ଭୁବନେଶ୍ୱର: କେନ୍ଦ୍ର ଶିକ୍ଷା ମନ୍ତ୍ରଣାଳୟର ୟୁଡାଇସ୍‌ ପ୍ଲସ୍‌ ରିପୋର୍ଟ ରାଜ୍ୟର ବିଜେପି ସରକାର ସମୟରେ ବିଦ୍ୟାଳୟ ଶିକ୍ଷା ବ୍ୟବସ୍ଥାରେ ବିକଳ ଚିତ୍ରକୁ ପଦାରେ ପକାଇଛି।  ପ୍ରାଥମିକ ବିଦ୍ୟାଳୟର ଶୈକ୍ଷିକ ସ୍ଥିିତି ଉଦ୍‌ବେଦଜନକ ଭାବେ ଅବନତି ଘଟୁଥିବାରୁ ବିଜୁ ଜନତା ଦଳ ଗଭୀର ଚିନ୍ତା ପ୍ରକାଶ କରିଛି। 

ଦଳର ମୁଖପାତ୍ର ତଥା ମିଡିଆ ସଂଯୋଜକ ଡ. ଲେନିନ ମହାନ୍ତି ଏକ ପ୍ରେସ ବିବୃତ୍ତିରେ କହିଛନ୍ତି ଯେ ବିଦ୍ୟାଳୟ ଶିକ୍ଷାକୁ ସୁଦୃଢ଼ କରାଯାଉଥିବା ରାଜ୍ୟ ସରକାର ଦାବି କରୁଥିବାବେଳେ କେନ୍ଦ୍ର ସରକାରଙ୍କ ରିପୋର୍ଟ ଏହାକୁ ପାଣିଚିଆ କରି ଦେଇଛି। ହଜାର ହଜାର ଶିକ୍ଷକ ନିଯୁକ୍ତି ଦେଇଥିବା ରାଜ୍ୟ ସରକାର ଦାବି କରୁଥିବା ବେଳେ ସରକାରୀ ପରିସଂଖ୍ୟାନ ସମ୍ପୂର୍ଣ୍ଣ ଭିନ୍ନ । ୨୦୨୪-୨୫ ତୁଳନାରେ ୨୦୨୫-୨୬ ରେ ଏକକ ଶିକ୍ଷକ ବିଦ୍ୟାଳୟ ୩୪ ପ୍ରତିଶତ ବୃଦ୍ଧି ପାଇଛି। ଏହି ପ୍ରଶାସନିକ ବିଫଳତାର ମୂଲ୍ୟ ବର୍ତ୍ତମାନ ଏକକ ବିଦ୍ୟାଳୟରେ ପଢ଼ୁଥିବା ୫୯,୬୭୨ ଜଣ ଛାତ୍ରଛାତ୍ରୀ ଦେଉଛନ୍ତି। ଏହାର ସବୁଠାରୁ ଅଧିକ ପ୍ରଭାବ ଗ୍ରାମାଞ୍ଚଳ, ଆଦିବାସୀ ଓ ଦୁର୍ଗମ ଅଞ୍ଚଳର ଶିଶୁଙ୍କ ଉପରେ ପଡ଼ିଛି। ଜଣେ ଶିକ୍ଷକଙ୍କୁ ଏକାସାଙ୍ଗରେ ଏକାଧିକ ଶ୍ରେଣୀରେ ବିଭିନ୍ନ ବିଷୟ ପଢ଼ାଇବା, ବିଦ୍ୟାଳୟର ରେକର୍ଡ ପରିଚାଳନା କରିବା, ସରକାରୀ ଯୋଜନାର କାର୍ଯ୍ୟକାରିତା ତଦାରଖ କରିବା ସହିତ ନିର୍ବାଚନ, ଜନଗଣନା ଓ ବିପର୍ଯ୍ୟୟ ପରିଚାଳନା ପରି ପ୍ରଶାସନିକ ଦାୟିତ୍ୱ ତୁଲାଇବାକୁ ଦିଆଯାଉଛି। ସରକାରଙ୍କ ଦୁର୍ବଳ ମାନବ ସମ୍ୱଳ ପରିକଳ୍ପନା, ନିଯୁକ୍ତିରେ ବିଳମ୍ୱ, ପଦୋନ୍ନତିରେ ଶିଥିଳତା ଏବଂ ଶିକ୍ଷକ ନିୟୋଜନରେ ବିଫଳତା ଏହି ରିପୋର୍ଟରେ ପ୍ରତିଫଳିତ ହୋଇଛି। 

ଅଧିକାଂଶ ଏକକ ଶିକ୍ଷକ ବିଦ୍ୟାଳୟ ଆଦିବାସୀ ଓ ପଛୁଆ ଅଞ୍ଚଳରେ ରହିଛି। ବିଜେପି ସରକାର ବାରମ୍ୱାର ଆଦିବାସୀ କଲ୍ୟାଣକୁ ପ୍ରାଥମିକତା ଦେଉଥିବା ଦାବି କରୁଥିଲେ ମଧ୍ୟ, ଏହି ଅଞ୍ଚଳଗୁଡ଼ିକରେ ପର୍ଯ୍ୟାପ୍ତ ଶିକ୍ଷକ ନିଯୁକ୍ତିରେ ବିଫଳତା ସରକାରଙ୍କ ପ୍ରତିଶ୍ରୁତି ଓ କାର୍ଯ୍ୟଦକ୍ଷତା ମଧ୍ୟରେ ଥିବା ବ୍ୟବଧାନକୁ ସ୍ପଷ୍ଟ କରୁଛି।  ତେଣୁ ପ୍ରତ୍ୟେକ ସରକାରୀ ବିଦ୍ୟାଳୟରେ ଅତି କମରେ ୩ରୁ ୪ ଜଣ ଶିକ୍ଷକଙ୍କ ନିଯୁକ୍ତି ସୁନିଶ୍ଚିତ କରନ୍ତୁ। ସମସ୍ତ ବକେୟା ନିଯୁକ୍ତି ଓ ପଦୋନ୍ନତି ପ୍ରକ୍ରିୟା ତୁରନ୍ତ ସମ୍ପୂର୍ଣ୍ଣ କରନ୍ତୁ। ଆଦିବାସୀ ଓ ଦୁର୍ଗମ ଅଞ୍ଚଳକୁ ପ୍ରାଥମିକତା ଦେଇ ଶିକ୍ଷକ ନିଯୁକ୍ତି କରନ୍ତୁ। ବିଜେପି ସରକାର କେବଳ ନିଜ ଦଳୀୟ ପ୍ରଚାରରେ ସୀମିତ ନରହି ପ୍ରତ୍ୟେକ ଶିଶୁଙ୍କୁ ପର୍ଯ୍ୟାପ୍ତ ଶିକ୍ଷକ ଏବଂ ଗୁଣାତ୍ମକ ଶିକ୍ଷା ସୁନିଶ୍ଚିତ କରିବା ପାଇଁ ତୁରନ୍ତ ପଦକ୍ଷେପ ନିଅନ୍ତୁ ବୋଲି ଡ. ମହାନ୍ତି ଦାବି କରିଛନ୍ତି।

ମଧ୍ୟପ୍ରାଚ୍ୟ ଏବଂ ଏହାର ଆଖପାଖ ଅଞ୍ଚଳରେ ଲାଗିରହିଥିବା ଯୁଦ୍ଧ କେବଳ ଧନଜୀବନ ନଷ୍ଟ କରୁନାହିଁ, ବରଂ କୋଟି କୋଟି ପିଲାଙ୍କ ଭବିଷ୍ୟତକୁ ମଧ୍ୟ ଅନ୍ଧକାର ଆଡ଼କୁ ଠେଲି ଦେଉଛି। ବିଶ୍ୱର ସବୁଠାରୁ ବଡ଼ ବାଲ୍ୟ ଅଧିକାର ସଂସ୍ଥା ସେଭ୍ ଦି ଚିଲ୍ଡ୍ରେନ୍ (Save the Children) ର ଏକ ତାଜା ରିପୋର୍ଟ ଅନୁଯାୟୀ, ଇରାନ-ଇସ୍ରାଏଲ୍ ଏବଂ ପାକିସ୍ତାନ-ଆଫଗାନିସ୍ତାନ ଭଳି ଦେଶଗୁଡ଼ିକରେ ଲାଗିରହିଥିବା ସଂଘର୍ଷ କାରଣରୁ ପ୍ରାୟ ୫.୨ କୋଟି ପିଲା ନିଜର ଶିକ୍ଷାରୁ ବଞ୍ଚିତ ହୋଇଛନ୍ତି। ମିଳିତ ଜାତିସଂଘର ତଥ୍ୟ ଉପରେ ଆଧାରିତ ଏହି ରିପୋର୍ଟ ଦର୍ଶାଉଛି ଯେ, ୫ ରୁ ୧୭ ବର୍ଷ ବୟସର ପିଲାମାନେ ବର୍ତ୍ତମାନ ସ୍କୁଲ୍ ଯିବା ପରିବର୍ତ୍ତେ ନିଜ ଜୀବନ ବଞ୍ଚାଇବା ପାଇଁ ସଂଘର୍ଷ କରୁଛନ୍ତି। ଏହି ପରିସ୍ଥିତିକୁ ଏକ 'ଏଜୁକେସନ୍ ଇମର୍ଜେନ୍ସି' ବା ଶିକ୍ଷାଗତ ଜରୁରୀକାଳୀନ ସ୍ଥିତି ବୋଲି କୁହାଯାଉଛି।

ସ୍କୁଲ୍ ବଦଳରେ ଶୁଭୁଛି ବିସ୍ଫୋରଣର ଶବ୍ଦ

ରିପୋର୍ଟ ଅନୁଯାୟୀ, ମଧ୍ୟପ୍ରାଚ୍ୟର ପ୍ରାୟ ୧୨ଟି ଦେଶରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ରୂପେ ଭୁସୁଡ଼ି ପଡ଼ିଛି। ସେଥିମଧ୍ୟରେ ଇରାନ, ଇସ୍ରାଏଲ୍, ଜୋର୍ଡାନ, ସାଉଦି ଆରବ, ପାଲେଷ୍ଟାଇନ୍ ଏବଂ ସଂଯୁକ୍ତ ଆରବ ଏମିରେଟ୍ସ (UAE) ଆଦି ଦେଶ ସାମିଲ ଅଛନ୍ତି। ଯୁଦ୍ଧ ବିମାନର ଆକ୍ରମଣରେ ଅନେକ ସ୍କୁଲ୍ ସମ୍ପୂର୍ଣ୍ଣ ରୂପେ ନଷ୍ଟ ହୋଇଯାଇଛି। କେବଳ ଇରାନରେ ହୋଇଥିବା ବିମାନ ଆକ୍ରମଣରେ ୬୫ ଟି ସ୍କୁଲ୍ ଧ୍ୱଂସସ୍ତୂପରେ ପରିଣତ ହୋଇଥିବା ଇରାନିଆନ୍ ରେଡ୍ କ୍ରିସେଣ୍ଟ ସୋସାଇଟି ପ୍ରକାଶ କରିଛି। ଯେଉଁ ଶ୍ରେଣୀଗୃହଗୁଡ଼ିକରେ କେବେ ପିଲାମାନଙ୍କର କୋଳାହଳ ଶୁଭୁଥିଲା, ସେଠାରେ ଏବେ କେବଳ ଇଟା, ପଥର ଏବଂ ଧୂଆଁ ଦେଖିବାକୁ ମିଳୁଛି।

ସ୍କୁଲ୍ ଏବେ ପାଲଟିଛି 'ଆଶ୍ରୟସ୍ଥଳୀ'

ଯେଉଁ ସ୍କୁଲ୍‌ଗୁଡ଼ିକ ବର୍ତ୍ତମାନ ସୁଦ୍ଧା ସୁରକ୍ଷିତ ରହିଛି, ସେଗୁଡ଼ିକୁ ମଧ୍ୟ ବନ୍ଦ କରିଦିଆଯାଇଛି। କାରଣ ଯୁଦ୍ଧ ଯୋଗୁଁ ବାସହୀନ ହୋଇପଡ଼ିଥିବା ହଜାର ହଜାର ପରିବାର ଏହି ସ୍କୁଲ୍‌ଗୁଡ଼ିକରେ ଆଶ୍ରୟ ନେଉଛନ୍ତି। ଅର୍ଥାତ୍ ବର୍ତ୍ତମାନ କ୍ଲାସ୍‌ରୁମ୍‌ଗୁଡ଼ିକ ଶରଣାର୍ଥୀଙ୍କ ପାଇଁ ଆଶ୍ରୟସ୍ଥଳୀରେ ପରିଣତ ହୋଇଛି। ଯୁଦ୍ଧର ପ୍ରଭାବ କେବଳ ସେହି ଦେଶଗୁଡ଼ିକରେ ସୀମିତ ନାହିଁ ବରଂ ପାକିସ୍ତାନ ଓ ଆଫଗାନିସ୍ତାନ ଭଳି ପଡ଼ୋଶୀ ଦେଶଗୁଡ଼ିକରେ ମଧ୍ୟ ଏହାର ବ୍ୟାପକ ପ୍ରଭାବ ଦେଖିବାକୁ ମିଳିଛି।

ବିଫଳ ହେଲା ଅନ୍‌ଲାଇନ୍ ଶିକ୍ଷା

ପିଲାମାନଙ୍କ ଶିକ୍ଷାକୁ ଜାରି ରଖିବା ପାଇଁ କିଛି ଦେଶ ଅନ୍‌ଲାଇନ୍ ଶିକ୍ଷା ବ୍ୟବସ୍ଥା ଆରମ୍ଭ କରିବାକୁ ପ୍ରୟାସ କରିଥିଲେ। କିନ୍ତୁ ଏହି ପ୍ରୟାସ ମଧ୍ୟ ସମ୍ପୂର୍ଣ୍ଣ ରୂପେ ବିଫଳ ହୋଇଛି। ଯୁଦ୍ଧଗ୍ରସ୍ତ ଅଞ୍ଚଳରେ ଇଣ୍ଟରନେଟ୍ ସେବା ବାରମ୍ବାର କାଟ୍ ହେବା ସହ ବିଜୁଳିର ଘୋର ଅଭାବ ଏବଂ ଆବଶ୍ୟକୀୟ ଉପକରଣର ଅନୁପସ୍ଥିତି କାରଣରୁ ପିଲାମାନେ ମାସ ମାସ ଧରି ବହିଠାରୁ ଦୂରରେ ଅଛନ୍ତି। ସେଭ୍ ଦି ଚିଲ୍ଡ୍ରେନ୍ ର ଏହି ରିପୋର୍ଟ ବିଶ୍ୱ ନେତୃବୃନ୍ଦଙ୍କ ପାଇଁ ଏକ ବଡ଼ ଚେତାବନୀ, କାରଣ ଯଦି ଶୀଘ୍ର ଏହାର ସମାଧାନ କରା ନଯାଏ, ତେବେ ଏକ ସମ୍ପୂର୍ଣ୍ଣ ପିଢ଼ିର ଭବିଷ୍ୟତ ନଷ୍ଟ ହୋଇଯିବ।