ଭୁବନେଶ୍ୱର: ଭିଜିଲାନ୍ସ ଜାଲରେ ଲାଞ୍ଚୁଆ ଟ୍ରାଫିକ୍ ଇନ୍ସପେକ୍ଟର। ସୁନ୍ଦରଗଡ଼ ଆଞ୍ଚଳିକ ପରିବହନ କାର୍ଯ୍ୟାଳୟ (ଆରଟିଓ) ର ଟ୍ରାଫିକ୍ ଇନ୍ସପେକ୍ଟର ମୁକେଶ କୁମାର ମିଶ୍ର ଜଣେ ଟ୍ରକ୍ ମାଲିକଙ୍କଠାରୁ ୨୦,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଆଜି ଭିଜିଲାନ୍ସ ହାତରେ ଧରାପଡ଼ିଛନ୍ତି।

ବିଭାଗୀୟ ଅଧିକାରୀଙ୍କ ସୂଚନା ଅନୁଯାୟୀ, ଟ୍ରାଫିକ୍ ଇନ୍ସପେକ୍ଟର ଶ୍ରୀ ମିଶ୍ର ତାଙ୍କ ଅଧୀନରେ ଥିବା ଅଞ୍ଚଳରେ ଦୁଇଟି ହାଇଭା (HYVA) ଟ୍ରକ୍ କୁ ବିନା ବାଧାରେ ଚଳାଇବାକୁ ଦେବା ପାଇଁ ମାସିକ ବଟି ବା କୋଟା ଆକାରରେ ଏହି ଅର୍ଥ ଦାବି କରିଥିଲେ। ସେ ଜୁନ୍ ଏବଂ ଜୁଲାଇ ୨୦୨୬ ମାସ ପାଇଁ ଏହି ଟଙ୍କା ମାଗିଥିଲେ। ତେବେ ଅଭିଯୋଗକାରୀ ଏତେ ଟଙ୍କା ଦେବାକୁ ଅସମର୍ଥ ହୋଇ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଅଭିଯୋଗ ପାଇବା ପରେ ଭିଜିଲାନ୍ସ ଅଧିକାରୀମାନେ ଯୋଜନାବଦ୍ଧ ଭାବେ ଏକ ଜାଲ ବିଛାଇଥିଲେ।

ଲାଞ୍ଚ ନେଉଥିବା ସମୟରେ ଭିଜିଲାନ୍ସ ଟିମ୍ ମୁକେଶ କୁମାର ମିଶ୍ର ଙ୍କୁ କାବୁ କରିବା ସହ ତାଙ୍କ ନିକଟରୁ ସମ୍ପୂର୍ଣ୍ଣ ୨୦ ହଜାର ଟଙ୍କା ଜବତ କରିଥିଲେ। ଆୟ ବହିର୍ଭୂତ ସମ୍ପତ୍ତି ଠୁଳ (ଡିଏ) ଅଭିଯୋଗର ତଦନ୍ତ ପାଇଁ ଅଭିଯୁକ୍ତଙ୍କ ସହ ଜଡିତ ୩ଟି ସ୍ଥାନରେ ଏକକାଳୀନ ଚଢ଼ାଉ ଜାରି ରହିଛି।

କଳାହାଣ୍ଡି: ଭିଜିଲାନ୍ସ ଜାଲରେ OAV ପ୍ରିନ୍ସପାଲ୍ । କଳାହାଣ୍ଡି ଜିଲ୍ଲା ଥୁଆମୂଳ ରାମପୁର OAV ପ୍ରିନ୍ସପାଲ୍ ସୀତାକାନ୍ତ ରଣା SHG ମହିଳାଙ୍କ ବିଲ୍‌ କରିବା ପାଇଁ ୧୦ ହଜାର ଲାଞ୍ଚ ନେଉଥିବାବେଳେ ମାଡିବସିଲା ଭିଜିଲାନ୍ସ ବିଭାଗ । ସୂଚନା ଅନୁଯାୟୀ, ଚଳିତ ଆର୍ଥିକ ବର୍ଷ ୨୦୨୬-୨୭ ର ତିନି ମାସ ପାଇଁ ବିଦ୍ୟାଳୟରେ କରାଯାଇଥିବା ସଫେଇ କାର୍ଯ୍ୟର ବକେୟା ବିଲ୍ ପାସ୍ କରାଇଦେବା ପାଇଁ ପ୍ରିନ୍ସପାଲ୍ ଶ୍ରୀ ରଣା ଏହି ଲାଞ୍ଚ ମାଗିଥିଲେ। ଏସଏଚଜି କର୍ମକର୍ତ୍ତା ଜଣକ ଦୀର୍ଘ ଦିନ ଧରି ନିଜର ବକେୟା ପ୍ରାପ୍ୟ ପାଇଁ ତାଙ୍କୁ ଅନୁରୋଧ କରୁଥିଲେ ମଧ୍ୟ ବିଲ୍ ପାସ୍ କରିବା ବାବଦକୁ ସେ ୧୦,୦୦୦ ଟଙ୍କା ଦାବି କରିଥିଲେ। 

ଲାଞ୍ଚ ଦେବାକୁ ଅସମର୍ଥ ହେବାରୁ ଅଭିଯୋଗକାରୀ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ପୂର୍ବ ଯୋଜନା ମୁତାବକ ଭିଜିଲାନ୍ସ ଟିମ୍ ଜାଲ ବିଛାଇ ଶ୍ରୀ ରଣାଙ୍କୁ ଲାଞ୍ଚ ନେଉଥିବା ସମୟରେ କାବୁ କରିବା ସହ ତାଙ୍କ ପାଖରୁ ସମସ୍ତ ଟଙ୍କା ଜବତ କରିଛି। ଲାଞ୍ଚ ନେବା ଅଭିଯୋଗରେ ଧରାପଡ଼ିବା ପରେ ତାଙ୍କର ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗର ତଦନ୍ତ ପାଇଁ ଶ୍ରୀ ରଣାଙ୍କ ସହ ଜଡିତ ଦୁଇଟି ସ୍ଥାନରେ ଏକକାଳୀନ ଚଢ଼ାଉ ଜାରି ରହିଛି। 

ସମ୍ବଲପୁର: ଓଡ଼ିଶା ଭିଜିଲାନ୍ସ ପକ୍ଷରୁ ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଜାରି ରହିଛି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବୁର୍ଲା ସ୍ଥିତ ଭିମସାର (VIMSAR) ରେ କାର୍ଯ୍ୟରତ ଏଷ୍ଟାବ୍ଲିସମେଣ୍ଟ ଅଫିସର ଧନୁର୍ଦ୍ଧର ବିଶ୍ୱାଳ ଏବଂ ଷ୍ଟିୱାର୍ଡ ଅଶ୍ୱିନୀ ମେହେରଙ୍କୁ ଭିଜିଲାନ୍ସ ଗିରଫ କରିଛି। ନିଜର ବୈଧ ଆୟ ଠାରୁ ଯଥେଷ୍ଟ ଅଧିକ ସମ୍ପତ୍ତି ଠୁଳ କରିବା ଅଭିଯୋଗରେ ଏହି ଦୁଇ ଅଧିକାରୀଙ୍କୁ ଗିରଫ କରାଯାଇଛି।

ତଦନ୍ତ ବେଳେ ଭିଜିଲାନ୍ସ ଅଧିକାରୀମାନେ ଜାଣିବାକୁ ପାଇଛନ୍ତି ଯେ, ଧନୁର୍ଦ୍ଧର ବିଶ୍ୱାଳଙ୍କ ନାମରେ ଦୁଇଟି କୋଠା ରହିଛି, ଯେଉଁଥିରେ ଗୋଟିଏ ୧,୭୦୦ ବର୍ଗଫୁଟର ବହୁତଳ ପ୍ରାସାଦ ଅନ୍ତର୍ଭୁକ୍ତ। ଏହା ବ୍ୟତୀତ ତାଙ୍କ ନିକଟରୁ ୩୨ଟି ପ୍ଲଟ, ନଗଦ ୧୯.୭୨ ଲକ୍ଷ ଟଙ୍କା, ୮୩.୦୫ ଗ୍ରାମ ସୁନା, ୩୯ ଲକ୍ଷ ଟଙ୍କାରୁ ଊର୍ଦ୍ଧ୍ୱ ବ୍ୟାଙ୍କ ଜମା, ୨ଟି ହାଇଭା ଟ୍ରକ, ୨ଟି ଟ୍ରାକ୍ଟର ଏବଂ ଗୋଟିଏ ଚାରିଚକିଆ ଯାନ ଠାବ କରାଯାଇଛି। ଏହି ବିପୁଳ ସମ୍ପତ୍ତିର ଉତ୍ସ ସମ୍ପର୍କରେ ସେ ସନ୍ତୋଷଜନକ ଉତ୍ତର ଦେଇପାରିନଥିଲେ। ଫଳରେ ତାଙ୍କ ବିରୋଧରେ ଦୁର୍ନୀତି ନିବାରଣ ଆଇନ, ୨୦୧୮ ଅଧୀନରେ ସମ୍ବଲପୁର ଭିଜିଲାନ୍ସ ଥାନା ମାମଲା ନଂ ୦୯/୨୦୨୬ ରୁଜୁ କରାଯାଇଛି।

ସେହିପରି ଅନ୍ୟତମ ଅଭିଯୁକ୍ତ ଷ୍ଟିୱାର୍ଡ ଅଶ୍ୱିନୀ ମେହେରଙ୍କ ନାମରେ ମଧ୍ୟ ଅମାପ ସମ୍ପତ୍ତି ଠାବ ହୋଇଛି। ତାଙ୍କ ନିକଟରୁ ୩ଟି କୋଠା (ଯେଉଁଥିରେ ଗୋଟିଏ ୮,୧୪୫ ବର୍ଗଫୁଟର ବିଶାଳ ବହୁତଳ ପ୍ରାସାଦ ସାମିଲ ରହିଛି), ଗୋଟିଏ ଷ୍ଟୋର ରୁମ୍, ୧୦ଟି ପ୍ଲଟ ଏବଂ ୮୩ ଗ୍ରାମ ସୁନା ଜବତ ହୋଇଛି। ଆୟ ବହିର୍ଭୂତ ସମ୍ପତ୍ତିର ହିସାବ ଦେବାରେ ବିଫଳ ହେବାରୁ ତାଙ୍କ ବିରୋଧରେ ମଧ୍ୟ ସମାନ ଆଇନ ବଳରେ ସମ୍ବଲପୁର ଭିଜିଲାନ୍ସ ଥାନା ମାମଲା ନଂ ୦୮/୨୦୨୬ ରୁଜୁ ହୋଇଛି।

ଏହି ଉଭୟ ଅଧିକାରୀଙ୍କୁ ସମ୍ବଲପୁରର ସ୍ୱତନ୍ତ୍ର ଭିଜିଲାନ୍ସ ବିଚାରପତିଙ୍କ ଅଦାଲତରେ ହାଜର କରାଯିବ। ସରକାରୀ କର୍ମଚାରୀଙ୍କ ମଧ୍ୟରେ ବ୍ୟାପ୍ତ ଦୁର୍ନୀତିକୁ ରୋକିବା ପାଇଁ ଓଡ଼ିଶା ଭିଜିଲାନ୍ସ ପକ୍ଷରୁ ଚାଲିଥିବା କ୍ରମାଗତ ଅଭିଯାନରେ ଏହି ଗିରଫଦାରୀକୁ ଆଉ ଏକ ବଡ଼ ସଫଳତା ଭାବେ ବିବେଚନା କରାଯାଉଛି।