ବଲିଉଡ ଅଭିନେତା ତଥା ନିର୍ମାତା ସୋହେଲ୍ ଖାନ୍ ନିକଟରେ ତାଙ୍କ ଏକ୍ସ-ୱାଇଫ୍ (ପୂର୍ବତନ ପତ୍ନୀ) ସୀମା ସଜଦେହଙ୍କୁ ଏକ ରିଆଲିଟି ସୋ'ରେ ଦେଖି ଭାବପ୍ରବଣ ହୋଇପଡ଼ିଛନ୍ତି। ଆମାଜନ୍ ପ୍ରାଇମ୍ ଭିଡିଓର ରିଆଲିଟି ସୋ' 'ଆଲାଏନ୍ସ (Alliance)'ରେ ଉଭୟଙ୍କୁ ଏକାଠି ଦେଖିବାକୁ ମିଳିଛି। ଏହି ସୋ'ର ଏକ ଏପିସୋଡ୍‌ରେ ନିଜ ଛାଡ଼ପତ୍ରକୁ ନେଇ ସୋହେଲ ଏକ ବଡ଼ ବୟାନ ଦେଇଛନ୍ତି, ଯାହା ଏବେ ସୋସିଆଲ୍ ମିଡିଆରେ ଚର୍ଚ୍ଚାର ବିଷୟ ପାଲଟିଛି।

ଏହି ସୋ'କୁ ଅଭିନେତା କୁଣାଲ ଖେମୁ ହୋଷ୍ଟ କରୁଥିବା ବେଳେ ଏଥିରେ ସୋହେଲ୍ ଖାନ୍ ଏବଂ ସୀମା ସଜଦେହ ଉଭୟ ୱାଇଲ୍ଡ କାର୍ଡ ପ୍ରତିଯୋଗୀ ଭାବରେ ପ୍ରବେଶ କରିଛନ୍ତି। ସୋ'ର ଏକ ପ୍ରୋମୋରେ କୁଣାଲ୍ ସୋହେଲଙ୍କୁ ସୀମାଙ୍କୁ ଘରେ ଦେଖିବା ପରେ ତାଙ୍କର ପ୍ରତିକ୍ରିୟା ପଚାରିଥିଲେ। ଏହାର ଉତ୍ତରରେ ସୋହେଲ୍ କହିଥିଲେ, "ବହୁତ ଭଲ ଲାଗୁଛି। ମୁଁ ଏହି ସୁନ୍ଦରୀ ମହିଳାଙ୍କ ସହ ୨୫ ବର୍ଷ ବିତାଇଛି ଏବଂ ଆଜି ଜାତୀୟ ଟେଲିଭିଜନରେ ମୁଁ ଏହା ସ୍ୱୀକାର କରୁଛି ଯେ ଯଦି ଆମ ଭିତରେ କିଛି ଭୁଲ୍ ହୋଇଥାଏ, ତେବେ ଏହାର ଦାୟିତ୍ୱ ମୁଁ ନେଉଛି (ଅଗର୍ କୋଇ ଭି ଗଲତି ହୁଇ ହୋଗି ହମାରେ ବିଚ୍ ମେଁ, ଆଇ ଟେକ୍ ଦି ରେସପନ୍ସିବିଲିଟି)।" ସୋହେଲଙ୍କ ଏହି କଥା ଶୁଣି ସୀମା 'ଆୱ୍ (Aww)' କହିଥିଲେ ଏବଂ ଅନ୍ୟ ପ୍ରତିଯୋଗୀମାନେ ଖୁସିରେ ତାଳି ମାରିଥିଲେ।

ସୋ' ପୂର୍ବରୁ ସୀମାଙ୍କୁ ଉପଦେଶ ଦେଇଥିଲେ ସୋହେଲ୍

ସୂଚନାଯୋଗ୍ୟ ଯେ, ଏହି ସୋ'ରେ ପ୍ରବେଶ କରିବା ପୂର୍ବରୁ ସୀମା ଏକ ସାକ୍ଷାତକାରରେ କହିଥିଲେ ଯେ ସେମାନେ ଉଭୟେ ସୋ' ବିଷୟରେ କଥା ହୋଇଥିଲେ। ସୋହେଲ୍ ତାଙ୍କୁ ଉପଦେଶ ଦେଇ କହିଥିଲେ ଯେ, ସୋ' ଭିତରେ କାହା କଥାରେ ନପଡ଼ିବାକୁ କିମ୍ବା କାହାଠାରୁ ନଡରିବାକୁ। ଏହାର ଉତ୍ତରରେ ସୀମା ମଧ୍ୟ କହିଥିଲେ ଯେ, "ତୁମେ ତ ସେଠାରେ ଅଛ।" ଏହି କଥାବାର୍ତ୍ତାରୁ ସ୍ପଷ୍ଟ ଜଣାପଡ଼ୁଛି ଯେ ଅଲଗା ହେବା ପରେ ବି ଉଭୟଙ୍କ ମଧ୍ୟରେ ଏବେ ମଧ୍ୟ ଏକ ସୁନ୍ଦର ବନ୍ଧୁତା ରହିଛି।

ଦୀର୍ଘ ୨୫ ବର୍ଷର ସମ୍ପର୍କ ଏବଂ ଛାଡ଼ପତ୍ର

ସୋହେଲ୍ ଖାନ୍ ଏବଂ ସୀମା ସଜଦେହ ଦୀର୍ଘ ଦୁଇ ଦଶନ୍ଧି ଧରି ବିବାହ ବନ୍ଧନରେ ଆବଦ୍ଧ ଥିଲେ। ତେବେ ବ୍ୟକ୍ତିଗତ କାରଣରୁ ଉଭୟ ୨୦୨୨ ମସିହାରେ ଆଇନଗତ ଭାବେ ପରସ୍ପରଠାରୁ ଅଲଗା ହୋଇଥିଲେ। ଛାଡ଼ପତ୍ର ପରେ ବି ସେମାନେ ନିଜର ଦୁଇ ପୁଅ ନିର୍ବାଣ ଏବଂ ଯୋହାନଙ୍କ ଲାଳନପାଳନ ଏକାଠି କରୁଛନ୍ତି। ବର୍ତ୍ତମାନ ଏହି ରିଆଲିଟି ସୋ' ମାଧ୍ୟମରେ ଉଭୟଙ୍କ ପାରସ୍ପରିକ ସମ୍ମାନ ଏବଂ ସ୍ନେହ ପୁଣିଥରେ ଦର୍ଶକଙ୍କ ସାମ୍ନାକୁ ଆସିଛି, ଯାହାକୁ ପ୍ରଶଂସକମାନେ ଖୁବ୍ ପସନ୍ଦ କରୁଛନ୍ତି।

ବଲିଉଡର ଅଭିଜ୍ଞ ଅଭିନେତ୍ରୀ ନୀନା ଗୁପ୍ତା କେବଳ ନିଜର ଚମତ୍କାର ଅଭିନୟ ପାଇଁ ନୁହେଁ, ବରଂ ନିଜର ବୋଲ୍ଡ ଫ୍ୟାଶନ୍ ସେନ୍ସ ଏବଂ ବେବାକ୍ ଅନ୍ଦାଜ ପାଇଁ ମଧ୍ୟ ବେଶ୍ ଜଣାଶୁଣା। ୬୬ ବର୍ଷ ବୟସରେ ମଧ୍ୟ ସେ ଯୁବତୀମାନଙ୍କୁ ନିଜର ଫିଟନେସ୍ ଏବଂ ଷ୍ଟାଇଲ୍ ଦ୍ୱାରା ମାତ୍ ଦେଉଛନ୍ତି। ନିକଟରେ ନୀନାଙ୍କୁ ସର୍ଟସ୍ ବା ସର୍ଟ ପ୍ୟାଣ୍ଟ ପିନ୍ଧିଥିବାର ଦେଖିବାକୁ ମିଳିଥିଲା, ଯାହାକୁ ନେଇ ସୋସିଆଲ୍ ମିଡିଆରେ କିଛି ଲୋକ ତାଙ୍କୁ ଟ୍ରୋଲ୍ କରିବା ଆରମ୍ଭ କରିଦେଇଛନ୍ତି। ତେବେ ଅଭିନେତ୍ରୀ ମଧ୍ୟ ଚୁପ୍ ବସିବା ଲୋକଙ୍କ ମଧ୍ୟରୁ ନୁହଁନ୍ତି। ସେ ଟ୍ରୋଲର୍ସଙ୍କୁ କଡ଼ା ଭାଷାରେ ଜବାବ ଦେଇଛନ୍ତି।

ସୋସିଆଲ୍ ମିଡିଆରେ ଅନେକ ୟୁଜର୍ସ ନୀନାଙ୍କ ପୋଷାକକୁ ନେଇ କଟାକ୍ଷ କରିଥିଲେ ଏବଂ 'ବୟସ ହିସାବରେ ପୋଷାକ ପିନ୍ଧିବା ଉଚିତ୍' ବୋଲି ଉପଦେଶ ଦେଇଥିଲେ। ହେଟର୍ସଙ୍କୁ ଜବାବ ଦେଇ ନୀନା ଗୁପ୍ତା କହିଛନ୍ତି ଯେ ଖରାପ କମେଣ୍ଟ କରୁଥିବା ଲୋକମାନେ ପ୍ରକୃତରେ ଇର୍ଷା କରୁଛନ୍ତି କାରଣ ସେମାନଙ୍କର ଏତେ ସୁନ୍ଦର ଫିଟ୍ ଶରୀର ନାହିଁ। ଏହିପରି ନକାରାତ୍ମକ ମନ୍ତବ୍ୟକୁ ସେ ଖାତିର କରନ୍ତି ନାହିଁ ବୋଲି ସ୍ପଷ୍ଟ କରିଛନ୍ତି। ନିଜର ମନ ପସନ୍ଦର ପୋଷାକ ପିନ୍ଧିବାର ସମ୍ପୂର୍ଣ୍ଣ ସ୍ୱାଧୀନତା ତାଙ୍କର ଅଛି ଏବଂ ସେ ସମାଜର ରକ୍ଷଣଶୀଳ ଚିନ୍ତାଧାରାକୁ କେବେ ମଧ୍ୟ ଗୁରୁତ୍ୱ ଦିଅନ୍ତି ନାହିଁ।

କେବେ ଆସିବ 'ପଞ୍ଚାୟତ ୫'?

ଏହି ଚର୍ଚ୍ଚା ମଧ୍ୟରେ ନୀନା ଗୁପ୍ତାଙ୍କ ଆଗାମୀ ୱେବ୍ ସିରିଜ୍ ପଞ୍ଚାୟତ ସିଜିନ୍ ୫ (Panchayat 5) କୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ବଢିବାରେ ଲାଗିଛି। ଆମାଜନ୍ ପ୍ରାଇମ୍ ଭିଡିଓରେ ଷ୍ଟ୍ରିମ୍ ହେଉଥିବା ଏହି ଲୋକପ୍ରିୟ ସିରିଜର ପଞ୍ଚମ ସିଜିନ୍ ୨୦୨୬ ମସିହାରେ ରିଲିଜ୍ ହେବା ନେଇ ଆନୁଷ୍ଠାନିକ ଭାବେ ଘୋଷଣା କରାଯାଇଛି।

ପୂର୍ବ ସିଜିନ୍ ଗୁଡ଼ିକ ଭଳି ଏଥର ମଧ୍ୟ ଜିତେନ୍ଦ୍ର କୁମାର (ଅଭିଷେକ ତ୍ରିପାଠୀ), ରଘୁବୀର ଯାଦବ (ପ୍ରଧାନ ଜୀ) ଏବଂ ନୀନା ଗୁପ୍ତା (ମଞ୍ଜୁ ଦେବୀ) ମୁଖ୍ୟ ଭୂମିକାରେ ନଜର ଆସିବେ। ଫୁଲେରା ଗାଁର ରାଜନୀତି, ଅଭିଷେକ ଓ ରିଙ୍କିଙ୍କ ସମ୍ପର୍କ ଏବଂ ଗାଁର ମଜାଳିଆ କାହାଣୀକୁ ନେଇ ନୂଆ ସିଜିନ୍ ଆହୁରି ରୋମାଞ୍ଚକର ହେବ ବୋଲି ପ୍ରଶଂସକମାନେ ଆଶା ରଖିଛନ୍ତି।