ଭୁବନେଶ୍ୱର: ଦାମି କାର୍‌ରେ ନିଶାସକ୍ତ ଡ୍ରାଇଭରଙ୍କ ଉନ୍ମତ୍ତ କାଣ୍ଡ । ଭୁବନେଶ୍ୱର ମଞ୍ଚେଶ୍ୱର ଥାନା ପଳାଶୁଣିରେ ସିରିଜ ଦୁର୍ଘଟଣା । ୩ କାର୍ ଏବଂ ୨ ବାଇକ ଭାଙ୍ଗି ଚୁରମାର୍ । ଦୁର୍ଘଟଣାରେ ୫ ଜଣ ଗୁରୁତର ହୋଇ ମେଡିକାଲରେ ଭର୍ତ୍ତି ହୋଇଛନ୍ତି । ଗୁରୁବାର ଭୋର ସମୟରେ ଜଣେ ମଦ୍ୟପ ଚାଳକ ଏକ ବିଳାସପୂର୍ଣ୍ଣ କାର୍‌କୁ ଦ୍ରୁତ ଗତିରେ ଚଳାଇ ଏକାଧିକ ଗାଡ଼ିକୁ ଧକ୍କା ଦେଇଛନ୍ତି। 

ସୂଚନା ଅନୁଯାୟୀ, ଦୁର୍ଘଟଣା ଘଟାଇଥିବା କାର୍‌ଟିର ବେଗ ଘଣ୍ଟାପ୍ରତି ୧୫୦ କିଲୋମିଟରରୁ ଅଧିକ ଥିଲା। ଏହି ଦ୍ରୁତଗାମୀ କାର୍‌ଟି ପ୍ରଥମେ ଏକ ଅଲ୍ଟୋ କାର୍‌କୁ ଧକ୍କା ଦେଇଥିଲା। ଏହାପରେ ଭାରସାମ୍ୟ ହରାଇ ଏକ ସ୍ୱିଫ୍ଟ ଡିଜାୟାର ଏବଂ ପରେ ଦୁଇଟି ମୋଟରସାଇକେଲ୍‌କୁ ଧକ୍କା ଦେଇଥିଲା। ଏହି ଭୟଙ୍କର ଧକ୍କା ଫଳରେ ସମୁଦାୟ ତିନୋଟି କାର୍ ଏବଂ ଦୁଇଟି ଦୁଇ ଚକିଆ ଯାନ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି।

ଦୁର୍ଘଟଣା ପରେ ସ୍ଥାନୀୟ ଲୋକଙ୍କ ସହାୟତାରେ ଆହତମାନଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ କ୍ୟାପିଟାଲ୍ ହସ୍ପିଟାଲ୍‌ରେ ଭର୍ତ୍ତି କରାଯାଇଥିଲା। ତେବେ ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକର ଏସସିବି ମେଡିକାଲ୍ କଲେଜ୍ ଓ ହସ୍ପିଟାଲ୍‌କୁ ସ୍ଥାନାନ୍ତର କରାଯାଇଛି। ଏହି ଘଟଣା ଯୋଗୁଁ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା ଏବଂ କିଛି ସମୟ ପାଇଁ ଟ୍ରାଫିକ୍ ସମସ୍ୟା ମଧ୍ୟ ଉପୁଜିଥିଲା।

ଖବର ପାଇ ମଞ୍ଚେଶ୍ୱର ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା। ପୋଲିସ ଦୁର୍ଘଟଣା ଘଟାଇଥିବା କାର୍ ଚାଳକଙ୍କୁ ଅଟକ ରଖି ପଚରାଉଚରା କରୁଛି। ପ୍ରାଥମିକ ତଦନ୍ତରୁ ଚାଳକ ଜଣକ ମଦ୍ୟପାନ କରି ଗାଡ଼ି ଚଳାଉଥିବା ପୋଲିସ ସନ୍ଦେହ କରୁଛି। ଘଟଣାର ଅଧିକ ତଦନ୍ତ ଜାରି ରହିଛି।

ଭୁବନେଶ୍ୱର: ଘରୋଇ କଳହର କରୁଣ ପରିଣତି । ପାରିବାରିକ କଳହ ସଂସାରକୁ ସମ୍ପୂର୍ଣ୍ଣ ଭାବେ ଉଜାଡି ଦେଇଛି। ସ୍ତ୍ରୀକୁ ବୀଭତ୍ସ ଭାବେ ହତ୍ୟା କରିବା ସହ ନିଜେ ବିଷ ପାନ କରି ହସ୍ପିଟାଲରେ ମରଣ ସହ ଲଢ଼େଇ କରୁଛି ସ୍ୱାମୀ । ଗୋଟିଏ ମାତ୍ର ପିଲା ନିଜ ମା’ ବାପାକୁ ନପାଇ ବାହୁନି କାନ୍ଦୁଛି। ସ୍ତ୍ରୀ ଉପରେ ପ୍ରତିଶୋଧ ଏତେ ଭୟଙ୍କର ଥିଲା ଯେ ସେ ଗାମୁଛାରେ ଗଳା ଦବାଇଲା, ବ୍ଲେଡ୍‌‌ରେ ହାତ କାଟିଲେ, ଶେଷରେ ବିଷ ଦେଇ ସ୍ତ୍ରୀକୁ ହତ୍ୟା କରିଛି। ରକ୍ତ ଜୁଡୁବୁଡୁ ଅବସ୍ଥାରେ ସ୍ତ୍ରୀ ଘର ଭିତରେ ପଡ଼ି ରହିଥିଲା ବେଳେ ସ୍ୱାମୀ ଘର ତାଲା ପକାଇ ବାହାରକୁ ଚାଲିଯାଇଥିଲା। ପୁଲିସ ଘଟଣାସ୍ଥଳରେ ପହଞ୍ଚି ପ୍ରଥମେ ମୃତଦେହକୁ ଜବତ କରିବା ସହ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ପୁଲିସ ସୂଚନା ମୁତାବକ ହତ୍ୟାକାଣ୍ଡର ଶିକାର ହୋଇଥିବା ମହିଳା ଜଣଙ୍କ ହେଲେ ମୋନିକା ଜେନା। ସେ ପ୍ରଦୀପ ଜେନାଙ୍କୁ ୭ ବର୍ଷ ତଳେ ବିବାହ କରିଥିଲେ। ଉଭୟଙ୍କ ଘର ନୟାଗଡ଼ ଜିଲ୍ଲା ଶରଣକୁଳ ଅଞ୍ଚଳରେ। ତାଙ୍କର ଗୋଟିଏ ଛୋଟ ପୁଅ ରହିଛି। ଉଭୟ ସ୍ୱାମୀ ଏବଂ ସ୍ତ୍ରୀଙ୍କ ମଧ୍ୟରେ ବିବାଦ ବହୁ ପୁରୁଣା। ବିବାଦ ଏତେ ତୀବ୍ର ହୋଇଯାଇଥିଲା ଯେ ମାମଲା ନୟାଗଡ଼ ଜିଲ୍ଲାର ଶରଣକୂଳ ଥାନାରେ ପହଞ୍ଚିଥିଲା। ଶରଣକୁଳ ଥାନା ପୁଲିସ ଏକ ପାରିବାରକ କଳହ ମାମଲା ରୁଜୁ କରିଥିଲା। ସ୍ତ୍ରୀ ମୋନିକା ଯେଉଁଠି ବି ରହୁଥିଲେ ସେଠାରେ ସେ ପହଞ୍ଚି ଗଣ୍ଡଗୋଳ କରୁଥିଲା। ଏପରିକି କିଛିଦିନ ତଳେ ପୁଅକୁ ବି ଜବରଦସ୍ତି ମୋନିକାଙ୍କ ଠାରୁ ନେଇ ଯାଇଥିଲା। ସ୍ୱାମୀଙ୍କ ଆକ୍ରୋଶର ଶିକାର ହେବା ଯୋଗୁଁ ଭୟରେ ବାରମ୍ବାର ଘର ବଦଳାଉଥିଲା। ରାଜଧାନୀରେ ଲୁଚି ବୁଲୁଥିଲେ।

ପ୍ରଦୀପ ଗୁଜୁରାଟରେ କାଚ ଫିଟିଂ କାମ କରନ୍ତି। ସେ କିଛିଦିନ ହେବ ଭୁବନେଶ୍ୱର ଫେରିଛନ୍ତି। ଏହା ଜାଣି ପାରି ମୋନିକା ଘର ବଦଳାଇ ଦେଇଥିଲେ। ୧୫ ଦିନ ତଳେ ମଞ୍ଚେଶ୍ୱର ଥାନା ଚକେଇସିଆଣି ଡିଏନ୍‌‌ କ୍ଲବ୍‌‌ ନିକଟସ୍ଥ ପ୍ରଶାନ୍ତୀ ଲେନ୍‌‌, ମାଳତୀ ଭବନ ପ୍ଲଟ୍‌‌ ନଂ. ୧୯୬/୫୯୪୪ରେ ମୋନିକା ତାଙ୍କ ମା’ଙ୍କ ସହ ଆସି ଭଡାରେ ରହୁଥିଲେ। ହେଲେ ପ୍ରଦୀପ ତାଙ୍କୁ ଖୋଜୁଥିଲେ। ସୋମବାର ସେ ମୋନିକାଙ୍କ ଚକେଇସିଆଣି ଠିକଣା ପାଇ ଯାଇଥିଲେ। ମୋନିକାଙ୍କ ମା’ ଲେବର କାମ କରିବାକୁ ବାହାରକୁ ଯାଇଥିଲା ବେଳେ ସେ ଆସି ପହଞ୍ଚି ଥିଲେ।
ପରେ ଉଭୟ କିଛି ସମୟ ପାଇଁ କଥାବାର୍ତ୍ତା ହୋଇଥିଲେ। ଏହାପରେ ପରେ ସ୍ୱାମୀ ପ୍ରଦୀପ ହତ୍ୟାକାଣ୍ଡର ଷଡ଼ଯନ୍ତ୍ର ରଚିଥିଲା। ଗାମୁଛାରେ ଗଳା ଦବାଇଲା, ବ୍ଲେଡ୍‌‌ରେ ହାତ କାଟିଲେ, ଶେଷରେ ସ୍ତ୍ରୀକୁ ବିଷ ଦେଇ ହତ୍ୟା କଲା। ଏହାପରେ ମାର୍କେଟରୁ ଏକ ନୂଆ ତାଲା ଆଣି ଘରେ ପକାଇ ଚାଲିଗଲା। ସନ୍ଦେହ ଜନକ ଅବସ୍ଥାରେ ନୂଆ ତାଲା ଦେଖି ଘର ମାଲିକ ପ୍ରଥମେ ତାଙ୍କ ମା’ଙ୍କୁ ଖବର ଦେଇଥିଲେ। ପରେ ତାଲା ଭଙ୍ଗି ଘରେ ପ୍ରବେଶ କରିବା ପରେ ମହିଳାଙ୍କ ରକ୍ତ ଯୁଡୁବୁଡୁ ମୃତ ଦେହ ମିଳିଥିଲା। ପୁଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।

ଏନେଇ ସ୍ୱାମୀ ପ୍ରଦୀପକୁ ପୁଲିସ ଖୋଜାଖୋଜି କରିବା ଆରମ୍ଭ କରିଥିଲା। ଏହାପରେ ଜଣାପଡ଼ିଥିଲା ଯେ ପ୍ରଦୀପ ହତ୍ୟା କରିବା ପରେ ନିଜେ ବିଷ ପାନ କରି ହତ୍ୟା ଉଦ୍ୟମ କରିଥିଲା। ଗୁରୁତର ଅବସ୍ଥାରେ ପ୍ରଦୀପକୁ ମଞ୍ଚେଶ୍ୱର ଶିଳ୍ପାଞ୍ଚଳସ୍ଥିତ ଏକ ଅଟୋରୁ ଉଦ୍ଧାର କରାଯାଇଥିଲା। ପ୍ରଦୀପକୁ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି। ତେବେ ତଦନ୍ତ ପରେ ସ୍ପଷ୍ଟ ହେବ ସେ କେଉଁ କାରଣରୁ ହତ୍ୟା କରିଛନ୍ତି। 

ଭୁବନେଶ୍ୱର: ପୂର୍ବ ଶତ୍ରୁତାକୁ କେନ୍ଦ୍ର କରି ରାଜଧାନୀ ଭୁବନେଶ୍ୱରରେ ହତ୍ୟାକାଣ୍ଡ । ପୂର୍ବ ଶତ୍ରୁତାକୁ କେନ୍ଦ୍ର କରି ଜଣେ ବ୍ୟକ୍ତିଙ୍କୁ ନିର୍ମମ ଭାବେ ହତ୍ୟା କରାଯାଇଛି। ମୃତକ ଜଣକ ହେଲେ ମଞ୍ଚେଶ୍ୱର ଥାନା ଅନ୍ତର୍ଗତ ଝରଣା ବସ୍ତିର ବନମାଳୀ ଭୋଳ। ମିଳିଥିବା ସୂଚନା ଅନୁଯାୟୀ, ଗତ ଜୁଲାଇ ୧୫ ତାରିଖ ଦିନ କିଛି ଦୁର୍ବୃତ୍ତ ତାଙ୍କ ବାସଭବନ ନିକଟରେ ତାଙ୍କ ଉପରେ ଧାରୁଆ ଅସ୍ତ୍ରରେ ସଂଘବଦ୍ଧ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ସକାଳେ ତାଙ୍କର ମୃତ୍ୟୁ ଘଟିଛି।

ଏହି ହତ୍ୟାକାଣ୍ଡ ମାମଲାରେ ପୋଲିସ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରି ଆଦିତ୍ୟ ଲେଙ୍କା ନାମକ ଜଣେ ଅଭିଯୁକ୍ତଙ୍କୁ ଗିରଫ କରିଛି। ତେବେ ଘଟଣାର ମୁଖ୍ୟ ଅଭିଯୁକ୍ତ କୁହାଯାଉଥିବା ସୁଶୀଲ ସ୍ୱାଇଁ ଏବେ ବି ଫେରାର ଅଛି। ତାକୁ ଧରିବା ପାଇଁ ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।

ମଞ୍ଚେଶ୍ୱର ପୋଲିସ ପକ୍ଷରୁ ଏହି ଘଟଣାର ବିସ୍ତୃତ ତଦନ୍ତ ଆରମ୍ଭ ହୋଇଛି। ଆବଶ୍ୟକ ପଡ଼ିଲେ ତଦନ୍ତ ପ୍ରକ୍ରିୟାରେ ସାଇଣ୍ଟିଫିକ୍ ଟିମ୍ ବା ବୈଜ୍ଞାନିକ ଦଳକୁ ସାମିଲ କରାଯାଇପାରେ ବୋଲି ସୂଚନା ମିଳିଛି। ରାଜଧାନୀରେ ଏଭଳି ଅପରାଧିକ ଘଟଣା ସାଧାରଣ ଲୋକଙ୍କ ମନରେ ଭୟ ସୃଷ୍ଟି କରିଛି।