ଭୁବନେଶ୍ୱର: ଉପମୁଖ୍ୟମନ୍ତ୍ରୀଙ୍କ ପିଏ ପରିଚୟ ଦେଇ ଠକେଇ । ଚାକିରି ନାଁରେ କୋଟିଏରୁ ଅଧିକ ଠକେଇ । ଓଡ଼ିଶାର ଉପମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସହାୟକ (ପିଏ) ଭାବରେ ନିଜକୁ ପରିଚୟ ଦେଇ ଚାକିରି ଆଶାୟୀଙ୍କ ଠାରୁ ପ୍ରାୟ ୧ କୋଟି ଟଙ୍କା ଠକି ନେଇଥିବା ଜଣେ ବ୍ୟକ୍ତିଙ୍କୁ ପୋଲିସ ବୁଧବାର ଦିନ ଗିରଫ କରିଛି। ଅଭିଯୁକ୍ତ ଜଣକ ହେଉଛନ୍ତି ଜଗନ୍ନାଥ ବାହାଳିଆ। ତାଙ୍କୁ ପଶ୍ଚିମବଙ୍ଗର ଦୀଘାରୁ ଭଦ୍ରକ ଟାଉନ ପୋଲିସର ଏକ ସ୍ୱତନ୍ତ୍ର ଟିମ୍ ଗିରଫ କରିବାରେ ସଫଳ ହୋଇଛି।

ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ଜଗନ୍ନାଥ ବାହାଳିଆ ନିଜକୁ ଉପମୁଖ୍ୟମନ୍ତ୍ରୀଙ୍କ ପିଏ ବୋଲି ପରିଚୟ ଦେଉଥିଲେ। ସାଧାରଣ ଲୋକଙ୍କ ବିଶ୍ୱାସ ଜିଣିବା ପାଇଁ ସେ ଉପମୁଖ୍ୟମନ୍ତ୍ରୀ ଏବଂ ଅନ୍ୟାନ୍ୟ ପ୍ରମୁଖ ରାଜନୈତିକ ନେତାଙ୍କ ସହ ଉଠାଇଥିବା ଫଟୋଗୁଡ଼ିକୁ ବ୍ୟବହାର କରୁଥିଲେ। ଏହି ଫଟୋ ଦେଖାଇ ସେ ନିଜର ରାଜନୈତିକ ପ୍ରଭାବ ଥିବା ଦାବି କରିବା ସହ ଟଙ୍କା ବଦଳରେ ଯୁବକମାନଙ୍କୁ ସରକାରୀ ଚାକିରି କରାଇଦେବାର ପ୍ରତିଶ୍ରୁତି ଦେଉଥିଲେ।

ଏହିଭଳି ଏକ ଠକେଇର ଶିକାର ହୋଇଥିଲେ ବାଲେଶ୍ୱର ଜିଲ୍ଲା ସିମୁଳିଆ ଅଞ୍ଚଳର ଜଣେ ଯୁବକ। ରେଳବାଇରେ ଚାକିରି କରାଇଦେବା ନାମରେ ଅଭିଯୁକ୍ତ ଜଣକ ତାଙ୍କଠାରୁ ୧୦ ଲକ୍ଷ ଟଙ୍କା ନେଇଥିଲେ ଏବଂ ପରେ ତାଙ୍କୁ ଏକ ନକଲି ନିଯୁକ୍ତି ପତ୍ର ପ୍ରଦାନ କରିଥିଲେ। ପୋଲିସର ଅନୁମାନ ଯେ ଅନେକ ଲୋକ ଏହିଭଳି ଭାବେ ଅଭିଯୁକ୍ତଙ୍କ ଦ୍ୱାରା ପ୍ରତାରିତ ହୋଇଛନ୍ତି।

ଠକେଇ ସମ୍ପର୍କରେ ବାଲେଶ୍ୱର, ଭଦ୍ରକ ଏବଂ କଟକ ଜିଲ୍ଲାରେ ଏକାଧିକ ମାମଲା ରୁଜୁ ହୋଇଥିଲା। ଅଭିଯୋଗକୁ ଭିତ୍ତି କରି ଭଦ୍ରକ ଟାଉନ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ପୋଲିସ ତାଙ୍କ ଲୋକେସନ ଟ୍ରାକ୍ କରି ଶେଷରେ ତାଙ୍କୁ ଦୀଘାରୁ ଗିରଫ କରିଥିଲା। 

ଅଭିଯୁକ୍ତ ଏପର୍ଯ୍ୟନ୍ତ ମୋଟ କେତେ ଟଙ୍କା ଆଦାୟ କରିଛନ୍ତି, କେତେ ଜଣ ଯୁବକ ଏହି ଠକେଇର ଶିକାର ହୋଇଛନ୍ତି ଏବଂ ଏହି ଗ୍ୟାଙ୍ଗରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ, ସେ ନେଇ ପୋଲିସ ଅଧିକ ଖୋଳତାଡ଼ ଜାରି ରଖିଛି।

ଭୁବନେଶ୍ୱର: ପିଏମ୍-ସୂର୍ଯ୍ୟ ଘରକୁ ପିଏମ୍-ଆବାସ ଯୋଜନା ସହ ସଂଯୋଜନ କରାଯିବ । ଏନେଇ ଘୋଷଣା କରିଛନ୍ତି ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ । ରାଜ୍ୟରେ ବିଦ୍ୟୁତ୍ କ୍ଷେତ୍ରରେ ସଂସ୍କାର, ସୁରକ୍ଷା ବ୍ୟବସ୍ଥା ଏବଂ କେନ୍ଦ୍ର ଓ ରାଜ୍ୟ ଯୋଜନାର ସଫଳ ରୂପାୟନ ନେଇ ଭୁବନେଶ୍ୱରଠାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଛି । ରାଜ୍ୟର ଉପମୁଖ୍ୟମନ୍ତ୍ରୀ ତଥା ଶକ୍ତି ମନ୍ତ୍ରୀ କନକ ବର୍ଦ୍ଧନ ସିଂହଦେଓ ଏହି ବୈଠକରେ ଅଧ୍ୟକ୍ଷତା କରି ଏହି ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି। ପିଏମ ସୂର୍ଯ୍ୟ ଘର ଯୋଜନାକୁ ଏବେ ପ୍ରଧାନମନ୍ତ୍ରୀ ଆବାସ ଯୋଜନା (PMAY) ସମେତ ଅନ୍ୟ ଆବାସ ଯୋଜନା ସହ ସାମିଲ କରାଯିବ ବୋଲି ସେ ସୂଚନା ଦେଇଛନ୍ତି।

ଉପମୁଖ୍ୟମନ୍ତ୍ରୀଙ୍କ କହିବା ଅନୁଯାୟୀ, ଆବାସ ଯୋଜନା ସହ ଏହାକୁ ଯୋଡ଼ିବା ଦ୍ୱାରା ଲୋକଙ୍କୁ ୨୪ ଘଣ୍ଟିଆ ସ୍ୱଚ୍ଛ ବିଦ୍ୟୁତ୍ ମିଳିବା ସହ ବିଦ୍ୟୁତ୍ ବିଲ୍ ବୋଝ ମଧ୍ୟ ଯଥେଷ୍ଟ କମ୍ ହେବ। ଏହି ଯୋଜନା ଅଧୀନରେ ସହରାଞ୍ଚଳର ହିତାଧିକାରୀମାନଙ୍କୁ ୧ କିଲୋୱାଟ୍ ରୁଫଟପ୍ ସୋଲାର ଲଗାଇବା ପାଇଁ କେନ୍ଦ୍ର ସରକାରଙ୍କ ତରଫରୁ ୩୦,୦୦୦ ଟଙ୍କା ଏବଂ ରାଜ୍ୟ ସରକାରଙ୍କ ତରଫରୁ ୨୫,୦୦୦ ଟଙ୍କା ସବସିଡି ପ୍ରଦାନ କରାଯିବ। ଫଳରେ ଏହି ସୁବିଧା ପାଇଁ ହିତାଧିକାରୀଙ୍କୁ ନିଜ ପକେଟରୁ ମାତ୍ର ୧,୮୭୫ ଟଙ୍କା ଦେବାକୁ ପଡ଼ିବ।

ସହରାଞ୍ଚଳ ଓ ଗ୍ରାମାଞ୍ଚଳରେ ଜନସାଧାରଣଙ୍କ ସୁରକ୍ଷାକୁ ପ୍ରାଥମିକତା ଦେବା ପାଇଁ ଉପମୁଖ୍ୟମନ୍ତ୍ରୀ ବିଦ୍ୟୁତ୍ ବିତରଣ କମ୍ପାନୀ (DISCOMs) ଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ବିଦ୍ୟୁତ୍ ସୁରକ୍ଷା ନିମନ୍ତେ ଚାରୋଟି ଯାକ ଡିସକମ୍ ଅଧୀନରେ ୩,୭୦୮ କୋଟି ଟଙ୍କା ବ୍ୟୟରେ ଅଣ୍ଡରଗ୍ରାଉଣ୍ଡ କେବୁଲିଂ ବା ଭୂତଳ ତାର ବିଛାଇବା ପ୍ରକଳ୍ପକୁ ମଞ୍ଜୁରୀ ମିଳିଛି। ଏହା ବ୍ୟତୀତ ତଳକୁ ଝୁଲି ରହିଥିବା ତାରକୁ ହଟାଇବା, ଇନସୁଲେଟେଡ୍ କଣ୍ଡକ୍ଟର ଲଗାଇବା, ସବଷ୍ଟେସନ ଗୁଡ଼ିକର ଚତୁଃପାର୍ଶ୍ୱରେ ଫେନ୍ସିଂ କରିବା ଏବଂ ଉତ୍ତମ ତଦାରଖ ପାଇଁ ଏକ ୟୁଟିଲିଟି ସିଫ୍ଟିଂ ପୋର୍ଟାଲ୍ ବିକଶିତ କରିବା ଉପରେ ବୈଠକରେ ନିଷ୍ପତ୍ତି ନିଆଯାଇଛି।