ଦକ୍ଷିଣ ଭାରତୀୟ ସିନେମାର ଜଣାଶୁଣା ଅଭିନେତ୍ରୀ ରୁକ୍ମିଣୀ ବସନ୍ତ ତାଙ୍କର ଏକ ନକଲି ଏଆଇ (AI) ନିର୍ମିତ ବିକିନି ଫଟୋ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି। କିଛି ଦୁର୍ବୃତ୍ତ ତାଙ୍କର ମୁହଁକୁ ଏକ ଭିନ୍ନ ଫଟୋ ସହ ଯୋଡ଼ି ଇଣ୍ଟରନେଟରେ ଛାଡ଼ିଛନ୍ତି। ଏହି ଘଟଣାକୁ ଏକ ଗମ୍ଭୀର ବ୍ୟକ୍ତିଗତ ଅଧିକାରର ଉଲ୍ଲଂଘନ ଦର୍ଶାଇ ଅଭିନେତ୍ରୀ ଦୋଷୀମାନଙ୍କ ବିରୋଧରେ ଆଇନଗତ ଏବଂ ସାଇବର୍ କ୍ରାଇମ୍ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିଷ୍ପତ୍ତି ନେଇଛନ୍ତି।

ସୋସିଆଲ୍ ମିଡିଆରେ ରୁକ୍ମିଣୀଙ୍କ ବୟାନ

ନିଜର ଇନଷ୍ଟାଗ୍ରାମ୍ ଏବଂ ଏକ୍ସ (X) ଆକାଉଣ୍ଟରେ ଏକ ସ୍ପଷ୍ଟୀକରଣ ଜାରି କରି ରୁକ୍ମିଣୀ ଲେଖିଛନ୍ତି ଯେ, "ମୁଁ ଏବଂ ମୋ ଟିମ୍‌ର ନଜରକୁ ଆସିଛି ଯେ, ମୋ ନାମରେ କିଛି ନକଲି ଏଆଇ (AI) ଫଟୋଗୁଡ଼ିକ ଇଣ୍ଟରନେଟରେ ଘୁରି ବୁଲୁଛି। ମୁଁ ସ୍ପଷ୍ଟ ଭାବରେ ଜଣାଇବାକୁ ଚାହେଁ ଯେ, ଏହି ଫଟୋଗୁଡ଼ିକ ସମ୍ପୂର୍ଣ୍ଣ ରୂପେ ନକଲି ଏବଂ ମିଥ୍ୟା"। ସେ ଆହୁରି ମଧ୍ୟ କହିଛନ୍ତି ଯେ ଏଭଳି ପରିବର୍ତ୍ତିତ କଣ୍ଟେଣ୍ଟ୍‌ ପ୍ରସ୍ତୁତ କରିବା ଏବଂ ସେୟାର କରିବା ଅତ୍ୟନ୍ତ ଦାୟିତ୍ୱହୀନତା ଏବଂ ଗୋପନୀୟତାର ଉଲ୍ଲଂଘନ। ତେଣୁ ଏହି ମାମଲାକୁ ଗୁରୁତର ସହ ନେଇ ସେ ସାଇବର୍ କ୍ରାଇମ୍ ପୋଲିସ୍ ନିକଟରେ ଅଭିଯୋଗ କରିବା ପାଇଁ ପଦକ୍ଷେପ ନେଉଛନ୍ତି।

ଫ୍ୟାନ୍‌ମାନଙ୍କୁ କଲେ ନିବେଦନ

ନିଜ ବିବୃତ୍ତିରେ ଅଭିନେତ୍ରୀ ଲୋକମାନଙ୍କୁ ଅନୁରୋଧ କରିଛନ୍ତି ଯେ ସେମାନେ ଏଭଳି ନକଲି ଫଟୋ କିମ୍ବା ଭିଡିଓଗୁଡ଼ିକୁ ସେୟାର୍ କରିବା କିମ୍ବା ସେଥିରେ ଏନ୍‌ଗେଜ୍ ହେବାରୁ ଦୂରେଇ ରୁହନ୍ତୁ। ଗତ କିଛି ଦିନ ହେବ ଫିଲ୍ମ ଇଣ୍ଡଷ୍ଟ୍ରିରେ ଅନେକ ଅଭିନେତ୍ରୀ ଏଭଳି ଡିପ୍‌ଫେକ୍ (Deepfake) ଟେକ୍ନୋଲୋଜିର ଶିକାର ହେଉଛନ୍ତି, ଯାହା ମଧ୍ୟରେ ରଶ୍ମିକା ମନ୍ଦାନା ଏବଂ ଆଲିଆ ଭଟ୍ଟ ମଧ୍ୟ ସାମିଲ୍ ଅଛନ୍ତି।

ରୁକ୍ମିଣୀ ବସନ୍ତଙ୍କ ଆଗାମୀ ପ୍ରୋଜେକ୍ଟ

କର୍ମକ୍ଷେତ୍ରରେ ଦେଖିବାକୁ ଗଲେ, ରୁକ୍ମିଣୀ ଗତ ବର୍ଷ ବ୍ଲକ୍‌ବଷ୍ଟର ଫିଲ୍ମ 'କାନ୍ତାରା: ଚାପ୍ଟର ୧' ରେ ନଜର ଆସିଥିଲେ ଯାହା ତାଙ୍କୁ ଲୋକପ୍ରିୟତା ଦେଇଥିଲା। ସେ ବର୍ତ୍ତମାନ ପାନ୍-ଇଣ୍ଡିଆ ଷ୍ଟାର୍ ଯଶ୍ଙ୍କ ସହ ଆଗାମୀ ଫିଲ୍ମ 'ଟକ୍ସିକ୍' (Toxic) ରେ ନଜର ଆସିବେ। ଏହା ବ୍ୟତୀତ ସେ ଜୁନିୟର୍ ଏନ୍‌ଟିଆର୍ଙ୍କ (Jr NTR) ଆଗାମୀ ଫିଲ୍ମ 'ଡ୍ରାଗନ୍' (Dragon) ରେ ମଧ୍ୟ ଏକ ପ୍ରମୁଖ ଭୂମିକାରେ ଅଭିନୟ କରୁଛନ୍ତି।

ଭୁବନେଶ୍ୱର: ସାଇବର ଅପରାଧୀମାନେ ରାଜ୍ୟରେ ଆତଙ୍କ ଖେଳାଇଥିବା ବେଳେ ତରିକା ବଦଳାଇ ଲୋକଙ୍କୁ ଚୂନ ଲଗାଉଛନ୍ତି। ଅଜଣା ନମ୍ବରରୁ ଲୋକଙ୍କ ପାଖକୁ ଏପିକେ ଫାଇଲ୍‌‌ ପଠାଉଛନ୍ତି। ଆର୍‌‌ଟିଓ ଚାଲାଣ, ନିମନ୍ତ୍ରଣ କାର୍ଡ, ଟ୍ରାଫିକ ଚାଲାଣ, ଏସବିଆଇ, କେୱାଇସି ଅପଡେଟ, ସରକାରୀ ସବସିଡି, ଏସବିଆଇ ୟୋନୋ ଭଳି ଏପିକେ ଫାଇଲ୍‌‌ ପଠାଉଥିବାରୁ ଲୋକମାନେ ସହଜରେ ବିଶ୍ୱାସକୁ ନେଇ ଯାଉଛନ୍ତି। ଆଉ ଫାଇଲ୍‌‌ ଖୋଲିବା ମାତ୍ରେ ମୋବାଇଲ୍‌‌ ଫୋନ୍‌‌ ହ୍ୟାକ୍‌‌ କରି ଲକ୍ଷ ଲକ୍ଷ ଟଙ୍କା ଠକି ନେଉଛନ୍ତି। ଅନେକ ସାଧାରଣ ଲୋକ ସାଇବର ଠକଙ୍କ ’ଏପିକେ’ ଜାଲରେ ପଡ଼ୁଛନ୍ତି। କିଏ ପେନସନ ଟଙ୍କା ହରାଉଛି ତ ଆଉ କିଏ ଝିଅ ବାହାଘର ପାଇଁ ରଖିଥିବା ପୁଞ୍ଜି। ଏମିତିକି ଏପିକେ ଫାଇଲ୍‌‌ ମାଧ୍ୟମରେ ଫିକ୍ସ ଡିପୋଜିଟ୍‌‌ ଭାଙ୍ଗି ଆକାଉଣ୍ଟ ଖାଲି କରି ଦେଉଛନ୍ତି ସାଇବର ଠକ।

ପାଣ୍ଡରାର ଯଶୋବନ୍ତ ଜେନାଙ୍କ ହ୍ୱାଟ୍ସଆପକୁ ଆରଟିଓ ଚାଲାଣ ନାମରେ ଏକ ଏପିକେ ଫାଇଲ୍‌‌ ଆସିଥିଲା। ଚାଲାଣ ଆସିଥିବା ଭାବି ଯଶୋବନ୍ତ ଉକ୍ତ ଏପିକେ ଫାଇଲକୁ ଖୋଲିଥିଲେ। ଫାଇଲ୍‌‌ ଖୋଲିବା ମାତ୍ରକେ ତାଙ୍କ ମୋବାଇଲ ଫୋନରୁ ନିୟନ୍ତ୍ରଣ ହରାଇ ବସିଥିଲେ। ନିଜ କଣ୍‌‌ଟ୍ରୋଲକୁ ନେବାପରେ ସାଇବର ଠକ ଯଶୋବନ୍ତଙ୍କ ବ୍ୟାଙ୍କ୍‌‌ ଆକାଉଣ୍ଟରେ ଦୁଇଟି ହିତାଧିକାରୀଙ୍କ ଆକାଉଣ୍ଟ ଯୋଡ଼ିଥିଲେ। ଆଉ ଆଖି ପିଛୁଳାକେ ୭ ଲକ୍ଷ ଟଙ୍କା ଉଡ଼ାଇ ନେଇଥିଲେ। ସେହିପରି ନୀଳାଦ୍ରି ବିହାରର ବିଦ୍ୟୁତ ଭୁଷଣ ପରିଡ଼ାଙ୍କ ହ୍ୱାଟ୍ସଆପକୁ କ୍‌‌ରେଡିଟ୍‌‌ କାର୍ଡ ଆବେଦନ ଆବେଦନ କରିଥିଲେ। ପରବର୍ତ୍ତୀ ସମୟରେ ତାଙ୍କ ହ୍ୱାଟ୍ସଆପକୁ ବ୍ୟାଙ୍କ ଅଫ୍‌‌ ବରୋଦାର କ୍‌‌ରେଡିଟ୍‌‌ କାର୍ଡ ଭେରିଫିକେସନ ପାଇଁ ଏକ ଏପିକେ ଫାଇଲ୍‌‌ ଆସିଥିଲା। ସାଇବର ଠକ ନିଜକୁ ବ୍ୟାଙ୍କ ଅଧିକାରୀ ପରିଚୟ ଦେଇ ଭିଡିଓ କଲ୍‌‌ ମାଧ୍ୟମରେ ବିଭିନ୍ନ ତଥ୍ୟ ପୂରଣ କରିବାକୁ କହିଥିଲା। ଆଉ ଏହାପରେ ସାଇବର ଠକମାନେ ବିଦ୍ୟୁତଙ୍କର ଦୁଇଟି ଫିକ୍ସ ଡିପୋଜିଟକୁ ଭାଙ୍ଗି ବ୍ୟାଙ୍କ ଆକାଉଣ୍ଟରୁ ୬ ଲକ୍ଷ ୨୫ ହଜାର ଟଙ୍କା ଉଡ଼ାଇ ନେଇଥିଲେ।

ଇଏ କେବଳ ଦୁଇଟି ଘଟଣା ନୁହଁ, ଅନେକ ଲୋକ ସାଇବର ଠକଙ୍କ ’ଏପିକେ’ ଜାଲରେ ପଡ଼ୁଛନ୍ତି। ଏପିକେ ଫାଇଲ୍‌‌ ଇନଷ୍ଟଲ୍‌‌ କରିବା ମାତ୍ରେ ମୋବାଇଲର ଆକ୍‌‌ସେସ୍‌‌? ସହ ବ୍ୟକ୍ତିଗତ ତଥ୍ୟ ସାଇବର ଠକଙ୍କ ପାଖକୁ ପଳାଉଛି। ଆଉ ତା’ ପରେ ମୋବାଇଲର ନିୟନ୍ତ୍ରଣ ଠାରୁ ଆରମ୍ଭ କରି ବ୍ୟାଙ୍କ ଆକାଉଣ୍ଟର ଟଙ୍କା, ସବୁକିଛି ନେଇ ଯାଉଛନ୍ତି ସାଇବର ଠକ। 

ଏପିକେ ଇନଷ୍ଟଲ୍‌‌ କଲେ କ’ଣ ହୁଏ
ଏପିକେ ଫାଇଲ୍‌‌ ଇନଷ୍ଟଲ୍‌‌ କରିବା ଦ୍ୱାରା ସ୍ପାଇୱେୟାର ନାମକ କ୍ଷତିକାରକ ସଫ୍ଟୱେର ମୋବାଇଲରେ ପ୍ରବେଶ କରେ। ବ୍ୟବହାରକାରୀଙ୍କ ବିଭିନ୍ନ ଗୋପନୀୟ ତଥ୍ୟ, ଓଟିପି, ବ୍ୟାଙ୍କ ପାସୱାର୍ଡ, ଫଟୋ, ଭିଡିଓ ଓ କଲ୍‌‌ ରେକର୍ଡିଂ ଆଦି ସଂଗ୍ରହ କରେ। ଏଥିସହିତ ବ୍ୟବହାରୀଙ୍କ ବିନା ଅନୁମତିରେ ହ୍ୟାକର ବା ସାଇବର ଠକଙ୍କୁ ପଠାଇଦିଏ। ମୋବାଇଲର କ୍ୟାମେରା, ମାଇକ୍‌‌, ଜିପିଏସ୍‌‌ ଆପେ ଆପେ ଅନ୍‌‌ କରିବା ସହ ଗତିବିଧିକୁ ଟ୍ରାକ୍‌‌ କରେ। ଏମିତିକି ଆପ୍‌‌ ନିଜେ ନିଜେ ଟଙ୍କା ଟ୍ରାନ୍ସଫର କରିଦିଏ।

କ’ଣ ଏହି ଏପିକେ ଫାଇଲ୍‌‌ 
ଏପିକେର ପୁରା ନାମ ହେଉଛି ଆଣ୍ଡ୍ରଏଡ ପ୍ୟାକେଜ କିଟ୍‌‌। ଏହି ଫାଇଲକୁ ଆଣ୍ଡ୍ରଏଡ ଅପରେଟିଂ ସିଷ୍ଟମ୍‌‌ ବୁଝିପାରେ ଓ ଇନଷ୍ଟଲ୍‌‌ କରିପାରେ। ଯେମିତି କମ୍ପ୍ୟୁଟରରେ କୌଣସି ସଫ୍ଟୱେର ଇନଷ୍ଟଲ୍‌‌ କରିବାକୁ ଇଏକ୍ସଇ ଫାଇଲ୍‌‌ ଦରକାର ହୁଏ, ସେମିତି ଆଣ୍ଡ୍ରଏଡ ଫୋନରେ କୌଣସି ଆପ୍‌‌ ଇନଷ୍ଟଲ୍‌‌ କରିବାକୁ ଏପିକେ ଫାଇଲର ଆବଶ୍ୟକ ପଡ଼େ। ଗୁଗଲ ପ୍ଲେ ଷ୍ଟୋରରେ ଉପଲବ୍ଧ ନ ଥିବା ଆପକୁ ଏପିକେ ଫାଇଲ୍‌‌ ଡାଉନଲୋଡ କରି ଇନଷ୍ଟଲ୍‌‌ କରାଯାଏ। ଏମିତିକି ଯଦି କୌଣସି ନୂଆ ଅପଡେଟ୍‌‌ ଫୋନରେ ଚାଲୁ ନାହିଁ ବା ଆପଣଙ୍କୁ ପୁରୁଣା ଭର୍ସନ୍‌‌ ଭଲ ଲାଗୁଛି, ତେବେ ଏପିକେ ଫାଇଲରୁ ସେହି ପୁରୁଣା ଭର୍ସନ ଇନଷ୍ଟଲ୍‌‌ କରି ବ୍ୟବହାର କରିପାରିବେ।

ସାଇବର ଠକ ବା ହ୍ୟାକର ମାନେ ଇଣ୍ଟରନେଟ ଓ ସାମାଜିକ ଗଣମାଧ୍ୟମରୁ କାହାର ବାହାଘର ହେଉଛି, କାହାର ବ୍ୟାଙ୍କ ଆପ୍ଲିକେସନ କାମ କରୁନାହିଁ, କିଏ କ୍ରେଡିଟ୍‌‌ କାର୍ଡ ଆବେଦନ କରିବାକୁ ଚାହୁଁଛି ଓ କିଏ ସବସିଡି ପାଇବାକୁ ଚାହୁଁଛି, ସେସବୁ ତଥ୍ୟ ସଂଗ୍ରହ କରି ନେଉଛନ୍ତି। ତଥ୍ୟ ଆଧାରରେ ଲୋକଙ୍କ ଆବଶ୍ୟକତା ଅନୁସାରେ ’ଏପିକେ’ ତିଆରି କରି ସମ୍ପୃକ୍ତ ବ୍ୟକ୍ତିଙ୍କୁ ପଠାଉଛନ୍ତି। ଲୋକମାନେ ମଧ୍ୟ ସେହି ଆବଶ୍ୟକତା ସନ୍ଧାନରେ ଥିବାରୁ ଖୁବଶୀଘ୍ର ହ୍ୟାକର ପଠାଇଥିବା ଏପିକେ ଫାଇଲ୍‌‌ ଡାଉନଲୋଡ କରି ଦେଉଛନ୍ତି। ଆଉ ଏପିକେ ଫାଇଲ୍‌‌ ଇନଷ୍ଟଲ୍‌‌ ପରେ ମାଲୱେୟାର ପୁରା ଫୋନକୁ ସାଇବର ଠକଙ୍କ ନିୟନ୍ତ୍ରଣକୁ ଠେଲି ଦେଉଛି। 

ଗୁଜରାଟର ସୁରଟ ସହରରେ ଏକ ବଡ଼ ଧରଣର ସାଇବର ଠକେଇର ପର୍ଦ୍ଦାଫାଶ ହୋଇଛି। ସୁରଟ ସାଇବର କ୍ରାଇମ୍ ପୋଲିସ ଏକ ଅନ୍ତର୍ଜାତୀୟ ସାଇବର ଠକେଇ ଗ୍ୟାଙ୍ଗକୁ ଧରିବାରେ ସଫଳ ହୋଇଛି, ଯେଉଁମାନେ ୪୭.୪୪ କୋଟି ଟଙ୍କାର ଅନଲାଇନ ଠକେଇ କରିଛନ୍ତି। ଏହି ମାମଲାରେ ଜଣେ ଅଭିଯୁକ୍ତକୁ ଗିରଫ କରାଯାଇଥିବା ବେଳେ ଅନ୍ୟ ଦୁଇ ଜଣ ଫେରାର ଅଛନ୍ତି। ପୋଲିସର ଚଢ଼ାଉ ବେଳେ ବିପୁଳ ପରିମାଣର ନଗଦ ଟଙ୍କା, ଡେବିଟ୍ କାର୍ଡ ଏବଂ ସିମ୍ କାର୍ଡ ଜବତ କରାଯାଇଛି।

'ଅପରେସନ ମ୍ୟୁଲ୍ ହଣ୍ଟ' ଅଧୀନରେ ବଡ଼ କାର୍ଯ୍ୟାନୁଷ୍ଠାନ

ସୁରଟ ସାଇବର କ୍ରାଇମ୍ ସେଲର ଡିସିପି ବିଶାଖା ଜୈନଙ୍କ ସୂଚନା ଅନୁଯାୟୀ, ଉପମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ 'ଅପରେସନ ମ୍ୟୁଲ୍ ହଣ୍ଟ' ଅଧୀନରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସୁରଟର ଲିମ୍ବାୟତ ଅଞ୍ଚଳରେ ଚଢ଼ାଉ କରାଯାଇ ଭାବେଶ ସିନ୍ଦେ ନାମକ ଜଣେ ଯୁବକକୁ ଗିରଫ କରାଯାଇଛି। ତା'ର ମୁଖ୍ୟ କାମ ଥିଲା ଏଟିଏମ୍‌ରୁ ନଗଦ ଟଙ୍କା ଉଠାଇ ମୁଖ୍ୟ ଅଭିଯୁକ୍ତ ହରିଶ ଚୌଧୁରୀଙ୍କୁ ହସ୍ତାନ୍ତର କରିବା।

ସେହିପରି ଅନ୍ୟ ଦୁଇ ଅଭିଯୁକ୍ତ ହୃଷିକେଶ ଅଧିକାର ସିନ୍ଦେ ଏବଂ ମହାରାଷ୍ଟ୍ରର ମୂଳ ବାସିନ୍ଦା ହରିଶ ସୁନୀଲଭାଇ ଚୌଧୁରୀ ବର୍ତ୍ତମାନ ଫେରାର ଅଛନ୍ତି। ଏହି ଗ୍ୟାଙ୍ଗ୍ ସୁଭାଷନଗର ସୋସାଇଟିର ଏକ ଘରୁ ନିଜର ସମସ୍ତ ଅପରାଧିକ ନେଟୱର୍କ ଚଳାଉଥିଲେ।

ଜବତ ହେଲା ନଗଦ ଟଙ୍କା, ସିମ୍ କାର୍ଡ ଓ ବ୍ୟାଙ୍କ ଖାତା

ପୋଲିସର ଚଢ଼ାଉ ବେଳେ ଗିରଫ ଅଭିଯୁକ୍ତଠାରୁ ୧୮.୫୦ ଲକ୍ଷ ଟଙ୍କା ନଗଦ ସମେତ ମୋଟ ୧୯.୮୭ ଲକ୍ଷ ଟଙ୍କାର ସାମଗ୍ରୀ ଜବତ କରାଯାଇଛି। ଅନ୍ୟପଟେ ଫେରାର ଥିବା ହରିଶ ଚୌଧୁରୀଙ୍କ ଘରେ ଚଢ଼ାଉ କରି ପୋଲିସ ୧୮.୫ ଲକ୍ଷ ଟଙ୍କା, ୪୦ଟି ସିମ୍ କାର୍ଡ ଏବଂ ୩୫ଟି ବ୍ୟାଙ୍କ ଆକାଉଣ୍ଟର ବିବରଣୀ ହାସଲ କରିଛି।

ଏହି ବ୍ୟାଙ୍କ ଆକାଉଣ୍ଟଗୁଡିକର ଯାଞ୍ଚରୁ ଜଣାପଡିଛି ଯେ, ଏନ୍‌ସିଆର୍‌ପି (NCRP) ପୋର୍ଟାଲରେ ଏହା ବିରୋଧରେ ୫୬ଟି ଅଭିଯୋଗ ରହିଛି ଏବଂ ସମଗ୍ର ଦେଶରେ ବିଭିନ୍ନ ଲୋକଙ୍କଠାରୁ ୪୭ କୋଟି ୪୪ ଲକ୍ଷ ଟଙ୍କା ଲୁଟ୍ କରାଯାଇଛି। ଠକମାନେ ସାଧାରଣ ଲୋକଙ୍କୁ କମିଶନର ଲୋଭ ଦେଖାଇ ସେମାନଙ୍କ ନାମରେ ବ୍ୟାଙ୍କ ଖାତା ଖୋଲୁଥିଲେ ଏବଂ ସେହି ଖାତାଗୁଡ଼ିକର ସମ୍ପୂର୍ଣ୍ଣ ନିୟନ୍ତ୍ରଣ ନିଜ ହାତରେ ରଖୁଥିଲେ ଯାହା ଦ୍ୱାରା ପୋଲିସ ସେମାନଙ୍କ ପାଖରେ ପହଞ୍ଚିପାରିବ ନାହିଁ।

ମହାଦେବ ଗେମିଂ ଆପ୍ ସହିତ ଲିଙ୍କ୍

ପ୍ରାଥମିକ ତଦନ୍ତରୁ ଜଣାପଡିଛି ଯେ, ଏହି ଗ୍ୟାଙ୍ଗ୍ ବିରୋଧରେ ଦେଶର ବିଭିନ୍ନ ରାଜ୍ୟରେ ପୂର୍ବରୁ ୧୫ଟି ମାମଲା ରୁଜୁ ହୋଇଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଫେରାର ଥିବା ମୁଖ୍ୟ ଅଭିଯୁକ୍ତ ପୂର୍ବରୁ ଚର୍ଚ୍ଚିତ ମହାଦେବ ଗେମିଂ ଆପ୍ ମାମଲାରେ ମଧ୍ୟ ସମ୍ପୃକ୍ତ ଥିଲା। ଏହି ଠକେଇର ଚେର ଦୁବାଇ ଏବଂ ଅନ୍ୟାନ୍ୟ ଦେଶ ସହିତ ଯୋଡି ହୋଇଥିବା ପୋଲିସ ସନ୍ଦେହ କରୁଛି। ଫେରାର ଅଭିଯୁକ୍ତଙ୍କୁ ଧରିବା ପାଇଁ ପୋଲିସର ତଦନ୍ତ ଏବଂ ଅନ୍ତର୍ଜାତୀୟ ଲିଙ୍କର ଯାଞ୍ଚ ବର୍ତ୍ତମାନ ଜାରି ରହିଛି।

ଦିଲ୍ଲୀ ପୋଲିସର ସାଉଥ୍-ୱେଷ୍ଟ ଜିଲ୍ଲା ସାଇବର ଟିମ୍ ଏକ ବଡ଼ ଅନଲାଇନ୍ ନିବେଶ ଠକେଇ ର‍୍ୟାକେଟର ପର୍ଦ୍ଦାଫାଶ କରିଛି। ସୋସିଆଲ ମିଡିଆରେ ଅଧିକ ଲାଭର ପ୍ରଲୋଭନ ଦେଖାଇ ଲୋକଙ୍କୁ ଠକୁଥିବା ଏହି ଅନ୍ତଃରାଜ୍ୟ ଗ୍ୟାଙ୍ଗର ୧୧ ଜଣ ସଦସ୍ୟଙ୍କୁ ପୋଲିସ ଗିରଫ କରିଛି। ଜଣେ ୬୦ ବର୍ଷୀୟ ବୃଦ୍ଧଙ୍କ ଅଭିଯୋଗ ପରେ ଏହି ଗ୍ୟାଙ୍ଗର କଳା କାରନାମା ସାମ୍ନାକୁ ଆସିଥିଲା, ଯାହାଙ୍କୁ ଏହି ଠକମାନେ ୨୨.୬୭ ଲକ୍ଷ ଟଙ୍କା ଠକି ନେଇଥିଲେ। ପୋଲିସର ତଦନ୍ତରୁ ଏହି ଅନ୍ତର୍ଜାତୀୟ ଠକେଇର ଚେର କାମ୍ବୋଡିଆ ସହିତ ଯୋଡ଼ି ହୋଇଥିବା ଜଣାପଡ଼ିଛି।

କିପରି ହୋଇଥିଲା ଠକେଇ?

ପୋଲିସର ସୂଚନାନୁସାରେ, ଠକମାନେ ପ୍ରଥମେ ଫେସବୁକରେ ଏକ ଆକର୍ଷଣୀୟ ବିଜ୍ଞାପନ ମାଧ୍ୟମରେ ପୀଡ଼ିତଙ୍କୁ ନିଜ ଜାଲରେ ଫସାଇଥିଲେ। ସେମାନେ ବୃଦ୍ଧଙ୍କୁ 'ମୁଦ୍ରା ୱାନ୍' (Mudra One) ଏବଂ 'ନାଇନ୍ ପ୍ରୋ' (Nine Pro) ଭଳି ଆପ୍ ମାଧ୍ୟମରେ ଟଙ୍କା ନିବେଶ କରିବାକୁ କହିଥିଲେ ଏବଂ ବିପୁଳ ଲାଭର ପ୍ରତିଶ୍ରୁତି ଦେଇଥିଲେ। ବୃଦ୍ଧ ଜଣକ ସେମାନଙ୍କ କଥାରେ ବିଶ୍ୱାସ କରି ବିଭିନ୍ନ ପର୍ଯ୍ୟାୟରେ ମୋଟ ୨୨ ଲକ୍ଷ ୬୭ ହଜାର ଟଙ୍କା ନିବେଶ କରିଥିଲେ। କିନ୍ତୁ ଯେତେବେଳେ ସେ ତାଙ୍କ ରିଟର୍ଣ୍ଣ ବା ପ୍ରାପ୍ୟ ଲାଭ ମାଗିଥିଲେ, ଠକମାନେ ତାଙ୍କ ସହ ସମସ୍ତ ଯୋଗାଯୋଗ ବିଚ୍ଛିନ୍ନ କରିବା ସହ ଫୋନ୍ ନମ୍ବର ଏବଂ ହ୍ୱାଟସ୍‌ଆପ୍‌କୁ ବ୍ଲକ୍ କରିଦେଇଥିଲେ।

ନକଲି ବ୍ୟାଙ୍କ ଆକାଉଣ୍ଟ ଓ କାମ୍ବୋଡିଆ କନେକ୍ସନ୍

ଡିଜିଟାଲ୍ ଡାଟା ଏବଂ ମନି ଟ୍ରେଲ୍ ଯାଞ୍ଚ କରିବା ପରେ ପୋଲିସ ଜାଣିବାକୁ ପାଇଥିଲା ଯେ, ଏହି ଗ୍ୟାଙ୍ଗ ଦିଲ୍ଲୀର ରୋହିଣୀ ଏବଂ ନେତାଜୀ ସୁଭାଷ ପ୍ଲେସ (NSP) ରୁ ନିଜର ନେଟୱର୍କ ଚଳାଉଥିଲା। ବିଶେଷ କରି NSP ରେ ଏକ ନକଲି ଅଫିସ୍ ଖୋଲାଯାଇଥିଲା, ଯେଉଁଠାରେ କେବଳ ଭଡ଼ାଟିଆ ବା ନକଲି ବ୍ୟାଙ୍କ ଆକାଉଣ୍ଟ ଖୋଲାଯାଇ ସାଇବର ଅପରାଧୀଙ୍କୁ ଯୋଗାଇ ଦିଆଯାଉଥିଲା। ଏହି ନକଲି ଆକାଉଣ୍ଟଗୁଡିକ ମାଧ୍ୟମରେ ଠକେଇ ଟଙ୍କା ପ୍ରଥମେ ମୁମ୍ବାଇ ପହଞ୍ଚୁଥିଲା। ମୁମ୍ବାଇରେ ବସିଥିବା 'ପିକେ' (PK) ନାମକ ଜଣେ ଅପରେଟର ଏହି ଟଙ୍କାକୁ ସିଧାସଳଖ କାମ୍ବୋଡିଆରେ ଥିବା ମାଷ୍ଟରମାଇଣ୍ଡମାନଙ୍କ ନିକଟକୁ ଟ୍ରାନ୍ସଫର୍ କରୁଥିଲା।

ଜବତ ହେଲା ବ୍ୟାପକ ସାମଗ୍ରୀ

ଏହି ଅପରେସନ୍ ଅଧୀନରେ ପୋଲିସ ଦିଲ୍ଲୀ, ମୁମ୍ବାଇ ଏବଂ ରାଜସ୍ଥାନରେ ଚଢ଼ାଉ କରି ତେଜିନ୍ଦର ସିଂ, ଆଶିଷ ସୈନି, ଶିବ ଦୟାଲ ସିଂ, ପ୍ରତିଭା, ସତୀଶ ଏବଂ ରାଜସ୍ଥାନରୁ ରାମଦେବ ସାଙ୍ଗଲା, ପ୍ରବୀଣ କୁମାୱତ, ଦୀପକ ମେୱାଡା ଓ ତ୍ରିଲୋକ ଚାନ୍ଦ ନାୟକଙ୍କ ସମେତ ସମୁଦାୟ ୧୧ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତଙ୍କ ନିକଟରୁ ୯୨ଟି ସିମ୍ କାର୍ଡ, ୪୦ଟି ମୋବାଇଲ୍ ଫୋନ୍, ୩୯ଟି ଚେକ୍ ବୁକ୍, ୪୫ଟି କମ୍ପାନୀ ଷ୍ଟାମ୍ପ, ୨ଟି ପିଓଏସ୍ (POS) ମେସିନ୍, ୬ଟି ୟୁପିଆଇ ସ୍କାନର, ୨୭ଟି ଏଟିଏମ୍ କାର୍ଡ ସହ ଲ୍ୟାପଟପ୍ ଏବଂ ଡେସ୍କଟପ୍ କମ୍ପ୍ୟୁଟର ଜବତ କରାଯାଇଛି। ସାଇବର ପୋଲିସ ସାଧାରଣ ନାଗରିକଙ୍କୁ ସୋସିଆଲ୍ ମିଡିଆରେ ମିଳୁଥିବା ଅତ୍ୟଧିକ ଲାଭଦାୟକ ନିବେଶ ବିଜ୍ଞାପନଠାରୁ ଦୂରେଇ ରହିବାକୁ ଏବଂ ଅଜଣା ଆକାଉଣ୍ଟରେ ଟଙ୍କା ଜମା ନକରିବାକୁ ପରାମର୍ଶ ଦେଇଛି।

ସୋସିଆଲ ମିଡିଆରେ ଅଜଣା ବ୍ୟକ୍ତିଙ୍କ ସହ ବନ୍ଧୁତା କରିବା କେତେ ବିପଜ୍ଜନକ ହୋଇପାରେ, ତାର ଏକ ଚାଞ୍ଚଲ୍ୟକର ଉଦାହରଣ ଗୁଜରାଟର ଅହମ୍ମଦାବାଦରୁ ସାମ୍ନାକୁ ଆସିଛି। ଏଠାରେ ଜଣେ ୭୦ ବର୍ଷୀୟ ବରିଷ୍ଠ ଆଇନଜୀବୀ ଫେସବୁକ୍ ପ୍ରେମ ଜାଲରେ ଫସି ନିଜର ଜୀବନ ସାରାର ପୁଞ୍ଜି ହରାଇଛନ୍ତି। ବିବାହର ପ୍ରତିଶ୍ରୁତି ଏବଂ କ୍ରିପ୍ଟୋକରେନ୍ସିରେ ଅଧିକ ଲାଭ ପାଇବାର ଲୋଭ ଦେଖାଇ ଜଣେ ମହିଳା ତାଙ୍କଠାରୁ ପ୍ରାୟ ୫୭.୯ ଲକ୍ଷ (ପ୍ରାୟ ୫୮ ଲକ୍ଷ) ଟଙ୍କା ଠକି ନେଇଛନ୍ତି। ଏନେଇ ପୀଡ଼ିତ ଜଣକ ଅହମ୍ମଦାବାଦ ସାଇବର କ୍ରାଇମ୍ ସେଲ୍‌ରେ ଅଭିଯୋଗ କରିଛନ୍ତି।

ଫେସବୁକ୍‌ରୁ ଆରମ୍ଭ ହୋଇଥିଲା ସମ୍ପର୍କ

ସୂଚନା ଅନୁଯାୟୀ, ଅହମ୍ମଦାବାଦର ଶିଲାଜ୍ ଅଞ୍ଚଳରେ ରହୁଥିବା ଆଇନଜୀବୀ ଗିରିଧାରୀଲାଲ ଯୁଗଳକିଶୋର ଶର୍ମା ଗତ ୨୦୨୫ ନଭେମ୍ବର ମାସରେ ଫେସବୁକ୍ ମାଧ୍ୟମରେ 'ଲକ୍ଷ୍ମୀଦେବୀ ରେଡ୍ଡୀ' ନାମକ ଏକ ପ୍ରୋଫାଇଲ୍ ସଂସ୍ପର୍ଶରେ ଆସିଥିଲେ। ପ୍ରଥମେ ଫେସବୁକ୍ ମେସେଜ୍ ଏବଂ ପରେ ହ୍ୱାଟ୍ସଆପ୍ ଚାଟ୍ ଓ ଭିଡିଓ କଲ୍ ମାଧ୍ୟମରେ ଉଭୟଙ୍କ ମଧ୍ୟରେ କଥାବାର୍ତ୍ତା ଆଗକୁ ବଢ଼ିଥିଲା। ଅଭିଯୁକ୍ତ ମହିଳା ନିଜକୁ ଜଣେ ଧନୀ ଫାଇନାନ୍ସ ପ୍ରଫେସନାଲ୍ ଭାବେ ପରିଚୟ ଦେବା ସହ ଆଇନଜୀବୀଙ୍କୁ ବିବାହ କରିବା ପାଇଁ ପ୍ରସ୍ତାବ ଦେଇଥିଲେ। ଏପରିକି ବିବାହ ପରେ ଇଟାଲୀର ମିଲାନ୍ ସହରରେ ସବୁଦିନ ପାଇଁ ରହିବାକୁ ସେ ସ୍ୱପ୍ନ ଦେଖାଇଥିଲେ। ଫଳରେ ବୃଦ୍ଧ ଆଇନଜୀବୀ ଜଣକ ତାଙ୍କ କଥାରେ ସମ୍ପୂର୍ଣ୍ଣ ଭାବେ ବିଶ୍ୱାସ କରିଯାଇଥିଲେ।

ନକଲି ଆପ୍‌ରେ କ୍ରିପ୍ଟୋ ନିବେଶ ଫାଶ

ବିଶ୍ୱାସ ଜିତିବା ପରେ ମହିଳା ଜଣକ କ୍ରିପ୍ଟୋକରେନ୍ସି ଟ୍ରେଡିଂରେ ଅଧିକ ଲାଭ ମିଳିବାର ପ୍ରଲୋଭନ ଦେଖାଇଥିଲେ। ସେ ପୀଡ଼ିତଙ୍କୁ ଆମେରିକାର ଏକ ନକଲି ଟ୍ରେଡିଂ ପ୍ଲାଟଫର୍ମ "CBOE US" ନାମକ ଏକ ଆପ୍‌ ଡାଉନଲୋଡ୍ କରିବାକୁ ଲିଙ୍କ୍ ପଠାଇଥିଲେ ଏବଂ ୟୁଏସଡିଟି (USDT) ରେ ଟ୍ରେଡିଂ କରିବାକୁ କହିଥିଲେ। ମହିଳାଙ୍କ କଥାରେ ପଡ଼ି ଆଇନଜୀବୀ ଜଣକ ପ୍ରଥମେ ୫୦,୦୦୦ ଟଙ୍କା ନିବେଶ କରିଥିଲେ।

ଠକଙ୍କ 'ହୁକ୍' ଟାକ୍ଟିକ୍ସ

ଠକମାନେ ନିଜର ଏକ ସୁଚିନ୍ତିତ ଯୋଜନା ଅନୁଯାୟୀ ଆରମ୍ଭରୁ ପୀଡ଼ିତଙ୍କୁ କିଛି ଲାଭାଂଶ ପ୍ରଦାନ କରିଥିଲେ। ପ୍ରଥମ ନିବେଶରୁ ତାଙ୍କୁ ୫,୦୦୦ ଟଙ୍କାର ଲାଭ ମିଳିଥିଲା ଏବଂ ସେ ବିଭିନ୍ନ ପର୍ଯ୍ୟାୟରେ ମୋଟ ୨.୧ ଲକ୍ଷ ଟଙ୍କା ଉଠାଣ କରିପାରିଥିଲେ। ଏହାଦ୍ୱାରା ଆପ୍ ଏବଂ ମହିଳାଙ୍କ ଉପରେ ଆଇନଜୀବୀଙ୍କ ବିଶ୍ୱାସ ଆହୁରି ଦୃଢ଼ ହୋଇଯାଇଥିଲା।

୫୮ ଲକ୍ଷର ଚୂନ ଓ ପୋଲିସରେ ଅଭିଯୋଗ

ଆପ୍‌ରେ ନିଜ ଆକାଉଣ୍ଟରେ ୧.୯ ଲକ୍ଷ ୟୁଏସଡିଟି (USDT) ର ନକଲି ଲାଭ ଦେଖି ଉତ୍ସାହିତ ହୋଇ ପୀଡ଼ିତ ଜଣକ ଜାନୁଆରୀ ୮ ରୁ ୨୯ ତାରିଖ ମଧ୍ୟରେ ଅଭିଯୁକ୍ତଙ୍କ ଦ୍ୱାରା ଦିଆଯାଇଥିବା ବିଭିନ୍ନ ବ୍ୟାଙ୍କ ଆକାଉଣ୍ଟକୁ ମୋଟ ୬୦ ଲକ୍ଷ ଟଙ୍କା ଟ୍ରାନ୍ସଫର୍ କରିଥିଲେ। କିନ୍ତୁ ପରେ ଯେତେବେଳେ ସେ ସେହି ଟଙ୍କା ଉଠାଇବାକୁ ଚେଷ୍ଟା କଲେ, ତାଙ୍କୁ ଟିକସ (ଟ୍ୟାକ୍ସ) ନାମରେ ଆହୁରି ଅଧିକ ଦେୟ ମାଗିଥିଲେ ତଥା ଯୋଗାଯୋଗ ବନ୍ଦ କରିଦେଇଥିଲେ। ମୋଟ ୬୦ ଲକ୍ଷରୁ କେବଳ ୨.୧ ଲକ୍ଷ ଫେରି ପାଇଥିବାରୁ ସେ ପ୍ରକୃତରେ ପ୍ରାୟ ୫୭.୯ ଲକ୍ଷ ଟଙ୍କାର ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ। ଏହାପରେ ସେ ତୁରନ୍ତ ନ୍ୟାସନାଲ୍ ସାଇବର କ୍ରାଇମ୍ ହେଲ୍ପଲାଇନ୍ (୧୯୩୦) ରେ କଲ୍ କରିବା ସହିତ ସାଇବର ଥାନାରେ ଏଫଆଇଆର୍ (FIR) ରୁଜୁ କରିଛନ୍ତି। ବର୍ତ୍ତମାନ ପୋଲିସ ଏହି ଘଟଣାର ଖୋଳତାଡ଼ ଜାରି ରଖିଛି।

ଭୁବନେଶ୍ୱର: ସାଇବର ଅପରାଧ ନେଟୱର୍କକୁ ସମୂଳ ଧ୍ୱଂସ କରିବା ଉଦ୍ଦେଶ୍ୟରେ ଓଡ଼ିଶା ପୋଲିସ ପକ୍ଷରୁ ଆରମ୍ଭ ହୋଇଥିବା ବିଶେଷ ଅଭିଯାନ ‘ଅପରେସନ ସାଇବର କବଚ’ ସମଗ୍ର ରାଜ୍ୟରେ ଜାରି ରହିଛି। ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ୱାଇ ବି ଖୁରାନିଆଙ୍କ ନିର୍ଦ୍ଦେଶକ୍ରମେ ଜିଲ୍ଲା ଏସ୍‌.ପି. ଓ ଡି.ସି.ପି.ମାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଜିଲ୍ଲା ସାଇବର କ୍ରାଇମ୍ ୟୁନିଟ୍‌ମାନଙ୍କ ଦ୍ୱାରା ଏହି ଅଭିଯାନ କାର୍ଯ୍ୟାନୁଷ୍ଠାନ ହେଉଛି। ସାଇବର କ୍ରାଇମ୍ ୟୁନିଟ୍‌, ସିଆଇଡି କ୍ରାଇମ୍ ବ୍ରାଞ୍ଚ ଏହାର ସମନ୍ୱୟ କରୁଛି। ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ସାଇବର ଅପରାଧୀମାନଙ୍କ ଆର୍ଥିକ ଢାଞ୍ଚାକୁ ଧ୍ୱଂସ କରିବା।

ଏପର୍ଯ୍ୟନ୍ତ ‘ଅପରେସନ ସାଇବର କବଚ’ ଅନ୍ତର୍ଗତ ସମଗ୍ର ରାଜ୍ୟରେ ମୋଟ ୩୭,୦୯୪ଟି ମ୍ୟୁଲ୍/ବେନାମୀ ବ୍ୟାଙ୍କ ଆକାଉଣ୍ଟ ଯାଞ୍ଚ କରାଯାଇଛି। ଏହାସହ ମ୍ୟୁଲ୍ ବ୍ୟାଙ୍କ ସମ୍ପର୍କିତ ୧୧୮୫ଟି ସାଇବର ମାମଲା, ଏଟିଏମ୍ ମାଧ୍ୟମରେ ଟଙ୍କା ଉଠାଣ ସମ୍ପର୍କିତ ୩୬ଟି ମାମଲା, ଚେକ୍ ମାଧ୍ୟମରେ ଟଙ୍କା ଉଠାଣ ସମ୍ପର୍କିତ ୪୧ଟି ମାମଲା ଏବଂ ନକଲି ସିମ୍/PoS ସମ୍ପର୍କିତ ୨୩ଟି ମାମଲା ରୁଜୁ ହୋଇଛି। ୩୬୫ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ବେଳେ ୧୯୨ଟି ପୁରୁଣା ଏଫ୍‌.ଆଇ.ଆର୍‌ ସହ ସଂପୃକ୍ତ ୭୨୭୬ଜଣ ସନ୍ଦିଗ୍ଧ ଆକାଉଣ୍ଟଧାରୀ ଓ ସହାୟକଙ୍କୁ ଆଇନଗତ ନୋଟିସ୍ ଜାରି କରାଯାଇଛି।

ଏହି ଅଭିଯାନରେ କେନ୍ଦୁଝର ଜିଲ୍ଲା ପୋଲିସ ୯୫ଟି ବେନାମୀ ଆକାଉଣ୍ଟ ଯାଞ୍ଚ କରି ୮ଟି ମାମଲା ରୁଜୁ କରି ୩ଜଣଙ୍କୁ ଗିରଫ ଏବଂ ୫ଜଣଙ୍କୁ ନୋଟିସ୍ ଜାରି କରିଛି। ସେହିପରି ରାଉରକେଲା ଜିଲ୍ଲା ପୋଲିସ ୭୫ଟି ବେନାମୀ ଆକାଉଣ୍ଟ ଯାଞ୍ଚ କରି ମ୍ୟୁଲ୍ ବ୍ୟାଙ୍କ ଆକାଉଣ୍ଟ ସମ୍ପର୍କିତ ୫୭ଟି ମାମଲା, ଏଟିଏମ୍ ଉଠାଣ ସମ୍ପର୍କିତ ୧ଟି ମାମଲା ଏବଂ ଚେକ୍ ଉଠାଣ ସମ୍ପର୍କିତ ୪ଟି ମାମଲା ରୁଜୁ କରି ୩୩ଜଣଙ୍କୁ ନୋଟିସ୍ ଜାରି କରିଛି। ସେହିପରି ଭଦ୍ରକ ଜିଲ୍ଲା ପୋଲିସ ୧୪୫ଟି ବେନାମୀ ଆକାଉଣ୍ଟ ଯାଞ୍ଚ କରି ମ୍ୟୁଲ୍ ଆକାଉଣ୍ଟ ସମ୍ପର୍କିତ ୧ଟି ମାମଲା ରୁଜୁ କରି ୨ଜଣଙ୍କୁ ନୋଟିସ୍ ଜାରି କରିଛି।

ଭୁବନେଶ୍ୱର (UPD) ପୋଲିସ ୩୪୭ଟି ବେନାମୀ ଆକାଉଣ୍ଟ ଯାଞ୍ଚ କରି ୩ଟି ମାମଲା ରୁଜୁ କରି ୯ଜଣଙ୍କୁ ଗିରଫ କରିଛି। କଟକ (UPD) ପୋଲିସ ୩୨୮ଟି ବେନାମୀ ଆକାଉଣ୍ଟ ଯାଞ୍ଚ କରି ୨ଟି ମାମଲା ରୁଜୁ କରି ୧୩ ଜଣଙ୍କୁ ନୋଟିସ୍ ଜାରି କରିଛି।

ସେହିପରି ଜଗତସିଂହପୁର ଜିଲ୍ଲା ପୋଲିସ ୨୦ଟି, ନୟାଗଡ଼ ଜିଲ୍ଲା ପୋଲିସ ୧୧୫ଟି ଆକାଉଣ୍ଟ ଯାଞ୍ଚ କରି ୧୦ଜଣଙ୍କୁ ନୋଟିସ୍, ସୁବର୍ଣ୍ଣପୁର ଜିଲ୍ଲା ପୋଲିସ ୨୩୮ଟି ଆକାଉଣ୍ଟ ଯାଞ୍ଚ କରି ୧ଟି ପୁରୁଣା ଏଫ୍‌.ଆଇ.ଆର୍‌ରେ ୧ଜଣଙ୍କୁ ଗିରଫ, ପୁରୀ ଜିଲ୍ଲା ପୋଲିସ ୧ଟି ପୁରୁଣା ଏଫ୍‌.ଆଇ.ଆର୍‌ରେ ୧ଜଣଙ୍କୁ ଗିରଫ, ବାଲେଶ୍ୱର ଜିଲ୍ଲା ପୋଲିସ ୨୯ଟି ଆକାଉଣ୍ଟ, ମୟୂରଭଞ୍ଜ ଜିଲ୍ଲା ପୋଲିସ ୫ଟି ଆକାଉଣ୍ଟ ଯାଞ୍ଚ କରି ୫ଜଣଙ୍କୁ ନୋଟିସ୍, ବ୍ରହ୍ମପୁର ଜିଲ୍ଲା ପୋଲିସ ୩୧ଟି ଆକାଉଣ୍ଟ ଯାଞ୍ଚ କରି ୧ଟି ପୁରୁଣା ଏଫ୍‌.ଆଇ.ଆର୍‌ ସହ ସଂପୃକ୍ତ ୧୧ଜଣଙ୍କୁ ନୋଟିସ୍, ବୌଦ୍ଧ ଜିଲ୍ଲା ପୋଲିସ ୧୨୩ଟି ଆକାଉଣ୍ଟ ଯାଞ୍ଚ କରି ୧୨୩ଜଣଙ୍କୁ ନୋଟିସ୍, ଗଞ୍ଜାମ ଜିଲ୍ଲା ପୋଲିସ ୧୫ଟି ଆକାଉଣ୍ଟ ଯାଞ୍ଚ କରି ୧ଟି ପୁରୁଣା ଏଫ୍‌.ଆଇ.ଆର୍‌ରେ ୧ଜଣଙ୍କୁ ଗିରଫ ଏବଂ ୧ଜଣଙ୍କୁ ନୋଟିସ୍, କନ୍ଧମାଳ ଜିଲ୍ଲା ପୋଲିସ ୧ଟି ଆକାଉଣ୍ଟ ଯାଞ୍ଚ କରି ୨ଜଣଙ୍କୁ ନୋଟିସ୍, ଢେଙ୍କାନାଳ ଜିଲ୍ଲା ପୋଲିସ ୭ଟି, କଳାହାଣ୍ଡି ଜିଲ୍ଲା ପୋଲିସ ୧୨ଟି, କୋରାପୁଟ ଜିଲ୍ଲା ପୋଲିସ ୧୯ଟି ଆକାଉଣ୍ଟ ଯାଞ୍ଚ କରିଛନ୍ତି। ସେହିପରି ମାଲକାନଗିରି ଜିଲ୍ଲା ପୋଲିସ ଏକ ଏଟିଏମ୍ ଉଠାଣ ମାମଲାରେ ୨ଜଣଙ୍କୁ ନୋଟିସ୍ ଜାରି କରିଛି।

ରାଜ୍ୟବାସୀଙ୍କ ଡିଜିଟାଲ କାରବାରର ସୁରକ୍ଷା ପାଇଁ ଓଡ଼ିଶା ପୋଲିସ ସର୍ବଦା ପ୍ରତିଶ୍ରୁତିବଦ୍ଧ ଓ ସାଇବର ଅପରାଧ ମୁକ୍ତ ଓଡ଼ିଶା ଗଠନ ପାଇଁ ଏହି ଅଭିଯାନ ଆଗାମୀ ଦିନରେ ଆହୁରି କଡ଼ାକଡ଼ି ଭାବେ ଜାରି ରହିବ।

ଉତ୍ତରପ୍ରଦେଶର ସହାରନପୁର ଜିଲ୍ଲାରେ ଏକ ବଡ଼ ଧରଣର ସାଇବର ଠକେଇ ମାମଲା ସାମ୍ନାକୁ ଆସିଛି। ସେୟାର ବଜାରରେ ଅନ୍‌ଲାଇନ୍ ଟ୍ରେଡିଂ ଜରିଆରେ ବିପୁଳ ଲାଭର ପ୍ରଲୋଭନ ଦେଖାଇ ସାଇବର ଠକମାନେ ଜଣେ ଯୁବକଙ୍କଠାରୁ ୧.୦୨ କୋଟି ଟଙ୍କା ଠକି ନେଇଛନ୍ତି। ପୋଲିସରେ ଦିଆଯାଇଥିବା ଅଭିଯୋଗ ଅନୁଯାୟୀ, ହ୍ୱାଟ୍ସଆପ୍ ଗ୍ରୁପ୍ ଏବଂ ନକଲି ଆପ୍ ବ୍ୟବହାର କରି ଏହି ବଡ଼ ଧରଣର ଠକେଇ କରାଯାଇଛି।

କିପରି ବିଛାଯାଇଥିଲା ଜାଲ

ସହାରନପୁର ସହର କୋତୱାଲି ଅଞ୍ଚଳର ମାଧବ ନଗର ନିବାସୀ ଅମିତ କୁମାରଙ୍କୁ ପ୍ରଥମେ ୨୦୨୫ ଡିସେମ୍ବର ଶେଷ ସପ୍ତାହରେ ଏକ ଫୋନ୍ କଲ୍ ଆସିଥିଲା। ଫୋନ୍ କରିଥିବା ବ୍ୟକ୍ତି ତାଙ୍କୁ ସେୟାର ବଜାରରେ ବିନିଯୋଗ ଏବଂ ଅନ୍‌ଲାଇନ୍ କ୍ଲାସ୍ ବିଷୟରେ କହିଥିଲେ। ଏହାପରେ ୨୦୨୬ ଜାନୁଆରୀ ୧ ତାରିଖରେ ତାଙ୍କୁ 'ଫିସଡମ୍ ଇନଷ୍ଟିଚ୍ୟୁସନାଲ୍ ଷ୍ଟକ୍ ଟ୍ରେଡିଂ' ଏବଂ ପରେ 'ଅମିତ ଭିଆଇପି ଏକ୍ସକ୍ଲୁସିଭ୍ ସର୍ଭିସ୍ ଟିମ୍-୧୫' ନାମକ ଦୁଇଟି ହ୍ୱାଟ୍ସଆପ୍ ଗ୍ରୁପରେ ସାମିଲ କରାଯାଇଥିଲା।

ଜାନୁଆରୀ ୧୨ ତାରିଖରେ ଗ୍ରୁପ୍ ଆଡମିନ୍ ରକ୍ଷିତା ବେଦ ତାଙ୍କୁ ବ୍ୟକ୍ତିଗତ ଭାବେ ମେସେଜ୍ କରି ଏକ ନୂତନ ଆପ୍‌ ମାଧ୍ୟମରେ ବିନିଯୋଗ କରିବାକୁ ପରାମର୍ଶ ଦେଇଥିଲେ। ଜାନୁଆରୀ ୨୧ରେ ଅମିତଙ୍କୁ ଏକ ଲିଙ୍କ୍ ପଠାଯାଇଥିଲା, ଯାହା ମାଧ୍ୟମରେ ସେ 'ଫିସ୍ଡପ୍ରୋ' (Fisdpro) ନାମକ ଏକ ନକଲି ଆପ୍ ଡାଉନଲୋଡ୍ କରିଥିଲେ। ଆରମ୍ଭରୁ ତାଙ୍କର ବିଶ୍ୱାସ ଜିତିବା ପାଇଁ ଠକମାନେ ତାଙ୍କ ଖାତାକୁ ୨୪,୧୦୦ ଟଙ୍କା ପଠାଇଥିଲେ।

ଆଇପିଓ ନାଁରେ ବିପୁଳ ଲୁଟ୍

ବିଶ୍ୱାସ ଜନ୍ମିବା ପରେ ଅମିତ ବଡ଼ ଧରଣର ବିନିଯୋଗ କରିବା ଆରମ୍ଭ କରିଥିଲେ। ଠକମାନେ ତାଙ୍କୁ ମାରୁଷିକା ଟେକ୍ନୋଲୋଜି ଲିମିଟେଡ୍ ନାମକ ଏକ ଆଇପିଓ (IPO) ରେ ନିବେଶ କରିବାକୁ କହିଥିଲେ ଏବଂ ତାଙ୍କୁ ୩୫ ଲକ୍ଷ ଟଙ୍କାର ଅତିରିକ୍ତ ସେୟାର ଆଲଟ୍ କରାଯାଇଥିବା ଦର୍ଶାଇଥିଲେ। ଏଥିପାଇଁ ତାଙ୍କୁ ବାଧ୍ୟତାମୂଳକ ଭାବେ ଅଧିକ ଟଙ୍କା ଜମା କରିବାକୁ ପଡ଼ିଥିଲା।

ଟଙ୍କା ଫେରସ୍ତ ପାଇଁ ସର୍ତ୍ତ ଓ ପୋଲିସରେ ଅଭିଯୋଗ

ଯେତେବେଳେ ଅମିତ ଆପ୍‌ରୁ ଟଙ୍କା ଉଠାଇବାକୁ ଚେଷ୍ଟା କଲେ, ସେତେବେଳେ ତାଙ୍କୁ ସର୍ଟ-ଟର୍ମ ଟ୍ୟାକ୍ସ ବାବଦକୁ ୩,୧୨,୦୫,୩୬୬ ଟଙ୍କା ଦେବାକୁ କୁହାଯାଇଥିଲା। ଏପରିକି ଆହୁରି ୫୦ ଲକ୍ଷ ଟଙ୍କା ନଦେଲେ ତାଙ୍କର ସମସ୍ତ ଟଙ୍କା ମୁମ୍ବାଇ ଆୟକର ବିଭାଗକୁ ପଠାଇଦିଆଯିବ ବୋଲି ଧମକ ମିଳିଥିଲା। ଶେଷରେ ଜାନୁଆରୀ ୨୧ ରୁ ମାର୍ଚ୍ଚ ୫ ତାରିଖ ମଧ୍ୟରେ ଅମିତ ନିଜ ଓ ପିତାମାତାଙ୍କ ଆକାଉଣ୍ଟରୁ ପ୍ରାୟ ୧.୦୨ କୋଟି ଟଙ୍କା ହରାଇଥିବା ଜାଣିବାକୁ ପାଇଥିଲେ। ବର୍ତ୍ତମାନ ସାଇବର କ୍ରାଇମ୍ ପୋଲିସ୍ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।

ଝାଡ଼ଖଣ୍ଡର ରାଜଧାନୀ ରାଞ୍ଚି ସ୍ଥିତ ଆଞ୍ଚଳିକ ପାସପୋର୍ଟ ଅଫିସକୁ ବୋମାରେ ଉଡ଼ାଇ ଦେବାକୁ ଧମକ ମିଳିବା ପରେ ଶୁକ୍ରବାର ଦିନ ହଇଚଇ ସୃଷ୍ଟି ହୋଇଥିଲା। ଏକ ଅଜ୍ଞାତ ଇମେଲ୍ ମାଧ୍ୟମରେ ଏହି ଧମକ ଦିଆଯାଇଥିଲା, ଯାହା ପରେ ପୋଲିସ ଏବଂ ସୁରକ୍ଷା ଏଜେନ୍ସି ତୁରନ୍ତ ଆକ୍ସନ ମୋଡକୁ ଆସିଥିଲେ।

ଇମେଲ୍ ଯୋଗେ ମିଳିଥିଲା ଧମକ

ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରାଞ୍ଚିର ରାତୁ ରୋଡ୍ ସ୍ଥିତ ଗାଲାକ୍ସିଆ ମଲରେ ଚାଲୁଥିବା ପାସପୋର୍ଟ ଅଫିସକୁ ଏକ ଧମକପୂର୍ଣ୍ଣ ଇମେଲ୍ ଆସିଥିଲା। ଏଥିରେ ଅଫିସକୁ ବୋମାରେ ଉଡ଼ାଇ ଦେବା କଥା ଉଲ୍ଲେଖ ଥିଲା। ଏହି ଖବର ପ୍ରଚାରିତ ହେବା ମାତ୍ରେ ଅଫିସ ପରିସରରେ ଭୟର ବାତାବରଣ ଖେଳିଯାଇଥିଲା।

ଘଟଣାସ୍ଥଳରେ ପହଞ୍ଚିଲା ବୋମା ନିଷ୍କ୍ରିୟକାରୀ ଦଳ

ସୂଚନା ପାଇବା ମାତ୍ରେ କୋତୱାଲି ଡିଏସପି ପ୍ରକାଶ ସୋୟଙ୍କ ନେତୃତ୍ୱରେ ଏକ ପୋଲିସ ଟିମ୍ ଏବଂ ବୋମା ନିଷ୍କ୍ରିୟକାରୀ ଦଳ (Bomb Disposal Squad) ଘଟଣାସ୍ଥଳରେ ପହଞ୍ଚିଥିଲେ। ସୁରକ୍ଷାକର୍ମୀମାନେ ପୁରା ମଲ୍ ଏବଂ ପାସପୋର୍ଟ ଅଫିସର କୋଣ ଅନୁକୋଣ ଯାଞ୍ଚ କରିଥିଲେ। ତେବେ ବ୍ୟାପକ ତଲାସି ପରେ ସେଠାରୁ କୌଣସି ସନ୍ଦିଗ୍ଧ ବସ୍ତୁ କିମ୍ବା ବିସ୍ଫୋରକ ସାମଗ୍ରୀ ମିଳିନଥିଲା। ପୋଲିସ ଏହାକୁ ଏକ 'ମିଥ୍ୟା ଧମକ' (Hoax) ବୋଲି ସ୍ପଷ୍ଟ କରିଛି।

ପୂର୍ବରୁ ମଧ୍ୟ ମିଳିଥିଲା ଏଭଳି ଧମକ

ପୋଲିସ ବର୍ତ୍ତମାନ ସାଇବର ସେଲ୍ ସହାୟତାରେ ଉକ୍ତ ଇମେଲ୍ ପଠାଇଥିବା ବ୍ୟକ୍ତିଙ୍କୁ ଚିହ୍ନଟ କରିବା ପାଇଁ ତଦନ୍ତ ଆରମ୍ଭ କରିଛି। ଉଲ୍ଲେଖଯୋଗ୍ୟ ଯେ, ଗତ ଫେବୃଆରୀ ମାସରେ ରାଞ୍ଚି ସିଭିଲ୍ କୋର୍ଟ ଏବଂ ଜିଲ୍ଲାପାଳଙ୍କ କାର୍ଯ୍ୟାଳୟକୁ ମଧ୍ୟ ସମାନ ଧରଣର ଧମକପୂର୍ଣ୍ଣ ଇମେଲ୍ ଆସିଥିଲା। ପୋଲିସ ଏହି ଘଟଣାଗୁଡ଼ିକ ମଧ୍ୟରେ କୌଣସି ସମ୍ପର୍କ ଅଛି କି ନାହିଁ, ତାହା ଖୋଜି ବାହାର କରିବାକୁ ଚେଷ୍ଟା କରୁଛି।

ଗୁଜୁରାଟ ପୋଲିସର ସିଆଇଡି (CID) କ୍ରାଇମ ବ୍ରାଞ୍ଚ ଏକ ବଡ଼ ଅନ୍ତର୍ଜାତୀୟ ମାନବ ଚାଲାଣ ଏବଂ ସାଇବର ଠକେଇ ର୍ୟାକେଟର ପର୍ଦ୍ଦାଫାଶ କରିଛି। ବିଦେଶରେ ଉଚ୍ଚ ବେତନର ଚାକିରି ଲୋଭ ଦେଖାଇ ଭାରତୀୟ ଯୁବକମାନଙ୍କୁ ‘ସାଇବର ଦାସତ୍ୱ’ (Cyber Slavery) ପାଇଁ ବିକ୍ରି କରୁଥିବା ଅଭିଯୋଗରେ ପୋଲିସ ଦୁଇଜଣ ଏଜେଣ୍ଟଙ୍କୁ ଗିରଫ କରିଛି। ଏହି ଘଟଣା ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଛି।

କିଏ ଏହି ଦୁଇ ଅଭିଯୁକ୍ତ?

ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ କୌଶିକ ପେଥାନୀ (ଅମରେଲି) ଏବଂ ଧ୍ରୁବ ଡୋବାରିୟା (ସୁରତ)। ପୋଲିସ ସୂଚନା ଅନୁଯାୟୀ, କୌଶିକ ପେଥାନୀ ସାଇବର ଅପରାଧ ଜଗତରେ ‘ଅଲି ବାବା’ ନାମରେ ପରିଚିତ ଥିଲା। ଏମାନେ ମୁଖ୍ୟତଃ ଗୁଜୁରାଟ ଏବଂ ଭାରତର ଅନ୍ୟାନ୍ୟ ରାଜ୍ୟରୁ ବେକାର ଯୁବକମାନଙ୍କୁ ଟାର୍ଗେଟ କରୁଥିଲେ।

କିପରି ଚାଲୁଥିଲା ଠକେଇର ଜାଲ?

ଏହି ଦଲାଲମାନେ ସୋସିଆଲ ମିଡିଆ (ଯେପରିକି ହ୍ୱାଟ୍ସଆପ୍ ଏବଂ ଟେଲିଗ୍ରାମ) ଜରିଆରେ ଯୁବକମାନଙ୍କ ସହ ଯୋଗାଯୋଗ କରୁଥିଲେ। ସେମାନଙ୍କୁ କାମ୍ବୋଡିଆ, ମ୍ୟାନ୍ମାର ଏବଂ ଲାଓସ୍ ଭଳି ଦେଶରେ ‘ଡାଟା ଏଣ୍ଟ୍ରି’ କିମ୍ବା ଆଇଟି କମ୍ପାନୀରେ ଚାକିରି ଦେବା ନାଁରେ ପ୍ରଲୋଭିତ କରାଯାଉଥିଲା। ବିଶ୍ୱାସ ଜନ୍ମାଇବା ପାଇଁ ସେମାନେ ନକଲି ଇଣ୍ଟରଭ୍ୟୁ ଏବଂ ଟାଇପିଂ ଟେଷ୍ଟ ମଧ୍ୟ କରାଉଥିଲେ। ପ୍ରତ୍ୟେକ ଯୁବକଙ୍କଠାରୁ ବିଦେଶ ପଠାଇବା ପାଇଁ ୭୦ ହଜାରରୁ ୧.୫ ଲକ୍ଷ ଟଙ୍କା ପର୍ଯ୍ୟନ୍ତ ଆଦାୟ କରାଯାଉଥିଲା।

ବିଦେଶ ମାଟିରେ ନର୍କ ଯନ୍ତ୍ରଣା

ଥରେ ଯୁବକମାନେ ବିଦେଶରେ ପହଞ୍ଚିବା ପରେ ସେମାନଙ୍କ ପାସପୋର୍ଟ ଏବଂ ମୋବାଇଲ୍ ଛଡ଼ାଇ ନିଆଯାଉଥିଲା। ସେମାନଙ୍କୁ ଏକ ବନ୍ଦ କୋଠରୀରେ ରଖି ଚୀନ ସାଇବର ମାଫିଆଙ୍କ ନିର୍ଦ୍ଦେଶରେ ସାଇବର ଠକେଇ କରିବାକୁ ବାଧ୍ୟ କରାଯାଉଥିଲା। ଯଦି କେହି ଏହି ଅପରାଧ କରିବାକୁ ମନା କରୁଥିଲେ, ତେବେ ସେମାନଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦିଆଯାଉଥିଲା। ଏହି ଯୁବକମାନଙ୍କୁ ବ୍ୟବହାର କରି ଭାରତୀୟ ନାଗରିକଙ୍କ ସହ କ୍ରିପ୍ଟୋକରେନ୍ସି ଠକେଇ ଏବଂ ଡିଜିଟାଲ ଆରେଷ୍ଟ ଭଳି ଅପରାଧ କରାଯାଉଥିଲା।

ପୋଲିସର କାର୍ଯ୍ୟାନୁଷ୍ଠାନ

ଗୁଜୁରାଟ ସାଇବର ସେଣ୍ଟର ଅଫ୍ ଏକ୍ସିଲେନ୍ସର ଏସପି ବିବେକ ଭେଡା କହିଛନ୍ତି ଯେ, ଗୁଇନ୍ଦା ସୂଚନା ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି ର୍ୟାକେଟର ଚେର ଆହୁରି ଗଭୀରକୁ ଯାଇଥିବା ଆଶଙ୍କା କରାଯାଉଛି ଏବଂ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ତଦନ୍ତ ଜାରି ରହିଛି। ପୋଲିସ ଜନସାଧାରଣଙ୍କୁ ସତର୍କ କରାଇ କହିଛି ଯେ, ବିଦେଶରେ ଚାକିରି ନାଁରେ ଆସୁଥିବା ଏଭଳି ପ୍ରଲୋଭନରୁ ଦୂରେଇ ରୁହନ୍ତୁ।

ପୁଣେର ଜଣେ ମହିଳା ସଫ୍ଟୱେୟାର ଇଞ୍ଜିନିୟରଙ୍କୁ ବିବାହର ପ୍ରତିଶ୍ରୁତି ଦେଇ ୪୨ ଲକ୍ଷ ଟଙ୍କା ଠକେଇ କରାଯାଇଥିବା ଏକ ଘଟଣା ସାମ୍ନାକୁ ଆସିଛି। ଠକ ଜଣକ ନିଜକୁ 'ଇସ୍ରୋ' (ISRO) ର ବୈଜ୍ଞାନିକ ବୋଲି ପରିଚୟ ଦେଇ ମାଟ୍ରିମୋନିଆଲ୍ ସାଇଟ୍ ଜରିଆରେ ଯୁବତୀଙ୍କ ସହ ସମ୍ପର୍କ ସ୍ଥାପନ କରିଥିଲେ। ଏନେଇ ପୀଡିତା ୱାକଡ ପୋଲିସ ଷ୍ଟେସନରେ ଅଭିଯୋଗ କରିବା ପରେ ଘଟଣାଟି ଲୋକଲୋଚନକୁ ଆସିଛି।

ମାଟ୍ରିମୋନିଆଲ୍ ସାଇଟରେ ପକାଇଥିଲା ଜାଲ

ପୋଲିସ ସୂଚନା ଅନୁଯାୟୀ, ଅଭିଯୁକ୍ତର ନାମ ଆଦର୍ଶ ପ୍ରଶାନ୍ତ ମ୍ହାତ୍ରେ (୩୬) ଏବଂ ସେ ରାୟଗଡର ଅଲିବାଗ ଅଞ୍ଚଳର ବାସିନ୍ଦା। ସେ ଏକ ପ୍ରମୁଖ ମାଟ୍ରିମୋନିଆଲ୍ ସାଇଟରେ 'ଜୟେଶ ପାଟିଲ' ନାମରେ ଏକ ନକଲି ପ୍ରୋଫାଇଲ୍ ତିଆରି କରିଥିଲା। ସେଥିରେ ସେ ନିଜକୁ ଇସ୍ରୋର ବୈଜ୍ଞାନିକ ବୋଲି ଦର୍ଶାଇଥିଲା ଏବଂ ନଭି ମୁମ୍ବାଇରେ ରହୁଥିବା ଦାବି କରିଥିଲା। ପୁଣେର ହିଞ୍ଜେୱାଡିରେ କାମ କରୁଥିବା ୩୦ ବର୍ଷୀୟା ପୀଡିତାଙ୍କ ସହ ତାର ସମ୍ପର୍କ ଗଢିଉଠିବା ପରେ ଅଭିଯୁକ୍ତ ତାଙ୍କୁ ବିବାହର ପ୍ରତିଶ୍ରୁତି ଦେଇଥିଲା।

ଜମି କିଣିବା ବାହାନାରେ ଲୁଟ୍

ବିବାହର ମିଥ୍ୟା ସ୍ୱପ୍ନ ଦେଖାଇ ଅଭିଯୁକ୍ତ ଜଣକ ପୀଡିତାଙ୍କ ବିଶ୍ୱାସ ଜିତିଥିଲା। ଏହାପରେ ବିଭିନ୍ନ ବାହାନା ଦେଖାଇ ସେ ଟଙ୍କା ମାଗିବା ଆରମ୍ଭ କରିଥିଲା। କେତେବେଳେ ଜମି କିଣିବା ପାଇଁ ତ ଆଉ କେତେବେଳେ ଟ୍ରେନିଂ ପାଇଁ ଟଙ୍କା ଦରକାର ବୋଲି କହି ସେ ପ୍ରାୟ ୪୨.୬୪ ଲକ୍ଷ ଟଙ୍କା ନିଜ ଆକାଉଣ୍ଟକୁ ଟ୍ରାନ୍ସଫର କରାଇ ନେଇଥିଲା। ନଭେମ୍ବର ୨୦୨୪ ରୁ ଜାନୁଆରୀ ୨୦୨୫ ମଧ୍ୟରେ ଏହି ଠକେଇ ହୋଇଥିବା ଅଭିଯୋଗ ହୋଇଛି।

ଜୁଆ ଆଡ୍ଡାରେ ଉଡାଉଥିଲା ଟଙ୍କା

ଯେତେବେଳେ ଯୁବତୀ ଜଣକ ଠକେଇର ଶିକାର ହୋଇଛନ୍ତି ବୋଲି ଜାଣିବାକୁ ପାଇଲେ, ସେ ତୁରନ୍ତ ସାଇବର ପୋଲିସର ଦ୍ୱାରସ୍ଥ ହୋଇଥିଲେ। ପୋଲିସର ତତ୍ପରତା ଯୋଗୁଁ ଠକେଇ ହୋଇଥିବା ଅର୍ଥରାଶି ମଧ୍ୟରୁ ପ୍ରାୟ ୧୬.୬୫ ଲକ୍ଷ ଟଙ୍କା ଫ୍ରିଜ୍ କରାଯାଇ ପାରିଛି। ତଦନ୍ତରୁ ଜଣାପଡିଛି ଯେ, ଅଭିଯୁକ୍ତ ଆଦର୍ଶ ଜଣେ ପେଶାଦାର ଠକ ଏବଂ ସେ ପୂର୍ବରୁ ଅନେକ ମହିଳାଙ୍କୁ ଏଭଳି ଠକିଛି। ଠକେଇ ଟଙ୍କାରେ ସେ ଗୋଆର କ୍ୟାସିନୋରେ ଜୁଆ ଖେଳୁଥିବା ପୋଲିସ ଜାଣିବାକୁ ପାଇଛି।

ଉତ୍ତରପ୍ରଦେଶର ସିଦ୍ଧାର୍ଥନଗର ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଜଣେ ସାଧାରଣ ଘରୋଇ ସ୍କୁଲ ଶିକ୍ଷକ, ଯିଏ ମାସକୁ ମାତ୍ର ୬ ରୁ ୭ ହଜାର ଟଙ୍କା ରୋଜଗାର କରନ୍ତି, ତାଙ୍କୁ ଜିଏସ୍ଟି (GST) ବିଭାଗ ପକ୍ଷରୁ ପ୍ରାୟ ୨ କୋଟି ଟଙ୍କାର ଟ୍ୟାକ୍ସ ନୋଟିସ ମିଳିଛି। ଏହି ନୋଟିସ ପାଇବା ପରେ ଶିକ୍ଷକ ଜଣକ ହତାଶ ହୋଇପଡିଛନ୍ତି ଏବଂ ନ୍ୟାୟ ପାଇଁ ବିଭିନ୍ନ ଅଧିକାରୀଙ୍କ କାର୍ଯ୍ୟାଳୟ ଦୌଡୁଛନ୍ତି।

କ’ଣ ରହିଛି ପୂରା ଘଟଣା?

ସିଦ୍ଧାର୍ଥନଗର ଜିଲ୍ଲା ଡୁମରିୟାଗଞ୍ଜ ତହସିଲ ଅନ୍ତର୍ଗତ ଭରୱାଠିଆ ମୁସ୍ତାକମ ଗାଁର ବାସିନ୍ଦା ଓମ ପ୍ରକାଶ ବର୍ମା ଜଣେ ଘରୋଇ ସ୍କୁଲରେ ଶିକ୍ଷକତା କରନ୍ତି। ଗତ ଫେବୃଆରୀ ୧୦ ତାରିଖରେ ତାଙ୍କୁ ଡାକ ଯୋଗେ ଏକ ସରકારી ନୋଟିସ ମିଳିଥିଲା। ଏହି ନୋଟିସରେ ତାଙ୍କ ନାମରେ ୧ କୋଟି ୯୯ ଲକ୍ଷ ୪୨ ହଜାର ୩୧୩ ଟଙ୍କାର ବକେୟା ଟ୍ୟାକ୍ସ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା। ଏତେ ବଡ଼ ଅଙ୍କର ନୋଟିସ ଦେଖି ଓମ ପ୍ରକାଶଙ୍କ ପାଦ ତଳୁ ମାଟି ଖସିଯାଇଥିଲା।

ପ୍ୟାନ କାର୍ଡ ଜରିଆରେ ବଡ଼ ଧରଣର ଜାଲିଆତି

ପୀଡ଼ିତ ଶିକ୍ଷକ ଯେତେବେଳେ ଏହି ବିଷୟରେ ଜାଣିବା ପାଇଁ ସେଲ ଟ୍ୟାକ୍ସ ବିଭାଗ ଏବଂ ପୋଲିସ ସହ ଯୋଗାଯୋଗ କଲେ, ସେତେବେଳେ ଏକ ବଡ଼ ଧରଣର ଠକେଇ ସାମ୍ନାକୁ ଆସିଥିଲା। ତଦନ୍ତରୁ ଜଣାପଡିଛି ଯେ, କେହି ଦୁର୍ବୃତ୍ତ ଓମ ପ୍ରକାଶଙ୍କ ପ୍ୟାନ କାର୍ଡ (PAN Card)ର ଅପବ୍ୟବହାର କରି ତାଙ୍କ ନାମରେ ଦୁଇଟି ଫର୍ଜି କମ୍ପାନୀ ପଞ୍ଜୀକୃତ କରିଛନ୍ତି।

୧. ଓମ ଟ୍ରେଡର୍ସ: ନୂଆଦିଲ୍ଲୀରେ ପଞ୍ଜୀକୃତ ଏହି ଫର୍ମ ଜରିଆରେ ଗତ ବର୍ଷ ପ୍ରାୟ ୧୧ କୋଟି ଟଙ୍କାର କାରବାର କରାଯାଇଛି।

୨. ବର୍ମା ଏଣ୍ଟରପ୍ରାଇଜେସ: ଏହି ଫର୍ମଟି ଉତ୍ତରପ୍ରଦେଶର ଫରୁଖାବାଦରେ ଚାଲୁଥିବା ଜଣାପଡିଛି।

ଦିଲ୍ଲୀ ସ୍ଥିତ ‘ଓମ ଟ୍ରେଡର୍ସ’ ନାମକ କମ୍ପାନୀ ୧୧ କୋଟିରୁ ଊର୍ଦ୍ଧ୍ୱ ଟଙ୍କାର କାରବାର କରିଥିଲେ ମଧ୍ୟ କୌଣସି ଟ୍ୟାକ୍ସ ଭରି ନଥିଲା, ଯାହା ଫଳରେ ବିଭାଗ ଅସଲି ପ୍ୟାନ କାର୍ଡ ଧାରକ ଓମ ପ୍ରକାଶଙ୍କୁ ଏହି ନୋଟିସ ପଠାଇଛି।

"ମୁଁ ଗରିବ ଲୋକ, ମୋତେ ଫସାଯାଉଛି"

ପୀଡ଼ିତ ଓମ ପ୍ରକାଶ କହିଛନ୍ତି ଯେ, ସେ ଜଣେ ଅତି ସାଧାରଣ ବ୍ୟକ୍ତି ଏବଂ ମାସିକ ମାତ୍ର କିଛି ହଜାର ଟଙ୍କାରେ ନିଜ ପରିବାର ଚଳାନ୍ତି। ସେ କହିଛନ୍ତି, "ମୁଁ ସ୍ୱପ୍ନରେ ସୁଦ୍ଧା ଏତେ ଟଙ୍କା ଦେଖିନାହିଁ। ମୋ ଅଜାଣତରେ ମୋ କାଗଜପତ୍ରର ଅପବ୍ୟବହାର କରାଯାଇ ମୋତେ ଫସାଯାଉଛି।" ବର୍ତ୍ତମାନ ସେ ଡୁମରିୟାଗଞ୍ଜ ଥାନାରେ ଏ ନେଇ ଲିଖିତ ଅଭିଯୋଗ କରିଛନ୍ତି ଏବଂ ନୌଗଡ ସ୍ଥିତ ଟ୍ୟାକ୍ସ କମିଶନରଙ୍କ ଦ୍ୱାରସ୍ଥ ହୋଇଛନ୍ତି। ପୋଲିସ ଏବଂ ସାଇବର ସେଲ୍ ଏହି ମାମଲାର ତଦନ୍ତ ଆରମ୍ଭ କରିଛନ୍ତି।

ଗୁଜରାଟର ଅହମ୍ମଦାବାଦ ଏବଂ ଭଦୋଦରାରେ ଏକାସାଙ୍ଗରେ ୨୫ରୁ ଅଧିକ ସ୍କୁଲକୁ ବୋମା ପକାଇ ଉଡାଇଦେବାକୁ ଧମକ ମିଳିବା ପରେ ଚାଞ୍ଚଲ୍ୟ ଖେଳିଯାଇଛି। ସୋମବାର ସକାଳେ ଏହି ସ୍କୁଲଗୁଡ଼ିକୁ ଇମେଲ୍ ଯୋଗେ ଧମକପୂର୍ଣ୍ଣ ବାର୍ତ୍ତା ପଠାଯାଇଥିଲା। ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ଗୁଜରାଟ ସରକାର ତୁରନ୍ତ ତଦନ୍ତ ନିର୍ଦ୍ଦେଶ ଦେଇଛନ୍ତି।

ଇମେଲରେ କ’ଣ ଥିଲା?

ମିଳିଥିବା ସୂଚନା ଅନୁଯାୟୀ, ସୋମବାର ସକାଳେ ଅହମ୍ମଦାବାଦର ପ୍ରାୟ ୧୫ଟି ଏବଂ ଭଦୋଦରାର ୧୦ରୁ ଅଧିକ ପ୍ରମୁଖ ସ୍କୁଲକୁ ଏକ ସନ୍ଦିଗ୍ଧ ଇମେଲ୍ ଆସିଥିଲା। ଏଥିରେ ଦାବି କରାଯାଇଥିଲା ଯେ ସ୍କୁଲ ପରିସରରେ ବିସ୍ଫୋରକ ସାମଗ୍ରୀ ଖଞ୍ଜାଯାଇଛି ଏବଂ ନିର୍ଦ୍ଦିଷ୍ଟ ସମୟରେ ବିସ୍ଫୋରଣ ଘଟିବ। ଏହି ଖବର ପ୍ରଚାରିତ ହେବା ମାତ୍ରେ ଅଭିଭାବକମାନଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିଲା। ସ୍କୁଲ କର୍ତ୍ତୃପକ୍ଷ ତୁରନ୍ତ ପୋଲିସକୁ ଖବର ଦେବା ସହ ପିଲାମାନଙ୍କୁ ସୁରକ୍ଷିତ ଭାବେ ଘରକୁ ପଠାଇବା ବ୍ୟବସ୍ଥା କରିଥିଲେ।

ସରକାରଙ୍କ କଡ଼ା କାର୍ଯ୍ୟାନୁଷ୍ଠାନ

ଘଟଣା ସମ୍ପର୍କରେ ଗୁଜରାଟର ଗୃହ ରାଷ୍ଟ୍ରମନ୍ତ୍ରୀ ହର୍ଷ ସାଙ୍ଘଭି ଏବଂ ଶିକ୍ଷାମନ୍ତ୍ରୀ ପ୍ରତିକ୍ରିୟା ରଖିଛନ୍ତି। ସରକାର ଏହି ଘଟଣାକୁ ଗମ୍ଭୀରତାର ସହ ଗ୍ରହଣ କରିଛନ୍ତି ଏବଂ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି। ସ୍ଥାନୀୟ ପୋଲିସ, ବୋମା ନିଷ୍କ୍ରିୟକାରୀ ଦଳ (BDDS) ଏବଂ ଡଗ୍ ସ୍କ୍ୱାଡ୍ ଘଟଣାସ୍ଥଳରେ ପହଞ୍ଚି ତନ୍ନ ତନ୍ନ କରି ଯାଞ୍ଚ ଚଳାଇଛନ୍ତି। ପ୍ରାଥମିକ ତଦନ୍ତରୁ ଏହା ଏକ 'ହୋକ୍ସ' ବା ମିଥ୍ୟା ଧମକ ବୋଲି ସନ୍ଦେହ କରାଯାଉଥିଲେ ମଧ୍ୟ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।

ସାଇବର କ୍ରାଇମ୍ ବ୍ରାଞ୍ଚର ତଦନ୍ତ ଆରମ୍ଭ

ଏହି ଧମକପୂର୍ଣ୍ଣ ଇମେଲ୍ କେଉଁଠାରୁ ଆସିଛି, ସେ ନେଇ ସାଇବର କ୍ରାଇମ୍ ବ୍ରାଞ୍ଚ ତଦନ୍ତ ଆରମ୍ଭ କରିଛି। ପୂର୍ବରୁ ଦିଲ୍ଲୀ ଏବଂ ଅନ୍ୟାନ୍ୟ ସହରରେ ମଧ୍ୟ ସମାନ ଧରଣର ମିଥ୍ୟା ଧମକ ମିଳିଥିଲା। ପୋଲିସର କହିବା ଅନୁଯାୟୀ, କେହି ଦୁର୍ବୃତ୍ତ ଆତଙ୍କ ସୃଷ୍ଟି କରିବା ଉଦ୍ଦେଶ୍ୟରେ ଏଭଳି କାଣ୍ଡ ଭିଆଇଥାଇ ପାରନ୍ତି। ତେବେ ଅଭିଭାବକମାନଙ୍କୁ ଭୟଭୀତ ନହେବାକୁ ପ୍ରଶାସନ ପକ୍ଷରୁ ନିବେଦନ କରାଯାଇଛି।