କେନ୍ଦ୍ର ଖାଉଟି ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ଅନଲାଇନ୍ ବିମାନ ଟିକେଟ୍ ବୁକିଂ ପ୍ଲାଟଫର୍ମଗୁଡ଼ିକ ଦ୍ୱାରା ଆଦାୟ କରାଯାଉଥିବା ଅତ୍ୟଧିକ ବାତିଲ (କ୍ୟାନ୍ସଲେସନ୍) ଚାର୍ଜକୁ ନେଇ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ଶନିବାର ଦିନ ସେ ଏହି ପ୍ରସଙ୍ଗରେ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ଗ୍ରାହକ ବ୍ୟାପାର ବିଭାଗ ଏବଂ କେନ୍ଦ୍ରୀୟ ଗ୍ରାହକ ସୁରକ୍ଷା ପ୍ରାଧିକରଣ (CCPA) କୁ ଅନଲାଇନ୍ ଟିକେଟ୍ ବୁକିଂ ପୋର୍ଟାଲ୍‌ଗୁଡ଼ିକ ଦ୍ୱାରା ନିଆଯାଉଥିବା ଏହି ଅତ୍ୟଧିକ ଦେୟର ଖୋଳତାଡ଼ କରିବାକୁ ନିର୍ଦ୍ଦେଶ ଦିଆଯାଇଛି।

ସ୍ୱଚ୍ଛତା ଏବଂ ଗ୍ରାହକଙ୍କ ବିଶ୍ୱାସ ଉପରେ ପ୍ରଭାବ

ମନ୍ତ୍ରୀ ପ୍ରହ୍ଲାଦ ଯୋଶୀ ନିଜର ଏକ୍ସ (X) ଆକାଉଣ୍ଟରେ ପୋଷ୍ଟ କରି କହିଛନ୍ତି ଯେ, ବୁକିଂ ସମୟରେ ଯାହା ଉଲ୍ଲେଖ ଥାଏ ତା'ଠାରୁ ଅଧିକ ବାତିଲ୍ ଦେୟ ଆଦାୟ କରିବା ସ୍ୱଚ୍ଛତା ଏବଂ ଗ୍ରାହକଙ୍କ ବିଶ୍ୱାସକୁ କ୍ଷୁଣ୍ଣ କରୁଛି। ସେ ବିଭାଗକୁ ନିର୍ଦ୍ଦେଶ ଦେଇଛନ୍ତି ଯେ କୌଣସି ପ୍ଲାଟଫର୍ମ ନିର୍ଦ୍ଧାରିତ ଏୟାରଲାଇନ୍ସ ଚାର୍ଜ ଠାରୁ ଅଧିକ ବା ନିୟମ ବାହାରେ ମନଇଚ୍ଛା ଟଙ୍କା କାଟୁଛି କି ନାହିଁ, ତାହାର ପୁଙ୍ଖାନୁପୁଙ୍ଖ ଯାଞ୍ଚ ହେବ।

କଠୋର ଆଇନଗତ କାର୍ଯ୍ୟାନୁଷ୍ଠାନର ଚେତାବନୀ

ଯଦି କୌଣସି ଅନଲାଇନ୍ ପ୍ଲାଟଫର୍ମ ଗ୍ରାହକ ଅଧିକାରର ଉଲ୍ଲଂଘନ କରୁଥିବାର ପ୍ରମାଣିତ ହୁଏ, ତେବେ ଏହାକୁ ଖାଉଟି ସୁରକ୍ଷା ଆଇନ, ୨୦୧୯ ଅଧୀନରେ 'ଅନୁଚିତ୍ ବାଣିଜ୍ୟ ଅଭ୍ୟାସ' ବା ଅନଫେୟାର ଟ୍ରେଡ୍ ପ୍ରାକ୍ଟିସେସ୍ ଭାବେ ବିବେଚନା କରାଯିବ। ମନ୍ତ୍ରୀ ଚେତାବନୀ ଦେଇଛନ୍ତି ଯେ ଖାଉଟିମାନଙ୍କ ସ୍ୱାର୍ଥ ରକ୍ଷା ତଥା ଉଚିତ୍ ବ୍ୟବହାର ନିଶ୍ଚିତ କରିବା ପାଇଁ CCPA ଆବଶ୍ୟକୀୟ କାର୍ଯ୍ୟାନୁଷ୍ଠାନ, ବିଶେଷକରି 'କ୍ଲାସ୍-ଆକ୍ସନ୍' ପଦକ୍ଷେପ ମଧ୍ୟ ଗ୍ରହଣ କରିବ।

କେଉଁଠୁ ଆସିଲା ଅଭିଯୋଗ?

ଭାରତୀୟ ଜନତା ଯୁବ ମୋର୍ଚ୍ଚା (BJYM) ର ରାଷ୍ଟ୍ରୀୟ ସମ୍ପାଦକ ତେଜିନ୍ଦର ବଗ୍ଗା ଏହି ସମସ୍ୟାକୁ ସାମ୍ନାକୁ ଆଣିବା ପରେ ସରକାର ଏହି ତତ୍ପରତା ଦେଖାଇଛନ୍ତି। ସେ ନିକଟରେ ମୁମ୍ବାଇ ବଦଳରେ ଭୁଲବଶତଃ ନଭି ମୁମ୍ବାଇ ପାଇଁ ଟିକେଟ୍ ବୁକ୍ କରିଦେଇଥିଲେ। ଯେତେବେଳେ ସେ ଅନଲାଇନ୍ ପୋର୍ଟାଲ୍ ଆଗୋଡା (Agoda) ମାଧ୍ୟମରେ ଟିକେଟ୍ ବାତିଲ୍ କଲେ, ସେତେବେଳେ କମ୍ପାନୀ ତାଙ୍କଠାରୁ ୪,୭୬୪ ଟଙ୍କା କ୍ୟାନ୍ସଲେସନ୍ ଫି ଭାବେ କାଟି ନେଇଥିଲା ଏବଂ ମାତ୍ର ୧,୫୭୧ ଟଙ୍କା ରିଫଣ୍ଡ୍ ଦେଇଥିଲା। ଅନ୍ୟପକ୍ଷରେ, ସେ ଯେତେବେଳେ ସମ୍ପୃକ୍ତ ଏୟାରଲାଇନ୍ସ ଆକାସା ଏୟାର (Akasa Air) ର ୱେବସାଇଟ୍ ଯାଞ୍ଚ କଲେ, ସେଠାରେ ବାତିଲ୍ ଚାର୍ଜ ମାତ୍ର ୨୯୯ ଟଙ୍କା ଥିବାବେଳେ ରିଫଣ୍ଡ୍ ପରିମାଣ ୬,୦୭୬ ଟଙ୍କା ଥିବା ଦେଖିବାକୁ ମିଳିଥିଲା।