ଭୁବନେଶ୍ୱର: ଓଡ଼ିଶା ସବ୍-ଅର୍ଡିନେଟ୍ ଷ୍ଟାଫ୍ ସିଲେକ୍ସନ୍ କମିଶନ୍ (OSSSC) ପକ୍ଷରୁ ଆୟୋଜିତ ସମ୍ମିଳିତ ନିଯୁକ୍ତି ପରୀକ୍ଷା ବା କମ୍ବାଇଣ୍ଡ ରିକ୍ରୁଟମେଣ୍ଟ ଏକ୍ସାମିନେସନ୍ (CRE-2025) ର ଲିଖିତ ପରୀକ୍ଷାକୁ ସ୍ଥଗିତ ରଖାଯାଇଛି। ପୂର୍ବରୁ ଏହି ପରୀକ୍ଷା ଜୁନ୍ ୨୦, ୨୦୨୬ ତାରିଖରେ ହେବାର ଥିଲା, ମାତ୍ର ବର୍ତ୍ତମାନ ଏହାକୁ ଜୁନ୍ ୨୮, ୨୦୨୬ ତାରିଖକୁ ଘୁଞ୍ଚାଇ ଦିଆଯାଇଛି।

ଆୟୋଗ ପକ୍ଷରୁ ଜାରି କରାଯାଇଥିବା ସରକାରୀ ବିଜ୍ଞପ୍ତି ଅନୁଯାୟୀ, NEET (UG) 2026 ପରୀକ୍ଷା ସୂଚୀ ସହିତ ତାରିଖ ଏକା ହୋଇଯାଉଥିବାରୁ ଏଭଳି ନିଷ୍ପତ୍ତି ନିଆଯାଇଛି। ଏହି ନିଯୁକ୍ତି ପ୍ରକ୍ରିୟା ମାଧ୍ୟମରେ ରେଭେନ୍ୟୁ ଇନ୍ସପେକ୍ଟର (RI), ଆଇସିଡିଏସ୍ ସୁପରଭାଇଜର (ICDS Supervisor), ଭିଲେଜ୍ ଏଗ୍ରିକଲଚରାଲ୍ ୱାର୍କର୍ (VAW), ଜୁନିୟର ଆସିଷ୍ଟାଣ୍ଟ, ଆସିଷ୍ଟାଣ୍ଟ ରେଭେନ୍ୟୁ ଇନ୍ସପେକ୍ଟର (ARI), ଅମିନ ଏବଂ ଷ୍ଟାଟିଷ୍ଟିକାଲ୍ ଫିଲ୍ଡ ସର୍ଭେୟର୍ (SFS) ଆଦି ଏକାଧିକ ପଦବୀ ପୂରଣ କରାଯିବ।

ପରୀକ୍ଷାର୍ଥୀମାନଙ୍କୁ ସେମାନଙ୍କର ସଂଶୋଧିତ ଆଡମିଟ୍ କାର୍ଡ ଡାଉନଲୋଡ୍ କରିବା ପାଇଁ ଆୟୋଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ପ୍ରାର୍ଥୀମାନେ ଅଫିସିଆଲ୍ ୱେବସାଇଟ୍ କୁ ଯାଇ ନିଜର ୟୁଜର୍ ଆଇଡି ଏବଂ ପାସୱାର୍ଡ ବ୍ୟବହାର କରି ଏହାକୁ ଡାଉନଲୋଡ୍ କରିପାରିବେ। ଆସନ୍ତା ଜୁନ୍ ୨୪, ୨୦୨୬ ତାରିଖରୁ ଏହି ସଂଶୋଧିତ ଆଡମିଟ୍ କାର୍ଡ ଉପଲବ୍ଧ ହେବ। 

OSSSC ପକ୍ଷରୁ ସ୍ପଷ୍ଟ କରାଯାଇଛି ଯେ ପରୀକ୍ଷା କେନ୍ଦ୍ର, ସମୟ ଏବଂ ସ୍ଥାନ ସମ୍ପର୍କରେ କେବଳ ସଂଶୋଧିତ ଆଡମିଟ୍ କାର୍ଡରେ ହିଁ ସୂଚନା ଦିଆଯିବ। ନିୟମିତ ଅପଡେଟ୍ ପାଇଁ ଅଫିସିଆଲ୍ ୱେବସାଇଟ୍ ପରିଦର୍ଶନ କରିବାକୁ ପରୀକ୍ଷାର୍ଥୀମାନଙ୍କୁ ପରାମର୍ଶ ଦିଆଯାଇଛି। 

ନୂଆଦିଲ୍ଲୀ: ଦେଶରେ ହେବାକୁ ଥିବା ନିଟ୍ ୟୁଜି ୨୦୨୬ (NEET-UG 2026)ର ରି-ଟେଷ୍ଟ ପୂର୍ବରୁ କେନ୍ଦ୍ର ସରକାର ମେସେଜିଂ ଆପ୍ ଟେଲିଗ୍ରାମ ଉପରେ ଲଗାଇଥିବା ଅସ୍ଥାୟୀ ପ୍ରତିବନ୍ଧକକୁ ଦିଲ୍ଲୀ ହାଇକୋର୍ଟ କାଏମ୍ ରଖିଛନ୍ତି। ଶୁକ୍ରବାର ଦିନ ଏହି ମାମଲାର ଶୁଣାଣି କରି ଅଦାଲତ ଟେଲିଗ୍ରାମର ଆବେଦନକୁ ଖାରଜ କରିଦେଇଛନ୍ତି। 

ବିଚାରପତି ତେଜସ କାରିଆ ଟେଲିଗ୍ରାମର ଆବେଦନକୁ ଖାରଜ କରି କହିଛନ୍ତି ଯେ କେନ୍ଦ୍ର ସରକାରଙ୍କ ଆଦେଶ ସମ୍ପୂର୍ଣ୍ଣ ଯୁକ୍ତିଯୁକ୍ତ। ସୂଚନା ପ୍ରଯୁକ୍ତିବିଦ୍ୟା ଆଇନର ଧାରା ୬୯ଏ ଅନୁଯାୟୀ କୌଣସି ପ୍ଲାଟଫର୍ମକୁ ବ୍ୟାନ୍ କରାଯାଇପାରିବ ବୋଲି ସେ ସ୍ପଷ୍ଟ କରିଛନ୍ତି। ଜୁନ୍ ୨୧ରେ ଅନୁଷ୍ଠିତ ହେବାକୁ ଥିବା ନିଟ୍ ପରୀକ୍ଷା ପୂର୍ବରୁ ଗୁଜବ ଏବଂ ପରୀକ୍ଷା ଜାଲିଆତିକୁ ରୋକିବା ପାଇଁ ନ୍ୟାସନାଲ ଟେଷ୍ଟିଂ ଏଜେନ୍ସି (NTA) ର ସୁପାରିଶ କ୍ରମେ କେନ୍ଦ୍ର ସରକାର ଏହି ଅସ୍ଥାୟୀ କଟକଣା ଲଗାଇଥିଲେ। ଏହି ପ୍ରତିବନ୍ଧକ ଜୁନ୍ ୨୨ ପର୍ଯ୍ୟନ୍ତ ବଳବତ୍ତର ରହିବ।

ଅଦାଲତରେ କେନ୍ଦ୍ର ସରକାରଙ୍କ ପକ୍ଷରୁ ଆଟର୍ଣ୍ଣି ଜେନେରାଲ୍ ଆର୍ ଭେଙ୍କଟରମଣୀ ଏହି ପ୍ଲାଟଫର୍ମର ସ୍ୱତନ୍ତ୍ର ଆର୍କିଟେକ୍ଚରକୁ ଏକ "ଫ୍ରାଙ୍କେନଷ୍ଟାଇନ୍" ବୋଲି ଅଭିହିତ କରିଥିଲେ। ସଲିସିଟର ଜେନେରାଲ୍ ତୁଷାର ମେହେଟ୍ଟା ଯୁକ୍ତି ବାଢ଼ିଥିଲେ ଯେ ଟେଲିଗ୍ରାମରେ ଜଣେ ୟୁଜର ୪୦ ଟି ବଟ୍ (40 bots) ତିଆରି କରିପାରିବେ ଏବଂ ଏହା କ୍ଲାଉଡ୍ ମାଧ୍ୟମରେ କାର୍ଯ୍ୟ କରୁଥିବାରୁ ଆଇନ ଶୃଙ୍ଖଳା ରକ୍ଷାକାରୀ ସଂସ୍ଥା ପ୍ରକୃତ ବ୍ୟବହାରକାରୀଙ୍କ ନିକଟରେ ପହଞ୍ଚିବା କଷ୍ଟକର। ଏଥିସହ, ଜାଲିଆତିକୁ ରୋକିବା ପାଇଁ ଟେଲିଗ୍ରାମର 'ମେସେଜ୍ ଏଡିଟିଂ' ଫିଚରକୁ ଭାରତରେ ଜୁନ୍ ୩୦ ପର୍ଯ୍ୟନ୍ତ ବନ୍ଦ ରଖାଯିବ ବୋଲି କେନ୍ଦ୍ର କୋର୍ଟଙ୍କୁ ଜଣାଇଛି।

ସୂଚନାଯୋଗ୍ୟ ଯେ, ପ୍ରଶ୍ନପତ୍ର ଲିକ୍ ପ୍ରମାଣ ମିଳିବା ପରେ କର୍ତ୍ତୃପକ୍ଷ ମୂଳ ନିଟ୍ ୟୁଜି ପରୀକ୍ଷାକୁ ବାତିଲ୍ କରିଥିଲେ ଏବଂ ପ୍ରଭାବିତ ଛାତ୍ରଛାତ୍ରୀଙ୍କ ପାଇଁ ଜୁନ୍ ୨୧ ରେ ପୁନଃ ପରୀକ୍ଷା ଧାର୍ଯ୍ୟ ହୋଇଥିଲା। ଅଧିକାରୀଙ୍କ ସୂଚନା ଅନୁଯାୟୀ, ଟେଲିଗ୍ରାମରେ ଥିବା ବିଭିନ୍ନ ଚ୍ୟାନେଲ୍ ଟଙ୍କା ବିନିମୟରେ ପୁନଃ ପରୀକ୍ଷା ପ୍ରଶ୍ନପତ୍ର ଯୋଗାଇଦେବାର ଦାବି କରିଥିଲେ। ତେଣୁ ଏଭଳି ସଙ୍ଗଠିତ ଜାଲିଆତି ରାକେଟ୍ ଗୁଡ଼ିକୁ ରୋକିବା ପାଇଁ ସରକାର ଏହି ପଦକ୍ଷେପ ନେଇଛନ୍ତି।

ନୂଆଦିଲ୍ଲୀ: ବଢ଼ିଲା ନିଟ୍‌-ୟୁଜି ପରୀକ୍ଷା ସମୟ ଅବଧି । ନ୍ୟାସନାଲ୍ ଟେଷ୍ଟିଂ ଏଜେନ୍ସୀ (NTA)ର ବଡ଼ ଘୋଷଣା । ଆସନ୍ତା ଜୁନ୍ ୨୧, ୨୦୨୬ ତାରିଖରେ ହେବାକୁ ଥିବା ନିଟ୍ ୟୁଜି (NEET UG) 2026 ପୁନଃ ପରୀକ୍ଷା (Re-exam) ପାଇଁ ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ବିଜ୍ଞପ୍ତି ପ୍ରକାଶ ପାଇଛି। ଛାତ୍ରଛାତ୍ରୀମାନଙ୍କ ସୁବିଧାକୁ ଦୃଷ୍ଟିରେ ରଖି ଏନଟିଏ ପକ୍ଷରୁ ପରୀକ୍ଷା ସମୟ ଏବଂ ପ୍ରଶ୍ନପତ୍ରର ଢାଞ୍ଚାରେ ବ୍ୟାପକ ପରିବର୍ତ୍ତନ କରାଯାଇଛି।

ଛାତ୍ରଛାତ୍ରୀମାନଙ୍କ ଦାବି ଏବଂ ମତାମତକୁ ଭିତ୍ତି କରି ପରୀକ୍ଷା ସମୟସୀମାକୁ ୧୯୫ ମିନିଟ୍ (୩ ଘଣ୍ଟା ୧୫ ମିନିଟ୍) କୁ ବୃଦ୍ଧି କରାଯାଇଛି। ନୂତନ ସମୟ ଅନୁଯାୟୀ, ପରୀକ୍ଷା ଅପରାହ୍ନ ୨:୦୦ ଟାରୁ ୫:୧୫ ପର୍ଯ୍ୟନ୍ତ ଚାଲିବ। ଏହି ବର୍ଦ୍ଧିତ ସମୟ ମଧ୍ୟରେ ଉପସ୍ଥାନ ପକାଇବା ଏବଂ ଅନ୍ୟାନ୍ୟ ପ୍ରଶାସନିକ କାର୍ଯ୍ୟ ଅନ୍ତର୍ଭୁକ୍ତ ଅଟେ। ଏହାଦ୍ୱାରା ପରୀକ୍ଷାର୍ଥୀମାନେ ପ୍ରଶ୍ନର ଉତ୍ତର ଦେବା ପାଇଁ ସମ୍ପୂର୍ଣ୍ଣ ସମୟ ପାଇପାରିବେ ଏବଂ ଅନ୍ୟ ପ୍ରଶାସନିକ କାର୍ଯ୍ୟରେ ସେମାନଙ୍କର ମୂଲ୍ୟବାନ ସମୟ ନଷ୍ଟ ହେବ ନାହିଁ ବୋଲି ଏନଟିଏ ସ୍ପଷ୍ଟ କରିଛି।

ପରୀକ୍ଷାର୍ଥୀମାନଙ୍କୁ ଗଣିତ ଏବଂ ଡାଏଗ୍ରାମ୍ ଆଦି କରିବା (Rough work) ପାଇଁ ପୂର୍ବରୁ ପ୍ରଶ୍ନପତ୍ର ବୁକ୍‌ଲେଟ୍‌ରେ କେବଳ ୨ଟି ପୃଷ୍ଠା ଦିଆଯାଉଥିଲା। ମାତ୍ର ବର୍ତ୍ତମାନ ଏହାକୁ ବୃଦ୍ଧି କରାଯାଇ ୪ଟି ପୃଷ୍ଠା ପ୍ରଦାନ କରାଯିବ। ପୂର୍ବରୁ ଏହି ପୃଷ୍ଠାଗୁଡ଼ିକ କେବଳ ବୁକ୍‌ଲେଟ୍‌ର ଶେଷ ଭାଗରେ ରହୁଥିଲା, ଯାହାକି ବାମହାତୀ ଛାତ୍ରଛାତ୍ରୀମାନଙ୍କ ପାଇଁ ଅସୁବିଧା ସୃଷ୍ଟି କରୁଥିଲା। ଏହି ସମସ୍ୟାର ସମାଧାନ ପାଇଁ ଏବେ ବୁକ୍‌ଲେଟ୍‌ର ଆରମ୍ଭରେ ନିର୍ଦ୍ଦେଶାବଳୀ ପୃଷ୍ଠା ପରେ ତୁରନ୍ତ ୨ଟି ରଫ୍ ପୃଷ୍ଠା ଏବଂ ଶେଷରେ ୨ଟି ରଫ୍ ପୃଷ୍ଠା ରଖାଯିବାର ନୂତନ ବ୍ୟବସ୍ଥା କରାଯାଇଛି।

ଇଂରାଜୀ ସମେତ ଆଞ୍ଚଳିକ ଭାଷାରେ ମଧ୍ୟ ଏହି ନୂତନ ଢାଞ୍ଚାରେ ପ୍ରଶ୍ନପତ୍ର ପ୍ରଦାନ କରାଯିବ। ନିଟ୍ ୟୁଜି 2026 ପରୀକ୍ଷାକୁ ଅଧିକ ସ୍ୱଚ୍ଛ, ନିରାପଦ ଏବଂ ଛାତ୍ର ବାନ୍ଧବ କରିବା ପାଇଁ ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ପ୍ରତିଶ୍ରୁତିବଦ୍ଧ ବୋଲି ପ୍ରକାଶ କରିଛି। ପରୀକ୍ଷା ସୁରୁଖୁରୁରେ ପରିଚାଳନା କରିବା ପାଇଁ ଆଡମିଟ୍ କାର୍ଡ (Admit Card) ଏବଂ ଇନଫରମେସନ୍ ବୁଲେଟିନ୍‌ରେ ଦିଆଯାଇଥିବା ନିର୍ଦ୍ଦେଶାବଳୀକୁ ଧ୍ୟାନର ସହ ପଢ଼ିବାକୁ ପରୀକ୍ଷାର୍ଥୀମାନଙ୍କୁ ପରାମର୍ଶ ଦିଆଯାଇଛି।

ମଧ୍ୟପ୍ରଦେଶର ମଉଗଞ୍ଜ ଜିଲ୍ଲାରେ ଏକ ଅତ୍ୟନ୍ତ ଦୁଃଖଦ ଘଟଣା ସାମ୍ନାକୁ ଆସିଛି। ଏଠାରେ ଜଣେ ନିଟ୍ (NEET) ଆଶାୟୀ ଛାତ୍ରୀ ଆତ୍ମହତ୍ୟା କରିଛନ୍ତି। ଆକାଂକ୍ଷା ଚତୁର୍ବେଦୀ ନାମକ ଏହି ଛାତ୍ରୀ ନିଟ୍ ପରୀକ୍ଷା ଦେଇଥିଲେ ଏବଂ ତାଙ୍କୁ ୬୫୦ ନମ୍ବର ମିଳିବ ବୋଲି ସେ ଆଶା କରିଥିଲେ। ତେବେ ପେପର ଲିକ୍ ଏବଂ ପରୀକ୍ଷା ବାତିଲ ହେବା ଆଶଙ୍କାକୁ ନେଇ ସେ ଗଭୀର ମାନସିକ ଚାପରେ ଥିଲେ। ଶେଷରେ ଘରର ଛାତ ପଙ୍ଖାରେ ଫାଶୀ ଲଗାଇ ସେ ନିଜ ଜୀବନ ହାରିଛନ୍ତି।

ସୁଇସାଇଡ୍ ନୋଟ୍‌ରେ ଲେଖାଥିଲା ଭାବପ୍ରବଣ କଥା

ଘଟଣାସ୍ଥଳରୁ ପୋଲିସକୁ ଏକ ସୁଇସାଇଡ୍ ନୋଟ୍ ମିଳିଛି, ଯାହା ସମସ୍ତଙ୍କ ଆଖିରେ ଲୁହ ଆଣିଦେବ। ଆକାଂକ୍ଷା ଏଥିରେ ଲେଖିଛନ୍ତି ଯେ, "ସରି ମମ୍ମି ପାପା, ଆପଣଙ୍କର ଭରସା ଥିଲା ଯେ ମୋ ଝିଅ ପାଠ ପଢ଼ି ଡାକ୍ତର ହେବ। କିନ୍ତୁ ଆଉ ଥରେ ନିଟ୍ ପେପର ଦେବାକୁ ମୋର ସାହସ ନାହିଁ। ମୁଁ ଆପଣ ଦୁହିଁଙ୍କୁ ବର୍ବାଦ କରିଦେଲି। ଆଗାମୀ ପରୀକ୍ଷା ଭଲ ହେବ, ଏହାର କୌଣସି ଗ୍ୟାରେଣ୍ଟି ନାହିଁ।" ଏହି ନୋଟ୍‌ରୁ ସ୍ପଷ୍ଟ ଜଣାପଡ଼ୁଛି ଯେ ପରୀକ୍ଷାର ଅନିଶ୍ଚିତତା ତାଙ୍କ ମନରେ କେତେ ଭୟ ସୃଷ୍ଟି କରିଥିଲା।

ଋଣ କରି ଝିଅକୁ ପଢ଼ାଉଥିଲେ ପରିବାର

ଆକାଂକ୍ଷାଙ୍କ ପରିବାରର ଆର୍ଥିକ ସ୍ଥିତି ସ୍ୱଚ୍ଛଳ ନଥିଲା। ତାଙ୍କ ବାପା କୃଷ୍ଣ କୁମାର ଚତୁର୍ବେଦୀ ଜଣେ ଚାଷୀ। ତେବେ ଝିଅର ଡାକ୍ତର ହେବାର ସ୍ୱପ୍ନ ପୂରଣ କରିବା ପାଇଁ ସେ କିଷାନ କ୍ରେଡିଟ୍ କାର୍ଡ (KCC) ମାଧ୍ୟମରେ ୩ ଲକ୍ଷ ଟଙ୍କାର ଋଣ ନେଇଥିଲେ। ଏତିକି ନୁହେଁ, ଝିଅର କୋଚିଂ ଖର୍ଚ୍ଚ ଉଠାଇବା ପାଇଁ ସେ ନାଗପୁର ଯାଇ ସେଠାରେ ରୋଷେୟା ଭାବରେ ମଧ୍ୟ କାମ କରୁଥିଲେ। ପରିବାର ଆଶା କରିଥିଲେ ଯେ ଏଥର ଆକାଂକ୍ଷା ନିଶ୍ଚିତ ସଫଳ ହେବେ, କିନ୍ତୁ ପେପର ଲିକ୍ ବିବାଦ ସେମାନଙ୍କର ସବୁ ଆଶା ଭାଙ୍ଗିଦେଲା।

ରାହୁଲ ଗାନ୍ଧୀଙ୍କ ସରକାରଙ୍କ ଉପରେ ବର୍ଷଣ

ଏହି ଛାତ୍ରୀଙ୍କ ଆତ୍ମହତ୍ୟା ଘଟଣା ଏବେ ରାଜନୈତିକ ରୂପ ନେଇଛି। ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ଏହି ପ୍ରସଙ୍ଗରେ ସୋସିଆଲ ମିଡିଆ ମାଧ୍ୟମରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ସେ ସରକାରଙ୍କ ପରୀକ୍ଷା ପରିଚାଳନା ବ୍ୟବସ୍ଥାକୁ ନେଇ ପ୍ରଶ୍ନ ଉଠାଇବା ସହ ଶିକ୍ଷାର୍ଥୀଙ୍କ ସୁରକ୍ଷା ଓ ଭବିଷ୍ୟତକୁ ନେଇ ଉଦ୍‌ବେଗ ପ୍ରକାଶ କରିଛନ୍ତି। ନିକଟରେ ଅନୁଷ୍ଠିତ ହୋଇଥିବା ନିଟ୍ (NEET UG) ପରୀକ୍ଷାରେ ଅନିୟମିତତା ନେଇ ଅଭିଯୋଗ ଆସିବା ପରେ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧକାର ମଧ୍ୟକୁ ଠେଲି ହୋଇଯାଇଛି ବୋଲି ସେ ଦର୍ଶାଇଛନ୍ତି।

ନୂଆଦିଲ୍ଲୀ: ଜୁନ ୨୧ରେ ହେବ ନିଟ-ୟୁଜି ପରୀକ୍ଷା । ଜାତୀୟ ପରୀକ୍ଷା ଏଜେନ୍ସି ବା ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ପକ୍ଷରୁ ନିଟ୍ ୟୁଜି (NEET UG) ୨୦୨୬ ର ପୁନଃ ପରୀକ୍ଷା ତାରିଖ ସମ୍ପର୍କରେ ଏକ ବଡ଼ ଘୋଷଣା କରାଯାଇଛି। ସରକାରୀ ସୂଚନା ଅନୁଯାୟୀ, ଆସନ୍ତା ୨୧ ଜୁନ୍ ୨୦୨୬, ରବିବାର ଦିନ ଏହି ମେଡିକାଲ୍ ପ୍ରବେଶିକା ପରୀକ୍ଷା ପୁନର୍ବାର ଅନୁଷ୍ଠିତ ହେବ। ଭାରତ ସରକାରଙ୍କ ଅନୁମୋଦନ କ୍ରମେ ଏହି ନିଷ୍ପତ୍ତି ନିଆଯାଇଥିବା ଏନଟିଏ (NTA) ପକ୍ଷରୁ ସ୍ପଷ୍ଟ କରାଯାଇଛି।

ପୂର୍ବରୁ ୩ ମେ ୨୦୨୬ ରେ ଅନୁଷ୍ଠିତ ହୋଇଥିବା ପରୀକ୍ଷାରେ କେତେକ ଅନିୟମିତତା ଅଭିଯୋଗ ଆସିବା ପରେ କର୍ତ୍ତୃପକ୍ଷ ଏହି ପରୀକ୍ଷାକୁ ବାତିଲ୍ କରିଥିଲେ। ଛାତ୍ରଛାତ୍ରୀମାନଙ୍କ ଭବିଷ୍ୟତ ଏବଂ ପରୀକ୍ଷାର ସ୍ୱଚ୍ଛତାକୁ ଦୃଷ୍ଟିରେ ରଖି ଏକ ସାନି ପରୀକ୍ଷା କରାଇବାକୁ ନିଷ୍ପତ୍ତି ନିଆଯାଇଥିଲା। ବର୍ତ୍ତମାନ ଏହି ପୁନଃ ପରୀକ୍ଷା ୨୧ ଜୁନ୍ ରେ ହେବାକୁ ଥିବାରୁ, ପରୀକ୍ଷାର୍ଥୀଙ୍କୁ ପ୍ରସ୍ତୁତି ପାଇଁ ଅଧିକ ସୁଯୋଗ ମିଳିଛି।

ଏନଟିଏ (NTA) ନିଜର ଅଫିସିଆଲ୍ ଏକ୍ସ (X) ଆକାଉଣ୍ଟ ଜରିଆରେ ଏହି ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛି। ଏଥିସହ ସଂସ୍ଥା ପକ୍ଷରୁ ଛାତ୍ରଛାତ୍ରୀ ଏବଂ ଅଭିଭାବକମାନଙ୍କୁ ଏକ ସ୍ୱତନ୍ତ୍ର ପରାମର୍ଶ ଦିଆଯାଇଛି। କୁହାଯାଇଛି ଯେ, ନିଟ୍ ଭଳି ଗୁରୁତ୍ୱପୂର୍ଣ୍ଣ ପରୀକ୍ଷାକୁ ନେଇ ସୋସିଆଲ୍ ମିଡିଆରେ ଅନେକ ଗୁଜବ ଏବଂ ଭୁଲ୍ ଖବର ପ୍ରସାରିତ ହେଉଛି। ତେଣୁ ଏଭଳି ଅସତ୍ୟ ଖବର ପ୍ରତି ଧ୍ୟାନ ନଦେଇ, କେବଳ NTA ର ଅଫିସିଆଲ୍ ୱେବସାଇଟ୍ ଏବଂ ଆଧିକାରିକ ପ୍ଲାଟଫର୍ମରୁ ଆସୁଥିବା ସୂଚନା ଉପରେ ବିଶ୍ୱାସ କରିବାକୁ ଅନୁରୋଧ କରାଯାଇଛି।

ନୂଆଦିଲ୍ଲୀ: ବାତିଲ ହେଲା NEET UG ୨୦୨୬ ପରୀକ୍ଷା । ମେ ୩ ତାରିଖରେ ଅନୁଷ୍ଠିତ ହୋଇଥିବା ନିଟ୍ ୟୁଜି (NEET UG) ୨୦୨୬ ପରୀକ୍ଷାକୁ ବାତିଲ କରିଛି ନ୍ୟାସନାଲ ଟେଷ୍ଟିଂ ଏଜେନ୍ସି (NTA) । ମଙ୍ଗଳବାର ଦିନ ଏନଟିଏ ପକ୍ଷରୁ ଏହି ଘୋଷଣା କରାଯାଇଛି। ପ୍ରଶ୍ନପତ୍ର ଲିକ୍ ନେଇ ଏନଟିଏ ଏଭଳି ନିଷ୍ପତ୍ତି ନେଇଛି । ଖୁବଶୀଘ୍ର ପରୀକ୍ଷାର ନୂଆ ତାରିଖ ଘୋଷଣା କରାଯିବ ବୋଲି ସୂଚନା ମିଳିଛି। ଦେଶସାରା ଥିବା ବିଭିନ୍ନ ସ୍ନାତକସ୍ତରୀୟ ମେଡିକାଲ ପାଠ୍ୟକ୍ରମରେ ନାମଲେଖା ପାଇଁ ଏହି ଜାତୀୟ ପ୍ରବେଶିକା ପରୀକ୍ଷା କରାଯାଇଥାଏ।

ପ୍ରାପ୍ତ ସୂଚନା ଅନୁଯାୟୀ, ରାଜସ୍ଥାନ ସ୍ପେଶାଲ ଅପରେସନ୍ସ ଗ୍ରୁପ୍ (SOG) ଏବଂ ଅନ୍ୟାନ୍ୟ କେନ୍ଦ୍ରୀୟ ଏଜେନ୍ସିଗୁଡ଼ିକ ପକ୍ଷରୁ ମିଳିଥିବା ତଥ୍ୟ ଆଧାରରେ ଏହି ନିଷ୍ପତ୍ତି ନିଆଯାଇଛି। ପରୀକ୍ଷା ପରିଚାଳନାରେ ଅନିୟମିତତା ନେଇ ଆସିଥିବା ଅଭିଯୋଗକୁ ଦୃଷ୍ଟିରେ ରଖି ପରୀକ୍ଷା ବାତିଲ କରିବା ଛଡ଼ା ଅନ୍ୟ କୌଣସି ବିକଳ୍ପ ନଥିଲା ବୋଲି ଏନଟିଏ କହିଛି। ଏପରି ଅନିୟମିତତା ସହ ପରୀକ୍ଷା ପ୍ରକ୍ରିୟାକୁ ଆଗକୁ ବଢାଇ ହେବ ନାହିଁ ବୋଲି ସ୍ପଷ୍ଟ କରାଯାଇଛି।

ଏହି ଘଟଣାରେ ସ୍ୱଚ୍ଛତା ବଜାୟ ରଖିବା ପାଇଁ ଭାରତ ସରକାର ଏହି ମାମଲାର ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ (CBI) କୁ ହସ୍ତାନ୍ତର କରିବାକୁ ନିଷ୍ପତ୍ତି ନେଇଛନ୍ତି। ପେପର ଲିକ୍ ଭଳି ସଙ୍ଗିନ ଅଭିଯୋଗର ଏକ ପୂର୍ଣ୍ଣାଙ୍ଗ ତଦନ୍ତ କରାଯିବ। ତଦନ୍ତ ପ୍ରକ୍ରିୟାରେ ସିବିଆଇକୁ ସମସ୍ତ ପ୍ରକାର ସହଯୋଗ କରିବ ବୋଲି ଏନଟିଏ (NTA) ପକ୍ଷରୁ ପ୍ରକାଶ କରାଯାଇଛି। ପୂର୍ବରୁ ମେ ୧୦ ତାରିଖରେ ଏନଟିଏ ଦାବି କରିଥିଲା ଯେ, ଏଆଇ ସିସିଟିଭି, ବାୟୋମେଟ୍ରିକ୍ ଏବଂ ୫ଜି ଜାମର୍ ଆଦିର ବ୍ୟବହାର କରାଯାଇ କଡ଼ା ସୁରକ୍ଷା ବଳୟ ମଧ୍ୟରେ ପରୀକ୍ଷା କରାଯାଇଥିଲା। କିନ୍ତୁ ଅଭିଯୋଗର ଗମ୍ଭୀରତାକୁ ଦେଖି ବର୍ତ୍ତମାନ ଏହି କଠୋର ପଦକ୍ଷେପ ନିଆଯାଇଛି।

ପରୀକ୍ଷା ବାତିଲ ହେବା ଫଳରେ ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକଙ୍କୁ ହେଉଥିବା ଅସୁବିଧା ପାଇଁ ଏନଟିଏ ଦୁଃଖ ପ୍ରକାଶ କରିଛି। ତେବେ ଛାତ୍ରଛାତ୍ରୀଙ୍କ ସ୍ୱାର୍ଥ ଏବଂ ପରୀକ୍ଷା ବ୍ୟବସ୍ଥା ଉପରେ ବିଶ୍ୱାସ ବଜାୟ ରଖିବା ପାଇଁ ଏପରି କରାଯାଇଥିବା ସ୍ପଷ୍ଟ କରାଯାଇଛି। ପୁନର୍ବାର ହେବାକୁ ଥିବା ପରୀକ୍ଷା ପାଇଁ ଛାତ୍ରଛାତ୍ରୀଙ୍କୁ କୌଣସି ନୂଆ ପଞ୍ଜୀକରଣ କରିବାକୁ ପଡ଼ିବ ନାହିଁ। 

ପୂର୍ବରୁ ଆବେଦନ କରିଥିବା ଛାତ୍ରଛାତ୍ରୀଙ୍କ ତଥ୍ୟକୁ ଆଧାର କରି ନୂତନ ଆଡମିଟ୍ କାର୍ଡ ଜାରି କରାଯିବ ଏବଂ ପୂର୍ବରୁ ମନୋନୀତ କରିଥିବା ପରୀକ୍ଷା କେନ୍ଦ୍ରଗୁଡ଼ିକ ମଧ୍ୟ ସମାନ ରହିବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ, ପରୀକ୍ଷାର୍ଥୀଙ୍କୁ କୌଣସି ଅତିରିକ୍ତ ଦେୟ ଦେବାକୁ ପଡ଼ିବ ନାହିଁ ଏବଂ ସେମାନେ ପୂର୍ବରୁ ଦେଇଥିବା ପରୀକ୍ଷା ଫି' ଫେରସ୍ତ କରାଯିବ। ଏନଟିଏ ନିଜସ୍ୱ ପାଣ୍ଠିରୁ ଏହି ପୁନଃପରୀକ୍ଷାର ଖର୍ଚ୍ଚ ବହନ କରିବ। ପରୀକ୍ଷାର ନୂଆ ତାରିଖ ଏବଂ ଅନ୍ୟାନ୍ୟ ସୂଚନା ସମ୍ପର୍କରେ ଜାଣିବା ପାଇଁ କେବଳ ଅଫିସିଆଲ୍ ୱେବସାଇଟ୍ ଉପରେ ନିର୍ଭର କରିବାକୁ ବିଭାଗ ପକ୍ଷରୁ ପରାମର୍ଶ ଦିଆଯାଇଛି।