ମହାରାଷ୍ଟ୍ରର ରାଜଧାନୀ ମୁମ୍ବାଇ ସ୍ଥିତ ଛତ୍ରପତି ଶିବାଜୀ ମହାରାଜ ଆନ୍ତର୍ଜାତୀୟ ବିମାନବନ୍ଦରରେ (ଟି-୨) ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଜଣେ ଯାତ୍ରୀଙ୍କର ଏକ ଛୋଟିଆ ମଜାଳିଆ କଥା ସୁରକ୍ଷା କର୍ମୀଙ୍କ ହୋସ୍ ଉଡ଼ାଇ ଦେଇଥିଲା। ସୁରକ୍ଷା ଯାଞ୍ଚ ସମୟରେ ଯାତ୍ରୀ ଜଣକ ନିଜ ବ୍ୟାଗରେ ବୋମା ଥିବା କହିବା ପରେ ବିମାନବନ୍ଦରରେ ଆତଙ୍କ ଖେଳିଯାଇଥିଲା। ଏହି କାରଣରୁ ଉଡ଼ାଣ ଭରିବା ପାଇଁ ପ୍ରସ୍ତୁତ ଥିବା ଏକ ଇଣ୍ଡିଗୋ ବିମାନକୁ ତୁରନ୍ତ ରୋକିବାକୁ ପଡ଼ିଥିଲା।

କିପରି ଘଟିଲା ଘଟଣା?

ସୂଚନା ଅନୁଯାୟୀ, ଗତ ଅଗଷ୍ଟ ୯ ତାରିଖ ଦିନ ମୁମ୍ବାଇରୁ ଦିଲ୍ଲୀ ଯିବାକୁ ଥିବା ଏକ ଇଣ୍ଡିଗୋ ଏୟାରଲାଇନ୍ସ ଫ୍ଲାଇଟ୍ ଉଡ଼ାଣ ଭରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲା। ଟର୍ମିନାଲ୍-୨ ର ବୋର୍ଡିଂ ଗେଟ୍ ନିକଟରେ ସୁରକ୍ଷା ଯାଞ୍ଚ ଚାଲିଥିବା ବେଳେ ଜଣେ ଯାତ୍ରୀ ହଠାତ୍ କହିଥିଲେ ଯେ ତାଙ୍କ ବ୍ୟାଗରେ ଏକ ବୋମା ଅଛି। ଯାତ୍ରୀଙ୍କ ମୁହଁରୁ ଏହି ପଦକ କଥା ଶୁଣିବା ମାତ୍ରେ ସେଠାରେ ଉପସ୍ଥିତ ଥିବା ସୁରକ୍ଷା କର୍ମୀ ଏବଂ ଏୟାରଲାଇନ୍ସ କର୍ମଚାରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ବିମାନବନ୍ଦରରେ ତୁରନ୍ତ ଆଫ୍ରାତଫ୍ରି ସ୍ଥିତି ଉପୁଜିବା ସହ ଉକ୍ତ ଦିଲ୍ଲୀଗାମୀ ବିମାନକୁ ଅଟକା ଯାଇଥିଲା।

ସିଆଇଏସଏଫ୍ ଦ୍ୱାରା ଅଟକ ଓ ଯାଞ୍ଚ

ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ସୁରକ୍ଷା ଏଜେନ୍ସିଗୁଡ଼ିକୁ ତୁରନ୍ତ ଆଲର୍ଟ କରାଯାଇଥିଲା। କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଏଫ୍) ଯବାନମାନେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଉକ୍ତ ଅଭିଯୁକ୍ତ ଯାତ୍ରୀଙ୍କୁ ହେପାଜତକୁ ନେଇଥିଲେ। ଏହାପରେ ବିମାନ ଏବଂ ଉକ୍ତ ଯାତ୍ରୀଙ୍କ ବ୍ୟାଗକୁ ବ୍ୟାପକ ଭାବେ ଯାଞ୍ଚ କରାଯାଇଥିଲା। ତେବେ ଟିକିନିଖି ଯାଞ୍ଚ ପରେ ସେଥିରୁ କୌଣସି ସନ୍ଦିଗ୍ଧ ବସ୍ତୁ କିମ୍ବା ବୋମା ମିଳିନଥିଲା। ଏହା କେବଳ ଏକ ଦାୟିତ୍ୱହୀନ ମଜା ଥିଲା ବୋଲି ପରେ ସ୍ପଷ୍ଟ ହୋଇଥିଲା।

ଦାୟିତ୍ୱହୀନ ଆଚରଣ ଯୋଗୁଁ ହଇରାଣ

ବିମାନବନ୍ଦର କର୍ତ୍ତୃପକ୍ଷ ଏବଂ ସୁରକ୍ଷା ବଳଙ୍କ କହିବା ଅନୁଯାୟୀ, ସୁରକ୍ଷା ପ୍ରସଙ୍ଗରେ ଏଭଳି ଦାୟିତ୍ୱହୀନ ମଜା କରିବା ଆଦୌ ଗ୍ରହଣୀୟ ନୁହେଁ। ଏହାଦ୍ୱାରା କେବଳ ସୁରକ୍ଷା ବ୍ୟବସ୍ଥାରେ ବାଧା ଉପୁଜେ ନାହିଁ, ବରଂ ଅନ୍ୟ ଶହ ଶହ ଯାତ୍ରୀଙ୍କୁ ମଧ୍ୟ ହଇରାଣ ହେବାକୁ ପଡ଼ିଥାଏ। ସୁରକ୍ଷା ଯାଞ୍ଚ ପ୍ରକ୍ରିୟା ଶେଷ ହେବା ପରେ ଏବେ ଉକ୍ତ ଯାତ୍ରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ସୂଚନା ମିଳିଛି। ଏହି ଘଟଣା ପ୍ରମାଣିତ କରୁଛି ଯେ ବିମାନବନ୍ଦର ଭଳି ସମ୍ବେଦନଶୀଳ ସ୍ଥାନରେ କୌଣସି ପ୍ରକାର ମଜାଳିଆ ମନ୍ତବ୍ୟ ମହଙ୍ଗା ପଡ଼ିପାରେ।

ପଞ୍ଜାବର ପୂର୍ବତନ ଉପମୁଖ୍ୟମନ୍ତ୍ରୀ ତଥା ଶିରୋମଣି ଅକାଳୀ ଦଳ (SAD)ର ସଭାପତି ସୁଖବୀର ସିଂହ ବାଦଲଙ୍କ ଉପରେ ମହାରାଷ୍ଟ୍ରର ନାନ୍ଦେଡ଼ ସାହିବ ଗୁରୁଦ୍ୱାର ନିକଟରେ ଏକ ମାରଣାସ୍ତ୍ର (କୃପାଣ) ଯୋଗେ ଆକ୍ରମଣ କରାଯାଇଛି। ଗୁରୁବାର (ଅଗଷ୍ଟ ୧୩) ଦିନ ଘଟିଥିବା ଏହି ଘଟଣାରେ ସେ ଆହତ ହୋଇଛନ୍ତି ଏବଂ ତାଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଛି।

ଗୁରୁଦ୍ୱାର ଦର୍ଶନ ସମୟରେ ଅଘଟଣ

ସୂଚନା ଅନୁଯାୟୀ, ସୁଖବୀର ସିଂହ ବାଦଲ ନିଜ ପରିବାର ଏବଂ ପତ୍ନୀ ତଥା ସାଂସଦ ହରସିମରତ କୌର ବାଦଲଙ୍କ ସହ ଏକ ବ୍ୟକ୍ତିଗତ ଗସ୍ତରେ ମହାରାଷ୍ଟ୍ର ଯାଇଥିଲେ। ସେମାନେ ନାନ୍ଦେଡ଼ ସ୍ଥିତ ଗୁରୁଦ୍ୱାର ମାତା ସାହିବ କୌର ଦର୍ଶନ ପାଇଁ ଯାଇଥିବା ବେଳେ ଜଣେ ଅଜ୍ଞାତ ବ୍ୟକ୍ତି ନିହଙ୍ଗ ଶିଖ୍ ବେଶରେ ଆସି ତାଙ୍କ ଉପରେ କୃପାଣରେ ଆକ୍ରମଣ କରିଥିଲେ।

ସୁରକ୍ଷାକର୍ମୀଙ୍କ ହସ୍ତକ୍ଷେପ ଏବଂ ଚିକିତ୍ସା

ଆକ୍ରମଣ ସମୟରେ ବାଦଲଙ୍କ ସୁରକ୍ଷା ଦାୟିତ୍ୱରେ ଥିବା ବ୍ୟକ୍ତିଗତ ସୁରକ୍ଷା ଅଧିକାରୀ (PSO) ତୁରନ୍ତ ହସ୍ତକ୍ଷେପ କରି ଆକ୍ରମଣକାରୀଙ୍କୁ ଅଟକାଇଥିଲେ। ସୁରକ୍ଷାକର୍ମୀଙ୍କ ଉପସ୍ଥିତ ବୁଦ୍ଧି ଯୋଗୁଁ ଏକ ବଡ଼ ଧରଣର ବିପଦ ଟଳିଯାଇଛି। ଏହି ଆକ୍ରମଣରେ ବାଦଲଙ୍କ ଡାହାଣ ହାତରେ ଆଘାତ ଲାଗିଥିବା ବେଳେ ପିଏସଓ ମଧ୍ୟ ଆହତ ହୋଇଛନ୍ତି। ବର୍ତ୍ତମାନ ବାଦଲଙ୍କୁ ଏକ ଘରୋଇ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ଏବଂ ସେ ବିପଦମୁକ୍ତ ଥିବା ଜଣାପଡ଼ିଛି। ଘଟଣାସ୍ଥଳରୁ ଆକ୍ରମଣକାରୀଙ୍କୁ ଅଟକ ରଖାଯାଇ ପଚରାଉଚରା କରାଯାଉଛି।

ମୁଖ୍ୟମନ୍ତ୍ରୀଙ୍କ ତଦନ୍ତ ନିର୍ଦ୍ଦେଶ ଓ ଅତୀତର ଘଟଣା

ଏହି ଘଟଣାକୁ ନେଇ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନବୀସ ଗଭୀର ଉଦ୍‌ବେଗ ପ୍ରକାଶ କରିବା ସହ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ପ୍ରକାଶ ଥାଉ କି, ଏହାର କିଛି ସମୟ ପୂର୍ବରୁ ଅର୍ଥାତ୍ ଡିସେମ୍ବର ୨୦୨୪ରେ ଅମୃତସର ସ୍ଥିତ ସ୍ୱର୍ଣ୍ଣ ମନ୍ଦିର ବାହାରେ ମଧ୍ୟ ସୁଖବୀର ସିଂହ ବାଦଲଙ୍କ ଉପରେ ଏକ ପ୍ରାଣଘାତୀ ଆକ୍ରମଣ ହୋଇଥିଲା। ସେହି ସମୟରେ ପୂର୍ବତନ ଆତଙ୍କବାଦୀ ନାରାୟଣ ସିଂହ ଚୌରା ତାଙ୍କ ଉପରକୁ ଗୁଳି ଚଳାଇଥିଲେ, କିନ୍ତୁ ସୁରକ୍ଷାକର୍ମୀଙ୍କ ତତ୍ପରତା ଯୋଗୁଁ ସେ ଅଳ୍ପକେ ବର୍ତ୍ତି ଯାଇଥିଲେ।

ମହାରାଷ୍ଟ୍ରର ନାଗପୁରଠାରେ ଏକ ଅତ୍ୟନ୍ତ ଅଭାବନୀୟ ତଥା ହୃଦୟ ବିଦାରକ ଘଟଣା ଦେଖିବାକୁ ମିଳିଛି। ରିପୋର୍ଟ ଅନୁଯାୟୀ, ଜଣେ ବ୍ୟକ୍ତି ନିଜର ବାନ୍ଧବୀଙ୍କୁ ନଦୀକୁ ଫିଙ୍ଗି ଦେଇଛନ୍ତି। ଫ୍ରେଣ୍ଡସିପ୍ ଡେ ବା ବନ୍ଧୁତା ଦିବସର ଉପହାର ଏବଂ ବିବାହ ପ୍ରସ୍ତାବକୁ ନେଇ ଉଭୟଙ୍କ ମଧ୍ୟରେ ହୋଇଥିବା ବିବାଦ ଶେଷରେ ଏହିଭଳି ଏକ ଭୟଙ୍କର ରୂପ ନେଇଛି।

ଉପହାର ଓ ବିବାହକୁ ନେଇ ବିବାଦ

ସୂଚନା ଅନୁଯାୟୀ, ଉଭୟ ଯୁବକ ଓ ଯୁବତୀ ଫ୍ରେଣ୍ଡସିପ୍ ଡେ ପାଳନ କରିବା ପାଇଁ ଏକାଠି ବୁଲିବାକୁ ଯାଇଥିଲେ। ସେଠାରେ ଯୁବତୀଜଣକ ଏକ ସ୍ୱତନ୍ତ୍ର ଉପହାର ମାଗିବା ସହ ବିବାହ କରିବା ପାଇଁ ଯୁବକଙ୍କ ଉପରେ ଚାପ ପକାଇଥିଲେ। ଏହି କଥାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା। କଥା କଟାକଟି ଏତେ ମାତ୍ରାରେ ବଢ଼ିଯାଇଥିଲା ଯେ, ରାଗିଯାଇ ଯୁବକଜଣକ ତାଙ୍କ ବାନ୍ଧବୀଙ୍କୁ ସେଠାରେ ଥିବା ଏକ ନଦୀ ମଧ୍ୟକୁ ଠେଲି ଦେଇଥିଲେ।

ପୋଲିସର ତଦନ୍ତ ଜାରି

ଘଟଣାସ୍ଥଳରେ ଉପସ୍ଥିତ ଥିବା ସ୍ଥାନୀୟ ଲୋକେ ତୁରନ୍ତ ଏ ସମ୍ପର୍କରେ ପୋଲିସକୁ ଖବର ଦେଇଥିଲେ। ଖବର ପାଇ ନାଗପୁର ପୋଲିସ ଘଟଣାସ୍ଥଳରେ ପହଞ୍ଚିବା ସହ ଯୁବତୀଙ୍କୁ ଉଦ୍ଧାର କରିବା ପାଇଁ ତଲାସି ଅଭିଯାନ ଆରମ୍ଭ କରିଛି। ଏହା ସହିତ ଅଭିଯୁକ୍ତ ଯୁବକଙ୍କୁ ଅଟକ ରଖି ଘଟଣାର ଅଧିକ ଖୋଳତାଡ଼ ଜାରି ରଖିଛି। ବର୍ତ୍ତମାନ ସୁଦ୍ଧା ଯୁବତୀଙ୍କର କୌଣସି ସ୍ପଷ୍ଟ ପତ୍ତା ମିଳିପାରି ନାହିଁ, ଯାହା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।

ମହାରାଷ୍ଟ୍ରର ଥାଣେ ଜିଲ୍ଲା ଅନ୍ତର୍ଗତ ଭିୱାଣ୍ଡି (Bhiwandi) ଅଞ୍ଚଳରେ ଏକ ବଡ଼ ଧରଣର ଅଘଟଣ ଘଟିଛି। ଗୁରୁବାର ବିଳମ୍ବିତ ରାତିରେ ଏକ ୪ ମହଲା ବିଶିଷ୍ଟ କୋଠା ଭୁଶୁଡ଼ି ପଡ଼ିବାରୁ ଅତି କମରେ ୯ ଜଣଙ୍କର ମୃତ୍ୟୁ ଘଟିଛି। ଏହି ଦୁର୍ଘଟଣାରେ ଅନେକ ଲୋକ ଫସି ରହିଥିବା ଆଶଙ୍କା କରାଯାଉଛି ଏବଂ ଉଦ୍ଧାର କାର୍ଯ୍ୟ ଜୋରଦାର ଚାଲିଛି।

ଅସୁରକ୍ଷିତ ଥିଲା କୋଠା

ସୂଚନା ଅନୁଯାୟୀ, ବାଲାଜୀ ନଗରରେ ଥିବା ଏହି ୪ ମହଲା ବିଶିଷ୍ଟ 'କୋହିନୂର ବିଲ୍ଡିଂ (Kohinoor Building)'କୁ ଭିୱାଣ୍ଡି-ନିଜାମପୁର ମହାନଗର ନିଗମ (ବିଏନଏମସି) ପକ୍ଷରୁ ପୂର୍ବରୁ ଅସୁରକ୍ଷିତ ଘୋଷଣା କରାଯାଇଥିଲା। ଏହି ବିପଦପୂର୍ଣ୍ଣ କୋଠାରେ ମରାମତି କାର୍ଯ୍ୟ ଚାଲିଥିବା ବେଳେ ଏହା ହଠାତ୍ ଭୁଶୁଡ଼ି ପଡ଼ିଥିଲା। ବିଲ୍ଡିଂର ପ୍ରତ୍ୟେକ ମହଲାରେ ୧୨ଟି ଲେଖାଏଁ ମୋଟ ୪୮ଟି ରୁମ୍ ରହିଥିଲା।

ଛାତିଥରା ଘଟଣାକ୍ରମ

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଗୁରୁବାର ରାତି ପ୍ରାୟ ୮ଟାରୁ ୯ଟା ମଧ୍ୟରେ କୋଠାରୁ ଜୋରରେ ଫାଟିବାର ଶବ୍ଦ ଶୁଭିଥିଲା। ବିପଦର ଆଶଙ୍କା କରି ସ୍ଥାନୀୟ ଲୋକେ ଅନେକ ପରିବାରକୁ ତୁରନ୍ତ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିଲେ। ତେବେ ରାତି ପ୍ରାୟ ୧୧ଟାରୁ ୧୧.୩୦ ମଧ୍ୟରେ ଉକ୍ତ ବିଲ୍ଡିଂର 'ବି' ୱିଙ୍ଗ୍ (B Wing)ର ଏକ ଅଂଶ ଭୁଶୁଡ଼ି ପଡ଼ିଥିଲା। ସେତେବେଳେ କିଛି ଲୋକ ବାହାରକୁ ଆସିବାକୁ ପ୍ରୟାସ କରୁଥିଲେ।

ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ

ଦୁର୍ଘଟଣାସ୍ଥଳରେ ଜାତୀୟ ବିପର୍ଯ୍ୟୟ ମୁକାବିଲା ବଳ (ଏନଡିଆରଏଫ୍), ଭିୱାଣ୍ଡି ଅଗ୍ନିଶମ ବାହିନୀ ଏବଂ ଭୋଇୱାଡ଼ା ପୋଲିସ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଭଗ୍ନାବଶେଷ ତଳୁ ୯ ଜଣଙ୍କର ମୃତଦେହ ଉଦ୍ଧାର କରାଯାଇଥିବା ବେଳେ ଆହୁରି ଅନେକ ଲୋକ ଚାପି ହୋଇ ରହିଥିବା ସନ୍ଦେହ କରାଯାଉଛି। ନିଖୋଜ ଥିବା ବ୍ୟକ୍ତିଙ୍କ ମଧ୍ୟରେ ଶ୍ୟାମଜୀ ପାଲ (୪୬), ସନ୍ତୋଷ ପାଣ୍ଡେ ଓରଫ ମୁନ୍ନା (୪୨) ଏବଂ ମିରାଜ ଶେଖ (୩୫) ପ୍ରମୁଖ ରହିଛନ୍ତି। ଥାଣେ ଜିଲ୍ଲାପାଳଙ୍କ କାର୍ଯ୍ୟାଳୟ ସୂଚନା ମୁତାବକ, ତାଲିମପ୍ରାପ୍ତ ସନ୍ଧାନୀ କୁକୁର, ଆମ୍ବୁଲାନ୍ସ ଏବଂ ଜେସିବି ମେସିନ ସାହାଯ୍ୟରେ ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରାଯାଇଛି।

ସାରା ଦେଶରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ସକ୍ରିୟ ରହିଥିବା ବେଳେ ଅନେକ ରାଜ୍ୟରେ ବର୍ଷା ଓ ବନ୍ୟା ପରିସ୍ଥିତି ଭୟାବହ ରୂପ ନେଇଛି। ଲଗାଣ ବର୍ଷା ଯୋଗୁଁ ଗୁଜରାଟ, ମହାରାଷ୍ଟ୍ର, ଜମ୍ମୁ-କାଶ୍ମୀର ଏବଂ ଉତ୍ତରାଖଣ୍ଡରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ନଦୀଗୁଡ଼ିକର ଜଳସ୍ତର ବୃଦ୍ଧି ପାଇବା ସହ ଅନେକ ସ୍ଥାନରେ ଭୂସ୍ଖଳନ ଓ ହଠାତ୍ ବନ୍ୟା ଦେଖିବାକୁ ମିଳିଛି। ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ଆଗାମୀ କିଛି ଦିନ ପାଇଁ ବିଭିନ୍ନ ରାଜ୍ୟକୁ ସତର୍କ ସୂଚନା ଜାରି କରାଯାଇଛି।

ଗୁଜରାଟ ଏବଂ ମହାରାଷ୍ଟ୍ରରେ ପ୍ରବଳ ବର୍ଷା

ଗୁଜରାଟ ଏବଂ ମହାରାଷ୍ଟ୍ରରେ ଲଗାଣ ବର୍ଷା ଯୋଗୁଁ ସ୍ଥିତି ସଙ୍ଗିନ ହୋଇପଡ଼ିଛି। ଗୁଜରାଟର ଭଲସାଡ ଜିଲ୍ଲାରେ ଗତ ୨୪ ଘଣ୍ଟା ମଧ୍ୟରେ ପ୍ରାୟ ୯୦୦ ମିଲିମିଟର (୩୬ ଇଞ୍ଚ) ବର୍ଷା ରେକର୍ଡ କରାଯାଇଛି, ଯାହା ଫଳରେ ବ୍ୟାପକ ଅଞ୍ଚଳ ଜଳମଗ୍ନ ହୋଇଛି। ପ୍ରଶାସନ ପକ୍ଷରୁ ସ୍କୁଲ ଓ କଲେଜଗୁଡ଼ିକୁ ବନ୍ଦ ରଖାଯାଇଥିବା ବେଳେ ୨୦୦ରୁ ଊର୍ଦ୍ଧ୍ୱ ଲୋକଙ୍କୁ ଉଦ୍ଧାର କରାଯାଇ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ମହାରାଷ୍ଟ୍ରର କୋଙ୍କଣ ଅଞ୍ଚଳ ଓ ମୁମ୍ବାଇ ସମେତ ବିଭିନ୍ନ ସ୍ଥାନରେ ପ୍ରବଳ ବର୍ଷା ଯୋଗୁଁ ଯାତାୟାତ ପ୍ରଭାବିତ ହୋଇଛି। ପାଣିପାଗ ବିଭାଗ ଉଭୟ ରାଜ୍ୟ ପାଇଁ ରେଡ୍ ଆଲର୍ଟ ଜାରି କରିଛି।

ଜମ୍ମୁ-କାଶ୍ମୀର ଓ ଉତ୍ତରାଖଣ୍ଡରେ ବିପର୍ଯ୍ୟୟ

ପାର୍ବତ୍ୟାଞ୍ଚଳ ରାଜ୍ୟଗୁଡ଼ିକରେ ମଧ୍ୟ ବର୍ଷାର ପ୍ରକୋପ ଜାରି ରହିଛି। ଜମ୍ମୁ-କାଶ୍ମୀରର ପୁଞ୍ଚ୍ ଏବଂ ରାଜୌରୀ ଜିଲ୍ଲାରେ ହଠାତ୍ ବନ୍ୟା ଓ ଭୂସ୍ଖଳନ ଯୋଗୁଁ ଅନେକ କ୍ଷୟକ୍ଷତି ଘଟିଛି। ବନ୍ୟାରେ ରାସ୍ତାଘାଟ ଧୋଇଯିବା ସହ ଘରଦ୍ୱାର ଭାଙ୍ଗିଯାଇଛି ଏବଂ ଅନେକ ଲୋକ ନିଖୋଜ ଥିବା ସୂଚନା ମିଳିଛି। ଉଦ୍ଧାର କାର୍ଯ୍ୟ ଜୋରଦାର କରାଯାଇଛି। ସେହିପରି ଉତ୍ତରାଖଣ୍ଡ ଏବଂ ହିମାଚଳ ପ୍ରଦେଶରେ ମଧ୍ୟ ପ୍ରବଳ ବର୍ଷା କାରଣରୁ ଭୂସ୍ଖଳନ ଘଟି ଯାତାୟାତରେ ବାଧା ସୃଷ୍ଟି ହୋଇଛି।

ଆଇଏମଡି (IMD) ର ଆଗାମୀ ସତର୍କ ସୂଚନା

ଭାରତୀୟ ପାଣିପାଗ ବିଭାଗର ତାଜା ସୂଚନା ଅନୁଯାୟୀ, ଆସନ୍ତା ୩ ରୁ ୪ ଦିନ ପର୍ଯ୍ୟନ୍ତ ଉତ୍ତର-ପଶ୍ଚିମ ଏବଂ କେନ୍ଦ୍ରୀୟ ଭାରତରେ ମୌସୁମୀ ସକ୍ରିୟ ରହିବ। ରାଜସ୍ଥାନ, ମଧ୍ୟପ୍ରଦେଶ, ପଞ୍ଜାବ ଏବଂ ହରିୟାଣାରେ ମଧ୍ୟ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ତେଣୁ ନଦୀକୂଳିଆ ଏବଂ ତଳିଆ ଅଞ୍ଚଳର ଲୋକମାନଙ୍କୁ ସତର୍କ ରହିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି।

କେତନ ଅଗ୍ରୱାଲ ହତ୍ୟା ମାମଲାରେ ପ୍ରତିଦିନ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ଏବେ ଏହି ହାଇ-ପ୍ରୋଫାଇଲ୍ ମର୍ଡର ମିଷ୍ଟ୍ରିରେ ଏକ ନୂଆ ମୋଡ଼ ଆସିଛି। ମୁଖ୍ୟ ଅଭିଯୁକ୍ତ ସିୟା ଗୋୟଲଙ୍କର ଏକ କଥିତ ସ୍ନାପଚାଟ୍ (Snapchat) ଚାଟ୍ ଭାଇରାଲ ହେବାରେ ଲାଗିଛି, ଯାହା ପୋଲିସର ତଦନ୍ତକୁ ଏକ ନୂଆ ଦିଗ ଦେଇଛି। ଏହି ଚାଟ୍‌ରେ ସିୟା ନିଜର ଜଣେ ସାଙ୍ଗକୁ ଆଧାର କାର୍ଡ ମାଗିଥିବା ବେଳେ ଏକ ଆଶ୍ଚର୍ଯ୍ୟଜନକ କଥା ମଧ୍ୟ ଉଲ୍ଲେଖ କରିଛନ୍ତି।

ସ୍ନାପଚାଟ୍ ଚାଟ୍ ଏବଂ ଆଧାର କାର୍ଡ ରହସ୍ୟ

ଭାଇରାଲ ହେଉଥିବା ସ୍ନାପଚାଟ୍ ମେସେଜ୍‌ରେ ସିୟା ନିଜ ସାଙ୍ଗକୁ ଲେଖିଛନ୍ତି ଯେ, "ଏମିତି ଏକ ବାହାଘର, ଯାହା କେବେ ହେବାର ନାହିଁ..."। ଏହା ସହିତ ସେ ତାଙ୍କ ସାଙ୍ଗର ଆଧାର କାର୍ଡର ଏକ କପି ମଧ୍ୟ ମାଗିଥିଲେ। ବର୍ତ୍ତମାନ ପୋଲିସ ଏହି 'ଆଧାର କାର୍ଡ ରହସ୍ୟ'ର ଖୋଳତାଡ଼ କରୁଛି। ହତ୍ୟାକାଣ୍ଡ ପୂର୍ବରୁ ସିୟା କାହିଁକି ଅନ୍ୟ ଜଣଙ୍କ ଆଧାର କାର୍ଡ ମାଗିଥିଲେ? କୌଣସି ହୋଟେଲ୍ ବୁକିଂ, ନକଲି ସିମ୍ କାର୍ଡ କିଣିବା ନା ହତ୍ୟା ଷଡ଼ଯନ୍ତ୍ରର ଅନ୍ୟ କୌଣସି ଅଂଶ ପାଇଁ ଏହାର ଆବଶ୍ୟକତା ଥିଲା, ତାହା ଉପରେ ପୋଲିସ ତଦନ୍ତ ଚଳାଇଛି।

ପଲିଗ୍ରାଫ୍ ଟେଷ୍ଟକୁ ମନା, ତୃତୀୟ ବ୍ୟକ୍ତିର ସନ୍ଦେହ

ଅନ୍ୟପକ୍ଷରେ କୋର୍ଟ ସିୟା ଗୋୟଲ ଏବଂ ତାଙ୍କ ପ୍ରେମିକ ତଥା ସହ-ଅଭିଯୁକ୍ତ ଚେତନ ଚୌଧୁରୀଙ୍କୁ ପୋଲିସ ରିମାଣ୍ଡରେ ପଠାଇବାକୁ ମନା କରିଦେଇଛନ୍ତି ଏବଂ ଉଭୟଙ୍କୁ ୧୪ ଦିନିଆ ବିଚାର ବିଭାଗୀୟ ହେପାଜତକୁ ପଠାଇ ଦିଆଯାଇଛି। ସବୁଠାରୁ ବଡ଼ କଥା ହେଉଛି, ଉଭୟ ଅଭିଯୁକ୍ତ ପଲିଗ୍ରାଫ୍ ଟେଷ୍ଟ (Polygraph Test) କରିବାକୁ ସିଧାସଳଖ ମନା କରିଦେଇଛନ୍ତି। ଏହା ପରେ ପୋଲିସ ଏହି ଘଟଣାରେ ଜଣେ ତୃତୀୟ ବ୍ୟକ୍ତିଙ୍କ ସମ୍ପୃକ୍ତି ଥିବା ସନ୍ଦେହ କରୁଛି।

ମିଛ ପ୍ରମାଣିତ ହେଲା ସିୟାଙ୍କ ଦାବି

ପୂର୍ବରୁ ସିୟା ପୋଲିସ ଆଗରେ ଦାବି କରିଥିଲେ ଯେ କେତନ ଅଗ୍ରୱାଲ ଖନେଇ ଖନେଇ କଥା କହୁଥିବାରୁ ସେ ତାଙ୍କୁ ବାହା ହେବାକୁ ଚାହୁଁନଥିଲେ। କିନ୍ତୁ ନିକଟରେ କେତନଙ୍କର ଏକ ଭିଡିଓ ସାମ୍ନାକୁ ଆସିଥିଲା, ଯେଉଁଥିରେ ସେ ସ୍ପଷ୍ଟ ଭାବରେ କଥା କହୁଥିବାର ଦେଖିବାକୁ ମିଳିଥିଲା। ଏହି ଭିଡିଓ ସିୟାଙ୍କ ମିଛକୁ ପଦାରେ ପକାଇ ଦେଇଥିଲା। ବର୍ତ୍ତମାନ ପୋଲିସ ଡିଜିଟାଲ୍ ପ୍ରମାଣ ଆଧାରରେ ମହାରାଷ୍ଟ୍ରର ଲୋହାଗଡ଼ ଦୁର୍ଗରେ ହୋଇଥିବା ଏହି ବର୍ବର ହତ୍ୟାକାଣ୍ଡର ପୂରା ଷଡ଼ଯନ୍ତ୍ର ଉନ୍ମୋଚନ କରିବାକୁ ପ୍ରୟାସ କରୁଛି।

ମହାରାଷ୍ଟ୍ରର ନାଗପୁରରୁ ଏକ ହୃଦୟ ବିଦାରକ ଅପରାଧ ସାମ୍ନାକୁ ଆସିଛି। ଏଠାରେ କୋର୍ଟରୁ ଛାଡ଼ପତ୍ର ମିଳିବାର ମାତ୍ର ଗୋଟିଏ ଦିନ ପରେ ଜଣେ ମହିଳାଙ୍କୁ ଅତି ନିର୍ମମ ଭାବେ ଧାରୁଆ ଅସ୍ତ୍ରରେ ହତ୍ୟା କରାଯାଇଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ପୋଲିସର ପ୍ରାଥମିକ ତଦନ୍ତରୁ ଏହି ହତ୍ୟାକାଣ୍ଡ ପଛରେ ପାରିବାରିକ ବିବାଦ ଥିବା ସନ୍ଦେହ କରାଯାଉଛି। ଘଟଣା ପରେ ମୃତ ମହିଳାଙ୍କ ସ୍ୱାମୀ ଫେରାର ଥିବାରୁ ପୋଲିସ ତାଙ୍କ ଉପରେ ସନ୍ଦେହ କରୁଛି।

ମୃତକଙ୍କ ପରିଚୟ ଏବଂ ଘଟଣାସ୍ଥଳ

ମିଳିଥିବା ସୂଚନା ଅନୁଯାୟୀ, ଏହି ହତ୍ୟାକାଣ୍ଡ ନାଗପୁର ସହରର କାମଠୀ ଅଞ୍ଚଳରେ ଘଟିଛି। ମୃତ ମହିଳାଙ୍କ ପରିଚୟ ୪୦ ବର୍ଷୀୟା ମଞ୍ଜୁ ରାଜକୁମାର ପାରସେ ଭାବେ ହୋଇଛି, ଯିଏକି ପୁଲଗାଓଁ ପାଚଖେଡ଼ର ବାସିନ୍ଦା ଥିଲେ। ଏହି ଘଟଣାଟି ଜୁନି କାମଠୀ ଥାନା ଅନ୍ତର୍ଗତ ହିରଣୱାର ଗଳି ସ୍ଥିତ ଶୁକ୍ରବାର ବଜାର ଦାରୋଗା ମସଜିଦ ନିକଟରେ ଘଟିଛି। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ମହିଳାଙ୍କ ଉପରେ କୌଣସି ଧାରୁଆ ଅସ୍ତ୍ରରେ ଏକାଧିକ ବାର ଆକ୍ରମଣ କରାଯାଇଥିଲା, ଯାହା ଫଳରେ ସେ ଗୁରୁତର ଆହତ ହୋଇ ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ।

ମଦ୍ୟପ ସ୍ୱାମୀ ଏବଂ ପାରିବାରିକ ବିବାଦ

ସୂତ୍ରରୁ ପ୍ରକାଶ ଯେ, ମୃତକ ଏବଂ ତାଙ୍କ ସ୍ୱାମୀ ରାଜକୁମାର ପାରସେଙ୍କ ମଧ୍ୟରେ ଦୀର୍ଘ ଦିନ ଧରି ପାରିବାରିକ ବିବାଦ ଲାଗି ରହିଥିଲା। ଅଭିଯୁକ୍ତ ସ୍ୱାମୀ ମଦ୍ୟପାନର ଶିକାର ଥିଲା ଏବଂ ଏହି କାରଣରୁ ଉଭୟଙ୍କ ମଧ୍ୟରେ ଅନେକ ସମୟରେ ଝଗଡ଼ା ହେଉଥିଲା। ଏହି ଅଶାନ୍ତି କାରଣରୁ ଘଟଣାର ଠିକ୍ ଗୋଟିଏ ଦିନ ପୂର୍ବରୁ ଉଭୟଙ୍କୁ କୋର୍ଟ ପକ୍ଷରୁ ଆନୁଷ୍ଠାନିକ ଭାବେ ଛାଡ଼ପତ୍ର ମିଳିଥିଲା। ତେବେ ଛାଡ଼ପତ୍ରର ଗୋଟିଏ ଦିନ ପରେ ହିଁ ଏଭଳି ଭୟଙ୍କର ପ୍ରତିଶୋଧମୂଳକ ଆକ୍ରମଣ କରାଯାଇଥିବା ସନ୍ଦେହ କରାଯାଉଛି।

ପୋଲିସର କାର୍ଯ୍ୟାନୁଷ୍ଠାନ

ଘଟଣା ସମ୍ପର୍କରେ ଖବର ପାଇବା ମାତ୍ରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି। ଘଟଣା ପରଠାରୁ ଅଭିଯୁକ୍ତ ସ୍ୱାମୀ ଫେରାର ଅଛି। ତାକୁ ଗିରଫ କରିବା ପାଇଁ ଜୁନି କାମଠୀ ପୋଲିସ ପକ୍ଷରୁ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି। ସିନିୟର ପୋଲିସ ଇନ୍ସପେକ୍ଟର ବିଜୟ ଦିଘେ କହିଛନ୍ତି ଯେ, ଏହି ମାମଲାର ସମସ୍ତ ଦିଗକୁ ପୋଲିସ ଗୁରୁତ୍ୱର ସହ ତଦନ୍ତ କରୁଛି ଏବଂ ଖୁବଶୀଘ୍ର ଅଭିଯୁକ୍ତକୁ ଗିରଫ କରାଯିବ।

ମହାରାଷ୍ଟ୍ର: ନିର୍ମାଣାଧୀନ ମନ୍ଦିରର ଛାତ ଭୁଶୁଡ଼ି ୭ ଶ୍ରଦ୍ଧାଳୁ ମୃତ । ମହାରାଷ୍ଟ୍ରର ପରଭାନୀ ଜିଲ୍ଲା ଅନ୍ତର୍ଗତ ମାନବତ ତାଲୁକାର ୟଶୱାଡିରେ ଥିବା ଏକ ମନ୍ଦିରରେ ଏପରି ବଡ଼ ଧରଣର ଅଘଟଣ ଘଟିଛି। ଶନିବାର ଅପରାହ୍ନରେ ଏକ ନିର୍ମାଣାଧୀନ ମନ୍ଦିରର ଛାତ ଭୁଶୁଡ଼ିପଡ଼ିବାରୁ ୭ ଜଣ ଶ୍ରଦ୍ଧାଳୁଙ୍କର ମୃତ୍ୟୁ ଘଟିଥିବା ସୂଚନା ମିଳିଛି । ତେବେ ୩୦ରୁ ୪୦ ଜଣ ଶ୍ରଦ୍ଧାଳୁ ଚାପିହୋଇଥିବା ଆଶଙ୍କା କରାଯାଉଛି । ଆଗକୁ ମୃତକଙ୍କ ସଂଖ୍ୟା ବଢିବାରେ ବୋଲି ଅନୁମାନ କରାଯାଉଛି । ଯୁଦ୍ଧକାଳୀନ ସ୍ତରରେ ଉଦ୍ଧାରକାର୍ଯ୍ୟ କରାଯାଉଛି । ଫସିଥିବା ଲୋକଙ୍କୁ ଉଦ୍ଧାର କରିବା ପାଇଁ ସମସ୍ତ ଚେଷ୍ଟା କରାଯାଉଛି । ଆହତଙ୍କୁ ହସପିଟାଲରେ ପହଞ୍ଚାଇବା ପାଇଁ ବ୍ୟବସ୍ଥା କରାଯାଉଛି । ଏକ ଧାର୍ମିକ କାର୍ଯ୍ୟକ୍ରମ ଚାଲିଥିବା ସମୟରେ ଏହି ଦୁର୍ଘଟଣା ଘଟିଥିବା ଜଣାପଡିଛି । 

ସାମାଜିକ ଗଣମାଧ୍ୟମରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିବା କକରୋଚ୍ ଜନତା ପାର୍ଟି (CJP) ର ପ୍ରତିଷ୍ଠାତା ଅଭିଜୀତ ଦିପକେ ଆସନ୍ତା ୬ ଜୁନ୍ ରେ ନୂଆଦିଲ୍ଲୀରେ ବିଶାଳ ପ୍ରତିବାଦ କରିବାକୁ ଯାଉଛନ୍ତି। ଏହି ଆନ୍ଦୋଳନ ପୂର୍ବରୁ ତାଙ୍କ ପରିବାର ଲୋକେ ମହାରାଷ୍ଟ୍ରର ଛତ୍ରପତି ସମ୍ଭାଜୀନଗର ସ୍ଥିତ ନିଜ ବାସଭବନ ଛାଡ଼ି ଏକ ଅଜ୍ଞାତ ସ୍ଥାନକୁ ଚାଲିଯାଇଛନ୍ତି। ତାଙ୍କର ଆଗାମୀ ରାଜନୈତିକ ଏବଂ ପ୍ରତିବାଦମୂଳକ ପଦକ୍ଷେପକୁ ନେଇ ପରିବାର ସଦସ୍ୟଙ୍କ ମଧ୍ୟରେ ସୁରକ୍ଷା ଜନିତ ଚିନ୍ତା ବଢ଼ିବାରେ ଲାଗିଛି।

ପରିବାରର ସୁରକ୍ଷା ଚିନ୍ତା ଓ ସ୍ଥାନାନ୍ତର

ଅଭିଜୀତଙ୍କ ବାପା ତଥା ମହାରାଷ୍ଟ୍ର ଶିଳ୍ପ ଉନ୍ନୟନ ନିଗମ (MIDC) ର ଅବସରପ୍ରାପ୍ତ ଇଞ୍ଜିନିୟର ଭଗବାନରାଓ ଦିପକେ କହିଛନ୍ତି ଯେ, ଜଣେ ବାପା ହିସାବରେ ପୁଅର ସୁରକ୍ଷାକୁ ନେଇ ତାଙ୍କର ଚିନ୍ତା ସ୍ୱାଭାବିକ। ଯଦିଓ ପରିବାରକୁ ଏପର୍ଯ୍ୟନ୍ତ କୌଣସି ସିଧାସଳଖ ଧମକ ମିଳିନାହିଁ, ତଥାପି ସତର୍କତାମୂଳକ ପଦକ୍ଷେପ ସ୍ୱରୂପ ସେମାନେ ୱାଲୁଜ୍ ଏମ୍ଆଇଡିସି ଅଞ୍ଚଳରେ ଥିବା ନିଜ ଘର ଛାଡ଼ି ଅନ୍ୟତ୍ର ରହିବାକୁ ନିଷ୍ପତ୍ତି ନେଇଛନ୍ତି। ପୂର୍ବରୁ ଅଭିଜୀତଙ୍କ ଘର ବାହାରେ ପୋଲିସ ମୁତୟନ କରାଯାଇଥିଲା, ଯାହାଫଳରେ ସେଠାରେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ନହୁଏ। ବର୍ତ୍ତମାନ ଉକ୍ତ ଘରଟି ସମ୍ପୂର୍ଣ୍ଣ ଖାଲି ପଡ଼ିଛି।

୬ ଜୁନରେ ଦିଲ୍ଲୀର ଯନ୍ତରମନ୍ତରଠାରେ ବିଶାଳ ପ୍ରଦର୍ଶନ

ଆମେରିକାର ବୋଷ୍ଟନ୍ ଠାରେ ରହୁଥିବା ୩୦ ବର୍ଷୀୟ ଅଭିଜୀତ ଦିପକେ ନିକଟରେ ଘୋଷଣା କରିଛନ୍ତି ଯେ, ଶିକ୍ଷା ବ୍ୟବସ୍ଥାରେ ବ୍ୟାପକ ବିଫଳତା, ବିଶେଷକରି ନ୍ୟାସନାଲ୍ ଏଲିଜିବିଲିଟି କମ୍ ଏଣ୍ଟ୍ରାନ୍ସ ଟେଷ୍ଟ ବା ନିଟ୍ (NEET) ପରୀକ୍ଷା ପ୍ରଶ୍ନପତ୍ର ଲିକ୍ ବିବାଦକୁ ନେଇ ସେ ଏକ ଶାନ୍ତିପୂର୍ଣ୍ଣ ପ୍ରତିବାଦ କରିବେ। ଆସନ୍ତା ୬ ଜୁନ୍ ରେ ସେ ଭାରତ ଫେରିବା ସହ ଦିଲ୍ଲୀର ଯନ୍ତରମନ୍ତର ଠାରେ ଧାରଣା ଦେବେ। ଏହି ଆନ୍ଦୋଳନ ଜରିଆରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଙ୍କ ଇସ୍ତଫା ଦାବି କରାଯିବ ବୋଲି ସେ ସ୍ପଷ୍ଟ କରିଛନ୍ତି।

ଆଇନଗତ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତ ଅଭିଜୀତ

ଦିଲ୍ଲୀ ବିମାନବନ୍ଦରରେ ଓହ୍ଲାଇବା ମାତ୍ରେ ଗିରଫ ହେବାର ଆଶଙ୍କା ଥିଲେ ମଧ୍ୟ ଅଭିଜୀତ ନିଜ ଜିଦରେ ଅଟଳ ଅଛନ୍ତି। ମାନବାଧିକାର କର୍ମୀ ତଥା ଆଇନଜୀବୀ ଅସୀମ ସରୋଦେ ଙ୍କ ସୂଚନା ଅନୁଯାୟୀ, ଅଭିଜୀତ ଗିରଫଦାରୀ ପାଇଁ ପ୍ରସ୍ତୁତ ଅଛନ୍ତି। ତାଙ୍କ ମତରେ ଏହି ସମସ୍ୟା କେବଳ ପରୀକ୍ଷା ଦେଇଥିବା ୩୦ ଲକ୍ଷ ଛାତ୍ରଛାତ୍ରୀଙ୍କର ନୁହେଁ, ବରଂ ସେମାନଙ୍କ ପିତାମାତାଙ୍କୁ ମିଶାଇ ପ୍ରାୟ ୭୦ ରୁ ୮୦ ଲକ୍ଷ ଲୋକଙ୍କ ସହ ଜଡ଼ିତ। ଏହି ଆନ୍ଦୋଳନକୁ ପରିବେଶବିତ୍ ତଥା ଶିକ୍ଷାବିତ୍ ସୋନମ ୱାଙ୍ଗଚୁକ୍ ଙ୍କ ଭଳି ବ୍ୟକ୍ତିବିଶେଷ ମଧ୍ୟ ସମର୍ଥନ ଜଣାଇଛନ୍ତି। ଆଗାମୀ ଦିନରେ ଏହି ଡିଜିଟାଲ୍ ଆନ୍ଦୋଳନ ରାସ୍ତା ଉପରେ କିଭଳି ପ୍ରଭାବ ପକାଉଛି, ତାହା ଦେଖିବା ବାକି ରହିଲା।

ମହାରାଷ୍ଟ୍ର: ମହାରାଷ୍ଟ୍ରର ପୁଣେ ଏବଂ ପିମ୍ପରି-ଚିଞ୍ଚୱାଡ ଅଞ୍ଚଳରେ ବିଷାକ୍ତ ମଦ ପିଇ ୧୫ଜଣଙ୍କ ଜୀବନ ଚାଲିଯାଇଛି ।   ଏହାସହିତ ଅନେକ ଲୋକଙ୍କ ଅବସ୍ଥା ଗୁରୁତର ମଧ୍ୟ ରହିଛି। ରିପୋର୍ଟ ଅନୁଯାୟୀ, ବିଷାକ୍ତ ମଦ ପିଇ ପିମ୍ପରି-ଚିଞ୍ଚୱାଡର ଦାପୋଡି ଏବଂ ଫୁଗେୱାଡି ଅଞ୍ଚଳରେ ୮ ଜଣଙ୍କର ମୃତ୍ୟୁ ହୋଇଛି। ସେହିପରି ପୁଣେର କାଲେ ପଡଲ ଅଞ୍ଚଳରେ ୩ ଜଣ ଏବଂ ହଡପସର ଅଞ୍ଚଳରେ ୨ ଜଣ ପ୍ରାଣ ହରାଇଛନ୍ତି। ବିଷାକ୍ତ ମଦ ପିଇବା ପରେ ଲୋକଙ୍କ ସ୍ୱାସ୍ଥ୍ୟାବସ୍ଥା ଅଚାନକ ବିଗିଡ଼ିବାକୁ ଲାଗିଥିଲା ଏବଂ କେତେକଙ୍କ ପାଟିରୁ ଫେଣ ବାହାରିଥିବା ଦେଖିବାକୁ ମିଳିଥିଲା।

ଘଟଣା ପରେ ପୋଲିସ ତଦନ୍ତକୁ ଜୋରଦାର କରିଛି ଏବଂ ମୁଖ୍ୟ ଅଭିଯୁକ୍ତ ଯୋଗେଶ ୱାଙ୍ଖଡେକୁ ଗିରଫ କରିଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ, ବେଆଇନ ମଦ ବେପାରରେ ସମ୍ପୃକ୍ତ ଥିବା ଏହି ଅଭିଯୁକ୍ତ ହିଁ ସ୍ପିରିଟ୍ ମିଶ୍ରିତ ବିଷାକ୍ତ ମଦ ପ୍ରସ୍ତୁତ କରିଥିଲା। ପୋଲିସର ସୂଚନା ଅନୁଯାୟୀ, ଅଭିଯୁକ୍ତ ଯୋଗେଶ ୱାଙ୍ଖଡେ ନାମରେ ପୂର୍ବରୁ ମଧ୍ୟ ଏକାଧିକ ଅପରାଧିକ ମାମଲା ରହିଛି। ବର୍ତ୍ତମାନ ପୋଲିସ ଏହି ଘଟଣାର ଅଧିକ ଖୋଳତାଡ଼ କରୁଛି।

ମହାରାଷ୍ଟ୍ର: ବାଘ ଆକ୍ରମଣରେ ୪ ମହିଳା ମୃତ । କେନ୍ଦୁପତ୍ର ସଂଗ୍ରହ ପାଇଁ ଜଙ୍ଗଲକୁ ଯାଇଥିବା ବେଳେ ଆକ୍ରମଣ କଲା ବାଘ । ମହାରାଷ୍ଟ୍ରର ଚନ୍ଦ୍ରପୁର ଜିଲ୍ଲାରେ ଜଙ୍ଗଲକୁ କେନ୍ଦୁ ପତ୍ର ସଂଗ୍ରହ କରିବାକୁ ଯାଇଥିବା ୪ ଜଣ ମହିଳାଙ୍କୁ ଗୋଟିଏ ବାଘ ଆକ୍ରମଣ କରି ମାରିଦେଇଥିବା ନେଇ ବନ ବିଭାଗ ଅଧିକାରୀ ସୂଚନା ଦେଇଛନ୍ତି। ବାଘ ଆତଙ୍କ ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।

ଏହି ଆକ୍ରମଣ ଜିଲ୍ଲା ମୁଖ୍ୟାଳୟଠାରୁ ପ୍ରାୟ ୭୦ କିଲୋମିଟର ଦୂର ସିନ୍ଦେୱାହି ତହସିଲ ଅନ୍ତର୍ଗତ ଗୁଞ୍ଜେୱାହି ଗ୍ରାମ ନିକଟସ୍ଥ ଜଙ୍ଗଲରେ ଘଟିଛି। ସୂଚନା ଅନୁଯାୟୀ, କିଛି ମହିଳା ବିଡ଼ି ତିଆରି ପାଇଁ ବ୍ୟବହୃତ ହେଉଥିବା କେନ୍ଦୁ ପତ୍ର ତୋଳିବାକୁ ଏକ ଜଙ୍ଗଲିଆ ଅଞ୍ଚଳକୁ ଯାଇଥିଲେ। ସେମାନେ ପତ୍ର ସଂଗ୍ରହରେ ବ୍ୟସ୍ତ ଥିବା ବେଳେ ହଠାତ୍ ଏକ ବାଘ ସେମାନଙ୍କ ଉପରେ ଆକ୍ରମଣ କରିଥିଲା। ଏହି ଭୟଙ୍କର ଆକ୍ରମଣରେ ୪ ଜଣ ମହିଳାଙ୍କର ମୃତ୍ୟୁ ହୋଇଛି।

ମୃତ ମହିଳାମାନେ ହେଲେ କୱାଡାବାଇ ମୋହୁର୍ଲେ (୪୫), ଅନିତାବାଇ ମୋହୁର୍ଲେ (୪୦), ସୁନିତା ମୋହୁର୍ଲେ (୩୮) ଏବଂ ସଂଗୀତା ଚୌଧୁରୀ (୫୦)। ଏହି ସମସ୍ତ ମୃତକ ଗୁଞ୍ଜେୱାହି ଗ୍ରାମର ବାସିନ୍ଦା ବୋଲି ଜଣାପଡିଛି। ତେବେ ବାଘଟି ଏହି ଚାରି ଜଣଙ୍କୁ ଗୋଟିଏ ସ୍ଥାନରେ ଏକାସାଙ୍ଗରେ ଆକ୍ରମଣ କରିଛି ନା ଅଲଗା ଅଲଗା ସ୍ଥାନରେ ଶିକାର କରିଛି, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରି ନାହିଁ।

ଖବର ପାଇବା ମାତ୍ରେ ବନ ବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚିଛି। ଚନ୍ଦ୍ରପୁର ସର୍କଲର ମୁଖ୍ୟ ବନ ସଂରକ୍ଷକ ଆର. ଏମ୍. ରାମାନୁଜମ୍ କହିଛନ୍ତି ଯେ ଅଧିକାରୀମାନେ ତଦନ୍ତ ଆରମ୍ଭ କରିଛନ୍ତି ଏବଂ 'ପଞ୍ଚନାମା' ଶେଷ ହେବା ପରେ ଏହି ଘଟଣା ସମ୍ପର୍କରେ ଅଧିକ ତଥ୍ୟ ସାମ୍ନାକୁ ଆସିବ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିବା ବେଳେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି।

ମହାରାଷ୍ଟ୍ରର ବାରାମତୀ ଅଞ୍ଚଳରେ ଏକ ବିମାନ ଦୁର୍ଘଟଣା ଘଟିଛି। ବୁଧବାର ସକାଳେ ଏକ ଦୁଇ ସିଟ୍ ବିଶିଷ୍ଟ ଟ୍ରେନିଂ ବିମାନ ଦୁର୍ଘଟଣାଗ୍ରସ୍ତ ହୋଇଛି। ମିଳିଥିବା ସୂଚନା ଅନୁଯାୟୀ, ଏହି ବିମାନଟି ରେଡବର୍ଡ ଏଭିଏସନ୍ କମ୍ପାନୀ ଦ୍ୱାରା ପରିଚାଳିତ ହେଉଥିଲା। ସୌଭାଗ୍ୟବଶତଃ ଏହି ଘଟଣାରେ ବିମାନରେ ଥିବା ଟ୍ରେନି ପାଇଲଟ୍ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି।

କେମିତି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ତାଲିମ ଉଡ଼ାଣ ସମୟରେ ବିମାନଟିରେ ହଠାତ୍ କିଛି ଯାନ୍ତ୍ରିକ ତ୍ରୁଟି ଦେଖାଦେଇଥିଲା। ଏହାଫଳରେ ବିମାନଟି ନିୟନ୍ତ୍ରଣ ହରାଇ ବାରାମତୀର ଗୋଜୁବାଭି ଗ୍ରାମ ନିକଟରେ କଚାଡ଼ି ହୋଇପଡ଼ିଥିଲା। ତେବେ ବିମାନଟି ଦୁର୍ଘଟଣାଗ୍ରସ୍ତ ହେବା ପୂର୍ବରୁ ପାଇଲଟ୍ ସୁରକ୍ଷିତ ଭାବେ ବାହାରି ଆସିବାରେ ସଫଳ ହୋଇଥିଲେ। ଘଟଣା ସମ୍ପର୍କରେ ଖବର ପାଇବା ମାତ୍ରେ ସ୍ଥାନୀୟ ପ୍ରଶାସନ ଏବଂ ପୋଲିସ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଦୁର୍ଘଟଣାର ପ୍ରକୃତ କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନଥିବା ବେଳେ ଏହାର ତଦନ୍ତ ଜାରି ରହିଛି।

ପୂର୍ବରୁ ମଧ୍ୟ ଘଟିଛି ବଡ଼ ଦୁର୍ଘଟଣା

ସୂଚନାଯୋଗ୍ୟ ଯେ, ଗତ କିଛି ମାସ ତଳେ ବାରାମତୀରେ ଏକ ମର୍ମନ୍ତୁଦ ବିମାନ ଦୁର୍ଘଟଣା ଘଟିଥିଲା। ଜାନୁଆରୀ ୨୮, ୨୦୨୬ ରେ ଘଟିଥିବା ସେହି ଘଟଣାରେ ମହାରାଷ୍ଟ୍ରର ତତ୍କାଳୀନ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ମୋଟ ୫ ଜଣଙ୍କର ମୃତ୍ୟୁ ହୋଇଥିଲା। ଏହି ବଡ଼ ଦୁର୍ଘଟଣାର କିଛି ମାସ ପରେ ପୁଣି ଏକ ଟ୍ରେନିଂ ବିମାନ କୋସଳିବା ଘଟଣା ସ୍ଥାନୀୟ ଅଞ୍ଚଳରେ ଆତଙ୍କ ଖେଳାଇ ଦେଇଛି। ବାରମ୍ବାର ଏଭଳି ଘଟଣା ସାମ୍ନାକୁ ଆସିବା ପରେ ବାରାମତୀ ଏୟାରଷ୍ଟ୍ରିପ୍‌ର ସୁରକ୍ଷା ବ୍ୟବସ୍ଥା ଏବଂ ନିୟନ୍ତ୍ରଣ ପ୍ରଣାଳୀକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।