କେରଳରେ ମୁଖ୍ୟମନ୍ତ୍ରୀ ପଦ ପାଇଁ କଂଗ୍ରେସର ମାନସମନ୍ଥନ ଜାରି ରହିଥିବା ବେଳେ ତାମିଲନାଡୁରେ ନୂଆ କରି ସରକାର ଗଠନ କରିଥିବା ମୁଖ୍ୟମନ୍ତ୍ରୀ ଥାଲାପତି ବିଜୟ ଆଜି ବିଧାନସଭାରେ ନିଜର ଆସ୍ଥା ଭୋଟ୍ ବା ବହୁମତ ସାବ୍ୟସ୍ତ କରିବାକୁ ଯାଉଛନ୍ତି। ଏହି ଦୁଇଟି ପ୍ରମୁଖ ରାଜନୈତିକ ଘଟଣାକୁ ନେଇ ଦେଶର ରାଜନୀତି ସରଗରମ ହୋଇଛି।

କେରଳ ମୁଖ୍ୟମନ୍ତ୍ରୀ ଦୌଡ଼ରେ ଆଗରେ କେ.ସି ବେଣୁଗୋପାଳ

କେରଳ ବିଧାନସଭା ନିର୍ବାଚନରେ କଂଗ୍ରେସ ନେତୃତ୍ୱାଧୀନ ୟୁଡିଏଫ୍ (UDF) ବୃହତ୍ ବିଜୟ ହାସଲ କରିଛି। ତେବେ ମୁଖ୍ୟମନ୍ତ୍ରୀ ଚେହେରା ବାଛିବା ନେଇ ଦଳ ଭିତରେ କସରତ ଜାରି ରହିଛି। ମୁଖ୍ୟମନ୍ତ୍ରୀ ଦୌଡ଼ରେ ତିନି ଜଣ ବରିଷ୍ଠ ନେତା— କେ.ସି ବେଣୁଗୋପାଳ, ଭି.ଡି ସତୀସନ୍ ଏବଂ ରମେଶ ଚେନ୍ନିଥାଲା ଅଛନ୍ତି। ନିକଟରେ ଦିଲ୍ଲୀରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକରେ ଅଧିକାଂଶ ବିଧାୟକ ଏବଂ କଂଗ୍ରେସ ନେତା କେ.ସି ବେଣୁଗୋପାଳଙ୍କୁ ମୁଖ୍ୟମନ୍ତ୍ରୀ ପଦ ପାଇଁ ସମର୍ଥନ ଜଣାଇଥିବା ଜଣାପଡିଛି। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ଏବଂ ରାହୁଲ ଗାନ୍ଧୀ ଖୁବ୍‌ଶୀଘ୍ର ଏ ନେଇ ଚୂଡ଼ାନ୍ତ ନିଷ୍ପତ୍ତି ଘୋଷଣା କରିବେ।

ତାମିଲନାଡୁରେ ମୁଖ୍ୟମନ୍ତ୍ରୀ ବିଜୟଙ୍କ ଆସ୍ଥା ଭୋଟ୍

ଅନ୍ୟପକ୍ଷରେ, ତାମିଲନାଡୁରେ ନିକଟରେ ଅନୁଷ୍ଠିତ ହୋଇଥିବା ବିଧାନସଭା ନିର୍ବାଚନରେ ଅଭିନେତାରୁ ନେତା ପାଲଟିଥିବା ଜୋସେଫ୍ ବିଜୟଙ୍କ ଦଳ ତାମିଝାଗା ଭେଟ୍ରି କାଝାଗମ୍ (TVK) ୧୦୮ଟି ଆସନ ଜିତି ସବୁଠାରୁ ବଡ଼ ଦଳ ଭାବେ ଉଭା ହୋଇଛି। କିନ୍ତୁ ବହୁମତ ପାଇଁ ଆବଶ୍ୟକ ସଂଖ୍ୟାଠାରୁ ଦଳ ସାମାନ୍ୟ ପଛରେ ଥିଲା। ଏବେ ବାଚସ୍ପତିଙ୍କ ନିର୍ବାଚନ ଏବଂ ଏକାଧିକ ଆସନର ସମୀକରଣ ପରେ ବହୁମତ ସଂଖ୍ୟା ୧୧୭ କୁ ଖସିଆସିଛି। ବର୍ତ୍ତମାନ କଂଗ୍ରେସ, ବାମପନ୍ଥୀ ଦଳ (CPI, CPM) ଏବଂ ଭିସିକେ (VCK) ପରି ଛୋଟ ଦଳର ସମର୍ଥନରେ ସରକାର ଗଠନ କରିଥିବା ମୁଖ୍ୟମନ୍ତ୍ରୀ ବିଜୟଙ୍କୁ ଆଜି ବିଧାନସଭାରେ ଆସ୍ଥା ଭୋଟ୍‌ର ସମ୍ମୁଖୀନ ହେବାକୁ ପଡିବ। ସିପିଆଇ (CPI) ଏହାର ଦୁଇଟି ଆସନ ସହିତ ସମର୍ଥନ ଘୋଷଣା କରିସାରିଛି, ଯାହା ବିଜୟଙ୍କୁ ସହଜରେ ବହୁମତ ଅତିକ୍ରମ କରିବାରେ ସାହାଯ୍ୟ କରିବ।

ଏଆଇଏଡିଏମକେ (AIADMK) ରେ ଫାଟ ଓ ଟିଭିକେ (TVK) କୁ ସମର୍ଥନ

ଏହି ଆସ୍ଥା ଭୋଟ୍‌ ପୂର୍ବରୁ ତାମିଲନାଡୁର ପ୍ରମୁଖ ବିରୋଧୀ ଦଳ ଏଆଇଏଡିଏମକେ (AIADMK) ରେ ବଡ଼ ଧରଣର ବିଭାଜନ ଦେଖିବାକୁ ମିଳିଛି। ଇଡାପ୍ପାଡି କେ. ପଲାନିସ୍ୱାମୀ (EPS)ଙ୍କ ନେତୃତ୍ୱକୁ ବିରୋଧ କରି ସି.ଭି ଷଣ୍ମୁଗମ୍ ଏବଂ ଏସ୍.ପି ବେଲୁମଣିଙ୍କ ନେତୃତ୍ୱରେ ପ୍ରାୟ ୩୦ ଜଣ ବିଧାୟକଙ୍କୁ ନେଇ ଗଠିତ ଏକ ବିଦ୍ରୋହୀ ଗୋଷ୍ଠୀ ମୁଖ୍ୟମନ୍ତ୍ରୀ ବିଜୟଙ୍କ ସରକାରକୁ ସମର୍ଥନ ଘୋଷଣା କରିଛନ୍ତି। ଏହା ବିଜୟଙ୍କ ସ୍ଥିତିକୁ ଆହୁରି ମଜବୁତ କରିଛି।

୭୦୦ ରୁ ଊର୍ଦ୍ଧ୍ୱ ମଦ ଦୋକାନ ବନ୍ଦ ନିର୍ଦ୍ଦେଶ

ଆସ୍ଥା ଭୋଟ୍‌ ପୂର୍ବରୁ ନୂଆ ମୁଖ୍ୟମନ୍ତ୍ରୀ ବିଜୟ ଏକ ବଡ଼ ନିଷ୍ପତ୍ତି ନେଇଛନ୍ତି। ସେ ରାଜ୍ୟରେ ଶିକ୍ଷାନୁଷ୍ଠାନ, ଧର୍ମପୀଠ ଏବଂ ବସ୍ ଷ୍ଟାଣ୍ଡର ୫୦୦ ମିଟର ପରିସର ମଧ୍ୟରେ ଥିବା ୭୧୭ ଟି ସରକାରୀ ପରିଚାଳିତ ଟାସମାକ୍ (TASMAC) ମଦ ଦୋକାନକୁ ଆସନ୍ତା ଦୁଇ ସପ୍ତାହ ମଧ୍ୟରେ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି।

ତାମିଲନାଡୁ: ଜଣେ ଜ୍ୟୋତିଷ ହେଲେ ତାମିଲନାଡୁ ମୁଖ୍ୟମନ୍ତ୍ରୀ ବିଜୟଙ୍କ OSD । ଜ୍ୟୋତିଷ ରିକି ରାଧାନ ପଣ୍ଡିତଙ୍କୁ OSD ନିଯୁକ୍ତି ଦେଲେ ଥାଲାପତି ବିଜୟ । ତାମିଲନାଡୁର ନବନିର୍ବାଚିତ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ନିଜର ବ୍ୟକ୍ତିଗତ ଜ୍ୟୋତିଷ ରିକି ରାଧନ ପଣ୍ଡିତ ଭେଟ୍ରିଭେଲଙ୍କୁ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର କର୍ତ୍ତବ୍ୟରତ ଅଧିକାରୀ କିମ୍ବା ଓଏସଡି (OSD - Political) ଭାବରେ ନିଯୁକ୍ତ କରିଛନ୍ତି। ମେ' ୧୨ ତାରିଖରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଦିଆଯାଇଥିବା ଏକ ନୋଟ୍ ଆଧାରରେ ଏହି ନିଯୁକ୍ତି ଆଦେଶ ଜାରି କରାଯାଇଛି। ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିବା ପରେ ନିଜର ରାଜନୈତିକ ଏବଂ ପ୍ରଶାସନିକ ବ୍ୟବସ୍ଥାକୁ ମଜବୁତ କରିବା ଦିଗରେ ଏହା ବିଜୟଙ୍କ ଏକ ପ୍ରମୁଖ ପଦକ୍ଷେପ ବୋଲି କୁହାଯାଉଛି।

ପ୍ରାୟ ଚାରି ଦଶନ୍ଧି ଧରି ବୈଦିକ ଜ୍ୟୋତିଷ, ସଂଖ୍ୟାତତ୍ତ୍ୱ ଏବଂ ଧ୍ୟାନ-ଆଧାରିତ ପରାମର୍ଶ କ୍ଷେତ୍ରରେ ବିଶେଷଜ୍ଞତା ହାସଲ କରିଥିବା ରାଧନ ପଣ୍ଡିତ ଭେଟ୍ରିଭେଲ ହେଉଛନ୍ତି ଭାରତର ଅନ୍ୟତମ ପ୍ରସିଦ୍ଧ ସେଲିବ୍ରିଟି ତଥା ରାଜନୈତିକ ଜ୍ୟୋତିଷ। ଗଣମାଧ୍ୟମ ରିପୋର୍ଟ ଅନୁଯାୟୀ, ତାଙ୍କର କ୍ଲାଏଣ୍ଟମାନଙ୍କ ମଧ୍ୟରେ ଭାରତୀୟ ଜନତା ପାର୍ଟି (ବିଜେପି), ଭାରତୀୟ ଜାତୀୟ କଂଗ୍ରେସ, ଡିଏମକେ (DMK) ଏବଂ ଏଆଇଏଡିଏମକେ (AIADMK) ଭଳି ପ୍ରମୁଖ ଦଳର ନେତାମାନେ ସାମିଲ ଅଛନ୍ତି। ରାଜନୈତିକ ମହଲରେ ତାଙ୍କୁ ମୁଖ୍ୟମନ୍ତ୍ରୀ ବିଜୟଙ୍କ ଅତ୍ୟନ୍ତ ଘନିଷ୍ଠ ବୋଲି ବିବେଚନା କରାଯାଏ ଏବଂ ନିକଟ ଅତୀତରେ ସେ ଅନେକ ପ୍ରମୁଖ ରାଜନୈତିକ ତଥା ବ୍ୟକ୍ତିଗତ କାର୍ଯ୍ୟକ୍ରମରେ ବିଜୟଙ୍କ ସହ ନଜର ଆସିଛନ୍ତି।

ରାଧନ ପଣ୍ଡିତ ହେଉଛନ୍ତି ମୁଖ୍ୟମନ୍ତ୍ରୀ ବିଜୟ ଏବଂ ତାଙ୍କ ଦଳ ତାମିଲାଗା ଭେଟ୍ରି କାଜାଗମ୍ (TVK) ର ସବୁଠାରୁ ବଡ଼ ସମର୍ଥକ। ନିର୍ବାଚନ ପୂର୍ବରୁ ସେ ଭବିଷ୍ୟବାଣୀ କରିଥିଲେ ଯେ ବିଜୟଙ୍କ କୁଣ୍ଡଳୀରେ ରାଜନୈତିକ ସଫଳତା ପାଇଁ ଏକ ଅସାଧାରଣ ବା ସୁନାମି ଭଳି କ୍ଷମତା ରହିଛି। ସେ ଦାବି କରିଥିଲେ ଯେ ବିଜୟ ରାଜ୍ୟରେ ୧୫୦ ରୁ ଅଧିକ ଆସନ ହାସଲ କରି ମୁଖ୍ୟମନ୍ତ୍ରୀ ହେବେ। ୨୦୨୪ ମସିହାରେ ସେ ଏକ ୟୁଟ୍ୟୁବ୍ ଭିଡିଓ ମଧ୍ୟ ଜାରି କରିଥିଲେ ଯେଉଁଥିରେ ସେ ବିଜୟଙ୍କ ରାଜନୈତିକ ସଫଳତାର କାରଣ ବର୍ଣ୍ଣନା କରିଥିଲେ। ସୂଚନାଯୋଗ୍ୟ ଯେ, ତାମିଲନାଡୁ ବିଧାନସଭା ନିର୍ବାଚନରେ ତାଙ୍କ ଦଳ ୨୩୪ ରୁ ୧୦୮ ଟି ଆସନ ଜିତିଥିଲା ଏବଂ କଂଗ୍ରେସ ଓ ଭିସିକେ (VCK) ର ସମର୍ଥନରେ ବିଜୟ ମେ' ୧୦ ତାରିଖରେ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ।

ତାମିଲନାଡୁ: ମେ ୭ ତାରିଖରେ ତାମିଲନାଡୁର ମୁଖ୍ୟମନ୍ତ୍ରୀ ଭାବେ ଶପଥ ନେଇନପାରନ୍ତି ତାମିଲାଗା ଭେଟ୍ରି କାଜାଗମ୍ (ଟିଭିକେ) ମୁଖ୍ୟ ବିଜୟ। ସଂଖ୍ୟାଗରିଷ୍ଠତା ପ୍ରମାଣ ପାଇଁ ଦଳ ଏବେ ମଧ୍ୟ ସଂଘର୍ଷ କରୁଥିବା ବେଳେ, ସରକାର ଗଠନ ନେଇ ଅନିଶ୍ଚିତତା ଦେଖାଦେଇଛି।

୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ୧୦୮ଟି ଆସନ ସହ ଟିଭିକେ ସବୁଠାରୁ ବଡ଼ ଦଳ ଭାବେ ଉଭା ହୋଇଛି। ତେବେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ୧୧୮ ରହିଥିବା ବେଳେ, ଦଳ ଏହାଠାରୁ ପଛରେ ରହିଛି। ଏହାବ୍ୟତୀତ, ବିଜୟ ବିଜୟୀ ହୋଇଥିବା ଦୁଇଟି ଆସନରୁ ଗୋଟିଏ ଛାଡିବା ପରେ ଦଳର ପ୍ରକୃତ ସଂଖ୍ୟା ୧୦୭ କୁ ଖସିଆସିବ।

ସୂତ୍ରରୁ ପ୍ରକାଶ ଯେ, ବହୁମତ ପ୍ରମାଣିତ କରିବା ପାଇଁ ଟିଭିକେ ପାଖରେ କୌଣସି ଆନୁଷ୍ଠାନିକ ଆକଳନ ନଥିବାରୁ ରାଜ୍ୟପାଳ ଏପର୍ଯ୍ୟନ୍ତ ସନ୍ତୁଷ୍ଟ ନାହାନ୍ତି। ଅନ୍ୟପକ୍ଷରେ, କଂଗ୍ରେସ ନିଜର ୫ ଜଣ ବିଧାୟକଙ୍କ ସହ ଦଳକୁ ସମର୍ଥନ ଜଣାଇଛି। ଏହା ଫଳରେ ମେଣ୍ଟର ସଂଖ୍ୟା ୧୧୩ ରେ ପହଞ୍ଚିଛି। ତଥାପି ବହୁମତ ପାଇଁ ଆହୁରି କିଛି ବିଧାୟକଙ୍କ ଆବଶ୍ୟକତା ଥିବାରୁ ଅନ୍ୟ ସମ୍ଭାବ୍ୟ ସହଯୋଗୀଙ୍କ ସହ ଆଲୋଚନା ଜୋରଦାର କରାଯାଉଛି।

ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ (MK Stalin) ବୁଧବାର ଦିନ କେନ୍ଦ୍ର ସରକାରଙ୍କ ପ୍ରସ୍ତାବିତ ସୀମା ନିର୍ଦ୍ଧାରଣ ବା ଡିଲିମିଟେସନ (Delimitation) ପ୍ରକ୍ରିୟାକୁ ତୀବ୍ର ବିରୋଧ କରିଛନ୍ତି। ନିଜ ପାର୍ଟି ଡିଏମକେ (DMK) ର ସାଂସଦ ଏବଂ ଜିଲ୍ଲାସ୍ତରୀୟ ନେତାମାନଙ୍କ ସହିତ ଏକ ଜରୁରୀକାଳୀନ ବୈଠକ କରିବା ପରେ ସେ କେନ୍ଦ୍ର ସରକାରଙ୍କୁ କଡ଼ା ଚେତାବନୀ ଦେଇଛନ୍ତି। "ଜଣେ ଆତ୍ମସମ୍ମାନୀ ତାମିଲ ଭାବେ ମୁଁ କେନ୍ଦ୍ର ସରକାରଙ୍କୁ ଚେତାବନୀ ଦେଉଛି," ବୋଲି ସେ ସ୍ପଷ୍ଟ ଭାବରେ କହିଛନ୍ତି।

କଳା ପତାକା ପ୍ରଦର୍ଶନ ପାଇଁ ଆହ୍ୱାନ

ଏହି ସୀମା ନିର୍ଦ୍ଧାରଣ ବିଲ୍‌କୁ 'ଏକ ବିରାଟ ଐତିହାସିକ ଅନ୍ୟାୟ' ବୋଲି ଅଭିହିତ କରି ଷ୍ଟାଲିନ ସମଗ୍ର ରାଜ୍ୟରେ ଏକ ବ୍ୟାପକ ଆନ୍ଦୋଳନର ଡାକରା ଦେଇଛନ୍ତି। ଗୁରୁବାର ଅର୍ଥାତ ଏପ୍ରିଲ ୧୬ ତାରିଖରେ ତାମିଲନାଡୁର କୋଣ ଅନୁକୋଣରେ ଥିବା ଘର ଓ ସାର୍ବଜନୀନ ସ୍ଥାନମାନଙ୍କରେ କଳା ପତାକା (Black Flag) ଉତ୍ତୋଳନ କରି ପ୍ରତିବାଦ ଜଣାଇବାକୁ ସେ ଆହ୍ୱାନ ଦେଇଛନ୍ତି। ଏହି ଜରୁରୀକାଳୀନ ବୈଠକ ଭିଡିଓ କନଫରେନ୍ସିଂ ମାଧ୍ୟମରେ ଧର୍ମପୁରୀ (Dharmapuri) ରୁ ପରିଚାଳିତ ହୋଇଥିଲା।

ଦକ୍ଷିଣ ରାଜ୍ୟଗୁଡ଼ିକ ପ୍ରତି ଅନ୍ୟାୟର ଅଭିଯୋଗ

ସଂସଦର ସ୍ୱତନ୍ତ୍ର ଅଧିବେଶନରେ ଲୋକସଭା ଆସନ ସଂଖ୍ୟା ବର୍ତ୍ତମାନର ୫୪୩ ରୁ ୮୫୦ କୁ ବୃଦ୍ଧି କରିବା ପାଇଁ କେନ୍ଦ୍ର ସରକାର ଏକ ବିଲ୍ ଆଣିବାକୁ ଯାଉଛନ୍ତି ବୋଲି ଚର୍ଚ୍ଚା ହେଉଛି। ଏହାଦ୍ୱାରା ଦକ୍ଷିଣ ଭାରତୀୟ ରାଜ୍ୟଗୁଡ଼ିକର ରାଜନୈତିକ ପ୍ରଭାବ କମିଯିବ ବୋଲି ଷ୍ଟାଲିନ ଆଶଙ୍କା ପ୍ରକାଶ କରିଛନ୍ତି। ସେ ପ୍ରଶ୍ନ କରିଛନ୍ତି ଯେ, "ଭାରତର ପ୍ରଗତି ପାଇଁ ଦକ୍ଷିଣ ରାଜ୍ୟଗୁଡ଼ିକ ଯେଉଁ ଅବଦାନ ଦେଇଛନ୍ତି, ତାହା କ'ଣ ସେମାନଙ୍କ ପାଇଁ ଏକ ଅପରାଧ? ଏହା କ'ଣ ତାର ଶାସ୍ତି"?

ବିଜେପି (BJP) ନେତୃତ୍ୱାଧୀନ କେନ୍ଦ୍ର ସରକାର ନିଆଁ ସହ ଖେଳୁଛନ୍ତି ବୋଲି ଅଭିଯୋଗ କରି ଡିଏମକେ ମୁଖ୍ୟ ଆହୁରି ମଧ୍ୟ କହିଛନ୍ତି ଯେ, ଯଦି କେନ୍ଦ୍ର ସରକାର ଏହି ବିଲ୍ ପ୍ରତ୍ୟାହାର ନକରନ୍ତି, ତେବେ ଏହାର ଭୟଙ୍କର ପରିଣାମ ଭୋଗିବାକୁ ପଡ଼ିବ ଏବଂ ଏଥିପାଇଁ ବହୁତ ବଡ଼ ମୂଲ୍ୟ ଦେବାକୁ ପଡ଼ିବ। ତାମିଲନାଡୁ ଏବଂ ପଶ୍ଚିମବଙ୍ଗ ନିର୍ବାଚନ ମଝିରେ କେନ୍ଦ୍ର ଏହି ସ୍ୱତନ୍ତ୍ର ଅଧିବେଶନ ଡାକିବା ଏକ ବଳପୂର୍ବକ ପ୍ରୟାସ ବୋଲି ମଧ୍ୟ ସେ ସମାଲୋଚନା କରିଛନ୍ତି।

ଗଣତନ୍ତ୍ର ଓ ରାଜ୍ୟ ଅଧିକାରର ସୁରକ୍ଷା ପାଇଁ ଏକଜୁଟ୍ ହେବାକୁ ନିବେଦନ

ଏହି ପ୍ରସଙ୍ଗରେ କେବଳ ତାମିଲନାଡୁ ନୁହେଁ, ବରଂ ଅନ୍ୟ ରାଜ୍ୟଗୁଡ଼ିକର ସାଂସଦମାନଙ୍କ ସହିତ ଯୋଗାଯୋଗ କରି ଏକ ମିଳିତ ରଣନୀତି ପ୍ରସ୍ତୁତ କରିବାକୁ ଦଳ ପ୍ରୟାସ କରୁଛି। "ଏହା କୌଣସି ଦଳ ବା ବ୍ୟକ୍ତିବିଶେଷର କଥା ନୁହେଁ। ଏହା ଆମ ଲୋକଙ୍କ ଅଧିକାର ଓ ଗଣତନ୍ତ୍ରକୁ ରକ୍ଷା କରିବାର ସମୟ," ବୋଲି ଏମକେ ଷ୍ଟାଲିନ ସମସ୍ତ ବିରୋଧୀ ଦଳଗୁଡ଼ିକୁ ଏକାଠି ହେବାକୁ ଆହ୍ୱାନ ଦେଇଛନ୍ତି।

ନୂଆଦିଲ୍ଲୀ: ଭାରତର ତିନୋଟି ପ୍ରମୁଖ ଅଞ୍ଚଳ- ଆସାମ, କେରଳ ଏବଂ କେନ୍ଦ୍ରଶାସିତ ଅଞ୍ଚଳ ପୁଡୁଚେରୀରେ ପରବର୍ତ୍ତୀ ସରକାର ବାଛିବା ପାଇଁ ମତଦାନ ପ୍ରକ୍ରିୟା ଆରମ୍ଭ ହୋଇଛି। କାଳ ୭ଟାରୁ ଭୋଟିଂ ଆରମ୍ଭ ହୋଇଥିବା ବେଳେ ନିର୍ବାଚନ  ସୁରୁଖୁରୁରେ ପରିଚାଳନା କରିବା ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା, ୱେବକାଷ୍ଟିଂ ଏବଂ ସ୍ୱତନ୍ତ୍ର ଭୋଟର ସୁବିଧା କରାଯାଇଛି। ଲୋକେ ପୁଲିଂ ବୁଥରେ ପହଞ୍ଚି ଭୋଟ୍ ଦେବା ଜାରି ରଖିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦଳ ପାଇଁ ଏହା ଏକ ବଡ଼ ପରୀକ୍ଷା ବୋଲି ବିବେଚନା କରାଯାଉଛି। 

ଆସାମ: ଆସାମରେ ଗତ ଏକ ଦଶନ୍ଧି ଧରି ବିଜେପି କ୍ଷମତାରେ ରହିଛି ଏବଂ ପୁଣିଥରେ ସତ୍ତା ବଜାୟ ରଖିବାକୁ ଚେଷ୍ଟା କରୁଛି। ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଅନୁପ୍ରବେଶ ଏବଂ ଜନସାଂଖ୍ୟିକ ପରିବର୍ତ୍ତନକୁ ମୁଖ୍ୟ ପ୍ରସଙ୍ଗ କରିଥିବା ବେଳେ କଂଗ୍ରେସ ନେତୃତ୍ୱାଧୀନ ବିରୋଧୀ ମେଣ୍ଟ ଶାସନ ଏବଂ ଅର୍ଥନୈତିକ ପ୍ରସଙ୍ଗ ଉପରେ ଗୁରୁତ୍ୱ ଦେଉଛି।

କେରଳ ଏବଂ ପୁଡୁଚେରୀ: କେରଳରେ ସାଧାରଣତଃ କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ (ମାର୍କ୍ସବାଦୀ) ଏବଂ କଂଗ୍ରେସ ମଧ୍ୟରେ କ୍ଷମତା ପରିବର୍ତ୍ତନ ହୋଇଥାଏ। ବାମପନ୍ଥୀ ମେଣ୍ଟ ଗତ ୧୦ ବର୍ଷ ଧରି ଏଠାରେ କ୍ଷମତାରେ ଅଛି। ସେହିପରି ୩୦ ଆସନ ବିଶିଷ୍ଟ ପୁଡୁଚେରୀରେ ବିଜେପି ନେତୃତ୍ୱାଧୀନ ଏନଡିଏ ମେଣ୍ଟ ବର୍ତ୍ତମାନ କ୍ଷମତାରେ ରହିଛି।

ଚଳିତ ମାସ ଶେଷ ଆଡ଼କୁ ଅନ୍ୟ ଦୁଇଟି ରାଜ୍ୟ- ପଶ୍ଚିମବଙ୍ଗ ଏବଂ ତାମିଲନାଡୁରେ ମତଦାନ ଅନୁଷ୍ଠିତ ହେବ। ଆସନ୍ତା ମେ ୪ ତାରିଖରେ ସମସ୍ତ ୫ଟି ଯାକ ଅଞ୍ଚଳର ଭୋଟ ଗଣତି କରାଯିବ। ଭାରତର ନିର୍ବାଚନ ଆୟୋଗଙ୍କ ତଥ୍ୟ ଅନୁଯାୟୀ, ଏହି ୫ଟି ରାଜ୍ୟରେ ମୋଟ ୧୭୪ ନିୟୁତ ଭୋଟର ଅଛନ୍ତି, ଯାହାକି ଦେଶର ସମୁଦାୟ ଭୋଟରଙ୍କ ପ୍ରାୟ ୧୮ ପ୍ରତିଶତ। ବିଜେପି ବର୍ତ୍ତମାନ ଆସାମରେ କ୍ଷମତାରେ ଥିବା ବେଳେ ପୁଡୁଚେରୀରେ ଶାସକ ମେଣ୍ଟର ଅଂଶବିଶେଷ ରହିଛି। ତେବେ ପଶ୍ଚିମବଙ୍ଗ, କେରଳ ଏବଂ ତାମିଲନାଡୁରେ ଦଳ କେବେବି ସରକାର ଗଠନ କରିପାରି ନାହିଁ। ନିଜର ପାରମ୍ପରିକ ଗଡ଼ ବାହାରେ ଦକ୍ଷିଣ ଏବଂ ପୂର୍ବ ଭାରତରେ ପତିଆରା ବିସ୍ତାର କରିବାକୁ ବିଜେପି ଲକ୍ଷ୍ୟ ରଖିଛି। ଅନ୍ୟପକ୍ଷରେ, ବିଜେପିର ଆଧିପତ୍ୟକୁ କଡ଼ା ଚ୍ୟାଲେଞ୍ଜ ଦେବା ପାଇଁ ବିରୋଧୀ ଦଳ, ବିଶେଷକରି କଂଗ୍ରେସ ନିମନ୍ତେ ଏହି ନିର୍ବାଚନ ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ।

୫ଟି ଅଞ୍ଚଳର ମୋଟ ୮୨୪ଟି ବିଧାନସଭା ଆସନ ପାଇଁ ମତଦାନ ହେଉଛି। ତେବେ ନିର୍ବାଚନ ପୂର୍ବରୁ ସ୍ୱତନ୍ତ୍ର ଭୋଟର ତାଲିକା ସଂଶୋଧନ (SIR) କାର୍ଯ୍ୟକ୍ରମକୁ ନେଇ ବଡ଼ ବିବାଦ ଦେଖାଦେଇଛି। ବିଜେପିକୁ ଫାଇଦା ପହଞ୍ଚାଇବା ପାଇଁ ଏହି ପ୍ରକ୍ରିୟା ଜରିଆରେ ବିଶେଷ କରି ସଂଖ୍ୟାଲଘୁ (ମୁସଲମାନ) ସମ୍ପ୍ରଦାୟର ଲକ୍ଷ ଲକ୍ଷ ଭୋଟରଙ୍କ ନାମ ତାଲିକାରୁ ବାଦ୍ ଦିଆଯାଇଥିବା ନେଇ ବିରୋଧୀ ଅଭିଯୋଗ ଆଣିଛନ୍ତି। ଯଦିଓ ନିର୍ବାଚନ ଆୟୋଗ ଏବଂ ବିଜେପି ଏହି ଅଭିଯୋଗକୁ ସମ୍ପୂର୍ଣ୍ଣ ରୂପେ ଖଣ୍ଡନ କରିଛନ୍ତି।

ତାମିଲନାଡୁର ତିରୁନେଲଭେଲି ଅଞ୍ଚଳରେ ଏକ ଅଭାବନୀୟ ତଥା ହୃଦୟବିଦାରକ ଘଟଣା ଦେଖିବାକୁ ମିଳିଛି। ପତ୍ନୀଙ୍କ ଚରିତ୍ର ଉପରେ ସନ୍ଦେହ କରି ଜଣେ ବ୍ୟକ୍ତି ତାଙ୍କୁ ବସ୍ ଷ୍ଟାଣ୍ଡରେ ଦିନଦ୍ୱିପ୍ରହରରେ ଗୋଡ଼ାଇ ଗୋଡ଼ାଇ ଅତି ନିର୍ମମ ଭାବେ ହାଣି ହତ୍ୟା କରିଛନ୍ତି। ଏହି ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।

ସନ୍ଦେହରୁ ଗଲା ଜୀବନ

ମିଳିଥିବା ସୂଚନା ଅନୁଯାୟୀ, ତିରୁନେଲଭେଲି ଜିଲ୍ଲାର ପାଲାମାଡାଇ ଅଞ୍ଚଳର ବାସିନ୍ଦା ସୁଧାକରଙ୍କ ସହ ପେଚିୟମ୍ମଲଙ୍କ ବିବାହ ହୋଇଥିଲା। ଉଭୟଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି। ତେବେ ଗତ କିଛି ଦିନ ହେବ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ପାରିବାରିକ ବିବାଦ ଲାଗି ରହିଥିଲା। ନିଜ ପତ୍ନୀଙ୍କର ଅନ୍ୟ କାହା ସହିତ ଅବୈଧ ସମ୍ପର୍କ ଥିବା ନେଇ ସୁଧାକର ସବୁବେଳେ ସନ୍ଦେହ କରୁଥିଲେ। ଏହି କାରଣରୁ ଉଭୟଙ୍କ ମଧ୍ୟରେ ଝଗଡ଼ା ହେଉଥିଲା ଏବଂ ବିବାଦ ବଢ଼ିବାରୁ ପେଚିୟମ୍ମଲ ନିଜ ସ୍ୱାମୀଙ୍କଠାରୁ ଅଲଗା ରହୁଥିଲେ।

କିପରି ଘଟିଲା ଘଟଣା?

ସୁଧାକର ନିଜ ସ୍ତ୍ରୀଙ୍କ ଉପରେ ରାଗ ରଖିଥିବା ବେଳେ ତାଙ୍କୁ ହତ୍ୟା କରିବା ପାଇଁ ଯୋଜନା କରିଥିଲେ। ଘଟଣା ଦିନ ପେଚିୟମ୍ମଲ ଘରୁ ବାହାରି ଏକ ବସ୍ ଷ୍ଟାଣ୍ଡରେ ଛିଡ଼ା ହୋଇଥିଲେ। ସେହି ସମୟରେ ସୁଧାକର ଏକ ଧାରୁଆ ଅସ୍ତ୍ର (ଦାଆ) ଧରି ସେଠାରେ ପହଞ୍ଚିଥିଲେ। ଦିନଦ୍ୱିପ୍ରହରରେ ସର୍ବସମ୍ମୁଖରେ ସେ ନିଜ ସ୍ତ୍ରୀଙ୍କୁ ଗୋଡ଼ାଇ ଗୋଡ଼ାଇ ଆକ୍ରମଣ କରିଥିଲେ। ରକ୍ତ ଜୁଡୁବୁଡୁ ଅବସ୍ଥାରେ ଘଟଣାସ୍ଥଳରେ ହିଁ ପେଚିୟମ୍ମଲଙ୍କର ମୃତ୍ୟୁ ହୋଇଯାଇଥିଲା।

ଥାନାରେ ସ୍ୱାମୀର ଆତ୍ମସମର୍ପଣ

ଏହି ବର୍ବରକାଣ୍ଡ ଭିଆଇବା ପରେ ଅଭିଯୁକ୍ତ ସ୍ୱାମୀ ଘଟଣାସ୍ଥଳରୁ ଫେରାର ହେବା ପରିବର୍ତ୍ତେ ସିଧାସଳଖ ନିକଟସ୍ଥ ପୋଲିସ୍ ଷ୍ଟେସନରେ ପହଞ୍ଚିଥିଲେ। ସେଠାରେ ସେ ନିଜର ଦୋଷ ସ୍ୱୀକାର କରିବା ସହ ଆତ୍ମସମର୍ପଣ କରିଥିଲେ। ପୋଲିସ୍ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ (ପୋଷ୍ଟମର୍ଟମ) ପାଇଁ ପଠାଇଛି। ବର୍ତ୍ତମାନ ପୋଲିସ୍ ଏହି ହତ୍ୟାକାଣ୍ଡର ଅଧିକ ତଦନ୍ତ ଜାରି ରଖିଥିବା ସୂଚନା ମିଳିଛି।

ନୂଆଦିଲ୍ଲୀ: କରୁର ଦଳାଚକଟା ମାମଲାରେ ଅଭିନେତା ତଥା ଟିଭିକେ (TVK) ମୁଖ୍ୟ ବିଜୟଙ୍କ ଅଡ଼ୁଆ ବଢ଼ିବାରେ ଲାଗିଛି। ଏହି ମାମଲାର ଅଧିକ ପଚରାଉଚରା ପାଇଁ କେନ୍ଦ୍ରୀୟ ତଦନ୍ତ ବ୍ୟୁରୋ ବା ସିବିଆଇ (CBI) ମଙ୍ଗଳବାର ଦିନ ହାଜର ହେବାକୁ ତାଙ୍କୁ ନୂଆ ସମନ ଜାରି କରିଛି।

ଏହାପୂର୍ବରୁ ଗତ ଜାନୁଆରୀ ୧୨ ଏବଂ ୧୯ ତାରିଖରେ ମଧ୍ୟ ସିବିଆଇ ମୁଖ୍ୟାଳୟରେ ଅଭିନେତାଙ୍କୁ ପଚରାଉଚରା କରାଯାଇଥିଲା। ତଦନ୍ତ ଅଧିକାରୀଙ୍କ ସୂଚନା ଅନୁଯାୟୀ, ବର୍ତ୍ତମାନ ସୁଦ୍ଧା ସଂଗ୍ରହ କରାଯାଇଥିବା ତଥ୍ୟ ଆଧାରରେ କିଛି ଦିଗ ଉପରେ ଅଧିକ ସ୍ପଷ୍ଟୀକରଣ ଆବଶ୍ୟକ ଥିବାରୁ ତାଙ୍କୁ ପୁଣିଥରେ ନୋଟିସ ପଠାଯାଇଛି।

ସୂଚନାଯୋଗ୍ୟ ଯେ, ଗତ ୨୦୨୫ ମସିହା ସେପ୍ଟେମ୍ବର ୨୭ ତାରିଖରେ ତାମିଲନାଡୁର କରୁରଠାରେ ବିଜୟଙ୍କ ଏକ ରାଲି ଚାଲିଥିବା ବେଳେ ଭୟଙ୍କର ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା। ଏହି ଅଘଟଣରେ ୪୧ ଜଣଙ୍କର ପ୍ରାଣହାନୀ ଘଟିଥିବା ବେଳେ ୬୦ରୁ ଅଧିକ ଲୋକ ଆହତ ହୋଇଥିଲେ।

ପରବର୍ତ୍ତୀ ସମୟରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଠାରୁ ଏହି ମାମଲା ସିବିଆଇ ହାତକୁ ଯାଇଥିଲା। ଗତ ବର୍ଷ ଅକ୍ଟୋବର ମାସରେ ସୁପ୍ରିମକୋର୍ଟ ଏହି ମାମଲାର ତଦନ୍ତ ଭାର ଜଣେ ବରିଷ୍ଠ ଅଧିକାରୀଙ୍କୁ ଦେବାକୁ ସିବିଆଇ ନିର୍ଦ୍ଦେଶକଙ୍କୁ କହିଥିଲେ। ଏଥିସହ ସିବିଆଇ ତଦନ୍ତ ଉପରେ ନଜର ରଖିବା ପାଇଁ ସୁପ୍ରିମକୋର୍ଟର ପୂର୍ବତନ ବିଚାରପତି ଅଜୟ ରସ୍ତୋଗୀଙ୍କ ନେତୃତ୍ୱରେ ଏକ ତଦାରଖ କମିଟି ମଧ୍ୟ ଗଠନ କରାଯାଇଥିଲା।

ବିଚାରପତି ଜଷ୍ଟିସ ଜେ. କେ. ମାହେଶ୍ୱରୀ ଏବଂ ଏନ. ଭି. ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ କହିଥିଲେ ଯେ, ଏହି ଘଟଣା ସାରା ଦେଶର ନାଗରିକଙ୍କ ମନରେ ଗଭୀର ରେଖାପାତ କରିଛି। ତେଣୁ ନିରପେକ୍ଷ ତଥା ସ୍ୱାଧୀନ ତଦନ୍ତ ମାଧ୍ୟମରେ ଅପରାଧିକ ନ୍ୟାୟ ବ୍ୟବସ୍ଥା ଉପରେ ଜନସାଧାରଣଙ୍କ ବିଶ୍ୱାସ ଫେରାଇ ଆଣିବା ନିହାତି ଆବଶ୍ୟକ ବୋଲି ସର୍ବୋଚ୍ଚ ନ୍ୟାୟାଳୟ ଗୁରୁତ୍ୱାରୋପ କରିଥିଲେ।

ତାମିଲନାଡୁର ସେଲମରେ ଅଭିନେତା ତଥା ରାଜନେତା ବିଜୟଙ୍କ ପାର୍ଟି 'ତାମିଲଗା ଭେଟ୍ରି କାଝଗମ୍' (TVK) ର ଏକ ରାଲି ବେଳେ ପୁଣି ଥରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ରାଲିରେ ସାମିଲ ହୋଇଥିବା ଜଣେ ୩୭ ବର୍ଷୀୟ ଯୁବକଙ୍କ ମୃତ୍ୟୁ ଘଟିଛି। ମୃତକ ଜଣକ ମହାରାଷ୍ଟ୍ରର ବୋଲି ଜଣାପଡିଛି ଏବଂ ସେ ବିଜୟଙ୍କୁ ଦେଖିବା ପାଇଁ ସୁଦୂର ମହାରାଷ୍ଟ୍ରରୁ ଆସିଥିଲେ। ଏହି ଘଟଣା ପରେ ତାମିଲନାଡୁର ପ୍ରମୁଖ ବିରୋଧୀ ଦଳ AIADMK ବିଜୟଙ୍କୁ କଡ଼ା ସମାଲୋଚନା କରିଛି।

'ସାଙ୍ଗରେ କଫିନ୍ ଧରି ଆସନ୍ତୁ'

ଏହି ଘଟଣାକୁ ନେଇ AIADMK ପକ୍ଷରୁ ଏକ ବିବାଦୀୟ ତଥା କଡ଼ା ବୟାନ ଜାରି କରାଯାଇଛି। ଦଳ ପକ୍ଷରୁ କୁହାଯାଇଛି ଯେ, "ଭବିଷ୍ୟତରେ ବିଜୟଙ୍କ କାର୍ଯ୍ୟକ୍ରମରେ ଯୋଗଦେବାକୁ ଚାହୁଁଥିବା ଲୋକମାନେ ନିଜ ସାଙ୍ଗରେ କଫିନ୍ (ଶବପେଟିକା) ନେଇ ଆସିବା ଉଚିତ୍।" ଏହି ବୟାନ ରାଜ୍ୟ ରାଜନୀତିରେ ହଇଚଇ ସୃଷ୍ଟି କରିଛି। ବିଜୟଙ୍କ ରାଲିରେ ବାରମ୍ବାର ଅବ୍ୟବସ୍ଥା ଏବଂ ସୁରକ୍ଷା ଅଭାବକୁ ନେଇ ବିରୋଧୀ ଦଳ ପ୍ରଶ୍ନ ଉଠାଇଛି।

କିପରି ଘଟିଲା ଅଘଟଣ?

ରିପୋର୍ଟ ଅନୁଯାୟୀ, ମୃତକଙ୍କ ନାମ ସୁରଜ ଏବଂ ତାଙ୍କ ଘର ମହାରାଷ୍ଟ୍ରରେ। ସେଲମରେ ଆୟୋଜିତ TVKର ଏହି ବିଶାଳ ଜନସଭାରେ ପ୍ରବଳ ଭିଡ଼ ହୋଇଥିଲା। ଅତ୍ୟଧିକ ଗରମ ଏବଂ ଭିଡ଼ କାରଣରୁ ସୁରଜ ହଠାତ୍ ଅସୁସ୍ଥ ହୋଇପଡିଥିଲେ। ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା, କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ୍ ସୂତ୍ରରୁ ମିଳିଥିବା ସୂଚନା ମୁତାବକ, ହୃଦଘାତ କାରଣରୁ ତାଙ୍କର ମୃତ୍ୟୁ ହୋଇଥାଇପାରେ ବୋଲି ଅନୁମାନ କରାଯାଉଛି।

ପୂର୍ବରୁ ମଧ୍ୟ ଘଟିଛି ଅଘଟଣ

ଉଲ୍ଲେଖଯୋଗ୍ୟ ଯେ, ବିଜୟ ରାଜନୀତିରେ ପ୍ରବେଶ କରିବା ପରେ ତାଙ୍କ ରାଲିରେ ପ୍ରବଳ ଜନସମାଗମ ହେଉଛି। ତେବେ ଏହା ପ୍ରଥମ ଘଟଣା ନୁହେଁ; ପୂର୍ବରୁ ମଧ୍ୟ ବିଜୟଙ୍କ ଏକ ରାଲିରେ ଅବ୍ୟବସ୍ଥା ଯୋଗୁଁ ଅନେକ ଲୋକ ଅସୁସ୍ଥ ହୋଇପଡିଥିଲେ ଏବଂ କିଛି ଦୁର୍ଘଟଣା ଘଟିଥିଲା। ଏବେ ନିର୍ବାଚନ ପାଖେଇ ଆସୁଥିବା ବେଳେ ବିରୋଧୀ ଦଳମାନେ ଏହି ପ୍ରସଙ୍ଗକୁ ନେଇ ବିଜୟଙ୍କ ନେତୃତ୍ୱ ଏବଂ ଆୟୋଜନ ଶୈଳୀ ଉପରେ ପ୍ରଶ୍ନବାଚୀ ସୃଷ୍ଟି କରୁଛନ୍ତି।

ଚେନ୍ନାଇ: ୨୦୨୬ରେ ତାମିଲନାଡ଼ୁରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହି ନିର୍ବାଚନରେ ସାଉଥ ଷ୍ଟାର୍‌ ବିଜୟଙ୍କ ତାମିଲଗା ଭେଟ୍ଟ୍ରି କାଜଗାମ୍‌ (ଟିଭିକେ) କୌଣସି ଦଳ ସହ ମେଣ୍ଟ ନ କରି ଏକାକୀ ଲଢ଼ିବ। ଚେନ୍ନାଇରେ ଏକ ରାଲିକୁ ସମ୍ବୋଧନ କରିବା ସମୟରେ ବିଜୟ ଏହି ଘୋଷଣା କରିଛନ୍ତି। ରାଜ୍ୟରେ ଶାସକ ଦଳ ଡିଏମ୍‌କେ ସହ ତାଙ୍କର ରାଜନୈତିକ ଶତ୍ରୁତା ରହିଛି ଏବଂ କେନ୍ଦ୍ରରେ ଶାସକ ଭାଜପା ସହ ତାଙ୍କର ବୈଚାରିକ ଶତ୍ରୁତା ରହିଛି। ତେଣୁ ଉଭୟ ଦଳ ସହ ଟିଭିକେର ମେଣ୍ଟ ହେବା ନେଇ ପ୍ରଶ୍ନ ଉଠୁନାହିଁ ବୋଲି ବିଜୟ କହିଛନ୍ତି। ୨୦୨୬ ତାମିଲନାଡ଼ୁ ବିଧାନସଭା ନିର୍ବାଚନରେ ମୁଖ୍ୟ ମୁକାବିଲା ଡିଏମ୍‌କେ ଓ ଟିଭିକେ ମଧ୍ୟରେ ହେବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ସେହିପରି ବିଜୟ ମଦୁରାଇ ପୂର୍ବ ଆସନରୁ ଲଢ଼ିବେ ବୋଲି ଘୋଷଣା କରିଛନ୍ତି।

ଚେନ୍ନାଇ: ତାମିଲନାଡ଼ୁର ଏକ ଘରୋଇ ହସ୍ପିଟାଲ୍‌ରେ ଅଗ୍ନିକାଣ୍ଡ ଘଟିଛି । ଏହି ଅଗ୍ନିକାଣ୍ଡରେ ୬ ଜଣଙ୍କର ମୃତ୍ୟୁ ଘଟିଥିବାବେଳେ ୨୦ ଜଣ ଆହତ ହୋଇଛନ୍ତି। ଗତକାଲି ବିଳମ୍ବିତ ରାତିରେ ଡିଣ୍ଡିଗୁଲର ଏକ ଅର୍ଥୋପେଡିକ୍ ହସ୍ପିଟାଲ୍‌ରେ ନିଆଁ ଲାଗିଥିବା ନେଇ ସୂଚନା ମିଳିଛି । ମୃତକଙ୍କ ମଧ୍ୟରେ ୨ ମହିଳା ଓ ଜଣେ ଶିଶୁ ଥିବା ନେଇ ସୂଚନା ମିଳିଛି । ଖବର ପାଇ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହ ଉଦ୍ଧାର କାର୍ଯ୍ୟ ଜାରି ରଖିଛି ଅଗ୍ନିଶମ ବାହିନୀ ।

ସୂଚନା ଅନୁସାରେ, ଗତକାଲି ରାତି ପ୍ରାୟ ୧୦ଟା ସମୟରେ ତାମିଲନାଡୁର ଡିଣ୍ଡିଗୁଲର ଏକ ଘରୋଇ ହସ୍ପିଟାଲରେ ବଡ ଧରଣର ଅଗ୍ନିକାଣ୍ଡ ଘଟିଛି । ଖବରପାଇ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା ଅଗ୍ନିଶମ ବାହିନୀ। ରିପୋର୍ଟ ଅନୁଯାୟୀ, ଡାକ୍ତରଖାନାରେ ଫସି ରହିଥିବା ପ୍ରାୟ ୧୦୦ ଲୋକଙ୍କୁ ଉଦ୍ଧାର କରିବା ପାଇଁ ତିନୋଟି ଅଗ୍ନିଶମ ବାହିନୀ ଗାଡି ନିୟୋଜିତ ହୋଇଥିଲା । ସେହିପରି ଲୋକଙ୍କୁ ସ୍ଥାନାନ୍ତର ପାଇଁ ୪୦ଟି ଆମ୍ବୁଲାନ୍ସ ନିୟୋଜିତ ହୋଇଥିଲା । ଅଗ୍ନିକାଣ୍ଡରେ ୬ ଜଣଙ୍କର ମୃତ୍ୟୁ ହୋଇଥିବାବେଳେ ୨୦ରୁ ଅଧିକ ଲୋକ ଆହତ ହୋଇଛନ୍ତି।  ଆହତଙ୍କ ମଧ୍ୟରୁ ତିନିଜଣଙ୍କ ଅବସ୍ଥା ଗୁରୁତର ରହିଛି। ସମସ୍ତଙ୍କୁ ଅନ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।

ତାମିଲନାଡ଼ୁ: ତାମିଲନାଡ଼ୁର ଚେନ୍ନାଇ ନିକଟରେ ଟ୍ରେନ୍ ଦୁର୍ଘଟଣା ଘଟିଥିବା ଜଣାପଡ଼ିିଛି। ଥିରୁଭାଲୁର ଜିଲ୍ଲାର କବରପେଟ୍ଟାଇ ଷ୍ଟେସନ ନିକଟରେ ଏହି ଦୁର୍ଘଟଣା ଘଟିଛି। ମହୀଶୁର-ଦରଭଙ୍ଗା ଏକ୍ସପ୍ରେସ୍ ସହ ମାଲବାହୀ ଟ୍ରେନ୍ ଧକ୍କା ହୋଇଥିଲା। ଦୁର୍ଘଟଣାରେ ଅନେକ ଯାତ୍ରୀ ଆହତ ହୋଇଥିବା ସୂଚନା । ଦୁର୍ଘଟଣା ପରେ ଟ୍ରେନ୍‌ରୁ ଧୂଆଁ ବାହାରୁଥିବା ସୂଚନା । ଖବର ପାଇ ଘଟଣାସ୍ଥଳରେ ରେସ୍କ୍ୟୁ ଟିମ ପହଞ୍ଚଛନ୍ତି। ଦୁର୍ଘଟଣାରେ ୫ରୁ ୬ଟି ବଗି ଲାଇନଚ୍ଯୁତ ହୋଇଥିବା ଜଣାପଡ଼ିଛି।

ତାମିଲନାଡୁ: ତାମିଲନାଡୁର ଶିବକାଶୀ ଅଞ୍ଚଳରେ ଘଟିଛି ଅଭାବନୀୟ ଘଟଣା। ବାଣ କାରଖାନାରେ ଭୟଙ୍କର ବିସ୍ଫୋରଣ ଘଟି ୮ ଜଣଙ୍କ ମୃତ୍ଯୁ ଘଟିଥିବା ବେଳେ ୧୨ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି।

ସୂଚନା ଅନୁଯାୟୀ, ବାଣ କାରଖାନାରେ ବିସ୍ଫୋରଣ ଯୋଗୁ ୮ ଜଣ ଜୀବନ୍ତ ଦଗ୍ଧ ହୋଇଯାଇଛନ୍ତି। ସେହିପରି ୧୨ ଜଣ ଗୁରୁତର ଅଛନ୍ତି। ସେମାନଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ସମସ୍ତ ମୃତକ ଏହି ବାଣ କାରଖାନାରେ କାମ କରୁଥିଲେ। ବିସ୍ଫୋରଣ ପରେ ପୂରା କାରଖାନାରେ ନିଆଁ ଲାଗି ଯାଇଥିଲା। ଖବର ପାଇ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଛି। ତେବେ କେଉଁ କାରଣ ଯୋଗୁ କାରଖାନାରେ ବିସ୍ଫୋରଣ ହୋଇଛି ସେ ନେଇ ସୂଚନା ମିଳିନାହିଁ।