ତାମିଲନାଡୁ: ତାମିଲନାଡୁ ମୁଖ୍ୟମନ୍ତ୍ରୀ ବିଜୟଙ୍କ ଓଏସଡି ପଦରୁ ହଟିଲେ ଜ୍ୟୋତିଷ ରାଧାନ ପଣ୍ଡିତ । ତାମିଲନାଡୁ ସରକାର ବୁଧବାର ଦିନ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟଙ୍କ ଓଏସଡି (Officer on Special Duty - OSD) ଭାବରେ ଜ୍ୟୋତିଷ ରାଧାନ ପଣ୍ଡିତଙ୍କ ନିଯୁକ୍ତି ଆଦେଶକୁ ବାତିଲ କରିଛନ୍ତି। ବିରୋଧୀ ଏବଂ ସହଯୋଗୀ ଦଳର ତୀବ୍ର ସମାଲୋଚନା ତଥା ଜନସାଧାରଣଙ୍କ ଅସନ୍ତୋଷ ପରେ ସରକାର ଏହି ନିଷ୍ପତ୍ତି ନେଇଛନ୍ତି।

ସୂଚନାଯୋଗ୍ୟ ଯେ, ମେ ୧୨ ତାରିଖରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏକ ନୋଟିସ୍ ଜାରି କରାଯାଇ ପ୍ରସିଦ୍ଧ ଜ୍ୟୋତିଷ ରାଧାନ ପଣ୍ଡିତ ଭେଟ୍ରିଭେଲଙ୍କୁ ଓଏସଡି ଭାବରେ ନିଯୁକ୍ତ କରାଯାଇଥିଲା। ତେବେ ମାତ୍ର ୨୪ଘଣ୍ଟା ପରେ ଏହି ନିଯୁକ୍ତିକୁ ବାତିଲ କରାଯାଇଛି।

ଏହି ନିଯୁକ୍ତିକୁ ନେଇ ତାମିଲନାଡୁରେ ଏକ ବଡ଼ ରାଜନୈତିକ ବିବାଦ ଦେଖାଦେଇଥିଲା। ଟିଭିକେ (TVK) ସରକାରଙ୍କ ପ୍ରମୁଖ ସମର୍ଥକ ଥିବା ଭିସିକେ (VCK), ସିପିଆଇ-ଏମ୍ (CPI-M) ଏବଂ ସିପିଆଇ (CPI) ଭଳି ଦଳଗୁଡ଼ିକ ଏହି ପଦକ୍ଷେପକୁ ଖୋଲାଖୋଲି ଭାବେ ସମାଲୋଚନା କରିଥିଲେ। ବିଧାନସଭାରେ ଫ୍ଲୋର ଟେଷ୍ଟ ପୂର୍ବରୁ ଭିସିକେ ବିଧାୟକ ବାଣୀ ଅରସୁ ସରକାରଙ୍କୁ ବୈଜ୍ଞାନିକ ଏବଂ ଯୁକ୍ତିଯୁକ୍ତ ଚିନ୍ତାଧାରାକୁ ପ୍ରୋତ୍ସାହିତ କରିବାକୁ ଅନୁରୋଧ କରିଥିଲେ। ସେ କହିଥିଲେ ଯେ, ଆମ ସରକାର ଜ୍ୟୋତିଷ ଶାସ୍ତ୍ରକୁ ନୁହେଁ, ବରଂ ବୈଜ୍ଞାନିକ ଚିନ୍ତାଧାରାକୁ ଗୁରୁତ୍ୱ ଦେବା ଉଚିତ୍। ଅନ୍ଧବିଶ୍ୱାସକୁ ପ୍ରୋତ୍ସାହନ ଦେବା ଭଳି କାର୍ଯ୍ୟରୁ ନିବୃତ୍ତ ରହିବାକୁ ସେ ପରାମର୍ଶ ଦେଇଥିଲେ।

ବୈଦିକ ଜ୍ୟୋତିଷ, ସଂଖ୍ୟାତତ୍ତ୍ୱ ଏବଂ ଧ୍ୟାନ-ଆଧାରିତ ପରାମର୍ଶ କ୍ଷେତ୍ରରେ ପ୍ରାୟ ଚାରି ଦଶନ୍ଧିର ଅଭିଜ୍ଞତା ଥିବା ରାଧାନ ପଣ୍ଡିତ ଭେଟ୍ରିଭେଲ ଭାରତର ଅନ୍ୟତମ ପ୍ରମୁଖ ସେଲିବ୍ରିଟି ତଥା ରାଜନୈତିକ ଜ୍ୟୋତିଷ ଭାବରେ ପରିଚିତ। ବିଜେପି, କଂଗ୍ରେସ, ଡିଏମକେ ଏବଂ ଏଆଇଏଡିଏମକେ ଭଳି ପ୍ରମୁଖ ଦଳର ନେତାମାନେ ତାଙ୍କର ଗ୍ରାହକ ଅଟନ୍ତି।

ସେ ମୁଖ୍ୟମନ୍ତ୍ରୀ ବିଜୟ ଏବଂ ତାଙ୍କ ଦଳ ତାମିଲାଗା ଭେଟ୍ରି କାଜାଗମ୍ (TVK) ର କଠୋର ସମର୍ଥକ ରହିଆସିଛନ୍ତି। ନିର୍ବାଚନ ପୂର୍ବରୁ ରାଧାନ ପଣ୍ଡିତ ଭବିଷ୍ୟବାଣୀ କରିଥିଲେ ଯେ ବିଜୟଙ୍କର ରାଜନୈତିକ ସଫଳତା ପାଇଁ ଏକ ସୁନାମି ଭଳି ସମ୍ଭାବନା ରହିଛି। ସେ ଏହା ମଧ୍ୟ ଦାବି କରିଥିଲେ ଯେ ବିଜୟ ୧୫୦ ରୁ ଅଧିକ ଆସନ ଜିତି ମୁଖ୍ୟମନ୍ତ୍ରୀ ହେବେ। ଯଦିଓ ଟିଭିକେ ୨୩୪ ଆସନରୁ ୧୦୮ଟି ଆସନ ଜିତିଥିଲା, ତଥାପି କଂଗ୍ରେସ ଏବଂ ଭିସିକେର ସମର୍ଥନରେ ବିଜୟ ମେ ୧୦ ତାରିଖରେ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। 

ତାମିଲନାଡୁ: ତାମିଲାଡୁରେ ଆରମ୍ଭ ହେଲା ବିଜୟ ରାଜ୍ । ତାମିଲନଡୁ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଥାଲପତି ବିଜୟ । ୧୯୭୬ ପରେ ପ୍ରଥମ ଅଣଦ୍ରାବିଡ ମୁଖ୍ୟମନ୍ତ୍ରୀ ଭାବେ ନେଲେ ଶପଥ । ପଦ ଓ ଗୋପନୀୟତାର ଶପଥ ପାଠ କରାଇଲେ ରାଜ୍ୟପାଳ । ଉପସ୍ଥିତ ଅଛନ୍ତି ବିରୋଧୀ ଦଳ ନେତା ରାହୁଲ ଗାନ୍ଧୀ । ଚେନ୍ନାଇ ନେହେରୁ ଷ୍ଟାଡିୟମରେ ଆୟୋଜିତ ଏହି ଐତିହାସିକ ଶପଥ ସମାରୋହ ହୋଇଛି ।

ବିଜୟଙ୍କ ଦଳକୁ ମିଳିଲା ସମ୍ପୂର୍ଣ୍ଣ ସଂଖ୍ୟା ଗରିଷ୍ଠତା । ୧୩ ତାରିଖ ସୁଦ୍ଧା ବିଧାନସଭାରେ ସଂଖ୍ୟାଗରିଷ୍ଠତାର ପ୍ରମାଣ ଦେବାକୁ ପଡ଼ିବ ବୋଲି ଲୋକଭବନ ପକ୍ଷରୁ ଜାରି ଏକ ବିବୃତିରେ କୁହାଯାଇଛି । ରାଜ୍ୟପାଳ ଟିଭିକେକୁ ସରକାର ଗଠନ ଅନୁମତି ଦେଇଛନ୍ତି ।

ଅନ୍ୟପଟେ ବିଜୟଙ୍କ ମନ୍ତ୍ରିମଣ୍ଡଳର ଶପଥ ଗ୍ରହଣ ହୋଇଛି । ବିଜୟଙ୍କ ସହ TVK ର ୯ ବିଧାୟକ ମନ୍ତ୍ରୀ ଭାବେ ନେଲେ ଶପଥ । ମନ୍ତ୍ରୀ ଭାବେ ଶପଥ ନେଲେ ଏନ . ଆନନ୍ଦ ଓ ଅଦାବ ଅର୍ଜୁନ । TVK ମହାସଚିବ କେ.ଜି ଅରୁଣରାଜ ମନ୍ତ୍ରୀ ଭାବେ ଶପଥ ନେଲେ । ଅଭିଜ୍ଞ କେ.ଏ ସେଙ୍ଗୋଟେୟନ ମଧ୍ୟ ମନ୍ତ୍ରୀ ଭାବେ ଶପଥ ନେଲେ । ଥିରୁ ଭେଙ୍କଟରମଣନ, ନିର୍ମଲ କୁମାର, ରାଜମୋହନ, ଟିକେ ପ୍ରଭୁ ନେଲେ ଶପଥ । ଏକମାତ୍ର ମହିଳା ମନ୍ତ୍ରୀ ଭାବେ ଶପଥ ନେଲେ ସେଲଭି ଏସ୍. କୀର୍ତ୍ତନା ।

ନୂଆଦିଲ୍ଲୀ: ତାମିଲନାଡୁ ମୁଖ୍ୟମନ୍ତ୍ରୀ ଏମ କେ ଷ୍ଟାଲିନଙ୍କ ବିରୋଧରେ ଅପମାନସୂଚକ ମନ୍ତବ୍ୟ ଦେଇ ଗିରଫ ହୋଇଥିବା ତାମିଲନାଡୁର ଜଣେ ୟୁଟ୍ୟୁବରଙ୍କୁ ଜାମିନ ଦେବା ପରିପ୍ରେକ୍ଷୀରେ ସୁପ୍ରିମକୋର୍ଟ ରାଜ୍ୟ ସରକାରଙ୍କୁ ଭର୍ତ୍ସନା କରିଛନ୍ତି। ସୋସିଆଲ ମିଡିଆରେ ମତ ମନ୍ତବ୍ୟ ରଖୁଥିବା କିମ୍ବା ସରକାରଙ୍କ ବିରୋଧରେ ଅଭିଯୋଗ ଆଣୁଥିବା ସବୁ ଲୋକଙ୍କୁ ସରକାର ଗିରଫ କରିପାରିବେ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ନିର୍ବାଚନ ପୂର୍ବରୁ ଯଦି ସରକାରଙ୍କ ବିରୋଧରେ ବିଭିନ୍ନ ସୋସିଆଲ ମିଡିଆରେ ଅଭିଯୋଗ ଅଣାଯାଏ ତେବେ ତାମିଲନାଡୁ ସରକାର କେତେ ଲୋକଙ୍କୁ ବାନ୍ଧିବେ ବୋଲି ସୁପ୍ରିମକୋର୍ଟ ପ୍ରଶ୍ନ କରିଛନ୍ତି।

ଉଲ୍ଲେଖଯୋଗ୍ୟ ଯେ, ଏ ଦୁରାଇମୁରୁଗାନ ସତାଇ ନାମକ ଜଣେ ବ୍ୟକ୍ତି ତାମିଲନାଡୁ ସରକାରଙ୍କ ବିରୋଧରେ ଅଭିଯୋଗ ଆଣି ମୁଖ୍ୟମନ୍ତ୍ରୀ ଷ୍ଟାଲିନଙ୍କ ବିରୋଧରେ ନିଜ ୟୁଟ୍ୟୁବ୍‌ ଚ୍ୟାନେଲରେ ଟିକା ଟିପ୍ପଣୀ କରିଥିଲେ। ଏହାକୁ ନେଇ ତାଙ୍କୁ ଗିରଫ କରାଯିବା ପରେ ସେ ସ୍ଥାନୀୟ ଅଦାଲତରୁ ଜାମିନ ପାଇଥିଲେ। କିନ୍ତୁ ଏହାକୁ ରାଜ୍ୟ ସରକାରଙ୍କ ପକ୍ଷରୁ ଚ୍ୟାଲେଞ୍ଜ କରାଯିବାରୁ ହାଇକୋର୍ଟ ସତାଇଙ୍କ ଜାମିନ ଖାରଜ କରିଦେଇଥିଲେ। ଏହାପରେ ସତାଇ ସୁପ୍ରିମକୋର୍ଟର ଦ୍ବାରସ୍ଥ ହୋଇଥିଲା ବେଳେ ସର୍ବୋଚ୍ଚ ନ୍ୟାୟାଳୟ ତାଙ୍କ ଜାମିନକୁ କାଏମ ରଖିବା ସହିତ ରାଜ୍ୟ ସରକାରଙ୍କୁ ଭର୍ତ୍ସନା କରିଛନ୍ତି। ସତାଇ ତାଙ୍କର ସାମ୍ବିଧାନିକ ମୌଳିକ ଅଧିକାରର କୌଣସି ଉଲ୍ଲଘଂନ କରିନାହାନ୍ତି ବୋଲି ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି।

ତାମିଲନାଡୁ: ତାମିଲନାଡୁର ବିରୁଧୁନଗରରେ ଥିବା ଏକ ବାଣ କାରଖାନାରେ ଭୟଙ୍କର ବିସ୍ଫୋରଣ । ବିସ୍ଫୋରଣରେ ୯ ଜଣ ମୃତ୍ୟୁବରଣ କରିଥିବାବେଳେ ଏକାଧିକ ଆହତ ହୋଇଛନ୍ତି । ମୃତକଙ୍କ ସଂଖ୍ୟା ଆଗକୁ ଆହୁରି ବଢିପାରେ ବୋଲି ଆଶଙ୍କା କରାଯାଉଛି । ସ୍ଥାନୀୟ ଲୋକଙ୍କ ସୂଚନା ଅନୁସାରେ, ବିସ୍ଫୋରଣ ଏତେ ଭୟଙ୍କର ଥିଲା ଯେ କାରଖାନା ନିକଟରେ ଥିବା ଚାରୋଟି ବିଲ୍ଡିଂ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ପୁଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରିବା ସହ ନିଆଁକୁ ଆୟତ୍ତ କରିଛନ୍ତି। ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି।

ପୋଲିସ ଦେଇଥିବା ସୂଚନା ଅନୁସାରେ, କାରଖାନାର ରାସାୟନିକ ମିଶ୍ରଣ ସ୍ଥାନରେ ପ୍ରଥମେ ବିସ୍ଫୋରଣ ଘଟିଥିଲା। ଏହାପରେ ଚାରିଆଡକୁ ନିଆଁ ବ୍ୟାପି ଯାଇଥିଲା। ବିସ୍ଫୋରଣ ବେଳେ ସାତ ଜଣଙ୍କର ମୃତ୍ୟୁ ଘଟିଥିଲା।ଡାକ୍ତରଖାନା ନେବା ବାଟରେ ଦୁଇଜଣଙ୍କର ମୃତ୍ୟୁ ଘଟିଛି। ପ୍ରାଥମିକ ତଦନ୍ତ ମୁତାବକ ଏହି ବିସ୍ଫୋରଣ କାରଖାନାର କେମିକାଲ ମିକ୍ସିଂ ବେଳେ ହୋଇଛି ।

ଚେନ୍ନାଇ : ତାମିଲନାଡୁର ଭିରୁଧୁନଗର ଜିଲାର ଶିବକାଶୀ ନିକଟରେ ଥିବା ଏକ ବାଣ କାରଖାନାରେ ବିସ୍ଫୋରଣ ଘଟିଛି। ବିସ୍ଫୋରଣରେ ୯ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିବା ସହ ଉଦ୍ଧାର କାର୍ଯ୍ୟ କରୁଛନ୍ତି।

ଅଗ୍ନିଶମବିଭାଗର ସୂଚନା ଅନୁଯାୟୀ, ବିରୁଧୁନଗର ଜିଲ୍ଲାର ଶିବକାଶୀ ନିକଟରେ ଥିବା ଏକ ବାଣ ତିଆରି କାରଖାନାରେ ପ୍ରଥମ ବିସ୍ଫୋରଣ ହୋଇଥିଲା। ତେବେ ଏଠାରେ କେହି ମୃତାହତ ହୋଇନଥିଲେ । ଏହାର କିଛି ସମୟ ପରେ ବିରୁଧୁନଗର ଜିଲ୍ଲାର କାମ୍ମାପଟ୍ଟି ଗ୍ରାମରେ ଥିବା ବାଣ କାରଖାନାରେ ଆଉ ଏକ ବିସ୍ଫୋରଣ ଘଟିଥିଲା, ଯେଉଁଥିରେ ୯ ଜଣଙ୍କର ମୃତ୍ୟୁ ଘଟିଥିଲା।

ତାମିଲନାଡୁ: ଟ୍ରେନ୍‌ରେ ନିଆଁ ଲାଗି ଜୀବନ୍ତ ଜଳିଗଲେ ୮ ଜଣ ଯାତ୍ରୀ । ଅଗ୍ନିକାଣ୍ଡରେ ୨୦ରୁ ଉର୍ଦ୍ଧ୍ବ ଯାତ୍ରୀ ଆହତ ହୋଇଛନ୍ତି । ତାମିଲନାଡୁର ମଦୁରାଇ ଷ୍ଟେସନ ନିକଟରେ ଭୋର ୫ଟା୧୫ରେ ଲକ୍ଷ୍ନୌରୁ ରାମେଶ୍ବରମ ଯାଉଥିବା ପୁନାଲୁର- ମଦୁରାଇ ଏକ୍କପ୍ରେସରେ ନିଆଁ ଲାଗିଥିବା ଜଣା ପଡ଼ିଛି । ଟ୍ରେନର ଟୁରିଷ୍ଟ କୋଚରେ ନିଆଁ ଲାଗି ୮ ଜଣ ମୃତ୍ୟୁବରଣ କରିଛନ୍ତି । ଖବର ପାଇ ଦମକଳ ବାହିନୀ ପହଞ୍ଚି ପ୍ରାୟ ୨ ଘଣ୍ଟାର ପରିଶ୍ରମ ପରେ ନିଆଁକୁ ଆୟତ କରିଛନ୍ତି । ଗୁରୁତରଙ୍କୁ ତୁରନ୍ତ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ବହୁ ଯାତ୍ରୀ ପ୍ରାଣ ବିକଳରେ ଟ୍ରେନ୍‌ରୁ ଡେଇଁ ନିଜ ଜୀବନ ରକ୍ଷା କରି ପାରିଛନ୍ତି।

ତେବେ ଟ୍ରେନରେ କିଛି ପ୍ୟାସେଞ୍ଜନ ବେଆଇନ ଭାବେ ଗ୍ୟାସ୍ ସିଲିଣ୍ଡର ନେଇ ଯାଉଥିବାବେଳେ ସେଥିରୁ ନିଆଁ ଲାଗିଥିବା ସନ୍ଦେହ କରାଯାଉଛି

ଚେନ୍ନାଇ: ଅବିଶ୍ରାନ୍ତ ବର୍ଷାରେ ବେହାଲ ତାମିଲନାଡ଼ୁ ଅନ୍ତର୍ଗତ ନାଗପଟ୍ଟିନମ୍ ଓ ତିରୁଭାରୁର୍ ଜିଲ୍ଲା । ଗତକାଲିଠାରୁ ବିଭିନ୍ନ ଜିଲ୍ଲାରେ ଅବିଶ୍ରାନ୍ତ ବର୍ଷା ହେବା ଯୋଗୁ ଜନଜୀବନ ବିପର୍ଯ୍ୟସ୍ତ ହୋଇଛି । ବର୍ଷା ଯୋଗୁଁ ଜିଲ୍ଲାରେ ସ୍ଥିତି ବିଗିଡିବାରେ ଲାଗିଛି । ବିଭିନ୍ନ ସ୍ଥାନରେ ଲୋକେ ନାହିଁ ନଥିବା ଅସୁବିଧାର ସାମ୍ନା କରୁଛନ୍ତି । ତିରୁବରୁର ଜିଲ୍ଲାରେ ସ୍କୁଲ ବନ୍ଦ ହେବା ନେଇ ଘୋଷଣା କରାଯାଇଛି ।

ତାମିଲନାଡ଼ୁରୁ କାରାଇକାଲଠାରୁ ୪୦୦ କିଲୋମିଟର ଦୂର ତଥା ଶ୍ରୀଲଙ୍କା ଉପକୂଳରୁ ୮୦ କିଲୋମିଟର ଦୂରରେ ବଙ୍ଗୋପସାଗରର ଦକ୍ଷିଣ ପଶ୍ଚିମରେ ଏକ ଲଘୁଚାପ ସୃଷ୍ଟି ହୋଇଥିବାରୁ କ୍ରମାଗତ ବର୍ଷା ଲାଗି ରହିଛି । ଏନେଇ ସୂଚନା ଦେଇଛି ଭାରତୀୟ ପାଣିପାଗ ବିଭାଗ । ଲଘୁଚାପ ପ୍ରଭାବରେ ତାମିଲନାଡ଼ୁ, ପୁଡୁଚେରୀ ଅନ୍ୟାନ୍ୟ ସ୍ଥାନରେ ବର୍ଷା ପ୍ରକୋପ ଦେଖାଦେଇଛି । ଆଜି ଓ ଆସନ୍ତାକାଲି ବର୍ଷାର ପ୍ରକୋପ ବଢ଼ିବା ଆଶଙ୍କା ରହିଛି । ସମୁଦ୍ର ମଧ୍ୟକୁ ନ ଯିବା ଲାଗି ଧୀବରଙ୍କୁ କରାଯାଇଛି ସତର୍କ । ୧୯୭୧ ପରେ ଏହା ୯ ଥର ଯେତେବେଳେ ଜାନୁଆରୀ-ଫେବ୍ରୁଆରୀ ମାସରେ ପାଣିପାଗ ଏଭଳି ପରିବର୍ତ୍ତନ ହୋଇଛି ।

ମଦୁରାଇ: ତାମିଲନାଡୁରୁ ବିଚଳତି କରିବା ଭଳି ଏକ ମାମଲା ସାମ୍ନାକୁ ଆସିଛି। ଏଠାରେ ଏକ ପୋଷା କୁକୁରକୁ ‘କୁକୁର’ କହିବାରୁ ଜଣେ ୬୨ ବର୍ଷୀୟ ବୃଦ୍ଧଙ୍କୁ ହତ୍ୟା କରାଯାଇଛି। ଡିଣ୍ଡିଗୁଲ ଜିଲ୍ଲା ଥାଜିକୋମ୍ବୁ ଥାନା ଅନ୍ତର୍ଗତ ଉଲଗମାପଟିରକୋଟମରେ ଗୁରୁବାର ଏହି ଘଟଣା ଘଟିଛି।

ପୁଲିସ ସୂଚନା ଅନୁଯାୟୀ ନିର୍ମଳା ଫାତିମା ରାଣୀ ଏବଂ ତାଙ୍କର ଦୁଇ ପୁଅ ଡାନିଏଲ ଓ ଭିନ୍ସେଣ୍ଟ ଅନେକ ଥର ବୃଦ୍ଧ ରୟପାନ, ତାଙ୍କ ସମ୍ପର୍କୀୟ ଏବଂ ପଡ଼ୋଶୀଙ୍କୁ ଚେତାବନୀ ଦେଇଥିଲେ। ସେ ତାଙ୍କ ପୋଷା କୁକୁରକୁ କୁକୁର ନ ଡାକିବାକୁ କହିଥିଲେ। ମାତ୍ର ପଡ଼ୋଶୀ ଏବଂ ରୟପାନ କୁକୁରକୁ ବାନ୍ଧି ରଖିବା ପାଇଁ ଫାତିମାଙ୍କୁ କହିଥିଲେ। ତେବେ ଗୁରୁବାର ଘର ନିକଟରେ ଥିବା ଫାର୍ମକୁ ଯାଇ ପାଣି ପମ୍ପ ବନ୍ଦ କରିବା ଲାଗି ରୟପାନ ନିଜ ନାତି କେଲ୍ଭିନକୁ କହିଥିଲେ। ସେଠାରେ କୁକୁରୁ ବୁଲୁଥିବାରୁ ବାଡ଼ି ନେଇ ଯିବାକୁ ସେ ନାତିକୁ ପରାମର୍ଶ ଦେଇଥିଲେ। କେଲ୍ଭିନଙ୍କୁ କହିବା ସମୟରେ ଡାନିଏଲ ଏହା ଶୁଣି ପାରିଥିଲା। ସେ କ୍ରୋଧିତ ହୋଇ ରୟପାନଙ୍କ ଛାତିକୁ ଶକ୍ତ ଧକ୍କା ମାରିଥିଲା। ରୟପାଲ ତଳେ ପଡ଼ି ଯାଇଥିଲେ ଏବଂ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ପରେ ଡାନିଏଲ ଏବଂ ତାଙ୍କ ପରିବାର ଫେରାର ହୋଇ ଯାଇଥିଲେ। ପୁଲିସ ଶୁକ୍ରବାର ନିର୍ମଳା ଏବଂ ତାଙ୍କ ପୁଅଙ୍କୁ ଗିରଫ କରିଛି।

ତାମିଲନାଡୁ: ତୀର୍ଥଯାତ୍ରୀଙ୍କୁ ନେଇ ଯାଉଥିବା ଏକ କାର ଘାଟି ତଳକୁ ଖସି ପଡିବା କାରଣରୁ ୮ ଜଣଙ୍କର ମୃତ୍ୟୁ ହେବା ସହିତ ଦୁଇ ଜଣ ଆହତ ହୋଇଛନ୍ତି । ତାମିଲନାଡୁର ଥେନି ଜିଲ୍ଲାରେ ଘଟିଛି ଏଭଳି ମର୍ମନ୍ତୁଦ ସଡକ ଦୁର୍ଘଟଣା। ଦୁଇ ଜଣ ଆହତଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି। ଶୁକ୍ରବାର ବିଳମ୍ବିତ ରାତିରେ ତୀର୍ଥଯାତ୍ରୀମାନେ ସାବରିମାଲା ଦର୍ଶନ ସାରି ଫେରୁଥିବାବେଳେ ପ୍ରାୟ ୪୦ ଫୁଟ ଗଭୀର ଖାଇକୁ ଗାଡିଟି ଖସିପଡିଥିଲା ।

ପ୍ରଶାସନର କହିବାନୁସାରେ, ପାହାଡ଼ିଆ ରାସ୍ତାର ଏକ ବାଙ୍କରେ ଡ୍ରାଇଭର ଗାଡି ଉପରୁ ନିୟନ୍ତ୍ରଣ ହରାଇବାରୁ ଏହି ଦୁର୍ଘଟଣା ଘଟିଥିଲା । ଘଟଣାସ୍ଥଳରେ ୭ ଜଣଙ୍କର ମୃତ୍ୟୁ ହୋଇଥିବାବେଳେ ଡାକ୍ତରଖାନା ନେବା ବାଟରେ ଆଉ ଜଣଙ୍କର ମୃତ୍ୟୁ ହୋଇଥିଲା । ଏହି ଆଠ ଜଣ ଲୋକ ଜିଲ୍ଲାର ଆଣ୍ଡିପଟ୍ଟି ବାସିନ୍ଦା ଥିଲେ । ସେମାନଙ୍କ ମଧ୍ୟରେ ଜଣେ ନାବାଳକ ଥିଲେ।

ଚେନ୍ନାଇ: ସ୍ଥଳଭାଗରେ ମାଡ ହେଲା ବାତ୍ୟା ମ୍ୟାଣ୍ଡସ୍‌ । ତାମିଲନାଡୁର ଚେନ୍ନାଇ ନିକଟ ମହାବଳିପୁରମରେ ସିଭିୟର ସାଇକ୍ଲୋନିକ ଷ୍ଟର୍ମରେ ପରିଣତ ହୋଇ ଏହା ଲ୍ୟାଣ୍ଡଫଲ କରିଛି । ଏହି ସମୟରେ ଘଣ୍ଟାପ୍ରତି ୮୦ରୁ ଅଧିକ କିଲୋମିଟର ବେଗରେ ପବନ ବହିଥିଲା । ପବନରେ ବଡ଼ ବଡ଼ ଗଛ ଭାଙ୍ଗି ଯାଇଥିବାବେଳେ କଚ୍ଚା ଘର ଉଡ଼ିଯାଇଛି । ବିଭିନ୍ନସ୍ଥାନରେ ପ୍ରବଳ ବର୍ଷା ଲାଗି ରହିଛି । ସ୍ଥିତିକୁ ଦେଖି ବିଭିନ୍ନ ଜିଲ୍ଲାରେ ସ୍କୁଲ, କଲେଜ ବନ୍ଦ କରାଯାଇଛି । ୧୫ଟି ବିମାନକୁ ବାତିଲ କରିଦିଆଯାଇଛି । ଏନଡିଆରଏଫ ଓ ନୌସେନା ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି ।

ସ୍ଥଳଭାଗ ଛୁଇଁବା ପରେ ବାତ୍ୟା ମ୍ୟାଣ୍ଡସ୍‌ ଏବେ ଉତର-ପଶ୍ଚିମ ଦିଗରେ ଗତି କରୁଛି । ଏହାର ପ୍ରଭାବରେ ଘଂଟା ପ୍ରତି ୫୫ ରୁ ୬୫ କିଲୋମିଟର ବେଗରେ ପବନ ବୋହୁଛି । ଏହାର ପ୍ରଭାବରେ ତିରୁଭାଲୁର, ଚେନ୍ନାଇ, ଚେଙ୍ଗଲାପାଟୁ, କାଂଚିପୁରମ ଜିଲ୍ଲାରେ ଭୀଷଣ ବର୍ଷା ସହ ଜୋରରେ ପବନ ବୋହୁଛି । ପ୍ରଶାସନ ପକ୍ଷରୁ ବାତ୍ୟା ଦୁର୍ବଳ ନହେବା ଯାଏଁ ଲୋକଙ୍କୁ ଘରୁ ନାବାହାରିବା ପାଇଁ ପରାମର୍ଶ ଦିଆଯାଇଛି । ସେପଟେ ଉତର-ତାମିଲନାଡୁ ଓ ଦକ୍ଷିଣଆନ୍ଧ୍ରପ୍ରଦେଶର ଉପକୁଳ ଜିଲ୍ଲାଗୁଡିକରେ ମୁଶଳ ଧାରରେ ବର୍ଷା ସହ ପବନର ବେଗ ମଧ୍ୟ ବୃଦ୍ଧି ପାଇଛି । ସାମୁଦ୍ରିକ ଝଡକୁ ଆଖିରେ ରଖି ତାମିଲନାଡୁ, ପୁଡୁଚେରି ଓ ଆନ୍ଧ୍ରପ୍ରଦେଶରେ ରେଡ ଅଲର୍ଟ ଜାରି କରାଯାଇଛି ।

ମଦୁରାଇ: ତାମିଲନାଡୁର ମଦୁରାଇରେ ଜିଲ୍ଲା ଭଡକମ୍ପଟ୍ଟିରେ ଥିବା ଏକ ବାଣ କାରଖାନାରେ ଭୟଙ୍କର ବିସ୍ଫୋରଣ ଘଟି ୫ ଜଣଙ୍କର ମୃତ୍ୟୁ ହୋଇଥିବାବେଳେ ଅନ୍ୟ ୧୦ ଜଣ ଗୁରୁତର ଆହତ ହୋଇଛନ୍ତି। ଗୁରୁତରମାନଙ୍କୁ ତୁରନ୍ତ ମେଡିକାଲ ନିଆଯାଇ ଚିକିତ୍ସା କରାଯାଉଛି । ବିସ୍ଫୋରଣ ଏତେ ଭୟଙ୍କର ଥିଲା ଯେ କାରଖାନାରେ କାର୍ଯ୍ୟରତ ଶ୍ରମିକଙ୍କ ଶରୀର ଖଣ୍ଡିବଖଣ୍ଡିତ ହୋଇ ତଳେ ପଡ଼ି ରହିଛି। ଖବର ପାଇ ଘଟଣାସ୍ଥଳରେ ପୁଲିସ ପ୍ରଶାସନ ପହଞ୍ଚି ତଦନ୍ତ ଆରମ୍ଭ କରିଛି।

ବିସ୍ଫୋରଣର କାରଣ ଏ ପର୍ଯ୍ୟନ୍ତ ଅସ୍ପଷ୍ଟ ରହିଛି । ବିସ୍ଫୋରଣରେ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ପରିଚୟ ଜାଣିବାକୁ ଚେଷ୍ଟା କରାଯାଉଛି । କାରଖାନାରେ କେମିତି ବିସ୍ଫୋରଣ ହେଲା ସେ ନେଇ ଖୋଳତାଡ଼ ଆରମ୍ଭ କରିଛି ମଦୁରାଇ ପୁଲିସ।

ପରମ୍ପରା, ରୀତିନୀତି ତଥା ଟେକ୍ନୋଲୋଜିର ସମିଶ୍ରଣରେ ଦେଖିବାକୁ ମିଳିଛି ଏକ ନିଆରା ରିସେପ୍‌ସନ। ତାମିଲନାଡୁର ଦୀନେଶ ଏସ୍‌ପି ଓ ଜନଗନନ୍ଦିନୀ ରାମାସ୍ବାମୀଙ୍କ ମେଟାଭର୍ସ ରିସେପ୍‌ସନ୍‌ ଫେବୃଆରୀ ୬ରେ ଅନୁଷ୍ଠିତ ହୋଇଥିଲା। ଏହା ଏବେ ଏସିଆର ପ୍ରଥମ ‘ମେଟାଭର୍ସ ରିସେପସନ୍‌’ ଭାବେ ପରିଚିତି ଲାଭ କରିଛି। ଏହାର ଥିମ୍ ଥିଲା ହ୍ୟାରିପୋର୍ଟର ହର୍ଗୱାଟସ୍। ମେଟାଭର୍ସ ଶବ୍ଦ ସହିତ ଏବେ ସମସ୍ତେ ଅଳ୍ପ ବହୁତ ପରିଚିତ। ଲୋକେ ଇଣ୍ଟରନେଟ୍‌ ଦ୍ବାରା କାଳ୍ପନିକ ଜୀବନର ନିଆରା ଅନୁଭୂତି ନେଇଥାନ୍ତି। ଏହା ଅବିକଳ ଥ୍ରୀ-ଡି ଦୁନିଆ ଭଳି । ଜଣେ ବ୍ୟକ୍ତି ଘରେ ଥାଇ ବିଭିନ୍ନ ୱେବସାଇଟ୍‌, ସୋସିଆଲ ମିଡିଆ ଓ ଆପ୍‌ ଦ୍ବାରା ବାହାରେ ବୁଲିବାର ମଜାନେବା, ଅଫିସ୍‌ କାର୍ଯ୍ୟ କରିବା, ବନ୍ଧୁଙ୍କ ସହ ସମୟ ବିତାଇବା ତଥା ଖେଳକୁଦ କରିବାର ମଜା ଉଠାଇପାରିବେ।

ବର୍ତ୍ତମାନ ସାମାଜିକ ଗଣମାଧ୍ୟମରେ ଏହି ରିସପେସନ୍‌ର ଫଟୋ ଓ ଭିଡିଓ ସଭିଁଙ୍କ ଦୃଷ୍ଟିଆକର୍ଷଣ କରୁଛି। ତାମିଲନାଡୁର ଶିବଲିଙ୍ଗପୁରମ୍‌ ଗାଁରେ ପ୍ରଥମେ ପାରମ୍ପରିକ ରୀତିନୀତିରେ ବିବାହ କରିଥିଲେ ଦୀନେଶ ଓ ଜନଗନନ୍ଦିନୀ। ଦୀନେଶ ଆଇଆଇଟି ମାଡ୍ରାସରେ ପ୍ରୋଜେକ୍ଟ ଆସୋସିଏଟ୍ ଭାବେ କାମ କରୁଥିବା ବେଳେ ଜନଗନନ୍ଦିନୀ ଜଣେ ସପ୍ଟୱେର୍ ଡେଭଲପର। ଦୀନେଶ କହନ୍ତି, ପ୍ରଥମେ ୟୁଟ୍ୟୁବ୍‌ରେ ମେଟାଭର୍ସର ଏକ ଭିଡିଓ ଦେଖିଥିଲେ। ତା’ପରେ ଉକ୍ତ ଟେକ୍ନୋଲୋଜି ସହ ସମସ୍ତଙ୍କୁ ପରିଚିତ କରାଇବା ପାଇଁ ଏଭଳି ପରିକଳ୍ପନା କରିଥିବା କହିଛନ୍ତି ଦୀନେଶ। ପଲିଜନ ଟେକ୍ନୋଲୋଜି ବ୍ଲକ୍‌ଚେନ୍ ମାଧ୍ୟମରେ ଚେନ୍ନାଇର ଏକ ଷ୍ଟାର୍ଟଅପ୍ ରିସେପ୍‌ସନ ଆୟୋଜନର ଯୋଜନା କରିଥିଲା। ତେବେ ଏହାର ୧୨ ଜଣିଆ ସଦସ୍ୟ ଏହାକୁ ସଫଳ କରିବା ଲାଗି ଏ ଦିଗରେ ମାସେ କାଳ କାମ କରିଥିଲେ। ପାରମ୍ପରିକ ବେଶଭୂଷାରେ ଦୀନେଶ ଓ ଜନଗନନ୍ଦିନୀ ଭର୍ଚୁଆଲ ଅବତାରରେ ନଜର ଆସିଥିଲେ। ଏଥିରେ ଜର୍ମାନୀ, ଅଷ୍ଟ୍ରେଲିଆ ଆଦିରୁ ପ୍ରାୟ ୬ ହଜାର ଅତିଥି ସାମିଲ ହୋଇଥିଲେ।

ସେହିପରି ଫୁଡ୍ ଡେଲିଭରି ମାଧ୍ୟମରେ ଅତିଥିଙ୍କ ପାଖକୁ ଖାଦ୍ୟ ପହଞ୍ଚାଇବାର ବନ୍ଦୋବସ୍ତ କରାଯାଇଥିଲା। ଏହି ଇଭେଣ୍ଟକୁ ସ୍ପନସର କରିଥିଲା କଲନସ୍ବିଚ୍‌। ରିସେପ୍‌ସନର ଅନ୍ୟତମ ଆକର୍ଷଣ ଥିଲା କନ୍ୟାଙ୍କ ଦିବଂଗତ ବାପା ଏଥିରେ ସାମିଲ ହେବା। ତାଙ୍କ ବାପାଙ୍କର ରିଅଲଷ୍ଟିକ୍ ଥ୍ରୀଡି ଭର୍ଚୁଆଲ ଅବତାରକୁ ଏନ୍‌ଏଫ୍‌ଟିରେ ତିଆରି କରାଯାଇଥିଲା। ସେ ଅତିଥିମାନଙ୍କୁ ସ୍ବାଗତ କରୁଥିବାର ଦେଖାଯାଇଥିଲେ। ଏହି ଭର୍ଚୁଆଲ ରିସେପ୍‌ସନ୍ ପାଇଁ ପାଖାପାଖି ୧,୫୦,୦୦୦ ଟଙ୍କା ଖର୍ଚ୍ଚ ହୋଇଥିଲା।