ଦୀର୍ଘ ଅର୍ଦ୍ଧ ଶତାବ୍ଦୀରୁ ଅଧିକ ସମୟ ପରେ ମଣିଷକୁ ନେଇ ଚନ୍ଦ୍ର ଅଭିମୁଖେ ଯାଇଥିବା ନାସା (NASA) ର ଐତିହାସିକ ଅନ୍ତରୀକ୍ଷ ମିଶନ ଆର୍ଟେମିସ୍-୨ (Artemis II) ସଫଳତାର ସହ ପୃଥିବୀକୁ ଫେରିଛି। ଶୁକ୍ରବାର ଦିନ (୧୦ ଏପ୍ରିଲ ୨୦୨୬) ଆମେରିକାର ସାନ ଡିଏଗୋ ଉପକୂଳ ନିକଟସ୍ଥ ପ୍ରଶାନ୍ତ ମହାସାଗରରେ ଓରିଅନ୍ କ୍ୟାପସୁଲ୍ ବା 'ଇଣ୍ଟିଗ୍ରିଟି' ସୁରକ୍ଷିତ ଭାବେ ସ୍ପ୍ଲାସ୍‌ଡାଉନ୍ (Splashdown) କରିଛି। ଏହା ସହିତ ଏହି ମିଶନରେ ଯାଇଥିବା ଚାରି ଜଣ ମହାକାଶଚାରୀ ସୁରକ୍ଷିତ ଭାବେ ପୃଥିବୀ ପୃଷ୍ଠରେ ପହଞ୍ଚିଛନ୍ତି।

ଐତିହାସିକ ରେକର୍ଡ ଓ ମହାକାଶଚାରୀ

ଏହି ୧୦ ଦିନିଆ ଚନ୍ଦ୍ର ଯାତ୍ରାରେ ମୋଟ ୪ ଜଣ ମହାକାଶଚାରୀ ସାମିଲ ଥିଲେ। ସେମାନେ ହେଲେ ନାସାର କମାଣ୍ଡର ରିଡ୍ ୱାଇଜମ୍ୟାନ୍ (Reid Wiseman), ପାଇଲଟ୍ ଭିକ୍ଟର ଗ୍ଲୋଭର (Victor Glover), ମିଶନ୍ ସ୍ପେଶାଲିଷ୍ଟ ଖ୍ରୀଷ୍ଟିନା କୋଚ୍ (Christina Koch) ଏବଂ କାନାଡା ସ୍ପେସ୍ ଏଜେନ୍ସିର ମହାକାଶଚାରୀ ଜେରେମି ହାନ୍‌ସେନ୍ (Jeremy Hansen)। ଏହି ମିଶନ ଆପୋଲୋ-୧୭ (୧୯୭୨) ପରେ ପ୍ରଥମ ଥର ପାଇଁ ମଣିଷକୁ ନେଇ ଚନ୍ଦ୍ର ନିକଟତର ହୋଇଥିଲା। କେବଳ ସେତିକି ନୁହେଁ, ଏହି ମହାକାଶଯାନ ପୃଥିବୀଠାରୁ ପ୍ରାୟ ୨,୫୨,୭୫୬ ମାଇଲ୍ ଦୂରକୁ ଯାଇ ମାନବ ମହାକାଶ ଉଡ଼ାଣ ଇତିହାସରେ ଏକ ନୂଆ ରେକର୍ଡ ସୃଷ୍ଟି କରିଛି।

ସଫଳ ଅବତରଣର ରୋମାଞ୍ଚକର ମୁହୂର୍ତ୍ତ

ପୃଥିବୀର ବାୟୁମଣ୍ଡଳରେ ପ୍ରବେଶ କରିବା ସମୟରେ ଓରିଅନ୍ କ୍ୟାପସୁଲ୍‌ର ବେଗ ଘଣ୍ଟା ପ୍ରତି ପ୍ରାୟ ୨୫,୦୦୦ ମାଇଲ୍ ଥିଲା ଏବଂ ଏହାର ତାପମାତ୍ରା ପ୍ରାୟ ୫,୦୦୦ ଡିଗ୍ରୀ ଫାରେନ୍‌ହାଇଟ୍ ରେ ପହଞ୍ଚିଥିଲା। ଏହି ସମୟରେ ପ୍ରାୟ ୬ ମିନିଟ୍ ପର୍ଯ୍ୟନ୍ତ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ତେବେ ତିନୋଟି ବୃହତ୍ ଲାଲ୍ ଏବଂ ଧଳା ପାରାସୁଟ୍ ସାହାଯ୍ୟରେ ଇଷ୍ଟର୍ଣ୍ଣ ଟାଇମ୍ ରାତି ୮:୦୭ ରେ ଏହା ସୁରକ୍ଷିତ ଭାବେ ସମୁଦ୍ରରେ ଅବତରଣ କରିଥିଲା।

ଭବିଷ୍ୟତ ପାଇଁ ନୂଆ ରାସ୍ତା ଉନ୍ମୁକ୍ତ

ଆମେରିକୀୟ ନୌସେନା ଏବଂ ନାସାର ମିଳିତ ଉଦ୍ଧାରକାରୀ ଦଳ ହେଲିକପ୍ଟର ଯୋଗେ ମହାକାଶଚାରୀମାନଙ୍କୁ ଉଦ୍ଧାର କରି ୟୁଏସ୍ଏସ୍ ଜନ୍ ପି. ମୁର୍ଥା (USS John P. Murtha) ନାମକ ଜାହାଜକୁ ଆଣିଥିଲେ, ଯେଉଁଠାରେ ସେମାନଙ୍କର ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା। ଆର୍ଟେମିସ୍-୨ ର ଏହି ଅଦ୍ଭୁତପୂର୍ବ ସଫଳତା ନାସାର ଆଗାମୀ ମିଶନ ଆର୍ଟେମିସ୍-୩ (Artemis III) ଏବଂ ଆର୍ଟେମିସ୍-୪ (Artemis IV) ପାଇଁ ଏକ ଦୃଢ଼ ମୂଳଦୁଆ ପକାଇଛି, ଯାହା ମାଧ୍ୟମରେ ମଣିଷ ପୁଣି ଥରେ ଚନ୍ଦ୍ର ପୃଷ୍ଠରେ ପାଦ ଥାପିବାକୁ ଲକ୍ଷ୍ୟ ରଖିଛି।

ନୂଆଦିଲ୍ଲୀ: ଇତିହାସ ରଚିଲା ନାସାର ବହୁ ପ୍ରତୀକ୍ଷିତ ଆର୍ଟେମିସ୍-୨ (Artemis II) ମିଶନ । ଚନ୍ଦ୍ର ଅଭିମୁଖେ ୪ ଜଣିଆ ମହାକାଶଚାରୀଙ୍କ ୧୦ ଦିନିଆ ଐତିହାସିକ ଯାତ୍ରା ଆରମ୍ଭ କରିଛନ୍ତି।  ଏହି ଯାତ୍ରା ମାନବ ଇତିହାସରେ ପୃଥିବୀ ଠାରୁ ସବୁଠାରୁ ଦୂରକୁ ଯିବାର ଏକ ନୂତନ ରେକର୍ଡ ସୃଷ୍ଟି କରିବାର ସମ୍ଭାବନା ରହିଛି। ଆମେରିକାର ଫ୍ଲୋରିଡାସ୍ଥିତ କେନେଡି ସ୍ପେଶ୍‌ ସେଣ୍ଟରରୁ ଭାରତୀୟ ସମୟ ଅନୁସାରେ ଗୁରୁବାର ପ୍ରତ୍ୟୁଷ ୩ ଟା ୫୪ ମିନିଟରେ ସବୁଠୁ ଶକ୍ତିଶାଳୀ ରକେଟ ସ୍ପେଶ ଲଞ୍ଚ ସିଷ୍ଟମ୍‌ (ଏସ୍‌ଏଲ୍‌ଏସ୍‌) ମାଧ୍ୟମରେ ଓରିଅନ କ୍ୟାପସୁଲ୍‌ରେ ବସି ଏହି ୪ ଜଣ ମହାକାଶଚାରୀ ଚନ୍ଦ୍ର ଅଭିମୁଖେ ଯାତ୍ରା କରିଥିଲେ । ୫୪ ବର୍ଷ ପରେ ନାସାର ଏହା ପ୍ରଥମ କ୍ରୁ ମିଶନ ।

ଏହି ମିଶନରେ ମହାକାଶଚାରୀମାନେ ଚନ୍ଦ୍ର ପୃଷ୍ଠରେ ଓହ୍ଲାଇବେ ନାହିଁ, ବରଂ କେବଳ ଚନ୍ଦ୍ରର ଚାରିପଟେ ବୁଲି ପୃଥିବୀକୁ ଫେରିବେ । ପ୍ରାୟ ୧୦ ଦିନର ଏହି ଯାତ୍ରାରେ ସେମାନେ ମହାକାଶ ଯାନର ଅମ୍ଳଜାନ, ଯୋଗାଯୋଗ ଏବଂ ନିରାପତ୍ତା ବ୍ୟବସ୍ଥାକୁ ଯାଞ୍ଚ କରିବେ । ଆସନ୍ତା ଏପ୍ରିଲ ୧୦ ତାରିଖ ବେଳକୁ ଏହି ମହାକାଶ ଯାନ ପ୍ରଶାନ୍ତ ମହାସାଗରରେ ଅବତରଣ କରିବାର ସୂଚନା ରହିଛି । ଏହି ସଫଳତା ପରେ ନାସା ‘ଆର୍ଟମସ୍-୩’ ମିଶନରେ ମଣିଷକୁ ଚନ୍ଦ୍ର ପୃଷ୍ଠରେ ଓହ୍ଲାଇବା ପାଇଁ ଯୋଜନା ରଖିଛି । ​

ଏହି ଅନ୍ତର୍ଜାତୀୟ ଦଳରେ ନାସାର ମହାକାଶଚାରୀ ରିଡ୍ ୱାଇଜମ୍ୟାନ୍ (Reid Wiseman), ଭିକ୍ଟର ଗ୍ଲୋଭର୍ (Victor Glover), ଖ୍ରୀଷ୍ଟିନା କୋଚ୍ (Christina Koch) ଏବଂ କାନାଡିୟାନ ସ୍ପେସ୍ ଏଜେନ୍ସି (CSA) ର ଜେରେମି ହାନସେନ୍ (Jeremy Hansen) ସାମିଲ ଅଛନ୍ତି। ଅର୍ଦ୍ଧ ଶତାବ୍ଦୀରୁ ଅଧିକ ସମୟ ପରେ ମଣିଷ ପୁଣିଥରେ ଚନ୍ଦ୍ରର ନିକଟତର ହେବାକୁ ଯାଉଛି। ଏହି ମିଶନ ଆପୋଲୋ (Apollo) ଯୁଗର ଦୂରତା ରେକର୍ଡକୁ ଭାଙ୍ଗି ମହାକାଶ ଗବେଷଣାରେ ଏକ ନୂଆ ମାଇଲଖୁଣ୍ଟ ସ୍ଥାପନ କରିବ ବୋଲି ଆଶା କରାଯାଉଛି।

ଏହି ମିଶନର ନେତୃତ୍ୱ ନେଉଛନ୍ତି ୫୦ ବର୍ଷୀୟ ମିଶନ୍ କମାଣ୍ଡର ରିଡ୍ ୱାଇଜମ୍ୟାନ୍, ଯିଏକି ପୂର୍ବରୁ ଆନ୍ତର୍ଜାତୀୟ ମହାକାଶ କେନ୍ଦ୍ର (ISS) ରେ ୧୬୫ ଦିନ ବିତାଇଥିଲେ। ସେହିପରି ଓରିଅନ୍ (Orion) ମହାକାଶଯାନର ପାଇଲଟ୍ ଭାବେ ଅଛନ୍ତି ୪୯ ବର୍ଷୀୟ ଆମେରିକୀୟ ନୌସେନାର ପୂର୍ବତନ ଅଧିକାରୀ ଭିକ୍ଟର ଗ୍ଲୋଭର୍ ଅଛନ୍ତି । ସେ ଚନ୍ଦ୍ରକୁ ଯାତ୍ରା କରିବାରେ ପ୍ରଥମ କୃଷ୍ଣକାୟ ବ୍ୟକ୍ତି ହେବାର ଗୌରବ ଅର୍ଜନ କରିବେ।

ଅନ୍ୟପକ୍ଷରେ ୪୭ ବର୍ଷୀୟା ମିଶନ୍ ସ୍ପେଶାଲିଷ୍ଟ ଖ୍ରୀଷ୍ଟିନା କୋଚ୍ ଚନ୍ଦ୍ର କକ୍ଷପଥରେ ପହଞ୍ଚିବାରେ ପ୍ରଥମ ମହିଳା ହେବାକୁ ଯାଉଛନ୍ତି। ଏହି ତିନି ଆମେରିକୀୟଙ୍କ ସହ କାନାଡାର ୫୦ ବର୍ଷୀୟ ଜେରେମି ହାନସେନ୍ ସାମିଲ ଅଛନ୍ତି, ଯିଏକି ଚନ୍ଦ୍ରର ନିକଟବର୍ତ୍ତୀ ଅଞ୍ଚଳକୁ ଯାତ୍ରା କରିବାରେ ପ୍ରଥମ ଅଣ-ଆମେରିକୀୟ ହେବେ।