UP Police encounter - The Sakala

ଗୋଗୀ ଗ୍ୟାଙ୍ଗ୍, 'ବାଲିଆନ୍' ଗୋତ୍ର ଓ 'କୋର୍ଟ ମେ ମର୍ଡର' ଗୀତ: ଅଙ୍କିତ ବାଲିଆନ୍ ହତ୍ୟାକାଣ୍ଡର ଖୁଲାସା କଲା ପୋଲିସ

Suryakanta — Mon, 31 Aug 2026 12:13:38 +0530

ଉତ୍ତରପ୍ରଦେଶର ଶାମଲି ଠାରେ ଲୋକପ୍ରିୟ ହରିୟାଣବୀ ଗାୟକ ତଥା ୟୁଟ୍ୟୁବର ଅଙ୍କିତ ବାଲିଆନ୍‌ଙ୍କ ହତ୍ୟାକାଣ୍ଡ ପଛର ପ୍ରକୃତ କାରଣ ପୋଲିସ ସାମ୍ନାକୁ ଆଣିଛି। ଏହି ହତ୍ୟାକାଣ୍ଡ କୌଣସି ବ୍ୟକ୍ତିଗତ ଶତ୍ରୁତା ନୁହେଁ, ବରଂ ଏକ ଗୀତ ପାଇଁ ହୋଇଥିବା ପୋଲିସ ତଦନ୍ତରୁ ଜଣାପଡ଼ିଛି। ଗତ ଅଗଷ୍ଟ ୨୬ ତାରିଖରେ ଏକ ଜିମ୍ ବାହାରେ ଅଙ୍କିତଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ଘଟଣାରେ ସମ୍ପୃକ୍ତ ଥିବା ଦୁଇ ଅଭିଯୁକ୍ତଙ୍କୁ ୟୁପି ପୋଲିସ ଏକ ଏନକାଉଣ୍ଟରରେ ନିହତ କରିଛି।

ଗୀତରୁ ଆରମ୍ଭ ହୋଇଥିଲା ଶତ୍ରୁତା

ଶାମଲି ଏସପି ନରେନ୍ଦ୍ର ପ୍ରତାପ ସିଂହଙ୍କ ସୂଚନା ଅନୁଯାୟୀ, ଅଙ୍କିତ ବାଲିଆନ୍ ଏକ ଗୀତ ଗାଇଥିଲେ ଯାହାର ବୋଲ୍ ଥିଲା- 'କୋର୍ଟ ମେ ଗୋଲି ମାରେଙ୍ଗେ ମେରି ଜାନ୍... ଜଜ୍ କେ ପସିନେ ଆୟେଙ୍ଗେ' (କୋର୍ଟରେ ଗୁଳି ମାରିବୁ... ଜଜ୍‌ଙ୍କର ବି ଝାଳ ବାହାରିଯିବ)। ଏହି ଗୀତଟି ୨୦୨୧ ମସିହାରେ ଦିଲ୍ଲୀର ରୋହିଣୀ କୋର୍ଟ ଭିତରେ ଗ୍ୟାଙ୍ଗଷ୍ଟର ଜିତେନ୍ଦ୍ର ମାନ୍ ଓରଫ୍ ଗୋଗୀଙ୍କ ହତ୍ୟାକାଣ୍ଡ ସହ ଜଡ଼ିତ ଥିଲା। ଗୋଗୀ ଗ୍ୟାଙ୍ଗର ସଦସ୍ୟମାନେ ଏହି ଗୀତକୁ ନେଇ ଅସନ୍ତୋଷ ପ୍ରକାଶ କରିଥିଲେ ଏବଂ ଏହା ସେମାନଙ୍କ ପାଇଁ ଅପମାନଜନକ ଦର୍ଶାଇ ଏପରି ଗୀତ ନ ଗାଇବାକୁ ଅଙ୍କିତଙ୍କୁ ଚେତାବନୀ ଦେଇଥିଲେ। କିନ୍ତୁ ଅଙ୍କିତ ସେମାନଙ୍କ କଥା ଶୁଣିନଥିଲେ, ଯାହା ଗୋଗୀ ଗ୍ୟାଙ୍ଗର କ୍ରୋଧର କାରଣ ପାଲଟିଥିଲା।

ଗୋଗୀ ଏବଂ ଟିଲ୍ଲୁ ତାଜପୁରିଆ ଗ୍ୟାଙ୍ଗ୍ ବିବାଦ ଓ ଗୋତ୍ର କନେକ୍ସନ୍

ଏହି ଗୀତଟି ଗୋଗୀଙ୍କ ଚରମ ଶତ୍ରୁ ତଥା ପ୍ରତିଦ୍ୱନ୍ଦ୍ୱୀ ଗ୍ୟାଙ୍ଗଷ୍ଟର ଟିଲ୍ଲୁ ତାଜପୁରିଆଙ୍କ ସମର୍ଥନରେ ଗାନ କରାଯାଇଥିବା ଭ୍ରମ ସୃଷ୍ଟି କରିଥିଲା। ଏହା ପଛର ଅନ୍ୟ ଏକ ବଡ଼ କାରଣ ଥିଲା 'ଗୋତ୍ର'। ଟିଲ୍ଲୁ ତାଜପୁରିଆ ଏବଂ ଅଙ୍କିତ ଉଭୟ ବାଲିଆନ୍ ଗୋତ୍ରର ହୋଇଥିବାରୁ, ଗୋଗୀ ଗ୍ୟାଙ୍ଗ୍ ଭାବିଥିଲା ଯେ ଅଙ୍କିତ ଜାଣିଶୁଣି ସେମାନଙ୍କୁ ଅପମାନିତ କରିବା ଏବଂ ଟିଲ୍ଲୁକୁ ସମର୍ଥନ କରିବା ଉଦ୍ଦେଶ୍ୟରେ ଏହି ଗୀତ ତିଆରି କରିଛନ୍ତି। ସୂଚନାଯୋଗ୍ୟ ଯେ, ଗୋଗୀ ହତ୍ୟାକାଣ୍ଡର ପ୍ରତିଶୋଧ ନେବାକୁ ଯାଇ ମେ ୨, ୨୦୨୩ରେ ତିହାର ଜେଲ୍‌ରେ ଟିଲ୍ଲୁ ତାଜପୁରିଆଙ୍କୁ ଗୋଗୀ ଗ୍ୟାଙ୍ଗର ସଦସ୍ୟମାନେ ଅତି ନିର୍ମମ ଭାବେ ୧୦୦ ରୁ ଊର୍ଦ୍ଧ୍ୱ ଥର ଛୁରୀ ଭୁସି ହତ୍ୟା କରିଥିଲେ। କିନ୍ତୁ ସେହି ଗୀତର ରାଗ ରଖି, ବର୍ତ୍ତମାନ ଅଙ୍କିତଙ୍କୁ ମଧ୍ୟ ହତ୍ୟା କରାଯାଇଛି।

ପୋଲିସ ଏନକାଉଣ୍ଟରରେ ଦୁଇ ଅଭିଯୁକ୍ତ ନିହତ

ଅଗଷ୍ଟ ୩୧ ତାରିଖ ଭୋର ପ୍ରାୟ ୪ଟା ସମୟରେ, ଶାମଲି ଜିଲ୍ଲାର କୈରାନା ରୋଡ୍ ନିକଟସ୍ଥ ଇଣ୍ଡିଆନ ଗ୍ୟାସ ଗୋଦାମ ପାଖରେ ପୋଲିସ ଏବଂ ଅଭିଯୁକ୍ତମାନଙ୍କ ମଧ୍ୟରେ ଗୁଳିବିନିମୟ ହୋଇଥିଲା। ଏସପିଙ୍କ ସୂଚନା ମୁତାବକ, ଏକ ବାଇକରେ ଆସୁଥିବା ଦୁଇ ଦୁର୍ବୃତ୍ତଙ୍କୁ ପୋଲିସ ଅଟକାଇବାକୁ ଚେଷ୍ଟା କରିବାରୁ ସେମାନେ ଗୁଳିଚାଳନା କରି ଖସିଯିବାକୁ ଉଦ୍ୟମ କରିଥିଲେ। ଜବାବରେ ଶାମଲି କୋତୱାଲି ପୋଲିସ, ଝିନଝାନା ପୋଲିସ ଏବଂ ସ୍ୱାଟ୍ (SWAT) ଟିମ୍ ମିଳିତ ଭାବେ ଏନକାଉଣ୍ଟର କରିଥିଲେ। ଏଥିରେ ଅଙ୍କିତ ହତ୍ୟାକାଣ୍ଡରେ ସମ୍ପୃକ୍ତ ଥିବା ଦୁଇ ଅଭିଯୁକ୍ତ ମୋହିତ (୨୨) ଏବଂ ସୁମିତ (୨୪) ନିହତ ହୋଇଛନ୍ତି। ଏହି ଦୁଇ ଜଣ ହରିୟାଣାର ସୋନିପତ ଜିଲ୍ଲାର ବାସିନ୍ଦା ବୋଲି ଏଡିଜି ଅମିତାଭ ଯଶ ସୂଚନା ଦେଇଛନ୍ତି।

ବୁଲନ୍ଦଶହର ଟ୍ରିପଲ ମର୍ଡର: ପୋଲିସ ଏନକାଉଣ୍ଟରରେ ଟଳିଲା ମୁଖ୍ୟ ଅଭିଯୁକ୍ତ ଜୀତୁ ସୈନି, ଦୁଇ ପୋଲିସକର୍ମୀ ଆହତ

Suryakanta — Thu, 30 Apr 2026 09:41:20 +0530

ଉତ୍ତରପ୍ରଦେଶର ବୁଲନ୍ଦଶହରସ୍ଥିତ ଖୁର୍ଜା ଅଞ୍ଚଳରେ ଘଟିଥିବା ଚାଞ୍ଚଲ୍ୟକର ଟ୍ରିପଲ ମର୍ଡର (ତିନୋଟି ହତ୍ୟା) ଘଟଣାରେ ପୋଲିସକୁ ବଡ଼ ସଫଳତା ମିଳିଛି। ଏହି ଘଟଣାର ମୁଖ୍ୟ ଅଭିଯୁକ୍ତ ତଥା ୫୦ ହଜାର ଟଙ୍କାର ପୁରସ୍କାର ଘୋଷିତ ଅପରାଧୀ ଜୀତୁ ସୈନି ଗୁରୁବାର ଭୋର ସମୟରେ ପୋଲିସ ସହ ହୋଇଥିବା ଏକ ଏନକାଉଣ୍ଟରରେ ନିହତ ହୋଇଛି। ଏହି ଗୁଳିବିନିମୟରେ ଦୁଇ ଜଣ ପୋଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି।

କିଭଳି ହେଲା ଏନକାଉଣ୍ଟର

ପୋଲିସ ସୂତ୍ରରୁ ପ୍ରକାଶ ଯେ, ଖୁର୍ଜା ନଗର କୋତୱାଲି ଅଞ୍ଚଳର ଢାକର ରୋଡ୍ ଏବଂ ସିକନ୍ଦରପୁର ଗାଁ ନିକଟରେ ପୋଲିସ ଏବଂ ସ୍ୱାଟ୍ (SWAT) ଟିମ୍ ସହିତ ଅପରାଧୀଙ୍କର ଭୟଙ୍କର ଗୁଳିବିନିମୟ ହୋଇଥିଲା। ଏଥିରେ ମୁଖ୍ୟ ଅଭିଯୁକ୍ତ ଜୀତୁ ସୈନିକୁ ଗୁଳି ବାଜିଥିଲା। ଗୁରୁତର ଅବସ୍ଥାରେ ତାକୁ ଡାକ୍ତରଖାନା ନିଆଯାଇଥିଲେ ହେଁ ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ। ଏହି ଏନକାଉଣ୍ଟରରେ ସ୍ୱାଟ୍ ଟିମ୍ ପ୍ରଭାରୀ ମହମ୍ମଦ ଅସଲମ ଏବଂ ହେଡ୍ କନଷ୍ଟେବଳ ମୋହିତ ମଲ୍ଲିକ ଗୁଳି ବାଜିବା କାରଣରୁ ଆହତ ହୋଇଛନ୍ତି। ଅନ୍ୟପକ୍ଷରେ, ଅନ୍ୟ ଦୁଇ କନଷ୍ଟେବଳ ରାମଫଳ ଏବଂ କପିଲଙ୍କ ବୁଲେଟପ୍ରୁଫ୍ ଜ୍ୟାକେଟରେ ଗୁଳି ବାଜିଥିବାରୁ ସେମାନେ ଅଳ୍ପକେ ବର୍ତ୍ତି ଯାଇଛନ୍ତି।

କେକ୍ ଲଗାଇବାକୁ କେନ୍ଦ୍ର କରି ହୋଇଥିଲା ହତ୍ୟାକାଣ୍ଡ

ଗତ ଏପ୍ରିଲ ୨୫ ତାରିଖରେ ଖୁର୍ଜାର ଏକ ଜିମ୍‌ରେ ଜନ୍ମଦିନ ପାର୍ଟି ଚାଲିଥିବା ବେଳେ ଏହି ହତ୍ୟାକାଣ୍ଡ ଘଟିଥିଲା। ମୁଖ୍ୟ ଅଭିଯୁକ୍ତ ଜୀତୁ ସୈନିର ଜନ୍ମଦିନ ପାଳନ ସମୟରେ ମୁହଁରେ କେକ୍ ଲଗାଇବାକୁ ନେଇ ମନୀଷ ନାମକ ଜଣେ ଯୁବକଙ୍କ ସହ ତାର ବଚସା ହୋଇଥିଲା। ଏଥିରେ ଉତ୍‌କ୍ଷିପ୍ତ ହୋଇ ଜୀତୁ ଆଖିବୁଜା ଗୁଳିଚାଳନା କରିଥିଲା। ଫଳରେ ମନୀଷ, ତାଙ୍କ ସମ୍ପର୍କୀୟ ଭାଇ ଅମରଦୀପ ଏବଂ ପୁତୁରା ଆକାଶଙ୍କର ମୃତ୍ୟୁ ହୋଇଥିଲା। ନିହତ ହୋଇଥିବା ତିନିଜଣ ଯୁବକ ବିଜେପି ସହ ଜଡିତ ଥିବାବେଳେ, ଅଭିଯୁକ୍ତ ପୂର୍ବରୁ ସମାଜବାଦୀ ପାର୍ଟିର ନଗର ଅଧ୍ୟକ୍ଷ ଥିଲା ବୋଲି ଜଣାପଡିଛି।

ବ୍ୟାପକ ଅସ୍ତ୍ରଶସ୍ତ୍ର ଜବତ ଏବଂ ଅନ୍ୟ ଅଭିଯୁକ୍ତ ଗିରଫ

ଏହି ମାମଲାରେ ପୋଲିସ ନିଜର ଅପରେସନ ଜାରି ରଖିଛି। ଏନକାଉଣ୍ଟର ସ୍ଥଳରୁ ଜୀତୁ ସୈନି ନିକଟରୁ ଦୁଇଟି ପିସ୍ତଲ, ଗୋଟିଏ ଦେଶୀ ବନ୍ଧୁକ ଏବଂ ବିପୁଳ ପରିମାଣର ଜୀବନ୍ତ ତଥା ଖାଲି କାର୍ଟ୍ରିଜ୍ (ଗୁଳି) ଜବତ କରାଯାଇଛି। ସେହିପରି ଅନ୍ୟ ଏକ ଘଟଣାରେ ଟ୍ରିପଲ ମର୍ଡରର ଆଉ ଜଣେ ଅଭିଯୁକ୍ତ ମୟଙ୍କ ସୈନିକୁ ପୋଲିସ ଗିରଫ କରିଛି। ଖସି ପଳାଇବାକୁ ଉଦ୍ୟମ କରୁଥିବା ବେଳେ ପୋଲିସ ଗୁଳିରେ ମୟଙ୍କର ଗୋଡ ଆହତ ହୋଇଛି। ଏହି ଟ୍ରିପଲ ମର୍ଡର ଘଟଣାରେ ପୋଲିସ ମୋଟ ୧୦ ଜଣଙ୍କ ନାମରେ ମାମଲା ରୁଜୁ କରିଥିଲା।