ତ୍ୱିଷା ଶର୍ମା ମୃତ୍ୟୁ ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଗୁରୁବାର ଦିନ ସିବିଆଇ ତ୍ୱିଷାଙ୍କ ଶାଶୁ ତଥା ପୂର୍ବତନ ବିଚାରପତି ଗିରିବାଳା ସିଂହଙ୍କୁ ଗିରଫ କରିଛି। ମଧ୍ୟପ୍ରଦେଶ ହାଇକୋର୍ଟ ତାଙ୍କର ଆଗୁଆ ଜାମିନ ଆବେଦନ ଖାରଜ କରିବା ପରେ ତଦନ୍ତକାରୀ ସଂସ୍ଥା ଏହି ପଦକ୍ଷେପ ନେଇଛି।

କୋର୍ଟରେ ହାଜର ଏବଂ ରିମାଣ୍ଡ ଦାବି

ଶୁକ୍ରବାର ଦିନ ସିବିଆଇ ଗିରିବାଳା ସିଂହଙ୍କୁ ଭୋପାଳର ଏକ ସ୍ଥାନୀୟ କୋର୍ଟରେ ହାଜର କରିବ। ଅଧିକ ପଚରାଉଚରା ଏବଂ ତଦନ୍ତ ପାଇଁ ତାଙ୍କୁ ୫ ଦିନିଆ ହେପାଜତ (ରିମାଣ୍ଡ)ରେ ନେବାକୁ ସିବିଆଇ ଦାବି କରିବ ବୋଲି ସୂଚନା ମିଳିଛି। ତଦନ୍ତକାରୀ ଅଧିକାରୀମାନେ ଅଭିଯୋଗ କରିଛନ୍ତି ଯେ ପ୍ରମାଣ ନଷ୍ଟ କରିବା ଏବଂ ଗୁରୁତ୍ୱପୂର୍ଣ୍ଣ ତଥ୍ୟ ଲୁଚାଇବା ପାଇଁ ଉଦ୍ୟମ କରାଯାଇଛି, ଯାହାର ଗଭୀର ଖୋଳତାଡ଼ କରାଯିବ।

ସ୍ୱାମୀ ସମର୍ଥ ସିଂହଙ୍କ ଉପରେ କଡ଼ା ନଜର

ଅନ୍ୟପଟେ, ତ୍ୱିଷାଙ୍କ ସ୍ୱାମୀ ସମର୍ଥ ସିଂହ ମଧ୍ୟ ସିବିଆଇ ହେପାଜତରେ ଅଛନ୍ତି। କୋର୍ଟରେ ହାଜର କରିବା ପୂର୍ବରୁ ସିବିଆଇ ତାଙ୍କର ଡାକ୍ତରୀ ମାଇନା କରାଇଛି। ତାଙ୍କର ରିମାଣ୍ଡ ଅବଧି ଶେଷ ହେଉଥିବାରୁ, ସିବିଆଇ ଅଧିକ ତଦନ୍ତ ପାଇଁ ସମୟସୀମା ବୃଦ୍ଧି କରିବାକୁ ଆବେଦନ କରିପାରେ।

କେମିତି ଥିଲା ଘଟଣାକ୍ରମ?

ସୂଚନାଯୋଗ୍ୟ ଯେ, ଗତ ମେ' ୧୨ ତାରିଖରେ ଭୋପାଳର କାଟାରା ହିଲ୍ସ ସ୍ଥିତ ଶାଶୁ ଘରେ ୩୩ ବର୍ଷୀୟା ମଡେଲ ତଥା ଅଭିନେତ୍ରୀ ତ୍ୱିଷା ଶର୍ମାଙ୍କ ସନ୍ଦେହଜନକ ମୃତ୍ୟୁ ହୋଇଥିଲା। ଏହି ଘଟଣାରେ ଯୌତୁକ ନିର୍ଯାତନା ଏବଂ ହତ୍ୟା ଅଭିଯୋଗ ଆଣିଥିଲେ ତ୍ୱିଷାଙ୍କ ପରିବାର। ବର୍ତ୍ତମାନ ସିବିଆଇ ଫରେନ୍ସିକ ଟିମ୍ ସହାୟତାରେ କ୍ରାଇମ୍ ସିନ୍ ରିକ୍ରିଏସନ୍ କରିବା ସହ ହ୍ୱାଟ୍ସଆପ୍ ଚାଟ୍ ଏବଂ ଶବ ବ୍ୟବଚ୍ଛେଦ ରିପୋର୍ଟରେ ମିଳିଥିବା ୬ଟି ଆଘାତର ତଦନ୍ତ କରୁଛି।

ନୂଆଦିଲ୍ଲୀ: ବହୁ ଚର୍ଚ୍ଚିତ ତ୍ୱିଷା ଶର୍ମା ମୃତ୍ୟୁ ମାମଲାରେ ଏକ ବଡ଼ ଖବର ସାମ୍ନାକୁ ଆସିଛି। କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଗୁରୁବାର ଦିନ ତାଙ୍କ ଶାଶୁ ତଥା ଅବସରପ୍ରାପ୍ତ ଜିଲ୍ଲା ବିଚାରପତି ଗିରିବାଳା ସିଂହଙ୍କୁ ଗିରଫ କରିଛି । ଭୋପାଳ ସ୍ଥିତ ବାସଭବନରୁ ଗିରଫ କଲା CBI । ଭୋପାଳର ବାଗ୍ ମୁଗଲିଆ ଏକ୍ସଟେନସନ୍ ଅଞ୍ଚଳରେ ଥିବା ଗିରିବାଳା ସିଂହଙ୍କ ବାସଭବନରୁ ତାଙ୍କୁ ଗିରଫ କରାଯାଇଛି । ମଧ୍ୟପ୍ରଦେଶ ହାଇକୋର୍ଟ ତାଙ୍କ ଆଗୁଆ ଜାମିନ ନାମଞ୍ଜୁର କରିବାର ଗୋଟିଏ ଦିନ ପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ CBI ମାମଲାର ତଦନ୍ତ କରୁଛି ।

ସୂଚନା ଅନୁଯାୟୀ, ଆଜି ସକାଳେ କାଟାରା ହିଲ୍ସ ଅଞ୍ଚଳରେ ଥିବା ଗିରିବାଳା ସିଂହଙ୍କ ବାସଭବନରେ ଏକ ବିଶାଳ ପୋଲିସ ଫୋର୍ସ ସହିତ ତଦନ୍ତକାରୀ ସଂସ୍ଥାର ଏକ ଟିମ୍ ପହଞ୍ଚିଥିଲା। ଏହି ସମୟରେ ସ୍ଥାନୀୟ ପୋଲିସ ସମ୍ପୂର୍ଣ୍ଣ ଅଞ୍ଚଳକୁ ବ୍ୟାରିକେଡ୍ କରି ସାଧାରଣ ଲୋକଙ୍କ ଚଳପ୍ରଚଳ ଉପରେ କଟକଣା ଲଗାଇଥିଲା।

ଡିସେମ୍ବର ୯, ୨୦୨୫ରେ ଗିରିବାଳା ସିଂହଙ୍କ ପୁଅ ସମର୍ଥ ସିଂହଙ୍କ ସହ ତ୍ୱିଷାଙ୍କ ବିବାହ ହୋଇଥିଲା। କିନ୍ତୁ ବିବାହର ମାତ୍ର ୫ ମାସ ପରେ ଅର୍ଥାତ୍ ମେ' ୧୨ ତାରିଖରେ ଶ୍ୱଶୁର ଘରୁ ତାଙ୍କ ମୃତଦେହ ଉଦ୍ଧାର କରାଯାଇଥିଲା। ଘଟଣାର ଦୁଇ ଦିନ ପରେ ଗିରିବାଳା ସିଂହ ଆଗୁଆ ଜାମିନ ପାଇଁ ଭୋପାଳ ଦୌରା ଅଦାଲତର ଦ୍ୱାରସ୍ଥ ହୋଇଥିଲେ ଏବଂ ମେ' ୧୫ରେ ତାଙ୍କୁ ଜାମିନ ମିଳିଥିଲା। ତେବେ ବୁଧବାର ଦିନ ହାଇକୋର୍ଟର ବିଚାରପତି ଦେବନାରାୟଣ ମିଶ୍ର ଏକ ୧୭ ପୃଷ୍ଠାର ନିର୍ଦ୍ଦେଶନାମାରେ ଏହି ଜାମିନକୁ ଖାରଜ କରିଦେଇଛନ୍ତି।

ହାଇକୋର୍ଟ ଦର୍ଶାଇଛନ୍ତି ଯେ ହ୍ୱାଟସ୍‌ଆପ୍ ଚାଟ୍ ଏବଂ ତ୍ୱିଷାଙ୍କ ପରିବାରର ବୟାନରୁ ସ୍ପଷ୍ଟ ହେଉଛି ଯେ ନିର୍ଯାତନା କେବଳ ତାଙ୍କ ସ୍ୱାମୀ ସମର୍ଥ ସିଂହଙ୍କ ମଧ୍ୟରେ ସୀମିତ ନଥିଲା। ଭାରତୀୟ ନ୍ୟାୟ ସଂହିତା (ବିଏନ୍‌ଏସ୍)ର ଧାରା ୮୦(୨), ୮୫ ଏବଂ ୩(୫) ସହିତ ଯୌତୁକ ନିଷେଧ ଆଇନର ଧାରା ୩ ଏବଂ ୪ ଅଧୀନରେ ଅଭିଯୋଗର ଅଧିକ ଯାଞ୍ଚର ଆବଶ୍ୟକତା ରହିଛି ବୋଲି ଅଦାଲତ କହିଛନ୍ତି।

ତ୍ୱିଷାଙ୍କ ପରିବାର ଅଭିଯୋଗ କରିଛନ୍ତି ଯେ ଶାଶୁ ଗିରିବାଳା ସିଂହ ଏବଂ ତାଙ୍କ ପୁଅ ତ୍ୱିଷାଙ୍କୁ ନିର୍ଯାତନା ଦେଉଥିଲେ ଏବଂ ଗର୍ଭପାତ କରାଇବାକୁ ବାଧ୍ୟ କରୁଥିଲେ। ଗର୍ଭପାତ ହୋଇଥିବା କଥାକୁ ଅଦାଲତ ମଧ୍ୟ ସ୍ୱୀକାର କରିଛନ୍ତି। ଶବ ବ୍ୟବଚ୍ଛେଦ ରିପୋର୍ଟରେ ମୃତ୍ୟୁର କାରଣ ଫାଶୀ ଲଗାଇବା ବୋଲି ଦର୍ଶାଯାଇଥିଲେ ମଧ୍ୟ ହାଇକୋର୍ଟ ତ୍ୱିଷାଙ୍କ ଶରୀରରେ ଥିବା ଅତିରିକ୍ତ ୬ ରୁ ୭ଟି କ୍ଷତ ଚିହ୍ନ ଉପରେ ଗୁରୁତ୍ୱାରୋପ କରିଛନ୍ତି। ତାଙ୍କ ବାମ ହାତ, ଆଙ୍ଗୁଠି ଏବଂ ମୁଣ୍ଡରେ କ୍ଷତ ଚିହ୍ନ ଥିଲା, ଯାହା ମୃତଦେହ କାଢ଼ିବା ବା ହସ୍ପିଟାଲ ନେବା ସମୟରେ ହୋଇନଥିଲା ବୋଲି ଏକ ସ୍ୱତନ୍ତ୍ର ରିପୋର୍ଟରେ ସ୍ପଷ୍ଟ କରାଯାଇଛି।

ବହୁ ଚର୍ଚ୍ଚିତ ତ୍ୱିଷା ଶର୍ମା ମୃତ୍ୟୁ ମାମଲାରେ ସୁପ୍ରିମକୋର୍ଟଙ୍କ ହସ୍ତକ୍ଷେପ ପରେ ଏବେ ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ ବା ସିବିଆଇ (CBI) ହାତକୁ ଯାଇଛି। ମୃତକଙ୍କ ଶାଶୁଘର ପକ୍ଷର ପ୍ରଭାବଶାଳୀ ପୃଷ୍ଠଭୂମି ଯୋଗୁଁ ତଦନ୍ତ ପ୍ରକ୍ରିୟାରେ ପକ୍ଷପାତିତା ହେବାର ଆଶଙ୍କା କରି ସର୍ବୋଚ୍ଚ ନ୍ୟାୟାଳୟ ନିଜ ଆଡୁ ଏହି ମାମଲାର ବିଚାର କରିଥିଲେ।

ଗତ ମେ ୧୨, ୨୦୨୬ ତାରିଖ ଦିନ ମଧ୍ୟପ୍ରଦେଶର ଭୋପାଳ ସ୍ଥିତ କାଟାରା ହିଲ୍ସ ଅଞ୍ଚଳରେ ଥିବା ନିଜ ଶାଶୁଘରୁ ୩୩ ବର୍ଷୀୟା ପୂର୍ବତନ ଅଭିନେତ୍ରୀ ତଥା ମଡେଲ ତ୍ୱିଷା ଶର୍ମାଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା। ଏହି ଘଟଣାରେ ତାଙ୍କ ସ୍ୱାମୀ ତଥା ଆଇନଜୀବୀ ସମର୍ଥ ସିଂହ ଏବଂ ଶାଶୁ ତଥା ଅବସରପ୍ରାପ୍ତ ଜିଲ୍ଲା ଜଜ୍ ଗିରିବାଳା ସିଂହଙ୍କ ନାମରେ ଯୌତୁକ ନିର୍ଯାତନା ଓ ହତ୍ୟା ଅଭିଯୋଗ ଆଣିଥିଲେ ତ୍ୱିଷାଙ୍କ ପରିବାର।

ସିବିଆଇର ତଦନ୍ତ ଆରମ୍ଭ

ସୋମବାର ଦିନ ସିବିଆଇ ପକ୍ଷରୁ ଭୋପାଳର କାଟାରା ହିଲ୍ସ ପୋଲିସ ଷ୍ଟେସନରେ ରୁଜୁ ହୋଇଥିବା ମୂଳ ଏଫଆଇଆରକୁ ପୁନଃ ପଞ୍ଜୀକରଣ କରାଯାଇଛି। ସିବିଆଇର ଏକ ସ୍ୱତନ୍ତ୍ର ଟିମ୍ ଭୋପାଳରେ ପହଞ୍ଚି ମଙ୍ଗଳବାରଠାରୁ କ୍ଷେତ୍ରସ୍ତରୀୟ ତଦନ୍ତ ଆରମ୍ଭ କରିବେ। ଭାରତୀୟ ନ୍ୟାୟ ସଂହିତା (BNS)ର ଧାରା ୮୦(୨), ୮୫ ଏବଂ ୩(୫) ସହିତ ଯୌତୁକ ନିଷେଧ ଆଇନର ଧାରା ୩ ଏବଂ ୪ ଅଧୀନରେ ମାମଲା ରୁଜୁ କରାଯାଇଛି।

ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ

ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି ବିଚାରପତି ସୂର୍ଯ୍ୟକାନ୍ତଙ୍କ ନେତୃତ୍ୱରେ ଗଠିତ ସୁପ୍ରିମକୋର୍ଟଙ୍କ ଏକ ଖଣ୍ଡପୀଠ ଏହି ମାମଲାର ନିରପେକ୍ଷ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ତଦନ୍ତ ପ୍ରକ୍ରିୟା ବାଧାପ୍ରାପ୍ତ ନହେବା ପାଇଁ ଗଣମାଧ୍ୟମରେ କୌଣସି ବୟାନବାଜି ନକରିବାକୁ କୋର୍ଟ ଉଭୟ ପରିବାର ଏବଂ ଗଣମାଧ୍ୟମକୁ ତାଗିଦ କରିଛନ୍ତି। ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହେଟ୍ଟା କହିଥିଲେ ଯେ, 'ପିତାମାତାଙ୍କ ପାଇଁ ଏକ ମୃତ ଝିଅ ଅପେକ୍ଷା ଛାଡ଼ପତ୍ର ନେଇଥିବା ଝିଅ ବଞ୍ଚି ରହିବା ଢେର ଭଲ'।

ଅଭିଯୁକ୍ତଙ୍କ ସ୍ଥିତି ଓ ଯୌତୁକ ନିର୍ଯାତନା ଅଭିଯୋଗ

ଘଟଣାର ୧୦ ଦିନ ପରେ ସ୍ୱାମୀ ସମର୍ଥ ସିଂହ ଆତ୍ମସମର୍ପଣ କରିଥିବା ବେଳେ ବର୍ତ୍ତମାନ ସେ ୭ ଦିନିଆ ପୋଲିସ ରିମାଣ୍ଡରେ ଅଛନ୍ତି। ସେହିପରି ଶାଶୁ ଗିରିବାଳା ସିଂହ ଆଗୁଆ ଜାମିନ ପାଇଥିବା ବେଳେ ଏହାକୁ ରାଜ୍ୟ ସରକାର ଏବଂ ତ୍ୱିଷାଙ୍କ ପିତା ହାଇକୋର୍ଟରେ ଚ୍ୟାଲେଞ୍ଜ କରିଛନ୍ତି। ତ୍ୱିଷାଙ୍କ ପରିବାରର ଅଭିଯୋଗ ଅନୁଯାୟୀ, ବିବାହ ସମୟରେ ବିଦାୟୀ ବେଳେ ଗିରିବାଳା ସିଂହଙ୍କ ଦାବି ମୁତାବକ ତାଙ୍କୁ ଅତିରିକ୍ତ ୨ ଲକ୍ଷ ଟଙ୍କା ଯୌତୁକ ଆକାରରେ ଦିଆଯାଇଥିଲା।

ମଧ୍ୟପ୍ରଦେଶର ରାଜଧାନୀ ଭୋପାଳରେ ଚାଞ୍ଚଲ୍ୟ ଖେଳାଇଥିବା ମଡେଲ ତଥା ଅଭିନେତ୍ରୀ ଟ୍ୱିଶା ଶର୍ମାଙ୍କ ମୃତ୍ୟୁ ମାମଲା ଏବେ ଏକ ନୂଆ ମୋଡ଼ ନେଇଛି। ଗୋଟିଏ ପଟେ ସିବିଆଇ (CBI) ତଦନ୍ତ ପାଇଁ ରାଜ୍ୟ ସରକାର ସୁପାରିସ କରିଥିବା ବେଳେ ଅନ୍ୟପଟେ ଦିଲ୍ଲୀ ଏମ୍ସ (AIIMS)ର ଡାକ୍ତରୀ ଦଳ ଦ୍ୱାରା ଟ୍ୱିଶାଙ୍କର ଦ୍ୱିତୀୟ ଥର ଶବ ବ୍ୟବଚ୍ଛେଦ କରାଯାଇଛି। ଦେଶର ସର୍ବୋଚ୍ଚ ନ୍ୟାୟାଳୟ ସୁପ୍ରିମକୋର୍ଟ ମଧ୍ୟ ଏହି ହାଇପ୍ରୋଫାଇଲ୍ ମାମଲାରେ ନିଜ ଆଡ଼ୁ ହସ୍ତକ୍ଷେପ କରିଛନ୍ତି, ଯାହା ପରିବାର ଲୋକଙ୍କୁ ନ୍ୟାୟ ମିଳିବାର ଆଶା ବଢ଼ାଇ ଦେଇଛି।

ଦ୍ୱିତୀୟ ଶବ ବ୍ୟବଚ୍ଛେଦ ଉପରେ ସମସ୍ତଙ୍କ ନଜର

ଗତ ୧୨ ମେ ୨୦୨୬ ରେ ଭୋପାଳର କଟାରା ହିଲ୍ସ ସ୍ଥିତ ଶାଶୂଘରେ ଟ୍ୱିଶାଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଭୋପାଳ ଏମ୍ସରେ ହୋଇଥିବା ପ୍ରଥମ ଶବ ବ୍ୟବଚ୍ଛେଦ ରିପୋର୍ଟରେ ମୃତ୍ୟୁର କାରଣ 'ଆଣ୍ଟି-ମୋର୍ଟେମ୍ ହ୍ୟାଙ୍ଗିଙ୍ଗ୍' ଦର୍ଶାଯାଇଥିଲା। ତେବେ ଟ୍ୱିଶାଙ୍କ ଶରୀରରେ ଥିବା କ୍ଷତ ଚିହ୍ନକୁ ନେଇ ପରିବାର ଲୋକେ ସନ୍ଦେହ ପ୍ରକାଶ କରିବା ସହ ରିପୋର୍ଟରେ ହେରଫେର ହୋଇଥିବା ଅଭିଯୋଗ କରିଥିଲେ। ଏହାପରେ ମଧ୍ୟପ୍ରଦେଶ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଦିଲ୍ଲୀ ଏମ୍ସର ଫୋରେନ୍ସିକ୍ ବିଭାଗ ମୁଖ୍ୟ ଡା. ସୁଧୀର କୁମାର ଗୁପ୍ତାଙ୍କ ନେତୃତ୍ୱରେ ଏକ ଡାକ୍ତରୀ ଦଳ ରବିବାର ଦିନ ଭୋପାଳ ପହଞ୍ଚି ଦ୍ୱିତୀୟ ପୋଷ୍ଟମର୍ଟମ୍ ପ୍ରକ୍ରିୟା ଶେଷ କରିଛନ୍ତି। ଏବେ ମାମଲାର ପ୍ରକୃତ କାରଣ ଜାଣିବା ପାଇଁ ହିଷ୍ଟୋପ୍ୟାଥୋଲୋଜି ଓ ଭିସେରା ଟେଷ୍ଟ ରିପୋର୍ଟକୁ ଅପେକ୍ଷା କରାଯାଇଛି।

ସ୍ୱାମୀ ସମର୍ଥ ସିଂହଙ୍କୁ ମାରାଥନ୍ ଜେରା

ଅନ୍ୟପଟେ ଟ୍ୱିଶାଙ୍କ ସ୍ୱାମୀ ତଥା ପେସାରେ ଓକିଲ ସମର୍ଥ ସିଂହ ନିଜର ଆଗୁଆ ଜାମିନ ଆବେଦନ ଫେରାଇ ନେଇ ଜବଲପୁର କୋର୍ଟରେ ଆତ୍ମସମର୍ପଣ କରିବା ପରେ ପୋଲିସ ତାଙ୍କୁ ୭ ଦିନିଆ ରିମାଣ୍ଡରେ ନେଇଛି। ଘଟଣା ଦିନ ଅର୍ଥାତ୍ ମେ ୧୨ ତାରିଖ ରାତିରେ ସେ କେଉଁଠି ଥିଲେ ଏବଂ ଉଭୟଙ୍କ ମଧ୍ୟରେ କୌଣସି ଝଗଡ଼ା ହୋଇଥିଲା କି ନାହିଁ, ସେନେଇ ପୋଲିସ ତାଙ୍କୁ ଲଗାତାର ଜେରା କରୁଛି। ସୂଚନାଯୋଗ୍ୟ ଯେ, ମାତ୍ର ୫ ମାସ ତଳେ ନୋଏଡାର ଟ୍ୱିଶା ଏବଂ ସମର୍ଥଙ୍କର ବିବାହ ହୋଇଥିଲା।

ସୁପ୍ରିମକୋର୍ଟଙ୍କ ହସ୍ତକ୍ଷେପ ଓ ହାଇପ୍ରୋଫାଇଲ୍ ପରିବାର

ଟ୍ୱିଶାଙ୍କ ଶାଶୂ ଗିରିବାଳା ସିଂହ ଜଣେ ଅବସରପ୍ରାପ୍ତ ଜିଲ୍ଲା ଜଜ୍ ହୋଇଥିବାରୁ ପରିବାର ଲୋକେ ନିଜ ପ୍ରଭାବ ଖଟାଇ ପ୍ରମାଣ ନଷ୍ଟ କରିବାକୁ ଚେଷ୍ଟା କରୁଥିବା ନେଇ ଟ୍ୱିଶାଙ୍କ ପରିବାର ଅଭିଯୋଗ ଆଣିଛନ୍ତି। ଏହି ମାମଲାରେ ପୋଲିସର ତଦନ୍ତ ପ୍ରକ୍ରିୟା ଏବଂ ସିସିଟିଭି ଫୁଟେଜ୍ ହେରଫେରକୁ ନେଇ ପ୍ରଶ୍ନ ଉଠିବା ପରେ ପ୍ରଧାନ ବିଚାରପତି ସୂର୍ଯ୍ୟ କାନ୍ତଙ୍କ ନେତୃତ୍ୱରେ ସୁପ୍ରିମକୋର୍ଟର ଏକ ଖଣ୍ଡପୀଠ ମାମଲାର ବିଚାର କରୁଛନ୍ତି। ଅନୁଷ୍ଠାନିକ ପକ୍ଷପାତିତା (Institutional Bias) ଦର୍ଶାଇ କୋର୍ଟ ନିଜ ଆଡ଼ୁ ଏହି ପଦକ୍ଷେପ ନେଇଛନ୍ତି।

ଯୌତୁକ ନିର୍ଯାତନା ଓ ହତ୍ୟା ଅଭିଯୋଗ

ମୃତ୍ୟୁ ପୂର୍ବରୁ ଟ୍ୱିଶା ନିଜ ମା'ଙ୍କୁ ପଠାଇଥିବା ହ୍ୱାଟ୍ସଆପ୍ ମେସେଜ୍‌ ଏବେ ପୋଲିସ ହାତରେ ଲାଗିଛି। ସେଥିରେ ସେ ନିଜକୁ ଅଣନିଃଶ୍ୱାସୀ ଅନୁଭବ କରୁଥିବା ଏବଂ ମାନସିକ ନିର୍ଯାତନାର ଶିକାର ହେଉଥିବା ଲେଖିଥିଲେ। ତେବେ ଟ୍ୱିଶା ମାନସିକ ଅବସାଦ (ସିଜୋଫ୍ରେନିଆ) ରୋଗରେ ପୀଡ଼ିତ ଥିଲେ ବୋଲି ତାଙ୍କ ଶାଶୂ ଗିରିବାଳା ଦାବି କରିଛନ୍ତି। ଏବେ ସିବିଆଇ (CBI) ଏହି ସମ୍ବେଦନଶୀଳ ମାମଲାର ଦାୟିତ୍ୱ ଗ୍ରହଣ କଲା ପରେ ଘଟଣାର ପ୍ରକୃତ ସତ୍ୟତା ପଦାକୁ ଆସିବ ବୋଲି ସମସ୍ତେ ଆଶା ବାନ୍ଧିଛନ୍ତି।

ବହୁଚର୍ଚ୍ଚିତ ତ୍ୱିଷା ଶର୍ମା ଯୌତୁକ ନିର୍ଯାତନା ଓ ମୃତ୍ୟୁ ମାମଲାରେ ପୋଲିସକୁ ଏକ ବଡ଼ ସଫଳତା ମିଳିଛି। ଘଟଣା ପରଠାରୁ ପ୍ରାୟ ୧୦ ଦିନ ଧରି ଫେରାର ଥିବା ତାଙ୍କ ସ୍ୱାମୀ ତଥା ପେସାରେ ଓକିଲ ଥିବା ସମର୍ଥ ସିଂହଙ୍କୁ ଶୁକ୍ରବାର ଦିନ ମଧ୍ୟପ୍ରଦେଶ ପୋଲିସ ହେପାଜତକୁ ନେଇଛି। ଶନିବାର ଭୋରରୁ ତାଙ୍କୁ ଜେରା ପାଇଁ ଭୋପାଳ ଅଣାଯାଇଥିବା ବେଳେ ଏହି ମାମଲାରେ ସିବିଆଇ (CBI) ତଦନ୍ତ ପାଇଁ ମଧ୍ୟପ୍ରଦେଶ ସରକାର ସୁପାରିସ କରିଛନ୍ତି।

ସମର୍ଥ ସିଂହଙ୍କ ଆତ୍ମସମର୍ପଣ ଓ ଗିରଫଦାରୀ

ଗତ ମେ ୧୨ ତାରିଖରେ ଭୋପାଳର କାଟାରା ହିଲ୍ସ ଅଞ୍ଚଳରେ ଥିବା ନିଜ ବାସଭବନରୁ ୩୩ ବର୍ଷୀୟା ପୂର୍ବତନ ମଡେଲ ତଥା ଅଭିନେତ୍ରୀ ତ୍ୱିଷାଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା। ବିବାହର ମାତ୍ର ୫ ମାସ ପରେ ତାଙ୍କର ସନ୍ଦେହଜନକ ମୃତ୍ୟୁ ହୋଇଥିଲା। ଏହା ପରଠାରୁ ତାଙ୍କ ସ୍ୱାମୀ ସମର୍ଥ ଫେରାର ଥିଲେ ଏବଂ ପୋଲିସ ତାଙ୍କ ଉପରେ ୩୦,୦୦୦ ଟଙ୍କାର ପୁରସ୍କାର ମଧ୍ୟ ଘୋଷଣା କରିଥିଲା। ଶୁକ୍ରବାର ଦିନ ମଧ୍ୟପ୍ରଦେଶ ହାଇକୋର୍ଟରୁ ନିଜର ଆଗୁଆ ଜାମିନ ଆବେଦନ ପ୍ରତ୍ୟାହାର କରିବା ପରେ ସମର୍ଥ ଜବଲପୁରର ଏକ କୋର୍ଟରେ ଆତ୍ମସମର୍ପଣ କରିଥିଲେ। ଏହି ଘଟଣା ପରେ ବାର୍ କାଉନସିଲ୍ ଅଫ୍ ଇଣ୍ଡିଆ (BCI) ସମର୍ଥ ସିଂହଙ୍କ ଓକିଲାତି ଲାଇସେନ୍ସ ବାତିଲ କରିଦେଇଛି।

ଶାଶୂଙ୍କ ବିରୋଧରେ ଅଭିଯୋଗ ଓ ସିସିଟିଭି ଫୁଟେଜ୍

ଏହି ମାମଲାରେ ତ୍ୱିଷାଙ୍କ ପରିବାର ଲୋକେ ଶାଶୂ ତଥା ଅବସରପ୍ରାପ୍ତ ଜିଲ୍ଲା ଜଜ୍ ଗିରିବାଳା ସିଂହ ଏବଂ ସ୍ୱାମୀ ସମର୍ଥଙ୍କ ନାମରେ ଶାରୀରିକ ଓ ମାନସିକ ନିର୍ଯାତନା ଏବଂ ଯୌତୁକ ଦାବି କରି ହତ୍ୟା କରିଥିବାର ଅଭିଯୋଗ ଆଣିଛନ୍ତି। ଗିରିବାଳା ସିଂହଙ୍କୁ କୋର୍ଟ ଆଗୁଆ ଜାମିନ ପ୍ରଦାନ କରିଥିବା ବେଳେ ରାଜ୍ୟ ସରକାର ଏହାକୁ ବାତିଲ କରିବା ପାଇଁ ହାଇକୋର୍ଟରେ ଆବେଦନ କରିଛନ୍ତି। ନିକଟରେ ସାମ୍ନାକୁ ଆସିଥିବା ଏକ ସିସିଟିଭି ଫୁଟେଜ୍ରେ ତ୍ୱିଷାଙ୍କ ଅନ୍ତିମ ମୁହୂର୍ତ୍ତର ଦୃଶ୍ୟ କଏଦ ହୋଇଛି, ଯେଉଁଥିରେ ସମର୍ଥ ଓ ଅନ୍ୟମାନେ ତାଙ୍କୁ ତଳକୁ ଆଣି ସିପିଆର (CPR) ଦେଉଥିବାର ଦେଖିବାକୁ ମିଳିଛି। ସରକାରୀ ଓକିଲ କୋର୍ଟରେ ଦାବି କରିଛନ୍ତି ଯେ ଏହି ସିସିଟିଭି ଫୁଟେଜ୍ ସହ ଛେଡ଼ଛାଡ଼ କରାଯାଇଛି।

ଦ୍ୱିତୀୟ ଶବ ବ୍ୟବଚ୍ଛେଦ ଓ ସିବିଆଇ ତଦନ୍ତ ନିର୍ଦ୍ଦେଶ

ତ୍ୱିଷାଙ୍କ ପରିବାରର ଅଭିଯୋଗକୁ ଭିତ୍ତି କରି ମଧ୍ୟପ୍ରଦେଶ ହାଇକୋର୍ଟ ଏମ୍ସ ଦିଲ୍ଲୀ (AIIMS Delhi)ର ଏକ ବିଶେଷଜ୍ଞ ଦଳ ଦ୍ୱାରା ଦ୍ୱିତୀୟ ଶବ ବ୍ୟବଚ୍ଛେଦ ପାଇଁ ଅନୁମତି ପ୍ରଦାନ କରିଛନ୍ତି। ଏଥିସହ ରାଜ୍ୟର ମୁଖ୍ୟମନ୍ତ୍ରୀ ତଥା ଗୃହ ବିଭାଗ ଏହି ସମ୍ବେଦନଶୀଳ ମାମଲାର ନିରପେକ୍ଷ ତଦନ୍ତ ପାଇଁ କେନ୍ଦ୍ରୀୟ ତଦନ୍ତ ବ୍ୟୁରୋ (CBI)କୁ ସୁପାରିସ କରିଛନ୍ତି। ଏବେ ସମର୍ଥଙ୍କୁ ରିମାଣ୍ଡରେ ଆଣି ଅଧିକ ପଚରାଉଚରା କରିବା ପାଇଁ ପୋଲିସ କୋର୍ଟରେ ଆବେଦନ କରିବ。

ମଧ୍ୟପ୍ରଦେଶର ରାଜଧାନୀ ଭୋପାଳରେ ନୋଏଡାର ବାସିନ୍ଦା ଟ୍ୱିଶା ଶର୍ମାଙ୍କ ସନ୍ଦେହଜନକ ମୃତ୍ୟୁ ମାମଲା ଏବେ ଏକ ନୂଆ ମୋଡ଼ ନେଇଛି। ଏହି ଘଟଣାରେ ଏମ୍ସ (AIIMS) ଭୋପାଳର ପୋଷ୍ଟମର୍ଟମ ରିପୋର୍ଟ ସାମ୍ନାକୁ ଆସିଛି। ପୋଲିସ ଏହାକୁ ଆତ୍ମହତ୍ୟା ବୋଲି ଦାବି କରୁଥିବା ବେଳେ ପରିବାର ଲୋକେ ଏହାକୁ ଗ୍ରହଣ କରିବାକୁ ମନା କରିଦେଇଛନ୍ତି ଏବଂ ଦ୍ୱିତୀୟ ଶବ ବ୍ୟବଚ୍ଛେଦ ପାଇଁ ଦାବି କରୁଛନ୍ତି।

ପୋଲିସ କମିଶନରଙ୍କ ବୟାନ

ଭୋପାଳ ପୋଲିସ କମିଶନର ସଞ୍ଜୟ କୁମାର ସ୍ପଷ୍ଟ କରିଛନ୍ତି ଯେ, ମେଡିକାଲ୍ ଏବଂ ଫରେନ୍ସିକ୍ ପ୍ରମାଣ ଆଧାରରେ ଏହା ଏକ ଆତ୍ମହତ୍ୟା ଥିଲା। ପୋଷ୍ଟମର୍ଟମ ରିପୋର୍ଟରେ ମୃତ୍ୟୁର କାରଣ 'ଆଣ୍ଟି-ମର୍ଟମ ହ୍ୟାଙ୍ଗିଙ୍ଗ' (ଫାଶୀ ଲଗାଇବା) ବୋଲି ଉଲ୍ଲେଖ କରାଯାଇଛି। ସେ କହିଛନ୍ତି ଯେ ପୋଲିସ ଉପରେ କୌଣସି ପ୍ରକାରର ବାହ୍ୟ ଚାପ ନାହିଁ ଏବଂ ତଦନ୍ତ ସଠିକ୍ ଦିଗରେ ଚାଲିଛି। ତେବେ ଟ୍ୱିଶାଙ୍କୁ ଆତ୍ମହତ୍ୟା କରିବା ପାଇଁ କେଉଁ ପରିସ୍ଥିତି ବାଧ୍ୟ କଲା, ତାହାର ଖୋଳତାଡ଼ ଜାରି ରହିଛି। ପରିବାରର ଦ୍ୱିତୀୟ ପୋଷ୍ଟମର୍ଟମ ଦାବି ଉପରେ କମିଶନର କହିଛନ୍ତି ଯେ ଯଦି କୋର୍ଟ ଏଥିପାଇଁ ଆଦେଶ ଦିଅନ୍ତି, ତେବେ ପୋଲିସର କୌଣସି ଆପତ୍ତି ନାହିଁ।

ପୋଷ୍ଟମର୍ଟମ ରିପୋର୍ଟକୁ ନେଇ ପ୍ରଶ୍ନ

ଏମ୍ସ ଭୋପାଳର ଡାକ୍ତରମାନଙ୍କ ଦ୍ୱାରା ପ୍ରସ୍ତୁତ ପୋଷ୍ଟମର୍ଟମ ରିପୋର୍ଟ ଅନୁଯାୟୀ, ଟ୍ୱିଶାଙ୍କ ବେକରେ ଦୁଇଟି ସମାନ୍ତରାଳ ଦାଗ ଦେଖିବାକୁ ମିଳିଥିଲା। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ବ୍ୟବଚ୍ଛେଦ ସମୟରେ ତଦନ୍ତକାରୀ ଅଧିକାରୀମାନେ ବ୍ୟବହୃତ ଦଉଡ଼ି କିମ୍ବା 'ସୁସାଇଡ୍ ବେଲ୍ଟ' ଡାକ୍ତରୀ ଦଳଙ୍କୁ ଦେଖାଇନଥିଲେ। ଫରେନ୍ସିକ୍ ସାଇନ୍ସ ଲାବୋରେଟୋରୀ (FSL) ଟିମ୍ ଏହି ସାମଗ୍ରୀକୁ ଜବତ କରିବା ପରେ ବିଳମ୍ବରେ ଏମ୍ସକୁ ପଠାଇଥିଲେ। ଏହି ପ୍ରକ୍ରିୟାଗତ ତ୍ରୁଟିକୁ ନେଇ ଏବେ ଏକ ପୃଥକ ତଦନ୍ତ ଆରମ୍ଭ ହୋଇଛି।

ଦ୍ୱିତୀୟ ଶବ ବ୍ୟବଚ୍ଛେଦ ଦାବି ଓ ପରିବାରର ଅଭିଯୋଗ

ଟ୍ୱିଶା ଶର୍ମାଙ୍କ ପରିବାର ଏମ୍ସ ଭୋପାଳରୁ ମୃତଦେହ ଗ୍ରହଣ କରିବାକୁ ମନା କରିଦେଇଛନ୍ତି ଏବଂ ଏମ୍ସ ଦିଲ୍ଲୀରେ ପୁଣିଥରେ ପୋଷ୍ଟମର୍ଟମ କରିବାକୁ ଦାବି କରୁଛନ୍ତି। ଅନ୍ୟପକ୍ଷରେ, ପୋଲିସ ପରିବାରକୁ ଏକ ଚିଠି ଲେଖି ଜଣାଇଛି ଯେ ଏମ୍ସ ଭୋପାଳ ମର୍ଗରେ ଅତ୍ୟଧିକ କମ୍ ତାପମାତ୍ରା ବିଶିଷ୍ଟ ଷ୍ଟୋରେଜ୍ ବ୍ୟବସ୍ଥା ନଥିବାରୁ ମେ' ୧୩ରୁ ରଖାଯାଇଥିବା ମୃତଦେହ ଏବେ ପଚିବା ଆରମ୍ଭ କଲାଣି।

ସୂଚନାଯୋଗ୍ୟ, ଗତ ମେ' ୧୨ ତାରିଖରେ ଭୋପାଳର କାଟାରା ହିଲ୍ସ ସ୍ଥିତ ଶାଶୂଘରୁ ୩୧ ବର୍ଷୀୟା ଟ୍ୱିଶାଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା। ଗତ ଡିସେମ୍ବର ୨୦୨୫ରେ ସେ ଅବସରପ୍ରାପ୍ତ ଜଜ୍ ଗିରିବାଳା ସିଂହଙ୍କ ପୁଅ ତଥା ଆଇନଜୀବୀ ସମର୍ଥ ସିଂହଙ୍କୁ ବିବାହ କରିଥିଲେ। ଟ୍ୱିଶାଙ୍କ ପରିବାର ଉଭୟ ଶାଶୂ ଏବଂ ସ୍ୱାମୀଙ୍କ ବିରୋଧରେ ଯୌତୁକ ନିର୍ଯାତନା ଏବଂ ହତ୍ୟା ଅଭିଯୋଗ ଆଣିଛନ୍ତି। ବର୍ତ୍ତମାନ ସ୍ୱାମୀ ସମର୍ଥ ସିଂହ ଫେରାର ଅଛନ୍ତି ଏବଂ ତାଙ୍କୁ ଧରିବା ପାଇଁ ପୋଲିସର ୬ଟି ଟିମ୍ ବିଭିନ୍ନ ସ୍ଥାନରେ ଚଢ଼ାଉ କରୁଛନ୍ତି।

ମଧ୍ୟପ୍ରଦେଶର ଭୋପାଳରେ ବହୁଚର୍ଚ୍ଚିତ ଟ୍ୱିଶା ଶର୍ମା ମୃତ୍ୟୁ ମାମଲାରେ ନୂଆ ଖୁଲାସା ହୋଇଛି। ଏହି ମାମଲାର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତକାରୀ ଦଳ (SIT) ମୁଖ୍ୟ ଡ. ରଜନୀଶ କଶ୍ୟପ ସ୍ପଷ୍ଟ କରିଛନ୍ତି ଯେ, ଟ୍ୱିଶାଙ୍କ ପୋଷ୍ଟମର୍ଟମ ରିପୋର୍ଟରେ କୌଣସି ପ୍ରକାରର ଡ୍ରଗ୍ସ ବା ନିଶାଦ୍ରବ୍ୟ ସେବନର ପ୍ରମାଣ ମିଳିନାହିଁ। ଶାଶୂ ତଥା ଅବସରପ୍ରାପ୍ତ ବିଚାରପତି ଗିରିବାଳା ସିଂହ ଲଗାଇଥିବା ଡ୍ରଗ୍ସ ସେବନ ଅଭିଯୋଗକୁ ଏହି ରିପୋର୍ଟ ସମ୍ପୂର୍ଣ୍ଣ ଭାବେ ଖଣ୍ଡନ କରିଛି।

ଜିମ୍ନାଷ୍ଟିକ୍ ବେଲ୍ଟ ନଦେବା ପୋଲିସର ବଡ଼ ତ୍ରୁଟି

ପୋଷ୍ଟମର୍ଟମ ସମୟରେ ଡାକ୍ତରମାନଙ୍କୁ ଫାଶୀ ପାଇଁ ବ୍ୟବହୃତ ଲିଗେଚର ମ୍ୟାଟେରିଆଲ୍ ବା ଜିମ୍ନାଷ୍ଟିକ୍ ବେଲ୍ଟ ଠିକ୍ ସମୟରେ ଉପଲବ୍ଧ କରାଯାଇନଥିଲା। ଏହି ଘଟଣାକୁ ନେଇ ଏସ୍ଆଇଟି ମୁଖ୍ୟ ସ୍ୱୀକାର କରିଛନ୍ତି ଯେ ତତ୍କାଳୀନ ତଦନ୍ତକାରୀ ଅଧିକାରୀଙ୍କ ପକ୍ଷରୁ ଅବହେଳା କରାଯାଇଛି। ଏହି ତ୍ରୁଟିକୁ ଗମ୍ଭୀରତାର ସହ ନିଆଯାଇ ସମ୍ପୃକ୍ତ ଅଧିକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଅନ୍ୟପଟେ ଟ୍ୱିଶାଙ୍କ ଶରୀରରେ ମୃତ୍ୟୁ ପୂର୍ବରୁ ଏକାଧିକ ଆଘାତ ଲାଗିଥିବା ରିପୋର୍ଟରେ ଉଲ୍ଲେଖ ରହିଛି, ଯାହା ଶାରୀରିକ ନିର୍ଯାତନା ଆଡ଼କୁ ଇଙ୍ଗିତ କରୁଛି।

ଫେରାର ସ୍ୱାମୀଙ୍କ ଜାମିନ ଆବେଦନ ଖାରଜ

ଟ୍ୱିଶାଙ୍କ ସ୍ୱାମୀ ତଥା ପେସାରେ ଆଇନଜୀବୀ ସମର୍ଥ ସିଂହ ବର୍ତ୍ତମାନ ଫେରାର ଅଛନ୍ତି। ଭୋପାଳ କୋର୍ଟ ତାଙ୍କର ଆଗୁଆ ଜାମିନ ଆବେଦନକୁ ଖାରଜ କରିଦେଇଛନ୍ତି। ପୋଲିସ ତାଙ୍କୁ ଗିରଫ କରିବା ପାଇଁ ୧୦,୦୦୦ ଟଙ୍କାର ପୁରସ୍କାର ରାଶି ଘୋଷଣା କରିଛି। ସମର୍ଥଙ୍କୁ ଧରିବା ପାଇଁ ୬ରୁ ୭ଟି ସ୍ୱତନ୍ତ୍ର ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛନ୍ତି ଏବଂ ତାଙ୍କ ପାସପୋର୍ଟ ବାତିଲ୍ କରିବା ପ୍ରକ୍ରିୟା ମଧ୍ୟ ଆରମ୍ଭ ହୋଇଛି।

ମା'ଙ୍କ ସହ ଶେଷ ଚାଟ୍‌ରେ ଥିଲା ନିର୍ଯାତନାର କାହାଣୀ

ମୃତ୍ୟୁର କିଛି ଦିନ ପୂର୍ବରୁ ୩୩ ବର୍ଷୀୟା ପୂର୍ବତନ ମିସ୍ ପୁଣେ ଟ୍ୱିଶା ଶର୍ମା ନିଜ ମା'ଙ୍କୁ ହ୍ୱାଟ୍ସଆପ୍‌ରେ ମେସେଜ୍ କରିଥିଲେ। ସେ ଲେଖିଥିଲେ, "ମୋ ଜୀବନ ନର୍କ ହୋଇଯାଇଛି। ଏମାନେ ମୋତେ ନା କାନ୍ଦିବାକୁ ଦେବେ ନା ହସିବାକୁ।" ସ୍ୱାମୀ ସମର୍ଥ ସିଂହ ଓ ଶାଶୂ ଯୌତୁକ ପାଇଁ ମାନସିକ ଓ ଶାରୀରିକ ନିର୍ଯାତନା ଦେଉଥିବା ପରିବାର ଲୋକେ ଅଭିଯୋଗ ଆଣିଛନ୍ତି। ବର୍ତ୍ତମାନ ସିସିଟିଭି ଫୁଟେଜ୍ ଏବଂ ପୋଷ୍ଟମର୍ଟମ ରିପୋର୍ଟ ଆଧାରରେ ପୋଲିସ ଏହି ହାଇପ୍ରୋଫାଇଲ୍ ମାମଲାର ଅଧିକ ଖୋଳତାଡ଼ କରୁଛି।

ବଲିଉଡର ପ୍ରସିଦ୍ଧ ଅଭିନେତ୍ରୀ ତଥା ଭାରତୀୟ ଜନତା ପାର୍ଟି (ବିଜେପି) ର ସାଂସଦ କଙ୍ଗନା ରଣାୱତ ନିକଟରେ ଘଟିଥିବା ଏକ ଯୌତୁକ ମୃତ୍ୟୁ ଘଟଣାକୁ ନେଇ କ୍ଷୋଭ ପ୍ରକାଶ କରିଛନ୍ତି। ସେ ଭାରତୀୟ ସମାଜର କଟୁ ସତ୍ୟକୁ ସାମ୍ନାକୁ ଆଣିବା ସହ ଯୁବତୀମାନଙ୍କୁ ବିବାହ ଅପେକ୍ଷା ନିଜ କ୍ୟାରିୟର ଏବଂ ଆର୍ଥିକ ସ୍ୱାଧୀନତା ଉପରେ ଅଧିକ ଧ୍ୟାନ ଦେବାକୁ ପରାମର୍ଶ ଦେଇଛନ୍ତି।

ବିବାହ ପରେ ଝିଅମାନଙ୍କୁ ପରିତ୍ୟାଗ କରେ ସମାଜ

ମଧ୍ୟପ୍ରଦେଶର ଭୋପାଳରେ ନିକଟରେ ଜଣେ ୩୩ ବର୍ଷୀୟା ବିବାହିତା ମହିଳା, ତୁଇଶା ଶର୍ମାଙ୍କ ସନ୍ଦେହଜନକ ମୃତ୍ୟୁ ହୋଇଥିଲା। ଏହି ଘଟଣାରେ ଯୌତୁକ ନିର୍ଯାତନାର ଅଭିଯୋଗ ଆସିବା ପରେ କଙ୍ଗନା ନିଜ ଇନଷ୍ଟାଗ୍ରାମ୍ ଷ୍ଟୋରୀରେ ଏକ ଲମ୍ବା ପୋଷ୍ଟ ଶେୟାର କରିଛନ୍ତି। ସେ ଲେଖିଛନ୍ତି, "ପ୍ରତ୍ୟେକ ଦିନ ବିବାହିତା ଯୁବତୀମାନଙ୍କ ସହ ଘଟୁଥିବା ଦୁଃଖଦ ଖବର ସାମ୍ନାକୁ ଆସୁଛି। ଅନେକ ଶିକ୍ଷିତ ଝିଅ ମଧ୍ୟ କୌଣସି ଅଘଟଣ ଘଟିବା ପୂର୍ବରୁ ନିଜର ଦମଘୋଣ୍ଟା ପରିସ୍ଥିତିରୁ ମୁକୁଳିବା ପାଇଁ ପିତାମାତାଙ୍କୁ ସାହାଯ୍ୟ ମାଗିଥାନ୍ତି। କିନ୍ତୁ ବିବାହ ପରେ ଝିଅମାନଙ୍କୁ ନିଜ ଅବସ୍ଥାରେ ଏକାକୀ ଛାଡିଦେବାରେ ଭାରତୀୟ ସମାଜ ବଦନାମ ଅଟେ।"

"ନିଜର ହିରୋ ନିଜେ ବନନ୍ତୁ"

ଆଜିକାଲିର ଯୁବତୀମାନଙ୍କୁ ସଶକ୍ତ ହେବାର ବାର୍ତ୍ତା ଦେଇ ସେ କହିଛନ୍ତି ଯେ କୌଣସି ସୋସିଆଲ୍ ମିଡିଆ, ଫ୍ୟାଶନ୍, ଡେଟିଂ କିମ୍ବା ମେକଅପ୍ ଇଣ୍ଡଷ୍ଟ୍ରି ସେମାନଙ୍କୁ ଏହି ବାସ୍ତବିକ ପରାମର୍ଶ ଦେବ ନାହିଁ। "ଜୀବନରେ ଆପଣଙ୍କ କ୍ୟାରିୟର ଅନ୍ୟ ସବୁକିଛିଠାରୁ ଅଧିକ ଗୁରୁତ୍ୱପୂର୍ଣ୍ଣ। ଆପଣ ସ୍ୱାବଲମ୍ବୀ ହେବା ପରେ ହିଁ ବିବାହ ବିଷୟରେ ଚିନ୍ତା କରନ୍ତୁ। ଦୟାକରି ନିଜର ହିରୋ ନିଜେ ବନନ୍ତୁ। ଆପଣଙ୍କୁ ରକ୍ଷା କରିବାକୁ କେହି ଆସିବେ ନାହିଁ। ଆପଣ କାହାକୁ ବିବାହ କରୁଛନ୍ତି ତାହା ଅପେକ୍ଷା ଆପଣ କଣ କରୁଛନ୍ତି ଏବଂ ଆପଣ କିଏ, ତାହା ଅଧିକ ଗୁରୁତ୍ୱପୂର୍ଣ୍ଣ," ବୋଲି କଙ୍ଗନା ରଣାୱତ ଦୃଢୋକ୍ତି ପ୍ରକାଶ କରିଛନ୍ତି।

ଭୋପାଳ ଯୌତୁକ ନିର୍ଯାତନା ମାମଲା

ସୂଚନାଯୋଗ୍ୟ, ଭୋପାଳରେ ଘଟିଥିବା ଏହି ଘଟଣା ସମଗ୍ର ଦେଶରେ ଚାଞ୍ଚଲ୍ୟ ସୃଷ୍ଟି କରିଛି। ପୋଲିସ ଏହି ମାମଲାର ତଦନ୍ତ ପାଇଁ ଏକ ୬ ଜଣିଆ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କରିଛି। ମୃତ ମହିଳାଙ୍କ ପରିବାର (ଯେଉଁମାନେ ମୂଳତଃ ନୋଏଡାର ବାସିନ୍ଦା) ତାଙ୍କ ସ୍ୱାମୀ ସମର୍ଥ ଏବଂ ଶାଶୂ ତଥା ଅବସରପ୍ରାପ୍ତ ବିଚାରପତି ଗିରିବାଳା ସିଂହଙ୍କ ବିରୋଧରେ ହତ୍ୟା ଏବଂ ଯୌତୁକ ନିର୍ଯାତନା ଅଭିଯୋଗ ଆଣିଛନ୍ତି। ପରିବାର ଲୋକଙ୍କ କହିବା ଅନୁଯାୟୀ, ମୃତ୍ୟୁ ପୂର୍ବରୁ ରାତି ପ୍ରାୟ ୧୦ଟା ପର୍ଯ୍ୟନ୍ତ ମହିଳା ଜଣକ ଫୋନରେ ତାଙ୍କ ସହ ଯୋଗାଯୋଗରେ ଥିଲେ ଏବଂ ସେ ଭୋପାଳ ଛାଡି ନୋଏଡା ଫେରିଯିବାକୁ ଚାହୁଁଥିଲେ।

କଙ୍ଗନାଙ୍କ ଏହି ପ୍ରତିକ୍ରିୟା ଏବେ ସୋସିଆଲ ମିଡିଆରେ ବେଶ୍ ଚର୍ଚ୍ଚାର ବିଷୟ ପାଲଟିଛି ଏବଂ ମହିଳାମାନଙ୍କ ଆର୍ଥିକ ସ୍ୱାଧୀନତା ଉପରେ ଏକ ଗୁରୁତ୍ୱପୂର୍ଣ୍ଣ ବାର୍ତ୍ତା ଦେଉଛି।