ସାଧାରଣ ଜନତାଙ୍କ ପାଇଁ ପୁଣି ଏକ ଖରାପ ଖବର । ଲଗାତାର ଭାବେ ବୃଦ୍ଧି ପାଉଥିବା ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ମଧ୍ୟରେ ଏବେ ଇନ୍ଧନ ଦର ସାଧାରଣ ଲୋକଙ୍କ ଉପରେ ଏକ ବଡ଼ ପ୍ରହାର କରିଛି । କେବଳ ୪ ଦିନ ମଧ୍ୟରେ ଦେଶରେ ଦ୍ୱିତୀୟ ଥର ପାଇଁ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି ପାଇଛି, ଯାହା ଗ୍ରାହକଙ୍କୁ ଚିନ୍ତାରେ ପକାଇଛି ।

କେତେ ବଢ଼ିଲା ତେଲ ଦର?

ଆଜି ଦେଶର ବିଭିନ୍ନ ପ୍ରମୁଖ ସହରରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ଉଲ୍ଲେଖନୀୟ ବୃଦ୍ଧି ଦେଖିବାକୁ ମିଳିଛି । ରିପୋର୍ଟ ଅନୁଯାୟୀ, ପେଟ୍ରୋଲ ଲିଟର ପିଛା ୮୨ ରୁ ୯୬ ପଇସା ମହଙ୍ଗା ହୋଇଥିବାବେଳେ, ଡିଜେଲ ଦର ଲିଟର ପିଛା ୮୬ ରୁ ୯୪ ପଇସା ପର୍ଯ୍ୟନ୍ତ ବୃଦ୍ଧି ପାଇଛି ।

ଅନ୍ତର୍ଜାତୀୟ ବିବାଦର ସିଧାସଳଖ ପ୍ରଭାବ

ବିଶ୍ୱ ବଜାରରେ ଦେଖାଦେଇଥିବା ଅସ୍ଥିରତା ହିଁ ଏହି ଦରବୃଦ୍ଧିର ମୁଖ୍ୟ କାରଣ ପାଲଟିଛି । ମୁଖ୍ୟତଃ ଇରାନ ସହ ଲାଗିରହିଥିବା ଯୁଦ୍ଧ ପରିସ୍ଥିତି ଏବଂ ଆମେରିକା-ଇସ୍ରାଏଲ ବିବାଦ ଯୋଗୁଁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ଉପରେ ବ୍ୟାପକ ପ୍ରଭାବ ପଡ଼ିଛି । ଏହାର ସିଧାସଳଖ ପ୍ରଭାବ ଏବେ ଭାରତର ସାଧାରଣ ନାଗରିକଙ୍କ ପକେଟ ଉପରେ ପଡ଼ୁଛି ।

ସିଏନଜି (CNG) ମଧ୍ୟ ବାଦ୍ ପଡ଼ିନାହିଁ

ପେଟ୍ରୋଲ ଏବଂ ଡିଜେଲ ପରେ ଏବେ ସିଏନଜି (CNG) ମଧ୍ୟ ମହଙ୍ଗା ହୋଇଛି । ସିଏନଜି କିଲୋ ପିଛା ଏକାଥରକେ ୨ ଟଙ୍କା ବଢ଼ିଯାଇଛି । ଏହି ତେଲ ସଂକଟ ଓ ଦରବୃଦ୍ଧି ଯୋଗୁଁ ଗ୍ରାହକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ପେଟ୍ରୋଲ ପମ୍ପଗୁଡ଼ିକରେ ଲୋକଙ୍କ ଲମ୍ବା ଧାଡ଼ି ଦେଖିବାକୁ ମିଳିଥିବା ବେଳେ ଏହି ମହଙ୍ଗା ମାଡ଼ ଯାନବାହାନ ଚାଳକ ଏବଂ ପରିବହନ ବ୍ୟବସ୍ଥାକୁ ବିଶେଷ ଭାବରେ ପ୍ରଭାବିତ କରିଛି ।

ଦେଶରେ ବଢ଼ୁଥିବା ଟ୍ରାଫିକ ସମସ୍ୟା, ବାୟୁ ପ୍ରଦୂଷଣ ଏବଂ ସଡ଼କ ଭିତ୍ତିଭୂମି ଉପରେ ପଡ଼ୁଥିବା ଚାପକୁ ଦୃଷ୍ଟିରେ ରଖି ନେପାଳ ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ସରକାରଙ୍କ ପକ୍ଷରୁ ସମସ୍ତ ପ୍ରକାରର ନୂଆ ସାର୍ବଜନୀନ ଗାଡ଼ି ବା ପବ୍ଲିକ ଟ୍ରାନ୍ସପୋର୍ଟ ପଞ୍ଜୀକରଣ ଉପରେ ଅନିର୍ଦ୍ଦିଷ୍ଟ କାଳ ପାଇଁ ରୋକ ଲଗାଯାଇଛି। ବିଶେଷ କଥା ହେଉଛି, ଏହି କଟକଣା କେବଳ ପେଟ୍ରୋଲ କିମ୍ବା ଡିଜେଲ ଚାଳିତ ଗାଡ଼ି ଉପରେ ନୁହେଁ, ବରଂ ଇଲେକ୍ଟ୍ରିକ ଭେଇକିଲ୍ (EV) ଉପରେ ମଧ୍ୟ ଲାଗୁ କରାଯାଇଛି।

କାହିଁକି ନିଆଗଲା ଏହି ନିଷ୍ପତ୍ତି?

ନେପାଳର ପରିବହନ ପରିଚାଳନା ବିଭାଗ (Department of Transport Management) ଅନୁଯାୟୀ, ଦେଶର ସହରାଞ୍ଚଳ ବିଶେଷ କରି କାଠମାଣ୍ଡୁ ଉପତ୍ୟକାରେ ବାୟୁ ପ୍ରଦୂଷଣ ଏକ ଗମ୍ଭୀର ରୂପ ନେଇଛି। ଏହାସହ ଅତ୍ୟଧିକ ଗାଡ଼ି ଯୋଗୁଁ ଟ୍ରାଫିକ ଜାମ୍ ସମସ୍ୟା ସାଧାରଣ ଜୀବନଯାତ୍ରାକୁ ଅସ୍ତବ୍ୟସ୍ତ କରିଦେଇଛି। ଏହା ବ୍ୟତୀତ ଦେଶରେ ଇନ୍ଧନ ଯୋଗାଣ ସଙ୍କଟ ଏବଂ ପେଟ୍ରୋଲିୟମ ଜାତୀୟ ଦ୍ରବ୍ୟ ଉପରେ ନିର୍ଭରଶୀଳତାକୁ କମାଇବା ପାଇଁ ଏହିଭଳି କଠୋର ନିଷ୍ପତ୍ତି ନିଆଯାଇଛି। ପରିବହନ ବ୍ୟବସ୍ଥାରେ ବୈଜ୍ଞାନିକ ପରିଚାଳନାର ଅଭାବ ଏବଂ ରାସ୍ତାର କ୍ଷମତା ତୁଳନାରେ ଗାଡ଼ି ସଂଖ୍ୟା ବୃଦ୍ଧି ପାଉଥିବାରୁ ଏହା ଜନସାଧାରଣଙ୍କ ପାଇଁ ଏକ ବଡ଼ ଆହ୍ୱାନ ସୃଷ୍ଟି କରୁଥିଲା।

ଆଇନଗତ ପ୍ରାବଧାନ ଓ ଆଗାମୀ ପ୍ରଭାବ

ବିଭାଗ ପକ୍ଷରୁ ଏହି ନିଷ୍ପତ୍ତି ଯାନ ଏବଂ ପରିବହନ ପରିଚାଳନା ଆଇନ, ୨୦୪୯ ର ଧାରା ୨୪(୩) ଅଧୀନରେ ନିଆଯାଇଛି, ଯାହା ସରକାରଙ୍କୁ ଜନସ୍ୱାର୍ଥ ଦୃଷ୍ଟିରୁ ନୂଆ ଗାଡ଼ି ପଞ୍ଜୀକରଣ ଉପରେ ପ୍ରତିବନ୍ଧକ ଲଗାଇବାକୁ କ୍ଷମତା ପ୍ରଦାନ କରିଥାଏ। ଏ ନେଇ ସମସ୍ତ ସାତୋଟି ପ୍ରଦେଶର ଭୌତିକ ଭିତ୍ତିଭୂମି, ଶ୍ରମ ଓ ପରିବହନ ମନ୍ତ୍ରଣାଳୟ ତଥା ସ୍ଥାନୀୟ ପ୍ରଶାସନକୁ ନିର୍ଦ୍ଦେଶନାମା ଜାରି କରାଯାଇଛି। ପରବର୍ତ୍ତୀ ନିର୍ଦ୍ଦେଶ ନଆସିବା ପର୍ଯ୍ୟନ୍ତ କୌଣସି ନୂତନ ସାର୍ବଜନୀନ ଯାନ ପଞ୍ଜୀକରଣ ପ୍ରକ୍ରିୟା କରାଯିବ ନାହିଁ ବୋଲି ସ୍ପଷ୍ଟ କରାଯାଇଛି। ଅନ୍ୟପକ୍ଷରେ, ଇଲେକ୍ଟ୍ରିକ ଗାଡ଼ିଗୁଡ଼ିକୁ ମଧ୍ୟ ଏହି କଟକଣା ପରିସରଭୁକ୍ତ କରାଯାଇଥିବାରୁ ପରିବେଶବିତ୍ ଏବଂ ପରିବହନ ବ୍ୟବସାୟୀମାନେ ଆଶ୍ଚର୍ଯ୍ୟ ପ୍ରକଟ କରିଛନ୍ତି।

କଣାସ: ଡିଜେଲ ଅଭାବରୁ ମଝି ଚିଲିକାରେ ଡଙ୍ଗା ସହ ଫସିଲେ ମତ୍ସ୍ୟଜୀବୀ । ଚିଲିକା ଭିତରେ ଥିବା ଛୋଟ ଛୋଟ ଟାପୁରେ ନେଇଛନ୍ତି ଆଶ୍ରୟ । କଣାସ ଅଞ୍ଚଳର ୪୦ଟି ଡଙ୍ଗା ସହ ଶତାଧିକ ମତ୍ସ୍ୟଜୀବୀ ଫସି ରହିଥିବା ସୂଚନା । କଣାସ ଜାଗୁଳାଇପଦର ଠାରୁ ୮ କିଲୋମିଟର ଦୂରରେ ଥିବା ଦୟାନଦୀ ମୁହାଣରେ ବି ଏକାଧିକ ଡଙ୍ଗା ତେଲ ଅଭାବରୁ କୂଳରେ ଲାଗିଛି ।

ତେଲ ମିଳୁନଥିବାରୁ ପୁରୀ ଜିଲ୍ଲା କଣାସ ଅଞ୍ଚଳ ମତ୍ସ୍ୟଜୀବୀ ଚିଲିକା ଭିତରକୁ ମାଛ ଧରିବାକୁ ଯାଇ ସମୁଦ୍ରରେ ପସିରହିଥିବା ଜଣାପଡ଼ିଛି । ୪୦ରୁ ଅଧିକ ଡଙ୍ଗାରେ ଶତାଧିକ ମତ୍ସ୍ୟଜୀବୀ ମାଛ ଧରିବାକୁ ଯାଇଥିଲେ । ମାତ୍ର ବୋଟରୁ ତେଲ ସରିଯିବାରୁ ଚିଲିକା ମଝିରେ ଥିବା କିଛି ଟାପୁରେ ଆଶ୍ରୟ ନେଇଛନ୍ତି । ଡିଜେଲ ଅଭାବରୁ ସେମାନେ ଆସି ପାରୁନଥିବା ଫୋନ ଯୋଗେ ପରିବାର ଲୋକଙ୍କୁ ଜଣାଇଛନ୍ତି । 

ଭୁବନେଶ୍ୱର: ଧାଡି ସରକାର ଭାବେ କୁଖ୍ୟାତ ଅର୍ଜନ କରିଥିବା ଡବଲ ଇଂଜିନ ସରକାର ପୁଣି ଥରେ ସାଧାରଣ ଲୋକଙ୍କୁ ପଦାରେ ଧାଡି କରି ଠିଆ କରିଛି । ପେଟ୍ରୋଲ ଓ ଡିଜେଲ  ପାଇଁ ସାରା ରାଜ୍ୟରେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି ସାଧାରଣ ଲୋକ । ବିମୁଦ୍ରିକରଣ ସମୟରେ ଯେଉଁଭଳି ସାଧାରଣ ଲୋକ ବ୍ୟାଙ୍କରେ ଧାଡି ହୋଇ ଠିଆ ହୋଇଥିଲେ, ସେଭଳି ତେଲକୁ ନେଇ ୪ରୁ ୫ ଘଣ୍ଟା ଟାଙ୍କି ସମ୍ମୁଖରେ ଠିଆ ହେଉଛନ୍ତି ଲୋକେ । ଯୋଗାଣ ବିଭାଗ ତଥା ରାଜ୍ୟ ସରକାରଙ୍କ ଦାୟିତ୍ୱହୀନତା ପାଇଁ ଏହି ସମସ୍ୟା ସୃଷ୍ଟି ହୋଇଛି ବୋଲି ବିଜେଡି ଅଭିଯୋଗ କରିଛି । 

ଆଜି ଶଙ୍ଖ ଭବନଠାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ବିଜେଡି ଉପସଭାପତି ଶ୍ରୀଯୁକ୍ତ ସଂଜୟ ଦାସବର୍ମା, ଗଣମାଧ୍ୟମ ସଂଯୋଜକ ତଥା ମୁଖପାତ୍ର ଡ. ଲେନିନ ମହାନ୍ତି ଓ ବିଜୁ ଛାତ୍ର ଜନତା ଦଳର ସଭାନେତ୍ରୀ ଇପ୍ସିତା ସାହୁ ରାଜ୍ୟ ସରକାରଙ୍କୁ କଡା ସମାଲୋଚନା କରି କହିଛନ୍ତି, ରାଜ୍ୟରେ ସୃଷ୍ଟି ହୋଇଥିବା ଏହି ଅଘୋଷିତ ଆପଦ ପାଇଁ ବିଜେପି ସରକାରଙ୍କ ଅପରିଣାମଦର୍ଶୀ ତଥା ଦିଶାହୀନ ଶାସନ ଦାୟୀ ।

ଶ୍ରୀଯୁକ୍ତ ଦାସବର୍ମା କହିଛନ୍ତି, ରାଜ୍ୟରେ ତେଲ ସମସ୍ୟାକୁ ନେଇ ଯେତେବେଳେ ସାଧାରଣ ଲୋକ ରାଜରାସ୍ତାରେ ଧାଡି କରି ଠିଆ ହେଲେ, ସେତେବେଳେ ଯୋଗାଣମନ୍ତ୍ରୀ ମିଛ ବାହାସ୍ପଟ ମାରି କହିଥିଲେ କୌଣସି ପ୍ରକାର ସମସ୍ୟା ନାହିଁ । ତେଲ ପର୍ଯ୍ୟାପ୍ତ ପରିମାଣରେ ମହଜୁଦ ରହିଛି । କିନ୍ତୁ ବାସ୍ତବ ଚିତ୍ର ଭିନ୍ନ, କେଉଁଠି ତେଲ ଟାଙ୍କି ବନ୍ଦ ରହିଥିଲା ବେଳେ ଆଉ କେଉଁଠି ଦୁଇଚକିଆ ଗାଡିକୁ ୨ଶହ ଟଙ୍କା ଓ ଚାରି ଚକିଆ ଗାଡିକୁ ୧୦୦୦ ଟଙ୍କାର ତେଲ ଦିଆଯାଉଛି । ତେଲ ଦୁର୍ଦ୍ଦଶାରେ ଜର୍ଜରିତ ହେଲାଣି ସାରା ଓଡିଶା କିନ୍ତୁ ରାଜ୍ୟ ସରକାର ଏହାର ପ୍ରତିକାର କରିବା ପରିବର୍ତ୍ତେ ମିଛ ଫୁଟାଣି ମାରୁଛନ୍ତି । ସରକାର ଏହି ସମସ୍ୟାକୁ କିଭଳି ସମାଧାନ ହେବ ସେଥିପ୍ରତି ଧ୍ୟାନ ନଦେଇ ନିଜର ଦୁଇ ବର୍ଷ ପୂର୍ତ୍ତି କିପରି ପାଳନ କରାଯିବ ସେଥିପାଇଁ ସଚିବାଳୟରେ ଉଚ୍ଚସ୍ତରୀୟ ବୈଠକ ଘନ ଘନ ଚାଲିଛି । ଗୋଟିଏ ପଟେ ରାଜ୍ୟର ଲୋକମାନେ ତେଲ ପାଇଁ ଲମ୍ବା ଧାଡିରେ ଥିବାବେଳେ ବେଡି ଉପରେ କୋରଡା ମାଡ ପରି ତୈଳ ଦର ବୃଦ୍ଧି ଲୋକଙ୍କ ଆର୍ଥୀକ ବୋଝ ବଢାଉଛି । ଯୋଗାଣ ସଚିବ କହୁଛନ୍ତି ତେଲ ପ୍ରଚୁର ପରିମାଣରେ ମହଜୁଦ ରହିଛି, ଅନ୍ୟପଟେ ଯୋଗାଣମନ୍ତ୍ରୀ କହୁଛନ୍ତି ତେଲ ମାତ୍ର ୧୩ ଦିନ ପାଇଁ ଗଚ୍ଛିତ ଅଛି । ଏଥିରୁ ସ୍ପଷ୍ଟ ଜଣାପଡୁଛି, ମନ୍ତ୍ରୀ ଓ ସଚିବଙ୍କ କଥାରେ ତାଳମେଳ ନାହିଁ । ଡବଲ ଇଂଜିନ ସରକାରରେ ଢିଙ୍କିଶାଳ ରୁ ହାଣ୍ଡିଶାଳ ପର୍ଯ୍ୟନ୍ତ ଯେଉଁ ମହଙ୍ଗା ମାଡ ଜନସାଧାରଣଙ୍କୁ ଦେଉଛନ୍ତି ଲୋକେ ଆଗାମୀ ଦିନରେ ଏହାର ଜବାବ ଦେବେ ।

ଡ. ମହାନ୍ତି କହିଛନ୍ତି, ବିଜେପି ଦଳ କ୍ଷମତାରେ ନଥିବା ବେଳେ ଗୋଟିଏ କଥା କହୁଥିଲା ବେଳେ କ୍ଷମତାକୁ ଆସିଲା ପରେ ଆଉ ଗୋଟିଏ କଥା କହି ଲୋକଙ୍କୁ ଭୂଆଁ ବୁଲାଉଛନ୍ତି । ଗତ କାଲି ୩ଟଙ୍କା ତେଲ ଦର ବୃଦ୍ଧି ପାଇଛି । ବିଜେପି ବିରୋଧୀ ଦଳରେ ଥିବା ବେଳେ ଭାଟ ହ୍ରାସ ଓ ଜିଏସ୍ଟିରେ ପେଟ୍ରୋଲ ଓ ଡିଜେଲକୁ ଅନ୍ତର୍ଭୁକ୍ତ କରିବା ପାଇଁ ଚିକ୍ରାର କରୁଥିଲେ । କିନ୍ତୁ ଆଜି ସେମାନେ କ୍ଷମତାରେ ଥାଇ ସେହିକଥାକୁ କାହିଁକି ପାଳନ କରୁନାହାନ୍ତି? ଏଥିରୁ ସ୍ପଷ୍ଟ ଜଣାପଡୁଛି ବିଜେପି ହେଉଛି ଦୋମୁହାଁ । ଅର୍ନ୍ତଜାତୀୟ ବଜାରରେ ଅଶୋଧିତ ତୈଳ ବ୍ୟାରେଲ ପିଛା ୫୦ରୁ ୬୦ ଟଙ୍କା ଥିଲା ବେଳେ ତୈଳ ଦର ନକମାଇ ସାଧାରଣ ଲୋକଙ୍କଠାରୁ କୋଟି କୋଟି ଟଙ୍କା ନିର୍ଦ୍ଦିଷ୍ଟ କମ୍ପାନୀ ମୁନାଫା କମାଇଥିଲେ । ଆଜି ଯେତେବେଳେ ଅଶୋଧିତ ତୈଳ ବୃଦ୍ଧି ହେଉଛି ସେତେବେଳେ ତେଲ କମ୍ପାନୀ ମାନଙ୍କୁ ମୁନାଫା ଦେବା ପାଇଁ ଲୋକଙ୍କ ଉପରେ ୩ଟଙ୍କା ତୈଳ ଦର ବୃଦ୍ଧି କରିଛି ବିଜେପି ସରକାର । ଏଥିରୁ ସ୍ପଷ୍ଟ ହେଉଛି ବିଜେପିର ଅସଲ ଚିତ୍ରଚରିତ୍ର ।

ବିଜୁ ଛାତ୍ର ଜନତା ଦଳ ସଭାନେତ୍ରୀ ଇପ୍ସିତା ସାହୁ କହିଛନ୍ତି ଯେ, ତୈଳ ଦର ବୃଦ୍ଧି ଓ ସଙ୍କଟ ଯୋଗୁ ସାଧାରଣ ଜନତା ଆଜି ୪୦ ଡିଗ୍ରୀ ଖରାରେ ଧାଡିରେ ଠିଆ ହେଉଛନ୍ତି । ଋଷିଆ ଭଳି ମିତ୍ର ଦେଶମାନେ ଆମକୁ ଶସ୍ତାରେ ଅଶୋଧିତ ତୈଳ ଦେବା ପାଇଁ ରାଜି ଥିଲା ବେଳେ କେଉଁ ଅଜଣା ଶକ୍ତି କାରଣରୁ ପ୍ରଧାନମନ୍ତ୍ରୀ ଭୟଭିତ ହୋଇ ଆମେରିକା ନିଦେ୍ର୍ଦଶରେ ଋଷିଆ ବଦଳରେ ଅନ୍ୟ ଦେଶରୁ ତେଲ କ୍ରୟ କରିବା ପାଇଁ ବାଧ୍ୟ ହେଉଛନ୍ତି । ତାହା ଦେଶବାସୀଙ୍କୁ ସ୍ପଷ୍ଟ କରନ୍ତୁ । ତେଲ ସମସ୍ୟାକୁ ନେଇ ଲାଗି ରହିଥିବା ଦୁର୍ଦ୍ଦଶା ଯଦି ଆଗାମୀ ଦିନରେ ନସୁଧୁରେ ତାହା ହେଲେ ବିଜେଡି ଲୋକଙ୍କ ପାଇଁ ରାଜ ରାସ୍ତାକୁ ଓହ୍ଲାଇବ ।

କଟକ: ରାଜ୍ୟରେ କୃତ୍ରିମ ତୈଳ ସଙ୍କଟ ଭିତରେ ସାମ୍ନାକୁ ଆସିଛି ହୃଦୟବିଦାରକ ଖବର । ଅଧାବାଟରେ ଆମ୍ବୁଲାନ୍ସରୁ ତେଲ ସରିଯିବାରୁ ରୋଗୀର ମୃତ୍ୟୁ ହୋଇଥିବା ଅଭିଯୋଗ । ମୃତକ ହେଲେ କେନ୍ଦ୍ରାପଡ଼ା ଅଞ୍ଚଳର ପ୍ରକାଶ କୁମାର ତାଣ୍ଡି । ରୋଗୀଜନକ ଏସସିବି ମେଡିକାଲରୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର ବେଳେ କାଠଯୋଡ଼ି ପୋଲ ଉପରେ ଆମ୍ବୁଲାନ୍ସରୁ ତେଲ ସରି ଯାଇଥିଲା । ଯେଉଁଥିପାଇଁ ପ୍ରକାଶଙ୍କର ମୃତ୍ୟୁ ହୋଇଥିବା ଅଭିଯୋଗ ହୋଇଛି ।

ସୂଚନା ଅନୁସାରେ, କେନ୍ଦ୍ରାପଡ଼ା ଅଞ୍ଚଳର ଜଣେ ଯୁବକ ବିଷପିଇ ଗୁରୁତର ହେବାରୁ ପରିବାର ଲୋକେ କଟକ ଏସସିବି ମେଡିକାଲକୁ ଆଣିଥିଲେ। ତେବେ ସେଠାରୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ଯୁବକକୁ ଆମ୍ବୁଲାନ୍ସରେ ସ୍ଥାନାନ୍ତର କରିଥିଲେ। ଯିବାବେଳେ କାଠଯୋଡ଼ି ନଦୀ ବ୍ରିଜ ଉପରେ ହଠାତ୍ ଆମ୍ୱୁଲାନ୍ସର ପେଟ୍ରୋଲ ଶେଷ ହୋଇଯାଇଥିଲା। ତେଲ ସରିଯିବାରୁ ରାସ୍ତାରେ ଅଟକିଥିଲା ଆମ୍ବୁଲାନ୍ସ। ଫଳରେ କିଛି ସମୟ ପରେ ରୋଗୀର ମୃତ୍ୟୁ ହୋଇଥିଲା ବୋଲି ପରିବାର ଲୋକେ ଅଭିଯୋଗ କରିଛନ୍ତି। ଏମିତିକି ଆମ୍ବୁଲାନ୍ସର ଅକ୍ସିଜେନ ମଧ୍ୟ ଶେଷ ହୋଇଯାଇଥିବା ସେମାନେ ଅଭିଯୋଗ କରିଛନ୍ତି।

ଭୁବନେଶ୍ୱର: ରାଜ୍ୟରେ ତୈଳ ସଂକଟ ନେଇ ପ୍ରତିକ୍ରିୟା ରଖିଲେ ଯୋଗାଣ ମନ୍ତ୍ରୀ । ମନ୍ତ୍ରୀ କହିଲଲେ କି, 'ରାଜ୍ୟରେ ୧୩ ଦିନ ପାଇଁ ତେଲର ଅଭାବ ନାହିଁ' । ଭୟଭୀତ ହୋଇ ପେଟ୍ରୋଲ ନ କଣିବାକୁ କହିଲେ ମନ୍ତ୍ରୀ । ଘରେ ପେଟ୍ରୋଲ କିଣି ମହଜୁଦ ରଖନ୍ତୁନି, ଦେଶ ଓ ରାଜ୍ୟରେ ପର୍ଯ୍ୟାପ୍ତ ତେଲ ରହିଛି । ଅସାଧୁ ବେପାରୀଙ୍କ ଉପରେ ନଜର ରଖାଯାଇଛି।ବେଆଇନ ଗଚ୍ଛିତ ତୈଳ ଥିବା ସ୍ଥାନରେ ଚଢ଼ାଉ କରାଯିବବୋଲି କହିଛନ୍ତି ମନ୍ତ୍ରୀ । ଯେତିକି ଆବଶ୍ୟକ ସେତିକି ତେଲ ପକାନ୍ତୁ ବୋଲି ମନ୍ତ୍ରୀ ପରାମର୍ଶ ଦେଇଛନ୍ତି । 

କୌଣସି ଗୁଜବ ଉପରେ ଗୁରୁତ୍ବ ଦିଅନ୍ତୁ ନାହିଁ । ଗହଳିକୁ ନଜରରେ ରଖି କିଛି ଟାଙ୍କିରେ କିଛି ନିୟମ କରିଛନ୍ତି । ଟାଙ୍କିରେ ବହୁତ ଭିଡ଼ ବଢ଼ିଯିବାରୁ ଅଳ୍ପ ଅଳ୍ପ ତେଲ ଦେଉଛନ୍ତି ମାଲିକ। ଆତଙ୍କିତ ହୋଇ ତେଲ ନ କିଣିବାକୁ ପରାମର୍ଶ ଦେଇଛନ୍ତି ମନ୍ତ୍ରୀ।

ସେହିପରି ରାଜ୍ୟରେ ପର୍ଯ୍ୟାପ୍ତ ପରିମାଣରେ ଅଛି ପେଟ୍ରୋଲ ଏବଂ ଡିଜେଲ । ପ୍ୟାନିକ ହୁଅନ୍ତୁ ନାହିଁ କିମ୍ବା ଭିଡ଼ କରନ୍ତୁ ନାହିଁ ବୋଲି କହିଛନ୍ତି IOCLର CGM କମଲ ସିଲ । ସେ କହିଛନ୍ତି, କୌଣସି ସ୍ଥାନରେ ପେଟ୍ରୋଲ କିମ୍ବା ଡିଜେଲର ଅଭାବ ନାହିଁ । ଅଧିକ ପେଟ୍ରୋଲ, ଡିଜେଲ କିଣି ମହଜୁଦ କରନ୍ତୁ ନାହିଁ । ଡିମାଣ୍ଡ ଅନୁସାରେ ସବୁ ଟାଙ୍କିକୁ ତେଲ ପହଞ୍ଚାଯିବ । ତେବେ ଗତ ଦୁଇ ଦିନରେ ୩୦ ପ୍ରତିଶତ ପେଟ୍ରୋଲ, ଡିଜେଲ ବିକ୍ରି ବଢି ଯାଇଥିବା କହିଛନ୍ତି କମଲ ସିଲ୍ । 

ଭୁବନେଶ୍ୱର: ତେଲ ପାଇଁ ହାହାକାର । ପେଟ୍ରୋଲ ଟାଙ୍କି ମାଲିକ କହୁଛନ୍ତି, କିଛି ସଙ୍କଟ ନାହିଁ । ହେଲେ ପେଟ୍ରୋଲ, ଡିଜେଲ ମିଳୁନାହିଁ । ରାଜ୍ୟର ଅନେକ ପେଟ୍ରୋଲ ପମ୍ପରେ ତୈଳ ସଙ୍କଟ ଦେଖାଦେଇଥିବାବେଳେ କିଛି ବନ୍ଦ ମଧ୍ୟ ରହିଛି । ଯେଉଁ ଟାଙ୍କିରେ ଅଛି ସେଠି ପେଟ୍ରୋଲ ଓ ଡିଜେଲ୍ ପକାଇବା ପାଇଁ ଗାଡି ଚାଳକମାନେ ଲମ୍ବା ଧାଡ଼ିରେ ଅପେକ୍ଷା କରି ରହୁଥିଵା ଦେଖାଯାଉଛି । ଗାଡ଼ିରେ ତେଲ ପକେଇବା ପାଇଁ ଲୋକେ ଘଣ୍ଟା ଘଣ୍ଟା ଧରି ଅପେକ୍ଷା କରିଥିବାବେଳେ କିଛି ସ୍ଥାନରେ ବଡ଼ ବଡ଼ ଟିଣ ଡବା ଧରି ମଧ୍ୟ ଧାଡ଼ିରେ ରହୁଛନ୍ତି । ଯାହାଫଳରେ କୁତ୍ରିମ ଅଭାବ ଦେଖିବାକୁ ମିଳୁଛି । ଉଚ୍ଚ ସ୍ତରରେ ସମସ୍ତେ କହୁଛନ୍ତି, ଅଛି...ଅଛି । ତା’ହେଲେ ଏ କୃତ୍ରିମ ଅଭାବ କାହିଁକି? ଏହା ପଛରେ କିଏ? ତେଲ କମ୍ପାନି ନା ଟାଙ୍କି ମାଲିକ ନା ଅଚାନକ ଅସ୍ୱାଭାବିକ ଚାହିଦା ବୃଦ୍ଧି। 

ଭୁବନେଶ୍ୱର: ସାରା ରାଜ୍ୟରେ ପେଟ୍ରୋଲ ଡିଜେଲ ଘୋର ସଙ୍କଟ । ପେଟ୍ରୋଲ ପମ୍ପରେ ଲାଗୁଛି ଲମ୍ବା ଲାଇନ । ରାଜଧାନୀ ଭୁବନେଶ୍ୱରରେ ପେଟ୍ରୋଲ ଓ ଡିଜେଲ ସଙ୍କଟ ଏବେ ଚରମ ସୀମାରେ ପହଞ୍ଚିଛି। ଯାହାକୁ ନେଇ ବେଶୀ ଚିନ୍ତାରେ ପଡିଛନ୍ତି ରାଜ୍ୟ ଘରୋଇ ବସ୍ ମାଲିକ ସଂଘ। ଯଦି ଏଭଳି ସମସ୍ୟା ଲାଗି ରୁହେ ତେବେ ୬ରୁ ୭ ଦିନ ମଧ୍ୟରେ ଘରୋଇ ବସ୍ ଚଳାଚଳ ବନ୍ଦ ହୋଇଯିବ। ଏମିତି ଆଶଙ୍କା ପ୍ରକାଶ କରିଛି ରାଜ୍ୟ ଘରୋଇ ବସ ମାଲିକ ସଙ୍ଘ । ରାଜ୍ୟ ଘରୋଇ ବସ ମାଲିକ ସଙ୍ଘର ସାଧାରଣ ସମ୍ପାଦକ ଦେବେନ୍ଦ୍ର ସାହୁ ଏହା କହିଛନ୍ତି ।

ସରକାର ଏଥିପ୍ରତି ତୁରନ୍ତ ଧ୍ୟାନ ଦେବାକୁ ସେ ଅନୁରୋଧ କରିଛନ୍ତି। ପବ୍ଲିକ ଟ୍ରାନ୍ସପୋର୍ଟ ପ୍ରତି ସ୍ବତନ୍ତ୍ର ଧ୍ୟାନ ଦେବା  ଏବଂ କାର୍ଡ ବ୍ୟବସ୍ଥା କରି ଡିଜେଲ ଦେବାକୁ ଅନୁରୋଧ  କରିଛନ୍ତି। ବର୍ତ୍ତମାନ୍ ରାଜ୍ୟରେ ମୋଟ ୧୪ ହଜାର ଘରୋଇ ବସ୍ ଚାଲିଛି। ତେଲ ନ ମିଳିବାରୁ ପ୍ରାୟ ଦୁଇ ହଜାର ବସ୍ ବନ୍ଦ ହୋଇପଡ଼ିଛି। ଗ୍ରାମାଞ୍ଚଳରେ ତେଲ ନ ମିଳିବାରୁ ବସ୍‌ଗୁଡ଼ିକ ଆସିପାରୁନାହିଁ। 

ସେ କହିଛନ୍ତି, ଓଡିଶା ସମେତ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶ, ଛତିଶଗଡ଼, ଝାଡ଼ଖଣ୍ଡ, ପଶ୍ଚିମବଙ୍ଗରେ ମଧ୍ୟ ତେଲ ମିଳୁ ନାହିଁ। ତେଣୁ ବାହାର ରାଜ୍ୟର ଗାଡ଼ି ଓଡିଶାକୁ ଆସି ପାରୁ ନାହିଁ। ରାଜ୍ୟ ସରକାର ସମ୍ବେଦନଶୀଳ ହୋଇ ତୁରନ୍ତ ଯାତ୍ରୀବାହୀ ବସ ଗୁଡିକୁ ତେଲ ଯୋଗାଇ ଦିଅନ୍ତୁ। ନଚେତ ଗାଡ଼ି ଚଳାଚଳ ସମ୍ଭବ ହେବ ନାହିଁ। 

ଭୁବନେଶ୍ୱର: ରାଜ୍ୟରେ ଦେଖାଦେଇଛି କି ତେଲ ସଙ୍କଟ । ଆଜି ସକାଳେ ପେଟ୍ରୋଲ ପମ୍ପକୁ ଦେଖିଲେ କିଛି ଏପରି ମନେ ହେଉଛି । ପେଟ୍ରୋଲ ପକାଇବାକୁ ଭୁବନେଶ୍ବରର ଅଧିକାଂଶ ପେଟ୍ରୋଲ ପମ୍ପ୍‌ରେ ଲାଗିଛି ଲମ୍ବା ଲାଇନ୍‌ । ତେଲ ପକାଇବାକୁ ପେଟ୍ରୋଲ ପମ୍ପରେ ଏତେ ଲମ୍ବା ଲାଇନ ଲାଗୁଛି ଯେ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡୁଛି । ଦୁଇଚକିଆ ଠାରୁ ଚାରିଚକିଆ ଯାନ ପର୍ଯ୍ୟନ୍ତ ଲମ୍ବା ଲାଇନ୍ ଦେଖିବାକୁ ମିଳୁଛି । ତେଲ ଅଭାବ ଆଶଙ୍କାରେ ଅଧିକ ତେଲ ସଂଗ୍ରହ କରିବାରେ ବ୍ୟସ୍ତ ଗ୍ରାହକ । ବିଭିନ୍ନ ତେଲ ଟାଙ୍କିରେ ତେଲ ନାହିଁ ବୋଲି ଗ୍ରାହକ ହନସନ୍ତ ମଧ୍ୟ ହେଉଛନ୍ତି ।  

ଅନ୍ୟପଟେ ଓଡ଼ିଶା ପେଟ୍ରୋଲ ପମ୍ପ୍ ଆସୋସିଏସନ୍ ସଭାପତି ସଞ୍ଜୟ ଲାଠ୍ କହିଛନ୍ତି କି, 'ରାଜ୍ୟରେ ତେଲ ସଂକଟ ନାହିଁ କି ଦର ବଢ଼ିବାର ନାହିଁ । ଲୋକେ ଭୟଭୀତ ହୋଇ ତେଲ ପକାଉଛନ୍ତି।' ସହର ସମସ୍ତ ବଡ ପେଟ୍ରୋଲ ପମ୍ପରେ ପେଟ୍ରୋଲ ଓ ଡିଜେଲ ପର୍ଯ୍ୟାପ୍ତ ପରିମାଣରେ ମହଜୁଦ ଅଛି ବୋଲି ସଞ୍ଜୟ ଲାଠ୍ କହିଛନ୍ତି । ଲୋକଙ୍କୁ ଅନାବଶ୍ୟକ ଭିଡ ନକରିବାକୁ ଓ ଗୁଜବରେ ବିଶ୍ଵାସ ନକରିବାକୁ ଅନୁରୋଧ କରିଛନ୍ତି ।

ତେବେ ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ପରିସ୍ଥିତିର ପ୍ରଭାବ ଏବେ ସାରା ବିଶ୍ୱ ଅନୁଭବ କରୁଛି ।  ବଢୁଛି ତୈଳ ସଙ୍କଟ ଓ ଇନ୍ଧନ ଦର । ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ଲଗାତାର ବଢୁଥିବାବେଳେ ଏହାର ସିଧାସଳଖ ପ୍ରଭାବ ପଡ଼ିଛି ଭାରତୀୟ ବଜାର ଉପରେ । ପେଟ୍ରୋଲ ଓ ଡିଜେଲ ଦର ବୃଦ୍ଧିକୁ ନେଇ ସାଧାରଣ ଲୋକଙ୍କ ମନରେ ଏବେ ଅସ୍ୱସ୍ଥତା ଓ ଆଶଙ୍କା ବଢ଼ିବାରେ ଲାଗିଛି । ଏହି ଗୁରୁତର ପରିସ୍ଥିତି ମଧ୍ୟରେ ଦେଶବାସୀଙ୍କୁ ସଚେତନ ହେବାକୁ ଅପିଲ କରିଛନ୍ତି ପ୍ରଧାନମନ୍ତ୍ରୀ । ପେଟ୍ରୋଲ, ଡିଜେଲ, ସାର ଓ ସୁନା ଭଳି ଆମଦାନୀ ହେଉଥିବା ସାମଗ୍ରୀର ସୀମିତ ଓ ଆବଶ୍ୟକତାନୁସାରେ ବ୍ୟବହାର କରିବାକୁ ସେ ଦେଶବାସୀଙ୍କୁ ଅନୁରୋଧ କରିଛନ୍ତି ।

ନୂଆଦିଲ୍ଲୀ: ପଶ୍ଚିମ ଏସିଆରେ ଲାଗି ରହିଥିବା ବିବାଦ, ବିମାନ ଇନ୍ଧନ ଦର ବୃଦ୍ଧି ଏବଂ ଆକାଶମାର୍ଗ କଟକଣାକୁ ଦୃଷ୍ଟିରେ ରଖି ଏୟାର ଇଣ୍ଡିଆ ଏକ ବଡ଼ ପଦକ୍ଷେପ ନେଇଛି। ଜୁନ୍‌ରୁ ଅଗଷ୍ଟ ୨୦୨୬ ମଧ୍ୟରେ ୨୯ଟି ଅନ୍ତର୍ଜାତୀୟ ରୁଟ୍‌ରେ ବିମାନ ଉଡ଼ାଣ ବାତିଲ ଏବଂ ହ୍ରାସ କରିବାକୁ କମ୍ପାନୀ ବୁଧବାର ଘୋଷଣା କରିଛି।

ବିମାନ ସଂସ୍ଥା ପକ୍ଷରୁ କୁହାଯାଇଛି ଯେ ଇରାନ ଯୁଦ୍ଧ ସଙ୍କଟ ଏବଂ ହରମୁଜ୍ ପ୍ରଣାଳୀ ଅଞ୍ଚଳରେ ଅସ୍ଥିରତା କାରଣରୁ ବିଶ୍ୱବ୍ୟାପୀ ବିମାନ ଚଳାଚଳ ବାଧାପ୍ରାପ୍ତ ହେଉଛି। ତେଣୁ ଯାତ୍ରୀମାନଙ୍କୁ ଶେଷ ମୁହୂର୍ତ୍ତରେ ହେଉଥିବା ଅସୁବିଧାରୁ ରକ୍ଷା କରିବା ଏବଂ ପରିଚାଳନାଗତ ସ୍ଥିରତା ଆଣିବା ପାଇଁ ଏହି ଅସ୍ଥାୟୀ ପରିବର୍ତ୍ତନ କରାଯାଇଛି। କିଛି ନିର୍ଦ୍ଦିଷ୍ଟ ଅଞ୍ଚଳରେ ଆକାଶମାର୍ଗ କଟକଣା ଏବଂ ଅନ୍ତର୍ଜାତୀୟ ଉଡ଼ାଣ ପାଇଁ ରେକର୍ଡସ୍ତରୀୟ ଇନ୍ଧନ ଦର ଯୋଗୁଁ ବାଣିଜ୍ୟିକ କ୍ଷତିକୁ ଏଡ଼ାଇବା ଲାଗି ଏଭଳି ନିଷ୍ପତ୍ତି ନିଆଯାଇଛି।

ଉଡ଼ାଣ ହ୍ରାସ ସତ୍ତ୍ୱେ କମ୍ପାନୀ ପକ୍ଷରୁ କୁହାଯାଇଛି ଯେ, ପ୍ରତି ମାସରେ ପାଞ୍ଚଟି ମହାଦେଶକୁ ୧୨୦୦ରୁ ଅଧିକ ଅନ୍ତର୍ଜାତୀୟ ବିମାନ ଚଳାଚଳ ଜାରି ରହିବ। ଏଥିରେ ଉତ୍ତର ଆମେରିକାକୁ ସପ୍ତାହକୁ ୩୩ଟି ଉଡ଼ାଣ, ୟୁରୋପକୁ ୪୭ଟି, ବ୍ରିଟେନକୁ ୫୭ଟି, ଅଷ୍ଟ୍ରେଲିଆକୁ ୮ଟି, ଦୂର ପ୍ରାଚ୍ୟ, ଦକ୍ଷିଣ-ପୂର୍ବ ଏସିଆ ଓ ସାର୍କ ଅଞ୍ଚଳକୁ ୧୫୮ଟି ଏବଂ ମରିସସକୁ ୭ଟି ଉଡ଼ାଣ ସାମିଲ ରହିଛି।

ଗତ ଆର୍ଥିକ ବର୍ଷରେ ଏୟାର ଇଣ୍ଡିଆ ପ୍ରାୟ ୨୨,୦୦୦ କୋଟି ଟଙ୍କାରୁ ଅଧିକ କ୍ଷତି ସହିଥିବା ଆକଳନ କରାଯାଇଛି। ଖର୍ଚ୍ଚ ନିୟନ୍ତ୍ରଣ ପାଇଁ କମ୍ପାନୀ ମେ ମାସରେ ମଧ୍ୟ ଦୈନିକ ପ୍ରାୟ ୯୦ଟି ବିମାନ ଉଡ଼ାଣ ହ୍ରାସ କରିଥିଲା। ଏହି ନୂଆ ପରିବର୍ତ୍ତନ ଯୋଗୁଁ ପ୍ରଭାବିତ ହୋଇଥିବା ଯାତ୍ରୀମାନଙ୍କୁ ବିନା ମୂଲ୍ୟରେ ତାରିଖ ପରିବର୍ତ୍ତନ କିମ୍ବା ସମ୍ପୂର୍ଣ୍ଣ ରିଫଣ୍ଡ (ଅର୍ଥ ଫେରସ୍ତ) ସୁବିଧା ଯୋଗାଇ ଦିଆଯିବ ବୋଲି ବିମାନ ସଂସ୍ଥା ପ୍ରତିଶ୍ରୁତି ଦେଇଛି। ଏଥିସହ ଖର୍ଚ୍ଚ କାଟ୍ ପାଇଁ ଘରୋଇ ତଥା ସ୍ୱଳ୍ପ ଦୂରଗାମୀ ଅନ୍ତର୍ଜାତୀୟ ଉଡ଼ାଣରେ ଭୋଜନ ସେବାକୁ ଇଚ୍ଛାଧୀନ କରିବାକୁ ମଧ୍ୟ ବିଚାର କରାଯାଉଛି।

ସୂଚନାଯୋଗ୍ୟ, ପଶ୍ଚିମ ଏସିଆ ବିବାଦ କାରଣରୁ ଅଶୋଧିତ ତୈଳ ଦର ବୃଦ୍ଧି ପାଇଛି ଏବଂ ବିମାନଗୁଡ଼ିକୁ ସୁରକ୍ଷିତ ଆକାଶମାର୍ଗ ଦେଇ ଅଧିକ ବାଟ ବୁଲି ଯିବାକୁ ପଡ଼ୁଛି। ବିଶ୍ୱବ୍ୟାପୀ ଦେଖାଦେଇଥିବା ଏହି ଆର୍ଥିକ ତଥା ଇନ୍ଧନ ସଙ୍କଟ ମଧ୍ୟରେ ବୈଦେଶିକ ମୁଦ୍ରା ସଂରକ୍ଷଣ ପାଇଁ ଅନାବଶ୍ୟକ ବିଦେଶ ଯାତ୍ରାକୁ ସ୍ଥଗିତ ରଖିବା ସହ ଘରୁ କାମ (Work from Home) ଏବଂ ଭର୍ଚୁଆଲ ମିଟିଂକୁ ଆପଣାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିକଟରେ ଦେଶବାସୀଙ୍କୁ ନିବେଦନ କରିଥିଲେ।