ଇରାନ ସହିତ ଲାଗି ରହିଥିବା ଉତ୍ତେଜନା ଏବଂ ସମ୍ଭାବ୍ୟ ଯୁଦ୍ଧ ପରିସ୍ଥିତି ମଧ୍ୟରେ ଆମେରିକା ଏହାର ସାମରିକ ପ୍ରସ୍ତୁତିକୁ ଅଧିକ ବ୍ୟାପକ କରିଛି। ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ (WSJ)ର ରିପୋର୍ଟ ଅନୁଯାୟୀ, ଆମେରିକାର ପ୍ରତିରକ୍ଷା ମନ୍ତ୍ରୀ ପିଟ୍ ହେଗସେଥ୍ ମଧ୍ୟପ୍ରାଚ୍ୟରେ ଆମେରିକୀୟ ସୈନ୍ୟ ଏବଂ ଯୁଦ୍ଧାସ୍ତ୍ର ମୁତୟନ ଅବଧିକୁ ୨୦୨୭ ପର୍ଯ୍ୟନ୍ତ ବୃଦ୍ଧି କରିଛନ୍ତି। ବିନା କୌଣସି ଔପଚାରିକ ଘୋଷଣାରେ ଏହି ସୈନ୍ୟ ଅବଧି ବୃଦ୍ଧି କରାଯାଇଛି।

ଟ୍ରମ୍ପଙ୍କ ନୂଆ ରଣନୀତି

ଏହି ପଦକ୍ଷେପ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଇରାନ ବିରୋଧରେ ବିଭିନ୍ନ ସାମରିକ ଏବଂ ଅର୍ଥନୈତିକ ବିକଳ୍ପ ପ୍ରଦାନ କରିବା ଉଦ୍ଦେଶ୍ୟରେ ନିଆଯାଇଛି। ବର୍ତ୍ତମାନ ମଧ୍ୟପ୍ରାଚ୍ୟରେ ପ୍ରାୟ ୫୦,୦୦୦ ଆମେରିକୀୟ ସୈନ୍ୟ ମୁତୟନ ଅଛନ୍ତି। ଏହା ସହିତ ୧୯ଟି ଯୁଦ୍ଧପୋତ, ବାୟୁ ପ୍ରତିରକ୍ଷା ୟୁନିଟ୍ ଏବଂ ପାରାଟ୍ରୁପରମାନେ ମଧ୍ୟ ସକ୍ରିୟ ଅଛନ୍ତି। ଆମେରିକା ପ୍ରଶାସନ ଇରାନ ଉପରେ କ୍ରମାଗତ ଆର୍ଥିକ ଚାପ ପକାଇ ଏହାର ପରମାଣୁ କାର୍ଯ୍ୟକ୍ରମକୁ ଧ୍ୱଂସ କରିବା କିମ୍ବା ସେଠାକାର ଶାସନ ବ୍ୟବସ୍ଥାର ପତନ ଘଟାଇବାକୁ ଲକ୍ଷ୍ୟ ରଖିଛି।

ସେନା ଉପରେ ପଡ଼ୁଛି ପ୍ରଭାବ

ସେନା ମୁତୟନ ଅବଧି ଦୀର୍ଘ ହେବା କାରଣରୁ ଆମେରିକୀୟ ଯବାନ, ସେମାନଙ୍କ ପରିବାର ଏବଂ ସାମରିକ ଉପକରଣଗୁଡ଼ିକର ରକ୍ଷଣାବେକ୍ଷଣ ଉପରେ ବ୍ୟାପକ ପ୍ରଭାବ ପଡ଼ୁଛି। ସାଧାରଣତଃ ଆମେରିକୀୟ ବାୟୁ ପ୍ରତିରକ୍ଷା କର୍ମଚାରୀଙ୍କ ମୁତୟନ ଅବଧି ୯ ମାସ ଥାଏ, କିନ୍ତୁ ଏବେ ତାହାକୁ ବୃଦ୍ଧି କରି ୧୨ ମାସ କରାଯାଇଛି। ଲଗାତାର ଭାବେ ଯୁଦ୍ଧପୋତଗୁଡ଼ିକ ମୁତୟନ ରହିବା ଫଳରେ ରକ୍ଷଣାବେକ୍ଷଣ ସମସ୍ୟା ମଧ୍ୟ ଦେଖାଦେଉଥିବା ରିପୋର୍ଟରେ କୁହାଯାଇଛି।

ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ଏବେ ଏକ ନୂଆ ଏବଂ ଭୟଙ୍କର ମୋଡ଼ ନେବାକୁ ଯାଉଛି। ରିପୋର୍ଟ ଅନୁଯାୟୀ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ (Donald Trump) ଇରାନ ଉପରେ ସ୍ଥଳପଥରେ ଆକ୍ରମଣ କରିବାକୁ ବିଚାର କରୁଛନ୍ତି। ପେଣ୍ଟାଗନ ପକ୍ଷରୁ ଏହି ସମ୍ଭାବ୍ୟ ଗ୍ରାଉଣ୍ଡ ଅପରେସନ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଥିବା ବେଳେ, ହଜାର ହଜାର ସଂଖ୍ୟାରେ ଆମେରିକୀୟ ସୈନ୍ୟ ଏବଂ ମେରାଇନ୍ସ ମଧ୍ୟପ୍ରାଚ୍ୟରେ ପହଞ୍ଚିବାରେ ଲାଗିଛନ୍ତି।

ଇୱୋ ଜିମା ସହ ତୁଳନା ଏବଂ ବିବାଦ

ଏହି ପ୍ରସଙ୍ଗରେ ରିପବ୍ଲିକାନ୍ ସିନେଟର ଲିଣ୍ଡସେ ଗ୍ରାହାମ୍ (Lindsey Graham) ଏକ ବିବାଦୀୟ ବୟାନ ଦେଇଛନ୍ତି। ସେ ଆମେରିକୀୟ ମେରାଇନ୍ସ ଦ୍ୱାରା ଇରାନର ପ୍ରମୁଖ ତୈଳ କେନ୍ଦ୍ର ଖାର୍ଗ ଦ୍ୱୀପ (Kharg Island) କୁ ଦଖଲ କରିବାକୁ ପରାମର୍ଶ ଦେଇଛନ୍ତି। ଏହି ଅପରେସନକୁ ସେ ଦ୍ୱିତୀୟ ବିଶ୍ୱଯୁଦ୍ଧର ସବୁଠାରୁ ରକ୍ତାକ୍ତ ସଂଘର୍ଷ ଇୱୋ ଜିମା (Iwo Jima) ଯୁଦ୍ଧ ସହ ତୁଳନା କରି କହିଛନ୍ତି ଯେ, "ଆମେ ଇୱୋ ଜିମା କରିଥିଲୁ, ଆମେ ଏହା ମଧ୍ୟ କରିପାରିବୁ"। ତେବେ ତାଙ୍କର ଏହି ବୟାନକୁ ଅନେକ ରାଜନେତା ଏବଂ ସାମରିକ ବିଶେଷଜ୍ଞମାନେ ତୀବ୍ର ନିନ୍ଦା କରିଛନ୍ତି।

ଆଲୋଚକଙ୍କ ମତରେ ଏହା ଏକ ମହାବିପତ୍ତି

ଅନେକ ପ୍ରତିରକ୍ଷା ବିଶେଷଜ୍ଞ ଏବଂ ଆମେରିକୀୟ ସାଂସଦମାନେ ଏହି ଗ୍ରାଉଣ୍ଡ ଅପରେସନକୁ ଏକ ବିପର୍ଯ୍ୟୟ ବା ମହାବିପତ୍ତି (Disaster) ବୋଲି ବର୍ଣ୍ଣନା କରିଛନ୍ତି। ଟ୍ରମ୍ପଙ୍କ ପୂର୍ବତନ ଆତଙ୍କବାଦ ନିରୋଧୀ ଅଧିକାରୀ ଜୋ କେଣ୍ଟ (Joe Kent) ଚେତାବନୀ ଦେଇଛନ୍ତି ଯେ, ଏହା ଇରାନକୁ ଏକ ସୁଯୋଗ ଦେବ ଯାହାଦ୍ୱାରା ସେମାନେ ଆମେରିକୀୟ ସୈନ୍ୟଙ୍କ ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ମାଡ଼ କରିପାରିବେ। ଏହି ସମ୍ଭାବ୍ୟ ଆକ୍ରମଣ କେବଳ ଆମେରିକୀୟ ସୈନ୍ୟଙ୍କ ଜୀବନ ପ୍ରତି ବିପଦ ସୃଷ୍ଟି କରିବ ନାହିଁ, ବରଂ ଯୁଦ୍ଧକୁ ଆହୁରି ଭୟଙ୍କର ସ୍ଥିତିକୁ ନେଇଯିବ ବୋଲି ସମାଲୋଚକମାନେ ମତ ଦେଉଛନ୍ତି।

ଟ୍ରମ୍ପଙ୍କ ଲକ୍ଷ୍ୟ ଏବଂ ସୈନ୍ୟ ମୁତୟନ

ଏକ ସାକ୍ଷାତକାରରେ ଡୋନାଲ୍ଡ ଟ୍ରମ୍ପ ଇରାନରୁ "ତୈଳ ନେବା" ପାଇଁ ନିଜର ଇଚ୍ଛା ପ୍ରକାଶ କରିଛନ୍ତି, ଯାହାକି କେବଳ ସ୍ଥଳପଥ ଆକ୍ରମଣ ଦ୍ୱାରା ହିଁ ସମ୍ଭବ ହୋଇପାରିବ। ବର୍ତ୍ତମାନ ସୁଦ୍ଧା ମଧ୍ୟପ୍ରାଚ୍ୟରେ ପ୍ରାୟ ୫୦,୦୦୦ ଆମେରିକୀୟ ସୈନ୍ୟ ମୁତୟନ ହୋଇଥିବା ବେଳେ, ଅତିରିକ୍ତ ୨,୫୦୦ ମେରାଇନ୍ସ ଏବଂ ଅନ୍ୟାନ୍ୟ ସେନା ୟୁନିଟ୍ ଉକ୍ତ ଅଞ୍ଚଳରେ ପହଞ୍ଚିଛନ୍ତି। ଯଦିଓ ଆମେରିକା ସରକାର ଏକ ପୂର୍ଣ୍ଣାଙ୍ଗ ଯୁଦ୍ଧ ପରିବର୍ତ୍ତେ ସ୍ୱତନ୍ତ୍ର ଅପରେସନ ଏବଂ ଚଢ଼ାଉ ଉପରେ ଧ୍ୟାନ ଦେଉଛନ୍ତି ବୋଲି କହୁଛନ୍ତି, ତଥାପି ଏହା ଏକ ଦୀର୍ଘକାଳୀନ ଯୁଦ୍ଧର ରୂପ ନେବାର ଆଶଙ୍କା ଦେଖାଦେଇଛି।