ବିହାର: ଗଙ୍ଗା ନଦୀରେ ଗାଧୋଇବା ବେଳେ ବୁଡ଼ିଗଲେ ୭ ଝିଅ । ବିହାରର ପାଟନା ଜିଲ୍ଲା ଅନ୍ତର୍ଗତ ବଖତିଆରପୁର ବ୍ଲକର ରାନୀସରାଇ ଗଙ୍ଗା ଘାଟରେ ଘଟିଛି ଏପରି ଏକ ବଡ଼ ଧରଣର ଅଘଟଣ । ଗୋଟିଏ ପରିବାରର ୭ ଜଣ ଝିଅ ଗଙ୍ଗା ନଦୀରେ ଗାଧୋଉଥିବା ବେଳେ ପ୍ରଖର ସ୍ରୋତରେ ଭାସିଯାଇଛନ୍ତି। ସ୍ଥାନୀୟ ଲୋକଙ୍କ ସହାୟତାରେ ୩ ଜଣଙ୍କୁ ଉଦ୍ଧାର କରାଯାଇଥିବା ବେଳେ, ଅନ୍ୟ ୪ ଜଣ ନିଖୋଜ ହୋଇଯାଇଥିଲେ। ପରେ ଉଦ୍ଧାର କାର୍ଯ୍ୟ ବେଳେ ୨ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଳେ ଅନ୍ୟ ୨ ଜଣ ଏବେ ବି ନିଖୋଜ ଅଛନ୍ତି।

ମିଳିଥିବା ସୂଚନା ଅନୁଯାୟୀ, ସୋମବାର ସକାଳ ପ୍ରାୟ ୭:୩୦ ମିନିଟ୍ ସମୟରେ ଏହି ଘଟଣା ଘଟିଥିଲା। ସମସ୍ତ ୭ ଜଣ ଝିଅ ସମ୍ପର୍କୀୟ ଭଉଣୀ ଥିଲେ ଏବଂ ଏକାଠି ଗାଧୋଇବା ପାଇଁ ଘାଟକୁ ଯାଇଥିଲେ। ସେମାନଙ୍କ ମଧ୍ୟରୁ ଜଣେ ଅସାବଧାନତା ବଶତଃ ଗଭୀର ପାଣିକୁ ଚାଲିଯାଇ ବୁଡ଼ିବାକୁ ଲାଗିଥିଲେ। ତାଙ୍କୁ ବଞ୍ଚାଇବାକୁ ପ୍ରୟାସ କରି ଅନ୍ୟମାନେ ମଧ୍ୟ ନଦୀର ପ୍ରଖର ସ୍ରୋତରେ ଫସି ଯାଇଥିଲେ। ଏହା ଦେଖି ଘାଟରେ ଉପସ୍ଥିତ ଥିବା ଲୋକେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରି ନଦୀକୁ ଡେଇଁପଡ଼ିଥିଲେ। ସ୍ଥାନୀୟ ଲୋକଙ୍କ ଉଦ୍ୟମ କ୍ରମେ ତିନି ଜଣ ଝିଅଙ୍କୁ ସୁରକ୍ଷିତ ଭାବେ କୂଳକୁ ଅଣାଯାଇଥିଲା।

ପାଣିରେ ବୁଡ଼ି ନିଖୋଜ ଥିବା ୪ ଜଣ ଝିଅଙ୍କ ପରିଚୟ ମିଳିଛି। ସେମାନେ ହେଲେ ଅବଧେଶ ଚନ୍ଦ୍ରବଂଶୀଙ୍କ ଝିଅ ଆରତୀ କୁମାରୀ (୨୧) ଓ ନନ୍ଦିନୀ କୁମାରୀ (୧୬), କମଲେଶ ଚନ୍ଦ୍ରବଂଶୀଙ୍କ ଝିଅ ରାଧିକା କୁମାରୀ (୧୫) ଏବଂ ମଣ୍ଟୁ ଚନ୍ଦ୍ରବଂଶୀଙ୍କ ଝିଅ ବବ୍‌ଲି କୁମାରୀ (୬)। ଘଟଣା ସମ୍ପର୍କରେ ଖବର ପାଇ ପୋଲିସ ଓ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ପରେ ଏସଡିଆରଏଫ (SDRF) ଟିମ୍ ମୁତୟନ କରାଯାଇ ନଦୀରେ ବ୍ୟାପକ ସର୍ଚ୍ଚ ଅପରେସନ୍ ଆରମ୍ଭ କରାଯାଇଥିଲା। ଖୋଜାଖୋଜି ବେଳେ ୨ଟି ମୃତଦେହ ଉଦ୍ଧାର କରାଯାଇଥିବା ବେଳେ, ବାକି ୨ ଜଣଙ୍କୁ ଖୋଜିବା ପାଇଁ ଉଦ୍ୟମ ଜାରି ରହିଛି। ନଦୀର ଗଭୀରତା ଏବଂ ପ୍ରଖର ସ୍ରୋତ କାରଣରୁ ଉଦ୍ଧାର କାର୍ଯ୍ୟରେ ବାଧା ଉପୁଜୁଛି। ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ବାର୍ହ ସବ୍-ଡିଭିଜନାଲ୍ ହସ୍ପିଟାଲକୁ ପଠାଯାଇଛି।

ଉଦ୍ଧାର କାର୍ଯ୍ୟ ବିଳମ୍ବରେ ଆରମ୍ଭ ହୋଇଥିବା ଅଭିଯୋଗ କରି ଗ୍ରାମବାସୀ ଓ ପରିବାର ଲୋକେ ତୀବ୍ର ଅସନ୍ତୋଷ ବ୍ୟକ୍ତ କରିଥିଲେ। ତୁରନ୍ତ ଉଦ୍ଧାରକାରୀ ଦଳ ମୁତୟନ ଦାବିରେ ଉତ୍ତ୍ୟକ୍ତ ଲୋକେ ପ୍ରାୟ ୨୦ ମିନିଟ୍ ଧରି ରାସ୍ତା ଅବରୋଧ କରିଥିଲେ, ଯାହା ଫଳରେ ସେଠାରେ ଯାତାୟାତ ବାଧାପ୍ରାପ୍ତ ହୋଇଥିଲା। ତେବେ ଉଦ୍ଧାର କାର୍ଯ୍ୟ ଆରମ୍ଭ ହେବା ପରେ ଅବରୋଧ ହଟାଯାଇଥିଲା। ଏବେ ବି ନଦୀ କୂଳରେ ବହୁ ସଂଖ୍ୟାରେ ସମ୍ପର୍କୀୟମାନେ ଉପସ୍ଥିତ ରହି ଉଦ୍ଧାର ହେବାର ଆଶାରେ ଅପେକ୍ଷା କରି ରହିଛନ୍ତି। ଗୋଟିଏ ପରିବାରର ଏକାଧିକ ଶିଶୁ ଏବଂ ଯୁବତୀ ଏହି ଭୟଙ୍କର ଦୁର୍ଘଟଣାର ଶିକାର ହେବା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି।

ଉତ୍ତରପ୍ରଦେଶର ପ୍ରୟାଗରାଜ ଅନ୍ତର୍ଗତ ଫାଫାମଉ ଅଞ୍ଚଳରେ ସୋମବାର ଏକ ବଡ଼ ଧରଣର ଅଘଟଣ ଘଟିଛି। ଏକ କୋଲ୍ଡ ଷ୍ଟୋରେଜର କାନ୍ଥ ଭୁଶୁଡ଼ି ପଡ଼ିବାରୁ ମାଟି ଅତଡ଼ା ତଳେ ଚାପି ହୋଇ ୯ ଜଣ ଶ୍ରମିକଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି। ଆମୋନିଆ ଗ୍ୟାସ୍ ପାଇପ୍ ଫାଟିଯିବା କାରଣରୁ ଏହି ଦୁର୍ଘଟଣା ଘଟିଥିବା ଜଣାପଡ଼ିଛି।

କିପରି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ଦୁର୍ଘଟଣା ସମୟରେ କୋଲ୍ଡ ଷ୍ଟୋରେଜ୍‌ ଭିତରେ ପ୍ରାୟ ୨୦ ଜଣ ଶ୍ରମିକ କାମ କରୁଥିଲେ। ହଠାତ୍ ଏକ ଶକ୍ତିଶାଳୀ ବିସ୍ଫୋରଣ ଶବ୍ଦ ଶୁଭିବା ସହ କାନ୍ଥଟି ଭୁଶୁଡ଼ି ପଡ଼ିଥିଲା। ଆମୋନିଆ ଗ୍ୟାସ୍ ପାଇପ୍ ଫାଟିଯିବା ଯୋଗୁଁ କାନ୍ଥଟି ଭାଙ୍ଗିପଡ଼ିଥିବା ପ୍ରାଥମିକ ତଦନ୍ତରୁ ଜଣାପଡିଛି। ଗ୍ୟାସ୍ ଲିକ୍ ହେବା ଫଳରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା ଏବଂ ଲୋକଙ୍କ ମଧ୍ୟରେ ଧାଁଦଉଡ଼ ପରିସ୍ଥିତି ସୃଷ୍ଟି ହୋଇଥିଲା।

ଉଦ୍ଧାର କାର୍ଯ୍ୟ ଜାରି

ଖବର ପାଇ ପୋଲିସ, ଅଗ୍ନିଶମ ବାହିନୀ ଏବଂ ଏସଡିଆରଏଫ୍ (SDRF) ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ୭ଟି ବୁଲଡୋଜର ନିୟୋଜିତ କରାଯାଇଛି। ବର୍ତ୍ତମାନ ସୁଦ୍ଧା ମାଟି ତଳୁ ୭ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ, ଅନ୍ୟ ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ଅଭିଯାନ ଜୋରସୋରରେ ଚାଲିଛି। ଆହତମାନଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଛି।

ତଦନ୍ତ ଓ କାର୍ଯ୍ୟାନୁଷ୍ଠାନ

ଏହି କୋଲ୍ଡ ଷ୍ଟୋରେଜ୍‌ଟି ଚାନ୍ଦପୁରର ଜଣେ ପୂର୍ବତନ ବିଧାୟକଙ୍କର ବୋଲି ସୂଚନା ମିଳିଛି। ସୁରକ୍ଷା ବ୍ୟବସ୍ଥାରେ ଅବହେଳା ଏବଂ ରକ୍ଷଣାବେକ୍ଷଣରେ ତ୍ରୁଟି ଅଭିଯୋଗରେ ପୋଲିସ କୋଲ୍ଡ ଷ୍ଟୋରେଜର ମ୍ୟାନେଜର ଏବଂ ଅନ୍ୟ କିଛି ବରିଷ୍ଠ କର୍ମଚାରୀଙ୍କୁ ଅଟକ ରଖି ପଚରାଉଚରା କରୁଛି। ଉଦ୍ଧାର କାର୍ଯ୍ୟରେ ଯେପରି କୌଣସି ବାଧା ନଆସେ, ସେଥିପାଇଁ ପୋଲିସ ପକ୍ଷରୁ ଉକ୍ତ ରାସ୍ତାରେ ଯାତାୟାତକୁ ଡାଇଭର୍ସନ୍ କରାଯାଇଛି। ଏହି ହୃଦୟବିଦାରକ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।