ଲୋକପ୍ରିୟ ୟୁଟ୍ୟୁବ୍ ଶୋ' 'ଇଣ୍ଡିଆଜ୍ ଗଟ୍ ଲାଟେଣ୍ଟ' (India's Got Latent) ରେ ଭିନ୍ନକ୍ଷମଙ୍କ ପ୍ରତି ଅସମ୍ବେଦନଶୀଳ ମନ୍ତବ୍ୟ ଦେବା ମାମଲାରେ କମେଡିଆନ୍ ସମୟ ରାଇନା (Samay Raina) ଏବଂ ଅନ୍ୟ ଚାରିଜଣଙ୍କୁ ସୁପ୍ରିମକୋର୍ଟଙ୍କ ପକ୍ଷରୁ ବଡ଼ ଆଶ୍ୱସ୍ତି ମିଳିଛି। ଶୁକ୍ରବାର ଦିନ ସର୍ବୋଚ୍ଚ ନ୍ୟାୟାଳୟ ଏହି ମାମଲାରେ ସେମାନଙ୍କ ବିରୋଧରେ ବିଭିନ୍ନ ସ୍ଥାନରେ ରୁଜୁ ହୋଇଥିବା ସମସ୍ତ ଏଫଆଇଆର (FIR) କୁ ଖାରଜ କରିଦେଇଛନ୍ତି।

ସୁପ୍ରିମକୋର୍ଟଙ୍କ ପ୍ରଶଂସା

ପ୍ରଧାନ ବିଚାରପତି (CJI) ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚି ଏବଂ ବିଚାରପତି ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟ ଶୁଣାଇଛନ୍ତି। ପୂର୍ବରୁ ଅଦାଲତ ଦେଇଥିବା ନିର୍ଦ୍ଦେଶକୁ ପାଳନ କରି ଭିନ୍ନକ୍ଷମଙ୍କ ପାଇଁ ସଚେତନତା କାର୍ଯ୍ୟକ୍ରମ ଆୟୋଜନ କରିଥିବାରୁ ଏବଂ ସେମାନଙ୍କ ସହାୟତା ପାଇଁ ପାଣ୍ଠି ସଂଗ୍ରହ ଦିଗରେ ପଦକ୍ଷେପ ନେଇଥିବାରୁ କୋର୍ଟ ଯୁବ କମେଡିଆନ୍‌ମାନଙ୍କ ଏହି ଉଦ୍ୟମକୁ ପ୍ରଶଂସା କରିଛନ୍ତି। କୋର୍ଟ କହିଛନ୍ତି ଯେ, "ଯେତେବେଳେ ପ୍ରକୃତ ପ୍ରୟାସ କରାଯାଏ, ସେତେବେଳେ ସକାରାତ୍ମକ ଫଳାଫଳ ନିଶ୍ଚିତ ଭାବେ ମିଳିଥାଏ। ସେମାନେ ବହୁତ ଉଜ୍ଜ୍ୱଳ ଯୁବକ। ଯଦି ସେମାନେ ଏକ ସକାରାତ୍ମକ ଦିଗରେ କାମ କରିବା ଆରମ୍ଭ କରିଛନ୍ତି, ତେବେ ଏହାର ଫଳାଫଳ ମଧ୍ୟ ସକାରାତ୍ମକ ହେବ।"

କେଉଁମାନଙ୍କୁ ମିଳିଲା ଆଶ୍ୱସ୍ତି?

ଏହି ମାମଲାରେ ସମୟ ରାଇନାଙ୍କ ବ୍ୟତୀତ ଅନ୍ୟ ଯେଉଁ ଚାରିଜଣଙ୍କୁ ସୁପ୍ରିମକୋର୍ଟରୁ ଆଶ୍ୱସ୍ତି ମିଳିଛି ସେମାନେ ହେଲେ ବିପୁଲ ଗୋୟଲ, ବଲରାଜ ପରମଜିତ୍ ସିଂହ ଘାଇ, ସୋନାଲି ଠକ୍କର ଓରଫ ସୋନାଲି ଆଦିତ୍ୟ ଦେଶାଇ ଏବଂ ନିଶାନ୍ତ ଜଗଦୀଶ ତନୱର।

କ'ଣ ଥିଲା ବିବାଦ?

'ଇଣ୍ଡିଆଜ୍ ଗଟ୍ ଲାଟେଣ୍ଟ' ଶୋ'ର ଏକ ଏପିସୋଡ୍‌ରେ ଦିବ୍ୟାଙ୍ଗ ବା ଭିନ୍ନକ୍ଷମ ବ୍ୟକ୍ତିମାନଙ୍କୁ ନେଇ କିଛି ଅପମାନଜନକ ଏବଂ ଅସମ୍ବେଦନଶୀଳ ଥଟ୍ଟା କରାଯାଇଥିଲା। ଏହାକୁ ନେଇ ସାରା ଦେଶରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ ବିଭିନ୍ନ ରାଜ୍ୟରେ ଏଫଆଇଆର ଦାଏର ହୋଇଥିଲା। ଏହି ଘଟଣାରେ ହସ୍ତକ୍ଷେପ କରି ସୁପ୍ରିମକୋର୍ଟ ପ୍ରଥମେ ଅଭିଯୁକ୍ତମାନଙ୍କୁ କଡ଼ା ତାଗିଦ୍ କରିଥିଲେ ଏବଂ ଭିନ୍ନକ୍ଷମଙ୍କ ସହାୟତା ନିମନ୍ତେ କାର୍ଯ୍ୟକ୍ରମ ଆୟୋଜନ କରିବାକୁ ସର୍ତ୍ତ ରଖିଥିଲେ। ଅଭିଯୁକ୍ତମାନେ ଅଦାଲତଙ୍କ ନିର୍ଦ୍ଦେଶକୁ ସମ୍ପୂର୍ଣ୍ଣ ରୂପେ ପାଳନ କରିଥିବାରୁ ବର୍ତ୍ତମାନ ସେମାନଙ୍କ ବିରୋଧରେ ଥିବା ସମସ୍ତ ଅପରାଧିକ ମାମଲାକୁ ଖାରଜ କରିଦିଆଯାଇଛି।

ଆଗକୁ କ'ଣ ହେବ?

ଯଦିଓ ଅଭିଯୁକ୍ତମାନଙ୍କୁ କ୍ଲିନ୍ ଚିଟ୍ ମିଳିଛି, ତଥାପି ଇଣ୍ଟରନେଟ୍‌ରେ ପ୍ରସାରିତ ହେଉଥିବା ଏଭଳି ବିବାଦୀୟ କଣ୍ଟେଣ୍ଟ ଉପରେ କିପରି ନିୟନ୍ତ୍ରଣ ରଖାଯାଇପାରିବ ସେନେଇ ସୁପ୍ରିମକୋର୍ଟ ଶୁଣାଣି ଜାରି ରଖିବେ। ଭିନ୍ନକ୍ଷମ ବ୍ୟକ୍ତିମାନଙ୍କ ପକ୍ଷରୁ ଦିଆଯାଉଥିବା ବିଭିନ୍ନ ପରାମର୍ଶକୁ ବିଚାରକୁ ନେଇ କୋର୍ଟ ଆଗାମୀ ଦିନରେ ଏହି ବ୍ୟାପକ ପ୍ରସଙ୍ଗରେ ଉପଯୁକ୍ତ ନିର୍ଦ୍ଦେଶାବଳୀ ଜାରି କରିବେ ବୋଲି ସୂଚନା ମିଳିଛି।

ଲୋକପ୍ରିୟ ଧାରାବାହିକ 'ଶକ୍ତିମାନ୍' ର ଅଭିନେତା ମୁକେଶ ଖାନ୍ନା ଏବଂ ଷ୍ଟାଣ୍ଡଅପ୍ କମେଡିଆନ୍ ସମୟ ରୈନାଙ୍କ ମଧ୍ୟରେ ବିବାଦ ପୁଣି ଥରେ ତେଜିବାରେ ଲାଗିଛି। ନିକଟରେ ସମୟ ରୈନା ନିଜର ଏକ ନୂଆ ଭିଡିଓରେ ମୁକେଶ ଖାନ୍ନାଙ୍କୁ ଟାର୍ଗେଟ୍ କରିବା ପରେ, ବର୍ଷୀୟାନ୍ ଅଭିନେତା ଜଣକ କଡ଼ା ଜବାବ ଦେଇଛନ୍ତି। ନିଜର ସୋସିଆଲ ମିଡିଆ ହ୍ୟାଣ୍ଡେଲରେ ମୁକେଶ ଖାନ୍ନା କମେଡିଆନ୍‌ଙ୍କ ଉପରେ ପ୍ରବଳ ବର୍ଷିଛନ୍ତି ଏବଂ ତାଙ୍କୁ 'କଳା ମୁହଁ କରି ଗଧ ଉପରେ ବସିବା ଲୋକ' ବୋଲି ଆକ୍ଷେପ କରିଛନ୍ତି।

ସମୟ ରୈନାଙ୍କ ନୂଆ ଭିଡିଓ ଓ ରୋଷ୍ଟ୍

ସୂଚନାଯୋଗ୍ୟ ଯେ, 'ଇଣ୍ଡିଆଜ୍ ଗଟ୍ ଲାଟେଣ୍ଟ୍' (India's Got Latent) ବିବାଦ ପରେ ସମୟ ରୈନା ୟୁଟ୍ୟୁବ୍‌ରେ 'SAMAY RAINA Still Alive' ନାମକ ଏକ ନୂଆ ଭିଡିଓ ପୋଷ୍ଟ କରିଛନ୍ତି। ଏହି ଭିଡିଓରେ ସେ ସେହି ସମସ୍ତ ସେଲିବ୍ରିଟିମାନଙ୍କୁ ରୋଷ୍ଟ୍ କରିଛନ୍ତି, ଯେଉଁମାନେ ପୂର୍ବ ବିବାଦ ସମୟରେ ତାଙ୍କ ବିରୋଧରେ ବୟାନ ଦେଇଥିଲେ। ସେ ସୁନୀଲ ପାଲ୍, ବି ପ୍ରାକ୍ ଏବଂ ମୁକେଶ ଖାନ୍ନାଙ୍କୁ ଟାର୍ଗେଟ୍ କରିଥିଲେ। ମୁକେଶ ଖାନ୍ନାଙ୍କ ଉଦ୍ଦେଶ୍ୟରେ ସମୟ କହିଥିଲେ ଯେ, ତାଙ୍କ ସୋ' 'ଶକ୍ତିମାନ୍' ଦେଖି ପିଲାମାନେ ବିଲ୍ଡିଂରୁ ଡେଇଁ ପଡ଼ୁଥିଲେ, ତେଣୁ ସେ କେଉଁ ନୈତିକ ଆଧାରରେ ବର୍ତ୍ତମାନ ଅନ୍ୟକୁ ଉପଦେଶ ଦେଉଛନ୍ତି।

'ଗଧ ଉପରେ ବସାଇବା ଦରକାର'

ସମୟ ରୈନାଙ୍କ ଏହି ମନ୍ତବ୍ୟ ଶୁଣିବା ପରେ ମୁକେଶ ଖାନ୍ନା ନିଜ ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରି ରାଗ ସୁଝାଇଛନ୍ତି। ସେ ଲେଖିଛନ୍ତି ଯେ, "କୁକୁର ଲାଞ୍ଜ କେବେ ସିଧା ହୁଏନାହିଁ। ତାକୁ ଲକ୍ଷେ ଶିଶିରେ ରଖିଲେ ମଧ୍ୟ ସେ ବଙ୍କା ରହିବ। ସମୟ ରୈନା ମଧ୍ୟ ସେହିଭଳି। ସେ କୌଣସି ସିଧାସାଦା ପ୍ରାଣୀ ନୁହଁନ୍ତି, ବରଂ ସେ ଏକ 'ରୋଷ୍ଟେଡ୍ ପ୍ରାଣୀ' ଯିଏକି ଅଳିଆ ଆବର୍ଜନାର ନିଆଁରେ ପୋଡ଼ି ହୋଇଛି"। ସେ ଆହୁରି ମଧ୍ୟ କହିଛନ୍ତି ଯେ, ଏଭଳି ଲୋକର ମୁହଁରେ କଳା ବୋଳି ତାକୁ ଗଧ ଉପରେ ବସାଇ ସାରା ଦେଶରେ ବୁଲାଇବା ଦରକାର, ଯାହାଫଳରେ ପିଲାମାନେ ତାଙ୍କ ଉପରକୁ ଅଣ୍ଡା ଓ ଟମାଟୋ ମାଡ଼ କରିବେ, କାରଣ ସେ ସେମାନଙ୍କ ସୁପରହିରୋ ଶକ୍ତିମାନ୍ଙ୍କୁ ଅପମାନିତ କରିଛନ୍ତି।

ପୂର୍ବରୁ କାହିଁକି ହୋଇଥିଲା ବିବାଦ?

ଗତବର୍ଷ 'ଇଣ୍ଡିଆଜ୍ ଗଟ୍ ଲାଟେଣ୍ଟ୍' ର ଏକ ଏପିସୋଡ୍‌ରେ କିଛି ଅଶ୍ଳୀଳ ମନ୍ତବ୍ୟ ଦିଆଯିବା ପରେ ବଡ଼ ଧରଣର ବିବାଦ ମୁଣ୍ଡ ଟେକିଥିଲା, ଯାହା ଫଳରେ ସମୟ ରୈନା ଏବଂ ଅନ୍ୟ କ୍ରିଏଟର୍ସଙ୍କ ନାମରେ ଏଫ୍‌ଆଇଆର୍ (FIR) ମଧ୍ୟ ରୁଜୁ ହୋଇଥିଲା। ସେହି ସମୟରେ ମୁକେଶ ଖାନ୍ନା ଏଭଳି ଅଶ୍ଳୀଳ ବିଷୟବସ୍ତୁକୁ ନେଇ କଡ଼ା ସମାଲୋଚନା କରିଥିଲେ ଏବଂ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ। ଏବେ ପୁଣି ଥରେ ଉଭୟଙ୍କ ମଧ୍ୟରେ ଏହି ବାକ୍‌ଯୁଦ୍ଧ ମନୋରଞ୍ଜନ ଜଗତରେ ଚର୍ଚ୍ଚାର ବିଷୟ ପାଲଟିଛି।