ମିଆମି ଆନ୍ତର୍ଜାତୀୟ ବିମାନବନ୍ଦରରେ ରବିବାର ଏକ ବଡ଼ ଧରଣର ବିମାନ ଦୁର୍ଘଟଣା ଘଟିଛି। ଆମାଜନ ପ୍ରାଇମ୍ ଏୟାରର ଏକ କାର୍ଗୋ ବିମାନ ଅବତରଣ ସମୟରେ ରନୱେରୁ ଖସିଯାଇ ଏକାଧିକ ଯାନବାହନ ସହ ଧକ୍କା ହେବା ଫଳରେ ଏଥିରେ ଭୟାବହ ନିଆଁ ଲାଗିଯାଇଛି। ଏହି ମର୍ମନ୍ତୁଦ ଦୁର୍ଘଟଣାରେ ଅତିକମରେ ୫ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ୫ ଜଣ ଆହତ ହୋଇଛନ୍ତି।

ରନୱେ ଅତିକ୍ରମ କରି ଗାଡ଼ି ସହ ଧକ୍କା

ମିଳିଥିବା ସୂଚନା ଅନୁଯାୟୀ, ବୋଇଂ ୭୬୭-୩୦୦ ବିମାନଟି ପୁଏର୍ତ୍ତୋ ରିକୋର ସାନ ଜୁଆନରୁ ଉଡ଼ାଣ ଭରି ମିଆମିରେ ପହଞ୍ଚିଥିଲା। ଏହାକୁ ୨୧ ଏୟାର (21 Air) ନାମକ କମ୍ପାନୀ ପ୍ରାଇମ୍ ଏୟାର ଫ୍ଲାଇଟ୍ ୭୫୯୮ ଭାବରେ ପରିଚାଳନା କରୁଥିଲା। ଅବତରଣ କରିବା ସମୟରେ ବିମାନଟି ନିୟନ୍ତ୍ରଣ ହରାଇ ଡାଇଗୋନାଲ୍ ରନୱେ ବାହାରକୁ ଚାଲିଯାଇଥିଲା। ଏହାପରେ ଏୟାରପୋର୍ଟ ପରିସର ବାହାରେ ଥିବା ରାସ୍ତାରେ ଯାଉଥିବା ଏକାଧିକ ଗାଡ଼ିକୁ ଧକ୍କା ଦେଇ ବିମାନଟିରେ ନିଆଁ ଲାଗିଯାଇଥିଲା।

ଉଦ୍ଧାର କାର୍ଯ୍ୟ ଏବଂ ତଦନ୍ତ

ଦୁର୍ଘଟଣା ସମ୍ପର୍କରେ ଖବର ପାଇ ମିଆମି-ଡେଡ୍ ଫାୟାର ରେସକ୍ୟୁ (MDFR) ର ୬୦ରୁ ଅଧିକ ୟୁନିଟ୍ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଉଦ୍ଧାରକାରୀ ଦଳ ବିମାନର କକ୍‌ପିଟ୍‌ରେ ଫସି ରହିଥିବା ପାଇଲଟ୍ ଓ କୋ-ପାଇଲଟ୍‌ଙ୍କ ସମେତ ଗାଡ଼ି ଭିତରେ ଫସିଥିବା ଲୋକଙ୍କୁ ଉଦ୍ଧାର କରିଥିଲେ। ଆହତମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ଗୁରୁତର ରହିଛି। ଆମେରିକାର ଫେଡେରାଲ୍ ଆଭିଏସନ୍ ଆଡମିନିଷ୍ଟ୍ରେସନ୍ (FAA) ଏବଂ ନ୍ୟାସନାଲ୍ ଟ୍ରାନ୍ସପୋର୍ଟେସନ୍ ସେଫ୍ଟି ବୋର୍ଡ (NTSB) ପକ୍ଷରୁ ଏହି ଘଟଣାର ତଦନ୍ତ ଆରମ୍ଭ କରାଯାଇଛି।

ବିମାନ ଚଳାଚଳ ବାଧାପ୍ରାପ୍ତ

ଏହି ଭୟଙ୍କର ଦୁର୍ଘଟଣା ପରେ ମିଆମି ଏୟାରପୋର୍ଟରେ ହାହାକାର ପରିସ୍ଥିତି ସୃଷ୍ଟି ହୋଇଥିଲା। ସୁରକ୍ଷାକୁ ଦୃଷ୍ଟିରେ ରଖି ବିମାନବନ୍ଦରର ସମସ୍ତ ରନୱେ ଏବଂ ଟ୍ୟାକ୍ସିୱେକୁ ବନ୍ଦ କରିଦିଆଯାଇଥିଲା। ଫଳରେ ରବିବାର ଅପରାହ୍ନରେ ଶହ ଶହ ବିମାନ ଉଡ଼ାଣରେ ବିଳମ୍ବ ଦେଖାଦେଇଥିଲା ଏବଂ ଅନେକ ବିମାନ ବାତିଲ ମଧ୍ୟ କରାଯାଇଛି। ଆମାଜନର ମୁଖପାତ୍ର କେଲି ନାଣ୍ଟେଲ ଘଟଣାରେ ଦୁଃଖ ପ୍ରକାଶ କରିବା ସହ ସ୍ଥାନୀୟ ପ୍ରଶାସନକୁ ସମ୍ପୂର୍ଣ୍ଣ ସହଯୋଗ କରାଯାଉଥିବା ସୂଚନା ଦେଇଛନ୍ତି।

🚨 Update: Deadly Cargo Plane Crash at Miami International Airport

At least five people have died and five others were injured after an Amazon Prime Air cargo aircraft overran the runway at Miami International Airport on Sunday afternoon, striking multiple vehicles and bursting… pic.twitter.com/6XLpT6mVaP

— FL360aero (@fl360aero) September 7, 2026

ମହାରାଷ୍ଟ୍ରର ବାରାମତୀ ଅଞ୍ଚଳରେ ଏକ ବିମାନ ଦୁର୍ଘଟଣା ଘଟିଛି। ବୁଧବାର ସକାଳେ ଏକ ଦୁଇ ସିଟ୍ ବିଶିଷ୍ଟ ଟ୍ରେନିଂ ବିମାନ ଦୁର୍ଘଟଣାଗ୍ରସ୍ତ ହୋଇଛି। ମିଳିଥିବା ସୂଚନା ଅନୁଯାୟୀ, ଏହି ବିମାନଟି ରେଡବର୍ଡ ଏଭିଏସନ୍ କମ୍ପାନୀ ଦ୍ୱାରା ପରିଚାଳିତ ହେଉଥିଲା। ସୌଭାଗ୍ୟବଶତଃ ଏହି ଘଟଣାରେ ବିମାନରେ ଥିବା ଟ୍ରେନି ପାଇଲଟ୍ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି।

କେମିତି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ତାଲିମ ଉଡ଼ାଣ ସମୟରେ ବିମାନଟିରେ ହଠାତ୍ କିଛି ଯାନ୍ତ୍ରିକ ତ୍ରୁଟି ଦେଖାଦେଇଥିଲା। ଏହାଫଳରେ ବିମାନଟି ନିୟନ୍ତ୍ରଣ ହରାଇ ବାରାମତୀର ଗୋଜୁବାଭି ଗ୍ରାମ ନିକଟରେ କଚାଡ଼ି ହୋଇପଡ଼ିଥିଲା। ତେବେ ବିମାନଟି ଦୁର୍ଘଟଣାଗ୍ରସ୍ତ ହେବା ପୂର୍ବରୁ ପାଇଲଟ୍ ସୁରକ୍ଷିତ ଭାବେ ବାହାରି ଆସିବାରେ ସଫଳ ହୋଇଥିଲେ। ଘଟଣା ସମ୍ପର୍କରେ ଖବର ପାଇବା ମାତ୍ରେ ସ୍ଥାନୀୟ ପ୍ରଶାସନ ଏବଂ ପୋଲିସ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଦୁର୍ଘଟଣାର ପ୍ରକୃତ କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନଥିବା ବେଳେ ଏହାର ତଦନ୍ତ ଜାରି ରହିଛି।

ପୂର୍ବରୁ ମଧ୍ୟ ଘଟିଛି ବଡ଼ ଦୁର୍ଘଟଣା

ସୂଚନାଯୋଗ୍ୟ ଯେ, ଗତ କିଛି ମାସ ତଳେ ବାରାମତୀରେ ଏକ ମର୍ମନ୍ତୁଦ ବିମାନ ଦୁର୍ଘଟଣା ଘଟିଥିଲା। ଜାନୁଆରୀ ୨୮, ୨୦୨୬ ରେ ଘଟିଥିବା ସେହି ଘଟଣାରେ ମହାରାଷ୍ଟ୍ରର ତତ୍କାଳୀନ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ମୋଟ ୫ ଜଣଙ୍କର ମୃତ୍ୟୁ ହୋଇଥିଲା। ଏହି ବଡ଼ ଦୁର୍ଘଟଣାର କିଛି ମାସ ପରେ ପୁଣି ଏକ ଟ୍ରେନିଂ ବିମାନ କୋସଳିବା ଘଟଣା ସ୍ଥାନୀୟ ଅଞ୍ଚଳରେ ଆତଙ୍କ ଖେଳାଇ ଦେଇଛି। ବାରମ୍ବାର ଏଭଳି ଘଟଣା ସାମ୍ନାକୁ ଆସିବା ପରେ ବାରାମତୀ ଏୟାରଷ୍ଟ୍ରିପ୍‌ର ସୁରକ୍ଷା ବ୍ୟବସ୍ଥା ଏବଂ ନିୟନ୍ତ୍ରଣ ପ୍ରଣାଳୀକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।

ଛତିଶଗଡ଼: ଛତିଶଗଡ଼ର ଜଶପୁର ଜିଲ୍ଲାରୁ ଏକ ବଡ଼ ବିମାନ ଦୁର୍ଘଟଣାର ଖବର ସାମ୍ନାକୁ ଆସିଛି। ନାରାୟଣପୁର ଅଞ୍ଚଳରେ ଥିବା ଆରା ପାହାଡ଼ ସହିତ ଧକ୍କା ହୋଇ ଏକ ଘରୋଇ ବିମାନ କ୍ରାସ୍ ହୋଇଯାଇଛି। ଏହି ଭୟଙ୍କର ଦୁର୍ଘଟଣାରେ ବିମାନର ପାଇଲଟ୍ ଏବଂ କୋ-ପାଇଲଟଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି।

ଘଟଣା ସମ୍ପର୍କରେ ଖବର ପାଇବା ମାତ୍ରେ ପୋଲିସ ଓ ପ୍ରଶାସନିକ ଟିମ୍ ଘଟଣାସ୍ଥଳ ଅଭିମୁଖେ ବାହାରିଛନ୍ତି। ଏସଏସପି ଲାଲ୍ ଉମେଦ ସିଂହ ମଧ୍ୟ ତୁରନ୍ତ ଘଟଣାସ୍ଥଳକୁ ଯାତ୍ରା କରିଛନ୍ତି। ଏହି ହୃଦୟ ବିଦାରକ ଦୁର୍ଘଟଣାର ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ପାହାଡ଼ ଉପରୁ ନିଆଁର ଶିଖା ଉଠୁଥିବା ଦେଖିବାକୁ ମିଳୁଛି। ଏହି ଦୃଶ୍ୟ ଦୁର୍ଘଟଣାର ଭୟାବହତାକୁ ସ୍ପଷ୍ଟ ଭାବେ ବୟାନ କରୁଛି।

ତେବେ ଦୁର୍ଘଟଣାଗ୍ରସ୍ତ ବିମାନରେ ପାଇଲଟ୍ ଓ କୋ-ପାଇଲଟଙ୍କ ବ୍ୟତୀତ ଅନ୍ୟ କୌଣସି ଯାତ୍ରୀ ଥିଲେ କି ନାହିଁ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ। ବର୍ତ୍ତମାନ ଘଟଣାସ୍ଥଳରେ ରିଲିଫ୍ ଓ ଉଦ୍ଧାର କାର୍ଯ୍ୟ ଆରମ୍ଭ କରିବା ପାଇଁ ଜୋରଦାର ପ୍ରସ୍ତୁତି ଚାଲିଛି। 

ଯୁକ୍ତରାଷ୍ଟ୍ର ଆମେରିକାର ନ୍ୟୁୟର୍କ ସ୍ଥିତ ଲା ଗାର୍ଡିଆ ବିମାନବନ୍ଦର (LaGuardia Airport) ଠାରେ ଏକ ବଡ଼ ଧରଣର ବିମାନ ଦୁର୍ଘଟଣା ଘଟିଛି। ରବିବାର ବିଳମ୍ବିତ ରାତିରେ ଅବତରଣ କରୁଥିବା ଏକ ଏୟାର କାନାଡା ଏକ୍ସପ୍ରେସ୍ (Air Canada Express) ବିମାନ ରନୱେରେ ଥିବା ଏକ ଅଗ୍ନିଶମ ବିଭାଗ ଗାଡ଼ି (ଫାୟାର ଟ୍ରକ୍) ସହ ଧକ୍କା ହୋଇଥିଲା। ଏହି ଭୟାବହ ଧକ୍କା ଫଳରେ ବିମାନରେ ଥିବା ଏକାଧିକ ଯାତ୍ରୀ ଆହତ ହୋଇଛନ୍ତି। ଘଟଣା ପରେ ବିମାନବନ୍ଦରର ସମସ୍ତ ଉଡ଼ାଣକୁ ସ୍ଥଗିତ ରଖାଯାଇଛି ଏବଂ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି।

ଦୁର୍ଘଟଣାରେ ବିମାନର ସମ୍ମୁଖ ଭାଗ ନଷ୍ଟ

ମିଳିଥିବା ସୂଚନା ଅନୁଯାୟୀ, କାନାଡାର ମଣ୍ଟ୍ରିଆଲ (Montreal) ରୁ ଆସୁଥିବା ବୋମ୍ବାର୍ଡିୟର୍ ସିଆରଜେ-୯୦୦ (Bombardier CRJ-900) ନାମକ ଏହି ବିମାନଟି ଅବତରଣ କରିବା ସମୟରେ ଘଣ୍ଟାପ୍ରତି ପ୍ରାୟ ୩୯ କିଲୋମିଟର (୨୪ ମାଇଲ୍) ବେଗରେ ଆସି ପୋର୍ଟ ଅଥରିଟିର ଏକ ଫାୟାର ଟ୍ରକ୍ ସହିତ ପିଟି ହୋଇଯାଇଥିଲା। ଧକ୍କା ଏତେ ଜୋରଦାର ଥିଲା ଯେ ବିମାନର ଆଗ ଅଂଶ ବା ନୋଜ୍ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି। ଦୁର୍ଘଟଣା ସମୟରେ ବିମାନରେ ପ୍ରାୟ ୧୦୦ ଜଣ ଯାତ୍ରୀ ଥିଲେ। ସମସ୍ତ ଯାତ୍ରୀଙ୍କୁ ତୁରନ୍ତ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ ଆହତମାନଙ୍କୁ ଚିକିତ୍ସା ପାଇଁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି। ଏପର୍ଯ୍ୟନ୍ତ କୌଣସି ମୃତାହତର ସରକାରୀ ସୂଚନା ମିଳିନାହିଁ।

ଏଟିସି ଅଡିଓରେ ଆତଙ୍କର ସ୍ବର

ଦୁର୍ଘଟଣା ପୂର୍ବରୁ ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC) ର ଏକ ଅଡିଓ ସାମ୍ନାକୁ ଆସିଛି, ଯେଉଁଥିରେ ଅଧିକାରୀଙ୍କ ଭୟଭୀତ ସ୍ୱର ସ୍ପଷ୍ଟ ଶୁଣିବାକୁ ମିଳୁଛି। ଅଡିଓରେ ଏଟିସି ଅଧିକାରୀ ଜଣକ ଲଗାତାର ଭାବେ ଦୁର୍ଘଟଣା ରୋକିବା ପାଇଁ "ଷ୍ଟପ୍ ଟ୍ରକ୍ ୧, ଷ୍ଟପ୍, ଷ୍ଟପ୍, ଷ୍ଟପ୍" (Stop Truck 1. Stop, stop, stop) ବୋଲି ଚିତ୍କାର କରୁଥିବା ଶୁଣାଯାଉଛି। କିନ୍ତୁ ସତର୍କବାଣୀ ସତ୍ତ୍ୱେ ରନୱେ ୪ (Runway 4) ନିକଟରେ ଗାଡ଼ିଟି ଯାଇ ବିମାନ ସହ ଧକ୍କା ହୋଇଥିଲା। ଏହି ଘଟଣା ପରେ ତୁରନ୍ତ ଅନ୍ୟ ସମସ୍ତ ଆସୁଥିବା ବିମାନଗୁଡ଼ିକୁ ବାଟରୁ ଫେରିଯିବାକୁ ନିର୍ଦ୍ଦେଶ ଦିଆଯାଇଥିଲା।

ଲା ଗାର୍ଡିଆ ବିମାନବନ୍ଦରର ସମସ୍ତ ଉଡ଼ାଣ ବାତିଲ

ଦୁର୍ଘଟଣାକୁ ଦୃଷ୍ଟିରେ ରଖି ଆମେରିକୀୟ ସଂଘୀୟ ବିମାନ ଚଳାଚଳ ପ୍ରଶାସନ ବା ଫେଡେରାଲ୍ ଆଭିଏସନ୍ ଆଡମିନିଷ୍ଟ୍ରେସନ୍ (FAA) ତରଫରୁ ବିମାନବନ୍ଦରରେ ଏକାଧିକ ଘଣ୍ଟା ପାଇଁ 'ଗ୍ରାଉଣ୍ଡ ଷ୍ଟପ୍' (Ground Stop) ଜାରି କରାଯାଇଛି। ଏହା ଫଳରେ ଲା ଗାର୍ଡିଆ ବିମାନବନ୍ଦର କୁ ସମ୍ପୂର୍ଣ୍ଣ ରୂପେ ବନ୍ଦ କରିଦିଆଯାଇଛି। ଆସୁଥିବା ଅନେକ ବିମାନକୁ ଅନ୍ୟ ବିମାନବନ୍ଦର ଆଡ଼କୁ ସ୍ଥାନାନ୍ତରିତ କରାଯାଇଥିବା ବେଳେ ଯାତ୍ରୀମାନଙ୍କୁ ବିଳମ୍ବ ଓ ବାତିଲ ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି। ବିମାନବନ୍ଦର କର୍ତ୍ତୃପକ୍ଷ ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଅନୁସନ୍ଧାନ ଜାରି ରଖିଛନ୍ତି ଏବଂ ପ୍ରକୃତରେ ଏହି ଦୁର୍ଘଟଣା କିପରି ଘଟିଲା ତାହାର ତଦନ୍ତ କରାଯାଉଛି।

ନୂଆଦିଲ୍ଲୀ: ବଲିଭିଆରେ ବଡ ଧରଣର ବିମାନ କ୍ରାସ । ବ୍ୟାଙ୍କ ନୋଟ ନେଇ ଯାଉଥିବା ବିମାନ ମଝି ଆକାଶରେ ଜଳି ଉଠିଲା। ଦୁର୍ଘଟଣାରେ ୧୫ ମୃତ ହୋଇଥିବା ବେଳେ ୩୦ ଜଣ ଆହତ ହୋଇଛନ୍ତି।  ବୋଲିଭିଆର ଏଲ୍ ଅଲ୍ଟୋ ଅନ୍ତର୍ଜାତୀୟ ବିମାନବନ୍ଦର ନିକଟରେ ଶୁକ୍ରବାର ଏହି ବିମାନ ଦୁର୍ଘଟଣା ଘଟିଛି। ବୋଲିଭିଆ ବାୟୁସେନାର ଏକ C-130 ହର୍କ୍ୟୁଲସ ବିମାନ ଭାରସାମ୍ୟ ହରାଇ ଏକ ଜନବହୁଳ ରାଜପଥ ଉପରେ ଦୁର୍ଘଟଣାଗ୍ରସ୍ତ ହୋଇଛି। ଏହି ଘଟଣାରେ ଅତିକମରେ ୧୫ ଜଣଙ୍କର ମୃତ୍ୟୁ ଘଟିଥିବା ବେଳେ ୩୦ରୁ ଅଧିକ ଲୋକ ଆହତ ହୋଇଛନ୍ତି। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଦୁର୍ଘଟଣା ପରେ ବିମାନରେ ଥିବା ୬ ଜଣ କ୍ରୁ ସଦସ୍ୟଙ୍କ ମଧ୍ୟରୁ ଦୁଇ ଜଣ ନିଖୋଜ ଅଛନ୍ତି।

ଏହି ସାମରିକ ବିମାନଟି ବୋଲିଭିଆର ସେଣ୍ଟ୍ରାଲ ବ୍ୟାଙ୍କରୁ ନୂତନ ନୋଟ୍ କିମ୍ବା କାଗଜ ମୁଦ୍ରା ପରିବହନ କରୁଥିଲା। ଦୁର୍ଘଟଣା ପରେ ବିମାନରୁ ଲକ୍ଷ ଲକ୍ଷ ଟଙ୍କାର ନୋଟ୍ ରାଜପଥରେ ବିଛାଡି ହୋଇ ପଡିଥିଲା। ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, ଲୋକମାନେ ନିଜ ଜୀବନକୁ ଖାତିର ନକରି ରାସ୍ତାରେ ପଡିଥିବା ଟଙ୍କା ଗୋଟାଇବା ପାଇଁ ଭିଡ ଜମାଇଥିଲେ। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ଏବଂ ଜରୁରୀକାଳୀନ ସେବା ଟିମ୍‌କୁ ଘଟଣାସ୍ଥଳରେ ମୁତୟନ କରାଯାଇଛି।

ରିପୋର୍ଟ ଅନୁଯାୟୀ, ବିମାନଟି ସାଣ୍ଟା କ୍ରୁଜ୍ ସହରରୁ କାର୍ଗୋ ନେଇ ଏଲ୍ ଅଲ୍ଟୋ ବିମାନବନ୍ଦରରେ ଅବତରଣ କରୁଥିଲା। କିନ୍ତୁ ଖରାପ ପାଗ ଯୋଗୁଁ ବିମାନଟି ରନ୍‌ୱେ ଅତିକ୍ରମ କରିପାରିନଥିଲା ଏବଂ ନିକଟସ୍ଥ କୋଷ୍ଟାନେରା ଆଭେନ୍ୟୁ (Costanera Avenue) ଉପରେ ମାଡି ଯାଇଥିଲା। ଏହି ସମୟରେ ରାସ୍ତାରେ ଯାଉଥିବା ଅନେକ ଯାନବାହନ ବିମାନ ଧକ୍କାରେ ଚୁରମାର ହୋଇଯାଇଥିଲା।

ଉଦ୍ଧାରକାରୀ ଦଳ ବର୍ତ୍ତମାନ ଆହତମାନଙ୍କୁ ଚିକିତ୍ସା ପାଇଁ ହସ୍ପିଟାଲ ପଠାଉଛନ୍ତି ଏବଂ ଘଟଣାସ୍ଥଳରୁ ବିଛାଡି ହୋଇଥିବା ମୁଦ୍ରା ସଂଗ୍ରହ କରୁଛନ୍ତି। ଦୁର୍ଘଟଣା ପରେ ବିଶ୍ୱର ଅନ୍ୟତମ ଉଚ୍ଚତମ ବିମାନବନ୍ଦର 'ଏଲ୍ ଅଲ୍ଟୋ'କୁ ସାମୟିକ ଭାବେ ବନ୍ଦ ରଖାଯାଇଛି ଏବଂ ତଦନ୍ତ ଆରମ୍ଭ କରାଯାଇଛି।

ମହାରାଷ୍ଟ୍ର: ମହାରାଷ୍ଟ୍ରର ବାରାମତୀ ନିକଟରେ ଘଟିଥିବା ଭୟାବହ ବିମାନ ଦୁର୍ଘଟଣାର ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରାଯାଇଛି। ଜାନୁଆରୀ ୨୮ତାରିଖରେ ଘଟିଥିବା ଏହି ଦୁଃଖଦ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ଅନ୍ୟ ୪ ଜଣଙ୍କର ପ୍ରାଣହାନୀ ଘଟିଥିଲା। ବେସାମରିକ ବିମାନ ଚଳାଚଳ ମନ୍ତ୍ରାଳୟ ଗୁରୁବାର ସ୍ପଷ୍ଟ କରିଛି ଯେ ଦୁର୍ଘଟଣାଗ୍ରସ୍ତ ବିମାନର ‘ବ୍ଲାକ୍ ବକ୍ସ’କୁ ସଫଳତାର ସହ ଉଦ୍ଧାର କରାଯାଇଛି, ଯାହା ଦୁର୍ଘଟଣାର କାରଣ ଜାଣିବାରେ ମୁଖ୍ୟ ଭୂମିକା ଗ୍ରହଣ କରିବ।

ମନ୍ତ୍ରାଳୟର ସୂଚନା ଅନୁଯାୟୀ, ଦୁର୍ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ (AAIB) ର ତିନିଜଣିଆ ଟିମ୍ ଏବଂ ଡିଜିସିଏ (DGCA) ର ଅନ୍ୟ ଏକ ଟିମ୍ ଜାନୁଆରୀ ୨୮ ତାରିଖରେ ହିଁ ଘଟଣାସ୍ଥଳରେ ପହଞ୍ଚିଥିଲେ। AAIB ର ମହାନିର୍ଦ୍ଦେଶକ ମଧ୍ୟ ସେହିଦିନ ଘଟଣାସ୍ଥଳ ପରିଦର୍ଶନ କରିଥିଲେ। ଉଦ୍ଧାର ହୋଇଥିବା ବ୍ଲାକ୍ ବକ୍ସରୁ ବିମାନର ଉଡାଣ ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବ ବୋଲି ଆଶା କରାଯାଉଛି।

ଉଲ୍ଲେଖଯୋଗ୍ୟ ଯେ, ବୋମ୍ବାଡିୟର୍ ଲିୟରଜେଟ୍ ୪୫ (Bombardier Learjet 45) ନାମକ ଏହି ବିମାନଟି ବାରାମତୀ ଏୟାରଷ୍ଟ୍ରିପରେ ଅବତରଣ କରିବାକୁ ଚେଷ୍ଟା କରୁଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ମନ୍ତ୍ରାଳୟ ସୋସିଆଲ ମିଡିଆରେ ସୂଚନା ଦେଇ କହିଛି ଯେ, “AAIB ନିୟମାବଳୀ, ୨୦୨୫ର ନିୟମ ୫ ଏବଂ ୧୧ ଅନୁଯାୟୀ ତଦନ୍ତ ଆରମ୍ଭ କରାଯାଇଛି। ଏକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସ୍ୱଚ୍ଛ ଏବଂ ନିରପେକ୍ଷ ତଦନ୍ତ ଶେଷ କରିବା ଆମର ପ୍ରାଥମିକତା।”

ନୂଆଦିଲ୍ଲୀ: କଲମ୍ବିଆର ଭେନେଜୁଏଲା ସୀମାରେ ମର୍ମନ୍ତୁଦ ବିମାନ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ବିମାନରେ ଥିବା ସମସ୍ତ ୧୫ ଜଣ ଯାତ୍ରୀଙ୍କର ମୃତ୍ୟୁ ଘଟିଥିବା ସୂଚନା ମିଳିଛି। ମୃତକଙ୍କ ମଧ୍ୟରେ ଜଣେ ସ୍ଥାନୀୟ ସାଂସଦ ଏବଂ ଜଣେ ନିର୍ବାଚନ ପ୍ରାର୍ଥୀ ସାମିଲ ଥିବା ସରକାରୀ ବିମାନ ଚଳାଚଳ ସଂସ୍ଥା ‘ସାଟେନା’ (Satena) ଏବଂ ବିମାନ ଚଳାଚଳ କର୍ତ୍ତୃପକ୍ଷ ନିଶ୍ଚିତ କରିଛନ୍ତି। 

ରିପୋର୍ଟ ଅନୁଯାୟୀ, Satena Flight NSE 8849 ନାମକ ଏହି ବିମାନଟି (Beechcraft 1900) କୁକୁଟାରୁ ଓକାନା (Ocana) ଅଭିମୁଖେ ଯାତ୍ରା କରୁଥିଲା। ସ୍ଥାନୀୟ ସମୟ ଅନୁସାରେ ଦିନ ପ୍ରାୟ ୧୨:୦୫ରେ ଏହା ଅବତରଣ କରିବାର ଥିଲା, କିନ୍ତୁ ଅବତରଣର କିଛି ମିନିଟ୍ ପୂର୍ବରୁ ଏୟାର ଟ୍ରାଫିକ୍ କଣ୍ଟ୍ରୋଲ୍ ସହ ଏହାର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଦୁର୍ଗମ ତଥା ପାହାଡ଼ିଆ କାଟାଟୁମ୍ବୋ ଅଞ୍ଚଳରେ ବ୍ୟାପକ ତଲାସି ଅଭିଯାନ ପରେ ଗୁରୁବାର ଦିନ ବିମାନର ଧ୍ୱଂସାବଶେଷ ଠାବ କରାଯାଇଥିଲା।

ଏହି ବିମାନରେ ୧୩ ଜଣ ଯାତ୍ରୀ ଏବଂ ୨ ଜଣ କ୍ରୁ ସଦସ୍ୟ ଯାତ୍ରା କରୁଥିଲେ। ବିମାନ ସଂସ୍ଥାର ଯାତ୍ରୀ ତାଲିକା ଅନୁଯାୟୀ, ବିମାନରେ ସାଂସଦ Diogenes Quintero ଏବଂ ତାଙ୍କ ଦଳର ସଦସ୍ୟମାନେ ଥିଲେ। ଏହା ସହିତ ଆଗାମୀ ମାର୍ଚ୍ଚ ନିର୍ବାଚନ ପାଇଁ କଂଗ୍ରେସ ପ୍ରାର୍ଥୀ Carlos Salcedo ମଧ୍ୟ ଏହି ଦୁର୍ଘଟଣାରେ ପ୍ରାଣ ହରାଇଛନ୍ତି। ଦୁର୍ଘଟଣାସ୍ଥଳର ଚିତ୍ରରୁ ବିମାନଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳିଛି।

ପାହାଡ଼ିଆ ଅଞ୍ଚଳ ଏବଂ ଖରାପ ପାଗ ଯୋଗୁଁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହୋଇଥିଲା। କଲମ୍ବିଆର ବେସାମରିକ ବିମାନ ଚଳାଚଳ ଏଜେନ୍ସିର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଦୁର୍ଘଟଣାର କାରଣ ଖୋଜୁଛନ୍ତି। ପ୍ରାଥମିକ ସୂଚନା ଅନୁସାରେ ଖରାପ ପାଗ କିମ୍ବା ବୈଷୟିକ ତ୍ରୁଟି ଯୋଗୁଁ ବିମାନ ଦୁର୍ଘଟଣା ହୋଇଥିବା ସନ୍ଦେହ କରାଯାଉଛି ।

ନୂଆଦିଲ୍ଲୀ: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିମାନ ଦୁର୍ଘଟଣାରେ ମୃତ୍ୟୁ ଘଟଣା ଏବେ ଏକ ନୂଆ ରାଜନୈତିକ ମୋଡ଼ ନେଇଛି। ଅଜିତ ପାୱାରଙ୍କର ଦେହାନ୍ତ ଖବର ଆସିବା ପରେ ବିଭିନ୍ନ ମହଲରୁ ଶୋକ ବାର୍ତ୍ତା ଆସିବାରେ ଲାଗିଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସାମାଜିକ ଗଣମାଧ୍ୟମ‌ ‘ଏକ୍ସ’ରେ ଏକ ପୋଷ୍ଟ କରି , ଅଜିତ ପାୱାରଙ୍କ ଆକସ୍ମିକ ବିୟୋଗରେ ମୁଁ ଗଭୀର ଭାବରେ ମର୍ମାହତ ଏବଂ ସ୍ତବ୍ଧ ବୋଲି ପ୍ରକାଶ କରିଛନ୍ତି। ପାୱାର ପରିବାର ପ୍ରତି ମମତା ଗଭୀର ସମବେଦନା ଜଣାଇବା ସହିତ ବିମାନ ଦୁର୍ଘଟଣାର ତଦନ୍ତ ଦାବି କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହାକୁ କେବଳ ଏକ "ଦୁର୍ଘଟଣା" ବୋଲି ନାମାନି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ସେ ଅଭିଯୋଗ ଆଣିଛନ୍ତି ଯେ, ଏହି ଘଟଣା ପଛରେ କିଛି ଷଡଯନ୍ତ୍ର ଥାଇପାରେ।

ମମତା ବାନାର୍ଜୀ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, ଅଜିତ ପାୱାରଙ୍କ ମୃତ୍ୟୁର ଉପଯୁକ୍ତ ତଦନ୍ତ ହେବା ନିହାତି ଆବଶ୍ୟକ ଏବଂ ଏହା ସିଧାସଳଖ ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ କରାଯିବା ଉଚିତ୍। ସେ ଇଙ୍ଗିତ କରିଛନ୍ତି ଯେ, ପାୱାର ଶାସକ ମହାଯୁତି ମେଣ୍ଟଠାରୁ ଦୂରେଇ ଯାଉଥିଲେ। ମମତା କହିଛନ୍ତି, "ସେ ଶାସକ ଦଳ ସହ ଥିଲେ ମଧ୍ୟ ବିଜେପି ଛାଡିବା ନେଇ ଚର୍ଚ୍ଚା ହେଉଥିଲା। ଏଭଳି ପରିସ୍ଥିତିରେ ଏହି ଅକସ୍ମାତ ଦୁର୍ଘଟଣା ସନ୍ଦେହଜନକ ମନେହେଉଛି।"

ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, "ଦେଶର ଲୋକଙ୍କ ପାଇଁ କୌଣସି ସୁରକ୍ଷା ନାହିଁ। ଆମେ କେବଳ ସୁପ୍ରିମକୋର୍ଟଙ୍କ ଉପରେ ଭରସା କରୁ, ଅନ୍ୟ କୌଣସି ଏଜେନ୍ସି ଉପରେ ନୁହେଁ।"

ବୁଧବାର ସକାଳେ ବାରାମତୀ ନିକଟରେ ମର୍ମନ୍ତୁଦ ବିମାନ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ତଥା ଏନ୍‌ସିପି ମୁଖ୍ୟ ଅଜିତ ପାୱାରଙ୍କର ଦେହାନ୍ତ ହୋଇଛି । ୬୬ ବର୍ଷୀୟ ଅଜିତ ପାୱାର ପୁଣେ ଜିଲ୍ଲା ପରିଷଦ ନିର୍ବାଚନ ପ୍ରଚାର ପାଇଁ ଏକ ଘରୋଇ ବିମାନରେ ଯାଉଥିଲେ। ମୁମ୍ବାଇରୁ ସକାଳ ପ୍ରାୟ ୮ଟାରେ ଉଡାଣ ଭରିବାର ୪୫ ମିନିଟ୍ ପରେ ଅବତରଣ ସମୟରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଘଟଣାସ୍ଥଳରୁ ପ୍ରବଳ ଧୂଆଁ ଓ ନିଆଁ ବାହାରୁଥିବା ଦେଖିବାକୁ ମିଳିଥିଲା।

ଏହି ଦୁର୍ଘଟଣାରେ ବିମାନରେ ଥିବା ସମସ୍ତ ୫ ଜଣଙ୍କର ମୃତ୍ୟୁ ଘଟିଛି। ଡିଜିସିଏ (DGCA) ସୂଚନା ଅନୁଯାୟୀ, ଅଜିତ ପାୱାରଙ୍କ ବ୍ୟତୀତ ତାଙ୍କ ବ୍ୟକ୍ତିଗତ ସୁରକ୍ଷା ଅଧିକାରୀ ବିଦିପ ଯାଦବ, ସହାୟକ ପିଙ୍କି ମାଲି ଏବଂ ପାଇଲଟ୍ କ୍ୟାପଟେନ୍ ସୁମିତ କପୁର ଓ କ୍ୟାପଟେନ୍ ଶାମ୍ଭବୀ ପାଠକଙ୍କର ମଧ୍ୟ ମୃତ୍ୟୁ ହୋଇଛି। ମହାରାଷ୍ଟ୍ର ରାଜନୀତିରେ 'ଦାଦା' ନାମରେ ପରିଚିତ ଅଜିତ ପାୱାର ସବୁଠାରୁ ଅଧିକ ସମୟ ଧରି ଉପମୁଖ୍ୟମନ୍ତ୍ରୀ ପଦବୀରେ ରହିବାର ରେକର୍ଡ କରିଥିଲେ।

ଆମେରିକାର ଟେକ୍ସାସ ସ୍ଥିତ ଏକ ବିମାନବନ୍ଦରରେ ମଙ୍ଗଳବାର ଦିନ ଏକ ବଡ଼ ଧରଣର ଦୁର୍ଘଟଣା ଅଳ୍ପକେ ଟଳିଯାଇଛି। ଯାନ୍ତ୍ରିକ ତ୍ରୁଟି ହେତୁ NASA (ନାସା)ର ଏକ ଗବେଷଣା ବିମାନକୁ ଜରୁରୀକାଳୀନ ପରିସ୍ଥିତିରେ 'ବେଲି ଲ୍ୟାଣ୍ଡିଂ' (ଚକ ବିନା ଅବତରଣ) କରିବାକୁ ପଡିଥିଲା। ଏହି ଘଟଣାର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି, ଯେଉଁଥିରେ ବିମାନଟି ରନ୍‌ୱେ ଉପରେ ଘୋଷାଡି ହୋଇ ଯାଉଥିବାର ଦେଖିବାକୁ ମିଳିଛି।

https://twitter.com/XTheNewsBeeX/status/2016231852743205177?s=20

ହ୍ୟୁଷ୍ଟନ୍‌ର ଦକ୍ଷିଣ-ପୂର୍ବରେ ଥିବା Ellington Airport (ଏଲିଙ୍ଗଟନ୍ ବିମାନବନ୍ଦର)ରେ ଏହି ଘଟଣା ଘଟିଛି। ବିମାନର ଲ୍ୟାଣ୍ଡିଂ ଗିଅର୍ ଖୋଲି ନ ପାରିବାରୁ ପାଇଲଟ୍ ବିମାନଟିକୁ ବିନା ଚକରେ ଅବତରଣ କରାଇଥିଲେ। ଭିଡିଓ ଫୁଟେଜରେ ଦେଖାଯାଇଛି ଯେ, ବିମାନଟି ନିୟନ୍ତ୍ରିତ ଭାବରେ ତଳକୁ ଖସୁଥିଲା, କିନ୍ତୁ ମାଟି ଛୁଇଁବା ମାତ୍ରେ ଏହା ରନ୍‌ୱେରେ ଘୋଷାଡି ହୋଇଯାଇଥିଲା। ଫଳରେ ବିମାନର ତଳ ଭାଗରୁ ପ୍ରବଳ ଧୂଆଁ ଓ ନିଆଁ ବାହାରିଥିଲା। ତେବେ ଆଶ୍ୱସ୍ତିର ବିଷୟ ଯେ, ବିମାନରେ ଥିବା ଉଭୟ କ୍ରୁ ସଦସ୍ୟ ସୁରକ୍ଷିତ ଅଛନ୍ତି ଏବଂ କୌଣସି ଆହତ ହୋଇନାହାନ୍ତି।

ନାସା ପକ୍ଷରୁ 'X' (ପୂର୍ବରୁ ଟ୍ୱିଟର)ରେ ସ୍ପଷ୍ଟ କରାଯାଇଛି ଯେ, ଏକ ଯାନ୍ତ୍ରିକ ସମସ୍ୟା ଯୋଗୁଁ ଏଭଳି ପରିସ୍ଥିତି ଉପୁଜିଥିଲା। ଦୁର୍ଘଟଣାଗ୍ରସ୍ତ ବିମାନଟି ହେଉଛି WB-57, ଯାହା ଏକ ଉଚ୍ଚ ଉଚ୍ଚତା ବିଶିଷ୍ଟ ଗବେଷଣା ବିମାନ। ଏହା ୬୦,୦୦୦ ଫୁଟରୁ ଅଧିକ ଉଚ୍ଚତାରେ ଉଡିପାରେ ଏବଂ ୧୯୭୦ ଦଶକରୁ ବୈଜ୍ଞାନିକ ଗବେଷଣା ପାଇଁ ଏହାକୁ ବ୍ୟବହାର କରାଯାଉଛି।

ଦୁର୍ଘଟଣା ପରେ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ବିମାନଟି ସମ୍ପୂର୍ଣ୍ଣ ଅଟକିବା ପରେ ଏହାର କକପିଟ୍ ଖୋଲାଯାଇଥିଲା। ଲ୍ୟାଣ୍ଡିଂ ଗିଅର୍ ବିଫଳ ହେବାର ପ୍ରକୃତ କାରଣ ଜାଣିବା ପାଇଁ ଏକ ତଦନ୍ତ ନିର୍ଦ୍ଦେଶ ଦିଆଯାଇଛି।

ମହାରାଷ୍ଟ୍ରର ବାରାମତୀରେ ବୁଧବାର ସକାଳେ ଘଟିଥିବା ଏକ ଦୁଃଖଦ ବିମାନ ଦୁର୍ଘଟଣାରେ ଏନସିପି ନେତା ତଥା ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ୫ ଜଣଙ୍କର ମୃତ୍ୟୁ ଘଟିଛି। ବିମାନ ଦୁର୍ଘଟଣା ସର୍ବଦା ହୃଦୟବିଦାରକ ହୋଇଥାଏ, କାରଣ ଏଥିରେ ଯାତ୍ରୀମାନଙ୍କ ବଞ୍ଚିବା ସମ୍ଭାବନା ଖୁବ୍ କମ୍ ଥାଏ। ତେବେ ଇତିହାସ ସାକ୍ଷୀ ଅଛି ଯେ, ପ୍ରତ୍ୟେକ ବଡ଼ ଦୁର୍ଘଟଣା ପରେ ବିମାନ ଚଳାଚଳ ବା ଏଭିଏସନ୍ ଇଣ୍ଡଷ୍ଟ୍ରିରେ ସୁରକ୍ଷା ନିୟମ ଓ ଜ୍ଞାନକୌଶଳରେ ବ୍ୟାପକ ପରିବର୍ତ୍ତନ କରାଯାଇଛି। ଆସନ୍ତୁ ଜାଣିବା ସେହି ୧୩ଟି ପ୍ରମୁଖ ବିମାନ ଦୁର୍ଘଟଣା ବିଷୟରେ, ଯାହା ବିମାନ ଯାତ୍ରାର ନିୟମକୁ ସବୁଦିନ ପାଇଁ ବଦଳାଇ ଦେଇଥିଲା।

୧. ଗ୍ରାଣ୍ଡ କ୍ୟାନିୟନ୍ ଧକ୍କା (୧୯୫୬)

୩୦ ଜୁନ୍ ୧୯୫୬ରେ ଗ୍ରାଣ୍ଡ କ୍ୟାନିୟନ୍ ଉପରେ ଦୁଇଟି ବିମାନ ପରସ୍ପର ସହ ଧକ୍କା ହୋଇଥିଲେ। ସେତେବେଳେ ରାଡାର୍ ବ୍ୟବସ୍ଥା ଏତେ ଉନ୍ନତ ନଥିଲା। ଏହି ଘଟଣା ପରେ ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଗଠନ କରାଗଲା ଏବଂ ବିମାନରେ ଧକ୍କା ରୋକିବା ପାଇଁ ଆଧୁନିକ TCAS ସିଷ୍ଟମ ଲଗାଗଲା।

୨. ୟୁନାଇଟେଡ୍ ଏୟାରଲାଇନ୍ସ ଫ୍ଲାଇଟ୍ ୧୭୩ (୧୯୭୮)

ପାଇଲଟ୍ ଏକ ଛୋଟ ଯାନ୍ତ୍ରିକ ତ୍ରୁଟି ସୁଧାରିବାରେ ବ୍ୟସ୍ତ ରହିବାରୁ ବିମାନର ଇନ୍ଧନ ଶେଷ ହୋଇଯାଇଥିଲା। ଏହି ଦୁର୍ଘଟଣା ପରେ କକ୍‌ପିଟ୍ ରିସୋର୍ସ ମ୍ୟାନେଜମେଣ୍ଟ (CRM) ଆରମ୍ଭ ହେଲା, ଯାହା ପାଇଲଟମାନଙ୍କୁ କ୍ରୁ ସଦସ୍ୟଙ୍କ ପରାମର୍ଶ ଶୁଣିବା ଏବଂ ଟିମ୍ ଭାବେ କାମ କରିବା ଶିଖାଇଲା।

୩. ଏୟାର କାନାଡା ଫ୍ଲାଇଟ୍ ୭୯୭ (୧୯୮୩)

୩୩ ହଜାର ଫୁଟ ଉଚ୍ଚରେ ଟ୍ୱାଏଲେଟରେ ନିଆଁ ଲାଗିବା ଫଳରେ ଧୂଆଁ ଯୋଗୁଁ ଯାତ୍ରୀମାନେ ବାହାରି ପାରିନଥିଲେ। ଏହାପରେ ବିମାନର ଟ୍ୱାଏଲେଟରେ ସ୍ମୋକ ଡିଟେକ୍ଟର ଏବଂ ଅଟୋମେଟିକ୍ ନିଆଁ ଲିଭା ଯନ୍ତ୍ର ବାଧ୍ୟତାମୂଳକ କରାଗଲା। ଚଟାଣରେ ରେଡିୟମ୍ ଲାଇଟ୍ ଲଗାଗଲା ଯାହା ଧୂଆଁରେ ମଧ୍ୟ ରାସ୍ତା ଦେଖାଇବାରେ ସାହାଯ୍ୟ କରେ।

୪. ଡେଲ୍ଟା ଏୟାରଲାଇନ୍ସ ଫ୍ଲାଇଟ୍ ୧୯୧ (୧୯୮୫)

ଅବତରଣ ସମୟରେ ପବନର ପ୍ରବଳ ଚାପ ଯୋଗୁଁ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହାପରେ ବିମାନଗୁଡିକରେ ଉନ୍ନତମାନର ରାଡାର୍ ଲଗାଗଲା, ଯାହା ପାଇଲଟଙ୍କୁ ପବନର ଗତିବିଧି ସମ୍ପର୍କରେ ଆଗୁଆ ସୂଚନା ଦେଇଥାଏ।

୫. ୟୁନାଇଟେଡ୍ ଏୟାରଲାଇନ୍ସ ଫ୍ଲାଇଟ୍ ୨୩୨ (୧୯୮୯)

ଇଞ୍ଜିନର ଏକ ପଙ୍ଖା ଫାଟିଯିବାରୁ ବିମାନର ନିୟନ୍ତ୍ରଣ ହଜିଯାଇଥିଲା। ଏହି ଘଟଣା ପରେ ଇଞ୍ଜିନ୍ ଯାଞ୍ଚ ପ୍ରକ୍ରିୟା କଡ଼ାକଡ଼ି କରାଗଲା ଏବଂ ଗୋଟିଏ ସିଷ୍ଟମ ଫେଲ୍ ମାରିଲେ ମଧ୍ୟ ବିମାନକୁ ନିୟନ୍ତ୍ରଣ କରିବା ପାଇଁ ବ୍ୟାକଅପ୍ ସୁରକ୍ଷା ବ୍ୟବସ୍ଥା ଯୋଡ଼ାଗଲା।

୬. ଆଲୋହା ଏୟାରଲାଇନ୍ସ ଫ୍ଲାଇଟ୍ ୨୪୩ (୧୯୮୮)

ଧାତୁ ଦୁର୍ବଳ ହୋଇଯିବାରୁ ଉଡ଼ନ୍ତା ଅବସ୍ଥାରେ ଏକ ପୁରୁଣା ବିମାନର ଛାତ ଉଡ଼ିଯାଇଥିଲା। ଏହାପରେ 'ବୃଦ୍ଧ ବିମାନ କାର୍ଯ୍ୟକ୍ରମ' ଆରମ୍ଭ ହେଲା, ଯେଉଁଥିରେ ପୁରୁଣା ବିମାନଗୁଡ଼ିକୁ ଅତି ସୂକ୍ଷ୍ମ ଭାବରେ ଯାଞ୍ଚ କରାଯାଏ।

୭. ୟୁଏସ୍ ଏୟାରୱେଜ୍ ଫ୍ଲାଇଟ୍ ୪୨୭ (୧୯୯୪)

ରଡର୍ (Rudder) ଜାମ୍ ହେବା କାରଣରୁ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହା ପରେ ବୋଇଂ କମ୍ପାନୀ ହଜାର ହଜାର ବିମାନର ରଡର୍ ସିଷ୍ଟମ ବଦଳାଇ ନୂତନ ଯନ୍ତ୍ରାଂଶ ଲଗାଇଥିଲା।

୮. ଭାଲ୍ୟୁଜେଟ୍ ଫ୍ଲାଇଟ୍ ୫୯୨ (୧୯୯୬)

କାର୍ଗୋରେ ରଖାଯାଇଥିବା କେମିକାଲରୁ ନିଆଁ ଲାଗି ବିମାନଟି ଖସି ପଡ଼ିଥିଲା। ଏହାପରେ ବିମାନର କାର୍ଗୋ ବିଭାଗରେ ସ୍ମୋକ୍ ଡିଟେକ୍ଟର ଲଗାଇବା ଏବଂ ବିପଜ୍ଜନକ ସାମଗ୍ରୀ ପରିବହନ ନିୟମକୁ କଡ଼ାକଡ଼ି କରାଗଲା।

୯. ଟିଡବ୍ଲୁଏ ଫ୍ଲାଇଟ୍ ୮୦୦ (୧୯୯୬)

ଇନ୍ଧନ ଟାଙ୍କିରେ ବିସ୍ଫୋରଣ ଘଟିବାରୁ ଏହି ଦୁର୍ଘଟଣା ଘଟିଥିଲା। ଏହାକୁ ରୋକିବା ପାଇଁ ଇନ୍ଧନ ଟାଙ୍କିରେ ନାଇଟ୍ରୋଜେନ୍ ଗ୍ୟାସ୍ ଭରିବାର ବ୍ୟବସ୍ଥା କରାଗଲା, ଯାହା ନିଆଁ ଲାଗିବାକୁ ଦିଏନାହିଁ।

୧୦. ସ୍ୱିସ୍ ଏୟାର ଫ୍ଲାଇଟ୍ ୧୧୧ (୧୯୯୮)

ବିମାନର ମନୋରଞ୍ଜନ ସିଷ୍ଟମରେ ସର୍ଟ ସର୍କିଟ୍ ହେବାରୁ ନିଆଁ ଲାଗିଥିଲା। ଏହି ଘଟଣା ପରେ ତାର (wiring) ଉପରେ ଅଗ୍ନିରୋଧୀ କଭର୍ ଲଗାଇବା ବାଧ୍ୟତାମୂଳକ କରାଗଲା।

୧୧. ଏୟାର ଫ୍ରାନ୍ସ ୪୪୭ (୨୦୦୯)

ଗତି ମାପକ ଯନ୍ତ୍ର ଜାମ୍ ହେବାରୁ ପାଇଲଟ୍ ବିମାନକୁ ନିୟନ୍ତ୍ରଣ କରିପାରିନଥିଲେ। ଏଥିରୁ ଶିକ୍ଷା ନେଇ ପାଇଲଟମାନଙ୍କୁ ଅଟୋ-ପାଇଲଟ୍ ଉପରେ ନିର୍ଭର ନକରି ମାନୁଆଲ୍ ବିମାନ ଉଡ଼ାଇବା ପାଇଁ କଡ଼ା ତାଲିମ ଦିଆଗଲା।

୧୨. ମାଲେସିଆ ଏୟାରଲାଇନ୍ସ ୩୭୦ (୨୦୧୪)

ଏହି ବିମାନ ରହସ୍ୟମୟ ଭାବେ ନିଖୋଜ ହୋଇଯାଇଥିଲା। ଏହାପରେ ସମୁଦ୍ର ଉପରେ ଥିବାବେଳେ ମଧ୍ୟ ବିମାନର ସଠିକ୍ ଲୋକେସନ୍ ଜାଣିବା ପାଇଁ ରିଅଲ୍-ଟାଇମ୍ ଟ୍ରାକିଂ ବାଧ୍ୟତାମୂଳକ କରାଯାଇଛି।

୧୩. ଲାୟନ୍ ଏୟାର ଓ ଇଥିଓପିଆନ୍ ଏୟାରଲାଇନ୍ସ (୨୦୧୮)

ସଫ୍ଟୱେୟାର ତ୍ରୁଟି (MCAS) ଯୋଗୁଁ ବୋଇଂ ୭୩୭ ମ୍ୟାକ୍ସର ଦୁଇଟି ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏହାପରେ ସଫ୍ଟୱେୟାର ବଦଳାଗଲା ଏବଂ ପାଇଲଟମାନଙ୍କ ପାଇଁ ଏହି ସିଷ୍ଟମ ଉପରେ ସ୍ୱତନ୍ତ୍ର ତାଲିମ ଅନିବାର୍ଯ୍ୟ କରାଗଲା।

ମହାରାଷ୍ଟ୍ର ରାଜନୀତିରେ ଏକ ଅପୂରଣୀୟ କ୍ଷତି ଘଟିଛି। ଅଜିତ ପାୱାର ମହାରାଷ୍ଟ୍ରର ସବୁଠାରୁ ପ୍ରଭାବଶାଳୀ ରାଜନୈତିକ ପରିବାରରୁ ଆସିଥିଲେ। ସେ ଏନସିପି ମୁଖ୍ୟ ଶରଦ ପାୱାରଙ୍କ ପୁତୁରା ଥିଲେ। ତାଙ୍କ ପତ୍ନୀଙ୍କ ନାମ ସୁନେତ୍ରା ପାୱାର, ଯିଏକି ପୂର୍ବତନ ମନ୍ତ୍ରୀ ପଦ୍ମସିଂହ ବାଜିରାଓ ପାଟିଲଙ୍କ ଭଉଣୀ ଅଟନ୍ତି। ଅଜିତଙ୍କର ଦୁଇ ପୁଅ ଅଛନ୍ତି - ପାର୍ଥ ପାୱାର ଏବଂ ଜୟ ପାୱାର। ବଡ଼ ପୁଅ ପାର୍ଥ ରାଜନୀତିରେ ସକ୍ରିୟ ଥିବାବେଳେ ସାନ ପୁଅ ଜୟ ରାଜନୀତିଠାରୁ ଦୂରରେ ଅଛନ୍ତି।

ଅଜିତ ପାୱାରଙ୍କ ବାପା ଅନନ୍ତରାଓ ପାୱାର ବଲିଉଡର ପ୍ରସିଦ୍ଧ ନିର୍ଦ୍ଦେଶକ ଭି. ଶାନ୍ତାରାମଙ୍କ ସହ ‘ରାଜକମଲ ଷ୍ଟୁଡିଓ’ରେ କାମ କରୁଥିଲେ। ତେବେ ଅଜିତ ପାୱାର ଚଳଚ୍ଚିତ୍ର ଜଗତ ପରିବର୍ତ୍ତେ ରାଜନୀତିକୁ ନିଜର କର୍ମକ୍ଷେତ୍ର ଭାବେ ବାଛିଥିଲେ ଏବଂ ନିଜ କାକା ଶରଦ ପାୱାରଙ୍କଠାରୁ ରାଜନୀତିର ଗୁରୁମନ୍ତ୍ର ଶିଖିଥିଲେ।

ଅଜିତଙ୍କ ବଡ଼ ଭାଇ ଶ୍ରୀନିବାସ ପାୱାର ଜଣେ ପ୍ରତିଷ୍ଠିତ ବ୍ୟବସାୟୀ, ଯାହାଙ୍କର ବ୍ୟବସାୟ କୃଷିଠାରୁ ଆରମ୍ଭ କରି ଅଟୋମୋବାଇଲ କ୍ଷେତ୍ର ପର୍ଯ୍ୟନ୍ତ ବ୍ୟାପିଛି। ତାଙ୍କ ଭଉଣୀ ବିଜୟା ପାଟିଲ ଗଣମାଧ୍ୟମ ଜଗତ ସହ ଜଡିତ। ସାଂସଦ ତଥା ଏନସିପି ନେତ୍ରୀ ସୁପ୍ରିୟା ସୁଲେ ହେଉଛନ୍ତି ଅଜିତ ପାୱାରଙ୍କ ସମ୍ପର୍କୀୟ ଭଉଣୀ। ରାଜନୈତିକ ମତଭେଦ ସତ୍ତ୍ୱେ ସୁପ୍ରିୟା ସର୍ବଦା ଅଜିତଙ୍କୁ ନିଜର ବଡ଼ ଭାଇ ଭାବେ ସମ୍ମାନ ଦେଇ ଆସୁଥିଲେ।

ମହାରାଷ୍ଟ୍ର ରାଜନୀତି ପାଇଁ ବୁଧବାର ଏକ ଅତ୍ୟନ୍ତ ଦୁଃଖଦ ଦିନ ପାଲଟିଛି। ଏକ ହୃଦୟବିଦାରକ ବିମାନ ଦୁର୍ଘଟଣାରେ ରାଜ୍ୟର ଉପମୁଖ୍ୟମନ୍ତ୍ରୀ ତଥା ଏନସିପି (NCP) ମୁଖ୍ୟ ଅଜିତ ପାୱାରଙ୍କର ପରଲୋକ ଘଟିଛି। ବାରାମତି ବିମାନବନ୍ଦର ନିକଟରେ ତାଙ୍କର ବ୍ୟକ୍ତିଗତ ଚାଟାର୍ଡ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ଅଜିତ ପାୱାରଙ୍କ ସମେତ ବିମାନରେ ଥିବା ସମସ୍ତ ୫ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଅଭିଜ୍ଞ ପାଇଲଟ୍ ଏବଂ ଫ୍ଲାଇଟ୍ ଆଟେଣ୍ଡାଣ୍ଟ ମଧ୍ୟ ସାମିଲ ଅଛନ୍ତି।

ସୂଚନା ଅନୁଯାୟୀ, ଦୁର୍ଘଟଣାଟି ସକାଳ ପ୍ରାୟ ୮:୪୫ ରୁ ୯:୧୫ ମଧ୍ୟରେ ଘଟିଥିଲା। ଅଜିତ ପାୱାର ଜିଲ୍ଲା ପରିଷଦ ନିର୍ବାଚନ ପାଇଁ ମୁମ୍ବାଇରୁ ବାରାମତି ଯାଉଥିଲେ। ବାରାମତି ରନୱେରେ ଅବତରଣ କରିବାକୁ ଚେଷ୍ଟା କରୁଥିବାବେଳେ ବିମାନରେ ଯାନ୍ତ୍ରିକ ତ୍ରୁଟି ଦେଖାଦେଇଥିଲା। ଫଳରେ ବିମାନଟି ରନୱେ ବଦଳରେ ନିକଟସ୍ଥ ଏକ କ୍ଷେତରେ ଖସି ପଡ଼ିଥିଲା ଏବଂ ଭୂମି ସହ ମାଡ଼ ହେବା ମାତ୍ରେ ଏଥିରେ ନିଆଁ ଲାଗିଯାଇଥିଲା। ଏହି ଘଟଣାରେ ଅଜିତ ପାୱାରଙ୍କ ବ୍ୟତୀତ ଯାତ୍ରୀ ବିଦୀପ ଯାଦବଙ୍କର ମଧ୍ୟ ମୃତ୍ୟୁ ଘଟିଛି।

ଦୁର୍ଘଟଣାଗ୍ରସ୍ତ 'ଲେୟାରଜେଟ୍ ୪୫' ବିମାନର ନିୟନ୍ତ୍ରଣ ଅଭିଜ୍ଞ କ୍ୟାପଟେନ ସୁମିତ କପୁର ଏବଂ ଫର୍ଷ୍ଟ ଅଫିସର ଶାମ୍ଭବୀ ପାଠକଙ୍କ ହାତରେ ଥିଲା। ଏହା ସହ ପିଙ୍କି ମାଲି ଫ୍ଲାଇଟ୍ ଆଟେଣ୍ଡାଣ୍ଟ ଭାବରେ କାର୍ଯ୍ୟରତ ଥିଲେ। ଶାମ୍ଭବୀ ୨୦୨୨ ମସିହାରୁ ଏହି କମ୍ପାନୀ ସହିତ ଜଡିତ ଥିଲେ ଏବଂ ସେ ମୁମ୍ବାଇ ବିଶ୍ୱବିଦ୍ୟାଳୟରୁ ଏଭିଏସନ୍ ପାଠ ପଢିବା ପରେ ନ୍ୟୁଜିଲ୍ୟାଣ୍ଡରେ ପାଇଲଟ୍ ଟ୍ରେନିଂ ନେଇଥିଲେ।

ନାଗରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏହି ଘଟଣାରେ ମୃତ୍ୟୁକୁ ନିଶ୍ଚିତ କରିବା ସହ ତଦନ୍ତ ନିର୍ଦ୍ଦେଶ ଦେଇଛି। ଦୁର୍ଘଟଣାଗ୍ରସ୍ତ ବିମାନଟି ଦିଲ୍ଲୀର ଘରୋଇ ଏଭିଏସନ୍ କମ୍ପାନୀ 'VSR ଭେଞ୍ଚର୍ସ'ର ଥିଲା, ଯାହାର ପଞ୍ଜୀକରଣ ନମ୍ବର VT-SSK ରହିଥିଲା। ଉଲ୍ଲେଖନୀୟ ଯେ, ଏହି କମ୍ପାନୀର ଅନ୍ୟ ଏକ ବିମାନ ୨୦୨୩ ସେପ୍ଟେମ୍ବରରେ ମଧ୍ୟ ମୁମ୍ବାଇ ବିମାନବନ୍ଦରରେ ଦୁର୍ଘଟଣାଗ୍ରସ୍ତ ହୋଇଥିଲା।