ଆନ୍ତର୍ଜାତୀୟ ଫୁଟବଲ୍ ଜଗତରୁ ଏକ ବଡ଼ ଖବର ସାମ୍ନାକୁ ଆସିଛି। ପର୍ତ୍ତୁଗାଲର କିମ୍ବଦନ୍ତୀ ଫୁଟବଲ୍ ଖେଳାଳି କ୍ରିଷ୍ଟିଆନୋ ରୋନାଲ୍ଡୋ ଖୁବଶୀଘ୍ର ଆନ୍ତର୍ଜାତୀୟ ଫୁଟବଲରୁ ଅବସର ନେବାକୁ ଯାଉଛନ୍ତି। ଏକ ରିପୋର୍ଟ ଅନୁଯାୟୀ, ଆସନ୍ତା ସେପ୍ଟେମ୍ବର ୨୪ ତାରିଖ ଦିନ ପର୍ତ୍ତୁଗାଲ୍ ଏବଂ ୱେଲ୍ସ ମଧ୍ୟରେ ଖେଳାଯିବାକୁ ଥିବା ୟୁଏଫଏ (UEFA) ନେସନ୍ସ ଲିଗ୍ ମ୍ୟାଚ୍ ତାଙ୍କର ଶେଷ ଆନ୍ତର୍ଜାତୀୟ ମ୍ୟାଚ୍ ହେବାର ସମ୍ଭାବନା ରହିଛି।

ଶେଷ ମ୍ୟାଚ୍ ପାଇଁ ଲିସବନର ଷ୍ଟାଡିୟମ୍

ରିପୋର୍ଟ ମୁତାବକ, ୪୧ ବର୍ଷୀୟ ରୋନାଲ୍ଡୋ ନିଜର ଶେଷ ମ୍ୟାଚ୍ ଲିସବନର ଜୋସ୍ ଆଲଭାଲେଡ୍ ଷ୍ଟାଡିୟମ୍ (Jose Alvalade Stadium) ଠାରେ ଖେଳିବେ। ଏହି ଷ୍ଟାଡିୟମ୍ ରୋନାଲ୍ଡୋଙ୍କ ପାଇଁ ବେଶ୍ ଗୁରୁତ୍ୱପୂର୍ଣ୍ଣ କାରଣ ୨୦୦୩ ମସିହାରେ ସେହିଠାରୁ ହିଁ ସେ ନିଜର ଆନ୍ତର୍ଜାତୀୟ ଫୁଟବଲ୍ କ୍ୟାରିୟର୍ ଆରମ୍ଭ କରିଥିଲେ। ଖେଳାଳିଙ୍କୁ ବିଦାୟ ଦେବା ପାଇଁ ଏହିଠାରେ ଏକ ବଡ଼ ଆୟୋଜନ ହେବ ବୋଲି ଜଣେ ପର୍ତ୍ତୁଗୀଜ୍ ଏଜେଣ୍ଟ ଏକ ସାକ୍ଷାତକାରରେ ସୂଚନା ଦେଇଛନ୍ତି।

ଫିଫା ବିଶ୍ୱକପରେ ଥିଲା ଶେଷ ଝଲକ

ନିକଟରେ ଶେଷ ହୋଇଥିବା ୨୦୨୬ ଫିଫା ବିଶ୍ୱକପ୍ ରୋନାଲ୍ଡୋଙ୍କ କ୍ୟାରିୟରର ଶେଷ ବିଶ୍ୱକପ୍ ଥିଲା। ଏହି ଟୁର୍ଣ୍ଣାମେଣ୍ଟର ରାଉଣ୍ଡ-୧୬ ମ୍ୟାଚରେ ପର୍ତ୍ତୁଗାଲ୍ ବିଶ୍ୱକପ୍ ବିଜେତା ସ୍ପେନ୍ ଠାରୁ ୧-୦ ଗୋଲରେ ପରାସ୍ତ ହୋଇ ବିଦାୟ ନେଇଥିଲା। ସେହି ମ୍ୟାଚ୍ ପୂର୍ବରୁ ରୋନାଲ୍ଡୋ ସ୍ପଷ୍ଟ କରିଥିଲେ ଯେ, ବିଶ୍ୱକପ୍ ମଞ୍ଚରେ ତାଙ୍କର ଏହା ଶେଷ ଅବଦାନ।

ରୋନାଲ୍ଡୋଙ୍କ ଐତିହାସିକ ରେକର୍ଡ

୨୩ ବର୍ଷର ସୁଦୀର୍ଘ ଆନ୍ତର୍ଜାତୀୟ କ୍ୟାରିୟରରେ ରୋନାଲ୍ଡୋ ଅନେକ ଐତିହାସିକ ରେକର୍ଡ ନିଜ ନାମରେ କରିଛନ୍ତି। ସେ ମୋଟ ୨୩୩ଟି ମ୍ୟାଚ୍ ଖେଳି ବିଶ୍ୱର ସର୍ବାଧିକ କ୍ୟାପ୍ ହାସଲକାରୀ ଖେଳାଳି ହୋଇଥିବା ବେଳେ ୧୪୬ ଗୋଲ୍ ସହ ପୁରୁଷ ଆନ୍ତର୍ଜାତୀୟ ଫୁଟବଲରେ ସର୍ବାଧିକ ଗୋଲ୍ ସ୍କୋରର ଭାବେ ଇତିହାସ ରଚିଛନ୍ତି। ଏହାସହ ସେ ୪୬ଟି ଆସିଷ୍ଟ୍ ମଧ୍ୟ କରିଛନ୍ତି। ତାଙ୍କ ନେତୃତ୍ୱରେ ପର୍ତ୍ତୁଗାଲ୍ ୨୦୧୬ ମସିହାରେ ୟୁରୋ କପ୍ ଏବଂ ୨୦୧୯ ତଥା ୨୦୨୫ ରେ ନେସନ୍ସ ଲିଗ୍ ଟାଇଟଲ୍ ଜିତିବାରେ ସଫଳ ହୋଇଥିଲା। ଯଦି ଏହି ଖବର ସତ୍ୟ ହୁଏ, ତେବେ ଫୁଟବଲ୍ ଇତିହାସର ଜଣେ ମହାନ ଖେଳାଳିଙ୍କ ଏକ ସୁବର୍ଣ୍ଣ ଯୁଗର ଅନ୍ତ ଘଟିବ।

ଆର୍ଜେଣ୍ଟିନାର ଅଧିନାୟକ ତଥା କିମ୍ବଦନ୍ତୀ ଫୁଟବଲ ଖେଳାଳି ଲିଓନେଲ୍ ମେସିଙ୍କ ଫୁଟବଲ କ୍ୟାରିୟରକୁ ନେଇ ଏବେ ସାରା ବିଶ୍ୱରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି। ସଦ୍ୟ ସମାପ୍ତ ହୋଇଥିବା ଫିଫା ବିଶ୍ୱକପ୍ ଫାଇନାଲ୍ରେ ସ୍ପେନ୍ଠାରୁ ପରାଜୟ ବରଣ କରିବା ପରେ ତାଙ୍କର ଅବସର ନେବାର ସମ୍ଭାବନାକୁ ନେଇ କ୍ରୀଡ଼ାପ୍ରେମୀଙ୍କ ମଧ୍ୟରେ ନାନା କଳ୍ପନାଜଳ୍ପନା ପ୍ରକାଶ ପାଇଛି।

ଲୁହ ଭରା ଆଖି ଓ ଅବସର ଗୁଜବ

ମହାସମରର ଫାଇନାଲ ମ୍ୟାଚରେ ଆର୍ଜେଣ୍ଟିନା ଦଳ ସ୍ପେନ୍ଠାରୁ ପରାସ୍ତ ହେବା ଫଳରେ ଲିଓନେଲ୍ ମେସିଙ୍କ ଲଗାତାର ଦ୍ୱିତୀୟ ଥର ପାଇଁ ବିଶ୍ୱକପ୍ ଟ୍ରଫି ଉଠାଇବାର ସ୍ୱପ୍ନ ଅଧୁରା ରହିଯାଇଥିଲା। ମ୍ୟାଚ୍ ଶେଷ ହେବା ପରେ ପଡ଼ିଆ ମଧ୍ୟରେ ଏହି ମହାନ ଖେଳାଳିଙ୍କ ଆଖିରେ ଲୁହ ଦେଖିବାକୁ ମିଳିଥିଲା। ଏହି ଘଟଣା ପରେ ଏହା ତାଙ୍କର ଶେଷ ବିଶ୍ୱକପ୍ ମ୍ୟାଚ୍ ହୋଇପାରେ ବୋଲି ସବୁଆଡ଼େ ଚର୍ଚ୍ଚା ଜୋର୍ ଧରିଛି।

କ'ଣ କହିଲେ ପ୍ରଶିକ୍ଷକ ଲିଓନେଲ୍ ସ୍କାଲୋନି?

ମେସିଙ୍କ ଅବସର ସମ୍ପର୍କରେ ଉଠୁଥିବା ପ୍ରଶ୍ନର ଉତ୍ତର ରଖିଛନ୍ତି ଆର୍ଜେଣ୍ଟିନା ଦଳର ମୁଖ୍ୟ ପ୍ରଶିକ୍ଷକ (କୋଚ୍) ଲିଓନେଲ୍ ସ୍କାଲୋନି। ସେ ସ୍ପଷ୍ଟ କରିଛନ୍ତି ଯେ ଫୁଟବଲରୁ ସନ୍ନ୍ୟାସ ନେବା ନିଷ୍ପତ୍ତି ସମ୍ପୂର୍ଣ୍ଣ ଭାବରେ ଖୋଦ୍ ମେସିଙ୍କ ଉପରେ ନିର୍ଭର କରେ। ଲିଓନେଲ୍ ସ୍କାଲୋନି କହିଛନ୍ତି, "ମେସିଙ୍କୁ ଏବେ ୩୯ ବର୍ଷ ବୟସ। ତାଙ୍କ କ୍ଷମତା ଏବଂ ପ୍ରତିଭା ସମ୍ପର୍କରେ ଆଉ ଅଧିକ କିଛି ପ୍ରମାଣ କରିବାର ନାହିଁ। ମୁଁ ନିଶ୍ଚିତ ଯେ ସେ ଯେତେଦିନ ପର୍ଯ୍ୟନ୍ତ ଫୁଟବଲ ଖେଳିବାକୁ ଚାହିଁବେ, ସେ ଖେଳିଚାଲିବେ।"

ସେ ଆହୁରି ମଧ୍ୟ ଯୋଡ଼ିଛନ୍ତି ଯେ, "ଏହି ନିଷ୍ପତ୍ତିରେ ଦଳର ସମସ୍ତ ଖେଳାଳି ଏବଂ ଲୋକମାନେ ତାଙ୍କୁ ପୂର୍ଣ୍ଣ ସମର୍ଥନ କରିବେ। ସେ ଫୁଟବଲ ଜଗତରେ ଯାହା କିଛି ହାସଲ କରିଛନ୍ତି, ସେଥିପାଇଁ ଆମେ ସମସ୍ତେ ଗର୍ବିତ। କାରଣ ସେ ହେଉଛନ୍ତି ସର୍ବଶ୍ରେଷ୍ଠ ଫୁଟବଲ ଖେଳାଳି।" ତେବେ ମେସି ନିଜ ଆଡ଼ୁ ବିଧିବଦ୍ଧ ଭାବେ କୌଣସି ଘୋଷଣା କରିନଥିବାରୁ, ତାଙ୍କ ପ୍ରଶଂସକମାନେ ଆଗାମୀ ଦିନରେ ତାଙ୍କ ଚୂଡ଼ାନ୍ତ ନିଷ୍ପତ୍ତିକୁ ଅପେକ୍ଷା କରିଛନ୍ତି।

ଆମେରିକାର ନ୍ୟୁୟର୍କ ସ୍ଥିତ ମେଟ୍‌ଲାଇଫ୍ ଷ୍ଟାଡିୟମରେ ଖେଳାଯାଇଥିବା ୨୦୨୬ ଫିଫା ବିଶ୍ୱକପ୍ ଫାଇନାଲରେ ଏକ ଐତିହାସିକ ବିଜୟ ହାସଲ କରିଛି ସ୍ପେନ୍। ଟୁର୍ଣ୍ଣାମେଣ୍ଟର ଫେଭରିଟ୍ ତଥା ଡିଫେଣ୍ଡିଂ ଚାମ୍ପିୟନ୍ ଆର୍ଜେଣ୍ଟିନାକୁ ୧-୦ ଗୋଲରେ ପରାସ୍ତ କରି ସ୍ପେନ୍ ନିଜ ଫୁଟବଲ୍ ଇତିହାସରେ ଦ୍ୱିତୀୟ ଥର ପାଇଁ ବିଶ୍ୱକପ୍ ଟାଇଟଲ୍ ନିଜ ନାମରେ କରିଛି। କିମ୍ବଦନ୍ତୀ ଖେଳାଳି ଲିଓନେଲ୍ ମେସିଙ୍କ ଶେଷ ବିଶ୍ୱକପ୍ ମ୍ୟାଚରେ ସ୍ପେନ୍ ଏକ ଚମତ୍କାର ରଣନୀତି ଆପଣାଇ ଆର୍ଜେଣ୍ଟିନାକୁ ସମ୍ପୂର୍ଣ୍ଣ ରୂପେ ନିୟନ୍ତ୍ରଣରେ ରଖିଥିଲା।

ଏକ୍ସଟ୍ରା ଟାଇମରେ ଫେରାନ୍ ଟୋରେସ୍‌ଙ୍କ ଗୋଲ୍

ନିର୍ଦ୍ଧାରିତ ସମୟ ସୁଦ୍ଧା ଉଭୟ ଦଳ ଗୋଲ୍ ଶୂନ୍ୟ ରହିବା ପରେ ମ୍ୟାଚ୍ ଏକ୍ସଟ୍ରା ଟାଇମ୍ ବା ଅତିରିକ୍ତ ସମୟକୁ ଯାଇଥିଲା। ଅତିରିକ୍ତ ସମୟର ଦ୍ୱିତୀୟାର୍ଦ୍ଧ ଆରମ୍ଭ ହେବାର ମାତ୍ର ୩୭ ସେକେଣ୍ଡରେ ସବ୍‌ଷ୍ଟିଚ୍ୟୁଟ୍ ଖେଳାଳି ଫେରାନ୍ ଟୋରେସ୍ ଏକ ଚମତ୍କାର ଗୋଲ୍ ସ୍କୋର୍ କରି ସ୍ପେନକୁ ବିଜୟୀ କରାଇଥିଲେ। ଟୁର୍ଣ୍ଣାମେଣ୍ଟରେ ୧୪ଟି ପ୍ରୟାସ ପରେ ଏହା ଥିଲା ତାଙ୍କର ପ୍ରଥମ ଗୋଲ୍। ଏହି ବିଜୟ ସହ ୨୦୧୦ ମସିହା ପରେ ସ୍ପେନ୍ ପୁଣି ଥରେ ବିଶ୍ୱବିଜେତା ହେବାର ଗୌରବ ଲାଭ କରିଛି।

ଫିକା ପଡ଼ିଲା ମେସିଙ୍କ ଯାଦୁ

ଷ୍ଟାଡିୟମରେ ଉପସ୍ଥିତ ୮୦,୬୬୩ ଦର୍ଶକ ମେସିଙ୍କୁ ଶେଷ ଥର ପାଇଁ ଟ୍ରଫି ଉଠାଉଥିବାର ଦେଖିବାକୁ ଆଶା ରଖିଥିଲେ। କିନ୍ତୁ କୋଚ୍ ଲୁଇସ୍ ଡି ଲା ଫୁଏଣ୍ଟେଙ୍କ ଦଳର ଦୃଢ଼ ରକ୍ଷଣଭାଗ ମେସିଙ୍କୁ ମ୍ୟାଚରେ କୌଣସି ସୁଯୋଗ ଦେଇନଥିଲା। ଏପରିକି ନିର୍ଦ୍ଧାରିତ ସମୟ ଶେଷ ସୁଦ୍ଧା ଆର୍ଜେଣ୍ଟିନା ଗୋଟିଏ ବି 'ସଟ୍ ଅନ୍ ଟାର୍ଗେଟ୍' କରିବାରେ ବିଫଳ ହୋଇଥିଲା।

ସ୍ପେନର ଦଳଗତ ପ୍ରଦର୍ଶନ ଓ ରୋଡ୍ରିଙ୍କ ନିୟନ୍ତ୍ରଣ

ଏହି ବିଶ୍ୱକପରେ ସ୍ପେନ୍ କୌଣସି ଜଣେ ସୁପରଷ୍ଟାରଙ୍କ ଉପରେ ନିର୍ଭର ନକରି ଦଳଗତ ପ୍ରଦର୍ଶନ ଉପରେ ଗୁରୁତ୍ୱ ଦେଇଥିଲା। ଫାଇନାଲ୍ ମ୍ୟାଚରେ ମିଡ୍‌ଫିଲ୍ଡର ରୋଡ୍ରିଙ୍କୁ ଅଟକାଇବା ପାଇଁ ଆର୍ଜେଣ୍ଟିନାର ଖେଳାଳିମାନେ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲେ। ଆର୍ଜେଣ୍ଟିନାର ଲିଆଣ୍ଡ୍ରୋ ପାରେଡେସ୍ ରୋଡ୍ରିଙ୍କ ପିଠିରେ ଏଲବୋ ମାରି ୟେଲୋ କାର୍ଡ ପାଇଥିଲେ ମଧ୍ୟ ସ୍ପେନର ମିଡ୍‌ଫିଲ୍ଡ ଆକ୍ରମଣକୁ ଅଟକାଇ ପାରିନଥିଲେ। ରୋଡ୍ରି ଏକତରଫା ଭାବେ ମ୍ୟାଚକୁ ନିୟନ୍ତ୍ରଣ କରିଥିଲେ। ପୂର୍ବତନ ତାରକା ଟୋନି କ୍ରୁସ୍ ଏହି ବିଜୟକୁ ନେଇ ସୋସିଆଲ୍ ମିଡିଆରେ ମାତ୍ର ଦୁଇଟି ଶବ୍ଦ ଲେଖିଥିଲେ, "ଫୁଟବଲ୍ ଜିତିଲା"। ଏହା ସ୍ପେନର ଶୃଙ୍ଖଳା ଓ ଦଳଗତ ଉଦ୍ୟମର ଶ୍ରେଷ୍ଠ ପ୍ରମାଣ ଥିଲା।

ବିଶ୍ୱର ସବୁଠାରୁ ଗ୍ଲାମରସ୍ ତଥା ସୁନ୍ଦରୀ ଫୁଟବଲର୍ ଭାବେ ପରିଚିତ ଆଲିଶା ଲେହମ୍ୟାନ୍ ନିଜ ଜୀବନର ଏକ ନୂଆ ଇନିଂସ୍ ଆରମ୍ଭ କରିବାକୁ ଯାଉଛନ୍ତି। ସ୍ୱିଜରଲ୍ୟାଣ୍ଡର ଏହି ଷ୍ଟାର୍ ଫୁଟବଲର୍ ନିକଟରେ ସୋସିଆଲ୍ ମିଡିଆରେ ନିଜ ନିର୍ବନ୍ଧର ଖବର ପ୍ରଶଂସକମାନଙ୍କ ସହ ସେୟାର୍ କରିଛନ୍ତି। ସେ ନିଜ ପ୍ରେମିକ ତଥା ବ୍ରିଟିଶ୍ ରିଆଲିଟି ସୋ' 'ଲଭ୍ ଆଇଲ୍ୟାଣ୍ଡ'ର ଷ୍ଟାର୍ ମଣ୍ଟେଲ୍ ମ୍ୟାକେଞ୍ଜିଙ୍କ ସହ ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି। ସମୁଦ୍ର କୂଳରେ ସୂର୍ଯ୍ୟାସ୍ତ ସମୟରେ ହୋଇଥିବା ଏହି ରୋମାଣ୍ଟିକ୍ ପ୍ରପୋଜାଲର ଫଟୋ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି।

ରୋମାଣ୍ଟିକ୍ ବିଚ୍ ପ୍ରପୋଜାଲ୍

୨୭ ବର୍ଷୀୟା ଆଲିଶା ନିଜ ଇନଷ୍ଟାଗ୍ରାମରେ ଏହି ସ୍ୱତନ୍ତ୍ର ମୁହୂର୍ତ୍ତର ଅନେକ ଫଟୋ ସେୟାର୍ କରିଛନ୍ତି। ଏହି ଫଟୋଗୁଡ଼ିକରେ ମଣ୍ଟେଲ୍ ମ୍ୟାକେଞ୍ଜି ଆଣ୍ଠୁମାଡ଼ି ବସି ଆଲିଶାଙ୍କୁ ମୁଦି ପିନ୍ଧାଉଥିବାର ନଜର ଆସିଛନ୍ତି। ଏହି ଖାସ୍ ମୁହୂର୍ତ୍ତରେ ଆଲିଶା ବେଶ୍ ଭାବପ୍ରବଣ ହୋଇପଡ଼ିଥିଲେ। କଳା ରଙ୍ଗର ଏକ ଷ୍ଟାଇଲିସ୍ ଡ୍ରେସ୍‌ରେ ଆଲିଶା ବହୁତ ସୁନ୍ଦର ଦେଖାଯାଉଥିଲେ ଏବଂ ମୁଦି ପିନ୍ଧିବା ପରେ ଉଭୟ ପରସ୍ପରକୁ ଆଲିଙ୍ଗନ କରିବା ସହ କ୍ୟାମେରା ଆଗରେ ନିଜର ଖୁସି ଜାହିର୍ କରିଥିଲେ। ଫଟୋଗୁଡ଼ିକୁ ସେୟାର କରି ଆଲିଶା କ୍ୟାପସନ୍‌ରେ ଲେଖିଛନ୍ତି, "ସବୁଦିନ ଏବଂ ସର୍ବଦା ପାଇଁ (Forever & Always)"। ସୋସିଆଲ୍ ମିଡିଆରେ ଏହି ଫଟୋ ସାମ୍ନାକୁ ଆସିବା ପରେ ଫୁଟବଲ୍ ଜଗତ ଏବଂ ପ୍ରଶଂସକମାନେ ଉଭୟଙ୍କୁ ଶୁଭେଚ୍ଛା ଜଣାଇଛନ୍ତି।

କିପରି ଆରମ୍ଭ ହୋଇଥିଲା ପ୍ରେମ କାହାଣୀ?

ଆଲିଶା ଏବଂ ମଣ୍ଟେଲ୍ ଚଳିତ ବର୍ଷ ଆରମ୍ଭରେ ନିଜ ସମ୍ପର୍କକୁ ସାର୍ବଜନୀନ କରିଥିଲେ। ରିପୋର୍ଟ ଅନୁଯାୟୀ, ଉଭୟଙ୍କର ପ୍ରଥମ ସାକ୍ଷାତ ଇଂଲଣ୍ଡର 'ବଲର୍ ଲିଗ୍' ସମୟରେ ହୋଇଥିଲା। ସେଠାରେ ଆଲିଶା ଏକ ଦଳର ମ୍ୟାନେଜର୍ ଭୂମିକା ତୁଲାଉଥିବା ବେଳେ ମଣ୍ଟେଲ୍ ଜଣେ ଖେଳାଳି ଭାବରେ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ। ସେବେଠାରୁ ଉଭୟଙ୍କ ମଧ୍ୟରେ ବନ୍ଧୁତା ଆରମ୍ଭ ହୋଇଥିଲା, ଯାହା ଖୁବ୍ ଶୀଘ୍ର ପ୍ରେମରେ ପରିଣତ ହୋଇଥିଲା। ଏହି ସମ୍ପର୍କ ଏତେ ମଜବୁତ ହେଲା ଯେ, ମାତ୍ର କିଛି ମାସ ମଧ୍ୟରେ ହିଁ ଦୁହେଁ ନିଜ ଜୀବନ ଏକାଠି ବିତାଇବାକୁ ନିଷ୍ପତ୍ତି ନେଲେ।

ପୂର୍ବରୁ ଡଗଲସ୍ ଲୁଇଜ୍‌ଙ୍କ ସହ ଥିଲେ ସମ୍ପର୍କରେ

ମଣ୍ଟେଲ୍ ମ୍ୟାକେଞ୍ଜିଙ୍କ ପୂର୍ବରୁ ଆଲିଶା ଲେହମ୍ୟାନ୍‌ଙ୍କ ନାମ ବ୍ରାଜିଲର ଷ୍ଟାର୍ ଫୁଟବଲର୍ ଡଗଲସ୍ ଲୁଇଜ୍ଙ୍କ ସହ ଯୋଡ଼ି ହୋଇଥିଲା। ଉଭୟ ଦୀର୍ଘ ଦିନ ଧରି ରିଲେସନସିପ୍‌ରେ ରହିଥିଲେ ଏବଂ ଏକାସାଙ୍ଗରେ ଜୁଭେଣ୍ଟସ୍ କ୍ଲବ୍ ସହ ମଧ୍ୟ ଯୋଡ଼ି ହୋଇଥିଲେ। ତେବେ ପରବର୍ତ୍ତୀ ସମୟରେ କୌଣସି କାରଣବଶତଃ ଉଭୟଙ୍କର ବ୍ରେକଅପ୍ ହୋଇଥିଲା। ବ୍ରେକଅପ୍ ପରେ ଆଲିଶା ନିଜ ଖେଳ ଏବଂ କ୍ୟାରିୟର୍ ଉପରେ ପୂର୍ଣ୍ଣ ଧ୍ୟାନ ଦେଇଥିଲେ। ମଇଦାନ ସହ ସୋସିଆଲ୍ ମିଡିଆରେ ମଧ୍ୟ ତାଙ୍କ ଲୋକପ୍ରିୟତା କ୍ରମାଗତ ଭାବେ ବୃଦ୍ଧି ପାଉଛି। ବର୍ତ୍ତମାନ ଇନଷ୍ଟାଗ୍ରାମରେ ତାଙ୍କର ୧୬ ନିୟୁତରୁ ଅଧିକ ଫଲୋଅର୍ସ ଅଛନ୍ତି ଏବଂ ସେ ବିଶ୍ୱର ସର୍ବାଧିକ ଚର୍ଚ୍ଚିତ ମହିଳା ଖେଳାଳିମାନଙ୍କ ମଧ୍ୟରେ ପରିଗଣିତ ହେଉଛନ୍ତି।

 

 

 

 

 

View this post on Instagram

 

 

 

 

 

 

 

 

 

 

 

A post shared by Alisha Lehmann (@alishalehmann7)