ନୂଆଦିଲ୍ଲୀ: କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ଏକ ବଡ଼ ଖୁସି ଖବର । କେନ୍ଦ୍ର କ୍ୟାବିନେଟ୍ ମହଙ୍ଗା ଭତ୍ତା (DA) ଏବଂ ମହଙ୍ଗା ରିଲିଫ୍ (DR) ରେ ୨ ପ୍ରତିଶତ ବୃଦ୍ଧିକୁ ଅନୁମୋଦନ ଦେଇଛି । ଏହି ନୂତନ ବୃଦ୍ଧି ଜାନୁଆରୀ ୧ ରୁ ପିଛିଲା ଭାବେ ଲାଗୁ ହେବ ବୋଲି ସୂଚନା ମିଳିଛି । ବଢ଼ୁଥିବା ମୁଦ୍ରାସ୍ଫୀତି ଏବଂ ଦରଦାମ୍ ବୃଦ୍ଧି ମଧ୍ୟରେ କର୍ମଚାରୀମାନଙ୍କୁ ଆର୍ଥିକ ସହାୟତା ପ୍ରଦାନ କରିବା ଉଦ୍ଦେଶ୍ୟରେ ସରକାରଙ୍କ ପକ୍ଷରୁ ଏହି ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି ।

ଏହାପୂର୍ବରୁ ଅକ୍ଟୋବର ମାସରେ ମହଙ୍ଗା ଭତ୍ତାକୁ ୫୫ ପ୍ରତିଶତ ରୁ ୫୮ ପ୍ରତିଶତକୁ ବୃଦ୍ଧି କରାଯାଇଥିଲା, ଯାହାକି ଜୁଲାଇ ୧, ୨୦୨୫ ରୁ ଲାଗୁ ହୋଇଥିଲା । ବର୍ତ୍ତମାନ ଏହି ନୂତନ ୨ ପ୍ରତିଶତ ବୃଦ୍ଧି ସହିତ ମହଙ୍ଗା ଭତ୍ତା ପରିମାଣ ଆହୁରି ଅଧିକ ହେବାକୁ ଯାଉଛି । ମହଙ୍ଗା ଭତ୍ତାକୁ ମୂଳ ଦରମା (ବେସିକ୍ ସାଲାରୀ) ର ଏକ ପ୍ରତିଶତ ଭାବରେ ହିସାବ କରାଯାଏ, ତେଣୁ ଏହି ନିଷ୍ପତ୍ତି ଦ୍ୱାରା କେନ୍ଦ୍ର ସରକାରୀ କର୍ମଚାରୀଙ୍କ ଇନ୍-ହ୍ୟାଣ୍ଡ ଦରମା ସିଧାସଳଖ ବୃଦ୍ଧି ପାଇବ । ସେହିପରି ପେନସନଭୋଗୀମାନଙ୍କର ମଧ୍ୟ ମହଙ୍ଗା ରିଲିଫ୍ ଆକାରରେ ଭତ୍ତା ବଢ଼ିବ ଏବଂ ସେମାନଙ୍କର କ୍ରୟ କ୍ଷମତା ବଜାୟ ରହିପାରିବ ।