ଖଣ୍ଡଗିରି : ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (ଏମ୍‍ସ) ଭୁବନେଶ୍ୱର ଟିକଟ କାଉଣ୍ଟର ଦଲାଲଙ୍କ କବ୍‍ଜାରେ ରହିଥିବା ଆଜି ପୁଣି ଥରେ ପ୍ରମାଣିତ ହୋଇଛି। ପୂର୍ବରୁ ଅନେକ ସାଧାରଣ ଲୋକ ଦଲାଲଙ୍କ ଶୋଷଣର ଶିକାର ହୋଇଥିବା ବେଳେ ଏବେ ସିବିଆଇ ଅଧିକାରୀ ମଧ୍ୟ ଦଲାଲଙ୍କ କବଳରୁ ବାଦ ପଡ଼ି ନାହାନ୍ତି। କୋଲକାତାସ୍ଥିତ ସିବିଆଇ ଅଫିସରେ କାର୍ଯ୍ୟରତ ଯାଜପୁର ବିଞ୍ଝାରପୁର ଥାନା ଅଞ୍ଚଳର ସିବିଆଇ ଇନସପେକ୍ଟର ଦେଢ଼ ହଜାର ଟଙ୍କା ଦେଇ ଏମ୍‍ସରେ ଓପିଡି ଟିକଟ କରିବା ପରେ ଏଭଳି ଘଟଣା ପଦାକୁ ଆସିଛି।

ସୂଚନା ଅନୁସାରେ, ସିବିଆଇ ଅଧିକାରୀ ଜଣକ ତାଙ୍କ ମାଆଙ୍କୁ ନ୍ୟୁରୋଲୋଜି (ସ୍ନାୟୁ ବିଭାଗ)ର ଡାକ୍ତରଙ୍କ ପରାମର୍ଶ କରାଇବା ପାଇଁ ଦୁଇ ଦିନ ପୂର୍ବେ ଏମ୍‍ସ ଆସିଥିଲେ। ଓପିଡି ଟିକଟ କରାଇବା ପାଇଁ ଧାଡ଼ିରେ ଛିଡ଼ା ହୋଇଥିଲେ ମଧ୍ୟ ତାଙ୍କୁ ଟିକଟ ମିଳି ନ ଥିଲା। ଟିକଟ ନ ପାଇ ଫେରି ଯାଉଥିବା ବେଳେ ଦଲାଲ ପ୍ରଭାକର ହାବୁଡ଼ରେ ପଡ଼ିଥିଲେ। ପ୍ରଭାକର ନ୍ୟୁରୋଲୋଜି ବିଭାଗର ଟିକଟ କରାଇଦେବ ବୋଲି କହିବା ସହ ଟିକଟ ପାଇଁ ଦେଢ଼ ହଜାର ଟଙ୍କା ନେବ ବୋଲି ଦାବି କରିଥିଲେ। ୧୦ ଟଙ୍କିଆ ଟିକଟର ମୂଲ୍ୟ ଦେଢ଼ ହଜାର ଟଙ୍କା ଶୁଣି ସମ୍ପୃକ୍ତ ସିବିଆଇ ଅଧିକାରୀଙ୍କୁ ପ୍ରଥମେ ଆଶ୍ଚର୍ଯ୍ୟ ଲାଗିଥିଲା। ହେଲେ ଅଧିକାରୀ ଜଣକ ଆଉ କୌଣସି ଉପାୟ ନପାଇ ପ୍ରଭାକରର କଥାରେ ସହମତି ହୋଇଥିଲେ।

ଏହାପରେ ଗତକାଲି ସିବିଆଇ ଅଧିକାରୀ ଜଣକ ପ୍ରଭାକରକୁ ହ୍ୱାଟ୍‍ସଆପ ଯୋଗେ ତାଙ୍କ ମାଆଙ୍କ ଆଧାର କାର୍ଡ ପଠାଇବା ସହିତ ଫୋନ୍‍ ପେ’ ମାଧ୍ୟମରେ ଏକ ହଜାର ଟଙ୍କା ପଠାଇଥିଲେ। ଟଙ୍କା ପଠାଇବା ପରେ ପ୍ରଭାକର ତାଙ୍କୁ ଆଜି ଏମ୍‍ସ ଆସିବା ପାଇଁ କହିଥିଲେ। ସିବିଆଇ ଅଧିକାରୀ ଜଣକ ଆଜି ଏମ୍‍ସରେ ପହଞ୍ଚିବା ପରେ ପ୍ରଭାକରକୁ ଫୋନ କରି କେଉଁଠି ଦେଖା କରିବି ବୋଲି ପଚାରିଥିଲେ। ନ୍ୟୁରୋଲୋଜି ବିଭାଗକୁ ଯାଆନ୍ତୁ, ସେଠାରେ ୬ନଂ ସିରିଏଲରେ ଆପଣଙ୍କ ଟିକଟ ରହିଛି ବୋଲି କହିବା ସହିତ ଉକ୍ତ ବିଭାଗରେ ଥିବା ଜଣେ ଠିକା କର୍ମଚାରୀଙ୍କୁ ଅବଶିଷ୍ଟ ୫ଶହ ଟଙ୍କା ଦେଇଦେବେ ବୋଲି ପ୍ରଭାକର ସିବିଆଇ ଅଧିକାରୀଙ୍କୁ କହିଥିଲେ।

ପ୍ରଭାକରର କଥା ମୁତାବକ ସିବିଆଇ ଅଧିକାରୀ ନ୍ୟୁରୋଲୋଜି ବିଭାଗକୁ ଯାଇ ୫ଶହ ଟଙ୍କା ଦେବା ସହିତ ତାଙ୍କ ମାଆଙ୍କୁ ଡାକ୍ତରଙ୍କ ପରାମର୍ଶ କରାଇଥିଲେ। ସିବିଆଇ ଅଧିକାରୀ ଜଣକ ଡାକ୍ତରଙ୍କୁ ଦେଖାଇବା ପରେ ଘଟଣା ବିଷୟରେ ଏମ୍‍ସ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ। ଧାଡ଼ିରେ ଛିଡ଼ା ହୋଇ ଟିକଟ ନ ମିଳିବା ଓ ଟଙ୍କା ଦେବା ପରେ ବିନା କୌଣସି ବାଧାରେ ସିଧାସଳଖ ଡାକ୍ତରଙ୍କ ସହିତ ପରାମର୍ଶ କରାଇବା ଦଲାଲଙ୍କ ସହିତ ଟିକଟ କାଉଣ୍ଟର କର୍ମଚାରୀଙ୍କ ମଧୁଚନ୍ଦ୍ରିକାକୁ ପଦାରେ ପକାଇଛି। ଦଲାଲଙ୍କ ସହିତ ବିଭିନ୍ନ ବିଭାଗରେ କାର୍ଯ୍ୟରତ ଠିକା କର୍ମଚାରୀଙ୍କ ସମ୍ପୃକ୍ତି ରହିଥିବା ମଧ୍ୟ ଏହି ଘଟଣାରୁ ସ୍ପଷ୍ଟ ହୋଇଛି। ତେବେ ବାରମ୍ୱାର ଏମ୍‍ସର ଓପିଡି ଟିକଟ ବିକ୍ରି ହେଉଥିବା ପ୍ରମାଣିତ ହୋଇଥିଲେ ମଧ୍ୟ ଏମ୍‍ସ ପକ୍ଷରୁ ଆଖିଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ କରାନଯିବା କର୍ତ୍ତୃପକ୍ଷଙ୍କ ଭୂମିକା ଉପରେ ସନ୍ଦେହ ସୃଷ୍ଟି କରିଛି।

ଭୁବନେଶ୍ୱର: ଆସନ୍ତା ଜୁନ୍ ୨୮ ତାରିଖରୁ ରୋଗୀଙ୍କ ପାଇଁ ଖୋଲିବ ଭୁବନେଶ୍ୱର ଏମ୍ସର ଓପିଡ଼ି । କରୋନା ପାଇଁ ଏପ୍ରିଲ ୨୪ ତାରିଖରୁ ଏମ୍‌ସ ଓପିଡ଼ି ବନ୍ଦ ରହିଥିଲା । ବର୍ତମାନ ସମୟରେ ସବୁ ବିଭାଗର ଆଉଟଡୋର୍ ରୋଗୀ ଚିକିତ୍ସା ଖୋଲିଲେ ମଧ୍ୟ ଅଳ୍ପ ସଂଖ୍ୟକ ରୋଗୀଙ୍କୁ କରୋନା କଟକଣା ମଧ୍ୟରେ ଚିକିତ୍ସା କରାଯିବ ବୋଲି ଏମ୍ସ ଅଧୀକ୍ଷକ ଡାକ୍ତର ସଚିଦାନନ୍ଦ ମହାନ୍ତି ଜଣାଇଛନ୍ତି । ଧିରେ ଧିରେ ନିୟମିତ ଭାବେ ସବୁ ବିଭାଗରେ ଯେତେ ରୋଗୀ ଚିକିତ୍ସା ପାଇଁ ଆସିବେ, ସେମାନଙ୍କୁ ଆଟେଣ୍ଡ କରାଯିବ । ହେଲେ ଓପିଡ଼ି ସହିତ ଟେଲି ମେଡ଼ିସନ୍ ବ୍ୟବସ୍ଥା ପୂର୍ବ ପରି ଜାରି ରହିବ ।