ପୁରୀ: ଆସନ୍ତାକାଲି ପବିତ୍ର ଜନ୍ମାଷ୍ଟମୀ ଉପଲକ୍ଷେ ଶ୍ରୀମନ୍ଦିରରେ ୫ ଘଣ୍ଟା ପାଇଁ ସର୍ବସାଧାରଣ ଦର୍ଶନ ବନ୍ଦ ରହିବ। କୃଷ୍ଣ ଜନ୍ମ ନୀତି ସହ ଜଡ଼ିତ ସ୍ୱତନ୍ତ୍ର ନୀତିକାନ୍ତି ସମ୍ପନ୍ନ କରାଯିବା ନେଇ ଶ୍ରୀଜଗନ୍ନାଥ ମନ୍ଦିର ପ୍ରଶାସନ (ଏସଜେଟିଏ) ପକ୍ଷରୁ ଏହି ଘୋଷଣା କରାଯାଇଛି। ଏଣୁ ସନ୍ଧ୍ୟାଧୂପ ଭୋଗ ପରେ କୃଷ୍ଣ ଜନ୍ମ ନୀତି ଅନୁଷ୍ଠିତ ହେବ। ମହାପ୍ରଭୁଙ୍କର ଏହା ଗୁପ୍ତନୀତି ହୋଇଥିବାରୁ ସଂଧ୍ୟା ୭ଟାରୁ ରାତି ୧୨ ଟା ଯାଏଁ ସର୍ବସାଧାରଣ ଦର୍ଶନ ବନ୍ଦ ରହିବ । 

ମନ୍ଦିର ପ୍ରଶାସନ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ, ଆସନ୍ତା ସେପ୍ଟେମ୍ବର ୪ ତାରିଖ, ୨୦୨୬ (ଶୁକ୍ରବାର) ଦିନ ଭାଦ୍ରବ କୃଷ୍ଣ ଅଷ୍ଟମୀ ତିଥିରେ ଶ୍ରୀମନ୍ଦିରରେ କୃଷ୍ଣ ଜନ୍ମ ନୀତି ଅନୁଷ୍ଠିତ ହେବ। ଏହି କାରଣରୁ ସନ୍ଧ୍ୟା ପ୍ରାୟ ୭:୦୦ ଟାରୁ ରାତି ୧୨:୦୦ଟା ପର୍ଯ୍ୟନ୍ତ ସାଧାରଣ ଭକ୍ତଙ୍କ ପାଇଁ ଦର୍ଶନ ବ୍ୟବସ୍ଥା ସାମୟିକ ଭାବେ ବନ୍ଦ ରଖାଯିବ।

ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ସନ୍ଧ୍ୟା ଧୂପ ଭୋଗ ଛେକ ଆରମ୍ଭ ହେବା ସମୟରୁ ଏହି କଟକଣା ଲାଗୁ ହେବ ଏବଂ କୃଷ୍ଣ ଜନ୍ମ ନୀତିର ସମସ୍ତ ବିଧି ଶେଷ ହେବା ପର୍ଯ୍ୟନ୍ତ ଏହା ବଳବତ୍ତର ରହିବ। ତେଣୁ, ଏହି ସମୟସୀମାକୁ ଦୃଷ୍ଟିରେ ରଖି ନିଜର ଶ୍ରୀମନ୍ଦିର ଯାତ୍ରା ତଥା ଦର୍ଶନ ଯୋଜନା ପ୍ରସ୍ତୁତ କରିବାକୁ ଶ୍ରଦ୍ଧାଳୁମାନଙ୍କୁ ପ୍ରଶାସନ ପକ୍ଷରୁ ବିଶେଷ ଅନୁରୋଧ କରାଯାଇଛି।

ପୁରୀ: ଆଜି ଶ୍ରୀମନ୍ଦିରରେ ମହାପ୍ରଭୁଙ୍କ ବନକଲାଗି ନୀତି ଅନୁଷ୍ଠିତ ହେବ । ଶ୍ରାବଣ ଶୁକ୍ଳ ପ୍ରତିପଦ ତିଥିରେ ବୁଧବାର ଅର୍ଥାତ ଆଜି ଶ୍ରୀମନ୍ଦିରରେ ମହାପ୍ରଭୁଙ୍କ ବନକଲାଗି ବା ଶ୍ରୀମୁଖ ଶୃଙ୍ଗାର ନୀତି ଅନୁଷ୍ଠିତ ହେବ। ଏଥିପାଇଁ ଦ୍ୱିତୀୟ ଭୋଗମଣ୍ଡପ ଶେଷ ହେବା ପରେ ଆପାତତଃ ସନ୍ଧ୍ୟା ୬ଟାରୁ ରାତି ୧୦ଟା ପର୍ଯ୍ୟନ୍ତ ପ୍ରାୟ ୪ଘଣ୍ଟା ସର୍ବସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି। ବନକଲାଗି ହେଉଛି ମହାପ୍ରଭୁଙ୍କର ଏକ ଗୁପ୍ତ ନୀତି। ଏହି ନୀତି ପାଇଁ ଜୟ ବିଜୟ ଦ୍ୱାର ବନ୍ଦ ରହିବ। ଦ୍ୱିପ୍ରହର ଧୂପ ସରିବା ପରେ ଦତ୍ତମହାପାତ୍ର ସେବକମାନେ ମହାପ୍ରଭୁଙ୍କ ଶ୍ରୀମୁଖ ଶୃଙ୍ଗାର କରିବେ। ଏହା ଦ୍ୱାରା ଶ୍ରୀବିଗ୍ରହଙ୍କ ଶ୍ରୀଅଙ୍ଗର ଶ୍ରୀବୃଦ୍ଧି ଘଟିଥାଏ । ଏଥିପାଇଁ ଦତ୍ତମହାପାତ୍ର ସେବକ ପ୍ରାକୃତିକ ରଙ୍ଗ ପ୍ରସ୍ତୁତ କରିଥାନ୍ତି। 

ପୁରୀ: ଆସନ୍ତାକାଲି ଅର୍ଥାତ୍ ଅଗଷ୍ଟ ୧୨ ତାରିଖ ବୁଧବାର ଦିନ ପୁରୀ ଶ୍ରୀମନ୍ଦିରରେ ମହାପ୍ରଭୁଙ୍କ ଚିତାଲାଗି ନୀତି ଅନୁଷ୍ଠିତ ହେବ । ଏଥିପାଇଁ ଶ୍ରଦ୍ଧାଳୁଙ୍କ ପାଇଁ ୫ ଘଣ୍ଟା ବନ୍ଦ ରହିବ ଦର୍ଶନ । ଶ୍ରାବଣ କୃଷ୍ଣ ଅମାବାସ୍ୟା ତିଥିରେ ଶ୍ରୀବିଗ୍ରହମାନଙ୍କ ପବିତ୍ର ଚିତାଲାଗି ଅମାବାସ୍ୟା ନୀତି ସୁଚାରୁରୂପେ ସମ୍ପନ୍ନ କରିବା ଉଦ୍ଦେଶ୍ୟରେ ଏହି ନିଷ୍ପତ୍ତି ନିଆଯାଇଛି ବୋଲି ଶ୍ରୀଜଗନ୍ନାଥ ମନ୍ଦିର ପ୍ରଶାସନ (SJTA) ପକ୍ଷରୁ ସୂଚନା ଦିଆଯାଇଛି। ଶ୍ରୀମନ୍ଦିରରେ ପ୍ରଥମ ଭୋଗମଣ୍ଡପ ନୀତି ସମ୍ପନ୍ନ ହେବା ପରେ ଦିନ ୨ଟାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ସର୍ବସାଧାରଣ ଦର୍ଶନକୁ ସାମୟିକ ଭାବେ ବନ୍ଦ ରଖାଯିବ ବୋଲି ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି। ସନ୍ଧ୍ୟା ୭ଟା ପରେ ଭକ୍ତମାନେ ଶ୍ରୀଜୀଉଙ୍କ ଦର୍ଶନ କରିପାରିବେ। 

ଚିତାଲାଗି ଅମାବାସ୍ୟାକୁ ଓଡ଼ିଶାରେ ଚିତୌ ଅମାବାସ୍ୟା ଭାବରେ ମଧ୍ୟ ପାଳନ କରାଯାଏ, ଯାହାକି ଶ୍ରାବଣ ମାସର ଏକ ପ୍ରମୁଖ ପାରମ୍ପରିକ ପର୍ବ। ଏହି ପବିତ୍ର ଦିନରେ ରତ୍ନବେଦୀରେ ବିରାଜମାନ ମହାପ୍ରଭୁ ଶ୍ରୀଜଗନ୍ନାଥ, ପ୍ରଭୁ ବଳଭଦ୍ର ଏବଂ ଦେବୀ ସୁଭଦ୍ରାଙ୍କ ଶ୍ରୀମୁଖରେ ମୂଲ୍ୟବାନ ରତ୍ନଖଚିତ ସୁବର୍ଣ୍ଣ ଚିତା ଲାଗି କରାଯାଇଥାଏ। ବାର୍ଷିକ ରଥଯାତ୍ରା ପୂର୍ବରୁ ସ୍ନାନ ପୂର୍ଣ୍ଣିମା ଦିନ ଶ୍ରୀଜୀଉଙ୍କ ଠାରୁ ଏହି ଚିତାଗୁଡ଼ିକୁ କାଢି ନିଆଯାଇଥିବା ବେଳେ, ଆଜିର ଦିନରେ ଏହାକୁ ପୁନର୍ବାର ପରିଧାନ କରାଯାଏ। 

ପୁରୀ: ପୁରୀ ଶ୍ରୀଜଗନ୍ନାଥ ମନ୍ଦିର ଭିତର ବେଢ଼ାରୁ ପୁଣି ଥରେ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଘଟଣା ଶ୍ରୀମନ୍ଦିରର ସୁରକ୍ଷା ବ୍ୟବସ୍ଥା ଏବଂ କଟକଣାକୁ ନେଇ ସାଧାରଣରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି।

ଭାଇରାଲ ହେଉଥିବା ଏହି ଭିଡିଓରେ ନୀଳଚକ୍ର ଏବଂ ପତିତପାବନ ବାନା ବନ୍ଧାଯାଉଥିବାର ଦୃଶ୍ୟ କଏଦ ହୋଇଛି। ସୂଚନା ଅନୁଯାୟୀ, ଏହି ଭିଡିଓଟି ଶ୍ରୀମନ୍ଦିରର ଭିତର ବେଢ଼ାରୁ ସୁଟିଂ କରାଯାଇଛି ଏବଂ ଏହାକୁ 'krutika_karpe2017' ନାମକ ଏକ ଇନଷ୍ଟାଗ୍ରାମ ଆକାଉଣ୍ଟରୁ ସେୟାର କରାଯାଇଛି।

ମନ୍ଦିର ଭିତରକୁ ମୋବାଇଲ ଫୋନ ନେବା ଉପରେ କଡ଼ା କଟକଣା ରହିଥିବା ବେଳେ କିପରି ଜଣେ ବ୍ୟକ୍ତି ମୋବାଇଲ ଫୋନ ନେଇ ଭିତରକୁ ପ୍ରବେଶ କଲେ ଏବଂ ଭିଡିଓ ରେକର୍ଡିଂ କଲେ, ତାହା ବର୍ତ୍ତମାନ ଏକ ବଡ଼ ପ୍ରଶ୍ନ ପାଲଟିଛି। ଏହା ପ୍ରଥମ ଘଟଣା ନୁହେଁ। ନିକଟ ଅତୀତରେ ମଧ୍ୟ ଶ୍ରୀମନ୍ଦିର ପରିସରରୁ ଅନେକ ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଏହା ବ୍ୟତୀତ ସିଂହଦ୍ୱାର ସମ୍ମୁଖରେ ରୀଲ୍ସ ବନାଇବା ଏବଂ ମନ୍ଦିର ଉପରେ ଡ୍ରୋନ ଉଡ଼ାଇବା ଭଳି ଘଟଣା ମଧ୍ୟ ସାମ୍ନାକୁ ଆସିଛି। ଶ୍ରୀଜଗନ୍ନାଥ ମନ୍ଦିର ପ୍ରଶାସନ ଏବଂ ସ୍ଥାନୀୟ ପ୍ରଶାସନ ପକ୍ଷରୁ ବାରମ୍ବାର ଚେତାବନୀ ଦିଆଯାଉଥିଲେ ମଧ୍ୟ ଏଭଳି ଘଟଣାର ପୁନରାବୃତ୍ତି ପ୍ରଶାସନର କାର୍ଯ୍ୟାନୁଷ୍ଠାନ ଉପରେ ଆଙ୍ଗୁଠି ଉଠାଇଛି।

ଭୁବନେଶ୍ୱର: ଓଡ଼ିଶାର ସମୃଦ୍ଧ ସାଂସ୍କୃତିକ ତଥା ଆଧ୍ୟାତ୍ମିକ ଐତିହ୍ୟର ଏକ ବଡ଼ ସ୍ୱୀକୃତି ସ୍ୱରୂପ, ନୂଆଦିଲ୍ଲୀ ସ୍ଥିତ ରାଷ୍ଟ୍ରପତି ଭବନରେ ଶ୍ରୀଜୀଉଙ୍କ ରଥଯାତ୍ରାରେ ବ୍ୟବହୃତ ତିନି ରଥର ଗୋଟିଏ ଲେଖାଏଁ ପବିତ୍ର ଚକ ସ୍ଥାପନ କରାଯିବ। ଏହି ପ୍ରସ୍ତାବକୁ ଶ୍ରୀଜଗନ୍ନାଥ ମନ୍ଦିର ପ୍ରଶାସନ (ଏସଜେଟିଏ) ପକ୍ଷରୁ ଉପସ୍ଥାପନ କରାଯିବା ପରେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହାକୁ ନିଜର ଅନୁମୋଦନ ଦେଇଛନ୍ତି। ପବିତ୍ର ଶ୍ରୀଗୁଣ୍ଡିଚା ଯାତ୍ରାର ଏହି ପ୍ରତୀକ ଏବେ ଦେଶର ସର୍ବୋଚ୍ଚ ସାମ୍ବିଧାନିକ ବାସଭବନରେ ଶୋଭା ପାଇବ।

ସୋମବାର ଦିନ ଭୁବନେଶ୍ୱର ସ୍ଥିତ ଲୋକ ଭବନରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ କୁମାର ପାଢ଼ୀ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟି ଏହି ପ୍ରସ୍ତାବକୁ ଆନୁଷ୍ଠାନିକ ଭାବେ ପ୍ରଦାନ କରିଥିଲେ। ରାଷ୍ଟ୍ରପତି ଏହି ପଦକ୍ଷେପକୁ ତୁରନ୍ତ ଅନୁମୋଦନ କରିଛନ୍ତି, ଯାହା ଫଳରେ ଶତାବ୍ଦୀ ଶତାବ୍ଦୀ ଧରି ଚାଲିଆସୁଥିବା ଜଗନ୍ନାଥ ପରମ୍ପରାକୁ ସମ୍ମାନ ଜଣାଇ ରାଷ୍ଟ୍ରପତି ଭବନ ପରିସରରେ ପବିତ୍ର ରଥଚକ ପ୍ରଦର୍ଶିତ ହେବାର ବାଟ ଫିଟିଛି।

ପ୍ରତିବର୍ଷ ପୁରୀର ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ନୂତନ ରଥ ନିର୍ମାଣ କରାଯାଇଥାଏ। ଏହି ପ୍ରସ୍ତାବିତ ଚକଗୁଡ଼ିକ ହେଉଛି ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ, ବଡ଼ଠାକୁର ଶ୍ରୀବଳଭଦ୍ରଙ୍କ ତାଳଧ୍ୱଜ ଏବଂ ଦେବୀ ସୁଭଦ୍ରାଙ୍କ ଦର୍ପଦଳନ ରଥର ଅଂଶ। ଏହି ପବିତ୍ର ରଥ ଏବଂ ଏହାର ଚକ ରାଜ୍ୟର ଅନନ୍ୟ ସାଂସ୍କୃତିକ ପରିଚୟ, ଭକ୍ତି ଓ ବିଶ୍ୱାସର ପ୍ରତୀକ ଅଟେ। 

ଖୁବଶୀଘ୍ର ଏହି ରଥ ଚକଗୁଡ଼ିକୁ ରାଷ୍ଟ୍ରପତି ଭବନକୁ ସ୍ଥାନାନ୍ତର କରାଯିବ। ଦେଶର ସର୍ବୋଚ୍ଚ ସାମ୍ବିଧାନିକ ବାସଭବନରେ ଶ୍ରୀଜଗନ୍ନାଥ ସଂସ୍କୃତି ଏବଂ ଓଡ଼ିଶାର ଆଧ୍ୟାତ୍ମିକ ଐତିହ୍ୟକୁ ସ୍ଥାୟୀ ପ୍ରତୀକ ଭାବେ ପ୍ରଦର୍ଶିତ କରିବା ରାଜ୍ୟ ପାଇଁ ଅତ୍ୟନ୍ତ ଗର୍ବର ବିଷୟ। ଏହି ପଦକ୍ଷେପ ଶ୍ରୀଜଗନ୍ନାଥ ସଂସ୍କୃତିର ବିଶ୍ୱବ୍ୟାପୀ ଗୁରୁତ୍ୱକୁ ଆହୁରି ସୁଦୃଢ଼ କରିବ ବୋଲି ଆଶା କରାଯାଉଛି।

ରଥଯାତ୍ରାର ଅନ୍ତିମ ପର୍ବ ନୀଳାଦ୍ରି ବିଜେ ଅବସରରେ ଶ୍ରୀଜୀଉମାନେ ଜନ୍ମବେଦୀରୁ ଫେରି ରତ୍ନସିଂହାସନକୁ ପ୍ରତ୍ୟାବର୍ତ୍ତନ କରନ୍ତି। ତେବେ ଏହି ସମୟରେ ଏକ ସ୍ୱତନ୍ତ୍ର ତଥା ମାନବୀୟ ଲୀଳା ଦେଖିବାକୁ ମିଳେ। ମହାପ୍ରଭୁ ଶ୍ରୀଜଗନ୍ନାଥଙ୍କ ଉପରେ ଅଭିମାନ କରି ମା' ଲକ୍ଷ୍ମୀ ଶ୍ରୀମନ୍ଦିରର ଦ୍ୱାର ବନ୍ଦ କରିଦିଅନ୍ତି। ଏହି ନିଆରା ପରମ୍ପରା ଭକ୍ତମାନଙ୍କୁ ଭାବବିହ୍ୱଳ କରିଥାଏ।

କାହିଁକି ରାଗନ୍ତି ମା' ଲକ୍ଷ୍ମୀ?

ରଥଯାତ୍ରା ସମୟରେ ମହାପ୍ରଭୁ ଭାଇଭଉଣୀଙ୍କୁ ସାଥିରେ ନେଇ ୯ ଦିନ ପାଇଁ ଗୁଣ୍ଡିଚା ମନ୍ଦିର ଯାଇଥାନ୍ତି, କିନ୍ତୁ ନିଜର ଅର୍ଦ୍ଧାଙ୍ଗିନୀ ମା' ଲକ୍ଷ୍ମୀଙ୍କୁ ସାଙ୍ଗରେ ନେଇ ନଥାନ୍ତି। ଏଥିରେ କ୍ଷୁବ୍ଧ ହୋଇ ମା' ଲକ୍ଷ୍ମୀ ହେରାପଞ୍ଚମୀ ଦିନ ଶ୍ରୀଗୁଣ୍ଡିଚା ମନ୍ଦିର ଯାଇ ନନ୍ଦିଘୋଷ ରଥର କାଠ ଭାଙ୍ଗି ଫେରିଆସନ୍ତି। ନୀଳାଦ୍ରି ବିଜେ ଦିନ ଯେତେବେଳେ ବଡ଼ଭାଇ ବଳଭଦ୍ର ଏବଂ ଭଉଣୀ ସୁଭଦ୍ରା ଶ୍ରୀମନ୍ଦିରକୁ ପ୍ରବେଶ କରିସାରନ୍ତି, ସେତେବେଳେ ଅଭିମାନିନୀ ମା' ଲକ୍ଷ୍ମୀ ମହାପ୍ରଭୁ ଜଗନ୍ନାଥଙ୍କୁ ଅଟକାଇବା ପାଇଁ ଜୟବିଜୟ ଦ୍ୱାର ବନ୍ଦ କରିଦିଅନ୍ତି।

ଦେବ ଦମ୍ପତ୍ତିଙ୍କ ମଧ୍ୟରେ ମାନଭଞ୍ଜନ ନୀତି

ଦ୍ୱାର ବନ୍ଦ ହେବା ପରେ ମହାପ୍ରଭୁ ଏବଂ ମା' ଲକ୍ଷ୍ମୀଙ୍କ ସେବାୟତଙ୍କ ମଧ୍ୟରେ ଏକ ରୋଚକ ବଚନିକା (ଲକ୍ଷ୍ମୀ-ନାରାୟଣ କଳି) ବା ତର୍କବିତର୍କ ଅନୁଷ୍ଠିତ ହୁଏ। ମହାପ୍ରଭୁ ନିଜର ଭୁଲ ସ୍ୱୀକାର କରିବା ସହ ବିଭିନ୍ନ ପ୍ରକାର କଥା କହି ମା'ଙ୍କୁ ମନାଇବାକୁ ଚେଷ୍ଟା କରନ୍ତି। ଶେଷରେ ମହାପ୍ରଭୁ ଉପହାର ସ୍ୱରୂପ ମା' ଲକ୍ଷ୍ମୀଙ୍କୁ ତାଙ୍କର ଅତି ପ୍ରିୟ ମିଷ୍ଟାନ୍ନ ରସଗୋଲା ପ୍ରଦାନ କରନ୍ତି।

ରସଗୋଲା ପାଇବା ପରେ ମା' ଲକ୍ଷ୍ମୀଙ୍କ ରାଗ ଶାନ୍ତ ହୁଏ ଏବଂ ସେ ସନ୍ତୁଷ୍ଟ ହୋଇ ମହାପ୍ରଭୁଙ୍କୁ ଶ୍ରୀମନ୍ଦିର ଭିତରକୁ ପ୍ରବେଶ କରିବାକୁ ଅନୁମତି ଦିଅନ୍ତି। ଏହା ପରେ ଦେବ ଦମ୍ପତ୍ତିଙ୍କ ମିଳନ ହୁଏ ଏବଂ ମହାପ୍ରଭୁ ନିଜ ଭାଇଭଉଣୀଙ୍କ ସହ ରତ୍ନବେଦୀରେ ବିଜେ କରନ୍ତି। ଏହି ପବିତ୍ର ତଥା ନିଆରା ପରମ୍ପରାକୁ ଦେଖିବା ପାଇଁ ଶ୍ରୀକ୍ଷେତ୍ରରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ।

ପୁରୀ: ଶ୍ରୀମନ୍ଦିରରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ କୌଣସି ଦେୟଯୁକ୍ତ ଭିଆଇପି ଦର୍ଶନ (Paid VIP Darshan) ବ୍ୟବସ୍ଥା ନାହିଁ। ଏନେଇ ପ୍ରଚାରିତ ଏକ ବିଭ୍ରାନ୍ତିକର ବିଜ୍ଞାପନ ବିରୋଧରେ ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ସିଂହଦ୍ୱାର ଥାନାରେ ଏଫଆଇଆର୍ ରୁଜୁ କରାଯାଇଛି।

ଜୁଲାଇ ୧୯ ତାରିଖରେ ସିଂହଦ୍ୱାର ଥାନା ଅଧିକାରୀଙ୍କ ନିକଟରେ କରାଯାଇଥିବା ଆନୁଷ୍ଠାନିକ ଅଭିଯୋଗରେ ଶ୍ରୀମନ୍ଦିର ପ୍ରଶାସନ ସ୍ପଷ୍ଟ କରିଛି ଯେ, ଶ୍ରୀମନ୍ଦିର ଭିତରେ ଟଙ୍କା ଦେଇ ଭିଆଇପି ଦର୍ଶନ କରିବାର କୌଣସି ନିୟମ ନାହିଁ। ଏପରିକି ଏଭଳି ସୁବିଧା ଯୋଗାଇଦେବା ପାଇଁ ପ୍ରଶାସନ ପକ୍ଷରୁ କୌଣସି ବ୍ୟକ୍ତି କିମ୍ବା ସଂସ୍ଥାକୁ ଅନୁମତି ଦିଆଯାଇ ନାହିଁ। ଅଭିଯୋଗରେ ଦର୍ଶାଯାଇଛି ଯେ ‘eoOdisha’ ନାମକ ଏକ ସଂସ୍ଥା ‘MyEO Jagannath Dham Concierge Service’ ନାମରେ ଏକ ନକଲି ବିଜ୍ଞାପନ ପ୍ରସାରଣ କରୁଛି, ଯେଉଁଥିରେ ସ୍ୱତନ୍ତ୍ର ଭିଆଇପି ଦର୍ଶନ ସୁବିଧା ଯୋଗାଇଦେବା ନେଇ ଦାବି କରାଯାଇଥିଲା। ଶ୍ରୀମନ୍ଦିର କାର୍ଯ୍ୟାଳୟ ଏହି ବିଜ୍ଞାପନକୁ ସମ୍ପୂର୍ଣ୍ଣ ଜାଲ୍ ଏବଂ ସାଧାରଣ ଲୋକଙ୍କୁ ଠକିବା ଉଦ୍ଦେଶ୍ୟରେ କରାଯାଇଥିବା କହିଛି।

ଶ୍ରୀମନ୍ଦିର ପ୍ରଶାସନର ଓଏସଡି (ସୁରକ୍ଷା) ହେମନ୍ତ କୁମାର ପାଢ଼ୀଙ୍କ ସ୍ୱାକ୍ଷରରେ ଜାରି କରାଯାଇଥିବା ଏହି ଅଭିଯୋଗ ପତ୍ରରେ ଉଲ୍ଲେଖ କରାଯାଇଛି ଯେ ଶ୍ରୀମନ୍ଦିରରେ ପେଡ୍ ଭିଆଇପି ଦର୍ଶନର କୌଣସି ବ୍ୟବସ୍ଥା ନାହିଁ। ତେଣୁ ଏଭଳି ମିଥ୍ୟା ଓ ବିଭ୍ରାନ୍ତିକର ଦାବିର ଶିକାର ନହେବାକୁ ଭକ୍ତମାନଙ୍କୁ ଚେତାବନୀ ଦିଆଯାଇଛି। ଶ୍ରୀମନ୍ଦିର ଦର୍ଶନ ଏବଂ ସେବା ସମ୍ପର୍କରେ କୌଣସି ତଥ୍ୟ ପାଇଁ କେବଳ ସରକାରୀ ତଥା ଆନୁଷ୍ଠାନିକ ସୂତ୍ର ଉପରେ ନିର୍ଭର କରିବାକୁ ଏବଂ ସତର୍କ ରହିବାକୁ ପ୍ରଶାସନ ଜନସାଧାରଣଙ୍କୁ ଅନୁରୋଧ କରିଛି। ଅନ୍ୟପକ୍ଷରେ, ମନ୍ଦିର ପ୍ରଶାସନର ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା ରୁଜୁ କରିବା ସହ ଘଟଣାର ତଦନ୍ତ ଆରମ୍ଭ କରିଛି।

ଇଣ୍ଟରନ୍ୟାସନାଲ୍ ସୋସାଇଟି ଫର୍ କୃଷ୍ଣ କନସିୟସନେସ୍ (ISKCON) ବା ଇସ୍କନ ପକ୍ଷରୁ ପୁଣିଥରେ ଅଦିନିଆ ରଥଯାତ୍ରା ଆୟୋଜନକୁ ନେଇ ବିବାଦ ତେଜିଛି। ପୁରୀ ଶ୍ରୀମନ୍ଦିରର ତିଥି ଏବଂ ନୀତିକାନ୍ତିକୁ ଉଲ୍ଲଂଘନ କରି ବିଦେଶରେ ଅସମୟରେ ରଥଯାତ୍ରା କରାଯାଉଥିବାରୁ ବିଶ୍ୱବ୍ୟାପୀ ଜଗନ୍ନାଥ ପ୍ରେମୀ ଓ ଓଡ଼ିଆ ସମାଜରେ ଘୋର ଅସନ୍ତୋଷ ଦେଖାଦେଇଛି। ନିକଟରେ ଜର୍ମାନୀର ୱିସବାଡେନ୍, ଆମେରିକାର ନ୍ୟୁୟର୍କ ସମେତ ଲଣ୍ଡନ, ସିଡନୀ ଏବଂ ଦକ୍ଷିଣ ଆଫ୍ରିକାର ଜୋହାନ୍ସବର୍ଗରେ ଇସ୍କନ ପକ୍ଷରୁ ଅଦିନିଆ ରଥଯାତ୍ରା କରାଯାଇଥିବା ଖବର ସାମ୍ନାକୁ ଆସିଛି।

ଓଡ଼ିଆଙ୍କୁ ଦୁର୍ବ୍ୟବହାର ଅଭିଯୋଗ

ଏହି ମନମାନିକୁ ବିରୋଧ କରିବାରୁ ପ୍ରବାସୀ ଓଡ଼ିଆମାନଙ୍କୁ ଇସ୍କନ ସମର୍ଥକମାନେ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ପ୍ରତିବାଦ କରୁଥିବା ଓଡ଼ିଆମାନଙ୍କୁ କୁକୁର ବୋଲି ସମ୍ବୋଧନ କରାଯାଇ ଅପମାନିତ କରାଯାଇଥିବା ନେଇ ଏକ ବିବାଦୀୟ ଭିଡିଓ ସାମ୍ନାକୁ ଆସିଛି। ଏହି ଘଟଣା ପରେ ଜଗନ୍ନାଥ ସଂସ୍କୃତି ରକ୍ଷା କରିବା ପାଇଁ ଏବଂ ଇସ୍କନର ଏଭଳି ସ୍ୱେଚ୍ଛାଚାରିତା ଉପରେ ରୋକ୍ ଲଗାଇବାକୁ ଦାବି ଜୋର ଧରିଛି। ମହାପ୍ରଭୁଙ୍କ ରଥଯାତ୍ରା କେବଳ ଏକ ଉତ୍ସବ ନୁହେଁ, ବରଂ ଏହା ଏକ ପବିତ୍ର ପରମ୍ପରା, ଯାହା ନିର୍ଦ୍ଦିଷ୍ଟ ତିଥି ଓ ରୀତିନୀତି ଅନୁଯାୟୀ ପାଳନ କରାଯିବା ଉଚିତ୍ ବୋଲି ଭକ୍ତମାନେ ମତ ଦେଇଛନ୍ତି।

ଗଜପତି ମହାରାଜଙ୍କ କଡ଼ା ଚେତାବନୀ

ପୂର୍ବରୁ ପୁରୀ ଗଜପତି ମହାରାଜା ଦିବ୍ୟସିଂହ ଦେବ ଏବଂ ଶ୍ରୀଜଗନ୍ନାଥ ମନ୍ଦିର ପ୍ରଶାସନ (SJTA) ପକ୍ଷରୁ ଇସ୍କନକୁ ଅଦିନିଆ ରଥଯାତ୍ରା ଏବଂ ସ୍ନାନଯାତ୍ରା ନକରିବାକୁ କଡ଼ା ଚେତାବନୀ ଦିଆଯାଇଥିଲା। ଏନେଇ ଗଜପତି ମହାରାଜା ଇସ୍କନ କର୍ତ୍ତୃପକ୍ଷଙ୍କୁ ଚିଠି ଲେଖି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ନେଇ ମଧ୍ୟ ସତର୍କ କରାଇଥିଲେ। ତଥାପି ଇସ୍କନ କର୍ତ୍ତୃପକ୍ଷ ଶ୍ରୀମନ୍ଦିର ପରମ୍ପରାକୁ ଅଣଦେଖା କରି ନିଜ ଜିଦରେ ଅଟଳ ରହିବା ଜଗନ୍ନାଥ ସଂସ୍କୃତିର ଗବେଷକ ତଥା ଭକ୍ତମାନଙ୍କୁ ମର୍ମାହତ କରିଛି। ଜଗନ୍ନାଥ ସଂସ୍କୃତି ଗବେଷକ ପଣ୍ଡିତ ସୂର୍ଯ୍ୟନାରାୟଣ ରଥଶର୍ମା ମଧ୍ୟ ଏହି ପ୍ରସଙ୍ଗରେ ଉଦବେଗ ପ୍ରକାଶ କରିବା ସହ ନୀତିକାନ୍ତିକୁ କିପରି ସୁରକ୍ଷିତ କରାଯିବ ସେ ନେଇ ପ୍ରଶ୍ନ ଉଠାଇଛନ୍ତି।

ପୁରୀ: ଆଜି ପବିତ୍ର ଦେବସ୍ନାନ ପୂର୍ଣ୍ଣିମା । ୧୦୮ଗରା ସୁବାଶିଷ ଜଳରେ ସ୍ନାନ କରି ଗଜାନନ ବେଶରେ ଦେବେ ଦର୍ଶନ ଦେବେ ମର୍ତ୍ତ୍ୟ ବୈକୁଣ୍ଠ ଅଧିପତି । ଅଗଣିତ ଭକ୍ତଙ୍କୁ ମହାପ୍ରଭୁ ଦିବ୍ୟ ସ୍ନାନ ଲୀଳା ଏବଂ ଗଜାନନ ବେଶରେ ଦର୍ଶନ ଦେବେ। ଏହି ପବିତ୍ର ଉତ୍ସବରେ ସାମିଲ ହେବା ପାଇଁ ଓଡ଼ିଶା ତଥା ଦେଶର ବିଭିନ୍ନ ପ୍ରାନ୍ତରୁ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଛି। ଏହା ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ପ୍ରସ୍ତୁତିର ପ୍ରାରମ୍ଭିକ ପର୍ବ।

ଜ୍ୟେଷ୍ଠ ମାସ ପୂର୍ଣ୍ଣିମା ତିଥିରେ ଅନୁଷ୍ଠିତ ହେଉଥିବା ଏହି ସ୍ନାନ ପୂର୍ଣ୍ଣିମା ଦିନ ସକାଳେ ଶ୍ରୀଜୀଉମାନଙ୍କର ପାରମ୍ପରିକ ପହଣ୍ଡି ନୀତି ଆରମ୍ଭ ହୋଇଥିଲା। ଗର୍ଭଗୃହରୁ ପ୍ରଭୁ ସୁଦର୍ଶନ, ଶ୍ରୀବଳଭଦ୍ର, ଦେବୀ ସୁଭଦ୍ରା ଏବଂ ଶ୍ରୀଜଗନ୍ନାଥ ପାରମ୍ପରିକ ଧାଡ଼ି ପହଣ୍ଡିରେ ସ୍ନାନ ମଣ୍ଡପକୁ ବିଜେ କରିଥିଲେ। 'ଜୟ ଜଗନ୍ନାଥ' ଧ୍ୱନି, ବେଦ ମନ୍ତ୍ର, ଶଙ୍ଖ ନାଦ ଓ ପାରମ୍ପରିକ ବାଦ୍ୟରେ ସମଗ୍ର ଶ୍ରୀମନ୍ଦିର ପରିସର ପ୍ରକମ୍ପିତ ହୋଇଥିଲା। ସକାଳ ପ୍ରାୟ ୭:୫୧ ସୁଦ୍ଧା ଶ୍ରୀଜୀଉମାନେ ସ୍ନାନ ମଣ୍ଡପରେ ବିରାଜମାନ କରିଥିଲେ।

ସ୍ନାନ ଯାତ୍ରାର ମୁଖ୍ୟ ହେଉଛି ଶ୍ରୀଜୀଉମାନଙ୍କର ପବିତ୍ର ମହାସ୍ନାନ। ଶ୍ରୀମନ୍ଦିରର ସୁନାକୁଅରୁ ସଂଗୃହୀତ ୧୦୮ ଗରା ପବିତ୍ର ଜଳରେ ଚତୁର୍ଦ୍ଧାମୂର୍ତ୍ତିଙ୍କୁ ସ୍ନାନ କରାଯିବାର ପରମ୍ପରା ରହିଛି। ଏହି ପବିତ୍ର ଜଳରେ ଚନ୍ଦନ, ଔଷଧୀୟ ବୃକ୍ଷ, ସୁଗନ୍ଧିତ ପୁଷ୍ପ ଓ ଅନ୍ୟାନ୍ୟ ଦ୍ରବ୍ୟ ମିଶ୍ରଣ କରାଯାଇଥାଏ, ଯାହା ଶୁଦ୍ଧିକରଣ ଏବଂ ଆରୋଗ୍ୟର ପ୍ରତୀକ ଅଟେ। ସ୍ନାନ ପରେ ସେବାୟତମାନେ ପିଷ୍ଟକ ଆଳତି ସମ୍ପନ୍ନ କରିଥାନ୍ତି।

ମହାପ୍ରଭୁଙ୍କ ଦିବ୍ୟ ସ୍ନାନ ନୀତି ସମ୍ପନ୍ନ ହେବା ପରେ ଦୁର୍ଲଭ ଗଜାନନ ବେଶ ଅନୁଷ୍ଠିତ ହେବ। ମହାବାହୁ ଶ୍ରୀଜଗନ୍ନାଥ, ଶ୍ରୀବଳଭଦ୍ର ଏବଂ ଦେବୀ ସୁଭଦ୍ରାଙ୍କୁ ଅତି ଚିତ୍ତାକର୍ଷକ ହାତୀ ବେଶ ବା ଗଜାନନ ବେଶରେ ସଜ୍ଜିତ କରାଯାଏ। ଏହି ଦୁର୍ଲଭ ରୂପରେ ଭଗବାନ ଗଣେଶଙ୍କ ଭଳି ଦର୍ଶନ ଦେଇଥାନ୍ତି ମହାପ୍ରଭୁ, ଯାହା ଜ୍ଞାନ, ସୁରକ୍ଷା ଏବଂ ବିଘ୍ନ ବିନାଶର ପ୍ରତୀକ ଅଟେ। ପ୍ରତିବର୍ଷ ଏହି ପବିତ୍ର ବେଶ ଦର୍ଶନ ପାଇଁ ଭକ୍ତମାନେ ଉତ୍କଣ୍ଠାର ସହ ଅପେକ୍ଷା କରିଥାନ୍ତି।

ରଥଯାତ୍ରା ପୂର୍ବରୁ ସ୍ନାନ ପୂର୍ଣ୍ଣିମାର ଆଧ୍ୟାତ୍ମିକ ଗୁରୁତ୍ୱ ବେଶ୍ ଅଧିକ। ମନ୍ଦିରର ପରମ୍ପରା ଅନୁଯାୟୀ, ଅତ୍ୟଧିକ ସ୍ନାନ କାରଣରୁ ମହାପ୍ରଭୁ ଜ୍ୱରରେ ପୀଡ଼ିତ ହୋଇଥାନ୍ତି। ତେଣୁ ସେମାନଙ୍କୁ ଅଣସର ଘରକୁ ନିଆଯାଏ, ଯେଉଁଠାରେ ସେମାନେ ପ୍ରାୟ ୧୫ ଦିନ ଧରି ବିଶ୍ରାମ ନେବା ସହ ଗୁପ୍ତ ସେବା ଗ୍ରହଣ କରନ୍ତି। ଏହି ସମୟରେ ଭକ୍ତମାନଙ୍କ ପାଇଁ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ବନ୍ଦ ରହେ। ରଥଯାତ୍ରାର ଠିକ୍ ଗୋଟିଏ ଦିନ ପୂର୍ବରୁ ନେତ୍ରୋତ୍ସବ ବା ନବଯୌବନ ଦର୍ଶନ ଅବସରରେ ମହାପ୍ରଭୁ ପୁଣିଥରେ ଭକ୍ତଙ୍କୁ ଦର୍ଶନ ଦେଇଥାନ୍ତି।

ପୁରୀ: ବିଶ୍ୱପ୍ରସିଦ୍ଧ ରଥଯାତ୍ରା ପାଖେଇ ଆସୁଥିବା ବେଳେ ଶ୍ରୀକ୍ଷେତ୍ରରେ ପ୍ରସ୍ତୁତି ଜୋରଦାର ଚାଲିଛି। ମହାପ୍ରଭୁଙ୍କ ନୀତିକାନ୍ତି ପାଇଁ ଶ୍ରୀମନ୍ଦିରରେ ୩୮୦ କିଲୋଗ୍ରାମ ପବିତ୍ର ବାସୁଙ୍ଗା ପାଟ ସୁତା ପହଞ୍ଚିଛି । ମହାପ୍ରଭୁଙ୍କର ବିଭିନ୍ନ ପାରମ୍ପରିକ ଏବଂ ଗୁପ୍ତ ନୀତିରେ ଏହି ସୂତା ବ୍ୟବହାର କରାଯିବ।

ଭୁବନେଶ୍ୱରସ୍ଥିତ ସହିଦ ନଗରରେ ଥିବା ଓଡ଼ିଶା ରାଜ୍ୟ ସମବାୟ ଟସର ଏବଂ ରେଶମ ଫେଡେରେସନ୍ (ସେରିଫେଡ୍) କାର୍ଯ୍ୟାଳୟ ପରିସରରୁ ଏହି ବାସୁଙ୍ଗା ପାଟ ସୂତାକୁ ପୁରୀକୁ ପଠାଯାଇଛି। ଓଡ଼ିଶାର ହସ୍ତତନ୍ତ, ବୟନଶିଳ୍ପ ଏବଂ ହସ୍ତଶିଳ୍ପ ମନ୍ତ୍ରୀ ପ୍ରଦୀପ ବଳ ସାମନ୍ତ ଏହାର ଶୁଭାରମ୍ଭ କରିଥିଲେ। ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର କରାଯିବା ପୂର୍ବରୁ ଏହି ପାଟ ସୂତାକୁ ପାରମ୍ପରିକ ରୀତିନୀତିରେ ପୂଜାର୍ଚ୍ଚନା କରାଯାଇଥିଲା।

ମହାପ୍ରଭୁ ଶ୍ରୀଜଗନ୍ନାଥଙ୍କ ବିଭିନ୍ନ ପବିତ୍ର ନୀତି, ବିଶେଷ କରି 'ଗୁପ୍ତ ନୀତି' ପାଇଁ ବାସୁଙ୍ଗା ପାଟ ସୂତାର ଏକ ସ୍ୱତନ୍ତ୍ର ଏବଂ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଏହି ସୂତାରୁ ଶ୍ରୀଜିଉଙ୍କ ପାଇଁ 'ବିଜୟ ଡୋରି', 'ପଇତା', 'ରକ୍ଷୀ' ଏବଂ ଅନ୍ୟାନ୍ୟ ଆବଶ୍ୟକୀୟ ପବିତ୍ର ସାମଗ୍ରୀ ପ୍ରସ୍ତୁତ କରାଯାଇଥାଏ।

ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ପୁରୀ ଆସୁଥିବା ଭକ୍ତମାନେ ଶ୍ରୀମନ୍ଦିର ହୁଣ୍ଡିରେ ଅର୍ଥ ଦାନ କରିବାର ପରମ୍ପରା ଦୀର୍ଘ ଦିନରୁ ରହିଆସିଛି। ତେବେ ମନ୍ଦିରକୁ ଆସିପାରୁ ନ ଥିବା ଶ୍ରଦ୍ଧାଳୁମାନେ ଏହି ସୁଯୋଗରୁ ବଞ୍ଚିତ ହେଉଥିଲେ। ଏହି ସମସ୍ୟାର ସମାଧାନ ପାଇଁ ଏବଂ ରାଜ୍ୟ ତଥା ଦେଶ ବାହାରେ ରହୁଥିବା ଶ୍ରଦ୍ଧାଳୁଙ୍କ ସୁବିଧା ନିମନ୍ତେ ଖୁବଶୀଘ୍ର ଶ୍ରୀମନ୍ଦିର ଇ-ହୁଣ୍ଡି ବ୍ୟବସ୍ଥା ଆରମ୍ଭ ହେବାକୁ ଯାଉଛି। ଏହି ଅନଲାଇନ୍ ବ୍ୟବସ୍ଥା ମାଧ୍ୟମରେ ଭକ୍ତମାନେ ଘରେ ବସି ଶ୍ରୀଜୀଉଙ୍କ ଉଦ୍ଦେଶ୍ୟରେ ନିଜର ଦାନ ଅର୍ଥ ପ୍ରଦାନ କରିପାରିବେ।

ଲୋକସେବା ଭବନରେ ଉଚ୍ଚସ୍ତରୀୟ ବୈଠକ

ଏହି ଅଭିନବ ବ୍ୟବସ୍ଥାର ସଫଳ ରୂପାୟନ ପାଇଁ ଲୋକସେବା ଭବନରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଇ-ହୁଣ୍ଡି ବ୍ୟବସ୍ଥାର ବିଭିନ୍ନ ଦିଗ ଉପରେ ବିସ୍ତୃତ ଆଲୋଚନା କରାଯାଇଥିଲା। ଭକ୍ତମାନେ ନିଜ ଜନ୍ମଦିନ, ବିବାହ ବାର୍ଷିକୀ କିମ୍ବା ମନସ୍କାମନା ପୂରଣ ହେବାର ଖୁସିରେ କିପରି ସହଜରେ ଅନଲାଇନ୍ ମାଧ୍ୟମରେ ଦାନ କରିପାରିବେ, ସେ ନେଇ ବ୍ଲୁ-ପ୍ରିଣ୍ଟ ପ୍ରସ୍ତୁତ କରାଯାଉଛି। ଏହି ବୈଠକରେ ଶ୍ରୀମନ୍ଦିର ପରିଚାଳନା କମିଟିର ସଦସ୍ୟ ତଥା ଓଡ଼ିଶା ରାଜ୍ୟ ବିଧି ଆୟୋଗ ଅଧ୍ୟକ୍ଷ ଜଷ୍ଟିସ ବିଶ୍ବନାଥ ରଥ, ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ, ଆଇନ ବିଭାଗ ପ୍ରମୁଖ ସଚିବ ଡ. ପବିତ୍ର ମୋହନ ସାମଲ, ସ୍ବତନ୍ତ୍ର ସଚିବ ପ୍ରଣବ ପାତ୍ର ଏବଂ ଅତିରିକ୍ତ ସଚିବ ଶିବ ପ୍ରସାଦ ମହାପାତ୍ର ପ୍ରମୁଖ ଉପସ୍ଥିତ ଥିଲେ।

ଆୟକର ଛାଡ଼ ଏବଂ ସାଇବର ସୁରକ୍ଷା ଉପରେ ଗୁରୁତ୍ୱ

ଏହି ଅନଲାଇନ୍ ଦାନ ପ୍ରକ୍ରିୟାକୁ ଅଧିକ ଆକର୍ଷଣୀୟ ଏବଂ ନିରାପଦ କରିବା ପାଇଁ ସ୍ୱତନ୍ତ୍ର ପଦକ୍ଷେପ ନିଆଯାଉଛି। ମିଳିଥିବା ସୂଚନା ଅନୁଯାୟୀ, ଦାନ କରାଯାଇଥିବା ଅର୍ଥରାଶି ଉପରେ ଆୟକର ଛାଡ଼ ବ୍ୟବସ୍ଥା ଲାଗୁ ହେବ। ଭକ୍ତଙ୍କ ଦ୍ୱାରା ଦାନ କରାଯାଇଥିବା ସମସ୍ତ ଅର୍ଥ କେବଳ ଶ୍ରୀମନ୍ଦିରର ବିକାଶମୂଳକ କାର୍ଯ୍ୟରେ ଖର୍ଚ୍ଚ କରାଯିବ। ଅନ୍ୟପକ୍ଷରେ, ଏହି ବ୍ୟବସ୍ଥାରେ ଯେପରି କୌଣସି ସାଇବର ଠକେଇ ନ ହୁଏ ଏବଂ ସାଇବର ଅପରାଧୀମାନେ ଏହାର ଫାଇଦା ଉଠାଇ ନ ପାରନ୍ତି, ସେଥିପାଇଁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରିବାକୁ ମନ୍ତ୍ରୀ ଶ୍ରୀ ହରିଚନ୍ଦନ ବିଭାଗୀୟ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି।

ବୈଶାଖ ମାସ ଶୁକ୍ଳ ପକ୍ଷ ତୃତୀୟା ତିଥିରେ ପାଳିତ ହେଉଥିବା ପବିତ୍ର ଅକ୍ଷୟ ତୃତୀୟାକୁ ନେଇ ଚଳିତ ବର୍ଷ ସାଧାରଣରେ ବଡ଼ ଦ୍ୱନ୍ଦ୍ୱ ଦେଖାଦେଇଛି। କେତେକ ପାଞ୍ଜିରେ ଏହା ୧୯ ଏପ୍ରିଲ ଦର୍ଶାଯାଇଥିବା ବେଳେ ଅନ୍ୟ କେତେକରେ ୨୦ ଏପ୍ରିଲ ବୋଲି ଉଲ୍ଲେଖ ରହିଛି। ତେବେ ଶାସ୍ତ୍ର ଓ ଶ୍ରୀମନ୍ଦିର ପରମ୍ପରା ଅନୁଯାୟୀ ଏହି ପବିତ୍ର ଦିନଟିକୁ କେବେ ପାଳନ କରାଯିବ, ସେନେଇ ସ୍ପଷ୍ଟ ସୂଚନା ମିଳିଛି।

ତିଥି ଗଣନା ଓ ସଠିକ୍ ତାରିଖ

ଜ୍ୟୋତିଷ ଶାସ୍ତ୍ର ଅନୁସାରେ, ଚଳିତ ବର୍ଷ ତୃତୀୟା ତିଥି ୧୯ ଏପ୍ରିଲ ପୂର୍ବାହ୍ନ ୧୦ଟା ୪୯ ମିନିଟ୍‌ରେ ଆରମ୍ଭ ହୋଇ ୨୦ ଏପ୍ରିଲ ସକାଳ ୭ଟା ୨୭ ମିନିଟ୍‌ରେ ଶେଷ ହେଉଛି। ତେବେ ଉଦୟକାଳୀନ ତିଥିକୁ ବିଚାରକୁ ନେଇ ଜଗନ୍ନାଥ ପାଞ୍ଜି ଏବଂ ସମୟ ଗଣନା ଅନୁସାରେ ୨୦ ଏପ୍ରିଲ (ସୋମବାର) ଦିନ ହିଁ ଅକ୍ଷୟ ତୃତୀୟା ପାଳନ କରାଯିବା ଶାସ୍ତ୍ର ସମ୍ମତ ବୋଲି ନିଷ୍ପତ୍ତି ନିଆଯାଇଛି।

ଶ୍ରୀମନ୍ଦିର ନୀତିକାନ୍ତି ଓ ରଥ ଅନୁକୂଳ

ସାଧାରଣ ଲୋକଙ୍କ ଦ୍ୱନ୍ଦ୍ୱକୁ ଦୂର କରି ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ଶ୍ରୀମନ୍ଦିରର ସମସ୍ତ ନୀତିକାନ୍ତି ୨୦ ଏପ୍ରିଲରେ ହିଁ ଅନୁଷ୍ଠିତ ହେବ। ଏହି ଦିନ ମହାପ୍ରଭୁଙ୍କ ପ୍ରସିଦ୍ଧ ଚନ୍ଦନ ଯାତ୍ରା ଆରମ୍ଭ ହେବା ସହ ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ରଥ ନିର୍ମାଣ ଅନୁକୂଳ କରାଯିବ। ସେହିପରି ରାଜ୍ୟର ଚାଷୀ ଭାଇମାନେ ମଧ୍ୟ ଏହି ଦିନ ନିଜର ପାରମ୍ପରିକ ଅଖି ମୁଠି ଅନୁକୂଳ କରି ନୂତନ କୃଷି ବର୍ଷର ଶୁଭାରମ୍ଭ କରିବେ ବୋଲି ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ଅନୁରୋଧ କରିଛନ୍ତି।

ପୂଜାବିଧି ଓ ସୁନା କିଣିବାର ମହତ୍ତ୍ୱ

ସନାତନ ଧର୍ମରେ ଅକ୍ଷୟ ତୃତୀୟାକୁ ଏକ 'ଅବୁଝା ମୁହୂର୍ତ୍ତ' କୁହାଯାଏ। ଏହି ଦିନ ସୁନା କିଣିବା ଏକ ପୁରାତନ ପରମ୍ପରା, ଯାହାଦ୍ୱାରା ଧନ ସମ୍ପତ୍ତି କ୍ଷୟ ନହୋଇ ବୃଦ୍ଧି ପାଏ ବୋଲି ବିଶ୍ୱାସ ରହିଛି। ପୂଜା ବିଧି ଅନୁଯାୟୀ, ଏହି ଦିନ ସକାଳୁ ସ୍ନାନ ସାରି ହଳଦିଆ ବସ୍ତ୍ର ପରିଧାନ କରିବା ଶୁଭ। ପ୍ରଭୁ ବିଷ୍ଣୁ ଏବଂ ମା' ଲକ୍ଷ୍ମୀଙ୍କୁ ଅକ୍ଷତ, ଚନ୍ଦନ ଓ ହଳଦିଆ ଫୁଲ ଅର୍ପଣ କରିବା ଉଚିତ୍। ଏହାସହ ବିଷ୍ଣୁ ସହସ୍ରନାମ ପାଠ କରିବା ଏବଂ ଗରିବ ଲୋକଙ୍କୁ ଜଳ, ଛତା, ଚପଲ କିମ୍ବା ଛତୁଆ ଦାନ କଲେ ଅଶେଷ ପୁଣ୍ୟ ପ୍ରାପ୍ତି ହୋଇଥାଏ।