋଧ କରି ଆମ ଆଦମୀ ପାର୍ଟି (ଆପ୍) ଏକ ବଡ଼ ଆନ୍ଦୋଳନର ପ୍ରସ୍ତୁତି କରୁଛି। ଏହି ପ୍ରସଙ୍ଗରେ ଆସନ୍ତା ଅଗଷ୍ଟ ୧ ତାରିଖ (ଶନିବାର) ନୂଆଦିଲ୍ଲୀ ସ୍ଥିତ କନଷ୍ଟିଚ୍ୟୁସନ୍ କ୍ଲବ୍ ଠାରେ ଦଳ ପକ୍ଷରୁ ଏକ 'ନ୍ୟାସନାଲ ଟାଉନ୍ ହଲ୍ ଆଗେନଷ୍ଟ ଇ୨୦' ର ଆୟୋଜନ କରାଯିବ ବୋଲି ଆପ୍‌ର ରାଷ୍ଟ୍ରୀୟ ଆବାହକ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି।

ପ୍ରଧାନମନ୍ତ୍ରୀଙ୍କ ବାସଭବନକୁ ଯିବ ଆପ୍

ଏକ ସାମ୍ବାଦିକ ସମ୍ମିଳନୀରେ ଶ୍ରୀ କେଜ୍ରିୱାଲ କହିଛନ୍ତି ଯେ, କେନ୍ଦ୍ର ସରକାର ଯଦି ଏହି ନିଷ୍ପତ୍ତି ପ୍ରତ୍ୟାହାର ନ କରନ୍ତି ତେବେ ଆଗାମୀ ଦିନରେ ଏହା ଏକ ବିରାଟ ଜନଆନ୍ଦୋଳନର ରୂପ ନେବ। ଆସନ୍ତା ସପ୍ତାହରେ ସେ ଏକ ଦାବିପତ୍ର ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାସଭବନକୁ ଯିବେ ବୋଲି ସ୍ପଷ୍ଟ କରିଛନ୍ତି। ସେ କହିଛନ୍ତି, "ଯେତେବେଳେ ଦେଶର ଯୁବବର୍ଗ ଏକାଠି ହୋଇ ସ୍ୱର ଉତ୍ତୋଳନ କଲେ, ସେତେବେଳେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଇସ୍ତଫା ଦେବାକୁ ପଡ଼ିଥିଲା। ଠିକ୍ ସେହିପରି ଇ୨୦ ବିରୋଧରେ ମଧ୍ୟ ଆମକୁ ଏକାଠି ହୋଇ ସ୍ୱର ଉଠାଇବାକୁ ପଡ଼ିବ।"

ଇଥାନଲ ମିଶ୍ରିତ ପେଟ୍ରୋଲକୁ ନେଇ କ'ଣ ରହିଛି ସମସ୍ୟା?

ପୁରୁଣା ଯାନଗୁଡ଼ିକରେ ଇ୨୦ ପେଟ୍ରୋଲ ବ୍ୟବହାର କରିବା ଦ୍ୱାରା ମାଇଲେଜ୍ କମିବା ସହିତ ଇଞ୍ଜିନ ଶୀଘ୍ର ଖରାପ ହୋଇଯାଉଥିବା ଲୋକେ ଅଭିଯୋଗ କରୁଛନ୍ତି। ଆପ୍ ଦାବି କରିଛି ଯେ ପେଟ୍ରୋଲ ପମ୍ପଗୁଡ଼ିକରେ ଗ୍ରାହକମାନଙ୍କୁ ବିକଳ୍ପ ଭାବେ ଶୁଦ୍ଧ ପେଟ୍ରୋଲ, E10 ଏବଂ E20 ବାଛିବାର ସୁଯୋଗ ମିଳିବା ଉଚିତ। ଏଥିସହ ଇ୨୦ ତୈଳର ମାଇଲେଜ୍ କମ୍ ଥିବାରୁ ଏହାର ଦର ସାଧାରଣ ପେଟ୍ରୋଲ ତୁଳନାରେ କମ୍ ହେବା ଦରକାର।

ଟାଉନ୍ ହଲ୍‌ରେ ସାମିଲ ହେବାକୁ ଆହ୍ୱାନ

ଏହି ଟାଉନ୍ ହଲ୍ ବୈଠକରେ ବିଶେଷଜ୍ଞ ଏବଂ ଇ୨୦ ପେଟ୍ରୋଲ ଯୋଗୁଁ ନିଜ ଗାଡ଼ିରେ ସମସ୍ୟାର ସମ୍ମୁଖୀନ ହୋଇଥିବା ସାଧାରଣ ଲୋକଙ୍କୁ ଆମନ୍ତ୍ରିତ କରାଯାଇଛି। କେଜ୍ରିୱାଲ ଦେଶବାସୀଙ୍କୁ ଆହ୍ୱାନ ଦେଇଛନ୍ତି ଯେ ସେମାନେ ଅନଲାଇନ୍ ଏବଂ ଅଫଲାଇନ୍ ମାଧ୍ୟମରେ ଏହି ବୈଠକରେ ବହୁସଂଖ୍ୟାରେ ଯୋଗ ଦିଅନ୍ତୁ ଏବଂ କେନ୍ଦ୍ର ସରକାରଙ୍କ ଉପରେ ଚାପ ପକାଇବା ପାଇଁ ନିଜର ମତ ରଖନ୍ତୁ। ଆପ୍ ପକ୍ଷରୁ ଏକ ଅନଲାଇନ୍ ପିଟିସନ୍ ମଧ୍ୟ ଜାରି କରାଯାଇଛି ଯେଉଁଥିରେ ପ୍ରାୟ ୨ ଲକ୍ଷରୁ ଅଧିକ ଲୋକ ଦସ୍ତଖତ କରିସାରିଛନ୍ତି।

E20 Petrol - The Sakala