ବୌଦ୍ଧ/କଣ୍ଟାମାଲ: ବୌଦ୍ଧ ଜିଲ୍ଲା କଣ୍ଟାମାଲ ଥାନା ଅଞ୍ଚଳରେ ଗତ କିଛିଦିନ ହେବ ଲୋକେ ଲୁଟେରାଙ୍କ ଶିକାର ହେଉଛନ୍ତି। ପୂର୍ବରୁ ଘାଟି ଅଞ୍ଚଳରେ ଜଣେ ବ୍ୟକ୍ତିଙ୍କ ବାଇକ ଲୁଟି ନେଇଥିବା ବେଳେ ଏବେ ଜଣେ ଫଇନାନ୍ସ କମ୍ପାନୀ କର୍ମଚାରୀଙ୍କ ଠାରୁ ଲକ୍ଷାଧିକ ଟଙ୍କା ଲୁଟ ହୋଇଥିବା ଥାନାରେ ଅଭିଯୋଗ ହୋଇଛି। ତେବେ ଲୁଟ ସମ୍ପର୍କିତ ମାମଲା ରୁଜୁକୁ ନେଇ ସାଧାରଣରେ ସନ୍ଦେହ ପ୍ରକାଶ ପାଉଛି।

ଥାନାରେ ଦିଆଯାଇଥିବା ଏତଲା ଅନୁସାରେ, ସୋନପୁର ଜିଲ୍ଲା ବିନିକା ଥାନା ଅଞ୍ଚଳର ଅଜିତ କାଣ୍ଡ ଗତ ଦୁଇମାସ ହେବ ଭାରତ ଫଇନାନ୍ସ ପ୍ରାଇଭେଟ ଲିମିଟେଡ଼ର କଣ୍ଟାମାଲ ଶାଖାକୁ ବଦଳି ହୋଇ ଆସିଥିଲେ। କଣ୍ଟାମାଲ ଶାଖାରେ ସେ ସଙ୍ଗମ ମ୍ୟାନେଜର ଭାବେ ଯୋଗ ଦେଇଥିଲେ। ଏହି ସଂସ୍ଥା ବିଭିନ୍ନ ସ୍ୱୟଂ ସହାୟକ ଗୋଷ୍ଠୀକୁ ଋଣ ପ୍ରଦାନ କରୁଥିବା ବେଳେ କାର୍ଯ୍ୟରେ ଯୋଗ ଦେବାପରେ ଘଟଣା ଦିନ ଶ୍ରୀ କାଣ୍ଡ ଋଣ ସଂଗ୍ରହ ପାଇଁ ବରଗାଁ ପଞ୍ଚାୟତକୁ ଯାଇଥିଲେ। ବକେୟା ଋଣ ବାବଦରେ ଏହି ପଞ୍ଚାୟତର ମଲିକୁଦ ଗ୍ରାମରୁ ୨୪୭୦୦ ଟଙ୍କା, କାଣିସେମେଲ ଗ୍ରାମରୁ ୨୪୭୫୦, ଲେଣ୍ଡ୍ରିମାଲ ଗ୍ରାମରୁ ୫୮୬୮୫ ଟଙ୍କା ସମେତ ମୋଟ ୧,୦୮,୧୩୫ ଟଙ୍କା ସଂଗ୍ରହ କରି ଫେରୁଥିଲେ।

ଅପରାହ୍ନ ୪ଟାରେ ନିଜ ହୋଣ୍ଡା ସାଇନ ବାଇକ ଯୋଗେ ଫେରୁଥିବା ବେଳେ ଉଦେପୁର ବ୍ରିଜ ଠାରୁ ୨୦୦ ମିଟର ଦୂରରେ ଥିବା ଏକ ବୁଲାଣି ନିକଟରେ ଜଣେ ପିଲା ବାଇକ ସାମ୍ନାକୁ ଦୌଡ଼ି ଆସିଥିଲା। ଦୁର୍ଘଟଣା ଆଶଙ୍କା କରି ବ୍ରେକ ଦେଇ ରହିବା ପରେ ପଛରୁ ଆଉ ୩ ଜଣ ଯୁବକ ପାଖକୁ ଆସିଥିଲେ। ସେମାନଙ୍କ ମଧ୍ୟରୁ ଜଣେ ଯୁବକ ଏକ କାଠରେ ଅଜିତଙ୍କ ମୁଣ୍ଡକୁ ମାଡ ମାରିଥିଲା। ଅନ୍ୟମାନେ ମିଳିତ ଭାବେ ଆକ୍ରମଣ କରି ତାଙ୍କ ବାଇକ ଟାଣି ରାସ୍ତା ପାର୍ଶ୍ୱକୁ ଘୋଷାରି ନେଇଥିଲେ। ତଳେ ପକାଇ ପ୍ରବଳ ମାଡ ମାରିବା ସହ ଋଣ ବାବଦରେ ସଂଗ୍ରହ ହୋଇଥିବା ୧,୦୮,୧୩୫ ଟଙ୍କା, ଗୋଟିଏ ମୋବାଇଲ, କମ୍ପାନୀ ଟ୍ୟାବ, ବାୟୋମାଟ୍ରିକ୍ସ ଯନ୍ତ୍ର, ମନିପର୍ସ, ବ୍ୟାଗ ଲୁଟିନେଇ ବାଇକରେ ଫେରାର ହୋଇଯାଇଥିଲେ। ଅଜିତ କମ୍ପାନୀ ଶାଖାକୁ ଫେରି ଘଟଣା ସମ୍ପର୍କରେ ନିଜର ଶାଖା ପରିଚାଳକଙ୍କୁ ଜଣାଇଥିଲେ। ଉପରିସ୍ଥ ଅଧିକାରୀଙ୍କ ପରାମର୍ଶକ୍ରମେ ଲୁଟ ସମ୍ପର୍କରେ କଣ୍ଟାମାଲ ଥାନାରେ ଏତଲା ଦେଇଥିଲେ। ଏତଲା ଆଧାରରେ ପୁଲିସ ଏକ ମାମଲା ୮୯/୨୧ ରୁଜୁ କରି ତଦନ୍ତ ଚଳାଇଛି। ତେବେ ବିଭିନ୍ନ କାରଣରୁ ଲୁଟ ଘଟଣାକୁ ନେଇ ସନ୍ଦେହ ଉପୁଜିଛି।

ବୌଦ୍ଧ: ଆଗରୁ ହସ୍ପିଟାଲର ଚାରିକାନ୍ଥ ଭିତରେ ରୋଗୀଙ୍କୁ ଚିକିତ୍ସା କରୁଥିଲେ। ଜଙ୍ଗଲ ଭିତରେ, ମାଓ ଉପଦୃତ ଅଞ୍ଚଳରେ କେବେ ଚିକିତ୍ସା ଯୋଗାଇବାକୁ ପଡିବ ବୋଲି ଭାବି ନଥିଲେ। କିନ୍ତୁ ହଠାତ ଡାକରା ଆସିଲା ଡାକ୍ତରଙ୍କୁ । ଜଙ୍ଗଲ ଭିତରକୁ ଚିକିତ୍ସା ପାଇଁ ଯିବାକୁ ହେବ। ଦୁଇଜଣ ଯବାନ ମାଓବାଦୀ ଗୁଳିରେ ଆହତ ହୋଇଛନ୍ତି। ସେମାନଙ୍କୁ ତୁରନ୍ତ ପ୍ରାଥମିକ ଚିକିତ୍ସା ଆବଶ୍ୟକ। ଭୟ ଥିଲେ ବି କର୍ତ୍ତବ୍ୟ ଆଗରେ ସବୁ ତୁଚ୍ଛ ପଲଟିଯାଇଥିଲା। କର୍ତ୍ତବ୍ୟ ପାଳନ ପାଇଁ ଡାକ୍ତର ମାଓବାଦୀ ଘେରି ରହିଥିବା ଜଙ୍ଗଲକୁ ବାହାରି ପଡ଼ିଥିଲେ। ସେ ଆଉ କେହି ନୁହନ୍ତି, ସେ ହେଉଛନ୍ତି ଶନିବାର ଆହତ ଯବାନଙ୍କୁ ପ୍ରାଥମିକ ଚିକିତ୍ସା ଯୋଗାଇଥିବା ଓ ରାଜ୍ୟ ପୁଲିସ ମୁଖିଆଙ୍କ ଦ୍ୱାରା ପ୍ରଶଂସିତ ହୋଇଥିବା କଣ୍ଟାମାଲ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡାକ୍ତର ଜଗଦୀଶ ସେଠୀ। ଶନିବାର ଘଟଣା କେତେ ଗୁରୁତ୍ୱପୂର୍ଣ୍ଣ ଥିଲା ଓ ଘଟଣାକ୍ରମ କିପରି ଥିଲା ସେ ବିଷୟରେ ଡାକ୍ତର ସେଠୀଙ୍କ ପ୍ରତିକ୍ରିୟା ଜାଣିବା…

ଶନିବାର ସକାଳ ୮ ଟା। କଣ୍ଟାମାଲ ଥାନରୁ ଖବର ଆସିଲା ଶୁକ୍ରବାର ରାତିରେ ବୌଦ୍ଧ ଜିଲ୍ଲା ଉମା ପଞ୍ଚାୟତ ସମାଡାଙ୍ଗୀ ଓ ନାଦେନ ଜଙ୍ଗଲରେ ମାଓ ଗତିବିଧି ଖବର ପାଇ ଏସଓଜି ଯବାନମାନେ କମ୍ବିଂ କରୁଥିଲେ। କମ୍ବିଂ ବେଳେ ଏସଓଜି ଯବାନ ଓ କେକେବିଏନ ଡିଭିଜନର ମାଓବାଦୀଙ୍କ ମଧ୍ୟରେ ଗୁଳିବିନିମୟ ହୋଇଥିଲା। ଏହି ସଂଘର୍ଷରେ ଏସଓଜି(ସ୍ଵତନ୍ତ୍ର ଅପରେସନ ଗ୍ରୁପ)ର ୨ ଜଣ ଯବାନ ଆହତ ହୋଇଥିଲେ। ସେମାନଙ୍କୁ ଚିକିତ୍ସା ଆବଶ୍ୟକ ଥିବା ଥାନା ଅଧିକାରୀ ମୋତେ କହିଥିଲେ ବୋଲି ଡାକ୍ତର ସେଠୀ କହିଛନ୍ତି। ଥାନରୁ ଖବର ପାଇ ଡାକ୍ତର ସେଠୀ ତାଙ୍କ ମେଡିକାଲ ଟିମକୁ ନେଇ ଘଣ୍ଟାପଡା ଅଭିମୁଖେ ବାହାରିଥିଲେ। ଘଣ୍ଟାପଡା ପହଁଚିବା ପରେ ସେଠାରେ ପ୍ରସ୍ତୁତ ଥିବା ଆମ୍ବୁଲାନ୍ସରେ ଡାକ୍ତର ଓ ତାଙ୍କ ଟିମ ସହ ସୁରକ୍ଷାକର୍ମୀ ଉମା ଜଙ୍ଗଲ ଆଡକୁ ଯାଇଥିଲେ। କିଛି ରାସ୍ତା ଯିବା ପରେ ଆଗକୁ ଆମ୍ବୁଲାନ୍ସ ଯିବା ପାଇଁ ରାସ୍ତା ନଥିଲା। ସେଠାରେ ଆମ୍ବୁଲାନ୍ସ ରଖି ସୁରକ୍ଷାକର୍ମୀଙ୍କ ସହ ଚାଲି ଚାଲି ଜଙ୍ଗଲ ଭିତରକୁ ଚାଲିଲେ।

ରାସ୍ତାରେ ଖବର ମିଳିଲା କେନ୍ଦ୍ରୀୟ ରିଜର୍ଭ ଫୋର୍ସର ସୁରକ୍ଷାକର୍ମୀ ଆହତ ଯବାନଙ୍କୁ ବାଇକ ଓ ଷ୍ଟ୍ରେଚରରେ ଆଣୁଛନ୍ତି। ରାସ୍ତାରେ ଅପେକ୍ଷା କରିବା ସହ ଆହତ ଯବାନ ପହଁଚିବା ପରେ ସେମାନଙ୍କୁ ଆମ୍ବୁଲାନ୍ସକୁ ଆଣିଥିଲେ। ଜଣେ ଯବାନଙ୍କ ଛାତି ଓ ଅନ୍ୟ ଜଣେ ଯବାନଙ୍କ ଆଖି ପାଖରେ ଗୁଳି ବାଜିଛି। ରକ୍ତସ୍ରାବ ଯୋଗୁ ସେମାନେ ନିଶ୍ଵାସ ନେବାରେ ଅସୁବିଧା ହେଉଥିଲା ଓ ଦୁର୍ବଳ ଅନୁଭବ କରୁଥିଲେ। ଆମ୍ବୁଲାନ୍ସ ଭିତରେ ପ୍ରାଥମିକ ଚିକିତ୍ସା ଦେଇ ଘଣ୍ଟାପଡା ଅଭିମୁଖେ ଆଣିଥିଲେ ବୋଲି ଡାକ୍ତର କହିଛନ୍ତି। ଆମ୍ବୁଲାନ୍ସ ପହଁଚିବା ବେଳକୁ ଘଣ୍ଟାପଡା ହାଇସ୍କୁଲ ପଡ଼ିଆରେ ଡିଜି ଅଭୟ ଓ ଆଇଜି(ଅପରେସନ) ଅମିତାଭ ଠାକୁର ହେଲିକପ୍ଟର ସହ ଅପେକ୍ଷା କରିଥିଲେ। ବୌଦ୍ଧରେ ଦୁଇ ଯବାନ ଆହତ ଖବର ପାଇ ସେମାନେ ନିଜ କୋରାପୁଟ ଗସ୍ତ ବାତିଲ କରି ଘଣ୍ଟାପଡା ପହଞ୍ଚିଥିଲେ। ଘଟଣାର ଅନୁଧ୍ୟାନ କରିବା ସହିତ ସେଠାରେ ଗୁରୁତର ଦୁଇ ଯବାନଙ୍କୁ ହେଲିକେପ୍ଟରରେ ଧରି ଡିଜିପି ଅଭୟ ଓ ସେ ମଧ୍ୟ ଭୂବନେଶ୍ୱର ଏମ୍ସକୁ ଯାଇଥିଲେ ବୋଲି ଡାକ୍ତର ସେଠୀ କହିଛନ୍ତି। ଆଜି ଉଭୟ ଯବାନଙ୍କ ଖବର ନେଇଥିଲେ, ଉଭୟଙ୍କ ସ୍ଵସ୍ଥବସ୍ଥାରେ ଉନ୍ନତି ହେଉଥିବା ସେ କହିଛନ୍ତି। ଡାକ୍ତରଙ୍କ ଏହି ଉଦ୍ୟମ ଓ ତ୍ୱରିତ ପଦକ୍ଷେପ ପାଇଁ ରାଜ୍ୟ ପୁଲିସ ମୁଖିଆ ବହୁ ପ୍ରଶଂସା କରିଛନ୍ତି।