ଅଭିନେତାରୁ ରାଜନେତା ପାଲଟିଥିବା ଥଲାପତି ବିଜୟ (ସି. ଜୋସେଫ୍ ବିଜୟ) ତାମିଲନାଡୁର ୧୩ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ମୁଖ୍ୟମନ୍ତ୍ରୀ ଆସନରେ ବସିବା ମାତ୍ରେ ହିଁ ସେ ନିଜର ଆକ୍ସନ ମୋଡ୍ ଦେଖାଇଛନ୍ତି। ଶପଥ ଗ୍ରହଣ କରିବାର କିଛି ସମୟ ପରେ, ସାଧାରଣ ଜନତାଙ୍କୁ ଦେଇଥିବା ୩ଟି ବଡ଼ ପ୍ରତିଶ୍ରୁତି ପୂରଣ କରି ସେ ନିଜର ପ୍ରଥମ ସରକାରୀ ଫାଇଲ୍‌ଗୁଡ଼ିକରେ ଦସ୍ତଖତ କରିଛନ୍ତି।

୩ଟି ବଡ଼ ପ୍ରତିଶ୍ରୁତି

୧. ୨୦୦ ୟୁନିଟ୍ ମାଗଣା ବିଦ୍ୟୁତ୍: ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ବିଜୟଙ୍କ ପ୍ରଥମ ନିଷ୍ପତ୍ତି ଥିଲା ରାଜ୍ୟବାସୀଙ୍କୁ ମାଗଣା ବିଦ୍ୟୁତ୍ ଯୋଗାଇଦେବା। ନୂଆ ନିୟମ ଅନୁଯାୟୀ, ପ୍ରତ୍ୟେକ ଯୋଗ୍ୟ ଘରୋଇ ଉପଭୋକ୍ତାଙ୍କୁ ୨୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଇ ଦିଆଯିବ।

୨. ମହିଳା ସୁରକ୍ଷା ପାଇଁ 'ସିଙ୍ଗାପେନ୍' ଟାସ୍କଫୋର୍ସ: ମହିଳାଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ବିଜୟ ଏକ ସ୍ୱତନ୍ତ୍ର ଟାସ୍କଫୋର୍ସ 'ସିଙ୍ଗାପେନ୍' ଗଠନ କରିଛନ୍ତି। ଏହା ସହିତ ମହିଳାଙ୍କ ସୁରକ୍ଷା ନିଶ୍ଚିତ କରିବା ପାଇଁ ଏକ ୨୪ ଘଣ୍ଟିଆ ହେଲ୍ପଲାଇନ୍ ବ୍ୟବସ୍ଥା ମଧ୍ୟ ଆରମ୍ଭ କରାଯାଇଛି।

୩. ନିଶା ନିବାରଣ ପାଇଁ ସ୍ୱତନ୍ତ୍ର ଟାସ୍କଫୋର୍ସ: ରାଜ୍ୟକୁ ନିଶାମୁକ୍ତ କରିବା ଏବଂ ଡ୍ରଗ୍ସ କାରବାର ଉପରେ ରୋକ୍ ଲଗାଇବା ପାଇଁ ଏକ ସ୍ୱତନ୍ତ୍ର ଟାସ୍କଫୋର୍ସ ଗଠନ ନେଇ ସେ ନିର୍ଦ୍ଦେଶ ଦେଇଛନ୍ତି।

ନୂଆ ଯୁଗର ଆରମ୍ଭ

ଚେନ୍ନାଇର ଜବାହରଲାଲ ନେହେରୁ ଇନଡୋର ଷ୍ଟାଡିୟମରେ ଆୟୋଜିତ ଏକ ଭବ୍ୟ ସମାରୋହରେ ତାମିଲଗା ଭେଟ୍ରି କାଜଗମ୍ (ଟିଭିକେ) ର ମୁଖ୍ୟ ଥଲାପତି ବିଜୟ ମୁଖ୍ୟମନ୍ତ୍ରୀ ପଦ ଏବଂ ଗୋପନୀୟତାର ଶପଥ ନେଇଥିଲେ। ଶପଥ ଗ୍ରହଣ ପରେ ଉଦବୋଧନ ଦେଇ ସେ କହିଥିଲେ ଯେ ସେ କୌଣସି ରାଜପରିବାରରୁ ଆସିନାହାଁନ୍ତି ବରଂ ଭୋକ ଏବଂ ଗରିବି କଣ ତାହା ସେ ବୁଝିଛନ୍ତି। ମିଥ୍ୟା ପ୍ରତିଶ୍ରୁତି ଦେଇ ସେ ଲୋକଙ୍କୁ ଠକିବେ ନାହିଁ ଏବଂ ତାମିଲନାଡୁରେ ପ୍ରକୃତ ଧର୍ମନିରପେକ୍ଷତା ତଥା ସାମାଜିକ ନ୍ୟାୟର ଏକ ନୂଆ ଶାସନ ଆରମ୍ଭ ହେବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।

ତାମିଲନାଡୁ: ତାମିଲନାଡୁ ରାଜନୀତିରେ ଲାଗି ରହିଥିବା ଦୀର୍ଘ ଦିନର ସସପେନ୍ସର ଅନ୍ତ ଘଟିଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ପାର୍ଟି ତାମିଲଗା ଭେତ୍ରି କାଝାଗମ (TVK) କୁ ସରକାର ଗଠନ ପାଇଁ ବିଦୁଥଲାଇ ଚିରୁଥାଇଗଲ କାଚି (VCK) ସମର୍ଥନ ଜଣାଇଛି। ଏହା ଫଳରେ ତାମିଲନାଡୁରେ ଏକ ନୂତନ ସରକାର ଗଠନ ପାଇଁ ବାଟ ଫିଟିଛି।

ଭିସିକେ (VCK) ସଭାପତି ଥୋଲ. ଥିରୁମାଭାଲାଭାନ ଆନୁଷ୍ଠାନିକ ଭାବେ ନିଜ ଦଳର ସମର୍ଥନ ପତ୍ରକୁ ଟିଭିକେ (TVK) ର ସାଧାରଣ ସମ୍ପାଦକ ତଥା ନିର୍ବାଚନ ପ୍ରଚାର ପରିଚାଳକ ଆଧବ ଅର୍ଜୁନଙ୍କୁ ହସ୍ତାନ୍ତର କରିଛନ୍ତି। ଅଭିନେତା ବିଜୟଙ୍କ ରାଜନୈତିକ ଦଳ ପାଇଁ ଏହା ଏକ ବଡ଼ ସଫଳତା ବୋଲି ବିବେଚନା କରାଯାଉଛି।

୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ବା ବହୁମତ ସଂଖ୍ୟା ହେଉଛି ୧୧୮ ଆସନ। ଭିସିକେର ଏହି ସମର୍ଥନ ଫଳରେ ଟିଭିକେ ବହୁମତ ହାସଲ କରିଛି। ଭିସିକେର ବିନା ସର୍ତ୍ତରେ ବାହ୍ୟ ସମର୍ଥନ ଏବଂ ଏହା ପୂର୍ବରୁ ମିଳିଥିବା ସିପିଆଇ (CPI) ଓ ସିପିଆଇ(ଏମ୍) (CPI-M) ର ସମର୍ଥନ ବିଜୟଙ୍କ ଦଳ ପାଇଁ ସରକାର ଗଠନର ରାସ୍ତାକୁ ସମ୍ପୂର୍ଣ୍ଣ ସଫା କରିଦେଇଛି। ଏହାଦ୍ୱାରା ରାଜ୍ୟରେ ଦୀର୍ଘ ଦିନ ଧରି ଚାଲିଥିବା ରାଜନୈତିକ ଛକାପଞ୍ଝାର ମଧ୍ୟ ଅନ୍ତ ଘଟିଛି।

ଏହା ବ୍ୟତୀତ, ଭିସିକେ ପରେ ଏବେ ଇଣ୍ଡିଆନ୍ ୟୁନିଅନ୍ ମୁସଲିମ୍ ଲିଗ୍ (IUML) ର ତାମିଲନାଡୁ ଶାଖା ମଧ୍ୟ ତାମିଲନାଡୁରେ ସରକାର ଗଠନ ପାଇଁ ତାମିଲଗା ଭେତ୍ରି କାଝାଗମକୁ ନିଜର ବିନା ସର୍ତ୍ତରେ ସମର୍ଥନ ଘୋଷଣା କରିଛି।

୨୦୨୬ ତାମିଲନାଡୁ ବିଧାନସଭା ନିର୍ବାଚନ ଫଳାଫଳ ରାଜ୍ୟ ରାଜନୀତିରେ ଏକ ନୂଆ ମୋଡ଼ ଆଣିଛି। ଅଭିନେତାରୁ ନେତା ପାଲଟିଥିବା ଥଲାପତି ବିଜୟଙ୍କ ଦଳ ତାମିଲାଗା ଭେତ୍ରି କାଜାଗମ୍ (ଟିଭିକେ) ରାଜ୍ୟର ସବୁଠାରୁ ବଡ଼ ଦଳ ଭାବେ ଉଭା ହୋଇଛି। କିନ୍ତୁ ସରକାର ଗଠନ ପାଇଁ ଆବଶ୍ୟକ ସଂଖ୍ୟାଗରିଷ୍ଠତା ବା ମ୍ୟାଜିକ୍ ନମ୍ବର ଛୁଇଁବାରେ ଏହା ବିଫଳ ହୋଇଛି।

ଆସନ ସମୀକରଣ ଓ ବହୁମତର ଅଭାବ

୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ବହୁମତ ସାବ୍ୟସ୍ତ କରିବା ପାଇଁ ୧୧୮ ଟି ଆସନର ଆବଶ୍ୟକତା ରହିଛି। ମାତ୍ର ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ, ୨୦୨୪ ମସିହାରେ ଗଠିତ ଏହି ନୂଆ ଦଳ ଏକାକୀ ନିର୍ବାଚନ ଲଢ଼ି ଉଲ୍ଲେଖନୀୟ ପ୍ରଦର୍ଶନ ସହ ୧୦୭ ଟି ଆସନ ହାସଲ କରିଛି। ସେହିପରି ଶାସକ ଡିଏମକେ (DMK) ମେଣ୍ଟକୁ ୭୪ଟି ଆସନ ମିଳିଥିବା ବେଳେ ଏନଡିଏ (NDA) ୫୩ଟି ଆସନ ସହ ତୃତୀୟ ସ୍ଥାନରେ ରହିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ମୁଖ୍ୟମନ୍ତ୍ରୀ ଏମ୍ କେ ଷ୍ଟାଲିନ ତାଙ୍କର ପାରମ୍ପରିକ ଆସନ କୋଲାଥୁର ରୁ ପରାସ୍ତ ହୋଇଛନ୍ତି। ଅନ୍ୟପକ୍ଷରେ ବିଜୟ ନିଜେ ଲଢିଥିବା ତିରୁଚିରାପଲ୍ଲୀ (ପୂର୍ବ) ଏବଂ ପେରାମ୍ବୁର ଉଭୟ ଆସନରୁ ବିଜୟୀ ହୋଇଛନ୍ତି।

ଆଗକୁ କଣ ହେବ? (ସମ୍ଭାବ୍ୟ ସ୍ଥିତି)

କୌଣସି ଦଳକୁ ସ୍ପଷ୍ଟ ବହୁମତ ମିଳିନଥିବାରୁ ଏବେ ତାମିଲନାଡୁରେ ସରକାର ଗଠନକୁ ନେଇ ଦ୍ୱନ୍ଦ୍ୱ ଦେଖାଦେଇଛି। ଏହି ପରିପ୍ରେକ୍ଷୀରେ କିଛି ସମ୍ଭାବ୍ୟ ଦିଗ ଉପରେ ଚର୍ଚ୍ଚା ହେଉଛି:

ସରକାର ଗଠନ କରିବା ପାଇଁ ଟିଭିକେକୁ ଆହୁରି ୧୧ ଜଣ ବିଧାୟକଙ୍କ ସମର୍ଥନ ଆବଶ୍ୟକ। ତେଣୁ ଦଳ ଅନ୍ୟ ଦଳ କିମ୍ବା ନିର୍ବାଚିତ ପ୍ରତିନିଧିଙ୍କ ସହ ମିଶି ମେଣ୍ଟ ସରକାର ଗଠନ କରିବାର ପ୍ରବଳ ସମ୍ଭାବନା ରହିଛି।

କ୍ଷମତାକୁ ଆସିବା ପାଇଁ ଟିଭିକେକୁ କୌଣସି ପ୍ରମୁଖ ବିରୋଧୀ ଦଳ ସର୍ତ୍ତମୂଳକ ଭାବେ ବାହାରୁ ସମର୍ଥନ ଦେଇପାରନ୍ତି।

ଯଦି ବିଜୟ ସରକାର ଗଠନ କରିବାରେ ସଫଳ ହୁଅନ୍ତି, ତେବେ ୧୯୬୭ ମସିହା ପରେ ସେ ତାମିଲନାଡୁର ପ୍ରଥମ ଅଣ-ଡ୍ରାଭିଡ଼ିଆନ୍ (ଅଣ-ଡିଏମକେ ଓ ଅଣ-ଏଆଇଏଡିଏମକେ) ମୁଖ୍ୟମନ୍ତ୍ରୀ ହେବାର ଗୌରବ ଅର୍ଜନ କରିବେ। ବର୍ତ୍ତମାନ ସମସ୍ତଙ୍କ ନଜର ବିଜୟଙ୍କ ପରବର୍ତ୍ତୀ ପଦକ୍ଷେପ ଏବଂ ତାମିଲନାଡୁର ରାଜନୈତିକ ଭବିଷ୍ୟତ ଉପରେ ରହିଛି।

ଦକ୍ଷିଣ ଭାରତୀୟ ସିନେମାର ସୁପରଷ୍ଟାର ଥଲାପତି ବିଜୟ ରାଜନୀତିରେ ପାଦ ଦେବା ମାତ୍ରେ ତାମିଲନାଡୁର ରାଜନୈତିକ ସମୀକରଣ ବଦଳିଯାଇଛି। ନିକଟରେ ଶେଷ ହୋଇଥିବା ତାମିଲନାଡୁ ବିଧାନସଭା ନିର୍ବାଚନ (୨୦୨୬) ର ଏକ୍‌ଜିଟ୍ ପୋଲ୍ ରିପୋର୍ଟ ପ୍ରକାଶ ପାଇଛି। ବିଶେଷ କରି ଏକ୍ସିସ୍ ମାଇ୍ ଇଣ୍ଡିଆ (Axis My India) ର ସର୍ଭେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଏହି ସର୍ଭେ ଅନୁଯାୟୀ, ବିଜୟଙ୍କ ନୂତନ ରାଜନୈତିକ ଦଳ ତାମିଲଗା ଭେଟ୍ରି କାଜାଗମ୍ (TVK) ରାଜ୍ୟରେ ଏକ ବଡ଼ ଶକ୍ତି ଭାବେ ଉଭା ହୋଇଛି, ଯାହାକି ତାଙ୍କୁ ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ ତଥା ନୂଆ 'ଏମଜିଆର' ହେବାର ସମ୍ଭାବନା ସୃଷ୍ଟି କରିଛି।

ଏକ୍‌ଜିଟ୍‌ ପୋଲ୍‌ରେ ଟିଭିକେର ଦବଦବା

ଏକ୍ସିସ୍ ମାଇ୍ ଇଣ୍ଡିଆର ଆକଳନ ଅନୁଯାୟୀ, ୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ଟିଭିକେ ୯୮ ରୁ ୧୨୦ଟି ଆସନ ଜିତିପାରେ। ସେହିପରି ଶାସକ ଡିଏମକେ (DMK) ମେଣ୍ଟକୁ ୯୨ ରୁ ୧୧୦ଟି ଆସନ ମିଳିବାର ସମ୍ଭାବନା ରହିଥିବା ବେଳେ, ଏଆଇଏଡିଏମକେ (AIADMK) ଓ ବିଜେପି ମେଣ୍ଟ ମାତ୍ର ୨୨ ରୁ ୩୨ଟି ଆସନରେ ସୀମିତ ରହିବ। ଭୋଟ୍ ହାର କ୍ଷେତ୍ରରେ ମଧ୍ୟ ଟିଭିକେ ଶାସକ ଡିଏମକେ ସହ ସମାନ ସ୍ତରରେ ରହିଛି ଏବଂ ଉଭୟଙ୍କୁ ପ୍ରାୟ ୩୫ ପ୍ରତିଶତ ଭୋଟ୍ ମିଳିବାର ଅନୁମାନ କରାଯାଇଛି।

ଯୁବ ଭୋଟରଙ୍କ ପ୍ରଥମ ପସନ୍ଦ ବିଜୟ

ବିଜୟଙ୍କ ଦଳ ପ୍ରତି ଯୁବବର୍ଗଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ସର୍ଭେ ତଥ୍ୟ ଅନୁଯାୟୀ, ୧୮ ରୁ ୧୯ ବର୍ଷ ବୟସ୍କ ପ୍ରଥମ ଥର ଭୋଟରଙ୍କ ମଧ୍ୟରୁ ୬୮% ଏବଂ ୨୦ ରୁ ୨୯ ବର୍ଷ ବୟସ୍କଙ୍କ ମଧ୍ୟରୁ ୫୯% ବିଜୟଙ୍କ ଦଳକୁ ଭୋଟ୍ ଦେଇଥିବା ଆକଳନ କରାଯାଇଛି। ଲୋକମାନେ ରାଜ୍ୟରେ ଏକ ପରିବର୍ତ୍ତନ ଚାହୁଁଛନ୍ତି ଏବଂ ବିଜୟଙ୍କ ବ୍ୟକ୍ତିଗତ ଲୋକପ୍ରିୟତା ଏହାକୁ ଆହୁରି ସୁଦୃଢ଼ କରିଛି।

ଏମଜିଆର ଏବଂ ଏନଟିଆରଙ୍କ ସହ ତୁଳନା

ଏକ୍ସିସ୍ ମାଇ୍ ଇଣ୍ଡିଆର ଅଧ୍ୟକ୍ଷ ପ୍ରଦୀପ ଗୁପ୍ତା ବିଜୟଙ୍କ ଏହି ଆଶ୍ଚର୍ଯ୍ୟଜନକ ଉତ୍‌ଥାନକୁ ପୂର୍ବତନ ମୁଖ୍ୟମନ୍ତ୍ରୀ ଏମ.ଜି ରାମଚନ୍ଦ୍ରନ (MGR) ଏବଂ ଆନ୍ଧ୍ରପ୍ରଦେଶର ଏନ.ଟି ରାମାରାଓ (NTR) ଙ୍କ ରାଜନୈତିକ ପ୍ରବେଶ ସହ ତୁଳନା କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ବିଜୟ କେବଳ ଭୋଟ୍ କାଟୁଥିବା ନେତା ନୁହଁନ୍ତି, ବରଂ ଜଣେ ମୁଖ୍ୟ ଦାବିଦାର ଭାବେ ଉଭା ହୋଇଛନ୍ତି। ଯଦିଓ ଅନ୍ୟ କେତେକ ସର୍ଭେ ସଂସ୍ଥା ଟିଭିକେକୁ କମ୍ ଆସନ (୧୦ ରୁ ୪୦ ମଧ୍ୟରେ) ମିଳିବ ବୋଲି ଆକଳନ କରିଛନ୍ତି, ତଥାପି ବିଜୟଙ୍କ ଦଳ ତାମିଲନାଡୁ ରାଜନୀତିରେ ଏକ ନିର୍ଣ୍ଣାୟକ ଭୂମିକା ଗ୍ରହଣ କରିବ ବୋଲି ସମସ୍ତେ ସହମତ ପ୍ରକାଶ କରିଛନ୍ତି।