ଭୁବନେଶ୍ୱର: ଭିଜିଲାନ୍ସ ଜାଲରେ ଫରେଷ୍ଟର । ଲାଞ୍ଚ ନେଲାବେଳେ ପୁରୀ ଜିଲ୍ଲା ଡେଲାଙ୍ଗ ବନାଞ୍ଚଳ ଅଧୀନରେ ଥିବା ଆଙ୍କୋଇ ଫରେଷ୍ଟର ରାକେଶ କୁମାର ପଣ୍ଡାଙ୍କୁ ମାଡିବସିଲା ଭିଜିଲାନ୍ସ ବିଭାଗ । ଜଣେ ଟ୍ରାକ୍ଟର ମାଲିକଙ୍କଠାରୁ ୨୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ବିଭାଗ ତାଙ୍କୁ ରଙ୍ଗେହାତେ ଧରିଛି ।

ଅଭିଯୋଗ ଅନୁଯାୟୀ, ଫରେଷ୍ଟର ରାକେଶ ପଣ୍ଡା ଏକ ଟ୍ରାକ୍ଟର ମାଲିକଙ୍କୁ ଜଙ୍ଗଲ ରାସ୍ତା ଦେଇ ମାଟି ବୋହିବା ପାଇଁ ଅନୁମତି ଦେବା ବାବଦରେ ଏହି ଲାଞ୍ଚ ମାଗିଥିଲେ। ପୂର୍ବରୁ ବିନା ଅନୁମତିରେ ଜଙ୍ଗଲ ରାସ୍ତା ବ୍ୟବହାର କଲେ ଟ୍ରାକ୍ଟର ଜବତ କରାଯିବ ବୋଲି ରାକେଶ କୁମାର ପଣ୍ଡା ଧମକ ଦେଇଥିଲେ। କୌଣସି ବିକଳ୍ପ ନପାଇ ଟ୍ରାକ୍ଟର ମାଲିକ ଓଡ଼ିଶା ଭିଜିଲାନ୍ସ କର୍ତ୍ତୃପକ୍ଷଙ୍କ ଦ୍ୱାରସ୍ଥ ହୋଇଥିଲେ।

ଅଭିଯୋଗକୁ ଭିତ୍ତି କରି ଭିଜିଲାନ୍ସ ଟିମ୍ ଏକ ଯୋଜନା ପ୍ରସ୍ତୁତ କରିଥିଲା। ଆଜି ଫରେଷ୍ଟର ଜଣକ ଲାଞ୍ଚ ନେଉଥିବା ସମୟରେ ତାଙ୍କୁ ରଙ୍ଗେହାତେ ଧରାଯାଇଥିଲା। ତାଙ୍କ ନିକଟରୁ ସମସ୍ତ ୨୫,୦୦୦ ଟଙ୍କା ଉଦ୍ଧାର କରାଯାଇ ଜବତ କରାଯାଇଛି। ଏହା ପରେ ଆୟ ବହିର୍ଭୂତ ସମ୍ପତ୍ତି ବା ଡିଏ ଦିଗରୁ ଅଭିଯୁକ୍ତଙ୍କ ସହ ଜଡ଼ିତ ଦୁଇଟି ସ୍ଥାନରେ ଏକକାଳୀନ ଚଢ଼ାଉ ଜାରି ରହିଛି।