କେରଳ: କେରଳର ନୂତନ ମୁଖ୍ୟମନ୍ତ୍ରୀ ଭାବେ କଂଗ୍ରେସ ନେତା ଭି.ଡି. ସତୀଶନ ଶପଥ ଗ୍ରହଣ କରିଛନ୍ତି। ଏହା ସହିତ କେରଳ ରାଜନୀତିରେ କଂଗ୍ରେସ ପାଇଁ ଏକ ନୂତନ ଯୁଗର ଆରମ୍ଭ ହୋଇଛି। କଂଗ୍ରେସ ନେତୃତ୍ୱାଧୀନ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (UDF) କ୍ଷମତାକୁ ଫେରିବା ସହ ରାଜ୍ୟରେ ବାମପନ୍ଥୀ ଦଳର ୧୦ ବର୍ଷର ଶାସନର ଅନ୍ତ ଘଟିଛି।

ଥିରୁଭାନନ୍ତପୁରମ ସ୍ଥିତ ସେଣ୍ଟ୍ରାଲ୍ ଷ୍ଟାଡିୟମରେ ଆୟୋଜିତ ଏକ ଭବ୍ୟ ଶପଥ ଗ୍ରହଣ ଉତ୍ସବରେ କେରଳର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ଶ୍ରୀ ସତୀଶନ ଏବଂ ତାଙ୍କ କ୍ୟାବିନେଟ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଏହି ଉତ୍ସବରେ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା, କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେ ଏବଂ ସାଂସଦ କେ.ସି. ବେଣୁଗୋପାଳଙ୍କ ସମେତ ବିଭିନ୍ନ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ।

ମୁଖ୍ୟମନ୍ତ୍ରୀଙ୍କୁ ମିଶାଇ ନୂତନ ସରକାରରେ ମୋଟ ୨୧ ଜଣିଆ କ୍ୟାବିନେଟ୍ ଗଠନ କରାଯାଇଛି। ଏଥିରେ କଂଗ୍ରେସ ପାଖରେ ମୁଖ୍ୟମନ୍ତ୍ରୀ ପଦ ସମେତ ୧୧ ଟି ମନ୍ତ୍ରୀପଦ ରହିଥିବା ବେଳେ ମେଣ୍ଟ ସହଯୋଗୀ ଇଣ୍ଡିଆନ୍ ୟୁନିୟନ୍ ମୁସଲିମ୍ ଲିଗ୍ (IUML) କୁ ୫ ଟି ମନ୍ତ୍ରୀପଦ ମିଳିଛି। ବିଶେଷ କଥା ହେଉଛି ନୂଆ କ୍ୟାବିନେଟରେ ଥିବା ୧୪ ଜଣ ସଦସ୍ୟ ପ୍ରଥମ ଥର ପାଇଁ ମନ୍ତ୍ରୀ ହୋଇଛନ୍ତି, ଯାହା ମନ୍ତ୍ରୀମଣ୍ଡଳକୁ ଏକ ନୂତନ ଏବଂ ଯୁବ ରୂପ ପ୍ରଦାନ କରିଛି।

ବହୁ ବର୍ଷ ଧରି ରାଜନୈତିକ ସଂଘର୍ଷ ପରେ ୟୁଡିଏଫ୍ ଏଥର ଏକ ଐତିହାସିକ ପ୍ରତ୍ୟାବର୍ତ୍ତନ କରିଛି। କେରଳ ବିଧାନସଭାର ମୋଟ ୧୪୦ ଟି ଆସନ ମଧ୍ୟରୁ ୟୁଡିଏଫ୍ ୧୦୨ ଟି ଆସନ ଜିତି ଏକ ବୃହତ୍ ବିଜୟ ହାସଲ କରିଛି। ଏଥିରେ କେବଳ କଂଗ୍ରେସ ରେକର୍ଡ ସଂଖ୍ୟକ ୬୩ ଟି ଆସନ ଅକ୍ତିଆର କରିଛି, ଯାହାକି ରାଜ୍ୟରେ ଦଳର ସର୍ବଶ୍ରେଷ୍ଠ ପ୍ରଦର୍ଶନ ଅଟେ। ସେହିପରି ମେଣ୍ଟ ସହଯୋଗୀ ଆଇୟୁଏମଏଲ୍ ୨୨ ଟି ଆସନ, କେରଳ କଂଗ୍ରେସ - କେଇସି ୭ ଟି ଆସନ, ଆରଏସପି ୩ ଟି ଆସନ ଏବଂ ଅନ୍ୟାନ୍ୟ ଦଳ ଗୋଟିଏ ଲେଖାଏଁ ଆସନ ଜିତିବାରେ ସଫଳ ହୋଇଛନ୍ତି।

ନୂଆଦିଲ୍ଲୀ: ୧୦ ଦିନ ଧରି ଲାଗି ରହିଥିବା ନେତୃତ୍ୱ ବିବାଦର ଅନ୍ତ ଘଟାଇ କଂଗ୍ରେସ ପକ୍ଷରୁ ୬ ଥରର ବିଧାୟକ ଭି.ଡି. ସତୀଶନଙ୍କୁ କେରଳର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବେ ଘୋଷଣା କରାଯାଇଛି। ରାଜନୀତିରେ ୩୫ ବର୍ଷରୁ ଅଧିକ ଅଭିଜ୍ଞତା ରଖିଥିବା ସତୀଶନ, ଏର୍ଣ୍ଣାକୁଲମ ଜିଲ୍ଲାର ପରଭୁର ନିର୍ବାଚନମଣ୍ଡଳୀରୁ କ୍ରମାଗତ ୬ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି।

ନୂଆଦିଲ୍ଲୀଠାରେ କଂଗ୍ରେସର ଶୀର୍ଷ ନେତା ଦୀପାଦାସ ମୁନ୍ସୀ, ମୁକୁଲ ୱାସନିକ ଏବଂ ଅଜୟ ମାକେନ ଏହି ଘୋଷଣା କରିଛନ୍ତି। କୋଚି ଜିଲ୍ଲାରେ ଜନ୍ମିତ ସତୀଶନ କେରଳର ୧୩ତମ ମୁଖ୍ୟମନ୍ତ୍ରୀ ହେବେ। ଚଳିତ ମାସ ଶେଷ ଆଡ଼କୁ ସେ ତାଙ୍କର ୬୨ତମ ଜନ୍ମଦିନ ପାଳନ କରିବାକୁ ଯାଉଛନ୍ତି। ଏହା ପୂର୍ବରୁ କଂଗ୍ରେସ ହାଇକମାଣ୍ଡ କେରଳ କଂଗ୍ରେସ ବିଧାୟକ ଦଳ ନେତା ଚୟନ ପ୍ରକ୍ରିୟାର ତଦାରଖ ଦାୟିତ୍ୱ ୱାସନିକ ଏବଂ ମାକେନଙ୍କୁ ପ୍ରଦାନ କରିଥିଲେ। ଉଭୟ ନେତା ନବନିର୍ବାଚିତ ବିଧାୟକମାନଙ୍କ ସହ ବିସ୍ତୃତ ଆଲୋଚନା କରି ନିଜର ରିପୋର୍ଟ ନୂଆଦିଲ୍ଲୀରେ ହାଇକମାଣ୍ଡଙ୍କୁ ହସ୍ତାନ୍ତର କରିଥିଲେ।

ମେ' ୨୦୨୬ ବିଧାନସଭା ନିର୍ବାଚନରେ ବିପୁଳ ସଂଖ୍ୟାଗରିଷ୍ଠତା ହାସଲ କରିବା ସତ୍ତ୍ୱେ ମୁଖ୍ୟମନ୍ତ୍ରୀ ପଦକୁ ନେଇ କଂଗ୍ରେସ ଭିତରେ ତୀବ୍ର ଗୋଷ୍ଠୀ କନ୍ଦଳ ଦେଖାଦେଇଥିଲା। ବିଶେଷକରି କେ.ସି. ବେଣୁଗୋପାଳ ଏବଂ ବିଦାୟୀ ବିରୋଧୀ ଦଳ ନେତା ଭି.ଡି. ସତୀଶନଙ୍କ ମଧ୍ୟରେ ମୁଖ୍ୟ ପ୍ରତିଦ୍ୱନ୍ଦ୍ୱିତା ହୋଇଥିଲା। ବେଣୁଗୋପାଳଙ୍କ ସମର୍ଥକମାନେ ଯୁକ୍ତି ବାଢ଼ିଥିଲେ ଯେ ତାଙ୍କୁ ଅଧିକାଂଶ ନବନିର୍ବାଚିତ ବିଧାୟକ ଓ କେରଳ ପ୍ରଦେଶ କଂଗ୍ରେସ କମିଟି (KPCC)ର ପ୍ରଭାବଶାଳୀ ନେତାଙ୍କ ସମର୍ଥନ ରହିଛି। ଅନ୍ୟପକ୍ଷରେ, ସତୀଶନଙ୍କୁ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (UDF)ର ବିପୁଳ ବିଜୟର ମୁଖ୍ୟ ବିନ୍ଧାଣି ଭାବେ ଗ୍ରହଣ କରାଯାଇଥିଲା। ବରିଷ୍ଠ କଂଗ୍ରେସ ନେତା ରମେଶ ଚେନ୍ନିଥାଲା ମଧ୍ୟ ନିଜର ବରିଷ୍ଠତା ଏବଂ ପ୍ରାଶାସନିକ ଅଭିଜ୍ଞତା ଆଧାରରେ ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ଥିବାରୁ ଦଳ ଭିତରେ ସହମତି ସୃଷ୍ଟି କରିବା କଷ୍ଟକର ହୋଇପଡ଼ିଥିଲା।

କଂଗ୍ରେସ ନେତୃତ୍ୱାଧୀନ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (UDF) ଦୀର୍ଘ ୧୦ ବର୍ଷ ବ୍ୟବଧାନ ପରେ କେରଳରେ କ୍ଷମତାକୁ ଫେରିଛି। ୧୪୦ ଆସନ ବିଶିଷ୍ଟ ବିଧାନସଭାରେ UDF ଐତିହାସିକ ୧୦୨ଟି ଆସନ ଦଖଲ କରି ବହୁମତ ପାଇଁ ଆବଶ୍ୟକ ୭୧ ଆସନ ସଂଖ୍ୟାକୁ ଅତିକ୍ରମ କରିଛି। ଏହି ବିଜୟ ସହିତ ଲେଫ୍ଟ ଡେମୋକ୍ରାଟିକ୍ ଫ୍ରଣ୍ଟ (LDF) ର କ୍ରମାଗତ ତୃତୀୟ ଥର ସରକାର ଗଠନ କରିବାର ଆଶା ଧୂଳିସାତ୍ ହୋଇଛି ଏବଂ କେରଳର ପାରମ୍ପରିକ କ୍ଷମତା ପରିବର୍ତ୍ତନର ଧାରା ବଜାୟ ରହିଛି।

କେରଳ ବିଧାନସଭା ନିର୍ବାଚନରେ କଂଗ୍ରେସ ନେତୃତ୍ୱାଧୀନ ୟୁଡିଏଫ୍ (UDF) ସଂଖ୍ୟାଗରିଷ୍ଠତା ହାସଲ କରିବାର ୧୦ ଦିନ ବିତିଯାଇଥିଲେ ମଧ୍ୟ ମୁଖ୍ୟମନ୍ତ୍ରୀ ପଦକୁ ନେଇ ଲାଗିରହିଥିବା ସସପେନ୍ସ ଆଜି ଶେଷ ହେବାକୁ ଯାଉଛି। କଂଗ୍ରେସ ହାଇକମାଣ୍ଡ ଗୁରୁବାର କେରଳର ପରବର୍ତ୍ତୀ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିବେ ବୋଲି ଜଣାପଡିଛି। ଏହି ସର୍ବୋଚ୍ଚ ପଦବୀ ପାଇଁ ଏଆଇସିସି ସାଧାରଣ ସମ୍ପାଦକ କେ.ସି. ଭେଣୁଗୋପାଳ, ବିରୋଧୀ ଦଳ ନେତା ଭି.ଡି. ସତୀସନ୍ ଏବଂ ବରିଷ୍ଠ ନେତା ରମେଶ ଚେନ୍ନିଥଲାଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିଛି।

ଆଜି ବସିବ ବିଧାୟକ ଦଳର ଗୁରୁତ୍ୱପୂର୍ଣ୍ଣ ବୈଠକ

ଥିରୁଅନନ୍ତପୁରମ୍ ସ୍ଥିତ କେପିସିସି ମୁଖ୍ୟାଳୟଠାରେ ଗୁରୁବାର ଦିନ ୧ଟା ସମୟରେ କଂଗ୍ରେସ ବିଧାୟକ ଦଳ (CLP) ର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ଏହି ବୈଠକରେ କେରଳ ପ୍ରଭାରୀ ଦୀପା ଦାସମୁନ୍ସିଙ୍କ ସମେତ କେନ୍ଦ୍ରୀୟ ପର୍ଯ୍ୟବେକ୍ଷକ ଅଜୟ ମାକେନ୍ ଏବଂ ମୁକୁଲ ୱାସନିକ୍ ଉପସ୍ଥିତ ରହିବେ। ସୂଚନା ଅନୁଯାୟୀ, ଦଳର ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖଡ଼ଗେ ଏବଂ ବରିଷ୍ଠ ନେତା ରାହୁଲ ଗାନ୍ଧୀଙ୍କ ଦ୍ୱାରା ନିଆଯାଇଥିବା ଚୂଡ଼ାନ୍ତ ନିଷ୍ପତ୍ତିକୁ ଏକ ବନ୍ଦ ଲଫାପାରେ ଅଣାଯାଇ ବିଧାୟକମାନଙ୍କ ସମ୍ମୁଖରେ ଖୋଲାଯିବ ଏବଂ ନୂଆ ମୁଖ୍ୟମନ୍ତ୍ରୀଙ୍କ ନାମ ଆନୁଷ୍ଠାନିକ ଭାବେ ଘୋଷଣା କରାଯିବ।

କାହା ପଲା କେତେ ଭାରି?

ଏକ ରିପୋର୍ଟ ଅନୁଯାୟୀ, ଦଳର ଅଧିକାଂଶ ତୃଣମୂଳ ସ୍ତରର କର୍ମୀ ଏବଂ ୟୁଡିଏଫ୍ ସହଯୋଗୀ ଦଳଗୁଡ଼ିକ ଭି.ଡି. ସତୀସନ୍ଙ୍କ ସମର୍ଥନରେ ଅଛନ୍ତି, ଯିଏକି ଗତ ୫ ବର୍ଷ ଧରି ବାମପନ୍ଥୀ ସରକାର ବିରୋଧରେ ଦଳର ନେତୃତ୍ୱ ନେଇଥିଲେ। ଅନ୍ୟପଟେ, ବହୁ ସଂଖ୍ୟକ ନବନିର୍ବାଚିତ ବିଧାୟକ ଏବଂ ହାଇକମାଣ୍ଡଙ୍କ ସମର୍ଥନ କେ.ସି. ଭେଣୁଗୋପାଳଙ୍କ ସପକ୍ଷରେ ଥିବା କୁହାଯାଉଛି। ଦୀର୍ଘ ଦିନ ଧରି ଚାଲିଥିବା ରାଜନୈତିକ ଛକାପଞ୍ଝା ପରେ ଶେଷରେ ଦଳ ଏକ ଚୂଡ଼ାନ୍ତ ନିଷ୍ପତ୍ତିରେ ପହଞ୍ଚିଥିବା ନେଇ ବରିଷ୍ଠ କଂଗ୍ରେସ ନେତା ଜୟରାମ ରମେଶ ସୂଚନା ଦେଇଛନ୍ତି।

କେରଳ: କେରଳ ବିଧାନସଭା ନିର୍ବାଚନ ୨୦୨୬ ର ଭୋଟ୍ ଗଣତି ଜାରି ରହିଛି। ରାଜ୍ୟର ମୋଟ ୧୪୦ଟି ନିର୍ବାଚନମଣ୍ଡଳୀ ପାଇଁ ହୋଇଥିବା ମତଦାନର ଫଳାଫଳ ଆସିବାରେ ଲାଗିଛି। ସଦ୍ୟତମ ଟ୍ରେଣ୍ଡ ଅନୁଯାୟୀ, କଂଗ୍ରେସ ନେତୃତ୍ୱାଧୀନ ମେଣ୍ଟ UDF ଏଠାରେ ସରକାର ଗଠନ କରିବା ଦିଗରେ ଅଗ୍ରସର ହେଉଥିବା ବେଳେ କ୍ଷମତାସୀନ ବାମପନ୍ଥୀ ଶିବିର LDFକୁ ଶକ୍ତ ଝଟକା ଲାଗିଛି। ପ୍ରାଥମିକ ଭୋଟ୍ ଗଣତିରେ UDF ୯୪ଟି ଆସନରେ ଆଗୁଆ ଥିବାବେଳେ LDF ୪୧ଟି ଆସନରେ ଆଗୁଆ ରହିଛି ।

ସଦ୍ୟତମ ଫଳାଫଳରେ ବିଜୟର ସଂଖ୍ୟା ପାର କରିବା ପରେ କଂଗ୍ରେସ ନେତାମାନେ ଉତ୍ସବ ମନାଇବା ଆରମ୍ଭ କରିଦେଇଛନ୍ତି। ଥିରୁଭାନନ୍ତପୁରମ୍ ସ୍ଥିତ ପାର୍ଟି କାର୍ଯ୍ୟାଳୟରେ କଂଗ୍ରେସ ସାଧାରଣ ସମ୍ପାଦକ କେ.ସି. ଭେଣୁଗୋପାଳ, ବରିଷ୍ଠ ନେତା ରମେଶ ଚେନ୍ନିଥାଲା ଏବଂ ବରିଷ୍ଠ ସାଂସଦ ଶଶି ଥରୁର ବିଜୟ ଉତ୍ସବ ମନାଇଛନ୍ତି। ଉଭୟ ଭେଣୁଗୋପାଳ ଏବଂ ଚେନ୍ନିଥାଲା ପରସ୍ପରକୁ ଆଲିଙ୍ଗନ କରି ଦଳର ସଫଳତା ପାଇଁ ଶୁଭେଚ୍ଛା ଜଣାଇଛନ୍ତି। ଦଳ ଏବେ ସରକାର ଗଠନ କରିବାକୁ ପୂରା ପ୍ରସ୍ତୁତ ଥିବା ସ୍ପଷ୍ଟ ହୋଇଛି।

ଚଳିତ ନିର୍ବାଚନରେ ସବୁଠାରୁ ଆକର୍ଷଣୀୟ ଟ୍ରେଣ୍ଡ୍ ହେଉଛି ଭାରତୀୟ ଜନତା ପାର୍ଟି (ବିଜେପି) ର ପ୍ରଦର୍ଶନ। ଏଥର ରାଜ୍ୟରେ ଏକ କଡ଼ା ତ୍ରିମୁଖୀ ଲଢ଼େଇ ଦେଖିବାକୁ ମିଳିଛି। ବାମପନ୍ଥୀଙ୍କ ଗଡ଼ରେ ବିଜେପିର ସ୍ଥିତି ମଜବୁତ ହୋଇଛି ଏବଂ ଦଳ ଏବେ ଦୁଇଟି ଗୁରୁତ୍ୱପୂର୍ଣ୍ଣ ଆସନରେ ଆଗୁଆ ରହିଛି। ଏହି ନିର୍ବାଚନରେ ବିଶେଷକରି ରାଜୀବ ଚନ୍ଦ୍ରଶେଖରଙ୍କ ଉପରେ ସମସ୍ତଙ୍କ ନଜର ରହିଛି। ଅନ୍ୟପକ୍ଷରେ, ଲଗାତାର ତୃତୀୟ ଥର କ୍ଷମତାକୁ ଫେରିବାକୁ ଲକ୍ଷ୍ୟ ରଖିଥିବା ସିପିଆଇ(ଏମ) ନେତୃତ୍ୱାଧୀନ ଏଲଡିଏଫ (LDF) ପାଇଁ ଏହି ଫଳାଫଳ ନିରାଶାଜନକ ରହିଛି, ଯାହା ପାଖରେ ପୂର୍ବ ବିଧାନସଭାରେ ୯୯ଟି ଆସନ ଥିଲା।

ସୂଚନାଯୋଗ୍ୟ ଯେ, ଏଥର କେରଳ ବିଧାନସଭା ନିର୍ବାଚନରେ ରାଜ୍ୟବାସୀ ବେଶ୍ ଉତ୍ସାହର ସହ ମତଦାନ କରିଥିଲେ। ରାଜ୍ୟର ପ୍ରାୟ ୨.୭୧ କୋଟି ପଞ୍ଜିକୃତ ଭୋଟର ନିଜର ମତାଧିକାର ସାବ୍ୟସ୍ତ କରିଥିଲେ। ରାଜ୍ୟରେ ମୋଟ ୭୮% ରୁ ଅଧିକ ଭୋଟ୍ ଦାନ ହୋଇଥିଲା, ଯାହା କେରଳବାସୀଙ୍କ ଉଚ୍ଚ ରାଜନୈତିକ ସଚେତନତାକୁ ଦର୍ଶାଉଛି। ଏଥର ନିର୍ବାଚନ ମୈଦାନରେ ବିଭିନ୍ନ ଦଳର ସମୁଦାୟ ୮୮୩ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି ଏବଂ ବର୍ତ୍ତମାନ ସେମାନଙ୍କର ରାଜନୈତିକ ଭାଗ୍ୟର ନିଷ୍ପତ୍ତି ଘୋଷଣା ହେଉଛି।