ଭୁବନେଶ୍ୱର: ଓଡ଼ିଶା କ୍ୟାଡରର ୨୦୦୩ ବ୍ୟାଚ୍ ଆଇପିଏସ୍ ଅଧିକାରୀ ତଥା କ୍ରାଇମ୍ ବ୍ରାଞ୍ଚ ଆଇଜି ସଫିନ୍ ଅହମ୍ମଦ କେ'ଙ୍କର ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୫୦ ବର୍ଷ ବୟସ ହୋଇଥିଲା। କେରଳର ତିରୁଅନନ୍ତପୁରମସ୍ଥିତ ଏକ ଘରୋଇ ଡାକ୍ତରଖାନାରେ କର୍କଟ ରୋଗରେ ଆକ୍ରାନ୍ତ ହୋଇ ସେ ଦୀର୍ଘ ଦିନ ଧରି ଚିକିତ୍ସାଧୀନ ଥିଲେ। ତାଙ୍କର ଏହି ଅକାଳ ବିୟୋଗରେ ଓଡ଼ିଶା ପୁଲିସ ବିଭାଗରେ ଗଭୀର ଶୋକର ଛାୟା ଖେଳିଯାଇଛି।

କେରଳର ବାସିନ୍ଦା ତଥା କଲେଜ ଅଫ୍ ଇଞ୍ଜିନିୟରିଂ ତ୍ରିଭେନ୍ଦ୍ରମ୍‌ରୁ (CET) ଇଞ୍ଜିନିୟରିଂ ଗ୍ରାଜୁଏଟ୍ ଥିବା ସେଫିନ୍ ଅହମ୍ମଦ ଜୁଲାଇ ୨୦୨୩ରୁ ଓଡ଼ିଶା ସିଆଇଡି କ୍ରାଇମ୍ ବ୍ରାଞ୍ଚର ନେତୃତ୍ୱ ନେଉଥିଲେ। ସେ ପୂର୍ବତନ ସିଆଇଟିୟୁ (CITU) ନେତା ହବିବଙ୍କ ସୁପୁତ୍ର ଥିଲେ। ଭାରତୀୟ ପୋଲିସ ସେବାରେ ଯୋଗଦେବା ପରେ ସେ ଆସିଷ୍ଟାଣ୍ଟ ସୁପରିଣ୍ଟେଣ୍ଡେଣ୍ଟ ଅଫ୍ ପୋଲିସ ଭାବେ ନିଜର କର୍ମମୟ ଜୀବନ ଆରମ୍ଭ କରିଥିଲେ। ଦୁଇ ଦଶନ୍ଧିରୁ ଅଧିକ ସମୟ ଧରି ସେ ଓଡ଼ିଶାରେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ ରହିଥିଲେ, ଯେପରିକି ଝାରସୁଗୁଡ଼ା ଏସପି, ଦକ୍ଷିଣ-ପଶ୍ଚିମାଞ୍ଚଳ ଡିଆଇଜି, ଡିଆଇଜି (ଟେକ୍ନିକାଲ୍), ଆଇଜିପି (ହୋମଗାର୍ଡ) ଏବଂ ଆଇଜିପି (ମାନବାଧିକାର ସୁରକ୍ଷା ସେଲ୍)। ଏହା ବ୍ୟତୀତ ସେ ନିଜ ଗୃହ ରାଜ୍ୟ କେରଳରେ ମଧ୍ୟ କିଛି ବର୍ଷ ପାଇଁ ଆନ୍ତଃ-କ୍ୟାଡର ଡେପୁଟେସନରେ ଯାଇ ତିରୁଅନନ୍ତପୁରମରେ ଏସପି (ରୁରାଲ୍) ଭାବେ କାର୍ଯ୍ୟ କରିଥିଲେ।

ସାଇବର କ୍ରାଇମ ଏବଂ ସିଆଇଡି କ୍ରାଇମ୍ ବ୍ରାଞ୍ଚରେ ତାଙ୍କର ଉଲ୍ଲେଖନୀୟ କାର୍ଯ୍ୟ ଏବଂ ବିଭିନ୍ନ ଅଭିଯାନ ପାଇଁ ତାଙ୍କୁ ଏକାଧିକ ସମ୍ମାନ ଏବଂ ପଦକ ପ୍ରଦାନ କରାଯାଇଥିଲା। ସହକର୍ମୀମାନେ ତାଙ୍କୁ ଜଣେ ଅତ୍ୟନ୍ତ ପେସାଦାର, ଅଭିଜ୍ଞ ତଥା ଶାନ୍ତ ଓ କର୍ତ୍ତବ୍ୟନିଷ୍ଠ ଅଧିକାରୀ ଭାବେ ସ୍ମରଣ କରିଛନ୍ତି। ତାଙ୍କର ଅକାଳ ବିୟୋଗରେ ରାଜ୍ୟ ପୁଲିସର ବରିଷ୍ଠ ନେତୃତ୍ୱ ସ୍ତରରେ ଏକ ବିରାଟ ଶୂନ୍ୟସ୍ଥାନ ସୃଷ୍ଟି ହୋଇଛି। 

ଅଗରତାଲା: ତ୍ରିପୁରାର ପୋଲିସ ମହାନିର୍ଦ୍ଦେଶକ (ଡିଜିପି) ଅନୁରାଗ ଧନଖରଙ୍କର ସନ୍ଦେହଜନକ ସ୍ଥିତିରେ ମୃତଦେହ ଉଦ୍ଧାର ହୋଇଛି । ଅଗରତାଲା ସ୍ଥିତ ରାଜ୍ୟ ପୋଲିସ ମୁଖ୍ୟାଳୟରେ ଥିବା ତାଙ୍କ ଚାମ୍ବରର ବାଥରୁମରୁ ତାଙ୍କର ମୃତଦେହ ଉଦ୍ଧାର କରାଯାଇଛି ବୋଲି ଅଧିକାରୀମାନେ ସୂଚନା ଦେଇଛନ୍ତି।

ଘଟଣାସ୍ଥଳରୁ ଏହି ବରିଷ୍ଠ ଆଇପିଏସ ଅଧିକାରୀଙ୍କୁ ତୁରନ୍ତ ଅଗରତାଲା ସରକାରୀ ମେଡିକାଲ କଲେଜ ଏବଂ ଗୋବିନ୍ଦ ବଲ୍ଲଭ ପନ୍ତ ହସ୍ପିଟାଲକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ହସ୍ପିଟାଲର ମେଡିସିନ ବିଭାଗ ମୁଖ୍ୟ ଡାକ୍ତର ପ୍ରଦୀପ ଭୌମିକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ହସ୍ପିଟାଲ ଆସିବା ବେଳକୁ ଅନୁରାଗଙ୍କ ଶରୀରରେ କୌଣସି ଜୀବନର ଲକ୍ଷଣ ନଥିଲା। ତାଙ୍କ ମୃତଦେହକୁ ବ୍ୟବଚ୍ଛେଦ (ପୋଷ୍ଟମର୍ଟମ) ପାଇଁ ପଠାଯାଇଛି ଏବଂ ରିପୋର୍ଟ ଆସିବା ପରେ ହିଁ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ। ଅବଶ୍ୟ, ତ୍ରିପୁରା ସରକାର କିମ୍ବା ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ଏଯାଏଁ ମୃତ୍ୟୁର କାରଣ ସମ୍ପର୍କରେ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ।

୧୯୯୪ ବ୍ୟାଚ୍ ର ତ୍ରିପୁରା କ୍ୟାଡରର ଆଇପିଏସ ଅଧିକାରୀ ଅନୁରାଗ ଗତବର୍ଷ ମେ ୧୭ ତାରିଖରେ ରାଜ୍ୟର ଡିଜିପି ଭାବେ ଦାୟିତ୍ୱ ଗ୍ରହଣ କରିଥିଲେ। ସେ ପୂର୍ବତନ ଡିଜିପି ଅମିତାଭ ରଞ୍ଜନଙ୍କ ସ୍ଥାନ ନେଇଥିଲେ। ଏହାପୂର୍ବରୁ ସେ ତ୍ରିପୁରା ପୋଲିସର ଗୁଇନ୍ଦା ବିଭାଗରେ ମହାନିର୍ଦ୍ଦେଶକ ଭାବେ କାର୍ଯ୍ୟ କରିଥିଲେ। ତାଙ୍କର ଶିକ୍ଷାଗତ ଯୋଗ୍ୟତା ଖୁବ୍ ଉଚ୍ଚକୋଟୀର ଥିଲା। ସେ ମହୀଶୂର ସ୍ଥିତ ସିଏଫଟିଆରଆଇ (CFTRI)ରୁ ଖାଦ୍ୟ ପ୍ରଯୁକ୍ତିବିଦ୍ୟାରେ ସ୍ନାତକୋତ୍ତର, ଓସ୍ମାନିଆ ବିଶ୍ୱବିଦ୍ୟାଳୟରୁ ପୋଲିସ ମ୍ୟାନେଜମେଣ୍ଟରେ ମାଷ୍ଟର ଡିଗ୍ରୀ ଏବଂ ହାଇଦ୍ରାବାଦ ନାଲସାର (NALSAR) ୟୁନିଭର୍ସିଟି ଅଫ୍ ଲ’ରୁ ସାଇବର କ୍ରାଇମରେ ପିଜି ଡିପ୍ଲୋମା ହାସଲ କରିଥିଲେ।

ଅନୁରାଗ ଆମେରିକାର ଏସିଏଫଇ (ACFE)ରୁ ଜଣେ ସାର୍ଟିଫାଇଡ୍ ଫ୍ରଡ୍ ଏକ୍ସାମିନର୍ ମଧ୍ୟ ଥିଲେ। ସେ ୧୯୯୫ରୁ ୨୦୦୩ ମଧ୍ୟରେ ତ୍ରିପୁରାର ବିଭିନ୍ନ ଗୁରୁତ୍ୱପୂର୍ଣ୍ଣ ପଦବୀରେ ଦାୟିତ୍ୱ ତୁଲାଇଥିଲେ। ୨୦୦୩-୦୪ ମସିହାରେ ସେ କୋସୋଭୋରେ ଜାତିସଂଘ ମିଶନ ସହିତ ମଧ୍ୟ କାର୍ଯ୍ୟ କରିଥିଲେ। ସେହିପରି ୨୦୦୫ରୁ ୨୦୧୩ ପର୍ଯ୍ୟନ୍ତ କେନ୍ଦ୍ରୀୟ ଡେପୁଟେସନରେ ଯାଇ ସିବିଆଇ (CBI)ର ଏସପି ଏବଂ ପରେ ଡିଆଇଜି ଭାବେ କାର୍ଯ୍ୟ କରିଥିଲେ। କେବଳ ସେତିକି ନୁହେଁ, ସେ ସିଆଇଏସଏଫ (CISF) ଏବଂ ବିପିଆର ଆଣ୍ଡ ଡି (BPR&D) ଭଳି ସଂସ୍ଥାରେ ଗୁରୁତ୍ୱପୂର୍ଣ୍ଣ ପଦବୀରେ ରହିଥିଲେ।

ବିଶେଷ କରି, କେନ୍ଦ୍ର ଗୃହ ମନ୍ତ୍ରଣାଳୟ ଦ୍ୱାରା ଗଠିତ ୧୯୮୪ ଶିଖ୍ ବିରୋଧୀ ଦଙ୍ଗାର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତକାରୀ ଦଳ (SIT)ର ଅଧ୍ୟକ୍ଷ ଭାବରେ ଅନୁରାଗ ନିଜର ଦକ୍ଷତା ପ୍ରତିପାଦନ କରିଥିଲେ। ତାଙ୍କର ଏହି ଅକାଳ ବିୟୋଗ ପୋଲିସ ବିଭାଗ ପାଇଁ ଏକ ବଡ଼ କ୍ଷତି ବୋଲି ବିବେଚନା କରାଯାଉଛି।