ଚେନ୍ନାଇ: ସରକାରୀ ଡାକ୍ତରଖାନାରେ ଜନ୍ମ ହେଉଥିବା ଶିଶୁଙ୍କୁ ମିଳିବ ସୁନା ମୁଦି । ଟିଭିକେ (TVK) ନେତୃତ୍ୱାଧୀନ ତାମିଲନାଡ଼ୁ ସରକାର ଆନୁଷ୍ଠାନିକ ଭାବେ 'ଥାଇମାମନ ଥଙ୍ଗା ମୋଥିରା ଥିଟ୍ଟମ' ନାକାମା ଏକ ଯୋଜନା ଘୋଷଣା କରିଛନ୍ତି। ଏହି ନୂତନ ଯୋଜନା ଅଧୀନରେ ତାମିଲନାଡ଼ୁର ସରକାରୀ ଡାକ୍ତରଖାନାଗୁଡ଼ିକରେ ଜନ୍ମ ହେଉଥିବା ପ୍ରତ୍ୟେକ ଶିଶୁଙ୍କୁ ୧ ଗ୍ରାମର ସୁନା ମୁଦି ଉପହାର ସ୍ୱରୂପ ପ୍ରଦାନ କରାଯିବ। ପରିବାରଗୁଡ଼ିକୁ ସହାୟତା ପ୍ରଦାନ କରିବା ଏବଂ ସରକାରୀ ଡାକ୍ତରଖାନାରେ ପ୍ରସବ କରାଇବା ପାଇଁ ଲୋକଙ୍କୁ ଉତ୍ସାହିତ କରିବା ଏହାର ମୂଳ ଲକ୍ଷ୍ୟ। ଏହି ଯୋଜନା ପାଇଁ ରାଜ୍ୟ ସରକାର ବାର୍ଷିକ ୭୫୫.୮୩ କୋଟି ଟଙ୍କା ବ୍ୟୟବରାଦ କରିଛନ୍ତି।

ଜୁନ ୨୨ ତାରିଖ ଠାରୁ ସରକାରୀ ଡାକ୍ତରଖାନାରେ ଜନ୍ମ ହେଉଥିବା ପିଲାମାନେ ଏହି ସୁନା ମୁଦି ପାଇବାକୁ ଯୋଗ୍ୟ ବିବେଚିତ ହେବେ। ତେବେ ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ସି.ଏନ. ଆନ୍ନାଦୁରାଇଙ୍କ ଜନ୍ମବାର୍ଷିକୀ ଉପଲକ୍ଷେ ଆସନ୍ତା ସେପ୍ଟେମ୍ବର ୧୫ ତାରିଖରେ ବର୍ତ୍ତମାନର ମୁଖ୍ୟମନ୍ତ୍ରୀ ବିଜୟ ଏହି ଯୋଜନାର ଆନୁଷ୍ଠାନିକ ଶୁଭାରମ୍ଭ କରିବେ।

ସରକାରଙ୍କ 'ଭେତ୍ରି ତାମିଝାଗମ' ରୂପରେଖର ଏକ ଅଂଶ ଭାବରେ ଏହି ଯୋଜନା ଆରମ୍ଭ କରାଯାଇଛି, ଯାହାର ଉଦ୍ଦେଶ୍ୟ ହେଉଛି ମା' ଏବଂ ଶିଶୁମାନଙ୍କୁ ବ୍ୟାପକ ସହାୟତା ପ୍ରଦାନ କରିବା। ତାମିଲ ସଂସ୍କୃତିରେ ସୁନାକୁ ସମୃଦ୍ଧି ଏବଂ ସୁସ୍ଥତାର ପ୍ରତୀକ ଭାବେ ବିବେଚନା କରାଯାଏ। ତେଣୁ ଏହି ସୁନା ମୁଦି ଉପହାର ଦେବା ଦ୍ୱାରା ଭାବଗତ ଏବଂ ସାଂସ୍କୃତିକ ସମ୍ପର୍କ ସୁଦୃଢ଼ ହେବ ବୋଲି ସରକାର ଆଶା ରଖିଛନ୍ତି।

ଏହି ଯୋଜନା ଦ୍ୱାରା ପ୍ରତିବର୍ଷ ରାଜ୍ୟର ହଜାର ହଜାର ପରିବାର ଉପକୃତ ହେବେ ବୋଲି ଆଶା କରାଯାଉଛି। ଏହା ସହିତ ସରକାରୀ ସ୍ୱାସ୍ଥ୍ୟସେବା ବ୍ୟବସ୍ଥା ଉପରେ ଲୋକଙ୍କ ବିଶ୍ୱାସ ବଢ଼ିବ ବୋଲି ସରକାର ଲକ୍ଷ୍ୟ ରଖିଛନ୍ତି।

ତାମିଲନାଡୁ ରାଜନୀତିରେ ଆଉ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟଙ୍କ ନେତୃତ୍ୱାଧୀନ ତାମିଲଗା ଭେଟ୍ରି କାଜାଗମ୍ (TVK) ସରକାରର ପ୍ରଥମ ମନ୍ତ୍ରିମଣ୍ଡଳ ସମ୍ପ୍ରସାରଣ ହେବାକୁ ଯାଉଛି। ରାଜ୍ୟ କ୍ୟାବିନେଟରେ ସାମିଲ ହେବାକୁ ଥିବା ୨୩ ଜଣ ନୂଆ ମନ୍ତ୍ରୀଙ୍କ ତାଲିକାକୁ ତାମିଲନାଡୁର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ମଞ୍ଜୁରୀ ପ୍ରଦାନ କରିଛନ୍ତି। ମେ' ୨୧, ୨୦୨୬ (ଗୁରୁବାର) ସକାଳେ ଚେନ୍ନାଇ ସ୍ଥିତ ଲୋକଭବନରେ ଏହି ନବନିଯୁକ୍ତ ମନ୍ତ୍ରୀମାନଙ୍କର ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ।

୫୯ ବର୍ଷ ପରେ ସରକାରରେ କଂଗ୍ରେସ

ଏହି ମନ୍ତ୍ରିମଣ୍ଡଳ ସମ୍ପ୍ରସାରଣର ସବୁଠାରୁ ଗୁରୁତ୍ୱପୂର୍ଣ୍ଣ ଦିଗ ହେଉଛି କଂଗ୍ରେସର ପ୍ରତ୍ୟାବର୍ତ୍ତନ। ପ୍ରାୟ ୫୯ ବର୍ଷର ବ୍ୟବଧାନ ପରେ କଂଗ୍ରେସ ଦଳ ପୁଣିଥରେ ତାମିଲନାଡୁ ସରକାରରେ ସାମିଲ ହେବାକୁ ଯାଉଛି। ନୂତନ ମନ୍ତ୍ରୀମାନଙ୍କ ମଧ୍ୟରେ ୨୧ ଜଣ ଟିଭିକେ (TVK) ବିଧାୟକ ଥିବାବେଳେ ୨ ଜଣ କଂଗ୍ରେସ ବିଧାୟକ ରହିଛନ୍ତି। କଂଗ୍ରେସ ପକ୍ଷରୁ କିଲିୟୁର ବିଧାୟକ ରାଜେଶ କୁମାର ଏବଂ ମେଲୁର ବିଧାୟକ ପି. ବିଶ୍ୱନାଥନ ମନ୍ତ୍ରୀ ଭାବରେ ଶପଥ ଗ୍ରହଣ କରିବେ ବୋଲି ଜଣାପଡିଛି। ଏହା ସହିତ ତାମିଲନାଡୁ ସ୍ୱାଧୀନତା ପରେ ପ୍ରଥମ ଥର ପାଇଁ ଏକ ମେଣ୍ଟ ସରକାର ଦେଖିବାକୁ ପାଇବ।

ଶପଥ ଗ୍ରହଣ ସମାରୋହ ଏବଂ ସରକାରଙ୍କ ରୂପରେଖ

ମୁଖ୍ୟମନ୍ତ୍ରୀଙ୍କ ସୁପାରିଶ କ୍ରମେ ସମସ୍ତ ବର୍ଗ ଏବଂ ଅଞ୍ଚଳକୁ ପ୍ରତିନିଧିତ୍ୱ ଦେବା ପାଇଁ ଏହି ନୂତନ ତାଲିକା ପ୍ରସ୍ତୁତ କରାଯାଇଛି। ମେ' ୧୦ ତାରିଖରେ ସି. ଜୋସେଫ୍ ବିଜୟ ମୁଖ୍ୟମନ୍ତ୍ରୀ ଭାବରେ ଶପଥ ନେବା ସହ ତାଙ୍କ ସାଥିରେ ୯ ଜଣ ମନ୍ତ୍ରୀ କାର୍ଯ୍ୟଭାର ଗ୍ରହଣ କରିଥିଲେ। ବର୍ତ୍ତମାନ ଏହି ୨୩ ଜଣ ନୂଆ ମନ୍ତ୍ରୀଙ୍କ ଯୋଗଦାନ ପରେ ତାମିଲନାଡୁ ମନ୍ତ୍ରିମଣ୍ଡଳର ସଦସ୍ୟ ସଂଖ୍ୟା ଯଥେଷ୍ଟ ବୃଦ୍ଧି ପାଇବ। ଏହି ସମ୍ପ୍ରସାରଣ ଦ୍ୱାରା ପ୍ରଶାସନିକ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ଏବଂ ଲୋକାଭିମୁଖୀ ଯୋଜନାଗୁଡ଼ିକୁ ସୁଚାରୁରୂପେ ପରିଚାଳନା କରିବା ପାଇଁ ସରକାର ଲକ୍ଷ୍ୟ ରଖିଛନ୍ତି।