କେନ୍ଦ୍ର ସରକାରଙ୍କ ଦ୍ୱାରା ଲାଗୁ ହୋଇଥିବା ନୂଆ ଲେବର କୋଡ୍ (New Labour Code) ଅଧୀନରେ ବେସରକାରୀ କ୍ଷେତ୍ରର କର୍ମଚାରୀଙ୍କ ପାଇଁ ଅନେକ ନୂତନ ନିୟମ ଆସିଛି। ଏହି ନୂଆ ନିୟମ ଅନୁଯାୟୀ, ଏପ୍ରିଲ ୧ ରୁ ଦରମା ଢାଞ୍ଚାରେ ବଡ଼ ପରିବର୍ତ୍ତନ କରାଯାଇଛି, ଯାହା ଫଳରେ କର୍ମଚାରୀଙ୍କ ଇନ୍-ହ୍ୟାଣ୍ଡ ଦରମା (In-hand Salary) କମିବାକୁ ଯାଉଛି।

କ’ଣ ରହିଛି ନୂଆ ନିୟମ?

ନୂଆ ନିୟମ ଅନୁଯାୟୀ, ଜଣେ କର୍ମଚାରୀଙ୍କର ମୋଟ ଦରମାର ଅତିକମରେ ୫୦ ପ୍ରତିଶତ ବେସିକ୍ ଦରମା (Basic Pay) ଏବଂ ମହଙ୍ଗା ଭତ୍ତା (DA) ହେବା ବାଧ୍ୟତାମୂଳକ। ବାକି ୫୦ ପ୍ରତିଶତରେ ଏଚଆରଏ (HRA) ଏବଂ ଅନ୍ୟାନ୍ୟ ଭତ୍ତା ସାମିଲ ରହିବ। ପୂର୍ବରୁ କମ୍ପାନୀଗୁଡ଼ିକ ବେସିକ୍ ଦରମା କମ୍ ରଖି ଅନ୍ୟାନ୍ୟ ଭତ୍ତା ବଢ଼ାଇ ଦେଉଥିଲେ, ଯାହାଫଳରେ ଇପିଏଫ୍ (EPF) ଏବଂ ଗ୍ରାଚ୍ୟୁଇଟି ବାବଦରେ କମ୍ ଟଙ୍କା କଟୁଥିଲା। ମାତ୍ର ବର୍ତ୍ତମାନ ବେସିକ୍ ଦରମା ବୃଦ୍ଧି ପାଇବା ଯୋଗୁଁ ପିଏଫ୍ (PF) ଆକାରରେ ଅଧିକ ଅର୍ଥ କଟାଯିବ, ଯାହା ପ୍ରତ୍ୟକ୍ଷ ଭାବରେ ମାସିକ ମିଳୁଥିବା ଦରମାକୁ କମାଇବ।

କାହା ଉପରେ ପଡିବ ଏହି ନିୟମର ପ୍ରଭାବ?

ସରକାର ସ୍ପଷ୍ଟ କରିଛନ୍ତି ଯେ, ଏହି ନିୟମ କେବଳ ସେହି କର୍ମଚାରୀଙ୍କ କ୍ଷେତ୍ରରେ ପ୍ରଯୁଜ୍ୟ ହେବ ଯେଉଁମାନଙ୍କର ବେସିକ୍ ଦରମା ୧୫,୦୦୦ ଟଙ୍କା ରୁ ଅଧିକ ରହିଛି। ଯଦି କୌଣସି କର୍ମଚାରୀଙ୍କ ବେସିକ୍ ଦରମା ୧୫ ହଜାର ଟଙ୍କା କିମ୍ବା ତା’ଠାରୁ କମ୍, ତେବେ ସେମାନଙ୍କ ଉପରେ ଏହି ନୂଆ ଦରମା ଢାଞ୍ଚା ଲାଗୁ ହେବ ନାହିଁ ଏବଂ ସେମାନଙ୍କର ଇନ୍-ହ୍ୟାଣ୍ଡ ଦରମାରେ କୌଣସି କାଟ୍ ହେବ ନାହିଁ।

₹୫୦,୦୦୦ ଦରମା ଥିଲେ କେତେ ହେବ କ୍ଷତି?

ଆସନ୍ତୁ ଉଦାହରଣ ସହିତ ବୁଝିବା:

ଯଦି ଆପଣଙ୍କର ମାସିକ ମୋଟ ଦରମା ୫୦,୦୦୦ ଟଙ୍କା ଅଟେ। ପୂର୍ବ ନିୟମରେ, ଯଦି ବେସିକ୍ ଦରମା ୨୦,୦୦୦ ଟଙ୍କା ଥିଲା, ତେବେ ତାର ୧୨% ହିସାବରେ ପିଏଫ୍ ବାବଦକୁ ୨,୪୦୦ ଟଙ୍କା କଟାଯାଉଥିଲା। ଫଳରେ ହାତକୁ ୪୭,୬୦୦ ଟଙ୍କା ମିଳୁଥିଲା।

କିନ୍ତୁ ନୂଆ ନିୟମ ଅନୁସାରେ, ୫୦ ହଜାରରୁ ଅତିକମରେ ୨୫,୦୦୦ ଟଙ୍କା (୫୦%) ବେସିକ୍ ଦରମା ହେବ। ଏବେ ୨୫,୦୦୦ ର ୧୨% ଅର୍ଥାତ୍ ୩,୦୦୦ ଟଙ୍କା ପିଏଫ୍ ବାବଦକୁ କଟାଯିବ। ଏହାର ଅର୍ଥ ଆପଣଙ୍କର ଇନ୍-ହ୍ୟାଣ୍ଡ ଦରମା କମି ଏବେ ୪୭,୦୦୦ ଟଙ୍କା ହୋଇଯିବ।

ଭବିଷ୍ୟତ ପାଇଁ ଲାଭଦାୟକ

ଯଦିଓ ନୂଆ ଲେବର କୋଡ୍ ଲାଗୁ ହେବା ଦ୍ୱାରା ବର୍ତ୍ତମାନ ହାତକୁ ଆସୁଥିବା ଦରମା କମିଯାଉଛି, କିନ୍ତୁ ଭବିଷ୍ୟତ ପାଇଁ ଏହା ବେଶ୍ ଲାଭଦାୟକ ପ୍ରମାଣିତ ହେବ। କର୍ମଚାରୀଙ୍କର ପ୍ରୋଭିଡେଣ୍ଟ ଫଣ୍ଡ (PF) ଏବଂ ଗ୍ରାଚ୍ୟୁଇଟି ଆକାରରେ ଅଧିକ ସଞ୍ଚୟ ହେବ, ଯାହା ଅବସର ଗ୍ରହଣ କରିବା ସମୟରେ ଏକ ବଡ଼ ଆର୍ଥିକ ସୁରକ୍ଷା ପ୍ରଦାନ କରିବ।

ହାଇଦରାବାଦ: ବୃଦ୍ଧ ମାତାପିତାଙ୍କୁ ବୋଝ ଭାବୁଥିବା ପିଲାଙ୍କୁ କଠୋର ଶାସ୍ତି ମିଳିବ। ବାପାମା’ଙ୍କ ଯତ୍ନ ନ ନେଇ ଅସହାୟ ଅବସ୍ଥାରେ ଛାଡୁଥିବା ସନ୍ତାନସନ୍ତତିଙ୍କୁ ଆର୍ଥିକ ଛାଟ ଲାଗିବ। ଏଭଳି କରୁଥିବା କର୍ମଚାରୀଙ୍କ ମୋଟ ଦରମାରୁ ୧୫ ପ୍ରତିଶତ କିମ୍ବା ୧୦ ହଜାର ଟଙ୍କା କାଟି ଦିଆଯିବ। ତେଲଙ୍ଗାନା ବିଧାନସଭାରେ ଏଭଳି କଠୋର ଆଇନ ସର୍ବସମ୍ମତି କ୍ରମେ ପାରିତ ହୋଇଯାଇଛି। ଏହାର ନାମ ‘ପ୍ୟାରେଣ୍ଟାଲ ସପୋର୍ଟ ବିଲ୍‌-୨୦୨୬’ ରହିଛି। ଏହାକୁ ଏ ପର୍ଯ୍ୟନ୍ତ ଦେଶରେ ଥିବା ସବୁଠାରୁ କଠୋର ଆଇନ ବୋଲି କୁହାଯାଉଛି। କାରଣ ଉଭୟ ସରକାରୀ ଏବଂ ବେସରକାରୀ କର୍ମଚାରୀଙ୍କୁ ଏହି ଆଇନ ପରିସରଭୂକ୍ତ କରାଯାଇଛି। ପ୍ରଥମ ଥର ପାଇଁ ବିଧାୟକ ଏବଂ ସାଂସଦଙ୍କୁ ମଧ୍ୟ ଏହି ଆଇନରେ ସାମିଲ କରାଯାଇଛି। ଘରୋଇ କ୍ଷେତ୍ରର କର୍ମଚାରୀ, ବିଧାୟକ, ସାଂସଦ, ସରପଞ୍ଚ ଆଦିଙ୍କୁ ମଧ୍ୟ ଉତ୍ତରଦାୟୀ କରାଯାଇଛି। ସବୁଠାରୁ ବଡ଼ କଥା ହେଉଛି ଯେ ଏହି ଅଭିଯୋଗ ପାଇଁ ମାତାପିତାଙ୍କୁ କୋର୍ଟକୁ ଯିବାକୁ ପଡ଼ିବ ନାହିଁ। ସେମାନେ ସିଧା ଜିଲ୍ଲାପାଳଙ୍କ ପାଖରେ ଆବେଦନ କରିପାରିବେ। ଯାଞ୍ଚରେ ଅଭିଯୋଗ ସତ୍ୟ ସାବ୍ୟସ୍ତ ହେଲେ ଜିଲ୍ଲାପାଳ ସିଧା କମ୍ପାନୀ କିମ୍ବା ବିଭାଗୀୟ କର୍ମଚାରୀଙ୍କ ଦରମା କାଟି ମାତାପିତାଙ୍କ ଖାତାରେ ଜମା କରିବାକୁ ନିର୍ଦ୍ଦେଶ ଦେଇପାରିବେ। 

ଏହି ବିଲ୍‌ ଉପସ୍ଥାପନ କରି ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀ ଭାବପ୍ରବଣ ହୋଇଯାଇଥିଲେ। ସେ କହିଥିଲେ ଯେ ମୁଁ ଜଣେ ଏପରି ଜନପ୍ରତିନିଧିଙ୍କୁ ଜାଣିଛି ଯାହାଙ୍କ ପିତା କର୍କଟ ପ୍ରାଣ ହରାଇ ଥିଲେ। ମାତ୍ର ପୁଅ ତାଙ୍କର ଖବର ସୁଦ୍ଧା ରଖି ନ ଥିଲା। ପିତାମାତାଙ୍କ ଆଖିରେ ଲୁହ ଆସିବା ସମାଜ ପତନର ସଙ୍କେତ ଦିଏ। ସକ୍ଷମ ହୋଇ ମଧ୍ୟ ନିଜର ପ୍ରିୟଜନମାନଙ୍କୁ ପରିତ୍ୟାଗ କରୁଥିବା ବ୍ୟକ୍ତିଙ୍କୁ ସମାଜ ବାସନ୍ଦ କରିବା ଉଚିତ ବୋଲି ରେଭନ୍ତ କହିଥିଲେ।