ଭୁବନେଶ୍ୱର: ଆଜି ପ୍ରଭୁ ଲିଙ୍ଗରାଜଙ୍କ ବାହୁଡ଼ା ଯାତ୍ରା ଅନୁଷ୍ଠିତ ହେବ। ପୁଣି ଶ୍ରଦ୍ଧାଳୁମାନେ ଜୟ ଲିଙ୍ଗରାଜ ଜୟ ଲିଙ୍ଗରାଜ ନାରା ଦେଇ ଅଣଲେଉଟା ରୁକୁଣା ରଥକୁ ଟାଣି ଆଣିବେ। ଗତ ଗୁରୁବାର ଆଶୋକାଷ୍ଟମୀ ଦିନଠାରୁ ରାମେଶ୍ୱର ମନ୍ଦିରକୁ ଯାତ୍ରା କରିଥିଲେ ଲିଙ୍ଗରାଜ ମହାପ୍ରଭୁ, ଦେବୀ ଦୁର୍ଗା ଓ ଦୋଳଗୋବିନ୍ଦ। 

ଆଜି ଏହି ଠାକୁରଙ୍କୁ ରୁକୁଣା ରଥରେ ରାମେଶ୍ୱରରୁ ସ୍ୱର୍ଣ୍ଣାଞ୍ଚଳକୁ ଲେଉଟାଇ ଅଣାଯିବ। ଏହି ରଥର ବିଶେଷତ୍ୱ ହେଉଛି ଏହା ଅଣ ଲେଉଟା। ଅର୍ଥାତ୍‌ ବିନା ମୋଡ଼ରେ ରଥ ଫେରିଥାଏ। ଜଗନ୍ନାଥ ମହାପ୍ରଭୁଙ୍କ ରଥ ଦକ୍ଷିଣୀ ମୋଡ଼ ହେଉଥିବାବେଳେ ରୁକୁଣା ରଥ କୌଣସି ମୋଡ଼ ନେଇ ନ ଥାଏ। ଏଥିପାଇଁ ଏହାକୁ ଅଣଲେଉଟା କୁହାଯାଏ। ବିଧି ଅନୁସାରେ ରଥର ପଛପଟ ଦ୍ୱାର ଖୋଲାଯାଏ। ଏହି ଦ୍ୱାରରେ ସାରଥି ବ୍ରହ୍ମା, ଚାରି ଅଶ୍ୱ ଓ ଇଶଙ୍କୁ ଆଗରୁ ଆଣି ନୂତନ ପଟ ଦ୍ୱାରରେ ଲଗାଯାଏ। ସେହିପରି ସିଂହାସନ ପ୍ରଭାଙ୍କୁ ମଧ୍ୟ ବୁଲାଇ ଦିଆଯାଇଥାଏ। ଏଥିସହିତ ନୂତନ ପଟ ଦ୍ୱାରରେ ଚାରମାଳ ବନ୍ଧାଯାଇଥାଏ। ଯାହାଫଳରେ ଠାକୁରମାନେ ଏହି ନୂତନ ଦ୍ୱାରରେ ପହଣ୍ଡି ହୋଇ ରଥ ଉପରକୁ ଆସିଥାନ୍ତି। 

ଶ୍ରୀଲିଙ୍ଗରାଜଙ୍କ ବାହୁଡ଼ା ଯାତ୍ରା ପାଇଁ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା ହୋଇଛି । ଭୋର ୫ଟାରୁ ସାଢ଼େ ୫ଟା ମଧ୍ୟରେ ବଢିଛି ମଙ୍ଗଳ ଆଳତି ଓ ଅବକାଶ ନୀତି । ରାମେଶ୍ୱରଙ୍କ ଠାରେ ୨ ଘଣ୍ଟାର ଅନ୍ତିମ ସାହାଣମେଲା ଦର୍ଶନ ସକାଳ ୬ଟାରୁ ୮ଟା ପର୍ଯ୍ୟନ୍ତ ଚାଲିଥିଲା । ଭୋଗ ମଣ୍ଡପ ନୀତି ଦିନ ସାଢେ ୧୧ଟାରେ ବଢି ଅଧର ପଣା ଦିନ ଗୋଟାଏ ଏବଂ ପହଣ୍ଡି ଅପରାହ୍ଣ ସାଢେ ୨ଟା ସୁଦ୍ଧା ସାରି ରଥଟଣା ଆରମ୍ଭ ହେବ । ଫେରିବା ବେଳେ ବାଟରେ ଅସୁର କିଆରୀ ଏବଂ ବିଭିନ୍ନ ନିଯୋଗ ତରଫରୁ ମଧ୍ୟ ପଣା ଲାଗି ହେବ ।

ଭୁବନେଶ୍ୱର: ଆଜି ପବିତ୍ର ଅଶୋକାଷ୍ଟମୀ । ଏକାମ୍ର କ୍ଷେତ୍ରର ରଥଦାଣ୍ଡରେ ଗଡ଼ିବ ଅଣଲେଉଟା ରୁକୁଣା ରଥ । ରଥରେ ଦର୍ଶନ ଦେବେ ମହାପ୍ରଭୁ ଶ୍ରୀଲିଙ୍ଗରାଜ । ରଥରେ ବିରାଜିବେ ମା’ରୁକ୍ମିଣୀ ଓ ପ୍ରଭୁ ବାସୁଦେବ। ରୁକୁଣା ରଥଯାତ୍ରା ପାଇଁ ଉତ୍ସବ ମୁଖର ହୋଇପଡ଼ିଛି ପୁରୁଣା ଭୁବନେଶ୍ୱର। ଦିନ ୧୦ଟା ୪୫ରୁ ପହଣ୍ଡି, ୨ଟା ୩୦ରେ ରଥଟଣା ନୀତି ଆରମ୍ଭ ହେବ । ରଥ କାଳିସ ଠାକୁରଙ୍କ ଆଜ୍ଞାମାଳ ପାଇବା ପରେ ଆରମ୍ଭ ହେବ ରଥ ଟଣା । ମୁଗ ଡାଲି, ଅନ୍ନ ଖାଇ ରଥକୁ ବିରାଜିବେ ଶ୍ରୀଲିଙ୍ଗରାଜ।

ରୁକୁଣା ରଥଯାତ୍ରା  ଯତ୍ରା ପଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ହେଇଛି। ସୁରକ୍ଷା ନିମନ୍ତେ ୨ ଜଣ ଡିସିପି ଓ ୩ ଜଣ ଅତିରିକ୍ତ ଡିସିପିଙ୍କ ସମେତ ୧୬ ପ୍ଲାଟୁନ ଫୋର୍ସ ଜଗି ରହିବେ। ୧୩ ଜଣ ଇନ୍ସପେକ୍ଟର, ୩୦ ଜଣ ମହିଳା ଜନଷ୍ଟେବଲ, ୧୫ ଜଣ ଏସଆଇ ଓ ଏଏସ୍ ଆଇ ମଧ୍ୟ ସୁରକ୍ଷା ଦାୟିତ୍ଵରେ ରହିବେ।

ଅଶୋକାଷ୍ଟମୀ ବା ରୁକୁଣା ରଥଯାତ୍ରାରେ ପ୍ରଭୁ ଶ୍ରୀଲିଙ୍ଗରାଜ ଦେବଦଳନ ରଥ ବା ରୁକୁଣା ରଥରେ ବସି ରାମେଶ୍ୱର ମନ୍ଦିର ଅଭିମୁଖେ ଯାତ୍ରା କରିବେ। ରଥରେ ପ୍ରଭୁ ଲିଙ୍ଗରାଜ (ଚନ୍ଦ୍ରଶେଖର), ଦେବୀ ଦୁର୍ଗା ଓ ପ୍ରଭୁ ଦୋଳଗୋବିନ୍ଦ ରହିବେ। ଏହି ରଥର ସାରଥୀ ସାଜିବେ ସ୍ୱୟଂ ସୃଷ୍ଟିକର୍ତ୍ତା ବ୍ରହ୍ମା। ପାଞ୍ଚଦିନ ପାଇଁ ପ୍ରଭୁ ରାମେଶ୍ୱର ମନ୍ଦିରରେ ଅବସ୍ଥାନ କରିବେ। ଏହି ରଥର ବିଶେଷତ୍ୱ ହେଉଛି ଏହା ଅଣଲେଉଟା। ଯେଉଁଭଳି ଭାବେ ରଥଟି ରାମେଶ୍ୱର ମନ୍ଦିର ପର୍ଯ୍ୟନ୍ତ ଯାଇଥାଏ, ସେହିଭଳି ଭାବରେ ପୁନର୍ବାର ପଛକୁ ଫେରିଥାଏ। ବିଧି ଅନୁସାରେ ରଥର ପଛପଟ ଦ୍ୱାର ଖୋଲାଯାଏ ଓ ଅଶ୍ୱଙ୍କୁ ଆଗରୁ ଖୋଲି ଆଣି ନୂଆ ଦ୍ୱାରରେ ଯୋଚାଯାଏ। ଜଗନ୍ନାଥ ମହାପ୍ରଭୁଙ୍କ ରଥ ଯେମିତି ଦକ୍ଷିଣ ମୋଡ଼ ନିଏ, ରୁକୁଣା ରଥ ସେମିତି କୌଣସି ମୋଡ଼ ନେଇନଥାଏ। ସେଥିପାଇଁ ଏହାକୁ ଅଣଲେଉଟା ବୋଲି କୁହାଯାଏ। ପ୍ରଭୁ ଲିଙ୍ଗରାଜଙ୍କର ଏହା ସ୍ୱତନ୍ତ୍ର ନୀତି। ବାହୁଡ଼ା ଦିନ ରଥର ସମ୍ମୁଖ ଭାଗର ସାଜସଜ୍ଜାକୁ ଖୋଲି ଆଣି ପଛ ପାଶ୍ୱର୍ରେ ଲଗାଯାଏ ଓ ରଥର ପଛପାଖକୁ ସମ୍ମୁଖ କରି ଠାକୁରଙ୍କୁ ବାହୁଡ଼ାଇ ଅଣାଯାଏ। ବିଶେଷ କଥା ହେଉଛି ଏହି ରଥର ନିର୍ମାଣ ଶୈଳୀ ଏମିତି ଯେ ସମ୍ମୁଖ ଭାଗକୁ ବଦଳାଇବା ପରେ ପଛ ପାଶ୍ୱର ପୁଣି ସମ୍ମୁଖ ଭାଗ ଭଳି ପ୍ରତୀୟମାନ ହୁଏ।

ପୌରାଣିକ ତଥ୍ୟ ଅନୁସାରେ ପ୍ରଭୁ ରାମଚନ୍ଦ୍ର ମାତା ସୀତାଙ୍କୁ ଉଦ୍ଧାର କରିବାକୁ ଯାଇ ରାବଣକୁ ହତ୍ୟା କରିବାରୁ ତାଙ୍କୁ ବ୍ରହ୍ମ ହତ୍ୟା ଦୋଷ ଲାଗିଥିଲା। ଏହି ପାପରୁ ମୁକ୍ତି ପାଇବା ପାଇଁ ସେ କୁଳଗୁରୁ ବଶିଷ୍ଠଙ୍କ ପରାମର୍ଶ ଅନୁସାରେ ଏକାମ୍ର କ୍ଷେତ୍ରରେ ରାମେଶ୍ୱରଠାରେ ତାଙ୍କୁ ପ୍ରତିଦିନ ପୂଜା କଲେ। ତାଙ୍କ ବ୍ରତ ଓ ଉପାସନାରେ ପ୍ରଭୁ ଲିଙ୍ଗରାଜ ସନ୍ତୁଷ୍ଟ ହୋଇ ତାଙ୍କୁ ବର ଯାଚିଥିଲେ। ଚୈତ୍ର ମାସ ଶୁକ୍ଳପକ୍ଷ ଅଷ୍ଟମୀ ପୁନର୍ବସୁ ନକ୍ଷତ୍ରରେ ରୁକୁଣା ରଥରେ ବସି ରାମେଶ୍ୱର ମନ୍ଦିର ଆସିବେ ବୋଲି ରାମଚନ୍ଦ୍ର ବର ମାଗିଥିଲେ। ସେହିଦିନଠାରୁ ଏହି ସ୍ୱତନ୍ତ୍ର ରଥଯାତ୍ରା ଅନୁଷ୍ଠିତ ହୋଇଆସୁଛି। ଏହି ରଥର ଉଚ୍ଚତା ୫୦ ଫୁଟ ହୋଇଥିବା ବେଳେ ଏଥିରେ ୪ଟି ଚକ, ୨ଟି ଓରା, ୧୬ ନାହାକା ଓ ୫ଦଣ୍ଡା ରହିଥାଏ।

ଭୁବନେଶ୍ୱର: ଆଜି ପବିତ୍ର ମହାଶିବରାତ୍ରୀ । ମହାଦେବଙ୍କ ମହାରାଧନାର ପର୍ବ । ଦେବାଦି ଦେବ ମହାଦେବଙ୍କ ଭକ୍ତଙ୍କ ପାଇଁ ଆଜି ବିଶେଷ ଦିନ। ମହାଶିବରାତ୍ରୀ ଅବସରରେ ଚଳଚଞ୍ଚଳ ହୋଇଉଠିଛି ରାଜ୍ୟର ସମସ୍ତ ଶୈବପୀଠ । ଜାଗର ଉପଲକ୍ଷେ ବିଭିନ୍ନ ଶୈବପୀଠରେ ସ୍ୱତନ୍ତ୍ର ନୀତିକାନ୍ତି ଓ ପୂଜାର୍ଚ୍ଚନା ଅନୁଷ୍ଠିତ ହେଉଛି । ମହାଶିବରାତ୍ରୀ ପାଇଁ ମାଟିରୁ ଆକାଶ ସବୁଠି ଶିବମୟ, ହର ହର ମହାଦେବ ନାରାରେ ପ୍ରକମ୍ପିତ ହେୁଛି ଲିଙ୍ଗରାଜରୁ ଲୋକନାଥ ଓ ଧବଳେଶ୍ବରରୁ କପିଳାସ ପୀଠ। ମହାଶିବରାତ୍ରୀ ପାଇଁ ସଜେଇ ହୋଇଛି ମହାପ୍ରଭୁ ଲିଙ୍ଗରାଜଙ୍କ ମନ୍ଦିର। ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ଠାରୁ ଆରମ୍ଭ କରି ସଠିକ ସମୟରେ ସମସ୍ତ ନୀତି ସମ୍ପାଦନ ଓ ମହାଦୀପ ଉଠିବା ନେଇ ନୀତିନିର୍ଘଣ୍ଟ ଧାର୍ୟ୍ୟ ହୋଇଛି । ରାତି ୧୦ଟାରେ ମହାଦୀପ ଉଠିବା ପାଇଁ ସହମତି ହୋଇଛି । 

ଜାଗର ପାଇଁ ଶ୍ରୀ ଲିଙ୍ଗରାଜ ମନ୍ଦିରରେ ଭକ୍ତଙ୍କ ପ୍ରବଳ ଭିଡ଼ ପରିଲିକ୍ଷିତ ହୋଇଛି । ମନ୍ଦିର ମୁଖ୍ୟ ଫାଟକ ଠାରୁ ଆରମ୍ଭ ହୋଇ ବହୁତ ଦୂର ପର୍ଯ୍ୟନ୍ତ ଲୋକଙ୍କ ଲମ୍ବା ଲାଇନ ଦେଖିବାକୁ ମିଳିଛି । ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ହୋଇଛି । ସୁରକ୍ଷା ବ୍ୟବସ୍ଥା ଉପରେ ଗୁରୁତ୍ୱ ଦିଆଯାଇଛି । ସେହିପରି ରାଜ୍ୟର ପ୍ରମୁଖ ଶୈବପୀଠ ଯେପରି ପୁରୀର ଶ୍ରୀଲୋକନାଥ ପୀଠ, ଆଠଗଡର ଧବଳେଶ୍ବର, ଢେଙ୍କାନାଳର କପିଳାସ, ଆରଡିର ଆଖଣ୍ଡଳମଣି, ବାଲେଶ୍ବରର ପଞ୍ଚଲିଙ୍ଗେଶ୍ବର, ଜଳେଶ୍ବରର ଚନ୍ଦନେଶ୍ବର, ଭୋଗରାଇର ଭୁଷଣ୍ଡେଶ୍ବର, କୋରାପୁଟର ଗୁପ୍ତେଶ୍ବର ଭଳି ଶୈବ ପୀଠରେ ମହାଶିବରାତ୍ରୀ ଆଡ଼ମ୍ବରର ସହ ପାଳନ କରାଯାଉଛି । ସମସ୍ତ ଶୈବପୀଠରେ ହଜାର ହଜାର ଶ୍ରଦ୍ଧାଳୁଙ୍କ ଗହଳି ଦେଖିବାକୁ ମିଳୁଛି । ଭକ୍ତମାନେ ଯେପରି ଶୃଙ୍ଖଳିତ ଦର୍ଶନ କରିପାରିବେ ସେଥିପାଇଁ ବ୍ୟାରିକେଡ୍, ସ୍ବତନ୍ତ୍ର ପୁଲିସ କଣ୍ଟ୍ରୋଲ ରୁମର ବ୍ୟବସ୍ଥା କରାଯାଇଛି ।

ଭୁବନେଶ୍ୱର: ସ୍ବାଭାବିକ ହେଲା ମହାପ୍ରଭୁ ଶ୍ରୀଲିଙ୍ଗରାଜଙ୍କ ନୀତିକାନ୍ତି । ଆଜି ସକାଳୁ ମଙ୍ଗଳ ଆଳତି ପରେ ମନ୍ଦିରରେ ଚାଲିଛି ଧାଡ଼ି ଦର୍ଶନ । ବ୍ରାହ୍ମଣ ନିଯୋଗ ପକ୍ଷରୁ ଏହି ସୂଚନା ଦିଆଯାଇଛି। ଦୁଇ ସେବାୟତ ଗୋଷ୍ଠୀ ମଧ୍ୟରେ ବିବାଦ ଯୋଗୁଁ ଗତ ମଙ୍ଗଳବାର ରାତିରୁ ଲିଙ୍ଗରାଜଙ୍କ ନୀତିକାନ୍ତି ବନ୍ଦ ଥିଲା। ଏପରିକି ମକର ସଂକ୍ରାନ୍ତିରେ ବି ଉପାସରେ ରହିଥିଲେ ଲିଙ୍ଗରାଜ। ତେବେ ଦୁଇ ଦିନ ପରେ ଆଜି ନୀତିକାନ୍ତି ସ୍ବାଭାବିକ ହୋଇଛି । କ୍ଷୀର ଆଉଟା ନୀତିକୁ ନେଇ ବଡୁ ଓ ବ୍ରାହ୍ମଣ ନିଯୋଗ ମଧ୍ୟରେ ବିବାଦ ହେବାରୁ ଏପରି ସମସ୍ୟା ଦେଖା ଦେଇଥିଲା।

ସୂଚନା ଅନୁଯାୟୀ, ମକରସଂକ୍ରାନ୍ତି ପୂର୍ବ ଦିନ ପ୍ରଭୁ ଲିଙ୍ଗରାଜଙ୍କ ନବାଙ୍କ ବେଢ଼ା ନୀତିରେ କ୍ଷୀର କିଏ ଆଉଟିବେ ତାକୁ ନେଇ ଉପୁଜିଥିଲା ବିବାଦ । ଏନେଇ ବଡ଼ୁ ନିଯୋଗ ଓ ବ୍ରାହ୍ମଣ ନିଯୋଗ ମୁହାଁମୁହିଁ ହୋଇଥିଲେ । ଉଭୟ ନିଯୋଗଙ୍କ ବିବାଦ ଯୋଗୁଁ ମଙ୍ଗଳବାର ରାତିରୁ କୌଣସି ନୀତିକାନ୍ତି ହୋଇପାରି ନଥିଲା । ଫଳରେ ଠାକୁର ଓପାସରେ ରହିଥିଲେ । ହେଲେ ଦୁଇ ଦିନ ପରେ ଆଜି ନୀତିକାନ୍ତି ସ୍ବାଭାବିକ ହୋଇଛି । ତେବେ ବାରମ୍ବାର ଲିଙ୍ଗରାଜ ଉପବାସରେ ରହୁଥିବାରୁ ଭକ୍ତଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ଭୁବନେଶ୍ୱର: ମକର ସଂକ୍ରାନ୍ତିରେ ଉପାସରେ ରହିଲେ ପ୍ରଭୁ ଲିଙ୍ଗରାଜ । ସେବାୟତଙ୍କ ବିବାଦ ଯୋଗୁ ଗତକାଲିଠୁ ବନ୍ଦ ରହିଛି ଶ୍ରୀଲିଙ୍ଗରାଜଙ୍କ ସମସ୍ତ ନୀତିକାନ୍ତି । ଆଜି ମକର ସଂକ୍ରାନ୍ତି ଅବସରରେ ମହାଦେବଙ୍କ ପାଖରେ ନବାନ୍ନ ଲାଗି ହୋଇଥାନ୍ତା । ହେଲେ ୧୨ ଘଣ୍ଟାରୁ ଅଧିକ ସମୟ ଧରି ଉପବାସରେ ଅଛନ୍ତି ପ୍ରଭୁ ଲିଙ୍ଗରାଜ । ଉଭୟ ବ୍ରାହ୍ମଣ ନିଯୋଗ ଓ ବଡୁ ନିଯୋଗ ମଧ୍ୟରେ ବିବାଦରୁ ପ୍ରଭୁ ଲିଙ୍ଗରାଜଙ୍କ ନୀତି ବନ୍ଦ ରହିଛି । ଗତକାଲି କ୍ଷୀର ଆଉଟା ନୀତିକୁ ନେଇ ବିବାଦ ଉପୁଜିଥିଲା ଓ ନୀତି ବନ୍ଦ ରହିଥିଲା। ଠାକୁରଙ୍କ ଘୃତକମ୍ବଳ ନୀତି ହୋଇପାରିନି। ଫଳରେ ଆଜି ମଧ୍ୟ ମକର ସଂକ୍ରାନ୍ତିରେ ଠାକୁରଙ୍କ ସମସ୍ତ ନୀତିକାନ୍ତି ବନ୍ଦ ରହିବ ବୋଲି କହିଛନ୍ତି ବ୍ରାହ୍ମଣ ନିଯୋଗ ସମ୍ପାଦକ। ଯେପର୍ଯ୍ୟନ୍ତ ଲିଙ୍ଗରାଜଙ୍କ ସ୍ୱତନ୍ତ୍ର ଆଇନ ନ ଆସିଛି ସେ ପର୍ଯ୍ୟନ୍ତ ଏଭଳି ସମସ୍ୟା ଲାଗି ରହିବ ବୋଲି କହିଛି ବ୍ରାହ୍ମଣ ନିଯୋଗ ସମ୍ପାଦକ।

ବିଗତ କିଛି ବର୍ଷ ହେବ ବିବାଦ ଚାଲିଥିଲା । ଏହାକୁ ନେଇ ହାଇକୋର୍ଟର ଦ୍ବାରସ୍ଥ ହୋଇଥିଲା ବଡ଼ୁ ନିଯୋଗ । ଦେବୋତ୍ତର ବିଭାଗକୁ ଏହି ବିବାଦର ସମାଧାନ କରିବା ପାଇଁ ନିର୍ଦ୍ଦେଶ ଦେଇଥିଲେ କୋର୍ଟ । ହେଲେ ଏଯାଏଁ ଏହାର ସମାଧାନ ହୋଇପାରିଲା ନାହିଁ । ଏଣୁ ଗତକାଲି ସନ୍ଧ୍ୟା ଧୂପ ପରଠାରୁ ପ୍ରଭୁ ଲିଙ୍ଗରାଜଙ୍କ ସମସ୍ତ ନୀତି ବନ୍ଦ ରହିଛି । ସମସ୍ୟାର ସମାଧାନ ନହେବା ପର୍ଯ୍ୟନ୍ତ ନୀତି ବନ୍ଦ ରହିବ ବୋଲି ଚେତାବନୀ ଦେଇଛନ୍ତି ସେବାୟତ । ବାରମ୍ବାର ପ୍ରଭୁ ଲିଙ୍ଗରାଜ ଉପବାସରେ ରହିବାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଭକ୍ତ ।

ଭୁବନେଶ୍ବର: ଆଜି ଅଶୋକଷ୍ଟମୀରେ ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥଯାତ୍ରା।ଚଳଚଞ୍ଚଳ ଭୁବନେଶ୍ବର ଏକାମ୍ର କ୍ଷେତ୍ର। ରଥରେ ଚଢି ମାଉସୀମା ଘରକୁ ଯିବେ ବାବା ଲିଙ୍ଗରାଜ। ମହାପ୍ରଭୁ ଲିଙ୍ଗରାଜଙ୍କ ସହିତ ଦୋଳଗୋବିନ୍ଦ ଓ ଭଉଣୀ ରୁକୁଣା ରଥରେ ବିଜେ କରିବେ।ମନ୍ଦିର ପ୍ରଶାସନ ପକ୍ଷରୁ ବାବା ଲିଙ୍ଗରାଜଙ୍କ ନିତୀନିର୍ଘଣ୍ଟ କରାଯାଇଛି। ଶନିବାର ଅପରାହ୍ନ ୩ଟାରେ ରଥଟଣା ଆରମ୍ଭ ହେବ। ରୁକୁଣା ରଥଯାତ୍ରାର ନିତୀକାନ୍ତି ବିଳମ୍ବ ନ ହେବ ସେ ନେଇ ମନ୍ଦିର ପ୍ରଶାସନ ନିଷ୍ପତ୍ତି ନେଇଛି।

ଶନିବାର ଭୋର ୫ଟାରୁ ମଙ୍ଗଳ ଆଳତୀ ଓ ଅବକାଶ ନୀତି ହେବ। ଭୋର ୫ଟା ୩୦ ମିନିଟରେ ସାହାଣମେଳା ଦର୍ଶନ କରିବେ ଶ୍ରଦ୍ଧାଳୁ। ସକାଳ ୬ଟା ୩୦ ମନିଟରେ ଛାମୁ ପରିସ୍କାର, ସକାଳ ୭ଟାରେ ମହାସ୍ନାନ ଓ ବେଶ ଓ ସୂର୍ଯ୍ୟାପୂଜା ନୀତି। ସକାଳ ୮ଟାରେ ଶ୍ରୀଜୀଉଙ୍କ ବଲ୍ଲଭ ନୀତି ଓ ସକାଳ ଧୂପ ଅନୁଷ୍ଠିତ ହେବ। ଅପରାହ୍ନ ୧୨ଟା ୩୦ରୁ ପହଣ୍ଡି ବିଜେ ଓ ରଥାରୁଢ଼ କରିବେ ଶ୍ରୀଜୀଉ। ଅପରାହ୍ନ ଗୋଟାଏ ୩୦ ମିନିଟରେ ରଥରେ ପୂଜା ଓ ଅପରାହ୍ନ ୩ଟା ୩୦ରେ ରଥ ଟଣା ଆରମ୍ଭ ହେବ।

ଚଳିତ ବର୍ଷ ମହାପ୍ରଭୁ ଲିଙ୍ଗରାଜଙ୍କ ପବିତ୍ର ରୁକୁଣା ରଥ ପାଇଁ ଭୁବନେଶ୍ୱର ଡିସିପିଙ୍କ ନେତୃତ୍ୱରେ ସୁରକ୍ଷା ଦାୟିତ୍ଵ ପ୍ରଦାନ କରାଯାଇଛି। ଭୁବନେଶ୍ୱର ଡିସିପି ଜଗମୋହନ ମିନା, ଟ୍ରାଫିକ ଡିସିପି ତପନ ମହାନ୍ତିଙ୍କ ନେତୃତ୍ୱରେ ଟ୍ରାଫିକ ବ୍ୟବସ୍ଥା ଓ ପାର୍କିଂ ସୁବିଧା କରାଯାଇଛି। ଶ୍ରଦ୍ଧାଳୁଙ୍କ ସୁରକ୍ଷାକୁ ଗୁରୁତ୍ୱ ଦିଆଯାଇଛି। ଦୁଇ ଡିସିପିଙ୍କ ନେତୃତ୍ୱରେ ୩ ଜଣ ଅତିରିକ୍ତ ଡିସିପି, ୫ ଏସିପି, ୧୨ଜଣ ଇନ୍ସପେକ୍ଟର, ୫୫ଜଣ ସବ ଇନ୍ସପେକ୍ଟର ସମେତ ୧୬ ପ୍ଲାଟୁନ ଫୋର୍ସ ଓ ୮୫ ଜଣ ହୋମଗାର୍ଡ ନିୟୋଜିତ କରାଯାଇଛି।

କେଉଁବାଟେ ଯିବେ….

• ରଥ ରୋଡ୍‌ ଏବଂ ପୁନାମା ଗେଟ୍‌ ପଟୁ ଲିଙ୍ଗରାଜ ମନ୍ଦିର ଆଡ଼କୁ ଆସୁଥିବା ସମସ୍ତ ଦୁଇ ଓ ଚାରିଚକିଆ ଯାନବାହନ ବଢେ଼ଇବାଙ୍କଠାରୁ ଆଗକୁ ନ ଯାଇ ବି.ଏମ୍‌. ହାଇସ୍କୁଲ ପଡ଼ିଆରେ ଗାଡ଼ି ପାର୍କିଂ କରିପାରିବେ। ସେହି ସମୟରେ ରଥ ରୋଡ୍‌ ଦେଇ କୌଣସି ପ୍ରକାରର ଭାରୀଯାନ ଚଳାଚଳ କରିପାରିବେ ନାହିଁ।
• କେଦାରଗୌରୀ ମନ୍ଦିର ପଟୁ ଓ ସାନିଟାରିୟମ୍‌ ଛକ ପଟୁ ଲିଙ୍ଗରାଜ ମନ୍ଦିର ଆଡ଼କୁ ଆସୁଥିବା ଯାନବାହନଗୁଡ଼ିକ କୋଟିତୀର୍ଥ ଗଳି ଦେଇ କଚେରି ପିଣ୍ଡି ରାସ୍ତାରେ ଯାଇ ତରଙ୍ଗ କ୍ଲବ୍‌ ପଛପଟେ ଥିବା ଖାଲି ସ୍ଥାନରେ ଗାଡ଼ି ରଖିପାରିବେ। ଏଥିନିମନ୍ତେ କୋଟି ତୀର୍ଥ ଗଳିଠାରୁ ସିଦ୍ଧିମଣ୍ଡପ ଗଳି ପର୍ଯ୍ୟନ୍ତ ରାସ୍ତାକୁ ଯାନବାହନ ଚଳାଚଳ ନିମନ୍ତେ ୱାନ୍‌ ୱେ କରାଯାଇଛି।
• ସାମନ୍ତରାପୁର ଛକ ପଟୁ ଆସୁଥିବା ଯାନବାହନଗୁଡ଼ିକ ଶ୍ରୀରାମ ନଗର ଓ ସବ୍‌ଷ୍ଟେସନ ଛକ ଦେଇ ଅନନ୍ତ ବାସୁଦେବ ମନ୍ଦିର ଉତ୍ତର ପାଶ୍ୱର୍ରେ ଏବଂ ତରଙ୍ଗ କ୍ଲବ୍‌ ପଛପଟେ ଥିବା ଖାଲି ସ୍ଥାନରେ ଗାଡ଼ି ରଖିପାରିବେ।
• କେଉଟ ସାହି ପଟୁ ଲିଙ୍ଗରାଜ ମନ୍ଦିର ଆଡ଼କୁ ଆସୁଥିବା ସମସ୍ତ ଯାନବାହନ ସବ୍‌ଷ୍ଟେସନ୍‌ ଛକ ଦେଇ ବିଏମ୍‌ସି ନ୍ୟୁ ମାର୍କେଟ୍‌ କମ୍ପ୍ଲେକ୍ସ ପାର୍କିଂ/ଅନନ୍ତ ବାସୁଦେବ ମନ୍ଦିର ପାର୍କିଂରେ ଗାଡ଼ି ରଖିପାରିବେ।
• ତାରା ସୁନ୍ଦରୀ ରାସ୍ତାରେ ଲିଙ୍ଗରାଜ ମନ୍ଦିର ଆଡ଼କୁ ଆସୁଥିବା ସମସ୍ତ ଗାଡ଼ି ବଢେ଼ଇବାଙ୍କ ଛକ ପରେ ଆଗକୁ ଯିବାକୁ ଦିଆଯିବନାହିଁ। ସେମାନେ ମ୍ୟୁନିସିପାଲିଟି ହସ୍ପିଟାଲ୍‌ କିମ୍ବା ବି.ଏମ୍‌. ହାଇସ୍କୁଲ ପଡ଼ିଆରେ ଗାଡ଼ି ପାର୍କିଂ କରିପାରିବେ।
• ରାମକୃଷ୍ଣ ମଠ ଦେଇ ମାଉସୀ ମା’ ଛକ ପଟୁ/କଳ୍ପନା ସାନିଟାରିୟମ୍‌ ଛକ ପର୍ଯ୍ୟନ୍ତ ଯିବାକୁ ଦିଆଯିବ ଏବଂ ଷ୍ଟାଣ୍ଡରେ ପାର୍କିଂ କରିପାରିବେ। ଛକ ପଟୁ ଆସୁଥିବା ସମସ୍ତ ବସ୍‌/ଭାରୀଯାନ/ କାର୍‌ଗୁଡ଼ିକ ସେମାନେ ସାନିଟାରିୟମ୍‌ ଛକ ପାଖରେ ଥିବା ନୂଆ ବସ୍‌ଷ୍ଟାଣ୍ଡ୍‌ରେ ପାର୍କିଂ କରିପାରିବେ।
• ଆମନ୍ତ୍ରିତ ଅତିଥି ଓ ସରକାରୀ କର୍ମଚାରୀଙ୍କ ଯାନବାହନ ରଥ ରୋଡ୍‌ରେ ଆସି ବଢେ଼ଇବାଙ୍କ ଛକଠାରୁ ମ୍ୟୁନିସପାଲିଟି ହସ୍ପିଟାଲ୍‌ ରାସ୍ତା ଦେଇ ନିର୍ଦ୍ଧାରିତ ହୋଇଥିବା ପାର୍କିଂ ସ୍ଥାନକୁ ଯାଇପାରିବେ।

କେଉଁଠି କିଏ ପାର୍କିଂ କରିବେ

• ବିଏମ୍‌ସି ନ୍ୟୁ ମାର୍କେଟ୍‌ କମ୍ପ୍ଲେକ୍ସରେ ଚାରିଚକିଆ ଯାନ ପାର୍କିଂ କରିବେ।
• ବିଏମ୍‌ସି ନ୍ୟୁ ମାର୍କେଟ୍‌ କମ୍ପ୍ଲେକ୍ସର ଉତ୍ତର ପାଶ୍ୱର୍ରେ କାର୍‌ ଓ ଚାରିଚକିଆ ପାର୍କିଂ କରିବେ।
• ସାନିଟାରିୟମ୍‌ ଛକ ପାଖରେ ଥିବା ନୂଆ ବସ୍‌ଷ୍ଟାଣ୍ଡ୍‌ରେ ବସ୍‌ ଓ କାର୍‌ ପାର୍କିଂ କରିବେ।
• କୋଟିତୀର୍ଥ ଲେନ୍‌ଠାରୁ କଚେରି ପିଣ୍ଡି ଛକ (ତରଙ୍ଗ କ୍ଲବ୍‌ ପଛପଟ)ରେ ଦୁଇଚକିଆ ଯାନବାହନ ପାର୍କିଂ କରିବେ।
• ବିଏମ୍‌ସି ହସ୍ପିଟାଲର ଉତ୍ତର ପାଶ୍ୱର୍ରେ ଏବଂ ପାପନାଶିନୀ ପୋଖରୀ ପାଖ ଓ ବିଏମ୍‌ସି ହାଇସ୍କୁଲ ଉତ୍ତର ପାଶ୍ୱର୍ରେ ସରକାରୀ ଯାନବାହନ ପାର୍କିଂ କରିବେ।
• ଲିଙ୍ଗରାଜ ମନ୍ଦିରର ଦକ୍ଷିଣ ଗେଟ୍‌ ସାମ୍‌ନା ପଟେ ଭିଆଇପି ପାର୍କିଂ କରିବେ।
• ବିଏମ୍‌ ହାଇସ୍କୁଲ ପଡ଼ିଆରେ ଚାରି ଓ ଦୁଇଚକିଆ ଯାନ ପାର୍କିଂ କରିବେ।
• ଲିଙ୍ଗରାଜ ହାଟର ସାମ୍‌ନା ପାର୍ଶ୍ବ ଓବିଭ୍ୟାନ୍‌ ଓ ପଶ୍ଚିମପଟେ ମିଡିଆର ଦୁଇ ଓ ଚାରି ଚକିଆ ଯାନ ପାର୍କିଂ କରିବେ।
• ଲିଙ୍ଗରାଜ ମନ୍ଦିର ଦକ୍ଷିଣ ପଟେ ଡ୍ୟୁଟି ନିମନ୍ତେ ନିୟୋଜିତ ସରକାରୀ ଯାନ ପାର୍କିଂ ଓ ଦକ୍ଷିଣ-ପୂର୍ବ କୋଣରେ ସେବାୟତ ଓ କଳାକାରମାନେ ପାର୍କିଂ କରିବେ।

ଭୁବନେଶ୍ୱର: ଆଜି ରୁକୁଣା ରଥଯାତ୍ରା ଓ ପବିତ୍ର ଅଶୋକାଷ୍ଟମୀ। ଆରମ୍ଭ ହେଲା ମହାପ୍ରଭୁ ଲିଙ୍ଗରାଜଙ୍କ ରୁକୁଣା ରଥ ଟଣା। ପୁଲିସ ଓ ସ୍ବେଚ୍ଛାସେବୀଙ୍କ କର୍ଡନରେ ରଥଟଣା ଆରମ୍ଭ ହୋଇଛି। ରଥଟଣାରେ ହଜାର ହଜାର ଶ୍ରାଦ୍ଧାଳୁ ସାମିଲ ହୋଇଛନ୍ତି। ନୀତିକାନ୍ତିରେ ସାମାନ୍ୟ ବିଳିମ୍ବ ହୋଇଛି। ଅପରାହ୍ଣ ୩ଟା ସୁଦ୍ଧା ରଥଟଣା ଆରମ୍ଭ ହେବାର ଥିଲା ହେଲେ ସାମାନ୍ୟ ବଳିମ୍ବରେ ରଥ ଟଣା ଆରମ୍ଭ ହୋଇଛି। ବର୍ଷକୁ ଥରେ ଭକ୍ତଙ୍କୁ ଦର୍ଶନ ଦେବାକୁ ଲିଙ୍ଗରାଜ ମନ୍ଦିରରୁ ମାଉସୀ ମା’ ମନ୍ଦିରକୁ ଆସୁଛନ୍ତି ମହାପ୍ରଭୁ। ମହାପ୍ରଭୁଙ୍କ ରଥଯାତ୍ରା ଦେଖିବାକୁ ରଥଦାଣ୍ଡରେ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଏକାଠି ହୋଇଛନ୍ତି।

ମହାପ୍ରଭୁ ରଥାରୂଢ଼ ହେବା ପରେ ଅପରାହ୍ଣ ଚକ ପୂଜା, ଚାରି ଦ୍ୱାର ପୂଜା, ନେତ ପୂଜା, ଅଶ୍ୱ ପୂଜା ଓ ବ୍ରହ୍ମ ପୂଜା ଆଦି ନୀତି କରାଯାଇଥିଲା। ରଥ ଉପର ନୀତି ଶେଷ ପରେ ରଥ ଟଣା ଆରମ୍ଭ ହୋଇଛି। ଉଲ୍ଲେଖଯୋଗ୍ୟ ମହାପ୍ରଭୁ ଲିଙ୍ଗରାଜ ରାମେଶ୍ୱର ମନ୍ଦିର ଅଧିଷ୍ଠିତ ହେବେ। ମହାପ୍ରଭୁଙ୍କର ଏହି ଯାତ୍ରା ୫ ଦିନିଆ ହୋଇଥାଏ।

ରୁକୁଣା ରଥ ଯାତ୍ରା ପାଇଁ ମନ୍ଦିର ପ୍ରଶାସନ ପକ୍ଷରୁ ନିତିନିର୍ଘଣ୍ଟ ଜାରି କରାଯାଇଛି। ସାଢ଼େ ୬ଟାରୁ ସାଢ଼େ ୯ଟା ପର୍ଯ୍ୟନ୍ତ ଠାକୁରଙ୍କ ସାହାଣ ମେଲା ରହିବ। ତା’ରି ଭିତରେ ସାଢ଼େ ୮ଟାରେ ରୋଷହୋମ ଓ ପାକକାର୍ଯ୍ୟ ହେବ। ସାଢ଼େ ୯ଟାରୁ ୧୦ଟା ଯାଏଁ ଛାମୁ ପରିଷ୍କାର ହେବ। ସକାଳ ୧୦ଟାରୁ ସାଢ଼େ ୧୦ଟା ଭିତରେ ମହାସ୍ନାନ, ସୂର୍ଯ୍ୟପୂଜା ଓ ଦ୍ୱାରପାଳ ନୀତି ସମ୍ପନ୍ନ ହେବ।

ଭୁବନେଶ୍ୱର: ସ୍ୱାଭାବିକ ହେଲା ମହାପ୍ରଭୁ ଶ୍ରୀଲିଙ୍ଗରାଜଙ୍କ ନୀତିକାନ୍ତି । ୩ ଦିନ ଖାଡା ଉପାସ ରହିବା ପରେ ଶ୍ରୀଲିଙ୍ଗରାଜଙ୍କ ପାଖରେ ଲାଗି ହେଲା ଭୋଗ । ଟ୍ରଷ୍ଟ ବୋର୍ଡରୁ ପୂଜାପଣ୍ଡା ନିଯୋଗ ଓ ବ୍ରାହ୍ମଣ ନିଯୋଗ ଇସ୍ତଫା ଦେବା ପରେ ମହାପ୍ରଭୁ ଲିଙ୍ଗରାଜଙ୍କ ନୀତିକାନ୍ତି ସ୍ୱାଭାବିକ ହୋଇଥିବା ସୂଚନା ମିଳିଛି ।

ସୂଚନାଯୋଗ୍ୟ, ପ୍ରଭୁ ଲିଙ୍ଗରାଜଙ୍କ ଜମି ଉପରେ ‘ବଡ଼ୁ ନିଯୋଗ’ ବେଆଇନ ନିର୍ମାଣ କରୁଥିବା ଅଭିଯୋଗ କରି ପୂଜାପଣ୍ଡା ଓ ବ୍ରାହ୍ମଣ ନିଯୋଗ ଠାକୁରଙ୍କ ନୀତିରୁ ଦୂରେଇ ରହିଥିଲେ । ଫଳରେ ଶ୍ରୀଲିଙ୍ଗରାଜଙ୍କ ନୀତି ବନ୍ଦ କରିଦେଇଥିଲେ ସେବାୟତ । ସେବାୟତଙ୍କ ମଧ୍ୟରେ ଚାଲିଥିବା ବିବାଦ ପାଇଁ ତିନି ଦିନ ଧରି ଖାଡା ଉପବାସରେ ଥିଲେ ମହାପ୍ରଭୁ ଲିଙ୍ଗରାଜ। ଆଜି ଏହା ସ୍ୱାଭାବିକ ହେବା ସହ ଶ୍ରୀଲିଙ୍ଗରାଜଙ୍କ ନୀତିକାନ୍ତି ପୁନର୍ବାର ଆରମ୍ଭ ହୋଇଛି ।

ଭୁବନେଶ୍ୱର: ପ୍ରଭୁ ଲିଙ୍ଗରାଜଙ୍କ ମନ୍ଦିରରେ ସେବାୟତ ବିବାଦ ପ୍ରସଙ୍ଗ। ବିବାଦର ସମାଧାନ ପାଇଁ ମନ୍ଦିର ଟ୍ରଷ୍ଟ ବୋର୍ଡ କାର୍ଯ୍ୟନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଲେ ଦେବୋତ୍ତର କମିଶନର। ତିନି ନିଯୋଗଙ୍କ ସହ ଆଲୋଚନା ପରେ ଟ୍ରଷ୍ଟ ବୋର୍ଡ କାର୍ଯ୍ୟନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି କମିଶନର। ସମସ୍ତ ପକ୍ଷଙ୍କ ସହ ଆଲୋଚନା କରି ବିବାଦର ସମାଧାନ କରିବାକୁ ଟ୍ରଷ୍ଟକୁ ନିର୍ଦ୍ଦେଶ। ଯଦି କୌଣସି ପକ୍ଷ ଅରାଜି ହୁଅନ୍ତି ବା ସେବା ନକରନ୍ତି ତାଙ୍କ ବିରୋଧରେ କ୍ଳଜ ୧୭ ଅନୁସାରେ ଟ୍ରଷ୍ଟ ବୋର୍ଡ କାର୍ଯ୍ୟନିର୍ବାହୀ ଅଧିକାରୀ ବିକଳ୍ପ ବ୍ୟବସ୍ଥା ଗ୍ରହଣ କରିପାରିବା ନେଇ ନିର୍ଦ୍ଦେଶ। ଏହା ସହ ପୁରୁଣା ସମସ୍ତ ବିବାଦ ଏବଂ ନୀତିକାନ୍ତି ବନ୍ଦ ସମ୍ପର୍କରେ ମଧ୍ୟ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ଦେବୋତ୍ତର କମିଶନ।

ସୂଚନାଯୋଗ୍ୟ, ସେବାୟତଙ୍କ ମଧ୍ୟରେ ଚାଲିଥିବା ବିବାଦ ପାଇଁ ଗତକାଲିଠୁ ଉପବାସରେ ଅଛନ୍ତି ମହାପ୍ରଭୁ ଲିଙ୍ଗରାଜ। ଗତକାଲି ମଙ୍ଗଳ ଆଳତି ପରଠାରୁ ମହାପ୍ରଭୁଙ୍କ କୌଣସି ନୀତିକାନ୍ତି ହୋଇନାହିଁ। ଗତକାଲି ସକାଳୁ ସିଂହଦ୍ୱାର ଖୋଲା ନୀତି ପରଠାରୁ ଠାକୁରଙ୍କ ନୀତି ହୋଇ ପାରିନାହିଁ। ଲିଙ୍ଗରାଜଙ୍କ ଜମି ଉପରେ ‘ବଡ଼ୁ ନିଯୋଗ’ ବେଆଇନ ନିର୍ମାଣ କରୁଥିବା ଅଭିଯୋଗ କରି ପୂଜାପଣ୍ଡା ଓ ବ୍ରାହ୍ମଣ ନିଯୋଗ ଠାକୁରଙ୍କ ନୀତିରୁ ଦୂରେଇ ରହିଛନ୍ତି।

ଭୁବନେଶ୍ୱର(ଦତ୍ତାତ୍ରେୟ ନାୟକ): ବ୍ରହ୍ମଲିଙ୍ଗଙ୍କଠାରେ ଲାଗି ନୈବେଦ୍ୟ ମହାପ୍ରସାଦର ମାନ୍ୟତା ପାଇଛି। ଯାହା ଦେବ ଭୋଗ୍ୟ; ହରି, ହର ଓ ବ୍ରହ୍ମାଙ୍କର ଅତି ପ୍ରିୟ ତାହାକୁ ମହାପ୍ରସାଦ ବ୍ୟତିରେକ ଅନ୍ୟ କିଛି କୁହାଯାଇପାରିବ ନାହିଁ। ଏକାମ୍ରକ୍ଷେତ୍ରର ପ୍ରମୁଖ ଶୈବପୀଠ ତଥା ମହାପ୍ରଭୁ ଲିଙ୍ଗରାଜଙ୍କ ମହାପ୍ରସାଦ ପ୍ରାପ୍ତିର ଆସ୍ପର୍ଦ୍ଧା ସମସ୍ତ ଶୈବ ଶ୍ରଦ୍ଧାଳୁଙ୍କ ମଧ୍ୟରେ ରହିଛି। ଦୂରଦୂରାନ୍ତରୁ ମନ୍ଦିରମାଳିନୀ ଭୁବନେଶ୍ୱରକୁ ଆସୁଥିବା ଶ୍ରଦ୍ଧାଳୁମାନେ ମହାପ୍ରଭୁଙ୍କ ଦର୍ଶନ କରି ମୋକ୍ଷପ୍ରାପ୍ତିର ଆତ୍ମସନ୍ତୋଷ ଲାଭକରନ୍ତି ଓ ପ୍ରଭୁ ଲିଙ୍ଗରାଜଙ୍କର ମହାପ୍ରସାଦ ସେବନ କରନ୍ତି। ଏଣୁ ଦେବଦେବ ମହାଦେବଙ୍କର ଦୈନନ୍ଦିନ ନୀତିକାନ୍ତିରେ ଲାଗି ହେଉଥିବା ଭୋଗ ତଥା ମହାପ୍ରସାଦକୁ ନେଇ ଏଥରର ସ୍ୱତନ୍ତ୍ର ଉପସ୍ଥାପନା।

ଯେତେ ଯାତ, ସେତେ ନୈବେଦ୍ୟ
ମହାପ୍ରଭୁଙ୍କ ଦୈନନ୍ଦିନ ନୀତିକାନ୍ତିକୁ ବାଦଦେଇ ଅନେକ ବାହାର ଓ ଭିତର ଯାତ ମଧ୍ୟ ରହିଛି। ଯାତ ଅନୁସାରେ ମହାପ୍ରଭୁଙ୍କ ନିକଟରେ ଭିନ୍ନ ଭିନ୍ନ ପ୍ରକାର ନୈବେଦ୍ୟ ଲାଗି କରାଯାଇଥାଏ। ଧନୁ ମାସରେ ମହାପ୍ରଭୁଙ୍କ ସନ୍ଧ୍ୟା ଧୂପ ସମୟରେ ଧନୁ ମୁଆଁ ଲାଗି ହୋଇଥାଏ। କାର୍ତ୍ତିକ ମାସରେ ମହାପ୍ରଭୁଙ୍କ ନିକଟରେ ସାରା ମାସ ଏକ ସ୍ୱତନ୍ତ୍ର ବାଳ ଭୋଗ ହୋଇଥାଏ। ହବିଷ୍ୟାଳୀମାନେ ଏହି ଭୋଗର ଆକାଂକ୍ଷା ରଖିଥାଆନ୍ତି। ନଡ଼ିଆ, ଅଦା, ମୁଗ ଭଳି ଅନେକ ଦ୍ରବ୍ୟରେ ଏହି ବାଳ ଭୋଗ ପ୍ରସ୍ତୁତ ହୋଇଥାଏ। ସେହିଭଳି ପ୍ରତ୍ୟେକ ଚତୁର୍ଦଶୀ ଟେରାଫିଟା ପରେ ଏକ ଯାତ୍ରା ପୂଜା କରାଯାଇଥାଏ। ଏହି ପୂଜାରେ ନଡ଼ିଆ, କଦଳୀ ଭଳି ବିଭିନ୍ନ ପ୍ରକାର ଫଳ ସାଙ୍ଗକୁ ଅଦା ପଡ଼ି ଏକ ନୈବେଦ୍ୟ ମହାପ୍ରଭୁଙ୍କ ପାଖରେ ଲାଗି ହୋଇଥାଏ। ସେହିଭଳି ଚନ୍ଦନଯାତ୍ରରେ ମହାପ୍ରଭୁଙ୍କୁ ମାଣ୍ଡୁଅ ପିଠା ଓ କାକରା ଇତ୍ୟାଦି ଲାଗି କରାଯାଏ।

ମହାପ୍ରଭୁଙ୍କର ଅଷ୍ଟବାରି ନୈବେଦ୍ୟ
ସକାଳୁ ଆରମ୍ଭ କରି ବଡ଼ସିଂହାର ପର୍ଯ୍ୟନ୍ତ ମହାପ୍ରଭୁଙ୍କ ଉଦ୍ଦେଶ୍ୟରେ ପଞ୍ଚ ଅବକାଶ ଓ ତିନି ଧୂପକୁ ମିଶାଇ ଅଷ୍ଟବାରି ନୈବେଦ୍ୟ ଲାଗି ହୋଇଥାଏ। ଏହି ଅଷ୍ଟ ଭୋଗଗୁଡ଼ିକର ନାମ ହେଉଛି, ବାଳ ଧୂପ ବା ବାଳ ବଲ୍ଲଭ, ସକାଳ ଧୂପ, ଭୋଗ ମଣ୍ଡପ ଧୂପ ବା ଛତ୍ର ଭୋଗ, ବୀରକିଶୋର ବଲ୍ଲଭ, ଦ୍ୱିପ୍ରହର ଧୂପ, ଟେରା ଫିଟା, ସନ୍ଧ୍ୟା ଧୂପ ଓ ବଡ଼ସିଂହାର। ଭିନ୍ନ ଭିନ୍ନ ଭୋଗ ସମୟରେ ମହାପ୍ରଭୁଙ୍କୁ ଭିନ୍ନ ଭିନ୍ନ ବ୍ୟଞ୍ଜନ ଲାଗି ହୋଇଥାଏ।

କୋରାଖଇ, ଦହିରୁ ଭୋଗ ଲାଗି ଆରମ୍ଭ
ବାଳ ବଲ୍ଲଭରେ ମହାପ୍ରଭୁଙ୍କୁ ଭୋଗ ହୁଏ କୋରା ଖଇ ଓ ଦହି। ମହାପ୍ରଭୁଙ୍କ ବଲ୍ଲଭ ସରିବାରେ ପରେ ଭୁବନେଶ୍ୱର ଠାକୁରାଣୀଙ୍କର ଭୋଗ କରାଯାଇଥାଏ। ଏହାପରେ ମହାପ୍ରଭୁ ଲିଙ୍ଗରାଜଙ୍କର ସକାଳ ଧୂପ ଭୋଗ ଆରମ୍ଭ ହୁଏ। ସକାଳ ଧୂପରେ ଅନ୍ନ, ଖେଚୁଡ଼ି, ଡ଼ାଲି, ଶାଗ, ପୁଳି, ହଂସକେଳି, ଦହି ତଡ଼ମା, ଏଣ୍ଡୁରୀ ଓ କାନ୍ତି ଇତ୍ୟାଦି ନୈବେଦ୍ୟ ଅର୍ପଣ କରାଯାଇଥାଏ। ଏହାପରେ ମହାପ୍ରଭୁଙ୍କର ଭୋଗ ମଣ୍ଡପ ପାଇଁ ପ୍ରସ୍ତୁତ କରାଯାଏ। ଭୋଗମଣ୍ଡପରେ ମହାପ୍ରଭୁଙ୍କୁ ଅନ୍ନ, ମୁଗଡ଼ାଲି ଓ ଶାକର ଇତ୍ୟାଦି ଭୋଗ ହୋଇଥାଏ।

ବ୍ୟଞ୍ଜନରେ ଅତିପ୍ରିୟ ଖିରିଗୁଡ଼ା
ବୀରକିଶୋର ବଲ୍ଲଭ ଭୋଗରେ ମହାପ୍ରଭୁଙ୍କୁ କାକରା ଓ ତ୍ରିପୁରୀ ଅର୍ପଣ କରାଯାଇଥାଏ। ଗୋଟିଏ ତ୍ରିପୁରୀ ଓ ତିନୋଟି କାକରା ଭୋଗ ଲାଗି ହୁଏ। ଏହାପରେ ଦ୍ୱିପ୍ରହର ଭୋଗ ହୋଇଥାଏ। ଏଥିରେ ଅନ୍ନ, ଡ଼ାଲି, ବେସର, ଶାଗ, ଖିରିଗୁଡ଼ା, ଆରିଶା ଓ କାକରା ଇତ୍ୟାଦି ଭୋଗ ହୋଇଥାଏ। ଏହାପରେ ଠାକୁରାଣୀ ମା ଭୁବନେଶ୍ୱରୀଙ୍କର ଦ୍ୱିପ୍ରହର ଧୂପ ଯାଇଥାଏ। ଦ୍ୱିପ୍ରହର ଧୂପରେ ଠାକୁରାଣୀଙ୍କୁ କାନ୍ତି ଓ ଖିରିଗୁଡ଼ା ଲାଗି ହୋଇଥାଏ। ଗୁଡ଼ରେ ପ୍ରସ୍ତୁତ ହୋଇଥିବା ଏହି ନୈବେଦ୍ୟ(ଖିରିଗୁଡ଼ା) ଉଭୟ ମହାପ୍ରଭୁ ଓ ମା’ଙ୍କର ଅତିପ୍ରିୟ ବୋଲି କୁହାଯାଏ। ଖିରିଗୁଡ଼ା ପ୍ରସ୍ତୁତି ପ୍ରଣାଳୀ ଅତ୍ୟନ୍ତ ସ୍ୱତନ୍ତ୍ର ହୋଇଥିବା ବେଳେ ମହାପ୍ରଭୁଙ୍କ ନୈବେଦ୍ୟ ଅର୍ପଣରେ ଏହାର ଯଥେଷ୍ଟ ସ୍ୱତନ୍ତ୍ରତା ରହିଛି ବୋଲି ଶ୍ରୀଲିଙ୍ଗରାଜଙ୍କର ସେବାୟତମାନେ କହିଛନ୍ତି।

ଜାଗରରେ ଚରୁ ଅନ୍ନ; ଭାଦ୍ରବ ଚତୁର୍ଦଶୀରେ ସପ୍ତପୁରୀ
ଶିବରାତ୍ରି ଶ୍ରୀଲିଙ୍ଗରାଜର ସବୁଠାରୁ ବଡ଼ ମହୋତ୍ସବ। ଜାଗରରେ ପ୍ରତ୍ୟେକ ଚାରିପ୍ରହର ପୂଜାରେ ମହାପ୍ରଭୁଙ୍କୁ ଚରୁ ଅନ୍ନ ଭୋଗ ହୋଇଥାଏ। ଏହା ଖେଚୁଡ଼ି ଭଳି ଏକ ବ୍ୟଞ୍ଜନ। ଯଦିଓ ଏହା ଏକ କୋଠଭୋଗ। ଜାଗରରେ ଶ୍ରଦ୍ଧାଳୁମାନଙ୍କ ସଂଖ୍ୟା ଅଧିକ ହୋଇଥିବା ହେତୁ ଚରୁ ଅନ୍ନ ଅଧିକ ପରିମାଣରେ ପ୍ରସ୍ତୁତ କରାଯାଇଥାଏ। ସେହିଭଳି ଭାଦ୍ରବ ମାସ ଚତୁର୍ଦଶୀରେ ମହାପ୍ରଭୁଙ୍କ ନିକଟରେ ସପ୍ତପୁରୀ ଲାଗି ହୋଇଥାଏ। ସାତପ୍ରକାର ପୁରୀରେ ପ୍ରସ୍ତୁତ ହୋଇଥିବା ପିଠାକୁ ସପ୍ତପୁରୀ ବୋଲି କୁହାଯାଇଥାଏ। ସପ୍ତପୁରୀ ଅମାବାସ୍ୟରେ ମଧ୍ୟ ସପ୍ତପୁରୀ ପିଠା ମହାପ୍ରଭୁଙ୍କୁ ଅର୍ପଣ କରାଯାଏ।

ବଡ଼ସିଂହାରରେ ପ୍ରତିଦିନ ଲାଗି ହୁଏ ଦହିପଖାଳ
ପହୁଡ଼ ନୀତି ଶେଷ ପରେ ମହାପ୍ରଭୁଙ୍କର ଟେରାଫିଟା ଭୋଗ ହୋଇଥାଏ। ଏହି ଭୋଗରେ ଖେଇ ଆରିଶା ଭୋଗ ଲାଗେ। ଏହାପରେ ଆରମ୍ଭ ହୁଏ ସନ୍ଧ୍ୟା ଧୂପ। ସନ୍ଧ୍ୟା ଧୂପ ଭୋଗ ଶୋଧୁଅ ଓ ଦହିପଖାଳ ଭୋଗ ହୋଇଥାଏ। ତେବେ ମା’ଭୁବନେଶ୍ୱରୀଙ୍କ ପାଖରେ ସନ୍ଧ୍ୟାଧୂପରେ କେବଳ ଦହିପଖାଳ ଭୋଗ ହୋଇଥାଏ। ଶେଷରେ ରାତ୍ର ସମୟରେ ମହାପ୍ରଭୁଙ୍କର ବଡ଼ସିଂହାର ଭୋଗରେ ଖେଇ, ଆରିସା, ସୋଧୁଅ, ଖର୍ଜୁର ଓ ଦହିପଖାଳ ଅର୍ପଣ କରାଯାଇଥାଏ। ସେହିଭଳି ଲଡ଼ୁ ଓ ଖଜା ଇତ୍ୟାଦି ମଧ୍ୟ ମହାପ୍ରଭୁଙ୍କ ନିକଟରେ ବଡ଼ସିଂହାର ଭୋଗରେ ସାମିଲ ହୋଇଥାଏ।

ରଥ ଉପରେ ମୁଆଁ ଭୋଗ
ରୁକୁଣା ରଥଯାତ୍ରା ସମୟରେ ମହାପ୍ରଭୁଙ୍କୁ ସକଳା ଧୂପ ଓ ଦ୍ୱିପ୍ରହର ଧୂପରେ ମୁଆଁ ଲାଗି ହୋଇଥାଏ। ସନ୍ଧ୍ୟା ଧୂପରେ ମୁଆଁ ସହ ମାଣ୍ଡୁଅ ପିଠା ଲାଗି କରାଯାଇଥାଏ। ମହାପ୍ରଭୁଙ୍କ ରଥଯାତ୍ରା ସମୟରେ ମୁଆଁ ଭୋଗକୁ ଶ୍ରଦ୍ଧାଳୁମାନେ ଅନାଇ ବସିଥାଆନ୍ତି। ପୁରୁଣା ଭୁବନେଶ୍ୱରର ବାସିନ୍ଦାମାନେ ମହାପ୍ରଭୁ ରଥାରୂଢ଼ ହୋଇଥିବା ତଳେ ମୁଆଁ ଭୋଗ ମଧ୍ୟ କରିଥାଆନ୍ତି। ମହାପ୍ରଭୁଙ୍କୁ ଭୋଗ ଲାଗିଥିବା ମୁଆଁ ଭୋଗକୁ ଆତ୍ମୀୟ ସ୍ୱଜନମାନଙ୍କ ମଧ୍ୟରେ ମଧ୍ୟ ବାଣ୍ଟନ୍ତି। ଏକାମ୍ର କ୍ଷେତ୍ରର ବାସିନ୍ଦା ପ୍ରତାପ ବିଶୋଇ କହିଛନ୍ତି ଯେ ଖଇ କୋରା ସାଙ୍ଗକୁ ମୁଆଁ ଭୋଗ ମହାପ୍ରଭୁ ଲିଙ୍ଗରାଜଙ୍କ ରଥଯାତ୍ରାର ସ୍ୱତନ୍ତ୍ରତା। ରଥଦାଣ୍ଡ ଦେଇ ପ୍ରଭୁ ଯିବା ବେଳେ ଶ୍ରଦ୍ଧାଳୁମାନେ ମୁଆଁ ଭୋଗ କରନ୍ତି। ମୋ ଜୀବନକାଳ ମଧ୍ୟରେ କେବେ ହେଲେ ଏହି ଭୋଗ ଅର୍ପଣରେ ବ୍ୟତିକ୍ରମ କରିନାହିଁ। ଏହା ଆମ ପରିବାରର ଏକ ପରମ୍ପରା ଭଳି।

ବରାଦୀ ଭୋଗର ରହିଛି ଲମ୍ବା ତାଲିକା
ମହାପ୍ରଭୁଙ୍କର ଅଷ୍ଟ ନୈବେଦ୍ୟ ଭୋଗଗୁଡ଼ିକ ପ୍ରତ୍ୟହ କରାଯାଇଥାଏ। ମହାପ୍ରଭୁଙ୍କ ନୀତିକାନ୍ତି ଅନୁସାରେ ଏହି ବ୍ୟଞ୍ଜନ ଲାଗି ହେବା ବାଧ୍ୟତାମୂଳକ। ଏଣୁ ଏହାକୁ କୋଠଭୋଗ ବୋଲି କୁହାଯାଏ। ଏହା ବ୍ୟତୀତ ବରାଦୀ ଭୋଗ ମଧ୍ୟ ରହିଛି। ବରାଦୀ ଭୋଗରେ ଅନେକ ବ୍ୟଞ୍ଜନ ପ୍ରସ୍ତୁତ ହୋଇ ମହାପ୍ରଭୁଙ୍କ ନିକଟରେ ଭୋଗ ଲାଗିଥାଏ। ଏହି ବରାଦୀ ଭୋଗକୁ ଶ୍ରଦ୍ଧାଳୁମାନେ ବଡ଼ ଧରଣରେ ଖରିଦ କରି ନିଅନ୍ତି। କୋଠଭୋଗ କମ୍‌‌ ପରିମାଣରେ କରାଯାଉଥିବା ବେଳେ ବରାଦୀ ଭୋଗ ଭକ୍ତଙ୍କ ଚାହିଦା ଓ ଆଗମନକୁ ଦୃଷ୍ଟିରେ ରଖି କରାଯାଇଥାଏ। ସାଧାଅନ୍ନ, ମିଷ୍ଟାନ୍ନ, କାନିକା, ମିଠା ଡାଲି, ବେସର, ମହୁର, ଡାଲେମା, ସୋଲା, ପୋଟଳ ରଶା, ଲେମନ୍‌‌ ରାଇସ୍‌‌, ହବିଷ ଡାଲି, ଖଜୁରୀ ଖଟା ଓ ଆମ୍ବ ଖଟା ଭଳି ୫୦ ପ୍ରକାରର ବ୍ୟଞ୍ଜନ ରହିଛି। ଦିନକୁ ଦିନ ବରାଦି ଭୋଗର ତାଲିକା ବଢ଼ିବାରେ ଲାଗିଛି।

ପ୍ରତ୍ୟହ ଆନନ୍ଦବଜାରରେ ମହାପ୍ରସାଦ ପାଆନ୍ତି ୨ ହଜାର ଶ୍ରଦ୍ଧାଳୁ
ପ୍ରତ୍ୟହ ଲିଙ୍ଗରାଜ ମନ୍ଦିରରେ ଆନୁମାନିକ ୨ ହଜାର ଶ୍ରଦ୍ଧାଳୁଙ୍କ ପାଇଁ ଅବଢ଼ା ପ୍ରସ୍ତୁତ ହୁଏ। ବରାଦ ଅଧିକ ଥିଲେ ଏହାଠାରୁ ଅଧିକ ପ୍ରସ୍ତୁତ କରାଯାଏ। ଯାନିଯାତ ସମୟରେ ଅଧିକ ମହାପ୍ରସାଦ ପ୍ରସ୍ତୁତ ହୋଇଥାଏ। ସେହିଭଳି ଆନନ୍ଦବଜାରରେ ସୋମବାର ଓ ସଂକ୍ରାନ୍ତିରେ ଅଧିକ ଗହଳି ଦେଖିବାକୁ ମିଳେ। ଏହାକୁ ଦୃଷ୍ଟିରେ ରଖି ସୁଆରମାନେ ଅତିରିକ୍ତ ଭୋଗ ଲାଗି କରିଥାଆନ୍ତି।

ଶ୍ରୀମନ୍ଦିର ଭଳି ଲିଙ୍ଗରାଜ ମନ୍ଦିରରେ ମଧ୍ୟ ଅବଢ଼଼ାର ଦର ନିର୍ଦ୍ଧାରଣ ହୋଇପାରୁ ନାହିଁ। ଶ୍ରୀଲିଙ୍ଗରାଜ ମନ୍ଦିର ସେବାୟତମାନଙ୍କ କହିବା କଥା ଯେ ଅବଢ଼ାର ଦର ନିର୍ଦ୍ଧାରଣ ଅବଢ଼ାକୁ ଅପମାନ ସଦୃଶ। ଏହା ମହାପ୍ରଭୁଙ୍କ ମହାପ୍ରସାଦ। ଧନୀ, ଗରିବ ସମସ୍ତେ ଏହାକୁ ପାଇ ପାରିବେ। ଏକ ଦର ଭିତରେ ଏହାକୁ ବାନ୍ଧି ରଖିବା ଉଚିତ୍‌‌ ନୁହେଁ। ମହାପ୍ରସାଦ କାହାରିକୁ ମନା କରାଯାଏ ନାହିଁ।

ମହାପ୍ରଭୁଙ୍କ ବ୍ୟଞ୍ଜନ ପ୍ରସ୍ତୁତ କରିବା ଏକ ଅପୂର୍ବ ଆନନ୍ଦ
ମହାପ୍ରଭୁଙ୍କ ସୁଆର ସେବାୟତମାନେ ବ୍ୟଞ୍ଜନ ପ୍ରସ୍ତୁତ କରିଥାଆନ୍ତି। ପାରମ୍ପରିକ ଭାବେ ୩୬୫ ଘର ବ୍ରାହ୍ମଣ ନିଯୋଗ ସମିତି ଅଧୀନରେ ୧୮ ସେବାୟତ ବର୍ଗ ରହିଥିବା ବେଳେ ସୁଆର-ମହାସୁଆର ନିଯୋଗ ଏହି ନିଯୋଗ ଅନ୍ତର୍ଗତ। ସମ୍ପ୍ରତି ସୁଆର-ମହାସୁଆର ସେବାୟତଙ୍କ ସଂଖ୍ୟା ବଢ଼଼ି କରି ୫ଶହରେ ପହଞ୍ଚିଲାଣି। ମହାପ୍ରଭୁଙ୍କ ବ୍ୟଞ୍ଜନ ପ୍ରସ୍ତୁତର ସୁଯୋଗ ମିଳିଥିବା ହେତୁ ମୁଁ ଗର୍ବିତ। ମହାପ୍ରଭୁଙ୍କ ସେବାରେ ଯେଉଁ ଆତ୍ମସନ୍ତୋଷ ତାହ ସର୍ବଦା ଅତୁଳନୀୟ। ପିଢ଼ି ପରେ ପିଢ଼ି ଆମେ ଏହି ଦାୟିତ୍ୱ ସମ୍ପାଦନ କରିଆସୁଛି। କୋଠ ଭୋଗ ସମେତ ବରାଦୀ ଭୋଗ ପ୍ରସ୍ତୁତ କରୁଛୁ। କୋଠ ଭୋଗ ସଦାସର୍ବଦା ନିର୍ଦ୍ଧାରିତ ହୋଇଥିବାବେଳେ ବରାଦୀ ଭୋଗ ଚାହିଦାକୁ ଦେଖି ବନାଉଛି।
-ଶିବ ପ୍ରସାଦ ମହାପାତ୍ର, ସେବକ

ଭୁବନେଶ୍ୱର: ବହୁ ବାଦବିବାଦ ପରେ ସମ୍ପନ୍ନ ହେଲା ଦେବଦମ୍ପତିଙ୍କ ବିବାହ। ସଜ ମଙ୍ଗଳକୃତ୍ୟକୁ ସଜ ବାହା। ପ୍ରଶାସନର ଚେଷ୍ଟା ଫଳରେ ଜାରି ରହିଲା ପରମ୍ପରା। ପଡ଼ିଲା ଦେବଦମ୍ପତିଙ୍କ ହାତଗଣ୍ଠି। ନିର୍ଦ୍ଧାରିତ ସମୟରେ ନୀତିକାନ୍ତି କରାଯିବା ସହ ମହାପ୍ରଭୁ ଲିଙ୍ଗରାଜ ବିରାଟ ଶୋଭାଯାତ୍ରାରେ କେଦାର ଗୌରୀ ମନ୍ଦିରରେ ପହଞ୍ଚିଛନ୍ତି । ଆଜି ବିବାହ ଉତ୍ସବ ସରିବା ପରେ ମାତା ପାର୍ବତୀଙ୍କୁ ସାଙ୍ଗରେ ଧରି ମନ୍ଦିରକୁ ଫେରିବେ ମହାପ୍ରଭୁ ଲିଙ୍ଗରାଜ ।

୨୦୧୫ ମସିହାରୁ ଲାଗି ରହିଥିବା ବିବାଦ ନେଇ ଆଲୋଚନା ଓ ପର୍ଯ୍ୟାଲୋଚନା ପରେ ବହୁ ବିଳମ୍ବରେ ବିବାହ ନିଷ୍ପତ୍ତି ହୋଇଥିଲା। ଶନିବାର ଶ୍ରୀଲିଙ୍ଗରାଜଙ୍କର ସଜ ମଙ୍ଗଳକୃତ୍ୟ ସମ୍ପନ୍ନ କରାଯିବାପରେ ବିବାହ ରୀତିନୀତି ଆରମ୍ଭ ହୋଇଥିଲା। ଶୁକ୍ରବାର ଲିଙ୍ଗରାଜଙ୍କର ମଙ୍ଗଳ କୃତ୍ୟ ହେବାକୁ ଥିବାବେଳେ ବ୍ରାହ୍ମଣ ନିଯୋଗ ଓ ପୂଜାପଣ୍ଡା ନିଯୋଗଙ୍କ ଅସହଯୋଗ କାରଣରୁ ସେଥିରେ ବାଧା ସୃଷ୍ଟି ହୋଇଥିଲା। ଏଥିପାଇଁ ଲିଙ୍ଗରାଜ ମନ୍ଦିର ଟ୍ରଷ୍ଟ ସଦସ୍ୟ ଓ ଭୁବନେଶ୍ୱର ଉପଜିଲ୍ଲାପାଳ ସତ୍ୟବ୍ରତ ସାହୁଙ୍କ ଅଧ୍ୟକ୍ଷତାରେ କପିଳେଶ୍ୱର ମନ୍ଦିରର ମଲିଆ ଓ ଖୁଣ୍ଟିଆ ସେବାୟତ ପ୍ରତିନିଧିଙ୍କୁ ନେଇ ବୈଠକ ହୋଇଥିଲା।

୨୦୧୫ ମସିହାରୁ ଲିଙ୍ଗରାଜଙ୍କ ବିବାହରେ ଯୋଗ ଦେଉନଥିବା କପିଳେଶ୍ୱର ବାବାଙ୍କୁ ଲିଙ୍ଗରାଜ ମନ୍ଦିରକୁ ଆଣିବା ପାଇଁ ରାଜି ହୋଇଥିଲେ। ମାତ୍ର ପରବର୍ତ୍ତୀ ସମୟରେ ବ୍ରାହ୍ମଣ ନିଯୋଗ ଓ ପୂଜାପଣ୍ଡା ନିଯୋଗଙ୍କ ବୈଠକରେ କପିଳେଶ୍ୱରଙ୍କ ଆଗମନ ନେଇ ବିବାଦ ଲାଗିରହିଲା। ହାଇକୋର୍ଟଙ୍କ ନିର୍ଦ୍ଦେଶ କାର୍ଯ୍ୟକାରୀ ନେଇ ଜିଦ୍‍ରେ ଅଟଳ ରହିଲେ ବ୍ରାହ୍ମଣ ଓ ପୂଜାପଣ୍ଡା ନିଯୋଗ। ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କ ହସ୍ତକ୍ଷେପ ପରେ ଶେଷରେ ଶ୍ରୀଲିଙ୍ଗରାଜଙ୍କ ଶିବବିବାହ ପାଇଁ ନୀତିକାନ୍ତି ଆରମ୍ଭ ହୋଇଥିଲା। ରାତି ୧୦ଟା ପରେ କପିଳନାଥ ବିଜେ କରିଥିଲେ। ଏହାପରେ ବଡ଼ସିଂହାର, ପଞ୍ଚବକ୍ର ବିଜେ, ପୁଷ୍ପାଞ୍ଜଳି ଓ ପହୁଡ଼ ନୀତିକାନ୍ତି କରାଯାଇଥିଲା। ଏଥିପାଇଁ ମନ୍ଦିର ମଧ୍ୟରେ ବରଯାତ୍ରୀଙ୍କ ପାଇଁ ଭୋଜିର ବ୍ୟବସ୍ଥା କରାଯାଇଥିଲା। ବିଳମ୍ବିତ ରାତିରେ ଶୋଭାଯାତ୍ରାରେ ବରାନୁଗମନ କରିଥିଲେ। ରୀତିନୀତି ଅନୁଯାୟୀ କେଦାରଗୌରୀ ମନ୍ଦିରରେ ରାତି ୧୨ଟାରୁ ଭୋର ପର୍ଯ୍ୟନ୍ତ ଦେବ ଦମ୍ପତିଙ୍କ ବିବାହ ଉତ୍ସବ ଅନୁଷ୍ଠିତ ହୋଇଥିଲା।

ସେହିପରି ଶୀତଳଷଷ୍ଠୀ ଫେରନ୍ତା ରୋଷଣୀ ଶୋଭାଯାତ୍ରା ପାଇଁ ପ୍ରସ୍ତୁତି ହୋଇଛି। ଆଜି ବାଜା, ବାଣ, ରୋଷଣୀ ସହିତ ପ୍ରତ୍ୟାବର୍ତ୍ତନ କରିବେ ଦମ୍ପତି। ସକାଳ ମଙ୍ଗଳ ଆଳତୀ, ଅବକାଶ ଆଦି ନୀତିକାନ୍ତି କରାଯିବାପରେ ସନ୍ଧ୍ୟାରେ ନୀତିକାନ୍ତି କରାଯିବ। ରାତି ୯ଟାରେ କେଦାର ଗୌରୀ ମନ୍ଦିରରୁ ବିଜେ କରିବେ ଶ୍ରୀଜୀଉ। ଏଥିପାଇଁ ଶୀତଳ ଷଷ୍ଠୀରେ ପାରମ୍ପରିକ ଲୋକ ବାଦ୍ୟଯନ୍ତ୍ର ବ୍ୟବହାର କରାଯାଇଥିଲା। ଦୁଇ ସେବାୟତ ନିଯୋଗଙ୍କ ଅଭିଯୋଗକୁ ଆସନ୍ତା ୧୭ତାରିଖରେ ସମାଧାନ କରାଯିବ ବୋଲି ବ୍ରାହ୍ମଣ ନିଯୋଗ ବିରଞ୍ଚିନାରାୟଣ ପତି ସୂଚନା ଦେଇଛନ୍ତି। ଏଥିରେ ପୂଜା ପଣ୍ଡା ଓ ବ୍ରାହ୍ମଣ ନିଯୋଗ ଯୋଗ ଦେଇଥିଲେ।