ମଧ୍ୟପ୍ରଦେଶର ଭୋପାଳରୁ ଏକ ଚକିତ କଲା ଭଳି ଘଟଣା ସାମ୍ନାକୁ ଆସିଛି। ଏଠାରେ ହଳଦୀ ଓ ବିବାହ ରୀତିନୀତି ଚାଲିଥିବା ବେଳେ ବିବାହ ମଣ୍ଡପରୁ ଆକାଶ ଓରଫ୍ ଭୁରା ହଡ୍ଡି ନାମକ ଜଣେ ଗ୍ୟାଙ୍ଗଷ୍ଟର ବରକୁ ପୋଲିସ ଗିରଫ କରିଛି। ବର ଗିରଫ ହେବା ପରେ, ହାତରେ ମେହେନ୍ଦୀ ଏବଂ ଦେହରେ ହଳଦୀ ଲଗାଇ କନ୍ୟା ସିଧାସଳଖ କୋହ-ଇ-ଫିଜା ପୋଲିସ ଷ୍ଟେସନରେ ପହଞ୍ଚିଥିଲେ ଏବଂ ପୋଲିସ ଅଧିକାରୀଙ୍କୁ ବିବାହ ସମ୍ପନ୍ନ କରିବା ପାଇଁ ଗୁହାରି କରିଥିଲେ।

ଥାନାରେ କନ୍ୟାଙ୍କ ହାଇଡ୍ରାମା

ବର ଗିରଫ ହେବା ପରେ କନ୍ୟା ଜଣକ କାନ୍ଦି କାନ୍ଦି ଥାନାରେ ପହଞ୍ଚିଥିଲେ। ସେ ପୋଲିସ ଆଗରେ ଗୁହାରି କରି କହିଥିଲେ ଯେ, "ସାର୍, ମୋର ଜୀବନ ବର୍ବାଦ ହୋଇଯିବ, ଏଥିରେ ମୋର କ'ଣ ଦୋଷ? ମୁଁ ତାଙ୍କ ଅପରାଧ ବିଷୟରେ କିଛି ଜାଣି ନଥିଲି। ଘରେ ଅତିଥିମାନେ ଅପେକ୍ଷା କରିଛନ୍ତି ଏବଂ ହଳଦୀ ସମେତ ଅନ୍ୟାନ୍ୟ ରୀତିନୀତି ସରିଯାଇଛି।" କନ୍ୟା ଜଣକ ପୋଲିସକୁ ଅନୁରୋଧ କରିଥିଲେ ଯେ, କେବଳ ୨ ଘଣ୍ଟା ପାଇଁ ତାଙ୍କୁ ଛାଡ଼ି ଦିଆଯାଉ ଯାହାଫଳରେ ବିବାହ ଶେଷ ହୋଇପାରିବ। ପୋଲିସ ଏଥିରେ ରାଜି ନହେବାରୁ, ସେ ଥାନା ଭିତରେ ହିଁ କଷ୍ଟଡିରେ ସାତଫେରା (ବିବାହ) କରାଇଦେବାକୁ ଦାବି କରିଥିଲେ। ତେବେ ଅପରାଧର ଗମ୍ଭୀରତାକୁ ଦୃଷ୍ଟିରେ ରଖି ପୋଲିସ ତାଙ୍କର କୌଣସି ଜିଦ୍ ଶୁଣି ନଥିଲା।

ପୂଜକଙ୍କୁ ଅପହରଣ ଓ ବ୍ଲାକମେଲିଂ

ପୋଲିସ ସୂଚନା ଅନୁଯାୟୀ, ଗ୍ୟାଙ୍ଗଷ୍ଟର ଆକାଶ ବିରୋଧରେ ହତ୍ୟା ଓ ଅପହରଣ ଭଳି ପ୍ରାୟ ୩୫ଟି ଅପରାଧିକ ମାମଲା ରହିଛି। ସେ ନିଜ ବିବାହ ପାଇଁ ଟଙ୍କା ଯୋଗାଡ଼ କରିବା ଉଦ୍ଦେଶ୍ୟରେ ଏକ ଭୟଙ୍କର ଷଡ଼ଯନ୍ତ୍ର ରଚିଥିଲା। ଆକାଶ ଏବଂ ତା'ର ଗ୍ୟାଙ୍ଗର ସଦସ୍ୟମାନେ ଜଣେ ମହିଳାଙ୍କ ଜରିଆରେ ୨୫ ବର୍ଷୀୟ ଜଣେ ପୂଜକଙ୍କୁ ହନିଟ୍ରାପ୍ କରି ଲାଲଘାଟି ଅଞ୍ଚଳରେ ଥିବା ଏକ ରୁମ୍‌କୁ ଡାକିଥିଲେ। ସେଠାରେ ସେମାନେ ପୂଜକଙ୍କୁ ଅପହରଣ କରିବା ସହ ଦୁଷ୍କର୍ମ ମାମଲାରେ ଫସାଇଦେବାର ଧମକ ଦେଇଥିଲେ। ଗ୍ୟାଙ୍ଗ୍ ପକ୍ଷରୁ ପୂଜକଙ୍କ ଭାଇଙ୍କଠାରୁ ପ୍ରଥମେ ଡରାଇ ଧମକାଇ ୫୦,୦୦୦ ଟଙ୍କା ଲୁଟି ନିଆଯାଇଥିଲା। ଏହା ପରେ ସେମାନେ ଆହୁରି ୮ ଲକ୍ଷ ଟଙ୍କା ଦାବି କରିଥିଲେ। ପୂଜକ ଜଣକ ମୁକୁଳିବା ପରେ ପୋଲିସରେ ଅଭିଯୋଗ କରିଥିଲେ।

ବିବାହ ମଣ୍ଡପରୁ ଗିରଫ

ପୂଜକଙ୍କ ଏଫଆଇଆର (FIR) ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା ଏବଂ ଜାଣିବାକୁ ପାଇଥିଲା ଯେ ଅଭିଯୁକ୍ତ ନିଜ ବିବାହରେ ବ୍ୟସ୍ତ ଅଛି। ବୁଧବାର ରାତିରେ ପୋଲିସର ଏକ ସ୍ୱତନ୍ତ୍ର ଟିମ୍ ବିବାହ ମଣ୍ଡପରେ ଚଢ଼ାଉ କରି ହଳଦୀ ରୀତିନୀତି ଚାଲିଥିବା ବେଳେ ଗ୍ୟାଙ୍ଗଷ୍ଟର ଆକାଶ ଓରଫ୍ ଭୁରା ହଡ୍ଡିକୁ ଗିରଫ କରିଥିଲା। ପୋଲିସ ଏହି ଘଟଣାରେ ଆକାଶ ସମେତ ଅନ୍ୟ ସହଯୋଗୀ ଆକାଶ ଉପାଧ୍ୟାୟ ଏବଂ ରାମ ଠାକୁରଙ୍କୁ ମଧ୍ୟ ଗିରଫ କରି କୋର୍ଟରେ ହାଜର କରିବା ପରେ ଜେଲ୍ ପଠାଇ ଦେଇଛି। ପୋଲିସର ଏହି ତ୍ୱରିତ କାର୍ଯ୍ୟାନୁଷ୍ଠାନ ଯୋଗୁଁ ଅପରାଧୀ ନିଜ ବିବାହ ମଣ୍ଡପରୁ ସିଧାସଳଖ ଜେଲ୍‌ର ଚାରି କାନ୍ଥ ଭିତରେ ପହଞ୍ଚିଛି।

ମଧ୍ୟପ୍ରଦେଶର ରାଜଧାନୀ ଭୋପାଳରେ ପୁଣି ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ଜଣେ ବ୍ୟୁଟିସିଆନ୍ ଯୁବତୀଙ୍କୁ 'ଲଭ୍ ଜିହାଦ୍' ଜାଲରେ ଫସାଇ ଦୁଷ୍କର୍ମ ଓ ଧର୍ମ ପରିବର୍ତ୍ତନ ପାଇଁ ଚାପ ପକାଯାଇଥିବା ଅଭିଯୋଗ ହୋଇଛି। ଏହି ଷଡଯନ୍ତ୍ରରେ ପୀଡ଼ିତାଙ୍କ ନିଜ ରୁମ୍ ପାର୍ଟନର ଅମରୀନ୍ ମୁଖ୍ୟ ଭୂମିକା ଗ୍ରହଣ କରିଥିବା ଜଣାପଡ଼ିଛି।

ବାନ୍ଧବୀ ସାଜି ବିଶ୍ୱାସଘାତକତା

ପୋଲିସ୍ ସୂଚନା ଅନୁଯାୟୀ, ଛତିଶଗଡ଼ର ଜଣେ ୩୦ ବର୍ଷୀୟା ବ୍ୟୁଟିସିଆନ୍ ଭୋପାଳରେ ରହି କାମ କରୁଥିଲେ। ଡିସେମ୍ବର ୨୦୨୪ରେ ଏକ ଜନ୍ମଦିନ ପାର୍ଟିରେ ତାଙ୍କର ଅମରୀନ୍ ଓରଫ୍ ମାହିରା ନାମକ ଜଣେ ଯୁବତୀଙ୍କ ସହ ବନ୍ଧୁତା ହୋଇଥିଲା। ପରେ ଉଭୟ ବାଗସେବନିଆ ଅଞ୍ଚଳରେ ଏକାଠି ରହିବା ଆରମ୍ଭ କରିଥିଲେ। ଅଭିଯୋଗ ଅନୁସାରେ, କିଛି ଦିନ ପରେ ଅମରୀନ୍ ପୀଡ଼ିତାଙ୍କ ଉପରେ ଇସଲାମ୍ ଧର୍ମ ଗ୍ରହଣ କରିବା ପାଇଁ ଚାପ ପକାଇବା ଆରମ୍ଭ କରିଦେଇଥିଲେ।

ନିଶା ଦେଇ ଦୁଷ୍କର୍ମ ଅଭିଯୋଗ

ନଭେମ୍ବର ୨୦୨୫ରେ ଅମରୀନ୍ ପୀଡ଼ିତାଙ୍କୁ ଗାନ୍ଧୀ ନଗର ସ୍ଥିତ ଆବାସ୍ ନଗରକୁ ନେଇଯାଇଥିଲେ। ସେଠାରେ ଅମରୀନ୍‌ଙ୍କ ଭାଇ ବିଲାଲ୍ ଚା’ରେ ନିଶା ଦ୍ରବ୍ୟ ମିଶାଇ ପୀଡ଼ିତାଙ୍କୁ ପିଇବାକୁ ଦେଇଥିଲେ। ଯୁବତୀ ଜଣକ ଅଚେତ ହୋଇପଡ଼ିବା ପରେ ବିଲାଲ୍ ତାଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ହୋଇଛି। କେବଳ ସେତିକି ନୁହେଁ, ଡିସେମ୍ବର ମାସରେ ଅମରୀନ୍ ତାଙ୍କୁ ଅହମ୍ମଦାବାଦ ନେଇଯାଇଥିଲେ, ଯେଉଁଠାରେ ୟାସିର୍ ନାମକ ଅନ୍ୟ ଜଣେ ଯୁବକ ମଧ୍ୟ ତାଙ୍କ ସହ ଦୁଷ୍କର୍ମ କରିଥିଲେ।

ପୋଲିସ୍ ତଦନ୍ତ ଆରମ୍ଭ

ପୀଡ଼ିତାଙ୍କ ଅଭିଯୋଗ କ୍ରମେ ବାଗସେବନିଆ ପୋଲିସ୍ ଏକ ମାମଲା ରୁଜୁ କରିଛି। ଏହି ମାମଲାରେ ଅମରୀନ୍, ବିଲାଲ୍, ୟାସିର୍ ଏବଂ ଚନ୍ଦନ ଯାଦବଙ୍କ ନାମରେ ଏଫ୍ଆଇଆର୍ (FIR) ଦାୟର କରାଯାଇଛି। ଘଟଣା ପରେ ସମସ୍ତ ଅଭିଯୁକ୍ତ ଫେରାର୍ ଥିବାବେଳେ ପୋଲିସ୍ ସେମାନଙ୍କୁ ଧରିବା ପାଇଁ ତଲାସି ଅଭିଯାନ ଜାରି ରଖିଛି।

ଭୋପାଳ: ମଧ୍ୟପ୍ରଦେଶର ରାଜଧାନୀ ଭୋପାଳ ସ୍ଥିତ ସତପୁରା ଭବନରେ ଭୟାବହ ଅଗ୍ନିକାଣ୍ଡ । ସତପୁରା ଭବନର ୩ୟ ମହଲାରେ ଭୟାବହ ଅଗ୍ନିକାଣ୍ଡ ଘଟିଥିବା ଜଣାପଡିଛି । ଏହି ବିଲ୍ଡିଂର ୩ୟ ମହଲାରେ ସ୍ୱାସ୍ଥ୍ୟ ବିଭାଗ ସମେତ ଅନେକ ସରକାରୀ ବିଭାଗର ଅଫିସ ବି ଅଛି। ତେଣୁ ଅଗ୍ନିକାଣ୍ଡରେ କାର୍ଯ୍ୟାଳୟରେ ରଖାଯାଇ ଥିବା ଅନେକ ପ୍ରମୁଖ କାଗଜପତ୍ର ଜଳି ପାଉଁଶ ହୋଇ ଯାଇଥିବା ସୂଚନା ମିଳିଛି । ତେବେ ନିଆଁ ଲାଗିବାର କାରଣ ଏବେ ବି ଅସ୍ପଷ୍ଟ ଥିବାବେଳେ ଏସିରେ ବ୍ଲାଷ୍ଟ ହେବା କାରଣରୁ ଏହି ନିଆଁ ଲାଗିଥିବା କିଛି ମିଡ଼ିଆ ରିପୋର୍ଟରେ କୁହାଯାଉଛି ।

ନୂଆଦିଲ୍ଲୀ: ଭୋପାଳ ଗ୍ୟାସ ଟ୍ରାଜେଡି ପୀଡ଼ିତଙ୍କୁ ଅତିରିକ୍ତ କ୍ଷତିପୂରଣ ପାଇଁ ଦାଏର ହୋଇଥିବା ପିଟିସନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି । ଏହି ଘଟଣାର ପୀଡିତଙ୍କୁ ମିଳିବନି ଅତିରିକ୍ତ ସହାୟତା । ସୁପ୍ରିମକୋର୍ଟରେ ୫ଜଣିଆ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ଏହା ଉପରେ ବିଚାର କରି ଏହି ନିଷ୍ପତ୍ତି ଶୁଣାଇଛନ୍ତି । । କେନ୍ଦ୍ର ସରକାରଙ୍କ ପକ୍ଷରୁ ଦାଏର ହୋଇଥିବା କ୍ୟୁରେଟିଭ୍ ଆବେଦନ ଉପରେ ଶୁଣାଣି କରି ଏପରି ନିଷ୍ପତ୍ତି ଶୁଣାଇଛନ୍ତି ।

ସୂଚନା ଅନୁସାରେ, ୧୯୮୪ ଭୋପାଳ ଗ୍ୟାସ ଦୁର୍ଘଟଣା ପୀଡ଼ିତଙ୍କ ପାଇଁ ଆମେରିକୀୟ କମ୍ପାନୀ ୟୁନିଅନ କାର୍ବାଇଡ (ବର୍ତ୍ତମାନ ‘ଡୋ କେମିକାଲ୍ସ’ ମାଲିକାନାରେ) ଠାରୁ ଅତିରିକ୍ତ କ୍ଷତିପୂରଣ ଦାବି କରି କେନ୍ଦ୍ର ସରକାର ୨୦୧୦ରେ ଏକ କ୍ୟୁରେଟିଭ୍ ପିଟିସନ ଦାୟର କରିଥିଲେ। ଏହି ଆବେଦନରେ ୟୁନିୟନ କାର୍ବାଇଡରୁ ପ୍ରାୟ ୭୮୦୦ କୋଟି ଟଙ୍କା ଅତିରିକ୍ତ କ୍ଷତିପୂରଣ ଦାବି କରାଯାଇଥିଲା। ତେବେ କେନ୍ଦ୍ରର ଏହି ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି ।

ସୂଚନାଯୋଗ୍ୟ, ୧୯୮୪ ଡିସେମ୍ବର ୪ ତାରିଖ ରାତିରେ ଭୋପାଳ ସ୍ଥିତ କାର୍ବାଇଡ୍ କମ୍ପାନୀରୁ ବିଷାକ୍ତ ମିଥାଇଲ ଆଇସୋସାଇନେଟ୍ ଗ୍ୟାସ୍ ଲିକ୍ ହୋଇ ଚାରିଆଡକୁ ବ୍ୟାପିଯାଇଥିଲା । ସେହି ସମୟରେ ରାତି ହୋଇଥିବାରୁ ଶୋଇଥିବା ଅବସ୍ଥାରେ ହିଁ ବିଷାକ୍ତ ଗ୍ୟାସ ଯୋଗୁଁ ପାଖାପାଖି ୧୬ ହଜାର ଲୋକଙ୍କ ମୃତ୍ୟୁ ହୋଇଥିଲା । ହଜାର ହଜାର ଲୋକ ବିକଳାଙ୍ଗ ମଧ୍ୟ ହୋଇଯାଇଥିଲେ ।

ଭୋପାଳ: ମଧ୍ୟପ୍ରଦେଶର ବେତୁଲରେ ଗୁରୁବାର ବିଳମ୍ବିତ ରାତିରେ ଏକ ବସ୍ ଓ ଟ୍ରାଭେରା ମଧ୍ୟରେ ଘଟିଛି ଭୟଙ୍କର ସଡ଼କ ଦୁର୍ଘଟଣା । ଦୁର୍ଘଟଣାରେ ଚାଲିଗଲା ୧୧ ଜଣଙ୍କ ଜୀବନ । ବେତୁଲର ପରତୱାଡା ଜାତୀୟ ରାଜପଥ ନିକଟରେ ଘଟିଛି ଏହି ମର୍ମନ୍ତୁଦ ଦୁର୍ଘଟଣା । ଏକ ବସ୍ ଏବଂ ଟ୍ରାଭେରା ମଧ୍ୟରେ ମୁହାଁମୁହିଁ ଧକ୍କା ହେବାରୁ ଟ୍ରାଭେରାରେ ଥିବା ୧୧ ଜଣ ଲୋକଙ୍କ ମୃତ୍ୟୁ ହୋଇଥିବାବେଳେ ଜଣେ ଆହତ ହୋଇଛନ୍ତି । ଚିକିତ୍ସା ନିମନ୍ତେ ଜଣେ ଆହତଙ୍କୁ ନିକଟତମ ଡାକ୍ତରଖାନାକୁ ନିଆଯାଇଛି।

ଦୁର୍ଘଟଣା ଏତେ ଭୟଙ୍କର ଥିଲା ଯେ ଟ୍ରାଭେରାକୁ କାଟି ମୃତଦେହ ବାହାର କରିବାକୁ ପଡ଼ିଥିଲା। ରାତି ପ୍ରାୟ ୨ ଟାରେ ଏହି ଦୁର୍ଘଟଣା ଘଟିଥିଲା । ଦ୍ରୁତ ଗତି ଲାଗି ଏଭଳି ଦୁର୍ଘଟଣା ଘଟିଥିବା କୁହାଯାଉଛି। ପୁଲିସ ଘଟଣାର ତଦନ୍ତ ଜାରି ରଖିଛି। ସୂଚନା ଅନୁସାରେ, ଦୁର୍ଘଟଣାର ଶିକାର ହୋଇଥିବା ଟ୍ରାଭେରାରେ ୧୧ଜଣ ଶ୍ରମଜୀବୀ ମହାରାଷ୍ଟ୍ରର ଅମରାବତୀରୁ ପ୍ରତ୍ୟାବର୍ତ୍ତନ କରୁଥିଲେ। ରାତି ପ୍ରାୟ ୨ଟା ବେଳେ ଘଟିଥିବା ଉକ୍ତ ଦୁର୍ଘଟଣାରେ ୬ଜଣ ପୁରୁଷ, ୩ଜଣ ମହିଳା, ୫ ବର୍ଷର ଜଣେ ଝିଅ ଏବଂ ଜଣେ ଶିଶୁର ଘଟଣାସ୍ଥଳରେ ମୃତ୍ୟୁ ଘଟିଛି।

ଭୋପାଳ: ଦେଶରେ ଝିଅଙ୍କ ବିବାହ ବୟସ ବୃଦ୍ଧି କରିବାକୁ କେନ୍ଦ୍ର ସରକାର ନିଷ୍ପତ୍ତି ନେବା ପରେ ବିବାହ (ନିକାହ) ସଂଖ୍ୟା ଦ୍ରୁତଗତିରେ ବଢ଼ିବାରେ ଲାଗିଛି। ମଧ୍ୟପ୍ରଦେଶର ଭୋପାଳ, ଗ୍ବାଲିୟର ଭଳି ୧୦ ସହରରେ ବିବାହ ସଂଖ୍ୟା ୪୨ରୁ ୭୦୦ ପ୍ରତିଶତକୁ ବୃଦ୍ଧି ପାଇଛି। ଅକ୍ଟୋବରରୁ ଡିସେମ୍ବର ମଧ୍ୟରେ ମସ୍‌ଜିଦ୍‌ରେ ହୋଇଥିବା ନିକାହ ତଥ୍ୟର ଯାଞ୍ଚ ପରେ ଏହି ଖୁଲାସା ହୋଇଛି। ରାୟସେନାରେ ନିକାହ ସଂଖ୍ୟା ସର୍ବାଧିକ ୭୦୦ ପ୍ରତିଶତ ବଢିଛି। ଭୋପାଳ ମସ୍‌ଜିଦ୍‌ କମିଟିର ସଚିବ ୟାସିର ଅରାଫାତ କହିଛନ୍ତି ଯେ ଡିସେମ୍ବର ଶେଷରେ ବିବାହ ପାଇଁ ପ୍ରାୟ ୧ ହଜାର ଆବେଦନ ଆସିଥିଲା। ଆଗାମୀ କିଛି ଦିନ ମଧ୍ୟରେ ବିବାହ କରିବାକୁ ଅଧିକାଂଶ ଦାବି କରିଛନ୍ତି। ଭୋପାଳରେ ଡିସେମ୍ବରରେ ୯୫୦ ନିକାହ ହୋଇଛି।

ଯୁବତୀଙ୍କ ବିବାହ ବୟସ ବୃଦ୍ଧି ଲାଗି ଆଇନ ଆଣିବା ଖବର ଯୋଗୁଁ ଏପରି ହୋଇଛି। ଏହା ବ୍ୟତୀତ କରୋନା କଟକଣା କଡ଼ାକଡି ହେବାର ମଧ୍ୟ ଆଶଙ୍କା ରହିଛି। ତେଣୁ ୨ ବର୍ଷ ପରେ ବିବାହ କରିବାକୁ ଚାହୁଁଥିବା ଲୋକେ ଆଗୁଆ କରିଦେଇଛନ୍ତି। ସୁଫି ଇସଲାମିକ ବୋର୍ଡର ରାଷ୍ଟ୍ରୀୟ ଅଧ୍ୟକ୍ଷ ହାଫିଜ ମହମ୍ମଦ ଦାନିଶ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିବାହ ବୟସ ଧାର୍ଯ୍ୟ କରିଦେଇଛନ୍ତି, ଏହାକୁ ଦେଖି ନିକାହ ସଂଖ୍ୟା ବୃଦ୍ଧି ପାଉଛି। ଲକ୍‌ଡାଉନ ମଧ୍ୟ ଏଥିପାଇଁ ଦାୟୀ।

ଭୋପାଳ: ବଲିଉଡ ଅଭିନେତ୍ରୀ ଅମିଶା ପଟେଲଙ୍କ ନାଁ’ରେ ଓ୍ବାରେଣ୍ଟି ଜାରି କରିଛି ଭୋପାଳ କୋର୍ଟ । ସୋମବାର ଅମିଶାଙ୍କ ବିରୋଧରେ ଏହି ଓ୍ବାରେଣ୍ଟ ଜାରି କରାଯାଇଛି । ଅମିଶା ପଟେଲଙ୍କ ବିପକ୍ଷରେ ଏକ ଚେକ୍ ବାଉନ୍ସ କେସ୍ ଚାଲୁଛି । ଯାହା ଫଳରେ ତାଙ୍କୁ ପରବର୍ତ୍ତୀ ଶୁଣାଣି ପାଇଁ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି ।

ଖବର ଅନୁଯାୟୀ, ଡିସେମ୍ବର ୪ରେ କୋର୍ଟରେ ହାଜିର ହେବାକୁ ଅମିଶାଙ୍କୁ ନିର୍ଦ୍ଦେଶ ଦିଆଯାଇଛି । ଅମିଶାଙ୍କ ବିପକ୍ଷରେ ଭୋପାଳ ଅଦାଲତରେ ୩୨.୨୫ ଲକ୍ଷ ଟଙ୍କାର ଚେକ୍ ବାଉନ୍ସର ମାମଲା ଚାଲୁଛି । ଅମିଶାଙ୍କ ବିପକ୍ଷରେ ୟ୍ୟୁଟିଏଫ ଟେଲିଫିଲ୍ମ୍ସ ପ୍ରାଇଭେଟ ଲିମିଟେଡ ଏହି ମାମଲା ଦାୟର କରିଛି । ତାଙ୍କ ଅଭିଯୋଗ ଅନୁଯାୟୀ ଅମିଶା ଫିଲ୍ମୀ ନିର୍ମାଣ କରିବା ପାଇଁ ତାଙ୍କଠାରୁ ଟଙ୍କା ଆଣିଥିଲେ । କିନ୍ତୁ ବଦଳରେ ଯେଉଁ ଦୁଇଟି ଚେକ୍ ଦେଇଥିଲେ ସେହି ଚେକ୍ ବାଉନ୍ସ ହୋଇଥିଲା ।

ଅନ୍ୟପକ୍ଷରେ ଯଦି ଅମିଶା ପଟେଲ ୪ ଡିସେମ୍ବରରେ କୋର୍ଟରେ ହାଜିର ହେବେ ନାହିଁ ତେବେ ତାଙ୍କ ବିପକ୍ଷରେ ଆରେଷ୍ଟ ଓ୍ବାରେଣ୍ଟ ଜାରି କରାଯିବ। ବିଗତ କିଛି ସମୟ ଧରି ଫିଲ୍ମ ଜଗତରୁ ଦୂରରେ ଥିଲେ ଅମିଶା ପଟେଲ । ତେବେ ଏବେ ପୁଣି ସେ ତାଙ୍କ ସୁପରହିଟ ଫିଲ୍ମୀ ‘ଗଦର’ର ସିକ୍ବେଲରେ ପୁଣି ଥରେ ସନ୍ନୀ ଦେଓଲଙ୍କ ସହ ନଜର ଆସିବେ । ଏହା ବ୍ୟତୀତ ଅର୍ଜୁନ ରାମପାଲ ଏବଂ ଡେଜୀ ଶାହାଙ୍କ ଫିଲ୍ମୀ ‘ମିଷ୍ଟ୍ରୀ ଅଫ୍ ଟାଟୁ’ରେ ନଜର ଆସିବେ ଅମିଶା ପଟେଲ ।

ଭୋପାଳ: ବିଷାକ୍ତ ତଥା ଅପମିଶ୍ରିତ ମଦ ବିକ୍ରି କରୁଥିବା ଲୋକଙ୍କୁ ଆଉ ତ୍ରାହି ନାହିଁ । ବିଷାକ୍ତ ମଦ ବିକ୍ରି କରୁଥିବା ଲୋକଙ୍କ ବିରୋଧରେ ମଧ୍ୟପ୍ରଦେଶ ସରକାର ନେଇଛନ୍ତି କଡ଼ା ଆଭିମୁଖ୍ୟ । ବିଷାକ୍ତ ମଦ ମୃତ୍ୟୁ ଘଟଣାରେ ମଧ୍ୟପ୍ରଦେଶରେ ଦଣ୍ଡବିଧାନ ଆହୁରି କଠୋର ହୋଇଛି । ସମ୍ପ୍ରତି ଏଭଳି ଘଟଣା ପାଇଁ ଅଭିଯୁକ୍ତକୁ ସର୍ବାଧିକ ୧୦ ବର୍ଷ ଜେଲ୍ ଦଣ୍ଡର ବ୍ୟବସ୍ଥା ଅଛି । ତେବେ ଏଣିକି ବିଷାକ୍ତ ମଦମୃତ୍ୟୁ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ କିମ୍ବା ମୃତ୍ୟୁଦଣ୍ଡ ଦିଆଯିବ।

ମଙ୍ଗଳବାର ଏ ସମ୍ପର୍କିତ ଏକ ପ୍ରସ୍ତାବକୁ ମଧ୍ୟ ପ୍ରଦେଶ ସରକାର ଅନୁମୋଦନ କରିଛନ୍ତି। ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ସଂଶୋଧିତ ବିଲ୍‌ର ଡ୍ରାଫ୍ଟକୁ ମଞ୍ଜୁରି ମିଳିଛି । ଏଥିରେ ବିଷାକ୍ତ ମଦ୍ୟପାନ କରି ମୃତ୍ୟୁ ଘଟଣାରେ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ କିମ୍ବା ମୃତ୍ୟୁଦଣ୍ଡ ଦିଆଯାଇପାରେ । ଜୋରିମାନା ପରିମାଣ ମଧ୍ୟ ୨୫ ଲକ୍ଷକୁ ବୃଦ୍ଧି କରାଯାଇଛି। ଏହାଛଡ଼ା ବେଆଇନ ମଦ ବିକ୍ରିକୁ ଧରିବାକୁ ଯାଉଥିବା ଅବକାରୀ ଟିମ୍ କିମ୍ବା ଅନ୍ୟ ଅନୁସନ୍ଧାନକାରୀ ଦଳ ଉପରେ ଆକ୍ରମଣ ମାମଲାରେ ବର୍ତ୍ତମାନ ତିନି ବର୍ଷ ପର୍ଯ୍ୟନ୍ତ ଦଣ୍ଡ ମିଳିବ।

ଭୋପାଳ : ସ୍କୁଲ ଫିକୁ ନେଇ ମଧ୍ୟପ୍ରଦେଶ ରାଜ୍ୟ ଶିକ୍ଷାମନ୍ତ୍ରୀ ଯେଉଁ ବୟାନ ଦେଇଛନ୍ତି ତାହା ଅନେକଙ୍କୁ ବିସ୍ମିତ କରିଛି। କରୋନା କାଳରେ ଅଧÒକାଂଶ ଲୋକ ନିଯୁକ୍ତି ହରାଇଥÒବା ବେଳେ ଅନେକ ଲୋକଙ୍କ ଆୟ ମଧ୍ୟ କମିଛି। ଏହାବ୍ୟତୀତ ଅଧÒକାଂଶ ଦିନ ଧରି ସ୍କୁଲ ବନ୍ଦ ରହିଛି। ଏହା ସତ୍ତ୍ବେ ବି ଅନେକ ସ୍କୁଲ ଅଭିଭାବକଙ୍କ ଠାରୁ ମୋଟା ଅଙ୍କର ଫି ଆଦାୟ କରୁଛନ୍ତି। ଏଭଳି ସମସ୍ୟାକୁ ନେଇ ମଧ୍ୟପ୍ରଦେଶର କିଛି ଅଭିଭାବକ ରାଜ୍ୟ ଶିକ୍ଷାମନ୍ତ୍ରୀଙ୍କ ନିକଟକୁ ଯାଇଥÒଲା ବେଳେ ଯଦି ସରକାର କିଛି ବ୍ୟବସ୍ଥା ନକରନ୍ତି ତେବେ ଆମେ ମରିଯିବୁ ବୋଲି କହିଥÒଲେ। ହେଲେ ମନ୍ତ୍ରୀ ସେମାନଙ୍କୁ କିଛି ଆଶାସ୍ବନା ଦେବା ପରିବର୍ତ୍ତେ ‘ ମରିବାର ଅଛି ତ ମରି ଯାଅ’ ବୋଲି ଅଭିଭାବକମାନଙ୍କୁ କହିବା ଘଟଣା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ମନ୍ତ୍ରୀଙ୍କ ଏଭଳି ଆଚରଣକୁ ନେଇ ବିରୋଧୀ କଂଗ୍ରେସ ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବି କରିଛି।