ଦୁଷ୍କର୍ମ ଓ ହତ୍ୟା ଭଳି ସଙ୍ଗିନ ଅପରାଧରେ ଜେଲ ଦଣ୍ଡ ଭୋଗୁଥିବା ଡେରା ସଚ୍ଚା ସଉଦା ମୁଖ୍ୟ ଗୁରମିତ ରାମ ରହିମ ସିଂହଙ୍କୁ ପୁଣିଥରେ ଜେଲରୁ ଅସ୍ଥାୟୀ ମୁକ୍ତି ମିଳିଛି। ହରିୟାଣା ସରକାର ତାଙ୍କୁ ୨୧ ଦିନିଆ ଫର୍ଲୋ ପ୍ରଦାନ କରିଛନ୍ତି। ମଙ୍ଗଳବାର ସକାଳ ପ୍ରାୟ ୬.୦୫ ମିନିଟରେ ସେ ରୋହତକ ସ୍ଥିତ ସୁନାରିଆ ଜେଲରୁ ବାହାରିଛନ୍ତି। ଏହି ଛୁଟି ସମୟରେ ସେ ସିରସା ସ୍ଥିତ ଡେରା ମୁଖ୍ୟାଳୟରେ ରହିବେ ବୋଲି ଜଣାପଡିଛି।

୨୦୨୦ରୁ ଏପର୍ଯ୍ୟନ୍ତ ୧୭ ଥର ମିଳିଲାଣି ପାରୋଲ ବା ଫର୍ଲୋ

ରାମ ରହିମଙ୍କୁ ବାରମ୍ବାର ପାରୋଲ ବା ଫର୍ଲୋ ମିଳିବା ଏବେ ଚର୍ଚ୍ଚାର ବିଷୟ ପାଲଟିଛି। ସରକାରୀ ତଥ୍ୟ ଅନୁଯାୟୀ, ୨୦୨୦ ମସିହାଠାରୁ ବର୍ତ୍ତମାନ ସୁଦ୍ଧା ଏହା ହେଉଛି ତାଙ୍କର ୧୭ତମ ଅସ୍ଥାୟୀ ମୁକ୍ତି। ଗତ ଜୁନ ୨୬ ତାରିଖରେ ସେ ୩୦ ଦିନିଆ ପାରୋଲ ଶେଷ କରି ଜେଲକୁ ଫେରିଥିଲେ। ମାତ୍ର ଦୁଇ ମାସ ନପୁରୁଣୁ ତାଙ୍କୁ ପୁଣି ଏହି ୨୧ ଦିନିଆ ଫର୍ଲୋ ମିଳିଛି। ଚଳିତ ବର୍ଷ ଜାନୁଆରୀରେ ମଧ୍ୟ ତାଙ୍କୁ ୪୦ ଦିନ ଏବଂ ମେ' ମାସରେ ୩୦ ଦିନର ପାରୋଲ ପ୍ରଦାନ କରାଯାଇଥିଲା।

ସଙ୍ଗିନ ମାମଲାରେ ଦୋଷୀ ସାବ୍ୟସ୍ତ

ସୂଚନାଯୋଗ୍ୟ ଯେ, ୨୦୧୭ ମସିହାରେ ନିଜ ଆଶ୍ରମର ଦୁଇ ଜଣ ମହିଳା ଅନ୍ତେବାସୀଙ୍କୁ ଦୁଷ୍କର୍ମ କରିବା ମାମଲାରେ ସେ ଦୋଷୀ ସାବ୍ୟସ୍ତ ହୋଇଥିଲେ। ଏହି ମାମଲାରେ କୋର୍ଟ ତାଙ୍କୁ ୨୦ ବର୍ଷର ଜେଲ ଦଣ୍ଡ ଶୁଣାଇଥିଲେ। ଏହା ବ୍ୟତୀତ ସାମ୍ବାଦିକ ରାମଚନ୍ଦ୍ର ଛତ୍ରପତିଙ୍କ ହତ୍ୟା ମାମଲାରେ ମଧ୍ୟ ସେ ଆଜୀବନ କାରାଦଣ୍ଡ ଭୋଗୁଛନ୍ତି। ବାରମ୍ବାର ଜେଲରୁ ମୁକ୍ତି ମିଳିବା ନେଇ ରାଜନୈତିକ ଏବଂ ସାଧାରଣ ସ୍ତରରେ ଅନେକ ସମାଲୋଚନା ହେଉଛି, କିନ୍ତୁ ନିର୍ଦ୍ଦିଷ୍ଟ ଆଇନଗତ ପ୍ରକ୍ରିୟା ମାଧ୍ୟମରେ ତାଙ୍କୁ ଫର୍ଲୋ ମିଳିଥିବା କୁହାଯାଇଛି।

ହରିୟାଣାର ରୋହତକ ସ୍ଥିତ ସୁନାରିଆ ଜେଲରେ ବନ୍ଦୀ ଥିବା ଡେରା ସଚ୍ଚା ସୌଦା ମୁଖ୍ୟ ଗୁରମିତ ରାମ ରହିମ ସିଂହଙ୍କୁ ପୁଣିଥରେ ୩୦ ଦିନର ପାରୋଲ ମିଳିଛି। ସକ୍ଷମ ରାଜ୍ୟ କର୍ତ୍ତୃପକ୍ଷଙ୍କ ଅନୁମୋଦନ କ୍ରମେ ମଙ୍ଗଳବାର ସକାଳେ ସେ ଜେଲରୁ ବାହାରିଛନ୍ତି। ନିଜର ୨୦ ବର୍ଷର ଜେଲ୍ ଦଣ୍ଡାଦେଶ ଭୋଗୁଥିବା ବେଳେ ଏହା ହେଉଛି ତାଙ୍କର ୧୬ତମ ଅସ୍ଥାୟୀ ମୁକ୍ତି। ତାଙ୍କ ଓକିଲ ଜିତେନ୍ଦ୍ର ଖୁରାନାଙ୍କ ସୂଚନା ଅନୁଯାୟୀ, ପାରୋଲ ଅବଧିରେ ସେ ସିରସା ସ୍ଥିତ ନିଜ ଡେରା ସଚ୍ଚା ସୌଦାରେ ରହିବେ।

ଜେଲ୍ ବାହାରେ ବିତାଇସାରିଲେଣି ୪୦୬ ଦିନ

୨୦୧୭ ଅଗଷ୍ଟରେ ଦୋଷୀ ସାବ୍ୟସ୍ତ ହେବା ପରଠାରୁ ଗୁରମିତ ରାମ ରହିମଙ୍କୁ ବାରମ୍ବାର ପାରୋଲ ଏବଂ ଫର୍ଲୋ ମିଳୁଛି। ଜେଲ୍ ରେକର୍ଡ ଅନୁଯାୟୀ ତାଙ୍କ କଏଦୀ ନମ୍ବର ହେଉଛି ୮୬୪୭/C। ବର୍ତ୍ତମାନର ଏହି ମୁକ୍ତି ପୂର୍ବରୁ ସେ ପ୍ରାୟ ୯ ବର୍ଷର ଜେଲ୍ ଜୀବନ ମଧ୍ୟରୁ ୪୦୬ ଦିନ ଜେଲ୍ ବାହାରେ ବିତାଇସାରିଛନ୍ତି। ଏହି ୩୦ ଦିନର ପାରୋଲ ଶେଷ ହେବା ବେଳକୁ ସେ ମୋଟ ଉପରେ ୪୩୬ ଦିନ ଜେଲରୁ ବାହାରେ ରହିବେ ବୋଲି ହିସାବ କରାଯାଇଛି। ଚଳିତ ବର୍ଷ ଜାନୁଆରୀ ମାସରେ ମଧ୍ୟ ତାଙ୍କୁ ପାରୋଲ ମିଳିଥିଲା।

କେଉଁ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି ରାମ ରହିମ?

୨୦୧୭ ମସିହାରେ ଏକ ସ୍ୱତନ୍ତ୍ର ସିବିଆଇ ଅଦାଲତ ଗୁରମିତ ରାମ ରହିମଙ୍କୁ ଦୁଇ ଜଣ ମହିଳା ଅନୁଗାମୀଙ୍କ ସହ ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ କରି ୨୦ ବର୍ଷର ଜେଲ୍ ଦଣ୍ଡାଦେଶ ଶୁଣାଇଥିଲେ। ଏହା ବ୍ୟତୀତ ସାମ୍ବାଦିକ ରାମ ଚନ୍ଦ୍ର ଛତ୍ରପତିଙ୍କ ହତ୍ୟା (୨୦୧୯) ଏବଂ ଡେରା ମ୍ୟାନେଜର ରଣଜିତ ସିଂହଙ୍କ ହତ୍ୟା ଷଡ଼ଯନ୍ତ୍ର (୨୦୨୧) ମାମଲାରେ ତାଙ୍କୁ ଆଜୀବନ କାରାଦଣ୍ଡ ଦିଆଯାଇଥିଲା। ତେବେ ପରବର୍ତ୍ତୀ ସମୟରେ ପଞ୍ଜାବ ଏବଂ ହରିୟାଣା ହାଇକୋର୍ଟ ଉଭୟ ରଣଜିତ ସିଂହ ଏବଂ ରାମ ଚନ୍ଦ୍ର ଛତ୍ରପତି ହତ୍ୟା ମାମଲାରେ ତାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି।

ପାରୋଲର ଆଇନଗତ ନିୟମ

ଏହି ନୂତନ ୩୦ ଦିନିଆ ପାରୋଲ ସହିତ ଡେରା ମୁଖ୍ୟ ୨୦୨୬ ବର୍ଷ ପାଇଁ ହରିୟାଣା ଗୁଡ୍ କଣ୍ଡକ୍ଟ ପ୍ରିଜନର୍ସ ଆକ୍ଟ, ୨୦୨୨ ଅଧୀନରେ ଥିବା ସର୍ବାଧିକ ୧୦ ସପ୍ତାହର ପାରୋଲ ସୀମା ପୂରଣ କରିସାରିଛନ୍ତି। ଏହି ଆଇନ ଅନୁଯାୟୀ, ଜଣେ କଏଦୀ ଗୋଟିଏ କ୍ୟାଲେଣ୍ଡର ବର୍ଷରେ ମୋଟ ୧୦ ସପ୍ତାହ ପର୍ଯ୍ୟନ୍ତ ପାରୋଲ ନେଇପାରିବେ। ତେବେ ସେ ଚଳିତ ବର୍ଷ ଆହୁରି ୩ ସପ୍ତାହର ଫର୍ଲୋ ପାଇଁ ଆବେଦନ କରିପାରିବେ ବୋଲି ଜଣାପଡ଼ିଛି। ବାରମ୍ବାର ତାଙ୍କର ଏହି ଅସ୍ଥାୟୀ ମୁକ୍ତିକୁ ନେଇ ବିଭିନ୍ନ ସମୟରେ ରାଜନୈତିକ ଏବଂ ଆଇନଗତ ବିବାଦ ସୃଷ୍ଟି ହେଉଛି।