ଗ୍ଲୋବାଲ ଆଇକନ ପ୍ରିୟଙ୍କା ଚୋପ୍ରା ନିକଟରେ ଏକ ସାକ୍ଷାତକାରରେ ବଲିଉଡ ଛାଡିବାର ପ୍ରକୃତ କାରଣ ବିଷୟରେ ଖୁଲାସା କରିଛନ୍ତି। ନିଜ କ୍ୟାରିୟରର ଶୀର୍ଷରେ ଥିବା ସମୟରେ ସେ କାହିଁକି ହଠାତ ହଲିଉଡ ମୁହାଁ ହୋଇଥିଲେ, ସେ ନେଇ ଅନେକ ଦିନରୁ ଚର୍ଚ୍ଚା ଲାଗି ରହିଥିଲା। ଏବେ ପ୍ରିୟଙ୍କା କହିଛନ୍ତି ଯେ, ସେହି ସମୟରେ ତାଙ୍କୁ ଇଣ୍ଡଷ୍ଟ୍ରିରେ ସୀମିତ ଅନୁଭବ ହେଉଥିଲା ଏବଂ ସେଠାରେ ରହିଥିବା ରାଜନୀତି ବା ଗନ୍ଦଗୀ ମଧ୍ୟରେ ସେ ଆଉ ରହିବାକୁ ଚାହୁଁନଥିଲେ।

ବଲିଉଡର କଟୁ ଅନୁଭୂତି

ପ୍ରିୟଙ୍କା କହିଛନ୍ତି ଯେ, ବଲିଉଡରେ ସେହି ସମୟରେ ତାଙ୍କର କିଛି ସମ୍ପର୍କ ଭଲ ନଥିଲା ଏବଂ ତାଙ୍କୁ କୋଣଠେସା କରାଯାଇଥିଲା। ଅମାଣ୍ଡା ହିର୍ଶଙ୍କ ପୋଡକାଷ୍ଟ 'ନଟ୍ ସ୍କିନି ବଟ୍ ନଟ୍ ଫ୍ୟାଟ୍'ରେ ଯୋଗ ଦେଇ ସେ କହିଛନ୍ତି ଯେ, ମୋତେ ଗନ୍ଦଗୀ ବା କାଦୁଅରେ ରହିବାକୁ ପସନ୍ଦ ନୁହେଁ, କାରଣ ଏଥିରେ ରହିଲେ ଆପଣଙ୍କୁ ତା'ର ଗନ୍ଧରେ ଅଭ୍ୟସ୍ତ ହେବାକୁ ପଡେ। ସେ ପରିବର୍ତ୍ତନ ଉପରେ ବିଶ୍ୱାସ କରନ୍ତି ଏବଂ ଜୀବନ ଯେତେବେଳେ କଷ୍ଟକର ହୁଏ, ସେତେବେଳେ ନିଜକୁ ସମ୍ଭାଳି ଆଗକୁ ବଢିବା ଆବଶ୍ୟକ ବୋଲି ସେ ମତ ଦେଇଛନ୍ତି।

ଆଇଶ୍ୱର୍ଯ୍ୟା ରାୟଙ୍କୁ ନେଇ କହିଲେ ଏହି କଥା

ଯେତେବେଳେ ପ୍ରିୟଙ୍କାଙ୍କୁ ପଚରାଗଲା ଯେ ସେ ଆମେରିକୀୟ ଫିଲ୍ମ ଇଣ୍ଡଷ୍ଟ୍ରିରେ କାମ କରିବାକୁ କାହିଁକି ସ୍ଥିର କଲେ, ସେ ଆଇଶ୍ୱର୍ଯ୍ୟା ରାୟ ଏବଂ ମିଣ୍ଡି କାଲିଙ୍ଗଙ୍କ ନାମ ନେଇଥିଲେ। ସେ କହିଥିଲେ ଯେ ସେହି ସମୟରେ ହଲିଉଡରେ ଭାରତୀୟ କଳାକାରଙ୍କ ପ୍ରତିନିଧିତ୍ୱ ବହୁତ କମ ଥିଲା। ସେ ଜଣେ ନବମ ଶ୍ରେଣୀର ଝିଅ ଭଳି ଅନୁଭବ କରୁଥିଲେ ଯାହାର ଚେହେରା ସେଠାରେ ଅନ୍ୟମାନଙ୍କ ସହ ମିଶୁନଥିଲା। ଏହି ଅଭାବକୁ ଦୂର କରିବା ଏବଂ ନିଜର ସାମର୍ଥ୍ୟ ପରଖିବା ପାଇଁ ସେ ହଲିଉଡରେ କାମ ଖୋଜିବା ଆରମ୍ଭ କରିଥିଲେ।

୨୦୧୫ ମସିହାରେ 'କ୍ୱାଣ୍ଟିକୋ' ସିରିଜ ଜରିଆରେ ସେ ନିଜର ଆନ୍ତର୍ଜାତୀୟ ଯାତ୍ରା ଆରମ୍ଭ କରିଥିଲେ। ପ୍ରିୟଙ୍କାଙ୍କ କହିବା ଅନୁଯାୟୀ, ସେ ଜଣେ ପରିଶ୍ରମୀ ମଣିଷ ଏବଂ ନିଜ କାମକୁ ଭଲ ଭାବେ ଜାଣନ୍ତି। ବର୍ତ୍ତମାନ ସେ ତାଙ୍କର ଆଗାମୀ ଚଳଚ୍ଚିତ୍ର 'ବାରାଣସୀ' ପାଇଁ ପ୍ରସ୍ତୁତି ଚଳାଇଛନ୍ତି, ଯାହା ଆସନ୍ତା ବର୍ଷ ମୁକ୍ତିଲାଭ କରିବ।

ବଲିଉଡ୍‌ର 'ଦେଶୀ ଗର୍ଲ' ତଥା ଗ୍ଲୋବାଲ ଷ୍ଟାର ପ୍ରିୟଙ୍କା ଚୋପ୍ରା ନିଜ ବ୍ୟକ୍ତିଗତ ଜୀବନକୁ ନେଇ ସର୍ବଦା ଚର୍ଚ୍ଚାରେ ରହିଥାନ୍ତି। ନିକଟରେ ସେ ତାଙ୍କ ସ୍ୱାମୀ ନିକ ଜୋନାସଙ୍କ ସହ ଛାଡ଼ପତ୍ର ଏବଂ ସମ୍ପର୍କରେ ଫାଟ ସୃଷ୍ଟି ହୋଇଥିବା ଗୁଜବ ଉପରେ ମୁହଁ ଖୋଲିଛନ୍ତି। ଏକ ସାକ୍ଷାତକାରରେ ପ୍ରିୟଙ୍କା ଟ୍ରୋଲରମାନଙ୍କୁ କଡ଼ା ଜବାବ ଦେଇ କହିଛନ୍ତି ଯେ, କିଛି ଲୋକ ତାଙ୍କ ସମ୍ପର୍କ ଭାଙ୍ଗିବାକୁ ଅପେକ୍ଷା କରି ବସିଛନ୍ତି, କିନ୍ତୁ ଏଥିରେ ତାଙ୍କୁ ଆଉ କୌଣସି ଫରକ ପଡ଼େନାହିଁ।

୮ ବର୍ଷର ସମ୍ପର୍କ ଏବଂ ଲୋକଙ୍କ ନକାରାତ୍ମକ ଚିନ୍ତାଧାରା

ପ୍ରିୟଙ୍କା କହିଛନ୍ତି ଯେ ତାଙ୍କ ବିବାହକୁ ୮ ବର୍ଷ ବିତିଯାଇଛି, ତଥାପି ଲୋକମାନେ ଏବେ ବି ଭାବୁଛନ୍ତି ଯେ ଏହି ସମ୍ପର୍କ ବେଶୀ ଦିନ ତିଷ୍ଠିବ ନାହିଁ। ସେ କହିଛନ୍ତି, "ଯଦି ଲୋକମାନେ ଆମ ସମ୍ପର୍କ ଭାଙ୍ଗିବାକୁ ଅପେକ୍ଷା କରିବାକୁ ଚାହୁଁଛନ୍ତି, ତେବେ ଏହା ସେମାନଙ୍କ ଇଚ୍ଛା। ମୁଁ ଏବେ ଏସବୁ ବିଷୟରେ ଭାବିବା ବନ୍ଦ କରିଦେଇଛି।"

ପୂର୍ବରୁ ଏହି ଗୁଜବଗୁଡ଼ିକ ତାଙ୍କୁ ଖୁବ୍ କଷ୍ଟ ଦେଉଥିଲା। ବିଶେଷକରି ଦୁହିଁଙ୍କ ବୟସରେ ପାର୍ଥକ୍ୟ (Age Gap) ଏବଂ ଭିନ୍ନ ସଂସ୍କୃତିକୁ ନେଇ ଲୋକମାନେ ଅନେକ କଟୁ ମନ୍ତବ୍ୟ ଦେଉଥିଲେ। ପ୍ରିୟଙ୍କାଙ୍କ ଅନୁଯାୟୀ, ଆରମ୍ଭରେ ଏହା ତାଙ୍କ ପାଇଁ ଯନ୍ତ୍ରଣାଦାୟକ ଥିଲା, କିନ୍ତୁ ଏବେ ସେ ଏସବୁକୁ ଗୁରୁତ୍ୱ ଦିଅନ୍ତି ନାହିଁ।

ନିକଙ୍କୁ ପ୍ରଥମେ ସନ୍ଦେହ କରିଥିଲେ ପ୍ରିୟଙ୍କା

ନିଜ ସମ୍ପର୍କର ଆରମ୍ଭ ଦିନଗୁଡ଼ିକ ବିଷୟରେ କଥା ହୋଇ ପ୍ରିୟଙ୍କା ଖୁଲାସା କରିଛନ୍ତି ଯେ, ନିକଙ୍କ ସହ ମାତ୍ର ୬ ମାସର ପରିଚୟ ପରେ ସେ ବିବାହ କରିଥିଲେ। ତେଣୁ ପ୍ରଥମେ ପ୍ରଥମେ ନିକଙ୍କ ବ୍ୟବହାର ସତ କି ଅଭିନୟ, ତାହା ସେ ବୁଝିପାରୁନଥିଲେ। କିନ୍ତୁ ପରେ ସେ ଅନୁଭବ କଲେ ଯେ ନିକ ଜଣେ ଖୁବ୍ ସରଳ ଓ ସଚ୍ଚୋଟ ମଣିଷ।

ସୂଚନାଯୋଗ୍ୟ ଯେ, ଗୋଲ୍ଡେନ୍ ଗ୍ଲୋବ୍ସ ୨୦୨୬ ସମୟରେ ଉଭୟଙ୍କୁ ଅଲଗା ଅଲଗା ଦେଖିବା ପରେ ପୁଣିଥରେ ଛାଡ଼ପତ୍ର ଗୁଜବ ଜୋର୍ ଧରିଥିଲା। ତେବେ ପ୍ରିୟଙ୍କାଙ୍କ ଏହି ବୟାନ ସମସ୍ତ ଗୁଜବରେ ପୂର୍ଣ୍ଣଚ୍ଛେଦ ପକାଇଛି।

ବଲିଉଡ୍‌ ଅଭିନେତା ହ୍ରିତିକ୍‌ ରୋଶନଙ୍କ ଅଭିନୀତ ‘କ୍ରିସ୍’ ଫ୍ରାଞ୍ଚାଇଜ୍‌ର ଚତୁର୍ଥ ଫିଲ୍ମକୁ ଦର୍ଶକେ ଅନେକ ଦିନରୁ ଅପେକ୍ଷା କରିଛନ୍ତି। ଫିଲ୍ମକୁ ନେଇ ନୂଆ ନୂଆ ଖବର ମଧ୍ୟ ଆସୁଛି। ଏଥିରେ ଜବରଦସ୍ତ ଆକ୍ସନ୍‌ ସିନ୍‌ ସାଙ୍ଗକୁ ଉଚ୍ଚ କୋଟିର ଗ୍ରାଫିକ୍ସ ରହିବ ବୋଲି ଚର୍ଚ୍ଚା ହେଉଛି। ପ୍ରିୟଙ୍କା ଚୋପ୍ରାଙ୍କୁ ମଧ୍ୟ ଏଥିରେ ଦେଖିବାକୁ ମିଳିବ। ପ୍ରିୟଙ୍କାଙ୍କ ସହ ଏଥିରେ ପ୍ରୀତି ଜିନ୍‌ଟା ଓ ରେଖା ମଧ୍ୟ ଦେଖାଯିବେ। ଇତିିମଧ୍ୟରେ ଫିଲ୍ମକୁ ନେଇ ଆଉ ଏକ ଖବର ଆସିଛି। ‘କ୍ରିସ୍‌-୪’ରେ ହ୍ରିତିକ୍‌ ଟ୍ରିପିଲ ରୋଲରେ ଦେଖାଯିବେ। ସେ ଏଥିରେ ତିନୋଟି ଭିନ୍ନ ଭିନ୍ନ ଭୂମିକାରେ ଅତୀତ, ବର୍ତ୍ତମାନ ଓ ଭବିଷ୍ୟତ ସହ ଯୋଡ଼ି ହେଉଥିବାର ଦେଖାଯିବେ। ତେବେ ଏଥିରେ ହ୍ରିତିକ୍‌ ଅଭିନୟ କରିବା ସହ ଏହାର ନିର୍ଦ୍ଦେଶନା ମଧ୍ୟ ଦେବେ। ଏବେ ଏହାର ପ୍ରିପ୍ରଡକ୍ସନ କାମ ଚାଲିଛି। ୨୦୨୬ ଆରମ୍ଭରେ ଏହା ରିଲିଜ୍‌ ହୋଇପାରେ ବୋଲି କୁହାଯାଉଛି। ‘କୋଇ ମିଲଗୟା’ ରିଲିଜ୍‌ ହେବାର ୨୩ ବର୍ଷ ପରେ ‘କ୍ରିସ୍‌-୪’ ରିଲିଜ୍‌ ହେଉଛି।

ଦେଶୀ ଗାର୍ଲ ପ୍ରିୟଙ୍କା ଚୋପ୍ରା, ଗ୍ଲୋବାଲ୍ ଆଇକନ୍‌ ହେବା ରାସ୍ତା ଏତେଟା ସହଜ ନ ଥିଲା। ବଲିଉଡ୍‌ ପରେ ହଲିଉଡ୍‌ରେ ମଧ୍ୟ ପ୍ରିୟଙ୍କା ବେଶ୍ ନାମ କମାଇଛନ୍ତି। ହଲିଉଡ୍‌ରେ ବେଶ୍ ବଡ଼ ବଡ଼ ପ୍ରୋଜେକ୍ଟରେ ପ୍ରିୟଙ୍କା ଏବେ କାମ କରୁଛନ୍ତି। ଏବେ ତାଙ୍କର ପ୍ରଶଂସକମାନେ ପ୍ରିୟଙ୍କାଙ୍କ ବଲିଉଡ୍‌ ଫିଲ୍ମକୁ ଅପେକ୍ଷା କରିଛନ୍ତି। ତେବେ ସେ ବଲିଉଡ୍‌ ଅଭିନେତା ହ୍ରିତିକ୍‌ ରୋଶନଙ୍କ ସହ ପରଦାକୁ ଫେରିବେ ବୋଲି ନିକଟରେ ଏକ ରିପୋର୍ଟରେ ପ୍ରକାଶ ପାଇଛି।

ଅଭିନେତା ହ୍ରିତିକ୍‌ ରୋଶନ ଓ ପ୍ରିୟଙ୍କା ଚୋପ୍ରାଙ୍କ ଯୋଡ଼ି ବଲିଉଡ୍‌ର ଏକ ସଫଳ ଯୋଡ଼ି ଭାବେ ଗଣନା କରାଯାଏ। ଦୁହିଁଙ୍କ ଅଭିନୀତ ‘କ୍ରିସ୍‌’ ଓ ‘ଅଗ୍ନିପଥ’ ବକ୍ସ ଅଫିସ୍‌ରେ ଭଲ ବିଜିନେସ୍‌ କରିଥିଲା। ଏବେ ୧୦ ବର୍ଷ ପରେ ଏହି ଯୋଡ଼ିଙ୍କୁ ଏକାଠି ‘କ୍ରୀସ୍-୪’ରେ ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି। ପ୍ରିୟଙ୍କା ହ୍ରିତିକ୍‌ଙ୍କ ସହ ‘କ୍ରିସ୍’ ଓ ‘କ୍ରିସ୍-୩’ରେ ଏକାଠି ନଜର ଆସିଥିଲେ। ତେବେ ‘କ୍ରୀସ୍‌-୪’ରେ ପ୍ରିୟଙ୍କା କାମ କରିବେ କି ନାହିଁ, ତାହା ଏବେ ସୁଦ୍ଧା ଫିଲ୍ମର ପ୍ରଯୋଜକଙ୍କ ପକ୍ଷରୁ କିଛି କୁହାଯାଇ ନାହିଁ। ଫିଲ୍ମର କାହାଣୀ ଫାଇନାଲ ହୋଇଯାଇଛି। ହ୍ରିତିକ୍ ଏଥିରେ କାମ କରିବା ପାଇଁ ରାଜି ହୋଇଯାଇଛନ୍ତି। ଯଦି ପ୍ରିୟଙ୍କା ଏଥିରେ କାମ କରିବା ପାଇଁ ରାଜି ହୋଇଯାନ୍ତି ଫିଲ୍ମର ସୁଟିଂ ୨୦୨୪ ଫେବୃଆରୀରୁ ଆରମ୍ଭ ହେବ।

ବିରାଟ କୋହଲି ବିଶ୍ବର ସବୁଠୁ ଧନୀ କ୍ରିକେଟ୍ ଖେଳାଳି ଭାବେ ପରିଗଣିତ ହୁଅନ୍ତି। ସୋସିଆଲ ମିଡିଆରେ ମଧ୍ୟ ସେ ବେଶ୍ ସକ୍ରିୟ। ସୋସିଆଲ ମିଡିଆରେ ବିରାଟଙ୍କର ଲକ୍ଷ ଲକ୍ଷ ପ୍ରଶଂସକ ଅଛନ୍ତି। ନିକଟରେ କେଉଁ ସେଲିବ୍ରିଟି ତାଙ୍କର ଇନ୍‌ଷ୍ଟାଗ୍ରାମ ପୋଷ୍ଟ ପାଇଁ କେତେଟଙ୍କା ନିଅନ୍ତି ତା’ର ଏକ ତାଲିକା ପ୍ରକାଶ ପାଇଛି। ବିରାଟ ଏହି ତାଲିକାର ୧୯ ନମ୍ବର ସ୍ଥାନରେ ରହିଛନ୍ତି । ସେ ଗୋଟିଏ ପୋଷ୍ଟ ପାଇଁ ୫ କୋଟି ଟଙ୍କା ନେଉଛନ୍ତି। ଏହି ତାଲିକାରେ ବଲିଉଡ୍‌ର ଆଗଧାଡ଼ିର ନାୟିକା ପ୍ରିୟଙ୍କା ଚୋପ୍ରା ବିରାଟଙ୍କଠାରୁ ଯଥେଷ୍ଟ ପଛରେ ଅଛନ୍ତି। ଏହି ତାଲିକାରେ ପ୍ରିୟଙ୍କା ୨୭ ନମ୍ବର ସ୍ଥାନରେ ଅଛନ୍ତି। ସେ ଗୋଟିଏ ପୋଷ୍ଟ ପାଇଁ ୩ କୋଟି ଟଙ୍କା ନେଉଥିବା ପ୍ରକାଶ ପାଇଛି। ବିରାଟ ପ୍ରିୟଙ୍କାଙ୍କଠାରୁ ଗୋଟିଏ ପୋଷ୍ଟ ପାଇଁ ୨ କୋଟି ଟଙ୍କା ଅଧିକ ନେଉଛନ୍ତି। ଏହି ତାଲିକାରେ ପ୍ରଥମ ସ୍ଥାନରେ ଫୁଟବଲ୍‌ ଖେଳାଳି କ୍ରୀଷ୍ଟିଆନୋ ରୋନାଲ୍‌ଡୋ ରହିଛନ୍ତି। ରୋନାଲ୍ଡୋ ଗୋଟିଏ ଇନ୍‌ଷ୍ଟା ପୋଷ୍ଟ ପାଇଁ ପାଖାପାଖି ୧୨ କୋଟି ଟଙ୍କା ନେଇଥାନ୍ତି। ଲିଓନେଲ୍ ମେସି ଏହି ତାଲିକାରେ ସପ୍ତମ ସ୍ଥାନରେ ଅଛନ୍ତି। ସେ ଗୋଟିଏ ପୋଷ୍ଟ ପାଇଁ ୮ କୋଟି ୭୦ ଲକ୍ଷ ନିଅନ୍ତି। ବିରାଟ କୋହଲିଙ୍କର ଇନ୍‌ଷ୍ଟାଗ୍ରାମ୍‌ରେ ୧୩୨ ମିଲିଅନ୍‌ ଅନୁଗାମୀ ଅଛନ୍ତି।