ମିଠା ଦୋକାନରେ ମିଳୁଥିବା ଜିଲାପି ସହିତ ଆମେ ସମସ୍ତେ ପରିଚିତ। କିନ୍ତୁ ଆପଣ କେବେ ଗଛରେ ଫଳୁଥିବା ଜିଲାପି ବିଷୟରେ ଶୁଣିଛନ୍ତି କି? ଏହାକୁ ଜଙ୍ଗଲ ଜିଲାପି କୁହାଯାଏ। ଏହା କେବଳ ସ୍ୱାଦିଷ୍ଟ ନୁହେଁ, ବରଂ ଏଥିରେ ଅନେକ ଔଷଧୀୟ ଗୁଣ ଭରି ରହିଛି। ଭାରତ ଏବଂ ଦକ୍ଷିଣ-ପୂର୍ବ ଏସିଆରେ ମିଳୁଥିବା ଏହି ଫଳଟି ଆକାରରେ ଜିଲାପି ପରି ବଙ୍କା ହୋଇଥିବାରୁ ଏହାକୁ ଜଙ୍ଗଲ ଜିଲାପି କୁହାଯାଏ।

ଏହି ଫଳକୁ ଦେଶର ବିଭିନ୍ନ ସ୍ଥାନରେ ଗଙ୍ଗା ତେନ୍ତୁଳି, ସିମ କୟାଁ, ମାଡ୍ରାସ ଥର୍ଣ୍ଣ କିମ୍ବା କିକର ଆଦି ନାମରେ ଜଣାଯାଏ। ଏହାର ସ୍ୱାଦ ଖଟା-ମିଠା ହୋଇଥାଏ। ଖରାଦିନେ ଏହାକୁ ଖାଇବା ଦ୍ୱାରା ଶରୀରକୁ ଥଣ୍ଡା ମିଳିଥାଏ। ଆୟୁର୍ବେଦରେ ଏହି ଫଳର ବିଶେଷ ମହତ୍ତ୍ୱ ରହିଛି। ଆସନ୍ତୁ ଜାଣିବା ଜଙ୍ଗଲ ଜିଲାପି ଖାଇଲେ କେଉଁ ସବୁ ସ୍ୱାସ୍ଥ୍ୟ ଲାଭ ମିଳିଥାଏ।

ପାଚନ କ୍ରିୟା ଏବଂ ରକ୍ତ ସଫା କରିବାରେ ସହାୟକ

ଜଙ୍ଗଲ ଜିଲାପି ଖାଇବା ଦ୍ୱାରା ହଜମ ପ୍ରକ୍ରିୟା କିମ୍ବା ପାଚନ କ୍ରିୟାରେ ଉନ୍ନତି ଆସିଥାଏ। ଏହା ସହିତ ଏହା ରକ୍ତକୁ ସଫା କରିବାରେ ମଧ୍ୟ ସାହାଯ୍ୟ କରିଥାଏ। ଏହି ଫଳର ମଞ୍ଜି ପେଟ ପାଇଁ ଅତ୍ୟନ୍ତ ଲାଭଦାୟକ ଅଟେ। ଏହା କୋଷ୍ଠକାଠିନ୍ୟ ଦୂର କରିବା ସହ ପେଟରେ ଥିବା କୃମି ନଷ୍ଟ କରିବାରେ ମହତ୍ତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ।

କାଶ ଏବଂ ଶ୍ୱାସରୋଗରେ ଉପକାରୀ

ଆୟୁର୍ବେଦିକ ଦୃଷ୍ଟିକୋଣରୁ ଜଙ୍ଗଲ ଜିଲାପିର ଅନେକ ମହତ୍ତ୍ୱ ରହିଛି। ଏହି ଫଳ କାଶ ଏବଂ ଦମା (ଆଜ୍‌ମା) ରୋଗୀଙ୍କ ପାଇଁ ବହୁତ ଲାଭଦାୟକ ହୋଇଥାଏ। ତରଳ ଝାଡ଼ା ଓ କାଶ ହେଉଥିଲେ ଏହାର ଛାଲିରୁ ପ୍ରସ୍ତୁତ କାଢ଼ା ଦିନକୁ ୨ ଥର ପିଇଲେ ଆରାମ ମିଳିଥାଏ।

ଦାନ୍ତ, ମାଢ଼ି ଏବଂ ଚର୍ମ ରୋଗ ପାଇଁ ରାମବାଣ

ଦାନ୍ତ ଏବଂ ମାଢ଼ି ଜନିତ ରୋଗରେ ଜଙ୍ଗଲ ଜିଲାପି ଗଛର ଛାଲି ଅତ୍ୟନ୍ତ ଉପଯୋଗୀ ସାବ୍ୟସ୍ତ ହୋଇଥାଏ। ସେହିପରି ଚର୍ମ ରୋଗ ଏବଂ ଶରୀରର ଫୁଲା କମାଇବା ପାଇଁ ଏହାର ପତ୍ରକୁ ଲେପ କିମ୍ବା କାଢ଼ା ରୂପରେ ବ୍ୟବହାର କରାଯାଇଥାଏ। ଏହାବ୍ୟତୀତ ଡାଇବେଟିସ୍ ବା ମଧୁମେହ ରୋଗୀଙ୍କ ପାଇଁ ମଧ୍ୟ ଏହା ଲାଭଦାୟକ ବୋଲି ବିବେଚନା କରାଯାଏ, କାରଣ ଏଥିରେ ପ୍ରଚୁର ମାତ୍ରାରେ ଭିଟାମିନ୍ ସି ରହିଛି ଯାହା ଆମ ରୋଗ ପ୍ରତିରୋଧକ ଶକ୍ତି ବୃଦ୍ଧି କରେ।

କିପରି କରିବେ ବ୍ୟବହାର?

ଜଙ୍ଗଲ ଜିଲାପିକୁ ଆପଣ କଞ୍ଚା ଖାଇପାରିବେ କିମ୍ବା ଏହାକୁ ଶୁଖାଇ ଗୁଣ୍ଡ କରି ମଧ୍ୟ ସେବନ କରିପାରିବେ। ଏହାର ମଞ୍ଜିରୁ ପ୍ରସ୍ତୁତ ଚୂର୍ଣ୍ଣକୁ ମହୁ ସହିତ ମିଶାଇ ଖାଇବା ସ୍ୱାସ୍ଥ୍ୟ ପାଇଁ ଲାଭଦାୟକ ହୋଇଥାଏ। ଗ୍ରାମାଞ୍ଚଳରେ ଏହାକୁ ପିଲାମାନଙ୍କର ପ୍ରାକୃତିକ ଟଫି ବୋଲି ମଧ୍ୟ କୁହାଯାଏ, ଯାହା ସ୍ୱାଦିଷ୍ଟ ହେବା ସହ ପେଟର ଗରମକୁ ଶାନ୍ତ କରିବାରେ ସାହାଯ୍ୟ କରେ।

ଦୀର୍ଘ ଦିନ ଧରି ଡାଇବେଟିସ୍, ଫ୍ୟାଟି ଲିଭର୍ ଏବଂ ହୃଦରୋଗ ପାଇଁ କେବଳ ଶରୀରର ଓଜନ ବା Body Weight କୁ ମୁଖ୍ୟ କାରଣ ଭାବେ ବିବେଚନା କରାଯାଉଥିଲା। ଲୋକମାନଙ୍କୁ ପ୍ରାୟତଃ ପରାମର୍ଶ ଦିଆଯାଏ ଯେ ଓଜନ କମାଇଲେ ଏହି ସମସ୍ୟାଗୁଡିକର ସମାଧାନ ହୋଇଯିବ। କିନ୍ତୁ ଆଧୁନିକ ଗବେଷଣାରୁ ଜଣାପଡିଛି ଯେ, ଏହା ପଛରେ ଅନ୍ୟ ଏକ ଗୁରୁତ୍ୱପୂର୍ଣ୍ଣ କାରଣ ରହିଛି, ଯାହା ହେଉଛି ‘କ୍ରନିକ୍ ଇନଫ୍ଲାମେସନ୍’ ବା ଶରୀର ଭିତରେ ସୃଷ୍ଟି ହେଉଥିବା ପ୍ରଦାହ। ଏହା ଏକ ନୀରବ ଘାତକ ଭଳି କାମ କରେ, ଯାହା ବାହାରକୁ ଅନୁଭବ ହୁଏ ନାହିଁ କିନ୍ତୁ ଧୀରେ ଧୀରେ ଶରୀରର ଚର୍ବି ସଂରକ୍ଷଣ ଏବଂ ରକ୍ତ ସଞ୍ଚାଳନ ପ୍ରକ୍ରିୟାକୁ କ୍ଷତି ପହଞ୍ଚାଇଥାଏ।

ଲିଭର୍, ବ୍ଲଡ୍ ସୁଗାର୍ ଏବଂ ହାର୍ଟ ମଧ୍ୟରେ ସମ୍ପର୍କ

ଡାକ୍ତରୀ ବିଜ୍ଞାନ ଅନୁଯାୟୀ, ଡାଇବେଟିସ୍, ଫ୍ୟାଟି ଲିଭର୍ ଏବଂ ହୃଦରୋଗ ପରସ୍ପର ସହ ଘନିଷ୍ଠ ଭାବେ ଜଡିତ। ଯେତେବେଳେ ଶରୀର ଆବଶ୍ୟକତାଠାରୁ ଅଧିକ ଶର୍କରା ଓ କ୍ୟାଲୋରୀ ଗ୍ରହଣ କରେ, Liver (ଯକୃତ) ଏହାକୁ ଚର୍ବିରେ ପରିଣତ କରେ। ସମୟକ୍ରମେ ଏହି ଚର୍ବି ଯକୃତ କୋଷରେ ଜମା ହୋଇ Fatty Liver ରୂପ ନିଏ। ଏକ ଫ୍ୟାଟି ଲିଭର୍ କେବଳ ଚର୍ବି ଜମା କରେ ନାହିଁ, ବରଂ ଶରୀରରେ ଇନଫ୍ଲାମେସନ୍ ସୃଷ୍ଟି କରୁଥିବା ରାସାୟନିକ ସଙ୍କେତ ମଧ୍ୟ ଛାଡିଥାଏ। ଫଳରେ ଇନସୁଲିନ୍ ଠିକ୍ ଭାବେ କାମ କରେ ନାହିଁ ଏବଂ ରକ୍ତରେ ଶର୍କରା ବଢିବା ସହ ଧମନୀ ଗୁଡିକ ଦୁର୍ବଳ ହୋଇ ହୃଦରୋଗ ଆଶଙ୍କା ସୃଷ୍ଟି ହୁଏ।

ଖାଦ୍ୟପେୟ ଓ ଜୀବନଶୈଳୀର ପ୍ରଭାବ

ଆମର ଖାଦ୍ୟପେୟ ଇନଫ୍ଲାମେସନ୍ ସ୍ତରକୁ ପ୍ରଭାବିତ କରିଥାଏ। ଅତ୍ୟଧିକ ପ୍ରକ୍ରିୟାକୃତ ଖାଦ୍ୟ, ଚିନି, ମଇଦା ଜାତୀୟ ଖାଦ୍ୟ ଏବଂ ମିଠା ପାନୀୟ ଶରୀରରେ ଇନଫ୍ଲାମେସନ୍ ବଢାଇଥାଏ। ଅପରପକ୍ଷରେ, ସବୁଜ ପନିପରିବା, ଡାଲି ଜାତୀୟ ଶସ୍ୟ, ବାଦାମ ଏବଂ ସୁସ୍ଥ ଚର୍ବି (Healthy Fats) ଯୁକ୍ତ ଖାଦ୍ୟ ଶରୀରକୁ ସୁସ୍ଥ ରଖିବାରେ ସାହାଯ୍ୟ କରେ। ଏକ ଗୁରୁତ୍ୱପୂର୍ଣ୍ଣ କଥା ହେଉଛି, କେବଳ ମୋଟାପଣ ଥିବା ଲୋକଙ୍କୁ ଯେ ଏହି ରୋଗ ହୁଏ ତାହା ନୁହେଁ। ଦକ୍ଷିଣ ଏସିଆର ଅନେକ ଲୋକଙ୍କର ଓଜନ ସ୍ୱାଭାବିକ ଥିଲେ ମଧ୍ୟ ସେମାନେ Metabolic Health ସମସ୍ୟାର ଶିକାର ହେଉଛନ୍ତି।

ସୁସ୍ଥ ରହିବାର ସହଜ ଉପାୟ

କେବଳ ଓଜନ କମାଇବା ଉପରେ ଧ୍ୟାନ ନ ଦେଇ ଜୀବନଶୈଳୀରେ କିଛି ଛୋଟ ପରିବର୍ତ୍ତନ ଆଣିବା ଜରୁରୀ। ଏଥିପାଇଁ ଖାଦ୍ୟରେ ଉତ୍ତମ ମାନର Protein (ଯେପରିକି ଡାଲି, ଅଣ୍ଡା, ସୋୟାବିନ୍) ସାମିଲ କରନ୍ତୁ। ମଇଦା ଓ ଚିନି ଜାତୀୟ ଖାଦ୍ୟ କମ କରନ୍ତୁ ଏବଂ ପ୍ରଚୁର ପରିମାଣରେ ଫାଇବର ଯୁକ୍ତ ଖାଦ୍ୟ ଖାଆନ୍ତୁ। ଏହା ସହିତ ନିୟମିତ ବ୍ୟାୟାମ, ପର୍ଯ୍ୟାପ୍ତ ନିଦ୍ରା ଏବଂ ମାନସିକ ଚାପ ନିୟନ୍ତ୍ରଣ କରିବା ଦ୍ୱାରା ଶରୀରର ମେଟାବୋଲିଜିମ୍ ସୁସ୍ଥ ରହିପାରିବ।

ନୂଆଦିଲ୍ଲୀ: ବର୍ତ୍ତମାନର ବ୍ୟସ୍ତ ବହୁଳ ଜୀବନରେ ଆପଣ କ’ଣ  କ୍ଳାନ୍ତ ଅନୁଭବ କରୁଛନ୍ତି? ଚାପ ଆପଣଙ୍କ ଜୀବନର ଏକ ଅଂଶ ପାଲଟିଛି କି ? ଯଦି ହଁ, ତେବେ ଆପଣ ଏକା ନୁହଁନ୍ତି। ସଙ୍କଟରେ ଏବେ ଭାରତର ଜେନ୍‌ ଜେଡ୍‌ଙ୍କ ସ୍ୱାସ୍ଥ୍ୟବସ୍ଥା। ଦେଶର ପ୍ରମୁଖ ବୀମା କମ୍ପାନୀ ଆଇସିଆଇସିଆଇ ଲୋମ୍ବାର୍ଡ ସମ୍ପ୍ରତି ଏକ ଆଶ୍ଚର୍ଯ୍ୟଜନକ ପରିସଂଖ୍ୟାନ ସହିତ ଏକ ରିପୋର୍ଟ ପ୍ରକାଶ କରିଛି। ବିଶ୍ୱ ମଧୁମେହ ଦିବସ ଅବସରରେ ପ୍ରକାଶିତ ଏହି ରିପୋର୍ଟ କେବଳ ଭାରତୀୟଙ୍କ ଅବନତିଶୀଳ ସ୍ୱାସ୍ଥ୍ୟ ବିଷୟରେ ଅନ୍ଧକାର ସତ୍ୟ ପ୍ରକାଶ କରେ ନାହିଁ, ବରଂ ଏହା ମଧ୍ୟ ପ୍ରକାଶ କରେ ଯେ ଭାରତରେ ପ୍ରତି ୬ଜଣରେ ଜଣେ ବର୍ତ୍ତମାନ ମଧୁମେହ ରୋଗରେ ପୀଡିତ। ଆଇସିଆଇସିଆଇ ଲୋମ୍ବାର୍ଡର ଇଣ୍ଡିଆ ୱେଲନେସ୍ ଇଣ୍ଡେକ୍ସ ୨୦୨୫ ଅନୁଯାୟୀ, ଚାପ, ଗଣ୍ଠି ଯନ୍ତ୍ରଣା ଏବଂ ଉଚ୍ଚ ରକ୍ତଚାପ ପରେ ମଧୁମେହ ଦେଶର ଶ୍ରେଷ୍ଠ ୫ଟି ରୋଗ ମଧ୍ୟରୁ ଗୋଟିଏ ହୋଇଗଲାଣି। 

ଏହି ରିପୋର୍ଟ ଦେଶର ୧୯ଟି ପ୍ରମୁଖ ସହରର ୨୦୦୦ ଲୋକଙ୍କ ଉପରେ କରାଯାଇଥିବା ଏକ ସର୍ଭେ ଉପରେ ଆଧାରିତ। ଏଥିରେ ସବୁଠାରୁ ଚିନ୍ତାଜନକ କଥା ହେଉଛି ଏହି ରୋଗ ଆଉ କେବଳ ବୟସ୍କ ଲୋକଙ୍କ ମଧ୍ୟରେ ସୀମିତ ନୁହେଁ। ମିଲେନିୟାଲ୍ସ ଏବଂ କର୍ପୋରେଟ୍ କର୍ମଚାରୀଙ୍କ ମଧ୍ୟରେ ମଧ୍ୟ ଏହାର ପ୍ରକୋପ ଦ୍ରୁତ ଗତିରେ ବୃଦ୍ଧି ପାଉଛି। ଏହାର ମୁଖ୍ୟ କାରଣ ହେଉଛି ଆମେ ସମସ୍ତେ ସମ୍ମୁଖୀନ ହେଉଥିବା ସମାନ - ଖରାପ ଖାଦ୍ୟ, ଶାରୀରିକ ନିଷ୍କ୍ରିୟତା ଏବଂ ଅତ୍ୟଧିକ ଚାପ। ରିପୋର୍ଟରେ ସ୍ପଷ୍ଟ ଭାବରେ କୁହାଯାଇଛି ଯେ ହୃଦରୋଗ କିମ୍ବା ମଧୁମେହ ଥିବା ଲୋକଙ୍କର ସାଧାରଣ ଜନସଂଖ୍ୟା (୭୯) ତୁଳନାରେ ଯଥେଷ୍ଟ କମ୍ ସୁସ୍ଥତା ସ୍କୋର (୭୦) ଥାଏ। ପ୍ରାୟତଃ ଏହା ଅନୁମାନ କରାଯାଏ ଯେ ଯୁବପିଢ଼ିର ଅର୍ଥ ପ୍ରଚୁର ଶକ୍ତି, କିନ୍ତୁ ଏହି ରିପୋର୍ଟ ଏକ ଭିନ୍ନ କାହାଣୀ କୁହେ। ଭାରତର ଯୁବପିଢ଼ି ଜେନ୍‌ ଜେଡ୍‌ଙ୍କ ସ୍ୱାସ୍ଥ୍ୟରେ ଏକ ଗୁରୁତ୍ୱପୂର୍ଣ୍ଣ ହ୍ରାସ ଦେଖିବାକୁ ମିଳିଛି। ରିପୋର୍ଟ ଅନୁଯାୟୀ, ଏହି ପିଢ଼ି ଶାରୀରିକ, ମାନସିକ ଏବଂ ସାମାଜିକ ପ୍ରତ୍ୟେକ କ୍ଷେତ୍ରରେ ପଛରେ ପଡ଼ିଛି। ଟାୟାର-୧ ସହରରେ ରହୁଥିବା ଯୁବପିଢ଼ି ବିଶେଷ ଭାବରେ ଦୁର୍ବଳ। ଅନ୍ୟପକ୍ଷରେ, କର୍ପୋରେଟ୍ ଜଗତରେ ପରିସ୍ଥିତି ଆହୁରି ଭୟଙ୍କର। ସର୍ଭେରେ ସାମିଲ ହୋଇଥିବା ପ୍ରତି ତିନି ଜଣଙ୍କ ମଧ୍ୟରୁ ଜଣେ ସ୍ୱୀକାର କରିଛନ୍ତି ଯେ ସେମାନେ ଦୈନନ୍ଦିନ ଚାପ ଅନୁଭବ କରୁଛନ୍ତି, ଯେତେବେଳେ ୪୧% ଲୋକ ନିରନ୍ତର କ୍ଳାନ୍ତ ଅନୁଭବ କରୁଛନ୍ତି। ଅଫିସ୍ କର୍ମଚାରୀଙ୍କ ଶାରୀରିକ ସ୍ୱାସ୍ଥ୍ୟ ସାଧାରଣ ଲୋକଙ୍କ ତୁଳନାରେ ବହୁତ ଖରାପ। କାର୍ଯ୍ୟ-ଜୀବନ ସନ୍ତୁଳନର ଅଭାବ, ଜ୍ୱଳନ ଏବଂ ପରିବାରକୁ ସମୟ ଦେଇ ନ ପାରିବା ପାଇଁ ଦୋଷୀ ପ୍ରାୟ ଦୁଇ-ତୃତୀୟାଂଶ କର୍ମଚାରୀଙ୍କୁ ଗ୍ରାସ କରୁଛି। ତଥାପି, ଭଲ ଖବର ହେଉଛି ଯେ ଜେନେରେସନ୍ ଏକ୍ସ ଏବଂ ମହିଳାମାନେ ସେମାନଙ୍କ ସ୍ୱାସ୍ଥ୍ୟ, ଆର୍ଥିକ ବୁଝାମଣା ଏବଂ କର୍ମକ୍ଷେତ୍ର ସନ୍ତୁଳନରେ ଉନ୍ନତି ଦେଖାଇଛନ୍ତି। 

ପାଣି ପିଇବା ଲାଗି ପ୍ଲାଷ୍ଟିକ୍‌ ବୋତଲର ବ୍ୟବହାର କିଛି ବର୍ଷ ହେଲା ବଢ଼ିଯାଇଛି। ଏହି ଅଭ୍ୟାସ କେବଳ ପରିବେଶ ପାଇଁ କ୍ଷତିକାରକ ନୁହେଁ, ଏହା ସ୍ୱାସ୍ଥ୍ୟ ଉପରେ ମଧ୍ୟ ନକାରାତ୍ମକ ପ୍ରଭାବ ପକାଏ। ନିକଟରେ ହୋଇଥିବା ଏକ ଅଧ୍ୟୟନ ଅନୁଯାୟୀ, ପ୍ଲାଷ୍ଟିକ୍ ବୋତଲ ପାଣି ପିଇବା ଦ୍ବାରା ମଧୁମେହ ହେବା ଆଶଙ୍କା ବୃଦ୍ଧି ପାଇଥାଏ। ଆମେରିକା ଡାଇବେଟିସ୍‌ ଆସୋସିଏସନ୍‌ର ଏକ ସଦ୍ୟ ଅଧ୍ୟୟନ ଅନୁଯାୟୀ, ‘ବିପିଏ’ ବା ‘ବିସ୍ଫେନଲ ଏ’ ଖାଦ୍ୟ ତଥା ପାନୀୟ ପ୍ୟାକେଜିଂରେ ଅଧିକ ମାତ୍ରାରେ ବ୍ୟବହୃତ ହୋଇଥାଏ। ତେବେ ପ୍ଲାଷ୍ଟିକ୍‌ରେ ବ୍ୟବହୃତ ଏହି ବିପିଏ ଇନ୍‌ସୁଲିନ୍‌କୁ ହ୍ରାସ କରିଥାଏ। ଯାହାର ଫଳସ୍ବରୂପ ଟାଇପ-୨ ମଧୁମେହ ରୋଗ ଆଶଙ୍କା ବୃଦ୍ଧି ହୋଇଥାଏ।

ତେବେ ଫୁଡ୍‌ ଡ୍ରଗ୍‌ ଆଡମିନିଷ୍ଟ୍ରେସନର ରିପୋର୍ଟ ଅନୁଯାୟୀ, ଖାଦ୍ୟ, ପାନୀୟ ପାତ୍ର ପ୍ରସ୍ତୁତିରେ ୫ ମିଲିଗ୍ରାମ ବିପିଏ ବ୍ୟବହାରକୁ ସୁରକ୍ଷିତ ମଣାଯାଏ। କିନ୍ତୁ ନୂତନ ଅଧ୍ୟୟନ ଅନୁଯାୟୀ, ବର୍ତ୍ତମାନ ଏହାର ମାତ୍ରା ବିପଦଜ୍ଜନକ ଭାବେ ବୃଦ୍ଧି ହେବାରେ ଲାଗିଛି। ତେଣୁ ବିଶେଷଜ୍ଞମାନେ ୨୦୨୪ର ଶେଷଆଡ଼କୁ ଖାଦ୍ୟ ତଥା ପାନୀୟ ସଂସ୍ପର୍ଶରେ ଆସୁଥିବା ଏହି ବିପିଏକୁ ନିଷେଧ କରିବାପାଇଁ ଦାବି କରିଛନ୍ତି। ଏହି ଅଧ୍ୟୟନର ନିଷ୍କର୍ଷ ଅନୁସାରେ, ଏହି ବିପିଏ ପରିମାଣକୁ ହ୍ରାସ କରିବାପାଇଁ ଷ୍ଟେନଲେସ ଫ୍ରି, କାଚବୋତଲ, କିମ୍ବା ବିପିଏ ମୁକ୍ତ କଣ୍ଟେନର ବ୍ୟବହାର କରି ମଧୁମେହ ରୋଗକୁ ରୋକା ଯାଇପାରିବ। ତେବେ ବିପିଏ ବା ବିସ୍ଫୋନେଲ ପ୍ଲାଷ୍ଟିକ୍‌ ତଥା ଖାଦ୍ୟ କଣ୍ଟେନରରେ ବ୍ୟବହାର କରାଯାଇଥାଏ।

ଭୁବନେଶ୍ୱର(ବିଶ୍ୱଜିତ୍‌‌, ସତ୍ୟବ୍ରତ): କେବଳ ଭାରତ ନୁହେଁ; ସାରାବିଶ୍ୱରେ ମଧୁମେହ ରୋଗୀଙ୍କ ସଂଖ୍ୟା ଧୀରେ ଧୀରେ ବଢ଼଼ିବାରେ ଲାଗିଛି। ଆଗରୁ ବୟସ୍କ ଲୋକଙ୍କ ନିକଟରେ ଦେଖା ଯାଉଥିବାବେଳେ ଏବେ ଆବାଳବୃଦ୍ଧବନିତା ଏଥିରେ ଆକ୍ରାନ୍ତ ହେଉଛନ୍ତି। ଏହାର ମୁଖ୍ୟ କାରଣ ହେଲା ବଂଶାନୁଗତ, ଅନିୟମିତ ଜୀବନଶୈଳୀ ଓ ଅସନ୍ତୁଳିତ ଖାଦ୍ୟପେୟ। ଯଦି ଶରୀରରେ ରକ୍ତ ଶର୍କରା ଅତ୍ୟଧିକ ବୃଦ୍ଧି ପାଉଥାଏ, ତେବେ ମଧୁମେହ ହୋଇଥିବା ଆଶଙ୍କା କରାଯାଏ। ଦୀର୍ଘ ସମୟ ଧରି ରକ୍ତ ଶର୍କରାସ୍ତର ଅଧିକ ରହିଲେ, ଏହା ଆଖି ଉପରେ ଗଭୀର ପ୍ରଭାବ ପକାଇଥାଏ। ଶର୍କରା ବୃଦ୍ଧି ଯୋଗୁଁ ବୃକକ୍‌‌, ହୃତ୍‌‌ପିଣ୍ଡ, ଚକ୍ଷୁ, ସ୍ନାୟୁ ଆଦି ଶରୀରର ଅନେକାଂଶକୁ ରୋଗଗ୍ରସ୍ତ କରିଥାଏ। ଫଳରେ ଏହିସବୁ ଅଂଶ ଦୁର୍ବଳ ହୋଇପଡ଼େ ଏବଂ କାର୍ଯ୍ୟ କରିବାର ଶକ୍ତି ହ୍ରାସ ହୁଏ। ଅନିୟନ୍ତ୍ରିତ ମଧୁମେହ ଭୟଙ୍କର ଓ ସ୍ଥଳ ବିଶେଷରେ ପ୍ରାଣଘାତୀ ମଧ୍ୟ ହୋଇଥାଏ। ତେଣୁ ତା’ର ସମୟପୋଯୋଗୀ ଉପଚାର ଅତ୍ୟନ୍ତ ଆବଶ୍ୟକ।

ଔଷଧ ଉପଚାର
ମଧୁମେୟ ରୋଗରେ ରକ୍ତ ଶର୍କରା, ଗ୍ଲାଇକୋ ସିଲେଟେଡ୍‌‌ ହିମୋଗ୍ଲୋବିନ୍‌‌ ଉଚ୍ଚ ରକ୍ତଚାପ ନିୟନ୍ତ୍ରଣ କରି ସୁସ୍ଥ ମାତ୍ରାରେ ରହିବା ସର୍ବାଦା ଆବଶ୍ୟକ। ସେଥିପାଇଁ ବ୍ୟବହୃତ ହେଉଥିବା ଔଷଧଗୁଡ଼ିକ ହେଲା – ଇନ୍‌‌ସୁଲିନ, ମେଟ୍‌‌ଫରମିନ୍‌‌, ସଲେ୍‌‌ଫାନିଲ ୟୁରିଆ, ଡିପିପିଫୋର୍‌‌ ଇନ୍‌‌ହିବିଟର୍‌‌, ଇନ୍‌‌କ୍ରିଟିନ୍‌‌।

ଇନ୍‌‌ସୁଲିନ୍‌‌ କ’ଣ ?
୧୯୨୧ ମସିହାରେ ଡକ୍ଟର ବ୍ୟାଣ୍ଟିଙ୍ଗ୍‌‌ ଏବଂ ଡକ୍ଟର ବେଷ୍ଟ ଇନ୍‌‌ସୁଲିନ୍‌‌ ଆବିଷ୍କାର କରିଥିଲେ ଏବଂ ଏହି ଯୁଗାନ୍ତକାରୀ ଆବିଷ୍କାର ପାଇଁ ୧୯୨୩ ମସିହାରେ ଉଭୟ ଡକ୍ଟର ନୋବେଲ୍‌‌ ପୁରସ୍କାର ପାଇବା ପାଇଁ ଯୋଗ୍ୟ ବିବେଚିତ ହୋଇଥିଲେ। ଏହି ଆବିଷ୍କାର ପାଇଁ କୋଟି କୋଟି ଡାଇବେଟିସ୍‌‌ ରୋଗୀ ନିଶ୍ଚିତ ମୃତ୍ୟୁମୁଖରୁ ରକ୍ଷା ପାଉଛନ୍ତି। ଟାଇପ୍‌‌ -୧ ଡାଇବେଟିସ୍‌‌ ରୋଗୀ ସମସ୍ତେ ଇନ୍‌‌ସୁଲିନ ଇଞ୍ଜେକସନ୍‌‌ ଦ୍ୱାରା ଚିକିତ୍ସିତ ହୁଅନ୍ତି ଏବଂ ସମସ୍ତ ଜଟିଳ ଟାଇପ୍‌‌-୨ ଡାଇବେଟିସ୍‌‌ ରୋଗୀ ମଧ୍ୟ ଇନ୍‌‌ସୁଲିନ୍‌‌ ଦ୍ୱାରା ଚିକିତ୍ସିତ ହୁଅନ୍ତି।

ବିନା ଇନ୍‌‌ସୁଲିନ୍‌‌ରେ ନିୟନ୍ତ୍ରଣ
ଇନ୍‌‌ସୁଲିନ୍‌‌ ହେଉଛି ଏକ ହର୍ମୋନ୍‌‌। ପାଚନଗ୍ରନ୍ଥୀରୁ ଏହା ଉତ୍ପନ୍ନ ହୋଇଥାଏ। ଏହା ପୂର୍ବରୁ ମଧୁମେହ ରୋଗୀଙ୍କ ଚିକିତ୍ସା ପାଇଁ ଅଧିକ ସୁବିଧା ନ ଥିଲା। ଇନ୍‌‌ସୁଲିନର ଆବିଷ୍କାର ପରେ ମଧୁମେହ ପୀଡ଼ିତଙ୍କ ପାଇଁ ଏହା ଜୀବନଦାୟୀ ଔଷଧ ଭାବେ କାର୍ଯ୍ୟ କରୁଛି। ମଧୁମେହ ପୀଡ଼ିତ ବ୍ୟକ୍ତିଙ୍କୁ ଇନସୁଲିନ୍‌‌ ଜୀବନ ବଞ୍ଚାଇବା ପାଇଁ ସାହାଯ୍ୟ କରିଥାଏ। ଯଦି ଡାଇବେଟିସ୍‌‌ ପୀଡ଼ିତ ବ୍ୟକ୍ତି ଖାଦ୍ୟପେୟ ପ୍ରତି ସତର୍କତା ଅବଲମ୍ୱନ କରିବା ସହିତ ନିର୍ଦ୍ଧାରିତ ମାତ୍ରାର ଇନସୁଲିନ୍‌‌ ଇଞ୍ଜେକସନ୍‌‌ ନିଅନ୍ତି, ତେବେ ମଧୁମେହକୁ ନିୟନ୍ତ୍ରିତ କରାଯାଇପାରେ। ରକ୍ତରେ ଶର୍କରାର ସ୍ତର ଅଧିକ କମିଗଲେ, ତାହାକୁ ହାଇପୋଗ୍ଲାଇସେମିଆ କୁହାଯାଏ। ଯଦି ଶରୀରରେ ଶର୍କରାସ୍ତର ନିୟନ୍ତ୍ରଣ ନ ରୁହେ, ତେବେ ମୁଣ୍ଡ ବୁଲାଇବା, ଦେହ ଥରିବା, ଦେହରୁ ଝାଳ ନିର୍ଗତ ହେବା, ଅଧିକ ଭୋକ ଲାଗିବା ପରି ସମସ୍ୟା ଦେଖାଦେଇଥାଏ। ତେଣୁ ଶରୀରରେ ରକ୍ତ ଶର୍କରା ସ୍ତରକୁ ନିୟନ୍ତ୍ରିତ କରିବା ପାଇଁ ଇନସୁଲିନ୍‌‌ ଇଞ୍ଜେକସନ୍‌‌ ବ୍ୟବହାର କରାଯାଏ।

ଇନ୍‌ସୁଲିନକୁ ନା’
ଔଷଧ ଦ୍ୱାରା ଏ ରୋଗକୁ ସମ୍ପୂର୍ଣ୍ଣ ରୂପେ ଭଲ କରାଯାଇ ପାରେନାହିଁ, କେବଳ ରୋଗକୁ ନିୟନ୍ତ୍ରିତ କରାଯାଇପାରେ। ଔଷଧ ସହିତ ଜୀବନଶୈଳୀରେ ପରିବର୍ତ୍ତନ ଆଣିବା ନିହାତି ଆବଶ୍ୟକ। ନିୟମିତ ସୁଷମ ଖାଦ୍ୟ ଖାଇବା, ବ୍ୟାୟାମ କରିବା, ନିଶା ସେବନଠାରୁ ଦୂରେଇ ରହିବା, ସଠିକ୍‌‌ ସମୟରେ ଶୋଇବା, ମାନସିକ ଚାପକୁ ନିୟନ୍ତ୍ରଣ କରିବା ଦ୍ୱାରା, ଏହି ରୋଗଠାରୁ ଦୂରେଇ ରହିପାରିବେ। ବାପା ମା’ଙ୍କ ଡାଇବେଟିସ୍‌‌ ଥିଲେ ବଂଶାନୁଗତ ଭାବରେ ଶିଶୁକୁ ମଧୁମେହ ହେବାର ଆଶଙ୍କା ଅଧିକ ରହିଥାଏ। ଇନସୁଲିନର ବ୍ୟବହାର ନ କରି ମଧ୍ୟ ମଧୁମେହକୁ ନିୟନ୍ତ୍ରଣ କରାଯାଇପାରିବ। ସେଥିପାଇଁ ମଇଦା ଯୁକ୍ତ ଖାଦ୍ୟ ଓ ତେଲମସଲାଯୁକ୍ତ ଖାଦ୍ୟଠାରୁ ଦୂରେଇ ରହିବା ଉଚିତ। ଦୈନିକ ୬୦% କାର୍ବୋହାଇଡ୍ରେଟ୍‌‌, ୩୦% ଫ୍ୟାଟ୍‌‌ ଓ ୧୦% ପ୍ରୋଟିନ୍‌‌ ଖାଦ୍ୟ ଖାଇବା ଉଚିତ। ଡାକ୍ତର ଓ ଖାଦ୍ୟ ବିଶେଷଜ୍ଞଙ୍କ ପରାମର୍ଶ ଅନୁଯାୟୀ ଖାଦ୍ୟପେୟ ଓ ଜୀବନଶୈଳୀରେ ପରିବର୍ତ୍ତନ ଆଣିଲେ, ଇନସୁଲିନର ଆବଶ୍ୟକତା ପଡ଼ିବ ନାହିଁ।

ହାଇପୋଗ୍ଲାଇସିମିଆ କ’ଣ?
ରକ୍ତରେ ଶର୍କରାର ମାତ୍ରା ଶତକଡ଼ା ୬୦ ମିଲିଗ୍ରାମ୍‌‌ରୁ କମିଗଲେ, ଶରୀରରେ ଶର୍କରାର ଅଭାବ ସୃଷ୍ଟି ହୁଏ। ଏହାକୁ ଡାକ୍ତରୀ ଭାଷାରେ ହାଇପୋଗ୍ଲାଇସିମିଆ କୁହାଯାଏ। ଏହି ଅବସ୍ଥା ଡାଇବେଟିସ୍‌‌ ଔଷଧ ଚିକିତ୍ସାର ପାର୍ଶ୍ବ ପ୍ରତିକ୍ରିୟା ଭାବେ ଦେଖା ଦେଇପାରେ। ଏହାକୁ ଚିହ୍ନିବା ପାଇଁ ରୋଗୀ ସତର୍କ ରହିବା ଆବଶ୍ୟକ। ଏଭଳି ଅବସ୍ଥା ସୃଷ୍ଟି ହେଲେ ଦେହରୁ ଗମ୍‌‌ଗମ୍‌‌ ଝାଳ ବାହାରେ। ହୃତ୍‌‌ପିଣ୍ଡର ଗତି ବଢ଼଼ିଯାଇ ଛାତି ଧଡ୍‌‌ଧଡ୍‌‌ ହେବା ପରି ଅନୁଭୂତ ହୋଇଥାଏ। ଭୋକ ଲାଗିବା ସହ ଦେହ ଥରିବା, ମୁଣ୍ଡ ବିନ୍ଧିବା, ବାନ୍ତି ଲାଗିବା ଓ ଦୁର୍ବଳ ଲାଗିଥାଏ। ଏହି ଲକ୍ଷଣ ଅଧିକ ହେଲେ ରୋଗୀ ଅଚେତ ହୋଇଯାଏ ବୋଲି ଭେଷଜ ବିଶେଷଜ୍ଞ ପ୍ରଫେସର୍‌‌ ନିରଞ୍ଜନ ତ୍ରିପାଠୀ କହିଛନ୍ତି।

ମଧୁମେହ ଦୂର ପାଇଁ ଔଷଧ ଓ ସେବନ ବିଧି

• ଜାମୁକୋଳି ମଞ୍ଜି ୧୦୦ଗ୍ରାମ, ମେଥଳ ୫୦ ଗ୍ରାମ, ହରିତକି ୧୦ ଗ୍ରାମ, ବାହାଡ଼ା ୧୦ ଗ୍ରାମ, ଅଁଳା ୧୦ ଗ୍ରାମକୁ ନେଇ ସୂକ୍ଷ୍ମ ଭାବେ ଚୂର୍ଣ୍ଣ କରି, ତହିଁରୁ ସକାଳେ ଓ ସନ୍ଧ୍ୟାରେ ଅଧଚାମଚ ସେବନ କଲେ ଉପକାର ହୋଇଥାଏ।
• କୁଆମଇତା ପତ୍ରରସ ୫ ମିଲିଲିଟର ଗୁଡ଼ମାରି ପତ୍ରରସ ୫ ମିଲିଲିଟର, ସଦାବିହାରୀ ପତ୍ରରସ ୫ ମିଲିଲିଟରକୁ ମିଶାଇ ଦିନକୁ ଦୁଇଥର ସେବନ କଲେ ମଧୁମେହ ଦୂର ହୋଇଥାଏ।
• ବସନ୍ତ କୁସୁମାକର ରସ, ବୃହତ ପୂର୍ଣ୍ଣଚନ୍ଦ୍ର ରସ, ଚନ୍ଦ୍ରପ୍ରଭା ବଟୀ, ଆରୋଗ୍ୟ ବର୍ଦ୍ଧନୀ ଗୁଟିକା ଆଦି ଚିକିତ୍ସକଙ୍କ ପରାମର୍ଶରେ ଗ୍ରହଣ କରାଯାଇପାରେ।
• ଚିନି, ରିଫାଇନ୍‌‌ ତେଲ, ପ୍ୟାକେଟ୍‌‌ ଲୁଣ ଆଦି ସମ୍ପୂର୍ଣ୍ଣ ବର୍ଜନୀୟ। ଆଳୁ ଭଳି ମାଟିତଳ ଖାଦ୍ୟ ସାମଗ୍ରୀ, ଗୁଡ଼ ଓ ମହୁ ଆଦି ଖୁବ୍‌‌ କମ୍‌‌ ମାତ୍ରାରେ ଗ୍ରହଣ କରାଯାଇପାରେ।
• ପାଚିଲା ମଧୁର ଫଳ ମଧ୍ୟ ନିଜର ଚିକିତ୍ସକଙ୍କ ପରାମର୍ଶରେ ସ୍ୱଳ୍ପ ମାତ୍ରାରେ ଗ୍ରହଣ କରାଯାଇପାରେ।
• ଶାଗ, ପରିବା ଭଳି ତନ୍ତୁଜାତୀୟ ଖାଦ୍ୟକୁ ଭୋଜନରେ ସାମିଲ୍‌‌ କରିବା ହିତକର ହୋଇଥାଏ ଏବଂ ତୈଳାକ୍ତ ଭୋଜନ ଅହିତକର।
• ତେବେ ମୋଟାମୋଟି କହିବାକୁ ଗଲେ, ସନ୍ତୁଳିତ ପରିଶ୍ରମ ଓ ସ୍ୱଳ୍ପାହାର ସହିତ ଉପଯୁକ୍ତ ଜୀବନଶୈଳୀ ମଧୁମେହ ରୋଗୀକୁ ସାମର୍ଥ୍ୟବାନ ଓ ଦୀର୍ଘଜୀବୀ କରିଥାଏ।

ଅନ୍ୟାନ୍ୟ ଔଷଧ
ମଧୁମେହ ସହ ସ୍ନାୟବିକ ଦୁର୍ବଳତା କ୍ଷେତ୍ରରେ କ୍ରୁରାରୀ ଔଷଧ ଦିଆଯାଏ। ଏସବୁ ବ୍ୟତୀତ ଏସିଡ୍‌‌ ଫସ୍‌‌, ଥାଇରୋଜିନମ୍‌‌, କାଲକାରିୟା ଓ କାର୍ବ ଆଦି ଔଷଧ ଲକ୍ଷଣଭିତ୍ତିରେ ଭଲ କାମ କରେ। ତେବେ ଔଷଧ ନିୟମିତ ନେବା ସହ ଖାଦ୍ୟପେୟରେ ସତର୍କତା, ବ୍ୟାୟାମ, ନିୟମିତ ଡାକ୍ତରୀ ଯାଞ୍ଚ୍‌‌, ସଚେତନତା ଓ ଅବହେଳା ନ କରି ପ୍ରାଥମିକ ସ୍ତରରେ ଚିକିତ୍ସା କରିବା ଦ୍ୱାରା ମଧୁମେହ ନିୟନ୍ତ୍ରଣ କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିଥାଏ।

ରୋଗ ପାଇଁ ଭଲମନ୍ଦ

• ତିକ୍ତ, କଷାୟ ଓ କଟୁରସଯୁକ୍ତ ଭୋଜନ ହିତକର ହୋଇଥାଏ। ଅଧିକ ମଧୁର, ଅମ୍ଳ ଓ ଲବଣରସ ଯୁକ୍ତ ଭୋଜନ ହିତକର ହୋଇ ନ ଥାଏ।
• ରୋଗୀର ଶାରୀରିକ କ୍ଷମତାନୁସାରେ ପ୍ରାତଃଭ୍ରମଣ, ସନ୍ତରଣ ପରି ସାଧାରଣ ବ୍ୟାୟାମ ହିତକର। ଗରମ ଦିନ ଅପେକ୍ଷା ଶୀତଦିନେ ଅଧିକ ବ୍ୟାୟାମ କରିବାକୁ ପରାମର୍ଶ ଦିଆଯାଇଥାଏ।
• ପ୍ରାତଃଭ୍ରମଣରୁ ଫେରିବା ପରେ ସାମାନ୍ୟ ବିଶ୍ରାମ ନେଇ ଗୋଟିଏ ଲେଖାଏଁ ଛୋଟ କାକୁଡ଼ି, କଲରା ଓ ଟମାଟକୁ ଗ୍ରାଇଣ୍ଡିଂ କରି ଗୋଲମରିଚ ଗୁଣ୍ଡ, ଜୀରାଗୁଣ୍ଡ, ସୈନ୍ଧବ ଲବଣ ଆଦି ମିଶାଇ ନିୟମିତ ସେବନ କଲେ ହିତକର ହୋଇଥାଏ।
• ସକାଳ ଜଳଖିଆରେ ଗଜାମୁଗ, ଗଜାବୁଟ, ଗଜା ଗହମ, ୨ରୁ ୪ଟି ପେସ୍ତା ବାଦାମ୍‌‌, ଗୋଟିଏରୁ ଦୁଇଟି ଅଖ୍ରୋଟ୍‌‌ ଆଦିକୁ ସାମିଲ କରିବା ଆବଶ୍ୟକ। – ଜଳଖଳଆ ଓ ମଧ୍ୟାହ୍ନ ଭୋଜନ ମଝି ସମୟରେ ଭୋକ ହେଲେ ଅଳ୍ପ ତଟକା ଫଳ ସେବନ କରାଯାଇପାରେ। ମଧ୍ୟାହ୍ନ ଭୋଜନ ପୂର୍ବରୁ ଖଣ୍ଡିଏ ଅଦା ସହିତ ଅଳ୍ପ ସୈନ୍ଧବ ଲବଣ ଚୋବାଇ ଖାଇବା ହିତକର ହୋଇଥାଏ।
• ମଧ୍ୟାହ୍ନ ଭୋଜନରେ ଅଳ୍ପ ଭାତ, ରୁଟି, ଡାଲି, ସିଝା ତରକାରି ଆଦି ସାମିଲ କରିବା ସହିତ ସାଲାଡ୍‌‌ ନିହାତି ରହିବା ଦରକାର ଏବଂ ଭୋଜନ କରିବା ପୂର୍ବରୁ ସାଲାଡ୍‌‌ ଖାଇବା ପରେ ରନ୍ଧାଖାଦ୍ୟ ଗ୍ରହଣ କରିବା ବିଧେୟ।
• ଅପରାହ୍ଣରେ ଭୋକ ହେଲେ ହାଲୁକା ଖାଦ୍ୟ ଗ୍ରହଣ କରାଯାଇପାରେ। ରାତ୍ରିର ପ୍ରଥମ ପ୍ରହରରେ ରାତ୍ରିଭୋଜନ ଶେଷ କରିବା ଦରକାର। ଏଥିପାଇଁ ରୁଟି ଓ ପରିବା ସିଝା ଯଥେଷ୍ଟ ହୋଇଥାଏ।
• ରାତ୍ରିଭୋଜନ ପରେ ଅତିକମ୍‌‌ରେ ଶହେରୁ ଦୁଇଶହ ପାଦ ଧୀରେ ଧୀରେ ଚାଲିବା ଦରକାର। ଏହାପରେ ଶାନ୍ତ ମନରେ ସାତରୁ ଆଠଘଣ୍ଟା ଶୋଇବା ଆବଶ୍ୟକ। ଦିବା ଶୟନକୁ ସର୍ବଦା ପରିତ୍ୟାଗ କରିବା ଦରକାର।

ରୋଗ ପାଇଁ ଯୋଗ
ଆଭ୍ୟନ୍ତରୀଣ ଅଙ୍ଗଗୁଡ଼ିକର ବ୍ୟାୟାମ ହେଉଛି ଯୋଗ। ମଧୁମେହ ଉପଚାର ସ୍ୱରୁପ ପଶ୍ଚିମୋତ୍ତାନାସନ, ଗୋମୁଖାସନ, ହଳାସନ, ପର୍ବତାସନ, ଅର୍ଦ୍ଧ ମତ୍ସ୍ୟନ୍ଦ୍ରାସନ ପରି ଯୋଗାସନ ନିୟମିତ ଅଭ୍ୟାସ କଲେ ଏଣ୍ଡୋକ୍ରାଇନ୍‌‌ ସିଷ୍ଟମର ଦକ୍ଷତା ବୃଦ୍ଧି କରିଥାଏ। ଯକୃତ, ଅଗ୍ନାଶୟ, ପ୍ରିହା, ବୃକକ ଓ ଆଡ୍ରିନାଲ ଗ୍ରନ୍ଥି ମାଲିସ୍‌‌ ହୋଇ ହୋଇ ଓଜନ କମାଇବା ସହ ଯନ୍ତ୍ରଣା ଓ କଠିନତା କମିଥାଏ। ରକ୍ତ ସଞ୍ଚାଳନ ସହ ଇନସୁଲିନ୍‌‌ ବୃଦ୍ଧି ପାଏ। ଫଳରେ ଯୋଗ ମଧୁମେହ ରୋଗ ପାଇଁ ସଞ୍ଜିବନୀ ସଦୃଶ ହୋଇଥାଏ। ଅସ୍ତ୍ରୋପଚାର କିମ୍ୱା ଆଘାତ ପ୍ରାପ୍ତ ବ୍ୟକ୍ତି ଡାକ୍ତରଙ୍କ ପରାମର୍ଶ ପରେ ଯୋଗ କରିବା ଉଚିତ।

ହୋମିଓପାଥି ଚିକିତ୍ସା
ହୋମିଓପାଥି ଏକ ଲକ୍ଷଣଭିତ୍ତିକ ଚିକିତ୍ସା ପ୍ରଣାଳୀ ହୋଇଥିବାରୁ ମଧୁମେହର ଲକ୍ଷଣ ଅନୁସାରେ ଔଷଧ ଦିଆଯାଏ। ରୋଗୀର ଶାରୀରିକ, ମାନସିକ ସ୍ଥିତି ଓ ଲକ୍ଷଣ ବିଚାରକୁ ନେଇ ଔଷଧ ଚୟନ ହୋଇଥାଏ। ଏହା ବ୍ୟତୀତ ତୁରନ୍ତ ରକ୍ତ ଶର୍କରା ହ୍ରାସ କରିବାକୁ ସ୍ଥଳବିଶେଷରେ କିଛି ଔଷଧ ରହିଛି। ଏହା ମୂଳ ଅର୍କ (କ୍ୟୁ) ହିସାବରେ ପ୍ରୟୋଗ କରାଯାଏ। ସେହିଭଳି ହୋମିଓପାଥି ଡାକ୍ତରଙ୍କ ପରାମର୍ଶରେ ଔଷଧ ଖାଇଲେ, ଶର୍କରାସ୍ତରକୁ ସୁନିୟନ୍ତ୍ରିତ କରାଯାଇପାରେ। ରୋଗର ଜଟିଳତାକୁ ମଧ୍ୟ କମାଯାଇଥାଏ ବୋଲି ରାଉରକେଲାସ୍ଥିତ ରେଳବାଇ ହସ୍ପିଟାଲ୍‌‌ର ହୋମିଓପାଥି ବିଶେଷଜ୍ଞ ଡାକ୍ତର ସମରେନ୍ଦ୍ର ପ୍ରସାଦ ମିଶ୍ର କହିଛନ୍ତି।

ହୋମିଓପାଥି ଔଷଧ ଓ ସେବନ ମାତ୍ରା-:

ମଧୁମେହ ଦୂର କରିବା ପାଇଁ କେତେକ ହୋମିଓପାଥି ଔଷଧ ରହିଛି। ରୋଗୀଙ୍କ ରକ୍ତ ଶର୍କରାର ସ୍ତର, ରୋଗର ଗମ୍ଭୀରତା, ଲକ୍ଷଣ ସମୂହ ଓ ବୟସକୁ ଦୃଷ୍ଟିରେ ରଖି ଔଷଧର ମାତ୍ରାରେ ପରିବର୍ତ୍ତନ କରାଯାଏ। ତେଣୁ ହୋମିଓପାଥି ଡାକ୍ତରଙ୍କ ସହ ପରାମର୍ଶ ନ କରି କୌଣସି ଔଷଧ ସେବନ କରନ୍ତୁ ନାହିଁ।

ସିଜିଜିୟମ୍‌‌ ଜାମ୍ୱୋଲାନମ୍‌‌
ହୋମିଓପାଥି ଔଷଧ ପସ୍ତୁତ ପ୍ରଣାଳୀ ମାଧ୍ୟମରେ ସିଜିଜିୟମ୍‌‌ ଜାମ୍ୱୋଲାନମ୍‌‌ ଔଷଧ ପ୍ରକୃତରେ ଜାମୁକୋଳି ମଞ୍ଜିରୁ ତିଆରି ହୋଇଥାଏ। ଏହା ରକ୍ତ ଶର୍କରା ବୃଦ୍ଧିକୁ ତୁରନ୍ତ କମ୍‌‌ କରିଥାଏ। ଅତ୍ୟଧିକ ଶୋଷ, ବାରମ୍ୱାର ପରିସ୍ରା, ଦୁର୍ବଳବୋଧ ଏବଂ ଘା’ ଶୁଖିବାରେ ବିଳମ୍ୱ ହେଉଥିଲେ, ରୋଗୀକୁ ଏହି ଔଷଧର ମୂଳଅର୍କ (କ୍ୟୁ), ୧୦ରୁ ୧୫ ଟୋପା ଲେଖାଏଁ ଦିନକୁ ୨/୩ ଥର ଦିଆଯାଏ। ଏହାକୁ ଖାଲିପେଟରେ ବୟସ୍କଙ୍କୁ ଦିଆଯାଇଥାଏ। ଶିଶୁଙ୍କ କ୍ଷେତ୍ରରେ ଏହାର ଅର୍ଦ୍ଧାଧିକ ପରିମାଣରେ ଦିନକୁ ୨ଥର ଦିଆଯାଇଥାଏ।

ଆବ୍ରୋମା ଅଗଷ୍ଟା
ଓଲଟ କମଳ ଗଛର ପତ୍ରରୁ ପ୍ରସ୍ତୁତ ଏହି ଔଷଧଟି ରକ୍ତ ଶର୍କରା ମାତ୍ରାକୁ କମ୍‌‌ କରେ। ରୋଗୀର ପରିସ୍ରାରେ ଆଲ୍‌‌ବୁମିନ୍‌‌ ଆସିଲେ, ଅତ୍ୟଧିକ ଶୋଷ ଲାଗି ଓଠ ଓ ପାଟି ଶୁଖିଗଲେ, ବାରମ୍ୱାର ପରିସ୍ରା ହେଉଥିଲେ ଏହି ଔଷଧ ଦିଆଯାଏ। ଏହି ଔଷଧର ମୂଳଅର୍କ (କ୍ୟୁ)ରୁ ୧୦-୧୫ ଟୋପା ମାତ୍ରାରେ ଦିନକୁ ୨ରୁ ୩ ଥର ଅଧାକପ୍‌‌ ପାଣିରେ ମିଶାଇ ଖାଲିପେଟରେ ଦିଆଯାଏ। ଶିଶୁମାନଙ୍କ କ୍ଷେତ୍ରରେ ଏହାର ମାତ୍ରା ଅଧା ହୋଇଥାଏ।

ଜିମ୍‌‌ନେମା ସିଲଭେଷ୍ଟ୍ରି ଏବଂ କେଫାଲେ ନଡ୍ରା ଇଣ୍ଡିକା
ରୋଗୀଠାରେ ବାରମ୍ୱାର ପରିସ୍ରା ସହ ରକ୍ତରେ ଶର୍କରା ବଢ଼଼ୁଥିଲେ, ଜିମ୍‌‌ନେମା ସିଲଭେଷ୍ଟ୍ରିର ମୂଳ ଅର୍କ (କ୍ୟୁ)କୁ ଦିଆଯାଏ। ସେହିପରି ପରିସ୍ରା କରିବା ପରେ ବିଶେଷ ଭାବେ ଶାରୀରିକ ଦୁର୍ବଳତା ଅନୁଭବ କରିବା, ରକ୍ତ ଶର୍କରା ବୃଦ୍ଧି ସହ ଦେହହାତ ଜଳାପୋଡ଼ା କରୁଥିଲେ କେଫାଲେ ନଡ୍ରା ଇଣ୍ଡିକା ଉପଯୋଗୀ। ଜିମ୍‌‌ନେମା ସିଲଭେଷ୍ଟ୍ରି ଓ କେଫାଲେ ନଡ୍ରା ଇଣ୍ଡିକାକୁ ସିଜିଜିୟମ୍‌‌ ଜାମ୍ୱୋଲାନମ୍‌‌ ପରି ସଠିକ୍‌‌ ମାତ୍ରାରେ ଦିଆଯାଏ।

ୟୁରାନିୟମ୍‌‌ ନାଇଟ୍ରିକମ୍‌‌
ମଧୁମେହ ସହ ଶରୀରର ଓଜନ ହ୍ରାସର ସମସ୍ୟା ଥିବା ରୋଗୀଙ୍କୁ ଏହି ଔଷଧ ଦିଆଯାଏ। ଏହାର ୟୁରାନିୟମ୍‌‌ ନାଇଟ୍ରିକମ୍‌‌-୨୦୦ରୁ ଦିନକୁ ୩ ବୁନ୍ଦା ଲେଖାଏଁ ୨ରୁ ୩ ଥର ଖାଲିପେଟରେ ଦିଆଯାଏ। ପିଲାମାନଙ୍କୁ ଏହାର ଅଧା ଦିଆଯାଇପାରେ।

ମଧୁମେହ ରୋଗୀଙ୍କ ଖାଦ୍ୟପେୟ

ତନ୍ତୁଜାତୀୟ ଖାଦ୍ୟ ଖାଆନ୍ତୁ
ରୋଗୀଙ୍କୁ ସବୁବେଳେ ଖାଦ୍ୟପଦାର୍ଥ ଉପରେ ବିଶେଷ ଯତ୍ନବାନ ହେବା ଆବଶ୍ୟକ। ସେମାନେ ଖାଉଥିବା ଖାଦ୍ୟ ଯେମିତି ଶରୀରରେ ସୁଗାର୍‌‌ ପରିମାଣକୁ ବୃଦ୍ଧି ନ କରିବ, ସେ ପ୍ରତି ସଚେତନ ଓ ସତର୍କ ରୁହନ୍ତୁ। ତନ୍ତୁଜାତୀୟ ଖାଦ୍ୟ ଖାଇବା ଦିଗରେ ଗୁରୁତ୍ୱ ଦେବା ଉଚିତ। ସେହିପରି କମ୍ପେ୍ଲକ୍ସ କାର୍ବୋହାଇଡ୍ରେଟ୍‌‌ ଖାଦ୍ୟ ଖାଇପାରିବେ। ଡାଏଟେରେ ମିଲେଟ୍‌‌ ସାମିଲ କରନ୍ତୁ। ବାଜରାରେ ଗ୍ଲାଇସେମିକ୍‌‌ ଇଣ୍ଡେକ୍ସ ପରିମାଣ କମ୍‌‌।

ସାଇଟ୍ରସ୍‌‌ ଖାଦ୍ୟ ପଦାର୍ଥ ଖାଆନ୍ତୁ
ସବୁଜ ପନିପରିବା ସମେତ ସେଓ, କମଳା, ନାସପାତି, ମୌସମ୍ୱି ଆଦି ଫଳ ଖାଇପାରିବେ। ସାଇଟ୍ରସ୍‌‌ ଖାଦ୍ୟପଦାର୍ଥରେ ଗ୍ଲାଇସେମିକ୍‌‌ ଇଣ୍ଡେକ୍ସ କମ୍‌‌ ରହୁଥିବାରୁ ମଧୁମେହ ରୋଗୀମାନେ ଏହାକୁ ଖାଇବା ଉଚିତ। ସେହିପରି ଯେଉଁ ସବୁ ଖାଦ୍ୟପଦାର୍ଥରେ ଗ୍ଲାଇସେମିକ୍‌‌ ଇଣ୍ଡେକ୍ସ କମ୍‌‌ ରହୁଛି, ସେସବୁ ସେମାନଙ୍କୁ ଖାଇବା ଦରକାର।

ଉପବାସ କରନ୍ତୁ ନାହିଁ
ଅନେକ ସମୟରେ ମଧୁମେହ ରୋଗୀଙ୍କର ସୁଗାର୍‌‌ କମି ଯାଏ। ଫଳରେ ମୁଣ୍ଡ ବୁଲାଏ, ଦେହ ହାତ ଥରେ ଓ ଶରୀରରୁ ଝାଳ ବୁହେ। ଏହି ସବୁ ଲକ୍ଷଣକୁ ଲୋ-ସୁଗାର୍‌‌ ଲେବଲ୍‌‌ ବୋଲି କହିଥାଉ। ଏସବୁ ସମସ୍ୟା ଦେଖାଦେଲେ, ସେମାନେ ସୁଗାର୍‌‌ ସହ ଗ୍ଲୁକୋଜ୍‌‌ ବି ନେଇପାରିବେ। ଏହି ସବୁ ପରେ ଅଳ୍ପ ଅଳ୍ପ କରି ବାରମ୍ବାର ଖାଆନ୍ତୁ ଓ ପେଟ ଖାଲି ରଖନ୍ତୁ ନାହିଁ।
– ନିହାରିକା ଦାସ

ନୂଆଦିଲ୍ଲୀ: ମଧୁମେହ ରୋଗୀଙ୍କ ପାଇଁ ଏକ ଖୁସି ଖବର ଆସିଛି। ଏବେ ଫାର୍ମା କମ୍ପାନୀ ୧୨ଟି ଔଷଧର ମୂଲ୍ୟ ବଢାଇ ପାରିବେନି । ଫାର୍ମାସିଉଟିକାଲ ପ୍ରାଇସିଂ ଅଥରିଟି(ଏନପିପିଏ) ପକ୍ଷରୁ ଏହି ସୂଚନା ଦିଆଯାଇଛି।

ଏନପିପିଏ ପକ୍ଷରୁ କୁହାଯାଇଛି ଯେ,୧୨ଟି ମଧୁମେହ ଔଷଧ ମୂଲ୍ୟରେ ସୀମା ନିର୍ଦ୍ଧାରଣ କରାଯାଇଛି। ଅର୍ଥାତ୍ ଧାର୍ଯ୍ୟ ସୀମା ଠାରୁ ଅଧିକ ମୂଲ୍ୟରେ କମ୍ପାନୀମାନେ ଔଷଧ ବିକ୍ରି କରିପାରିବେନି। ଏହି ସବୁ ଔଷଧ ମଧ୍ୟରେ ଗ୍ଲିମପ୍ରାଇଡ ଟାବଲେଟ, ଗ୍ଲୁକୋଜ ଇଞ୍ଜେକ୍ସନ ଏବଂ ଇଣ୍ଟରମିଡିଏଟ ଆକ୍ଟିଂ ଇନସ୍ଯୁଲିନ ସଲ୍ୟୁସନ ସାମିଲ ରହିଛି। ଭାରତୀୟଙ୍କ ପାଇଁ ମଧୁମେହ ଔଷଧ ଶସ୍ତା ହେବା ଉଚିତ ବୋଲି ଏନପିପିଏ କହିଛି । ଏଥିପାଇଁ ଔଷଧ ମୂଲ୍ୟ ସୀମା ଧାର୍ଯ୍ୟ କରାଯାଇଥିବା କୁହାଯାଇଛି।

ଗ୍ଲିମପ୍ରାଇଡ ଟାବଲେଟ(୧ ଏମଜି) ଗୋଟିକର ମୂଲ୍ୟ ୩.୬ ଟଙ୍କାରୁ ଅଧିକ ହେବା ଅନୁଚିତ। ୨ ଏମଜି ଟାବଲେଟ ମୂଲ୍ୟ ୫୭୨ ଟଙ୍କାରୁ ଅଧିକ ହେବ ନାହିଁ । ସେହିପରି ୧ ମିଲି ବିଶିଷ୍ଟ ଗ୍ଲୁକୋଜ ଇଞ୍ଜେକ୍ସନ(୨୫ ପ୍ରତିଶତ ମଜବୁତ)ର ମୂଲ୍ୟ ୧୭ ପଇସା ହେବ। ତେବେ ୧ ମିଲି ଇନକ୍ୟୁଲିନ ଇଞ୍ଜେକ୍ସନ ମୂଲ୍ୟ ୧୫୯ ଟଙ୍କା ରହିବ। ସେହିଭଳି ଭାବରେ ୧ ମିଲି ଇଣ୍ଟରମିଡିଏଟ ଆକ୍ଟିଂ ସଲ୍ୟୁସନ ଇନସ୍ଯୁଲିନ ଇଞ୍ଜେକ୍ସନର ମୂଲ୍ୟ ୧୫.୯ ଟଙ୍କା ରହିବ। ଏଥିରେ ୧ମିଲି ପ୍ରିମିକ୍ସ ଇନ୍‌ସ୍ଟ୍ରୋଲିନ ୩୦ ରୁ ୭୦ ଇଞ୍ଜେକ୍ସନ ମୂଲ୍ୟ ମଧ୍ୟ ସମାନ ରହିବ। ଏହାବ୍ୟତୀତ୫୦୦ ଏମଜି ବିଶିଷ୍ଟ ଟାବଲେଟ ଗୋଟିକ ପିଛା ମୂଲ୍ୟ ୧.୫୧ ଟଙ୍କା ଧାର୍ଯ୍ୟ କରାଯାଇଛି। ତେବେ ୭୫୦ ଏମଜି ବିଶିଷ୍ଟ ଟାବଲେଟ ମୂଲ୍ୟ ୩୫ ଟଙ୍କା ଏବଂ ୫୦୦ ଏମଜି ଟାବଲେଟ ମୂଲ୍ୟ ୧.୯୨ ଟଙ୍କା ରଖାଯାଇଛି। ମେଟାଫାର୍ମିନ ନିୟନ୍ତ୍ରଣ କରୁଥିବା ଟାବଲେଟର ୧୦୦୦ ଏମଜି ମୂଲ୍ୟ ୩.୬୬ ଟଙ୍କା, ୭୫୦ ଏମଜିର ମୂଲ୍ୟ ୨.୫୪ ଟଙ୍କା ଏବଂ ୫୦୦ ଏମଜି ଟାବଲେଟ ମୂଲ୍ୟ ୧.୯୨ ଟଙ୍କା ରହିଛି।

ପ୍ରାୟ ସମସ୍ତଙ୍କୁ ପାଚିଲା ପଣସ ଖାଇବାକୁ ଭଲ ଲାଗେ । ପଣସରୁ ତିଆରି ହେଉଥିବା ଚିପ୍ସ ମଧ୍ୟ ଅନେକଙ୍କର ପସନ୍ଦ । ମାତ୍ର ପଣସ ମଞ୍ଜି ଯେ ସ୍ୱାସ୍ଥ୍ୟ ପାଇଁ ଏତେ ଉପକାରୀ ଆପଣ ଜାଣିଲେ ଆଶ୍ଚର୍ଯ୍ୟ ହେବେ । ପଣସ ମଞ୍ଜିରୁ ତିଆରି ହେଉଥିବା ଅଟା ମଧୁମେହ ରୋଗୀଙ୍କ ପାଇଁ ମହୋଷଧୀ ରୂପେ କାମ ଦେବ ବୋଲି କହିଛନ୍ତି ଜଣେ ବୈଜ୍ଞାନିକ ।

ନିକଟରେ ହୋଇଥିବା ଏକ ଅଧ୍ୟୟନରୁ ଜଣାପଡିଛି ଯେ, ମଧୁମେହ ରୋଗୀଙ୍କ ପାଇଁ ପଣସ ମଞ୍ଜିରୁ ତିଆରି ଅଟା ସ୍ୱାସ୍ଥ୍ୟ ପାଇଁ ବହୁତ ଉପକାରୀ ।ଏକଥା ଆମେ କହୁନୁ, କେରଳର ଜଣେ ବୈଜ୍ଞାନିକ ପ୍ରଧାନମନ୍ତ୍ରୀଙ୍କୁ ନିଜର ଭରଚୁଆଲ ମିଟିଙ୍ଗରେ ଏନେଇ ବିଶ୍ଳେଷଣ କରି ଜଣାଇଛନ୍ତି । ଯଦି ଜଣେ ମଧୁମେହ ରୋଗୀ ପଣସ ମଞ୍ଜିରୁ ତିଆରି ଅଟା ଏକ ଚାମଚ ଦିନକୁ ତିନି ଟାଇମ ଖାଦ୍ୟ ସହିତ ବ୍ୟବହାର କରନ୍ତି ତେବେ ତିନି ମାସ ଭିତରେ ତାଙ୍କର ରକ୍ତ ଶର୍କରା ସମ୍ପୂର୍ଣ୍ଣ ନିୟନ୍ତ୍ରଣକୁ ଆସିଯିବ । ବୈଜ୍ଞାନିକଙ୍କ ଏହି ବାର୍ତ୍ତା ଶୁଣିବା ପରେ କୋରାପୁଟ ଜିଲ୍ଲା ପ୍ରଶାସନ ମଧ୍ୟ କେରଳ ଢ଼ାଞ୍ଚାରେ ଏବେ ପ୍ରସ୍ତୁତି ଆରମ୍ବ କରିଛି ।

ରାଜ୍ୟର କୋରାପୁଟ ଜିଲ୍ଳାରେ ପ୍ରଚୁର ପରିମାଣରେ ପଣସ ଆଦାୟ ହୋଇଥାଏ । ହେଲେ ପଣସ ମଞିର ବ୍ୟବହାର ଗାଁ ଗହଳିରେ ସାଧାରଣ କ୍ଷେତ୍ରରେ ବେଶୀ ହୋଇ ନ ଥାଏ । ଏଠାକାର ପଣସକୁ ସସ୍ତାରେ ପଡ଼ୋଶୀ ରାଜ୍ୟ ଆନ୍ଧ୍ର ଓ ଛତିଶଗଡ଼ ଟନ ଟନ୍ କିଣି ନେଉଥିଲେ । ଏବେ ଏହି ପଣସ ମଞିରୁ ବିଭିନ୍ନ ଦ୍ରବ୍ୟ ତିଆରି କରିବାକୁ ଯୋଜନା ପ୍ରସ୍ତୁତ ହୋଇ କାମ ଆଗକୁ ବଢ଼ୁଛି ଆଉ ଏହା ଆଦିବାସୀ ଅଚଂଳବାସୀଙ୍କ ଜୀବନ ଜିବିକାରେ ଉନ୍ନତି ଆଣିପାରିବ ବୋଲି ସ୍ଥାନୀୟ ଲୋକଙ୍କ ଆଶା ରହିଛି ।