ତାମିଲନାଡୁ: ନବନିର୍ବାଚିତ ମୁଖ୍ୟମନ୍ତ୍ରୀ ତଥା ତାମିଲଗା ଭେଟ୍ରି କାଜାଗମ୍ (TVK) ମୁଖ୍ୟ ସି. ଜୋସେଫ୍ ବିଜୟ ବୁଧବାର ଦିନ ତାମିଲନାଡୁ ବିଧାନସଭାରେ ଆସ୍ଥା ଭୋଟ୍ ଜିତିଛନ୍ତି। ତାଙ୍କ ସପକ୍ଷରେ ୧୪୪ଟି ଭୋଟ୍ ପଡ଼ିଥିବା ବେଳେ ବିପକ୍ଷରେ ମାତ୍ର ୨୨ଟି ଭୋଟ୍ ପଡ଼ିଛି ଏବଂ ୫ ଜଣ ବିଧାୟକ ଭୋଟଦାନରୁ ବିରତ ରହିଛନ୍ତି। ଏହି ବିଜୟ ସହିତ ସେ ରାଜ୍ୟରେ ନିଜ ସରକାରର ସ୍ଥିତିକୁ ସୁଦୃଢ଼ କରିଛନ୍ତି।

ରିପୋର୍ଟ ଅନୁଯାୟୀ, ବିରୋଧୀ ଦଳ ଏଆଇଏଡିଏମକେ (AIADMK)ର ୨୫ ଜଣ ବିଧାୟକ ଦଳୀୟ ହ୍ୱିପ୍‌କୁ ଅମାନ୍ୟ କରି ବିଜୟଙ୍କୁ ସମର୍ଥନ ଜଣାଇଛନ୍ତି। ଦଳର ସାଧାରଣ ସମ୍ପାଦକ ଏଡାପାଡ଼ି କେ ପଲାନିସ୍ୱାମୀ ସମସ୍ତ ୪୭ ଜଣ ବିଧାୟକଙ୍କୁ ଟିଭିକେ ସରକାର ବିପକ୍ଷରେ ଭୋଟ୍ ଦେବାକୁ ନିର୍ଦ୍ଦେଶ ଦେଇଥିଲେ। ମାତ୍ର ବିଧାନସଭା ଭିତରେ ଦଳର ନେତାଙ୍କ ମଧ୍ୟରେ ତୀବ୍ର ବିବାଦ ଦେଖିବାକୁ ମିଳିଥିଲା। ପଲାନିସ୍ୱାମୀ ଅଭିଯୋଗ କରିଛନ୍ତି ଯେ ବିଧାୟକମାନଙ୍କୁ ମନ୍ତ୍ରୀପଦ ଓ ଅନ୍ୟାନ୍ୟ ଲାଭଜନକ ପଦବୀର ପ୍ରଲୋଭନ ଦେଖାଇ ନିଜ ଆଡ଼କୁ ଆଣିବାକୁ ଉଦ୍ୟମ କରାଯାଇଛି।

ଭୋଟଗ୍ରହଣ ସମୟରେ ବିରୋଧୀ ଡିଏମକେ (DMK) ବିଧାୟକମାନେ କକ୍ଷତ୍ୟାଗ କରିଥିଲେ। ବିରୋଧୀ ଦଳ ନେତା ଉଦୟନିଧି ଷ୍ଟାଲିନ୍ କଟାକ୍ଷ କରି କହିଛନ୍ତି ଯେ, ଆମେ କକ୍ଷତ୍ୟାଗ କରୁଛୁ ଏବଂ ଏହାଦ୍ୱାରା ଆପଣ ସହଜରେ ବହୁମତ ହାସଲ କରିପାରିବେ। ସେ ମଧ୍ୟ ପୂର୍ବ ସରକାରଙ୍କ ଜନକଲ୍ୟାଣକାରୀ ଯୋଜନାକୁ ରାଜନୀତିକରଣ ନକରିବାକୁ ଅନୁରୋଧ କରିଥିଲେ। ଅନ୍ୟପକ୍ଷରେ କଂଗ୍ରେସ, ସିପିଆଇ, ସିପିଆଇ (ଏମ), ଭିସିକେ ଏବଂ ଆଇୟୁଏମଏଲ ଭଳି ଦଳଗୁଡ଼ିକ ଟିଭିକେକୁ ପୂର୍ଣ୍ଣ ସମର୍ଥନ ଜଣାଇଛନ୍ତି। ଏହା ବ୍ୟତୀତ ବହିଷ୍କୃତ ଏଏମଏମକେ ବିଧାୟକ କାମରାଜ ମଧ୍ୟ ସରକାରଙ୍କୁ ସମର୍ଥନ ଦେଇ ବିଜୟଙ୍କ ନେତୃତ୍ୱକୁ ପ୍ରଶଂସା କରିଛନ୍ତି।

ସି. ଜୋସେଫ୍ ବିଜୟ ତ୍ରିଚି ଇଷ୍ଟ ଆସନରୁ ଇସ୍ତଫା ଦେଇ ପେରାମ୍ବୁର ଆସନ ନିଜ ପାଖରେ ରଖିବା ପରେ ବିଧାନସଭାରେ ଟିଭିକେର ନିଜସ୍ୱ ସଦସ୍ୟ ସଂଖ୍ୟା ୧୦୭ ରହିଛି। ମେଣ୍ଟ ସହଯୋଗୀଙ୍କୁ ମିଶାଇ ଦଳର ସଂଖ୍ୟାବଳ ୧୨୦ ଥିଲା। ତେବେ କୋର୍ଟଙ୍କ ନିର୍ଦ୍ଦେଶ ଯୋଗୁଁ ଜଣେ ବିଧାୟକ ଭୋଟ୍ ଦେବାରୁ ବଞ୍ଚିତ ହୋଇଛନ୍ତି। ଟିଭିକେ ନିର୍ବାଚନରେ ସବୁଠାରୁ ବଡ଼ ଦଳ ଭାବେ ଉଭା ହୋଇ ଡିଏମକେ ଏବଂ ଏଆଇଏଡିଏମକେର ଦୀର୍ଘ ଦିନର ଦ୍ରାବିଡ଼ ଆଧିପତ୍ୟକୁ ଶେଷ କରି ରାଜ୍ୟ ରାଜନୀତିରେ ଏକ ନୂଆ ଅଧ୍ୟାୟ ସୃଷ୍ଟି କରିଛି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନ ୨୦୨୬ ର ଫଳାଫଳ ପ୍ରକାଶ ପାଇବା ପରେ ରାଜ୍ୟ ରାଜନୀତିରେ ଅନିଶ୍ଚିତତା ଲାଗି ରହିଛି। ଅଭିନେତାରୁ ରାଜନେତା ପାଲଟିଥିବା ବିଜୟ ଙ୍କ ନେତୃତ୍ୱାଧୀନ ତାମିଲାଗା ଭେଟ୍ରି କାଜାଗମ୍ (ଟିଭିକେ) ବିଧାନସଭା ନିର୍ବାଚନରେ ୧୦୮ଟି ଆସନ ଜିତି ଏକ ବଡ଼ ପ୍ରଭାବ ପକାଇଛି। ତେବେ ବହୁମତ ସାବ୍ୟସ୍ତ କରିବାକୁ ଦଳକୁ ଅନ୍ୟ ଦଳଗୁଡ଼ିକର ସମର୍ଥନ ଆବଶ୍ୟକ ହେଉଛି। ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ଗୁରୁବାର ଚେନ୍ନାଇଠାରେ ଦ୍ୱିତୀୟ ପର୍ଯ୍ୟାୟ ଆଲୋଚନା ସମୟରେ ବହୁମତ ପ୍ରମାଣ କରିବା ସହ ସମର୍ଥନ କରୁଥିବା ବିଧାୟକଙ୍କ ତାଲିକା ଦାଖଲ କରିବାକୁ ବିଜୟଙ୍କୁ ନିର୍ଦ୍ଦେଶ ଦେଇଛନ୍ତି। କଂଗ୍ରେସ ନିଜର ୫ଟି ଆସନ ସହ ଟିଭିକେକୁ ସମର୍ଥନ ଜଣାଇବା ପରେ ଅନ୍ୟ ସହଯୋଗୀ ଦଳଗୁଡ଼ିକ ଉପରେ ଏବେ ସମସ୍ତଙ୍କ ନଜର ରହିଛି।

ସରକାର ଗଠନ ନେଇ ଚାଲିଥିବା ଛକାପଞ୍ଝା ମଧ୍ୟରେ ରାଜ୍ୟରେ ଥିବା ଛୋଟ ଦଳଗୁଡ଼ିକ ଏବେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ସିପିଆଇ(ଏମ) ଏବଂ ସିପିଆଇ ପୃଥକ ଭାବରେ କାର୍ଯ୍ୟକାରିଣୀ ବୈଠକ କରି ପରିସ୍ଥିତି ଉପରେ ଆଲୋଚନା କରୁଛନ୍ତି। ଉଭୟ ଦଳ ନିକଟରେ ୨ଟି ଲେଖାଏଁ ଆସନ ରହିଛି। ସେହିପରି ଡିଏମକେ ମେଣ୍ଟର ଅଂଶ ଥିବା ଭିସିକେ ମଧ୍ୟ ନିଜର ଉଚ୍ଚସ୍ତରୀୟ କମିଟିର ବୈଠକ ଡାକିଛି। ଏହି ଦଳ ମଧ୍ୟ ନିର୍ବାଚନରେ ୨ଟି ଆସନ ହାସଲ କରିଛି। ଯଦି ଏହି ତିନୋଟି ଦଳ କଂଗ୍ରେସ ସହ ମିଶି ବିଜୟଙ୍କୁ ସମର୍ଥନ କରନ୍ତି, ତେବେ ଟିଭିକେ ବହୁମତ ଆକଳନ ପାର୍ କରିପାରିବ ବୋଲି ଆଶା କରାଯାଉଛି। ଉଲ୍ଲେଖଯୋଗ୍ୟ ଯେ ୨୩୪ ଆସନ ବିଶିଷ୍ଟ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ଦରକାର, ଯାହାକି ଟିଭିକେ ପାଖରେ ନାହିଁ।

ଅନ୍ୟପକ୍ଷରେ ଏକ ଆଶ୍ଚର୍ଯ୍ୟଜନକ ଘଟଣାକ୍ରମରେ ଡିଏମକେ ଏବଂ ଏଆଇଏଡିଏମକେ ମଧ୍ୟରେ ମେଣ୍ଟ ହେବାର ସମ୍ଭାବନା ସୃଷ୍ଟି ହୋଇଛି। ଗୁରୁବାର ଦିନ ଡିଏମକେ ସଭାପତି ତଥା ବିଦାୟୀ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ ଚେନ୍ନାଇଠାରେ ବାମପନ୍ଥୀ ନେତା ଏବଂ ଭିସିକେ ସଭାପତିଙ୍କ ସହ ଆଲୋଚନା କରିଛନ୍ତି। ରାଜ୍ୟରେ ରାଜନୈତିକ ଅସ୍ଥିରତା ଦୂର କରିବା ପାଇଁ ଡିଏମକେ ଏଆଇଏଡିଏମକେ କୁ ସମର୍ଥନ ଦେବା ନେଇ ସେ ବିଚାର କରୁଥିବା ଜଣାପଡିଛି। ତେବେ ସିପିଆଇ ଏବଂ ସିପିଆଇ(ଏମ) ଶୁକ୍ରବାର ବୈଠକ ପରେ ଚୂଡ଼ାନ୍ତ ନିଷ୍ପତ୍ତି ନେବେ ବୋଲି ଷ୍ଟାଲିନଙ୍କୁ ଜଣାଇଛନ୍ତି। ଡିଏମକେ ଦଳର ସୂତ୍ରରୁ ପ୍ରକାଶ ଯେ, ସେମାନେ ସରକାରରେ ସାମିଲ ନହୋଇ ଏଆଇଏଡିଏମକେ ସରକାରକୁ ବାହାରୁ ସମର୍ଥନ ଦେବାକୁ ଆଗ୍ରହୀ ଅଛନ୍ତି। ନିର୍ବାଚନରେ ଡିଏମକେ ୫୯ଟି ଆସନ ଜିତିଥିବା ବେଳେ ଏଆଇଏଡିଏମକେ ୪୭ଟି ଆସନ ହାସଲ କରିଛି। ଏଭଳି ପରିସ୍ଥିତିରେ ତାମିଲନାଡୁର ପରବର୍ତ୍ତୀ ସରକାର କିଏ ଗଠନ କରିବ, ତାହା ଦେଖିବା ବାକି ରହିଲା।

ତାମିଲନାଡୁର ୨୦୨୬ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ରାଜ୍ୟରେ ଏକ ଅଭୂତପୂର୍ବ ରାଜନୈତିକ ସଙ୍କଟ ଦେଖାଦେଇଛି। ଦକ୍ଷିଣ ଭାରତୀୟ ସୁପରଷ୍ଟାର ବିଜୟଙ୍କ ଦ୍ୱାରା ଗଠିତ ନୂତନ ଦଳ ତାମିଲଗା ଭେତ୍ରି କାଜଗମ୍ (ଟିଭିକେ) ନିର୍ବାଚନରେ ସବୁଠାରୁ ବଡ଼ ଦଳ ଭାବରେ ଉଭା ହୋଇଥିଲେ ସୁଦ୍ଧା ସରକାର ଗଠନ ପାଇଁ ଆବଶ୍ୟକୀୟ ବହୁମତ ହାସଲ କରିପାରିନାହିଁ। ଏହାକୁ ନେଇ ସରକାର ଗଠନ ପ୍ରକ୍ରିୟାରେ ଅନିଶ୍ଚିତତା ଦେଖାଦେଇଛି।

ବହୁମତଠାରୁ ଦୂରରେ ଟିଭିକେ

ଦୀର୍ଘ ପାଞ୍ଚ ଦଶନ୍ଧି ଧରି ତାମିଲନାଡୁରେ ରାଜୁତି କରୁଥିବା ଦ୍ରାବିଡ଼ ଦଳଗୁଡ଼ିକର ଏକଚାଟିଆ ଶାସନକୁ ଶେଷ କରି ଟିଭିକେ ମୋଟ ୨୩୪ ଆସନରୁ ୧୦୮ଟି ଆସନ ହାତେଇଛି। ତେବେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ୧୧୮ ଥିବାବେଳେ ଦଳ ଏଥିରୁ ପଛରେ ପଡ଼ିଯାଇଛି। ଅନ୍ୟପକ୍ଷରେ ନିଜର ଦୁଇଟି ଆସନରୁ ବିଜୟୀ ହୋଇଥିବା ବିଜୟଙ୍କୁ ନିୟମ ଅନୁଯାୟୀ ଗୋଟିଏ ଆସନ ଛାଡ଼ିବାକୁ ପଡ଼ିବ, ଯାହା ଫଳରେ ଦଳର ବିଧାୟକ ସଂଖ୍ୟା ୧୦୭କୁ ଖସିଆସିବ। ଦୀର୍ଘ ଦିନର ସହଯୋଗୀ ଡିଏମକେ ସହ ମେଣ୍ଟ ଭାଙ୍ଗି କଂଗ୍ରେସ ନିଜର ୫ ବିଧାୟକଙ୍କ ସମର୍ଥନ ଟିଭିକେକୁ ଦେଇଛି। ଏହା ସତ୍ତ୍ୱେ ମେଣ୍ଟର ସଂଖ୍ୟା ୧୧୨ରେ ପହଞ୍ଚିଛି, ଯାହା ବହୁମତଠାରୁ ଏବେ ବି କମ୍ ରହିଛି।

ରାଜ୍ୟପାଳଙ୍କ ସହ ଆଲୋଚନା ଓ ବିକ୍ଷୋଭ

ସରକାର ଗଠନ ପାଇଁ ଦାବି ଜଣାଇ ବିଜୟ ତାମିଲନାଡୁର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଭେଟିଥିଲେ। କିନ୍ତୁ ରାଜ୍ୟପାଳ ତାଙ୍କୁ ଆବଶ୍ୟକୀୟ ୧୧୮ ବିଧାୟକଙ୍କ ସମର୍ଥନ ପତ୍ର ଦାଖଲ କରିବାକୁ କହିଛନ୍ତି। ରାଜ୍ୟପାଳଙ୍କ ଏହି ନିଷ୍ପତ୍ତି ପରେ ସରକାର ଗଠନରେ ବିଳମ୍ବ ହେଉଥିବାରୁ ଅସନ୍ତୋଷ ପ୍ରକାଶ କରି ଟିଭିକେ ଏବଂ କଂଗ୍ରେସ କର୍ମୀମାନେ ଚେନ୍ନାଇସ୍ଥିତ ଲୋକ ଭବନ ବାହାରେ ବିକ୍ଷୋଭ ପ୍ରଦର୍ଶନ କରିଛନ୍ତି। ବିଜୟ ଏବେ ସରକାର ଗଠନ କରିବା ପାଇଁ ଅନ୍ୟ ଛୋଟ ଦଳଗୁଡ଼ିକ ସହ ଆଲୋଚନା ଚଳାଇଛନ୍ତି।

ଡିଏମକେ ଏବଂ ଏଆଇଏଡିଏମକେର ରଣନୀତି

ଚଳିତ ନିର୍ବାଚନରେ କ୍ଷମତାସୀନ ଡିଏମକେ (DMK) ମାତ୍ର ୫୯ଟି ଆସନ ପାଇଥିବା ବେଳେ ପ୍ରମୁଖ ବିରୋଧୀ ଦଳ ଏଆଇଏଡିଏମକେ (AIADMK) ୪୭ଟି ଆସନରେ ସୀମିତ ରହିଛି। ବିଜୟଙ୍କୁ କ୍ଷମତାରୁ ଦୂରେଇ ରଖିବା ପାଇଁ ଏହି ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଦଳ ଏକାଠି ହୋଇ ସରକାର ଗଠନ କରିବା ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ଏହାର କଡ଼ା ଜବାବ ଦେଇ ଟିଭିକେ ପକ୍ଷରୁ ଚେତାବନୀ ଦିଆଯାଇଛି ଯେ ଯଦି ଡିଏମକେ କିମ୍ବା ଏଆଇଏଡିଏମକେକୁ ସରକାର ଗଠନ ପାଇଁ ସୁଯୋଗ ଦିଆଯାଏ, ତେବେ ଟିଭିକେର ସମସ୍ତ ୧୦୭ ବିଧାୟକ ଗଣଇସ୍ତଫା ଦେବେ। ବର୍ତ୍ତମାନ ପରିସ୍ଥିତିରେ ତାମିଲନାଡୁ ରାଜନୀତି ଏକ ରୋଚକ ମୋଡ଼ ନେଇଛି।

ତାମିଲନାଡୁ ରାଜନୀତିରେ ଏବେ ଏକ ବଡ଼ ଧରଣର ସଙ୍କଟ ଦେଖାଦେଇଛି। ୨୦୨୬ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ଅଭିନେତାରୁ ରାଜନେତା ପାଲଟିଥିବା ଥଲପତି ବିଜୟ ଏବଂ ତାଙ୍କ ଦଳ ତାମିଲଗା ଭେତ୍ରି କାଜାଗମ୍ (TVK) ସବୁଠାରୁ ବଡ଼ ଦଳ ଭାବେ ଉଭା ହୋଇଛନ୍ତି। ତେବେ ବହୁମତ ନଥିବାରୁ ସରକାର ଗଠନ ପାଇଁ ଏବେ ମେଣ୍ଟ ରାଜନୀତି ଜୋର ଧରିଛି।

ସଂଖ୍ୟାଗରିଷ୍ଠତା ଠାରୁ ଦୂରରେ ଟିଭିକେ

୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ସରକାର ଗଠନ ପାଇଁ ମ୍ୟାଜିକ୍ ନମ୍ବର ହେଉଛି ୧୧୮। କିନ୍ତୁ ବିଜୟଙ୍କ ଦଳ ଟିଭିକେ (TVK) ଏକାକୀ ୧୦୮ ଟି ଆସନ ଜିତିଛି। କଂଗ୍ରେସ ନିଜର ୫ ଜଣ ବିଧାୟକଙ୍କ ସମର୍ଥନ ଦେବା ପରେ ମଧ୍ୟ ଏହି ସଂଖ୍ୟା ୧୧୩ ରେ ପହଞ୍ଚିଛି। ଅନ୍ୟପକ୍ଷରେ, ଥଲପତି ବିଜୟ ଦୁଇଟି ଆସନରୁ ବିଜୟୀ ହୋଇଥିବାରୁ ତାଙ୍କୁ ଗୋଟିଏ ଆସନ ଛାଡ଼ିବାକୁ ପଡ଼ିବ। ଏହା ଫଳରେ ଗୃହର ମୋଟ ସଦସ୍ୟ ସଂଖ୍ୟା ୨୩୩ କୁ ଖସି ଆସିବ ଏବଂ ବହୁମତ ପାଇଁ ୧୧୭ ଆସନର ଆବଶ୍ୟକତା ପଡ଼ିବ। ଏବେ ସରକାର ଗଠନ କରିବା ପାଇଁ ବିଜୟଙ୍କୁ ଆଉ ୫ ଜଣ ବିଧାୟକଙ୍କ ସମର୍ଥନ ଦରକାର।

କଂଗ୍ରେସର ସମର୍ଥନ ଏବଂ ନୂଆ ସମୀକରଣ

ବହୁମତ ହାସଲ କରିବା ପାଇଁ ରାଜ୍ୟରେ ଏବେ ସମୀକରଣ ବଦଳିବାରେ ଲାଗିଛି। କଂଗ୍ରେସ ତାର ପୁରୁଣା ମେଣ୍ଟ ସାଥୀ ଡିଏମକେ (DMK) ର ହାତ ଛାଡ଼ି ବିଜୟଙ୍କୁ ସମର୍ଥନ ଜଣାଇଛି। ସଂଖ୍ୟାଗରିଷ୍ଠତା ହାସଲ କରିବା ଲକ୍ଷ୍ୟରେ ବିଜୟ ଏବେ ଭିସିକେ (VCK), ବାମପନ୍ଥୀ ଦଳ ଏବଂ ଆଇୟୁଏମଏଲ (IUML) ଭଳି ଦଳଗୁଡ଼ିକ ସହ ଆଲୋଚନା ଚଳାଇଛନ୍ତି, ଯେଉଁମାନେ ବର୍ତ୍ତମାନ ସୁଦ୍ଧା ଡିଏମକେ ମେଣ୍ଟରେ ଅଛନ୍ତି।

ଏଆଇଏଡିଏମକେ ଏବଂ ଡିଏମକେର ଚାଲ୍

ଅନ୍ୟପଟେ ରାଜ୍ୟର ଦୁଇ ପ୍ରମୁଖ ଦଳ ଡିଏମକେ (DMK) ଏବଂ ଏଆଇଏଡିଏମକେ (AIADMK) ମଧ୍ୟ ନିଜର ରଣନୀତି ପ୍ରସ୍ତୁତ କରୁଛନ୍ତି। ରିପୋର୍ଟ ଅନୁଯାୟୀ, ଥଲପତି ବିଜୟଙ୍କୁ କ୍ଷମତାରୁ ଦୂରେଇ ରଖିବା ପାଇଁ ଏହି ଦୁଇ ପାରମ୍ପରିକ ବିରୋଧୀ ଦଳ ଏକାଠି ହେବାର ସମ୍ଭାବନା ସୃଷ୍ଟି ହୋଇଛି। ଏହାରି ଭିତରେ ଏଆଇଏଡିଏମକେ ନିଜର ନବନିର୍ବାଚିତ ବିଧାୟକମାନଙ୍କୁ ପଡ଼ୋଶୀ ରାଜ୍ୟ ପୁଡୁଚେରୀକୁ ସ୍ଥାନାନ୍ତର କରିଦେଇଛି।

ତାମିଲନାଡୁ ରାଜନୀତିରେ ଦେଖାଦେଇଥିବା ଏହି ଅସ୍ଥିରତା ଏବେ ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଛି। ଆଗାମୀ ଦିନରେ କିଏ ସରକାର ଗଢ଼ିବ ଏବଂ କେଉଁ ଦଳ କାହାକୁ ସମର୍ଥନ ଦେବେ, ତାହା ଉପରେ ସମସ୍ତଙ୍କ ନଜର ରହିଛି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନରେ ଖଣ୍ଡିତ ଜନାଦେଶ ଆସିବା ପରେ ରାଜ୍ୟ ରାଜନୀତିରେ ହଟଚମଟ ସୃଷ୍ଟି ହୋଇଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ଦଳ ଟିଭିକେ (TVK) ୧୦୮ଟି ଆସନ ସହ ସବୁଠାରୁ ବଡ଼ ଦଳ ଭାବେ ଉଭା ହୋଇଥିବା ବେଳେ ସରକାର ଗଠନ ପାଇଁ କସରତ ଆରମ୍ଭ କରିଛି। ୨୩୪ ସଦସ୍ୟ ବିଶିଷ୍ଟ ତାମିଲନାଡୁ ବିଧାନସଭାରେ ବହୁମତ ସଂଖ୍ୟା ୧୧୮ ଥିବା ବେଳେ ଟିଭିକେକୁ ଆହୁରି ୧୦ଟି ଆସନର ଆବଶ୍ୟକତା ରହିଛି। ଏଥିପାଇଁ ଦଳ କଂଗ୍ରେସ, ପିଏମକେ (PMK), ବାମଦଳ ଏବଂ ଭିସିକେ (VCK) ଭଳି ଛୋଟ ଦଳଗୁଡ଼ିକର ସମର୍ଥନ ଲୋଡ଼ିଛି। ସରକାର ଗଠନ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ବିଜୟ ରାଜ୍ୟପାଳ ରାଜେନ୍ଦ୍ର ଆର୍ଲେକରଙ୍କୁ ଭେଟିବାକୁ ସମୟ ମାଗିଛନ୍ତି। 

ଦୀର୍ଘଦିନର ମେଣ୍ଟ ସହଯୋଗୀ ଡିଏମକେ (DMK)କୁ ଛାଡ଼ି କଂଗ୍ରେସ ଏବେ ବିଜୟଙ୍କ ଦଳକୁ ସମର୍ଥନ କରିବାକୁ ନିଷ୍ପତ୍ତି ନେଇଛି। କଂଗ୍ରେସ ନେତା କାର୍ତ୍ତି ଚିଦାମ୍ବରମ କହିଛନ୍ତି ଯେ ତାମିଲନାଡୁରେ ଏକ ଧର୍ମନିରପେକ୍ଷ ଏବଂ ସ୍ଥିର ସରକାର ଗଠନ ପାଇଁ ଦଳ ସର୍ବସମ୍ମତି କ୍ରମେ ଟିଭିକେକୁ ସମର୍ଥନ କରିବାକୁ ନିଷ୍ପତ୍ତି ନେଇଛି। ମଙ୍ଗଳବାର ବିଳମ୍ବିତ ରାତିରେ ଅନୁଷ୍ଠିତ ତାମିଲନାଡୁ କଂଗ୍ରେସର ରାଜନୈତିକ ବ୍ୟାପାର କମିଟି (PAC) ବୈଠକରେ ଏହି ନିଷ୍ପତ୍ତି ନିଆଯାଇଥିଲା। ଅନ୍ୟପକ୍ଷରେ, କଂଗ୍ରେସର ଏଭଳି ପଦକ୍ଷେପକୁ ନେଇ ଡିଏମକେ ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଡିଏମକେ ମୁଖପାତ୍ର ସରବଣନ ଅନ୍ନାଦୁରାଇ କଂଗ୍ରେସକୁ 'ବିଶ୍ୱାସଘାତକ' ବୋଲି କହିବା ସହ ଏହା ଏକ ଅଦୂରଦର୍ଶୀ ନିଷ୍ପତ୍ତି ବୋଲି ସମାଲୋଚନା କରିଛନ୍ତି। ସେ କହିଛନ୍ତି ଯେ ଏହା 'ଇଣ୍ଡିଆ' (INDIA) ମେଣ୍ଟ ଭାଗିଦାରୀଙ୍କ ପ୍ରତି ଧୋକା ଏବଂ ଆଗାମୀ ୨୦୨୯ ନିର୍ବାଚନରେ କଂଗ୍ରେସ ଏଥିପାଇଁ ଅନୁତାପ କରିବ।

ଅନ୍ୟପଟେ, ପ୍ରମୁଖ ବିରୋଧୀ ଦଳ ଏଆଇଏଡିଏମକେ (AIADMK) ମଧ୍ୟରେ ଅନ୍ତର୍ଦ୍ୱନ୍ଦ୍ୱ ଦେଖାଦେଇଛି। ଦଳର ଗୋଟିଏ ଗୋଷ୍ଠୀ ଇଡାପ୍ପାଡି ପଲାନିସ୍ୱାମୀଙ୍କ ନେତୃତ୍ୱରେ ଅସନ୍ତୁଷ୍ଟ ଥିବା ବେଳେ ସେମାନେ ବିଜୟଙ୍କୁ ସରକାର ଗଠନରେ ସମର୍ଥନ ଦେବାକୁ ଚାହୁଁଥିବା ଚର୍ଚ୍ଚା ହେଉଛି। ଏସବୁ ମଧ୍ୟରେ ଘୋଡ଼ା ବେପାର ଆଶଙ୍କାକୁ ଏଡ଼ାଇବା ପାଇଁ ଟିଭିକେ ତାର ସମସ୍ତ ୧୦୮ ବିଧାୟକଙ୍କୁ ମାମଲ୍ଲାପୁରମର ଏକ ବିଳାସପୂର୍ଣ୍ଣ ରିସର୍ଟରେ ରଖିଛି। ବିଧାୟକମାନଙ୍କ ସୁରକ୍ଷା ପାଇଁ ରିସର୍ଟ ଚାରିପଟେ କଡ଼ା ପୋଲିସ ପହରା ଲଗାଯାଇଛି। ସରକାର ଗଠନର ସମୀକରଣ ଯାହା ବି ହେଉନା କାହିଁକି, ତାମିଲନାଡୁ ରାଜନୀତିରେ ଏବେ ବିଜୟଙ୍କ ଯୁଗ ଆରମ୍ଭ ହୋଇଛି ବୋଲି ରାଜନୈତିକ ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।

୨୦୨୬ ତାମିଲନାଡୁ ବିଧାନସଭା ନିର୍ବାଚନ ଫଳାଫଳ ରାଜ୍ୟ ରାଜନୀତିରେ ଏକ ନୂଆ ମୋଡ଼ ଆଣିଛି। ଅଭିନେତାରୁ ନେତା ପାଲଟିଥିବା ଥଲାପତି ବିଜୟଙ୍କ ଦଳ ତାମିଲାଗା ଭେତ୍ରି କାଜାଗମ୍ (ଟିଭିକେ) ରାଜ୍ୟର ସବୁଠାରୁ ବଡ଼ ଦଳ ଭାବେ ଉଭା ହୋଇଛି। କିନ୍ତୁ ସରକାର ଗଠନ ପାଇଁ ଆବଶ୍ୟକ ସଂଖ୍ୟାଗରିଷ୍ଠତା ବା ମ୍ୟାଜିକ୍ ନମ୍ବର ଛୁଇଁବାରେ ଏହା ବିଫଳ ହୋଇଛି।

ଆସନ ସମୀକରଣ ଓ ବହୁମତର ଅଭାବ

୨୩୪ ଆସନ ବିଶିଷ୍ଟ ତାମିଲନାଡୁ ବିଧାନସଭାରେ ବହୁମତ ସାବ୍ୟସ୍ତ କରିବା ପାଇଁ ୧୧୮ ଟି ଆସନର ଆବଶ୍ୟକତା ରହିଛି। ମାତ୍ର ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ, ୨୦୨୪ ମସିହାରେ ଗଠିତ ଏହି ନୂଆ ଦଳ ଏକାକୀ ନିର୍ବାଚନ ଲଢ଼ି ଉଲ୍ଲେଖନୀୟ ପ୍ରଦର୍ଶନ ସହ ୧୦୭ ଟି ଆସନ ହାସଲ କରିଛି। ସେହିପରି ଶାସକ ଡିଏମକେ (DMK) ମେଣ୍ଟକୁ ୭୪ଟି ଆସନ ମିଳିଥିବା ବେଳେ ଏନଡିଏ (NDA) ୫୩ଟି ଆସନ ସହ ତୃତୀୟ ସ୍ଥାନରେ ରହିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ମୁଖ୍ୟମନ୍ତ୍ରୀ ଏମ୍ କେ ଷ୍ଟାଲିନ ତାଙ୍କର ପାରମ୍ପରିକ ଆସନ କୋଲାଥୁର ରୁ ପରାସ୍ତ ହୋଇଛନ୍ତି। ଅନ୍ୟପକ୍ଷରେ ବିଜୟ ନିଜେ ଲଢିଥିବା ତିରୁଚିରାପଲ୍ଲୀ (ପୂର୍ବ) ଏବଂ ପେରାମ୍ବୁର ଉଭୟ ଆସନରୁ ବିଜୟୀ ହୋଇଛନ୍ତି।

ଆଗକୁ କଣ ହେବ? (ସମ୍ଭାବ୍ୟ ସ୍ଥିତି)

କୌଣସି ଦଳକୁ ସ୍ପଷ୍ଟ ବହୁମତ ମିଳିନଥିବାରୁ ଏବେ ତାମିଲନାଡୁରେ ସରକାର ଗଠନକୁ ନେଇ ଦ୍ୱନ୍ଦ୍ୱ ଦେଖାଦେଇଛି। ଏହି ପରିପ୍ରେକ୍ଷୀରେ କିଛି ସମ୍ଭାବ୍ୟ ଦିଗ ଉପରେ ଚର୍ଚ୍ଚା ହେଉଛି:

ସରକାର ଗଠନ କରିବା ପାଇଁ ଟିଭିକେକୁ ଆହୁରି ୧୧ ଜଣ ବିଧାୟକଙ୍କ ସମର୍ଥନ ଆବଶ୍ୟକ। ତେଣୁ ଦଳ ଅନ୍ୟ ଦଳ କିମ୍ବା ନିର୍ବାଚିତ ପ୍ରତିନିଧିଙ୍କ ସହ ମିଶି ମେଣ୍ଟ ସରକାର ଗଠନ କରିବାର ପ୍ରବଳ ସମ୍ଭାବନା ରହିଛି।

କ୍ଷମତାକୁ ଆସିବା ପାଇଁ ଟିଭିକେକୁ କୌଣସି ପ୍ରମୁଖ ବିରୋଧୀ ଦଳ ସର୍ତ୍ତମୂଳକ ଭାବେ ବାହାରୁ ସମର୍ଥନ ଦେଇପାରନ୍ତି।

ଯଦି ବିଜୟ ସରକାର ଗଠନ କରିବାରେ ସଫଳ ହୁଅନ୍ତି, ତେବେ ୧୯୬୭ ମସିହା ପରେ ସେ ତାମିଲନାଡୁର ପ୍ରଥମ ଅଣ-ଡ୍ରାଭିଡ଼ିଆନ୍ (ଅଣ-ଡିଏମକେ ଓ ଅଣ-ଏଆଇଏଡିଏମକେ) ମୁଖ୍ୟମନ୍ତ୍ରୀ ହେବାର ଗୌରବ ଅର୍ଜନ କରିବେ। ବର୍ତ୍ତମାନ ସମସ୍ତଙ୍କ ନଜର ବିଜୟଙ୍କ ପରବର୍ତ୍ତୀ ପଦକ୍ଷେପ ଏବଂ ତାମିଲନାଡୁର ରାଜନୈତିକ ଭବିଷ୍ୟତ ଉପରେ ରହିଛି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନରେ ବଡ଼ ଧରଣର ବିପର୍ଯ୍ୟୟ ଦେଖିବାକୁ ମିଳିଛି। ରାଜ୍ୟରେ ଏପରି ସରକାର ବିରୋଧୀ ହାୱା ବହିଛି ଯେ ମୁଖ୍ୟମନ୍ତ୍ରୀ ଏମ୍.କେ ଷ୍ଟାଲିନ୍ ନିଜ ଆସନ ମଧ୍ୟ ବଞ୍ଚାଇ ପାରିନାହାଁନ୍ତି। କୋଲାଥୁର ବିଧାନସଭା ଆସନରୁ ମୁଖ୍ୟମନ୍ତ୍ରୀ ଷ୍ଟାଲିନ୍ ପରାଜୟର ସାମ୍ନା କରିଛନ୍ତି।

ତାମିଲନାଡୁ ରାଜନୀତିରେ ଅଭିନେତାରୁ ନେତା ପାଲଟିଥିବା ଥାଲାପତି ବିଜୟଙ୍କ ପାର୍ଟି ତାମିଲାଗା ଭେଟ୍ରି କାଜାଗମ୍ (TVK) ଚମତ୍କାର ପ୍ରଦର୍ଶନ କରିଛି। ମୁଖ୍ୟମନ୍ତ୍ରୀ ଷ୍ଟାଲିନ୍ ଙ୍କୁ ବିଜୟଙ୍କ ଦଳର ପ୍ରାର୍ଥୀ ପରାସ୍ତ କରିଛନ୍ତି। ପ୍ରାରମ୍ଭିକ ଧାରା ଅନୁଯାୟୀ, ବିଜୟଙ୍କ ଦଳ ପ୍ରାୟ ୧୦୮ଟି ଆସନରେ ଆଗୁଆ ରହିଛି। ଅନ୍ୟପକ୍ଷରେ ଡିଏମକେ ନେତୃତ୍ୱାଧୀନ ମେଣ୍ଟ ୭୧ଟି ଆସନରେ ଆଗୁଆ ଥିବା ବେଳେ ଏଆଇଏଡିଏମକେ ନେତୃତ୍ୱାଧୀନ ଏନଡିଏ ୫୪ଟି ଆସନ ସହ ତୃତୀୟ ସ୍ଥାନରେ ରହିଛି।

ନିର୍ବାଚନ ଆୟୋଗଙ୍କ ୱେବସାଇଟ୍ ଅନୁଯାୟୀ, ବର୍ତ୍ତମାନ ସୁଦ୍ଧା ୫ଟି ଆସନର ଫଳାଫଳ ଘୋଷଣା କରାଯାଇଛି। ଏଥିମଧ୍ୟରୁ ୩ଟି ଆସନରେ ଡିଏମକେ ପ୍ରାର୍ଥୀ ବିଜୟୀ ହୋଇଥିବା ବେଳେ କଂଗ୍ରେସ ଏବଂ ଟିଭିକେ ଗୋଟିଏ ଲେଖାଏଁ ଆସନରେ ଜିତିଛନ୍ତି।

ତାମିଲନାଡୁ: ତାମିଲନାଡୁ ବିଧାନସଭା ନିର୍ବାଚନ ୨୦୨୬ର ଭୋଟ୍ ଗଣତି ଜାରି ରହିଛି । ପ୍ରାରମ୍ଭିକ ଟ୍ରେଣ୍ଡରୁ ରାଜ୍ୟରେ ଏକ ବଡ଼ ରାଜନୈତିକ ପରିବର୍ତ୍ତନର ସଙ୍କେତ ମିଳିଛି। ଅଭିନେତାରୁ ରାଜନେତା ପାଲଟିଥିବା ବିଜୟଙ୍କ ପାର୍ଟି TVK ବହୁମତ ଆଡ଼କୁ ଅଗ୍ରସର ହେଉଥିବା ଦେଖାଯାଇଛି। ତାଙ୍କ ଦଳ 'ତାମିଲଗା ଭେଟ୍ରି କାଝାଗମ' (TVK) ରାଜ୍ୟର ପାରମ୍ପରିକ ରାଜନୈତିକ ସମୀକରଣକୁ ସମ୍ପୂର୍ଣ୍ଣ ଓଲଟପାଲଟ କରିଦେଇଛି । ବିଜୟ ଏକାକି ଲଢ଼ି ସବୁ ବଡ଼ ମେଣ୍ଟ ପାଇଁ ଟେନସନ୍ ପାଲଟିଛନ୍ତି । ବିଜୟଙ୍କ ଲୋକପ୍ରିୟତା ଏବଂ ତାଙ୍କ ଦଳ ପ୍ରତି ଯୁବପିଢ଼ିଙ୍କ ଆକର୍ଷଣ ଅନେକ ସ୍ଥାନରେ ସ୍ଥାପିତ ଦଳଗୁଡ଼ିକୁ ପଛରେ ପକାଇ ଦେଇଛି । ଯାହା ଆଜିର ଫଳାଫଳରୁ ସ୍ପଷ୍ଟ ଜଣାପଡୁଛି । 

ତାମିଲନାଡୁର ସମୁଦାୟ ୨୩୪ ବିଧାନସଭା ଆସନ ପାଇଁ ଗଣତି ଜାରି ରହିଛି। ସରକାର ଗଠନ ପାଇଁ ମ୍ୟାଜିକ୍ ନମ୍ବର ବା ବହୁମତ ସଂଖ୍ୟା ହେଉଛି ୧୧୮। ନିର୍ବାଚନ କମିଶନ (ECI) ଙ୍କ ତଥ୍ୟ ଅନୁଯାୟୀ, ପ୍ରାରମ୍ଭିକ ଟ୍ରେଣ୍ଡରେ ଟିଭିକେ ସର୍ବବୃହତ ଦଳ ଭାବରେ ଉଭା ହୋଇଛି ଏବଂ ଶତାଧିକ ଆସନରେ ଆଗୁଆ ରହିଛି। ସର୍ବଶେଷ ରିପୋର୍ଟ ଅନୁଯାୟୀ ଟିଭିକେ ୧୦୮ଟି ଆସନରେ ଆଗୁଆ ଥିବା ବେଳେ ଏଆଇଏଡିଏମକେ (AIADMK) ୬୯ଟି ଆସନ ରେ ଆଗୁଆ ରହିଛି। ସେହିପରି ବର୍ତ୍ତମାନର ମୁଖ୍ୟମନ୍ତ୍ରୀ ତଥା ଡିଏମକେ ମୁଖ୍ୟ ଏମକେ ଷ୍ଟାଲିନଙ୍କ DMK ୫୭ଟି ଆସନରେ ଆଗୁଆ ରହିଛି ।

ଚଳିତ ବର୍ଷ ଏପ୍ରିଲ ୨୩ ତାରିଖରେ ତାମିଲନାଡୁରେ ଏକକ ପର୍ଯ୍ୟାୟରେ ମତଦାନ ହୋଇଥିଲା। ଏଥର ରାଜ୍ୟରେ ରେକର୍ଡ ୮୪.୬୯ ପ୍ରତିଶତ ମତଦାନ ହୋଇଥିଲା, ଯାହାକି ପୂର୍ବର ସର୍ବାଧିକ ରେକର୍ଡ ୭୮.୩୯ ପ୍ରତିଶତ କୁ ଅତିକ୍ରମ କରିଥିଲା। ଏଥର ନିର୍ବାଚନରେ ମୁଖ୍ୟତଃ ଏନଡିଏ (NDA) ଏବଂ ଇଣ୍ଡିଆ ମେଣ୍ଟ (INDIA bloc) ମଧ୍ୟରେ କଡ଼ା ଟକ୍କର ହେବ ବୋଲି ଆଶା କରାଯାଉଥିଲା। କିନ୍ତୁ ବିଜୟଙ୍କ ଏଣ୍ଟ୍ରି ଏହାକୁ ଏକ ରୋମାଞ୍ଚକର ତ୍ରିମୁଖୀ ଲଢ଼େଇରେ ପରିଣତ କରିଦେଇଛି। ଏହି ନିର୍ବାଚନରେ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ୍, ଉପମୁଖ୍ୟମନ୍ତ୍ରୀ ଉଦୟନିଧି ଷ୍ଟାଲିନ୍, ବିରୋଧୀ ଦଳ ନେତା ଏଡାପ୍ପାଡି କେ. ପଲାନିସ୍ୱାମୀ ଏବଂ ବିଜୟ ଙ୍କ ଭଳି ହେଭିୱେଟ୍ ନେତାଙ୍କ ଭାଗ୍ୟ ପରୀକ୍ଷା ହେଉଛି।

ତାମିଲନାଡୁ ବିଧାନସଭା ନିର୍ବାଚନ ୨୦୨୬ର ପ୍ରାରମ୍ଭିକ ଧାରା ସାମ୍ନାକୁ ଆସିବା ପରେ ସତ୍ତାଧାରୀ ଦ୍ରାବିଡ଼ ମୁନ୍ନେତ୍ର କାଝାଗମ (ଡିଏମକେ)କୁ ଶକ୍ତ ଝଟକା ଲାଗିଛି। ଲୋକପ୍ରିୟ ଅଭିନେତା ତଥା ରାଜନେତା ବିଜୟଙ୍କ ନୂତନ ଦଳ ତାମିଲଗା ଭେତ୍ରି କାଝାଗମ (ଟିଭିକେ) ରାଜ୍ୟରେ ଏକ ବଡ଼ ଶକ୍ତି ଭାବରେ ଉଭା ହୋଇଛି ଏବଂ ଶତାଧିକ ଆସନରେ ଆଗୁଆ ରହିଛି। ଅନ୍ୟପକ୍ଷରେ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ ଏବଂ ତାଙ୍କ ପୁଅ ତଥା ଉପମୁଖ୍ୟମନ୍ତ୍ରୀ ଉଦୟନିଧି ଷ୍ଟାଲିନ ନିଜ ନିଜ ଆସନରେ ପଛୁଆ ଥିବା ଜଣାପଡିଛି।

ଭୁଲୁଣ୍ଠିତ ହେଲା ଡିଏମକେର ଅହଂକାର

ନିର୍ବାଚନ ଫଳାଫଳର ପ୍ରାରମ୍ଭିକ ଧାରାରେ ଡିଏମକେ ତୃତୀୟ ସ୍ଥାନକୁ ଖସି ଆସିଥିବା ଦେଖିବାକୁ ମିଳିଛି। ଏହି ଅପ୍ରତ୍ୟାଶିତ ବିପର୍ଯ୍ୟୟ ପରେ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି ଯେ, ଷ୍ଟାଲିନ ସରକାରଙ୍କ ଅହଂକାର ଏବଂ କ୍ରମାଗତ ବିବାଦୀୟ ବୟାନବାଜି ସେମାନଙ୍କ ପତନର ମୁଖ୍ୟ କାରଣ ପାଲଟିଛି। ବିଶେଷକରି ଜାତୀୟ ଶିକ୍ଷା ନୀତି (ଏନଇପି) ଏବଂ ହିନ୍ଦୀ ଭାଷାକୁ ନେଇ ଦଳର ତୀବ୍ର ବିରୋଧ ରାଜ୍ୟର ଯୁବବର୍ଗଙ୍କୁ ପ୍ରଭାବିତ କରିବାରେ ବିଫଳ ହୋଇଥିବା ମନେ କରାଯାଉଛି।

ସନାତନ ଧର୍ମକୁ ବିରୋଧ ପଡିଲା ମହଙ୍ଗା

ରାଜନୈତିକ ବିଶେଷଜ୍ଞଙ୍କ ମତରେ, ଡିଏମକେର ପରାଜୟ ପଛରେ ସବୁଠାରୁ ବଡ଼ କାରଣ ହେଉଛି ସେମାନଙ୍କର କ୍ରମାଗତ ହିନ୍ଦୁ ବିରୋଧୀ ଆଭିମୁଖ୍ୟ। ସେପ୍ଟେମ୍ବର ୨୦୨୩ରେ ଉଦୟନିଧି ଷ୍ଟାଲିନ ସନାତନ ଧର୍ମକୁ ଡେଙ୍ଗୁ, ମ୍ୟାଲେରିଆ ଏବଂ କରୋନା ଭଳି ରୋଗ ସହ ତୁଳନା କରି ଏହାକୁ ସମୂଳେ ନାଶ କରିବାକୁ ଆହ୍ୱାନ ଦେଇଥିଲେ। ଏହି ବୟାନ କେବଳ ରାଜ୍ୟ ନୁହେଁ, ବରଂ ସମଗ୍ର ଦେଶରେ ତୀବ୍ର ପ୍ରତିକ୍ରିୟା ସୃଷ୍ଟି କରିଥିଲା। ହିନ୍ଦୁ ଆସ୍ଥା ଉପରେ ଏଭଳି ପ୍ରହାରକୁ ତାମିଲନାଡୁର ଜନସାଧାରଣ ଗ୍ରହଣ କରିପାରିନାହାଁନ୍ତି ବୋଲି ବର୍ତ୍ତମାନର ଭୋଟ୍ ଧାରାରୁ ସ୍ପଷ୍ଟ ହେଉଛି।

ଥଲାପତି ବିଜୟଙ୍କ ଦଳର ଚମତ୍କାର ପ୍ରଦର୍ଶନ

ଡିଏମକେର ହିନ୍ଦୀ ଏବଂ ହିନ୍ଦୁ ବିରୋଧୀ ରାଜନୀତି ବିରୋଧରେ ଲୋକଙ୍କ ଅସନ୍ତୋଷର ସିଧାସଳଖ ଫାଇଦା ଅଭିନେତା ବିଜୟଙ୍କ ଦଳ ଟିଭିକେକୁ ମିଳିଥିବା ପରିଲକ୍ଷିତ ହେଉଛି। ବିଭିନ୍ନ ଗୁରୁତ୍ୱପୂର୍ଣ୍ଣ ଆସନରେ ଟିଭିକେ ପ୍ରାର୍ଥୀମାନେ ବ୍ୟାପକ ଭୋଟ୍ ବ୍ୟବଧାନରେ ଆଗେଇ ଚାଲିଛନ୍ତି। ଯଦି ଏହି ଧାରା ଅବ୍ୟାହତ ରହେ, ତେବେ ତାମିଲନାଡୁ ରାଜନୀତିରେ ଏହା ଏକ ବଡ଼ ପରିବର୍ତ୍ତନର ସୂତ୍ରପାତ କରିବ ଏବଂ ପାରମ୍ପରିକ ଦ୍ରାବିଡ଼ ରାଜନୀତିର ଦିଗକୁ ସମ୍ପୂର୍ଣ୍ଣ ବଦଳାଇ ଦେବ ବୋଲି ବିଶ୍ଳେଷକମାନେ ମତବ୍ୟକ୍ତ କରିଛନ୍ତି।

ତାମିଲନାଡୁ ବିଧାନସଭା ନିର୍ବାଚନ ୨୦୨୬ର ଫଳାଫଳ ଆଜି ପ୍ରକାଶ ପାଉଛି। ଏହି ନିର୍ବାଚନରେ ସବୁଠାରୁ ବଡ଼ ଚର୍ଚ୍ଚାର ବିଷୟ ପାଲଟିଛନ୍ତି ସାଉଥ୍ ସୁପରଷ୍ଟାର ଥଲାପତି ବିଜୟ। ତାଙ୍କ ନବଗଠିତ ରାଜନୈତିକ ଦଳ ତାମିଲଗା ଭେଟ୍ରି କାଜାଗମ୍ (TVK) ରାଜ୍ୟର ପାରମ୍ପରିକ ରାଜନୀତିରେ ଏକ ବଡ଼ ପରିବର୍ତ୍ତନ ଆଣିବାକୁ ଯାଉଥିବା ପ୍ରାରମ୍ଭିକ ଟ୍ରେଣ୍ଡରୁ ସ୍ପଷ୍ଟ ହୋଇଛି। ଗତ ୫୦ ବର୍ଷ ଧରି ତାମିଲନାଡୁ ରାଜନୀତିରେ ରାଜ୍ କରୁଥିବା ଡିଏମକେ (DMK) ଏବଂ ଏଆଇଏଡିଏମକେ (AIADMK) ପରି ଦୁଇ ପ୍ରମୁଖ ଦଳକୁ କଡ଼ା ଟକ୍କର ଦେଉଛି ବିଜୟଙ୍କ ଦଳ।

ରଜନୀକାନ୍ତ ଓ କମଲ ହାସନଙ୍କୁ ପଛରେ ପକାଇଲେ

ତାମିଲନାଡୁରେ ସିନେମା ଏବଂ ରାଜନୀତିର ସମ୍ପର୍କ ବହୁ ପୁରୁଣା। କିନ୍ତୁ ବିଗତ ଦିନରେ ରଜନୀକାନ୍ତ ଏବଂ କମଲ ହାସନଙ୍କ ଭଳି ବଡ଼ ତାରକା ରାଜନୀତିରେ ପ୍ରବେଶ କରିଥିଲେ ମଧ୍ୟ ବିଶେଷ ସଫଳତା ପାଇପାରି ନଥିଲେ। ମାତ୍ର ୫୧ ବର୍ଷୀୟ ଥଲାପତି ବିଜୟ ଏହି ଧାରାକୁ ବଦଳାଇ ଦେଇଛନ୍ତି। ବକ୍ସ ଅଫିସରେ ନିଜର ଯାଦୁ ଦେଖାଇବା ପରେ ଏବେ ଭୋଟ୍ ବାକ୍ସରେ ମଧ୍ୟ ସେ ନିଜର ପ୍ରଭାବ ବିସ୍ତାର କରିଛନ୍ତି। ସେ କେବଳ ଜଣେ ଫିଲ୍ମ ଷ୍ଟାର୍ ନୁହଁନ୍ତି, ବରଂ ଜଣେ ପ୍ରକୃତ ଜନନେତା ଭାବେ ଉଭା ହୋଇଛନ୍ତି।

ଦୁଇଟି ଆସନରୁ ଆଗୁଆ ଥଲାପତି

ନିର୍ବାଚନ ଆୟୋଗଙ୍କ ସଦ୍ୟତମ ତଥ୍ୟ ଅନୁଯାୟୀ, ବିଜୟ ନିଜେ ପ୍ରତିଦ୍ୱନ୍ଦ୍ୱିତା କରୁଥିବା ଦୁଇଟି ଯାକ ଆସନ— ପେରମ୍ବୁର୍ ଏବଂ ତ୍ରିଚି ଇଷ୍ଟରୁ ଆଗୁଆ ରହିଛନ୍ତି। ବିଶେଷ କରି ଡିଏମକେର ଗଡ଼ କୁହାଯାଉଥିବା ପେରମ୍ବୁର୍ ଏବଂ ଶ୍ରମିକ ବର୍ଗ ବହୁଳ ତ୍ରିଚିରେ ବିଜୟଙ୍କ ଆଗୁଆ ରହିବା ଏକ ବଡ଼ ରାଜନୈତିକ ସଫଳତା ବୋଲି ବିବେଚନା କରାଯାଉଛି। ତାଙ୍କ ଦଳ TVK ସମଗ୍ର ରାଜ୍ୟରେ ଏକାଧିକ ଆସନରେ ଅଗ୍ରଣୀ ରହିଛି, ଯାହା ଆଗାମୀ ସରକାର ଗଠନରେ ଏକ ନିର୍ଣ୍ଣାୟକ ଭୂମିକା ଗ୍ରହଣ କରିପାରେ।

ଯୁବ ଏବଂ ମହିଳା ଭୋଟରଙ୍କ ବିପୁଳ ସମର୍ଥନ

ବିଜୟଙ୍କ ସଫଳତାର ମୂଳ କାରଣ ହେଉଛି ରାଜ୍ୟର ଯୁବ ଏବଂ ମହିଳା ଭୋଟର। ନିର୍ବାଚନ ପ୍ରଚାର ସମୟରେ ବିଜୟ ବେକାର ଯୁବକମାନଙ୍କୁ ପ୍ରତି ମାସରେ ୪,୦୦୦ ଟଙ୍କା ଏବଂ ଡିପ୍ଲୋମାଧାରୀଙ୍କୁ ୨,୫୦୦ ଟଙ୍କାର ଆର୍ଥିକ ସହାୟତା ଦେବାକୁ ପ୍ରତିଶ୍ରୁତି ଦେଇଥିଲେ। ଏହା ସହିତ ନିଜକୁ ଏକ ବିକଳ୍ପ ଭାବେ ଉପସ୍ଥାପନ କରି ସେ ଭୋଟରଙ୍କ ହୃଦୟ ଜିଣିବାରେ ସଫଳ ହୋଇଛନ୍ତି।

ନୂଆଦିଲ୍ଲୀ: ତାମିଲନାଡୁ ଏବଂ ପଶ୍ଚିମବଙ୍ଗର ପ୍ରଥମ ପର୍ଯ୍ୟାୟ ବିଧାନସଭା ନିର୍ବାଚନ ପାଇଁ ମତଦାନ ପ୍ରକ୍ରିୟା ଜାରି ରହିଛି। ତେବେ ପଶ୍ଚିମବଙ୍ଗରେ ମତଦାନ ବେଳେ କିଛି ସ୍ଥାନରେ ହିଂସା ଏବଂ ଇଭିଏମ୍ (EVM) ଖରାପ ହେବା ଭଳି ଘଟଣା ସାମ୍ନାକୁ ଆସିଛି। ମୋଥାବାଡ଼ିର ଏକ ବୁଥରେ ଇଭିଏମ୍ ଅଚଳ ହେବା କାରଣରୁ ମତଦାନ କିଛି ସମୟ ପାଇଁ ବାଧାପ୍ରାପ୍ତ ହୋଇଥିଲା।

ପଶ୍ଚିମବଙ୍ଗରେ ମତଦାନ ବେଳେ ଏକାଧିକ ହିଂସାକାଣ୍ଡ ଦେଖିବାକୁ ମିଳିଛି। ଶୀତଲକୁଚିଠାରେ ଜଣେ ବିଜେପି କିଷାନ ମୋର୍ଚ୍ଚା ନେତା ଆକ୍ରମଣର ଶିକାର ହୋଇ ଗୁରୁତର ଆହତ ହୋଇଛନ୍ତି। ସେହିପରି ନଓଦାରେ ଟିଏମସି (TMC) ପ୍ରାର୍ଥୀ ସାହିନା ମୁମତାଜ ଅଭିଯୋଗ କରିଛନ୍ତି ଯେ ତାଙ୍କ ଉପରେ ଆମ ଜନତା ଉନ୍ନୟନ ପାର୍ଟିର ସମର୍ଥକମାନେ ଆକ୍ରମଣ କରିଛନ୍ତି, ଯଦିଓ ଏହି ଅଭିଯୋଗକୁ ଦଳର ନେତା ହୁମାୟୁନ କବୀର ଖଣ୍ଡନ କରିଛନ୍ତି। ନିର୍ବାଚନ ପୂର୍ବରୁ ବୁଧବାର ରାତିରେ ମଧ୍ୟ ସିପିଆଇ(ଏମ୍) ଏବଂ ଟିଏମସି ସମର୍ଥକଙ୍କ ମଧ୍ୟରେ ସଂଘର୍ଷ ଘଟି ୪ ଜଣ ବ୍ୟକ୍ତି ଆହତ ହୋଇଥିଲେ।

ପଶ୍ଚିମବଙ୍ଗରେ ମୁଖ୍ୟ ଲଢ଼େଇ କ୍ଷମତାସୀନ ତୃଣମୂଳ କଂଗ୍ରେସ (TMC) ଏବଂ ମୁଖ୍ୟ ବିରୋଧୀ ଦଳ ଭାରତୀୟ ଜନତା ପାର୍ଟି (BJP) ମଧ୍ୟରେ ହେଉଛି। ଏହା ବ୍ୟତୀତ ବାମଫ୍ରଣ୍ଟ (ପ୍ରାୟ ୨୨୪ଟି ଆସନରେ ଲଢୁଛି) ଏବଂ ଜାତୀୟ କଂଗ୍ରେସ (INC) ମଧ୍ୟ ନିର୍ବାଚନ ମୈଦାନରେ ଅଛନ୍ତି। ପଶ୍ଚିମବଙ୍ଗରେ ଦ୍ୱିତୀୟ ପର୍ଯ୍ୟାୟ ମତଦାନ ଏପ୍ରିଲ ୨୯ ତାରିଖରେ ଅବଶିଷ୍ଟ ୧୪୨ଟି ଆସନ ପାଇଁ ଅନୁଷ୍ଠିତ ହେବ।

ତାମିଲନାଡୁରେ ମୁଖ୍ୟ ପ୍ରତିଦ୍ୱନ୍ଦ୍ୱିତା ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନଙ୍କ ନେତୃତ୍ୱାଧୀନ ଡିଏମକେ (DMK) ମେଣ୍ଟ ଏବଂ ଏଆଇଏଡିଏମକେ (AIADMK) ନେତୃତ୍ୱାଧୀନ ଏନଡିଏ (NDA) ମଧ୍ୟରେ ହେଉଛି। ଏନଡିଏ ମେଣ୍ଟରେ ଥିବା ଏଆଇଏଡିଏମକେ ୧୬୯ଟି ଆସନରେ ଲଢୁଥିବା ବେଳେ ବିଜେପି ୨୭ଟି ଏବଂ ପିଏମକେ ୧୮ଟି ଆସନରେ ପ୍ରାର୍ଥୀ ଦେଇଛନ୍ତି। ଅନ୍ୟପକ୍ଷରେ ଅଭିନେତା ବିଜୟଙ୍କ ନୂଆ ଦଳ ତାମିଲଗା ଭେଟ୍ରି କାଜଗମ୍ (TVK) ସମସ୍ତ ୨୩୪ଟି ଆସନରେ ଏକାକୀ ନିର୍ବାଚନ ଲଢୁଛି। ନିର୍ବାଚନରେ ଏହି ନୂଆ ଦଳ ଏକ ବଡ଼ ଭୂମିକା ଗ୍ରହଣ କରିପାରେ ବୋଲି ଆଶା କରାଯାଉଛି। ଉଭୟ ରାଜ୍ୟର ନିର୍ବାଚନ ଫଳାଫଳ ଆସନ୍ତା ମେ' ୪ ତାରିଖରେ ଘୋଷଣା କରାଯିବ।

ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ (MK Stalin) ବୁଧବାର ଦିନ କେନ୍ଦ୍ର ସରକାରଙ୍କ ପ୍ରସ୍ତାବିତ ସୀମା ନିର୍ଦ୍ଧାରଣ ବା ଡିଲିମିଟେସନ (Delimitation) ପ୍ରକ୍ରିୟାକୁ ତୀବ୍ର ବିରୋଧ କରିଛନ୍ତି। ନିଜ ପାର୍ଟି ଡିଏମକେ (DMK) ର ସାଂସଦ ଏବଂ ଜିଲ୍ଲାସ୍ତରୀୟ ନେତାମାନଙ୍କ ସହିତ ଏକ ଜରୁରୀକାଳୀନ ବୈଠକ କରିବା ପରେ ସେ କେନ୍ଦ୍ର ସରକାରଙ୍କୁ କଡ଼ା ଚେତାବନୀ ଦେଇଛନ୍ତି। "ଜଣେ ଆତ୍ମସମ୍ମାନୀ ତାମିଲ ଭାବେ ମୁଁ କେନ୍ଦ୍ର ସରକାରଙ୍କୁ ଚେତାବନୀ ଦେଉଛି," ବୋଲି ସେ ସ୍ପଷ୍ଟ ଭାବରେ କହିଛନ୍ତି।

କଳା ପତାକା ପ୍ରଦର୍ଶନ ପାଇଁ ଆହ୍ୱାନ

ଏହି ସୀମା ନିର୍ଦ୍ଧାରଣ ବିଲ୍‌କୁ 'ଏକ ବିରାଟ ଐତିହାସିକ ଅନ୍ୟାୟ' ବୋଲି ଅଭିହିତ କରି ଷ୍ଟାଲିନ ସମଗ୍ର ରାଜ୍ୟରେ ଏକ ବ୍ୟାପକ ଆନ୍ଦୋଳନର ଡାକରା ଦେଇଛନ୍ତି। ଗୁରୁବାର ଅର୍ଥାତ ଏପ୍ରିଲ ୧୬ ତାରିଖରେ ତାମିଲନାଡୁର କୋଣ ଅନୁକୋଣରେ ଥିବା ଘର ଓ ସାର୍ବଜନୀନ ସ୍ଥାନମାନଙ୍କରେ କଳା ପତାକା (Black Flag) ଉତ୍ତୋଳନ କରି ପ୍ରତିବାଦ ଜଣାଇବାକୁ ସେ ଆହ୍ୱାନ ଦେଇଛନ୍ତି। ଏହି ଜରୁରୀକାଳୀନ ବୈଠକ ଭିଡିଓ କନଫରେନ୍ସିଂ ମାଧ୍ୟମରେ ଧର୍ମପୁରୀ (Dharmapuri) ରୁ ପରିଚାଳିତ ହୋଇଥିଲା।

ଦକ୍ଷିଣ ରାଜ୍ୟଗୁଡ଼ିକ ପ୍ରତି ଅନ୍ୟାୟର ଅଭିଯୋଗ

ସଂସଦର ସ୍ୱତନ୍ତ୍ର ଅଧିବେଶନରେ ଲୋକସଭା ଆସନ ସଂଖ୍ୟା ବର୍ତ୍ତମାନର ୫୪୩ ରୁ ୮୫୦ କୁ ବୃଦ୍ଧି କରିବା ପାଇଁ କେନ୍ଦ୍ର ସରକାର ଏକ ବିଲ୍ ଆଣିବାକୁ ଯାଉଛନ୍ତି ବୋଲି ଚର୍ଚ୍ଚା ହେଉଛି। ଏହାଦ୍ୱାରା ଦକ୍ଷିଣ ଭାରତୀୟ ରାଜ୍ୟଗୁଡ଼ିକର ରାଜନୈତିକ ପ୍ରଭାବ କମିଯିବ ବୋଲି ଷ୍ଟାଲିନ ଆଶଙ୍କା ପ୍ରକାଶ କରିଛନ୍ତି। ସେ ପ୍ରଶ୍ନ କରିଛନ୍ତି ଯେ, "ଭାରତର ପ୍ରଗତି ପାଇଁ ଦକ୍ଷିଣ ରାଜ୍ୟଗୁଡ଼ିକ ଯେଉଁ ଅବଦାନ ଦେଇଛନ୍ତି, ତାହା କ'ଣ ସେମାନଙ୍କ ପାଇଁ ଏକ ଅପରାଧ? ଏହା କ'ଣ ତାର ଶାସ୍ତି"?

ବିଜେପି (BJP) ନେତୃତ୍ୱାଧୀନ କେନ୍ଦ୍ର ସରକାର ନିଆଁ ସହ ଖେଳୁଛନ୍ତି ବୋଲି ଅଭିଯୋଗ କରି ଡିଏମକେ ମୁଖ୍ୟ ଆହୁରି ମଧ୍ୟ କହିଛନ୍ତି ଯେ, ଯଦି କେନ୍ଦ୍ର ସରକାର ଏହି ବିଲ୍ ପ୍ରତ୍ୟାହାର ନକରନ୍ତି, ତେବେ ଏହାର ଭୟଙ୍କର ପରିଣାମ ଭୋଗିବାକୁ ପଡ଼ିବ ଏବଂ ଏଥିପାଇଁ ବହୁତ ବଡ଼ ମୂଲ୍ୟ ଦେବାକୁ ପଡ଼ିବ। ତାମିଲନାଡୁ ଏବଂ ପଶ୍ଚିମବଙ୍ଗ ନିର୍ବାଚନ ମଝିରେ କେନ୍ଦ୍ର ଏହି ସ୍ୱତନ୍ତ୍ର ଅଧିବେଶନ ଡାକିବା ଏକ ବଳପୂର୍ବକ ପ୍ରୟାସ ବୋଲି ମଧ୍ୟ ସେ ସମାଲୋଚନା କରିଛନ୍ତି।

ଗଣତନ୍ତ୍ର ଓ ରାଜ୍ୟ ଅଧିକାରର ସୁରକ୍ଷା ପାଇଁ ଏକଜୁଟ୍ ହେବାକୁ ନିବେଦନ

ଏହି ପ୍ରସଙ୍ଗରେ କେବଳ ତାମିଲନାଡୁ ନୁହେଁ, ବରଂ ଅନ୍ୟ ରାଜ୍ୟଗୁଡ଼ିକର ସାଂସଦମାନଙ୍କ ସହିତ ଯୋଗାଯୋଗ କରି ଏକ ମିଳିତ ରଣନୀତି ପ୍ରସ୍ତୁତ କରିବାକୁ ଦଳ ପ୍ରୟାସ କରୁଛି। "ଏହା କୌଣସି ଦଳ ବା ବ୍ୟକ୍ତିବିଶେଷର କଥା ନୁହେଁ। ଏହା ଆମ ଲୋକଙ୍କ ଅଧିକାର ଓ ଗଣତନ୍ତ୍ରକୁ ରକ୍ଷା କରିବାର ସମୟ," ବୋଲି ଏମକେ ଷ୍ଟାଲିନ ସମସ୍ତ ବିରୋଧୀ ଦଳଗୁଡ଼ିକୁ ଏକାଠି ହେବାକୁ ଆହ୍ୱାନ ଦେଇଛନ୍ତି।