ପିପିଲି: ଭିଜିଲାନ୍ସ ଜାଲରେ ଦୁଇ ରାଜସ୍ୱ ଅଧିକାରୀ । ଓଡ଼ିଶା ଭିଜିଲାନ୍ସ ବିଭାଗ ପୁରୀ ଜିଲ୍ଲାର ଦୁଇ ଜଣ ରାଜସ୍ୱ ଅଧିକାରୀଙ୍କୁ ୩୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଧରିଛି । ଏକ ଜମି କିସମ ପରିବର୍ତ୍ତନ ଆବେଦନର ପ୍ରକ୍ରିୟାକରଣ ପାଇଁ ସେମାନେ ଅଭିଯୋଗକାରୀଙ୍କ ଠାରୁ ଏହି ଅର୍ଥ ଦାବି କରିଥିଲେ। ଅଭିଯୁକ୍ତ ଦ୍ୱୟ ହେଲେ ପିପିଲି ତହସିଲ ଅନ୍ତର୍ଗତ ସିଉଳା ଆରଆଇ ସର୍କଲର ରାଜସ୍ୱ ନିରୀକ୍ଷକ (RI) କଲ୍ୟାଣୀ ଜେନା ଏବଂ ଅତିରିକ୍ତ ରାଜସ୍ୱ ନିରୀକ୍ଷକ (ARI) ପୂର୍ଣ୍ଣଚନ୍ଦ୍ର ବେହେରା।

ସରକାରୀ ସୂତ୍ର ଅନୁଯାୟୀ, ଅଭିଯୋଗକାରୀ ନିଜର କୃଷି ଜମିକୁ ଘରବାରି ଜମିରେ ପରିବର୍ତ୍ତନ କରିବା ପାଇଁ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ନିୟମ ଅନୁଯାୟୀ ଏକ ବିଧିବଦ୍ଧ ଆବେଦନ କରିଥିଲେ। ତେବେ ସେ ଯେତେବେଳେ ନିଜ ଫାଇଲର ସ୍ଥିତି ବୁଝିବା ପାଇଁ ସିଉଳା ଆରଆଇ ଅଫିସକୁ ଯାଇଥିଲେ, ସେତେବେଳେ ଆରଆଇ କଲ୍ୟାଣୀ ଜେନା ଏବଂ ଏଆରଆଇ ପୂର୍ଣ୍ଣଚନ୍ଦ୍ର ବେହେରା ଅନୁସନ୍ଧାନ ରିପୋର୍ଟ ପ୍ରସ୍ତୁତ କରି ଉପରିସ୍ଥ ଅଧିକାରୀଙ୍କ ନିକଟକୁ ପଠାଇବା ପାଇଁ ୩୫,୦୦୦ ଟଙ୍କା ଲାଞ୍ଚ ମାଗିଥିଲେ। ଅଭିଯୋଗକାରୀ ସମସ୍ତ ସରକାରୀ ନିୟମ ପୂରଣ କରିଥିବା କହି ବାରମ୍ବାର ଅନୁରୋଧ କରିଥିଲେ ମଧ୍ୟ ସେମାନେ ଟଙ୍କା ବିନା କାମ କରିବାକୁ ମନା କରିଦେଇଥିଲେ।

ଏହି ମାନସିକ ନିର୍ଯାତନାର ଶିକାର ହୋଇ ଅଭିଯୋଗକାରୀ ବାଧ୍ୟ ହୋଇ ଭିଜିଲାନ୍ସ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ। ଏହାପରେ ଭିଜିଲାନ୍ସ ଟିମ୍ ପକ୍ଷରୁ ଏକ ଟ୍ରାପ୍ ପ୍ରସ୍ତୁତ କରାଯାଇଥିଲା। ଆଜି ଅଭିଯୋଗକାରୀଙ୍କ ଠାରୁ ୩୫,୦୦୦ ଟଙ୍କା ଲାଞ୍ଚ ଗ୍ରହଣ କରୁଥିବା ବେଳେ ହିଁ ଭିଜିଲାନ୍ସ ଅଧିକାରୀମାନେ ଉଭୟଙ୍କୁ ମାଡ଼ି ବସିଥିଲେ। ସେମାନଙ୍କ ଠାରୁ ସମସ୍ତ ଟଙ୍କା ଘଟଣାସ୍ଥଳରୁ ଜବତ କରାଯାଇଛି। ଗିରଫ ପରେ ଓଡ଼ିଶା ଭିଜିଲାନ୍ସ ଏହି ତଦନ୍ତକୁ ଆହୁରି ବ୍ୟାପକ କରି ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଅଭିଯୁକ୍ତଙ୍କ ସହ ଜଡିତ ତିନୋଟି ସ୍ଥାନରେ ସମାନ୍ତରାଳ ଚଢ଼ାଉ କରିଛି।

କେନ୍ଦୁଝର: ଭିଜିଲାନ୍ସ ଜାଲରେ କେନ୍ଦୁଝର ଜିଲ୍ଲା ଶ୍ରମ ଅଧିକାରୀ (DLO) ଆକାଶ ବିଷୋୟୀ । ଲାଞ୍ଚ ମାମଲାରେ ଭିଜିଲାନ୍ସ ବିଭାଗ ପକ୍ଷରୁ କରାଯାଇଥିବା ଚଢ଼ାଉ ବେଳେ ତାଙ୍କ ଘରୁ ୭ ଲକ୍ଷ ୨୯ ହଜାର ୨୦୦ ଟଙ୍କା ନଗଦ ଏବଂ ପ୍ରାୟ ୩୦୦ ଗ୍ରାମ ସୁନା ଅଳଙ୍କାର ଜବତ କରାଯାଇଛି। ଗତକାଲି ୨୦ ହଜାର ଟଙ୍କା ଲାଞ୍ଚ ନେବାବେଳେ ରଙ୍ଗେହାତ ଧରାପଡ଼ିଥିଲେ ଆକାଶ । 

ସୂଚନା ଅନୁଯାୟୀ, ଗତ ରବିବାର ସନ୍ଧ୍ୟାରେ ଜଣେ ଇଲେକ୍ଟ୍ରିକାଲ୍ ଠିକାଦାରଙ୍କଠାରୁ ୨୦,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଓଏଲ୍ଏସ୍-୧ (OLS-I) ଅଧିକାରୀ ଆକାଶ ବିଷୋୟୀଙ୍କୁ ଭିଜିଲାନ୍ସ ଟିମ୍ ହାତେହାତେ ଧରିଥିଲା। ଉକ୍ତ ଠିକାଦାର ଜଣକ ଟିପିଏନଓଡିଏଲ୍ (TPNODL) ପାଇଁ ବିଦ୍ୟୁତ୍ ସ୍ଥାପନ କାର୍ଯ୍ୟ କରୁଥିଲେ ଏବଂ ନିଜ ସଂସ୍ଥା ସପକ୍ଷରେ ଶ୍ରମ ଲାଇସେନ୍ସ (labour licence) ପାଇବାକୁ ଆବେଦନ କରିଥିଲେ। ଓଡ଼ିଶା ସରକାରଙ୍କ ଶ୍ରମ ଏବଂ ଇଏସ୍ଆଇ ବିଭାଗର ନିୟମ ଅନୁଯାୟୀ ସେ ଗତ ୧୪ ଅଗଷ୍ଟ ୨୦୨୬ ରେ ଏହି ଲାଇସେନ୍ସ ପାଇଁ ଅନ୍‌ଲାଇନ୍‌ରେ ଆବେଦନ କରିଥିଲେ। ତେବେ ଅଗଷ୍ଟ ୧୬ ତାରିଖରେ ଯେତେବେଳେ ଠିକାଦାର ଜଣକ ଲାଇସେନ୍ସ ସମ୍ପର୍କରେ ପଚାରିଥିଲେ, ସେତେବେଳେ ଶ୍ରମ ଅଧିକାରୀ କାମ କରାଇଦେବା ବଦଳରେ ୨୦,୦୦୦ ଟଙ୍କା ଦାବି କରିଥିଲେ। ଏହା ପରେ ଠିକାଦାର ଜଣକ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ।

ଲାଞ୍ଚ ନେବା ବେଳେ ଧରାପଡ଼ିବା ପରେ ଆୟ ବହିର୍ଭୂତ ସମ୍ପତ୍ତି (DA) ଠୁଳ କରିବା ସନ୍ଦେହରେ ଭିଜିଲାନ୍ସ ପକ୍ଷରୁ ଆକାଶ ବିଷୋୟୀଙ୍କ ଦୁଇଟି ଠିକଣାରେ ଏକକାଳୀନ ଚଢ଼ାଉ କରାଯାଇଥିଲା। ଏହି ଯାଞ୍ଚ ସମୟରେ କେନ୍ଦୁଝରସ୍ଥିତ ତାଙ୍କ ସରକାରୀ ବାସଭବନରୁ ସମୁଦାୟ ୭.୨୯ ଲକ୍ଷ ଟଙ୍କା ନଗଦ ଏବଂ ବହୁ ମୂଲ୍ୟବାନ ସୁନା ଅଳଙ୍କାର ଉଦ୍ଧାର କରାଯାଇ ଜବତ କରାଯାଇଛି। ଏହି ଘଟଣାକୁ ନେଇ ଭିଜିଲାନ୍ସର ଅଧିକ ତଦନ୍ତ ଜାରି ରହିଛି। 

କେନ୍ଦୁଝର: ଭିଜିଲାନ୍ସ ଜାଲରେ ପାଟଣା ତହସିଲର କନିଷ୍ଠ ରାଜସ୍ୱ ସହାୟକ । ଜମି ପଟ୍ଟା (ଆର୍‌ଓଆର୍) କରାଇଦେବା ପାଇଁ ୬,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଓଡ଼ିଶା ଭିଜିଲାନ୍ସ ହାତରେ ଧରାପଡିଛନ୍ତି କେନ୍ଦୁଝର ଜିଲ୍ଲା ପାଟଣା ତହସିଲର ଜଣେ କନିଷ୍ଠ ରାଜସ୍ୱ ସହାୟକ (JRA)। ଅଭିଯୁକ୍ତଙ୍କ ନାମ ବି.ଏଚ୍ ଉମାଶଙ୍କର ବୋଲି ଜଣାପଡିଛି। ସେ ଏକ ମ୍ୟୁଟେସନ ମାମଲାରେ ଫାଇଲ୍ ଘୁଞ୍ଚାଇବା ପାଇଁ ଜଣେ ଆବେଦନକାରୀଙ୍କ ଠାରୁ ୬,୦୦୦ ଟଙ୍କା ଲାଞ୍ଚ ନେଉଥିବା ସମୟରେ ରେଡ୍‌ହ୍ୟାଣ୍ଡେଡ୍ ଧରାପଡିଛନ୍ତି।

ସୂଚନା ଅନୁଯାୟୀ, ଅଭିଯୋଗକାରୀ ଜଣକ ନିଜ ଜମିର ମ୍ୟୁଟେସନ ପାଇଁ ସରକାରୀ ନିୟମ ଅନୁଯାୟୀ ଗତ ଜୁନ୍ ୩, ୨୦୨୬ ତାରିଖରେ ଅନଲାଇନ୍ ଯୋଗେ ଆବେଦନ କରିଥିଲେ। ତେବେ ସେ ନିଜ ଆବେଦନର ସ୍ଥିତି ସମ୍ପର୍କରେ ବୁଝିବାକୁ ଯାଇଥିବା ବେଳେ କନିଷ୍ଠ ରାଜସ୍ୱ ସହାୟକ ବି.ଏଚ୍ ଉମାଶଙ୍କର ତାଙ୍କୁ ଫାଇଲ୍ ପ୍ରୋସେସ୍ କରିବା ଏବଂ ପଟ୍ଟା ପ୍ରଦାନ ପାଇଁ ୬,୦୦୦ ଟଙ୍କା ଦାବି କରିଥିଲେ।

ଅନ୍ୟ କୌଣସି ଉପାୟ ନପାଇ ଆବେଦନକାରୀ ଜଣକ ଭିଜିଲାନ୍ସ ବିଭାଗର ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଭିତ୍ତି କରି ଭିଜିଲାନ୍ସର ଏକ ସ୍ୱତନ୍ତ୍ର ଟିମ୍ ଆଜି ଯୋଜନାବଦ୍ଧ ଭାବେ ଜାଲ ବିଛାଇଥିଲା। ତହସିଲ ଅଫିସର ଗ୍ୟାରେଜରେ ଲାଞ୍ଚ ନେଉଥିବା ସମୟରେ ଟିମ୍ ଅତର୍କିତ ଚଢ଼ାଉ କରି ଉମାଶଙ୍କରଙ୍କୁ ଗିରଫ କରିଥିଲା। ତାଙ୍କ ନିକଟରୁ ସମସ୍ତ ୬,୦୦୦ ଟଙ୍କା ଜବତ କରାଯାଇଛି। ଏହି ଘଟଣା ପରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଉମାଶଙ୍କରଙ୍କ ସହ ଜଡିତ ଦୁଇଟି ସ୍ଥାନରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢ଼ାଉ ଜାରି ରହିଛି। 

କୋରାପୁଟ: ଭିଜିଲାନ୍ସ ଜାଲରେ ଜୟପୁର ଖଣି ଉପନିର୍ଦ୍ଦେଶକ ସତ୍ୟଜିତ୍ ରାଉତ। ବାଲି ବ୍ୟବସାୟୀଙ୍କଠାରୁ ୨ ଲକ୍ଷ ଟଙ୍କା ଲାଞ୍ଚ ନେବା ବେଳେ ମାଡି ବସିଲା ଭିଜିଲାନ୍ସ ବିଭାଗ । ଏକ ଖଣି ଲିଜ୍ ଅବଧି ବୃଦ୍ଧି ଏବଂ ଆଗାମୀ ବାଲି ଉତ୍ସଗୁଡ଼ିକର ସ୍ପଟ୍ ନିଲାମରେ ଅନୁଚିତ ସୁବିଧା ପ୍ରଦାନ କରିବା ଉଦ୍ଦେଶ୍ୟରେ ଲିଜ୍‌ଧାରୀଙ୍କଠାରୁ ସତ୍ୟଜିତ୍ ରାଉତ ଏହି ଲାଞ୍ଚ ଦାବି କରିଥିଲେ। ତାଙ୍କ ନିକଟରୁ ସମସ୍ତ ୨ ଲକ୍ଷ ଟଙ୍କାର ଲାଞ୍ଚ ରାଶି ଘଟଣାସ୍ଥଳରୁ ଜବତ କରାଯାଇଛି।

ଚଢ଼ାଉ ପରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଟିମ୍ ସତ୍ୟଜିତ୍ ଙ୍କ ୩ଟି ବାସଭବନରେ ଏକକାଳୀନ ଚଢ଼ାଉ କରିଛି । ଜୟପୁରର ଲିଙ୍ଗରାଜ ନଗର, କଟକର ବିଦ୍ୟାଧରପୁର ଏବଂ ମାହାଙ୍ଗାର ଓଳକଣା ସ୍ଥିତ ବାସଭବନରେ ଏହି ଯାଞ୍ଚ କରାଯାଇଛି। ଯାଞ୍ଚ ସମୟରେ ତାଙ୍କ ଜୟପୁର ବାସଭବନରୁ ଅଧିକ ୨.୯୦ ଲକ୍ଷ ଟଙ୍କାର ହିସାବବିହୀନ ନଗଦ ଅର୍ଥ ଉଦ୍ଧାର ହୋଇଥିଲା। ବର୍ତ୍ତମାନ ସୁଦ୍ଧା ମୋଟ ଜବତ ନଗଦ ଟଙ୍କାର ପରିମାଣ ୪.୯୦ ଲକ୍ଷ ଟଙ୍କାରେ ପହଞ୍ଚିଛି। ଏହି ଘଟଣାରେ କୋରାପୁଟ ଭିଜିଲାନ୍ସ ଥାନାରେ ଦୁର୍ନୀତି ନିବାରଣ (ସଂଶୋଧନ) ଅଧିନିୟମ, ୨୦୧୮ର ଧାରା ୭ ଅନୁଯାୟୀ କେସ୍ ନମ୍ବର ୧୪/୨୦୨୬ ରୁଜୁ କରାଯାଇଛି। ବର୍ତ୍ତମାନ ଭିଜିଲାନ୍ସ ବିଭାଗ ପକ୍ଷରୁ ଘଟଣାର ଅଧିକ ତଦନ୍ତ ଜାରି ରହିଛି।

ଭୁବନେଶ୍ୱର: ଦୁର୍ନୀତି ବିରୋଧରେ କମିଶନରେଟ୍ ପୋଲିସର କଡ଼ା କାର୍ଯ୍ୟାନୁଷ୍ଠାନ। ଲାଞ୍ଚ ନେବା ଅଭିଯୋଗରେ ସହକାରୀ ସବ୍-ଇନ୍ସପେକ୍ଟର (ଏଏସଆଇ) ରାଜେଶ କୁଲୁଙ୍କୁ ଚାକିରିରୁ ତୁରନ୍ତ ବହିଷ୍କୃତ କରାଯାଇଛି। ଏଏସଆଇ ରାଜେଶ କୁଲୁ ଜଣେ ଅଭିଯୁକ୍ତଙ୍କଠାରୁ ମୋବାଇଲ୍ ଫୋନ୍ ଫେରାଇଦେବା ପାଇଁ ଲାଞ୍ଚ ମାଗିବା ଏବଂ ଗ୍ରହଣ କରିବା ଅଭିଯୋଗରେ ଭିଜିଲାନ୍ସ ମାମଲାରେ ଛନ୍ଦି ହୋଇଥିଲେ। ଭାରତୀୟ ସମ୍ବିଧାନର ଧାରା ୩୧୧(୨)(ଖ) ବ୍ୟବସ୍ଥା ଅନୁଯାୟୀ ତାଙ୍କ ବିରୋଧରେ ଏହି ଦୃଢ଼ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ଗତକାଲି ମୋବାଇଲ୍ ଫେରାଇବା ପାଇଁ ୨୦ ହଜାର ଟଙ୍କା ନେବା ବେଳେ ମଞ୍ଚେଶ୍ବର ଥାନାରେ ଏଏସଆଇ ରାଜେଶ କୁଲୁଙ୍କୁ ଧରିଥିଲା ଭିଜିଲାନ୍ସ ଟିମ । ଏହି ଲାଞ୍ଚ କାରବାରରେ ସମ୍ପୃକ୍ତ ଥିବା ଅନ୍ୟ ଦୁଇଜଣ ହୋମଗାର୍ଡଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ହୋମଗାର୍ଡ ଜ୍ୟୋତିରଞ୍ଜନ ବେହେରା ଏବଂ ଅବ୍ଦୁଲ ସରଫରାଜ ଖାନଙ୍କୁ ହୋମଗାର୍ଡ ସଙ୍ଗଠନରୁ ବିଦା କରିବା ପାଇଁ ଏକ ମାସର ନୋଟିସ୍ ଜାରି କରାଯାଇଛି।

ଦୁର୍ନୀତି ଏବଂ ଅନିୟମିତତା ପ୍ରତି କମିଶନରେଟ୍ ପୋଲିସ ନିଜର ଜିରୋ ଟୋଲରାନ୍ସ (ଶୂନ୍ୟ ସହନଶୀଳତା) ନୀତିକୁ ଦୋହରାଇଛି। କୌଣସି ପୋଲିସ ଅଧିକାରୀ କିମ୍ବା କର୍ମଚାରୀ ଏଭଳି ବେଆଇନ କାର୍ଯ୍ୟରେ ଲିପ୍ତ ଥିବା ପ୍ରମାଣିତ ହେଲେ, ଆଇନ ଏବଂ ସେବା ନିୟମ ଅନୁଯାୟୀ କଠୋର ଏବଂ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ପ୍ରଶାସନ ପକ୍ଷରୁ ସ୍ପଷ୍ଟ ବାର୍ତ୍ତା ଦିଆଯାଇଛି।

ଅନୁଗୋଳ: ଭିଜିଲାନ୍ସ ଜାଲରେ ଜରପଡ଼ା ଥାନା ASI । ୮୦୦୦ ଟଙ୍କା ଲାଞ୍ଚ ନେବା ବେଳେ ଏଏସଆଇ ସୀତା ନାୟକଙ୍କୁ ଧରିଲା ଭିଜିଲାନ୍ସ । ଏକ ମାମଲାର ରଫାଦଫା ପାଇଁ ୮୦୦୦ ଟଙ୍କା ଲାଞ୍ଚ ନେଉଥିବାବେଳେ ଅନୁଗୋଳ ଜିଲ୍ଲା ଜରପଡ଼ା ଥାନାର ଆସିଷ୍ଟାଣ୍ଟ ସବ୍-ଇନ୍ସପେକ୍ଟର (ଏଏସଆଇ) ସୀତା ନାୟକଙ୍କୁ ରଙ୍ଗେହାତରେ ଧରିଛି ଭିଜିଲାନ୍ସ । 

ସୂଚନା ଅନୁସାରେ, ଏଏସଆଇ ସୀତା ନାୟକ ଜରପଡ଼ା ଥାନାରେ ପଞ୍ଜିକୃତ ହୋଇଥିବା ଏକ ମାମଲାର ତଦନ୍ତକାରୀ ଅଧିକାରୀ ଥିଲେ। ଅଭିଯୋଗକାରୀ ଏବଂ ବିପକ୍ଷ ଦଳ ମଧ୍ୟରେ ଆପୋଷ ବୁଝାମଣା କରାଇବା ପାଇଁ ସେ ଅଭିଯୋଗକାରୀଙ୍କୁ ପ୍ରଥମେ ୧୦,୦୦୦ ଟଙ୍କା ଦାବି କରିଥିଲେ। ତେବେ ଅଭିଯୋଗକାରୀ ଏତେ ଟଙ୍କା ଦେବାକୁ ଅସମର୍ଥତା ପ୍ରକାଶ କରିବାରୁ ଏହି ରାଶିକୁ କମାଇ ୮,୦୦୦ ଟଙ୍କା କରାଯାଇଥିଲା।

ଏହି ବେଆଇନ ଦାବି ପୂରଣ କରିବାକୁ ନଚାହିଁ ଅଭିଯୋଗକାରୀ ସିଧାସଳଖ ଓଡ଼ିଶା ଭିଜିଲାନ୍ସ କର୍ତ୍ତୃପକ୍ଷଙ୍କ ଦ୍ୱାରସ୍ଥ ହୋଇ ଏକ ଲିଖିତ ଅଭିଯୋଗ କରିଥିଲେ। ଅଭିଯୋଗର ସତ୍ୟତା ଯାଞ୍ଚ କରିବା ପରେ ଭିଜିଲାନ୍ସ ଟିମ୍ ଯୋଜନାବଦ୍ଧ ଭାବେ ଏକ ଜାଲ ବିଛାଇଥିଲା। ଅଭିଯୁକ୍ତ ଏଏସଆଇ ନିଜ ଥାନା ପରିସରରେ ଅଭିଯୋଗକାରୀଙ୍କ ଠାରୁ ୮,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀମାନେ ତାଙ୍କୁ କାବୁ କରିଥିଲେ। ତାଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ମଧ୍ୟ ଜବତ କରାଯାଇଛି। ଗିରଫଦାରୀ ପରେ ଅଭିଯୁକ୍ତ ଏଏସଆଇଙ୍କ ସମ୍ଭାବ୍ୟ ଆୟ ବହିର୍ଭୂତ ସମ୍ପତ୍ତିର ତଦନ୍ତ ପାଇଁ ତାଙ୍କ ସହ ଜଡିତ ୨ଟି ସ୍ଥାନରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢ଼ାଉ ଜାରି ରହିଛି। 

ଭୁବନେଶ୍ୱର: ଭିଜିଲାନ୍ସ ପ୍ରତିଦିନ ଚଢ଼ଉ କରି ଲାଞ୍ଚଖୋର ଅଫିସରଙ୍କୁ ଗିରଫ କରୁଛି। ବିଶେଷ କରି ରାଜଧାନୀରେ ଅନ୍ୟ ସରକାରୀ କର୍ମଚାରୀ ଅପେକ୍ଷା ପୁଲିସ କର୍ମଚାରୀଙ୍କ ଗୁରୁତ୍ୱ ଅଧିକ ରହିଛି। ସେମାନେ ସିଧସଳଖ ଲୋକଙ୍କ ସହ ଭେଟି ନ୍ୟାୟ ଦେଉଛନ୍ତି। କିନ୍ତୁ କିଛି ଲାଞ୍ଚଖୋର ପୁଲିସ କର୍ମଚାରୀଙ୍କ ପାଇଁ ବଦନାମ ହେଉଛି ପୁରା ବିଭାଗ। ସେମାନେ ଲୋକଙ୍କୁ ନ୍ୟାୟ ଦେବା ବଦଳରେ ଶୋଷଣା କରୁଥିବା ଅଭିଯୋଗ ହୋଇଛି। ପରିଣତି ସ୍ୱରୂପ ଲାଞ୍ଚ ଓ ଆୟ ବହିର୍ଭୂତ ସମ୍ପତ୍ତି ଠୁଳ କରିବା ଅଭିଯୋଗରେ ପୁଲିସ ବାବୁ ଏବଂ ବାବୁଆଣୀ ଭିଜିଲାନ୍ସ ହାତରେ ଧରାପଡୁଛନ୍ତି। ବିଗତ ଦିନରେ ତଥ୍ୟରୁ ଦେଖିବାକୁ ମିଳିଛି ଯେ, ସହର ଅପେକ୍ଷା ଉପକଣ୍ଠରେ ଅଧିକ ଲାଞ୍ଚ କାରବାର ହେଉଛି। କାରଣ ୮ ବର୍ଷ ମଧ୍ୟରେ ଲାଞ୍ଚ କାରବାର କରି ୬୫ ଜଣ ପୁଲିସ କର୍ମଚାରୀ ଧରାପଡ଼ିଛନ୍ତି। ସେଥିରୁ ଉପକଣ୍ଠରୁ ୪୮ ଜଣ ପୁଲିସ କର୍ମଚାରୀ ଧରାପଡ଼ିଛନ୍ତି।

ଉପକଣ୍ଠରେ ଲାଞ୍ଚ ନେବା ସହଜ ହେଉଥିବାରୁ ପୁଲିସ କର୍ମଚାରୀମାନେ ନେଉଛନ୍ତି। ପୂର୍ବରୁ ତମାଣ୍ଡୋ ଥାନାର କୋଟିପତି ଏସ୍‌‌ଆଇ ଅଭିମନ୍ୟୁ ଚୌଧୁରୀ ଭିଜିଲାନ୍ସ ହାତରେ ଧରାପଡ଼ିଥିଲେ। ତାଙ୍କ ନିକଟରୁ ୩ କୋଟିର ସମ୍ପତ୍ତି ଠାବ କରାଯାଇଥିଲା। ସେହିପରି ବାଲିପାଟଣା ଥାନା ଏଏସ୍‌‌ଆଇ ପୁଷ୍ପଲତା ପାଇକରାୟଙ୍କୁ ଲାଞ୍ଚ ମାମଲାରେ ଗିରଫ କରିଥିଲା ଭିଜିଲାନ୍ସ। ଅଭିଯୁକ୍ତ ବିରୋଧରେ କଠୋର ଦଫା ଓ ଶୀଘ୍ର ଚାର୍ଜସିଟ୍‌‌ ଲାଗି ଲାଞ୍ଚ ନେଉଥିଲେ। ଜଟଣୀ ଥାନାର ତତ୍କାଳୀନ ଥାନା ଅଧିକାରୀ ସଞ୍ଜୀବ ମହାନ୍ତି ୫୦ ହଜାର ଟଙ୍କା ଲାଞ୍ଚ ନେବା ସମୟରେ ଭିଜିଲାନ୍ସ ହାତରେ ଧରାପଡ଼ିଥିଲେ। ମାମଲା ରଫାଦଫା ଲାଗି ଜଣେ ବ୍ୟକ୍ତିଙ୍କଠାରୁ ଲାଞ୍ଚ ନେଇ ଗିରଫ ହୋଇଥିଲେ। ୧୦ ହଜାର ଟଙ୍କା ଲାଞ୍ଚ ନେବା ସମୟରେ ଭିଜିଲାନ୍ସ ହାତରେ ଧରାପଡ଼ିଥିଲେ ଧଉଳି ଥାନା ତତ୍କାଳୀନ ଥାନା ଅଧିକାରୀ ଦେବୀ ପ୍ରସାଦ ଦାଶ। ସେ ମାମଲା ପଞ୍ଜୀକରଣ ଲାଗି ଅଭିଯୋଗକାରୀଙ୍କ ଠାରୁ ୧୦ ହଜାର ଲାଞ୍ଚ ନେଇ ଗିରଫ ହୋଇଥିଲେ। ସେହିପରି ଜମିଜମା ମାମଲାର ରଫାଦଫା ପାଇଁ ଦେଢ଼ ହଜାର ଟଙ୍କା ଲାଞ୍ଚ ନେଉଥିବା ବେଳେ ଧଉଳି ଥାନାର ତତ୍କାଳୀନ ଏଏସ୍‌‌ଆଇ ତୋଫାନ ଗୁରୁ ଭିଜିଲାନ୍ସ ହାତରେ ଗିରଫ ହୋଇଥିଲେ। ଜଟଣୀ ଥାନାର ସବ୍‌‌-ଇନ୍ସପେକ୍ଟର ରାକେଶ ସାମନ୍ତରାୟ ୧୦ ହଜାର ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡ଼ିଥିଲେ। ମାମଲାକୁ ରଫାଦଫା କରିବା ଲାଗି ରାକେଶ ନେଉଥିଲେ ଟଙ୍କା। ସେହିପରି ବାଲିପାଟଣା ଥାନାର କନଷ୍ଟେବଳ ସୁରେଶଚନ୍ଦ୍ର ଦାସ ୮ ହଜାର ଲାଞ୍ଚ ନେଇ ଗିରଫ ହୋଇଥିଲେ। ସେହିପରି ନନ୍ଦନକାନନ ସବ୍‌‌ଇନ୍ସପେକ୍ଟର ଅମିନ୍‌‌ ଖାନ୍‌‌ ଲାଞ୍ଚ ନେଇ ଭିଜିଲାନ୍ସ ହାତରେ ଗିରଫ ହୋଇଥିଲେ।

ବଡ଼ ବାବୁଙ୍କ ଭୟ ନାହିଁ
ରାଜଧାନୀ ଛାତି ଉପରେ ଥିବା ଥାନା କର୍ମଚାରୀ କୌଣସି ବ୍ୟକ୍ତିଠାରୁ ଟଙ୍କା ଉଠାଇବାକୁ ଭୟ କରିବେ। କାରଣ ଥାନା ଅଧିକାରୀ, ଏସିପି ଏବଂ ଡିସିପି ଯେକୌଣସି ଅଧିକାରୀ ଥାନାକୁ ଆସିପାରନ୍ତି। ଯଦି ଟଙ୍କା ଦେଇଥିବା ବ୍ୟକ୍ତି ଉପରିସ୍ଥ ଅଧିକାରୀଙ୍କୁ ଏନେଇ ଜଣାଇ ଦେବେ, ତେବେ ଲାଞ୍ଚ ନେଇଥିବା କର୍ମଚାରୀଙ୍କ ଅବସ୍ଥା ସଂଗୀନ ହୋଇଯିବ। ତେଣୁ ସହର ଛାତି ଉପରେ ଥିବା ଥାନାର କର୍ମଚାରୀ ଟଙ୍କା ନେବାକୁ ଭୟ କରନ୍ତି। କିନ୍ତୁ ଉପକଣ୍ଠ ଥାନାକୁ ବଡ଼ ବାବୁଙ୍କ ଯିବା ଆସିବା ଖୁବ୍‌‌ କମ୍‌‌ ଥାଏ। ତେଣୁ ସେଠାରେ ଥାନାରେ ଥିବା କର୍ମଚାରୀ ବିନା ଭୟରେ ଲାଞ୍ଚ ନେଇଥାନ୍ତି।

ଲୋକଙ୍କ ସଚେତନତା ଅଭାବରୁ ଫାଇଦା ନେଉଛନ୍ତି
ଯଦି କୌଣସି ପୁଲିସ କର୍ମଚାରୀ ଲାଞ୍ଚ ମାଗନ୍ତି ତେବେ ଭିଜିଲାନ୍ସରେ ଅଭିଯୋଗ କରିବାକୁ କୁହାଯାଇଛି। ଭିଜିଲାନ୍ସ ଦେଇଥିବା ଟୋଲ ଫ୍ରି ନମ୍ବରକୁ କଲ୍‌‌ କରି ମଧ୍ୟ ଅଭିଯୋଗ ଜଣାଇପାରିବେ ବୋଲି ସଚେତନ କରାଯାଇଛି। ତଥାପି ଉପକଣ୍ଠରେ ଥିବା ଗ୍ରାମାଞ୍ଚଳ ଲୋକେ ସଚେତନ ନୁହଁନ୍ତି। ତେଣୁ ସେମାନେ କୌଣସି କାମରେ ଥାନାକୁ ଗଲେ ସେମାନଙ୍କୁ ଥାନାର କର୍ମଚାରୀ ଲାଞ୍ଚ ମାଗନ୍ତି। ଯଦି ସେମାନେ ଭିଜିଲାନ୍ସରେ ଅଭିଯୋଗ କରନ୍ତି ତେବେ ଏହି ଲାଞ୍ଚୁଆ ଅଫିସର ଧରାପଡ଼ିଥାନ୍ତେ।

ପୁଲିସ କିଣୁଥିବା ଦାମୀ ସାମଗ୍ରୀ ଧରାଇଦେବ
ନିୟମିତ ଭାବେ ପୁଲିସ କର୍ମଚାରୀ ଲାଞ୍ଚ ନେଇ ଗିରଫ ହେଉଥିବାରୁ ଭିଜିଲାନ୍ସ ଏବେ ପୁଲିସ କର୍ମଚାରୀଙ୍କ ଉପରେ ନଜର ରଖିଛି। ଯଦି କୌଣସି ପୁଲିସ କର୍ମଚାରୀ ଲକ୍ଷାଧିକ ଟଙ୍କାର ସୁନା କିଣୁଛି ତାହା ଉପରେ ନଜର ରଖାଯାଇଛି। ଭିଜିଲାନ୍ସ ଅଧିକାରୀଙ୍କ ଗୁଇନ୍ଦା ଖବରୀ ସୁନା ଦୋକାନ ଆଗରେ ବୁଲୁଛନ୍ତି। ଏଥିସହ ପ୍ରତି ସୁନା ଦୋକାନୀଙ୍କ ଠାରୁ ଭିଜିଲାନ୍ସ ମାସ ଶେଷରେ ତଥ୍ୟ ସଂଗ୍ରହ କରୁଛି। ଯଦି ପୁଲିସ କର୍ମଚାରୀ ନିୟମିତ ସୁନା କିଣୁଥିବେ ତେବେ ତାଙ୍କୁ ଧରିବା ପାଇଁ ଭିଜିଲାନ୍ସ ବ୍ଲ୍ୟୁ-ପ୍ରିଣ୍ଟ ପ୍ରସ୍ତୁତ କରିବ। ସେହିପରି ଦାମୀ ଗାଡ଼ି, ସୋରୁମ, ଇଲୋଟ୍ରୋନିକ୍ସ ସାମଗ୍ରୀ, ବ୍ୟାଙ୍କ୍‌‌ ଟ୍ରାଞ୍ଜାକ୍‌‌ସନ ଏବଂ ସବ୍‌‌ ରେଜିଷ୍ଟ୍ରି ଅଫିସ୍‌‌ରେ ମଧ୍ୟ ଖବରୀ ରଖାଯାଇଛି। ସେଠାରେ ପୁଲିସ କର୍ମଚାରୀ କିଣୁଥିଲେ ଭିଜିଲାନ୍ସ ଜାଣିପାରିବ।

ପଡ଼ୋଶୀଙ୍କୁ ଦେଖି ପ୍ରତିଯୋଗିତା
ପଡ଼ୋଶୀଙ୍କୁ ଦେଖି ପୁଲିସ କର୍ମଚାରୀମାନେ ସମ୍ପତ୍ତି ଠୁଳରେ ପ୍ରତିଯୋଗିତା କରୁଛନ୍ତି। ପଡ଼ୋଶୀରେ ରହୁଥିବା ଜଣେ ପୁଲିସ କର୍ମଚାରୀ ଯଦି ଜମି କିଣୁଛି, ତେବେ ତାର ପାଖ ଘର ପୁଲିସ କର୍ମଚାରୀ ମଧ୍ୟ ଜମି କିଣୁଛି। ତେଣୁ ସୁନାଗହଣା କିଣିବା ପାଇଁ ପୁଲିସ କର୍ମଚାରୀ ଲାଞ୍ଚ ନେଉଛନ୍ତି। ବିଶେଷ କରି ପୁରୁଷ ପୁଲିସକୁ ଲାଞ୍ଚ ନେବାକୁ ସେମାନଙ୍କ ପତ୍ନୀ ପରୋକ୍ଷରେ ସମର୍ଥନ କରୁଛନ୍ତି।

ବଲାଙ୍ଗିର : ବଲାଙ୍ଗିର ଜିଲ୍ଲା ପାଟଣାଗଡ଼ ଉପଖଣ୍ଡର ଡାକ୍ତରଖାନାର ଅଧିକାରୀ ବାଚସ୍ପତି ଦାସଙ୍କୁ ତାଙ୍କ ପଦବୀରୁ ବହିଷ୍କାର କରାଯାଇଥିବା ଜଣାପଡ଼ିଛି । ରାଜ୍ୟ ସରକାରଙ୍କ ପରିବାର ଓ ସ୍ବାସ୍ଥ୍ୟ କଲ୍ୟାଣ ବିଭାଗଙ୍କ ନିର୍ଦ୍ଦେଶକ୍ରମେ ବଲାଙ୍ଗିର ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ ଚିଠି ନଂ୨୮୦୯ ଅନୁସାରେ ତାଙ୍କୁ କାର୍ଯ୍ୟରୁ ଅବ୍ୟାହତି ଦିଆଯାଇଛି। ସୂଚନାଯୋଗ୍ୟ, ପାଟଣାଗଡ଼ ଡାକ୍ତରଖାନାରେ ରୋଗୀ ପରିଜନଙ୍କ ଠାରୁ ଲାଞ୍ଚ ନେଉଥିବାର ଏକ ଭିଡିଓ ଭାଇରାଲ ହୋଇଥିଲା ।

ଏହାପରେ ବାଚସ୍ପତି ଦାସଙ୍କୁ ବଲାଙ୍ଗିର ଭୀମଭୋଇ ମେଡିକାଲକୁ ବଦଳି କରାଯାଇଥିଲା। ତେବେ ଏହି ଘଟଣାକୁ ଚପାଇବା ପାଇଁ ଶ୍ରୀଯୁକ୍ତ ଦାସ ମୁଖ୍ୟ ଅଭିଯୁକ୍ତକାରୀଙ୍କୁ ଟଙ୍କା ଦେଉଥିବା ଘଟଣା ପୁଣି ସାମ୍ନାକୁ ଆସିବା ପରେ ବିଭିନ୍ନ ସଂଗଠନ ପକ୍ଷରୁ ଅଭିଯୋଗ କରାଯାଇଥିଲା ଯାହାକୁ ଆଧାର କରି ଡା ଦାସଙ୍କୁ ବହିଷ୍କାର କରାଯାଇଛି।