ମେକ୍ସିକୋ ସିଟି: ଉତ୍ତର ଆମେରିକାରେ ଚାଲିଥିବା ଫିଫା ବିଶ୍ୱକପ୍‌ ୨୦୨୬ରେ ବୁଧବାର ରାତି ଓ ଗୁରୁବାର ଏକାଧିକ ରୋମାଞ୍ଚକର ମ୍ୟାଚ୍‌ ଦେଖିବାକୁ ମିଳିଛି। ଇଂଲଣ୍ଡ ଓ କଲୋମ୍ବିଆ ନିଜ ନିଜର ପ୍ରଥମ ମ୍ୟାଚ୍‌ରେ ବିଜୟୀ ହୋଇଥିବା ବେଳେ ଘାନା ଶେଷ ମୁହୂର୍ତ୍ତରେ ଗୋଲ୍‌ ଦେଇ ପାନାମାକୁ ପରାସ୍ତ କରିଛି। ଅନ୍ୟପଟେ କ୍ରିଷ୍ଟିଆନୋ ରୋନାଲ୍‌ଡୋଙ୍କ ପର୍ତ୍ତୁଗାଲ୍‌ କଙ୍ଗୋ ବିପକ୍ଷରେ ମ୍ୟାଚ୍‌ ଡ୍ର’ ରଖିବାକୁ ବାଧ୍ୟ ହୋଇ ଚମକହୀନ ପ୍ରଦର୍ଶନ କରିଛି। 

କଲୋମ୍ବିଆ ବନାମ ଉଜବେକିସ୍ତାନ (୩-୧): ମେକ୍ସିକୋ ସିଟିର ଏଷ୍ଟାଡିଓ ଆଜ୍‌ଟେକାଠାରେ ଖେଳାଯାଇଥିବା ଏହି ଗ୍ରୁପ୍‌ ‘କେ' ମ୍ୟାଚ୍‌ରେ କଲୋମ୍ବିଆ ୩-୧ ଗୋଲ୍‌ରେ ବିଶ୍ୱକପ୍‌ରେ ପଦାର୍ପଣ କରିଥିବା ଉଜବେକିସ୍ତାନକୁ ପରାସ୍ତ କରିଛି। କଲୋମ୍ବିଆ ପକ୍ଷରୁ ଡାନିଏଲ୍‌ ମୁନୋଜ୍‌, ଲୁଇସ୍‌ ଡିଆଜ୍‌ ଏବଂ ଜାମିଣ୍ଟନ କାମ୍ପାଜ୍‌ ଗୋଲ୍‌ କରିଥିଲେ। ଉଜବେକିସ୍ତାନ ପକ୍ଷରୁ ଏକମାତ୍ର ଗୋଲ୍‌ ଆବୋସବେକ ଫାୟଜୁଲାଭେଭ୍‌ ଦେଇଥିଲେ। ଏହି ବିଜୟ ସହ କଲୋମ୍ବିଆ ନିଜ ଗ୍ରୁପ୍‌ର ଶୀର୍ଷରେ ପହଞ୍ଚିଛି।

ଇଂଲଣ୍ଡ ବନାମ କ୍ରୋଏସିଆ (୪-୨): ଆମେରିକାର ଟେକ୍ସାସ ସ୍ଥିତ ଡାଲାସ୍‌ ଷ୍ଟାଡିୟମରେ ପ୍ରାୟ ୭୦,୦୦୦ ଦର୍ଶକଙ୍କ ସମ୍ମୁଖରେ ଇଂଲଣ୍ଡ ୪-୨ ଗୋଲ୍‌ରେ କ୍ରୋଏସିଆକୁ ପରାସ୍ତ କରି ଅଭିଯାନ ଆରମ୍ଭ କରିଛି। ଅଧିନାୟକ ହ୍ୟାରୀ କେନ୍‌ ଦୁଇଟି ଗୋଲ୍‌ ଦେଇଥିବା ବେଳେ ଜୁଡ୍‌ ବେଲିଂହାମ ଏବଂ ମାର୍କସ ରାଶଫୋର୍ଡ ଦ୍ୱିତୀୟାର୍ଦ୍ଧରେ ଗୋଲ୍‌ କରି ଦଳର ବିଜୟ ସୁନିଶ୍ଚିତ କରିଥିଲେ। କ୍ରୋଏସିଆ ପକ୍ଷରୁ ମାର୍ଟିନ ବାତୁରିନା ଓ ପେତାର ମୁସା ଗୋଲ୍‌ ପରିଶୋଧ କରିଥିଲେ ମଧ୍ୟ ଦଳକୁ ଜିତାଇ ପାରିନଥିଲେ।

ଘାନା ବନାମ ପାନାମା (୧-୦): ଗ୍ରୁପ୍‌ ‘ଏଲ୍‌'ର ଏକ ସଂଘର୍ଷପୂର୍ଣ୍ଣ ମ୍ୟାଚ୍‌ରେ ଘାନା ୧-୦ ଗୋଲ୍‌ରେ ପାନାମାକୁ ହରାଇଛି। ସମ୍ପୂର୍ଣ୍ଣ ମ୍ୟାଚ୍‌ ଗୋଲ୍‌ଶୂନ୍ୟ ରହିବା ପରେ ଅତିରିକ୍ତ ସମୟର (ଷ୍ଟପେଜ୍‌ ଟାଇମ୍‌) ୫ମ ମିନିଟ୍‌ରେ କାଲେବ ୟିରେନକି ଚମତ୍କାର ଗୋଲ୍‌ ଦେଇ ଦଳକୁ ଏକ ନାଟକୀୟ ବିଜୟ ଭେଟି ଦେଇଥିଲେ। ଘାନାର ଅଭିଜ୍ଞ ପ୍ରଶିକ୍ଷକ କାର୍ଲସ କୁଇରୋଜ୍‌ଙ୍କ ପାଇଁ ଏହା ଏକ ସ୍ମରଣୀୟ ମ୍ୟାଚ୍‌ ଥିଲା, କାରଣ ସେ ଲଗାତାର ୫ଟି ବିଶ୍ୱକପ୍‌ରେ ପ୍ରଶିକ୍ଷକ ସାଜିବାରେ ବିଶ୍ୱର ଦ୍ୱିତୀୟ ବ୍ୟକ୍ତି ହୋଇଛନ୍ତି।

ପର୍ତ୍ତୁଗାଲ ବନାମ କଙ୍ଗୋ (୧-୧): ଅନ୍ୟ ଏକ ଗୁରୁତ୍ୱପୂର୍ଣ୍ଣ ମ୍ୟାଚ୍‌ରେ ତାରକା ଫୁଟବଲର କ୍ରିଷ୍ଟିଆନୋ ରୋନାଲ୍‌ଡୋଙ୍କ ପର୍ତ୍ତୁଗାଲ ଦଳ ଡେମୋକ୍ରାଟିକ୍‌ ରିପବ୍ଲିକ ଅଫ୍‌ କଙ୍ଗୋ ବିପକ୍ଷରେ ୧-୧ ଗୋଲ୍‌ରେ ଡ୍ର’ ରଖି ପଏଣ୍ଟ ଭାଗ କରିଛି। ଏହି ମ୍ୟାଚ୍‌ରେ ରୋନାଲ୍‌ଡୋ ଗୋଲ୍‌ କରିବାରେ ବିଫଳ ହୋଇଥିଲେ। ବିଶ୍ୱକପ୍‌ର ପ୍ରଥମ କେତେକ ମ୍ୟାଚ୍‌ରୁ ହିଁ ଫୁଟବଲ୍‌ର ରୋମାଞ୍ଚ ଚରମ ସୀମାରେ ପହଞ୍ଚିଛି। ଇଂଲଣ୍ଡ ଓ କଲୋମ୍ବିଆ ଭଳି ଶକ୍ତିଶାଳୀ ଦଳଗୁଡ଼ିକ ବିଜୟ ସହ ଟ୍ରଫି ଦାବିଦାର ଭାବେ ନିଜର ସ୍ଥିତି ଜାହିର କରିଥିବା ବେଳେ ଉଜବେକିସ୍ତାନ ଓ ପାନାମା ଭଳି ଦଳ ଆଗାମୀ ମ୍ୟାଚ୍‌ଗୁଡ଼ିକରେ ବଡ଼ ଦଳକୁ କଡ଼ା ଟକ୍କର ଦେବାର ସଙ୍କତ ଦେଇଛନ୍ତି।