ମହାରାଷ୍ଟ୍ରର ରାଜଧାନୀ ମୁମ୍ବାଇରେ ଏକ ରାଜନୈତିକ ରାଲି ଯୋଗୁଁ ସୃଷ୍ଟି ହୋଇଥିବା ଟ୍ରାଫିକ୍ ଜାମ୍‌ରେ ଫସି ମନ୍ତ୍ରୀ ଗିରିଶ ମହାଜନଙ୍କୁ ଖୋଲାଖୋଲି ସମାଲୋଚନା କରିଥିବା ମହିଳାଙ୍କ ବିରୋଧରେ ଏବେ ଏକ ପୋଲିସ ଅଭିଯୋଗ ଦାୟର ହୋଇଛି। ତେବେ ଏହି ଘଟଣାରେ ମହିଳାଙ୍କ ବିରୋଧରେ କୌଣସି ଏଫଆଇଆର ରୁଜୁ ହୋଇନାହିଁ ବୋଲି ମୁମ୍ବାଇ ପୋଲିସ ସ୍ପଷ୍ଟ କରିଛି।

ଗତ ମଙ୍ଗଳବାର ଦିନ ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ବିଲ୍ ସମର୍ଥନରେ ମୁମ୍ବାଇର ବ୍ୟସ୍ତବହୁଳ ୱର୍ଲି ଅଞ୍ଚଳରେ ବିଜେପି ପକ୍ଷରୁ ଏକ ବିଶାଳ ରାଲିର ଆୟୋଜନ କରାଯାଇଥିଲା। ଏହି କାରଣରୁ ରାସ୍ତାରେ ଭୟଙ୍କର ଟ୍ରାଫିକ୍ ଜାମ୍ ସୃଷ୍ଟି ହୋଇଥିଲା। ଟ୍ରାଫିକ୍‌ରେ ଫସି ରହିଥିବା ଜଣେ ମହିଳା କ୍ରୋଧିତ ହୋଇ ରାସ୍ତା ଉପରେ ଗଣମାଧ୍ୟମକୁ ପ୍ରତିକ୍ରିୟା ଦେଉଥିବା ମହାରାଷ୍ଟ୍ରର ମନ୍ତ୍ରୀ ଗିରିଶ ମହାଜନଙ୍କ ଉପରେ ବର୍ଷିଥିଲେ। ରାଲି କରିବା ପାଇଁ ଖୋଲା ପଡ଼ିଆର ବ୍ୟବହାର କାହିଁକି କରାଯାଉନାହିଁ ବୋଲି ସେ ପ୍ରଶ୍ନ କରିବା ସହ ମନ୍ତ୍ରୀଙ୍କୁ ସେଠାରୁ ତୁରନ୍ତ ଚାଲିଯିବାକୁ କହିଥିଲେ।

ଏହି ଘଟଣାକୁ ନେଇ ଆଡଭୋକେଟ୍ ଗୁଣରତ୍ନ ସଦାବର୍ତ୍ତେଙ୍କ ଝିଅ ଜେନ୍ ସଦାବର୍ତ୍ତେ ବୁଧବାର ଦିନ ୱର୍ଲି ପୋଲିସ ଷ୍ଟେସନରେ ଏକ ଲିଖିତ ଅଭିଯୋଗ ଦାୟର କରିଛନ୍ତି। ମହିଳା ଜଣକ ଅଶାଳୀନ ଭାଷା ପ୍ରୟୋଗ କରିବା ସହ ସମ୍ବିଧାନ ଓ ଜନପ୍ରତିନିଧିଙ୍କୁ ଅପମାନିତ କରିଛନ୍ତି ବୋଲି ସେ ଅଭିଯୋଗ କରିଛନ୍ତି। ଏଥିସହ ଭାରତୀୟ ନ୍ୟାୟ ସଂହିତା (BNS)ର ଧାରା ୨୨୧, ୧୩୨, ୩୫୨, ୧୯୫ ଏବଂ ୩୫୩ ଅଧୀନରେ ମାମଲା ରୁଜୁ କରିବାକୁ ସେ ଦାବି କରିଥିଲେ। ତେବେ ଶୁକ୍ରବାର ଦିନ ପୋଲିସ ଏକ ସ୍ପଷ୍ଟୀକରଣ ଦେଇ କହିଛି ଯେ ମହିଳାଙ୍କ ବିରୋଧରେ କେବଳ ଅଭିଯୋଗ ଗ୍ରହଣ କରାଯାଇଛି, କିନ୍ତୁ କୌଣସି ଏଫଆଇଆର ମାମଲା ରୁଜୁ ହୋଇନାହିଁ। ସୋସିଆଲ ମିଡିଆରେ ବ୍ୟାପୁଥିବା ମିଥ୍ୟା ଗୁଜବରୁ ଦୂରେଇ ରହିବାକୁ ପୋଲିସ ନିବେଦନ କରିଛି।

ଏହି ସମ୍ପୂର୍ଣ୍ଣ ବିବାଦ ଉପରେ ମନ୍ତ୍ରୀ ଗିରିଶ ମହାଜନ ନିଜର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ ମହିଳାଙ୍କ ରାଗ ଯଥାର୍ଥ ଥିଲା, କିନ୍ତୁ ତାଙ୍କର ଭାଷା ପ୍ରୟୋଗ ଠିକ୍ ନଥିଲା। ତଥାପି ସେ ମହିଳାଙ୍କ ବିରୋଧରେ କୌଣସି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି। ଅନ୍ୟପଟେ, ସାଧାରଣ ଲୋକଙ୍କୁ ହୋଇଥିବା ଅସୁବିଧା ପାଇଁ ବିଜେପି ନେତ୍ରୀ ତଥା ମୁମ୍ବାଇ ମେୟର ରିତୁ ତାୱଡେ ଦୁଃଖ ପ୍ରକାଶ କରିଛନ୍ତି। ନିୟମ ଉଲ୍ଲଂଘନ କରି ଟ୍ରାଫିକ୍ ସମସ୍ୟା ସୃଷ୍ଟି କରିଥିବା ଅଭିଯୋଗରେ ପୋଲିସ ବର୍ତ୍ତମାନ ରାଲି ଆୟୋଜକଙ୍କ ନାମରେ ଏକ ମାମଲା ରୁଜୁ କରିଛି।

ମୁମ୍ବାଇର ୱର୍ଲି (Worli) ଠାରେ ଏକ ରାଜନୈତିକ ରାଲି ଯୋଗୁଁ ସୃଷ୍ଟି ହୋଇଥିବା ଟ୍ରାଫିକ୍ ଜାମକୁ ନେଇ ଜଣେ ମହିଳା ମହାରାଷ୍ଟ୍ର ମନ୍ତ୍ରୀ ଗିରୀଶ ମହାଜନ (Girish Mahajan) ଙ୍କ ସହ ଯୁକ୍ତିତର୍କ କରୁଥିବା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସାଧାରଣ ଲୋକଙ୍କ ଅସୁବିଧାକୁ ନେଇ ମହିଳାଙ୍କ ଏହି ପ୍ରତିବାଦକୁ ଅନେକ ଲୋକ ସମର୍ଥନ କରିଛନ୍ତି ଓ ଭିଆଇପି କଲଚରକୁ (VIP Culture) ନେଇ ଚର୍ଚ୍ଚା ଜୋର ଧରିଛି।

ଟ୍ରାଫିକ୍ ଜାମରେ ଫସିଲେ, ମନ୍ତ୍ରୀଙ୍କୁ କଲେ ପ୍ରଶ୍ନ

सामान्य जनतेला वेठीस धरणाऱ्या व्हीआयपी कल्चरचा जनतेला आता कंटाळा आला आहे. लोकांचा संयम ढळू लागला आहे, त्यातूनच मुंबईतील एका महिलेने मंत्री गिरीश महाजन यांची त्यांच्यामुळे झालेल्या वाहतुक कोंडीवरून खरडपट्टी काढली. pic.twitter.com/uomMBSUlGk

— Prashant Dhumal (@prash_dhumal) April 21, 2026

ମିଳିଥିବା ସୂଚନା ଅନୁଯାୟୀ, ବିଜେପି (BJP) ଏବଂ ମହାଯୁତି ମେଣ୍ଟ ପକ୍ଷରୁ ମହିଳା ସଂରକ୍ଷଣ ବିଲ୍ ପ୍ରସଙ୍ଗରେ ବିରୋଧୀଙ୍କୁ ଟାର୍ଗେଟ୍ କରି ଏକ ପ୍ରତିବାଦ ଶୋଭାଯାତ୍ରା ଆୟୋଜନ କରାଯାଇଥିଲା। ଏହି ରାଲି ସନ୍ଧ୍ୟା ୫ ଟାରେ ଜାମ୍ଭୋରୀ ମୈଦାନ (Jambhori Maidan) ରୁ ଆରମ୍ଭ ହୋଇଥିଲା। ଏହି ଅଞ୍ଚଳରେ ପ୍ରବଳ ଜନଗହଳି ରହୁଥିବା ବେଳେ ରାଲି ଯୋଗୁଁ ଭୟଙ୍କର ଟ୍ରାଫିକ୍ ସମସ୍ୟା ସୃଷ୍ଟି ହୋଇଥିଲା। ଏହି ସମୟରେ ନିଜ ପିଲାକୁ ସ୍କୁଲରୁ ଆଣିବାକୁ ଯାଉଥିବା ଜଣେ ସ୍ଥାନୀୟ ମହିଳା ଦୀର୍ଘ ସମୟ ଧରି ଟ୍ରାଫିକରେ ଫସି ରହିଥିଲେ। ଏଥିରେ ବିରକ୍ତ ହୋଇ ସେ ଗାଡ଼ିରୁ ଓହ୍ଲାଇ ସିଧାସଳଖ ରାଲି ମଧ୍ୟକୁ ପଶିଯାଇ ମନ୍ତ୍ରୀ ଗିରୀଶ ମହାଜନ ଏବଂ ପୋଲିସ ଅଧିକାରୀଙ୍କୁ ପ୍ରଶ୍ନ କରିଥିଲେ।

'ଏଠାରୁ ଟ୍ରାଫିକ୍ ହଟାଅ'

ଭାଇରାଲ୍ ଭିଡିଓରେ ମହିଳା ଜଣକ ରାଗିଯାଇ କହୁଛନ୍ତି ଯେ, "ଆପଣମାନଙ୍କର କ'ଣ ହୋଇଛି? ଶହ ଶହ ଲୋକ ଅପେକ୍ଷା କରିଛନ୍ତି। ଏଠାରୁ ବାହାରନ୍ତୁ, ଏଠାରୁ ଏହି ଟ୍ରାଫିକ୍ ହଟାନ୍ତୁ।" ସେ ଆହୁରି ମଧ୍ୟ ପ୍ରଶ୍ନ କରିଥିଲେ ଯେ ପାଖରେ ଖୋଲା ପଡ଼ିଆ ଥିବା ବେଳେ ରାଜନୈତିକ ନେତାମାନେ କାହିଁକି ରାସ୍ତା ମଝିରେ ଭିଡ଼ ଜମାଉଛନ୍ତି? ମହିଳା ଜଣକ ପୋଲିସର କାର୍ଯ୍ୟାନୁଷ୍ଠାନକୁ ମଧ୍ୟ ନିନ୍ଦା କରିଥିଲେ। ପୋଲିସ ସାଧାରଣ ଯାତ୍ରୀଙ୍କ ସୁବିଧା ପରିବର୍ତ୍ତେ ନେତାଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦେଉଥିବା ସେ ଅଭିଯୋଗ କରିଥିଲେ। ସେ ବରିଷ୍ଠ ଅଧିକାରୀଙ୍କ ସହ କଥା ହେବାକୁ ଜିଦ୍ ଧରିବା ପରେ ପୋଲିସ ତାଙ୍କ କଥା ଶୁଣିଥିଲା।

ସୋସିଆଲ ମିଡିଆରେ ମିଳୁଛି ସମର୍ଥନ

ଏହି ଘଟଣାର ଭିଡିଓ ଏକ୍ସ (X) ବ୍ୟବହାରକାରୀ ପ୍ରଶାନ୍ତ ଧୁମାଲଙ୍କ ଦ୍ୱାରା ସେୟାର କରାଯାଇଥିଲା। ଭିଆଇପି କଲଚର ବିରୋଧରେ ସ୍ୱର ଉତ୍ତୋଳନ କରିଥିବାରୁ ନେଟିଜେନ୍‌ମାନେ ମହିଳାଙ୍କୁ ପ୍ରଶଂସା କରିଛନ୍ତି। ଜଣେ ୟୁଜର ତାଙ୍କୁ 'ପ୍ରକୃତ ଯୋଦ୍ଧା' ବୋଲି କହିଥିବା ବେଳେ, ଅନ୍ୟମାନେ ନେତାଙ୍କ କାରଣରୁ ସାଧାରଣ ଲୋକେ ଭୋଗୁଥିବା ଦୁର୍ଦ୍ଦଶା ଉପରେ କ୍ଷୋଭ ପ୍ରକାଶ କରିଛନ୍ତି। ନେତାଙ୍କୁ ସମାଲୋଚନା କରି ଅନେକ ଲୋକ କହିଛନ୍ତି ଯେ, ସାଧାରଣ ଜନତା ଏବେ ନିଜ ଅଧିକାର ପ୍ରତି ସଚେତନ ହେଉଛନ୍ତି।