ରାଜନଗର: ବଢ଼ିଲା ନିଲମ୍ବିତ ଆଇଆଇସି ସଂନ୍ଧ୍ୟାରାଣୀ ଜେନାଙ୍କ ଅଡ଼ୁଆ । ସଂନ୍ଧ୍ୟାରାଣୀ ଜେନାଙ୍କ ନାଁରେ ରୁଜୁ ହେଲା ମାମଲା । ତାଳଚୁଆ ସାମୁଦ୍ରିକ ଥାନାରେ ମା, ପୁଅକୁ ମାଡ଼ ମାରି ନିଲମ୍ବିତ ହୋଇଥଲେ ସଂନ୍ଧ୍ୟାରାଣୀ । ମାଆ ପୁଅଙ୍କୁ ଥାର୍ଡ ଡିଗ୍ରୀ ଅଭିଯୋଗରେ ତାଳଚୁଆ ଥାନାରେ ଏହି ମାମଲା ରୁଜୁ ହୋଇଛି । କେସ ନଂ ୧୨୪/୨୦୨୬ ରେ ଧାରା ୨୯୬, ୭୪, ୧୧୫, ୩୫୧, ୩୦୮ ରେ ମାମଲା ରୁଜୁ କରିଛି ପୋଲିସ। ଏବେ ତଦନ୍ତର ସମ୍ମୁଖୀନ ହେବେ ସଂଧ୍ୟାରାଣୀ ଜେନା। ଆଗରୁ ତାଙ୍କୁ ନିଲମ୍ଵିତ କରାଯାଇଥିଲା। ଗତ ୨୫ ତାରିଖରେ ଥାନାରେ ମାଆ ପୁଅଙ୍କୁ ତତ୍କାଳୀନ ଆଇଆଇସି ସଂଧ୍ୟାରାଣୀ ଜେନା ନିସ୍ତୁକ ମାଡ଼ ମାରିଥିବାର ଅଭିଯୋଗ ହୋଇଥିଲା। ଏକ ପାରିବାରିକ କଳହକୁ ନେଇ ଅଭିଯୋଗ କରିବାକୁ ଆସିଥିଲେ ଗିରିଆପାହୀ ଗାଁର ୫୮ ବର୍ଷୀୟ ଅନ୍ନପୂର୍ଣ୍ଣା ମଣ୍ଡଳ ଓ ତାଙ୍କ ପୁଅ ଅନନ୍ତ ।

ଅଭିଯୋଗ ଅନୁସାରେ ସଂଧ୍ୟାରାଣୀ ଏତଲା ନରଖି ମାଆ ପୁଅଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ । ନିସ୍ତୁକ ମାଡ଼ ମାରିଥିଲେ । ଅନ୍ନପୂର୍ଣ୍ଣାଙ୍କ ଚୁଟି ଘୋଷାଡ଼ି ଅର୍ଦ୍ଧ ଉଲଗ୍ନ କରି ଚାପୁଡା ମାରିବା ସହିତ ମହିଳାଙ୍କ ମଥାରୁ ସିନ୍ଦୁର ପୋଛି ଦେଇଥିଲେ । ପୁଅ ଅନନ୍ତଙ୍କୁ ଥାନାର ପାଇଖାନା ଭିତରେ ପୁରାଇ ନିସ୍ତୁକ ମାଡ଼ ମାରିଥିଲେ। ଏପରିକି ଜୀବନରୁ ମାରି ଦେବାକୁ ଓ ମିଛ କେସରେ ଫସାଇ ଦେବାକୁ ଧମକ ଦେଇଥିଲେ। ଏସବୁର ଭିଜୁଆଲ ଭାଇରାଲ ହୋଇଥିଲା। ଏସପିଙ୍କ ତଦନ୍ତ ବେଳେ ସିସିଟିଭି ଫୁଟେଜ ଥାନାରୁ ହଟାଇ ଦେଇଥିବାର ପ୍ରମାଣ ମିଳିଥିଲା। ଗତ ୨୭ ତାରିଖରେ ସଂଧ୍ୟାରାଣୀଙ୍କୁ ଡିଜିପି ସସପେଣ୍ଡ କରିଥିଲେ। କିନ୍ତୁ ମାମଲା ରୁଜୁ ହୋଇନଥିଲା। ଏତେ ଦିନ ପରେ ମାମଲା ରୁଜୁ ହୋଇଛି।