ଦେଶର ରଣନୈତିକ ଇନ୍ଧନ ଭଣ୍ଡାର ବା ଷ୍ଟ୍ରାଟେଜିକ୍ ଫୁଏଲ୍ ରିଜର୍ଭ ପ୍ରସ୍ତୁତ କରିବା ପାଇଁ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି। ଏଥିପାଇଁ ରୋଷେଇ ଗ୍ୟାସ୍ (LPG) ଏବଂ ପ୍ରାକୃତିକ ଗ୍ୟାସ ଉପଯୋଗ କରୁଥିବା ଗ୍ରାହକଙ୍କ ଉପରେ ଟିକସ ବା ଶୁଳ୍କ ଲଗାଇବାକୁ ସରକାର ବିଚାର କରୁଛନ୍ତି। ରିପୋର୍ଟ ଅନୁଯାୟୀ, ଆନ୍ତର୍ଜାତୀୟ ସ୍ତରରେ ଯୋଗାଣ ବାଧାପ୍ରାପ୍ତ ହେଲେ ଦେଶକୁ ଊର୍ଜା ସଙ୍କଟରୁ ରକ୍ଷା କରିବା ପାଇଁ ୪୨ ବିଲିୟନ ଡଲାର ମୂଲ୍ୟର ଇନ୍ଧନ ଭଣ୍ଡାର ପ୍ରତିଷ୍ଠା କରିବାକୁ ଲକ୍ଷ୍ୟ ରଖାଯାଇଛି।

ସିଲିଣ୍ଡର ପିଛା ବଢ଼ିବ ୧୮ ଟଙ୍କା

ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟର ପ୍ରସ୍ତାବ ଅନୁଯାୟୀ, ଏଲପିଜି ଉପରେ କିଲୋଗ୍ରାମ ପିଛା ୧.୨୯ ଟଙ୍କା ଶୁଳ୍କ ଲଗାଯାଇପାରେ। ଯଦି ଏହି ନିଷ୍ପତ୍ତି ଲାଗୁ ହୁଏ, ତେବେ ଘରୋଇ ରୋଷେଇ ଗ୍ୟାସ୍ ସିଲିଣ୍ଡର ମୂଲ୍ୟ ପ୍ରାୟ ୧୮ ଟଙ୍କା ବୃଦ୍ଧି ପାଇବ। ସେହିପରି ପ୍ରାକୃତିକ ଗ୍ୟାସ ଉପରେ ଷ୍ଟାଣ୍ଡାର୍ଡ କ୍ୟୁବିକ୍ ମିଟର ପିଛା ୧.୪୩ ଟଙ୍କା ଶୁଳ୍କ ଆଦାୟ ପାଇଁ ବିଚାର କରାଯାଉଛି। ଏହା ଫଳରେ ଘରୋଇ ଗ୍ୟାସ ବିଲ୍ ପ୍ରାୟ ୨ ପ୍ରତିଶତ ବୃଦ୍ଧି ପାଇବାର ଆଶଙ୍କା ରହିଛି।

ବାର୍ଷିକ ଆଦାୟ ହେବ ୧.୫ ବିଲିୟନ ଡଲାର

ସରକାରଙ୍କ ଏହି ଯୋଜନା ମାଧ୍ୟମରେ ଗ୍ରାହକଙ୍କଠାରୁ ବାର୍ଷିକ ପ୍ରାୟ ୧.୫ ବିଲିୟନ ଡଲାର ଆଦାୟ ହେବାର ଲକ୍ଷ୍ୟ ରହିଛି। ଏହି ଅର୍ଥକୁ ମୁଖ୍ୟତଃ ଏଲପିଜି (LPG) ଏବଂ ଏଲଏନଜି (LNG) ଷ୍ଟୋରେଜ୍ ଭିତ୍ତିଭୂମି ବିକାଶରେ ବିନିଯୋଗ କରାଯିବ। ବର୍ତ୍ତମାନର ଖର୍ଚ୍ଚ ସ୍ତରକୁ ଦେଖିଲେ କେବଳ ଏଲପିଜି ଶୁଳ୍କରୁ ବାର୍ଷିକ ୪୬୦ ନିୟୁତ ଡଲାର ଏବଂ ପ୍ରାକୃତିକ ଗ୍ୟାସରୁ ୧ ବିଲିୟନ ଡଲାର ସଂଗ୍ରହ ହୋଇପାରିବ ବୋଲି ଆକଳନ କରାଯାଇଛି।

ଊର୍ଜା ସୁରକ୍ଷା ପାଇଁ ପଦକ୍ଷେପ

ଇରାନ ବିବାଦ ଏବଂ ଅନ୍ୟାନ୍ୟ ଭୂ-ରାଜନୈତିକ କାରଣରୁ ବିଶ୍ୱବ୍ୟାପୀ ଊର୍ଜା ସଙ୍କଟ ଦେଖାଦେଉଛି। ଏହାକୁ ଦୃଷ୍ଟିରେ ରଖି ଭାରତ କେବଳ ଅଶୋଧିତ ତୈଳ ନୁହେଁ, ବରଂ ନିଜର ଷ୍ଟ୍ରାଟେଜିକ୍ ରିଜର୍ଭରେ ଏଲପିଜି ଏବଂ ଏଲଏନଜିକୁ ମଧ୍ୟ ସାମିଲ କରିବାକୁ ଚାହୁଁଛି। ଆଗାମୀ ୧୦ ବର୍ଷ ମଧ୍ୟରେ ଅତିରିକ୍ତ ୨୮ ନିୟୁତ ଟନ୍ ଅଶୋଧିତ ତୈଳ, ୯ ନିୟୁତ ଟନ୍ ଏଲଏନଜି ଏବଂ ୪ ନିୟୁତ ଟନ୍ ଏଲପିଜି ମହଜୁଦ ରଖିବାର କ୍ଷମତା ସୃଷ୍ଟି କରିବାକୁ ସରକାର ଲକ୍ଷ୍ୟ ରଖିଛନ୍ତି। ଅବଶ୍ୟ ଏହି ପ୍ରସ୍ତାବ ଏବେ ଆନ୍ତଃ-ମନ୍ତ୍ରଣାଳୟ ଆଲୋଚନା ସ୍ତରରେ ରହିଛି ଏବଂ କ୍ୟାବିନେଟ୍ ପକ୍ଷରୁ ଚୂଡ଼ାନ୍ତ ମୋହର ବାଜିବା ବାକି ଅଛି।

ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ବଢୁଥିବା ଉତ୍ତେଜନା ମଧ୍ୟରେ ଭାରତରେ କୌଣସି ଇନ୍ଧନର ଅଭାବ ନାହିଁ ବୋଲି କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂହ ପୁରୀ ଗୁରୁବାର ଦିନ ଆଶ୍ୱାସନା ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ ଦେଶରେ ପର୍ଯ୍ୟାପ୍ତ ପରିମାଣର ଅଶୋଧିତ ତୈଳ ମହଜୁଦ ରହିଛି ଏବଂ ଭାରତର ଊର୍ଜା ସୁରକ୍ଷା ସମ୍ପୂର୍ଣ୍ଣ ଭାବେ ନିରାପଦ ଅଟେ। ସଂସଦରେ ଉଦବୋଧନ ଦେଇ ସେ ଜନସାଧାରଣଙ୍କୁ କୌଣସି ପ୍ରକାର ଗୁଜବର ଶିକାର ନହେବାକୁ ପରାମର୍ଶ ଦେଇଛନ୍ତି।

ପଶ୍ଚିମ ଏସିଆରେ ସୃଷ୍ଟି ହୋଇଥିବା ଅଶାନ୍ତି କାରଣରୁ ଭାରତ ନିଜର ଇନ୍ଧନ ଆମଦାନୀ ପାଇଁ ବିକଳ୍ପ ପଥ ଆପଣାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଫଳ କୂଟନୈତିକ ପ୍ରୟାସ ଯୋଗୁଁ, ହରମୁଜ୍ ପ୍ରଣାଳୀ ଦେଇ ଯେତିକି ପରିମାଣର ଅଶୋଧିତ ତୈଳ ଆସିବା କଥା, ତା'ଠାରୁ ଅଧିକ ତୈଳ ସୁରକ୍ଷିତ ଭାବେ ଅଣାଯାଇପାରିଛି ବୋଲି ମନ୍ତ୍ରୀ କହିଛନ୍ତି। ବର୍ତ୍ତମାନ ଭାରତ ବିଭିନ୍ନ ବିକଳ୍ପ ମାର୍ଗ ଦେଇ ପ୍ରାୟ ୪୦ଟି ଦେଶରୁ ଅଶୋଧିତ ତୈଳ ସଂଗ୍ରହ କରୁଛି।

ଦେଶର ଘରୋଇ ଖାଉଟିମାନଙ୍କ ପାଇଁ ଇନ୍ଧନର କୌଣସି ଅଭାବ ନାହିଁ ବୋଲି ସରକାର ସ୍ପଷ୍ଟ କରିଛନ୍ତି। ବିଶେଷ କରି ସାଧାରଣ ପରିବାର ଗୁଡ଼ିକୁ ନିରବଚ୍ଛିନ୍ନ ଭାବେ ସିଏନଜି (CNG) ଏବଂ ପିଏନଜି (PNG) ଯୋଗାଣ ଜାରି ରହିବ। ହରଦୀପ ସିଂହ ପୁରୀ କହିଛନ୍ତି ଯେ, ଦେଶବାସୀ ଆତଙ୍କିତ ହେବାର କୌଣସି କାରଣ ନାହିଁ, ଘରୋଇ ଉପଭୋକ୍ତାମାନଙ୍କୁ ସୁଲଭ ମୂଲ୍ୟରେ ଊର୍ଜା ଯୋଗାଇଦେବାକୁ ସରକାର ପ୍ରତିବଦ୍ଧ।

ଅନ୍ୟପକ୍ଷରେ, ଇରାନରେ ଥିବା ଭାରତୀୟ ନାଗରିକଙ୍କୁ ସହାୟତା ପ୍ରଦାନ ଏବଂ ସିପିଂ କ୍ଷେତ୍ରର ସୁରକ୍ଷା ପାଇଁ ବୈଦେଶିକ ବ୍ୟାପାର ମନ୍ତ୍ରଣାଳୟ (MEA) ନିରନ୍ତର କାର୍ଯ୍ୟ କରୁଛି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ୱାଲ ସୂଚନା ଦେଇଛନ୍ତି ଯେ, ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ଏବଂ ଇରାନର ବୈଦେଶିକ ମନ୍ତ୍ରୀ ଆବାସ ଆରାଗଚିଙ୍କ ମଧ୍ୟରେ ନିକଟରେ ତିନିଥର ଆଲୋଚନା ହୋଇଛି। ଏହି ଆଲୋଚନାରେ ମୁଖ୍ୟତଃ ଜାହାଜ ଚଳାଚଳର ସୁରକ୍ଷା ଏବଂ ଭାରତର ଊର୍ଜା ସୁରକ୍ଷା ଉପରେ ଗୁରୁତ୍ୱାରୋପ କରାଯାଇଛି।